1-2. (a) Yesus manwawan rikyor ḇyeskoya skosmai parenta fa skofrur rosai, ma rosai skofrur ya? (b) Rosai nari kawos ro farkarkor ineni?

RAS ḆEBA Munara Paskah taun 32 M imnai kwar, Manwawan Petrus, Yakobus, ma Yohanes skomam fasasnai ḇeba oso. Ro bon ḇekaki, imbude Bon Hermon, skomam Yesus i. ”Ḇarpon ḇyedi isnai imnis ori ma sansun ḇyena napioper karḇas imnis isnai.” (Mat. 17:1-4) Skomam ramnai, skomnaf Allah doḇe, ”Ine Rumkun yaswar kakurirya, faro I sneri imarisen, iḇye mkomnaf I.” (Mat. 17:5) Inja fafisu ani, manwawan rikyor sfasnai roro kenem skoḇena snar skomnaf Yesus i. Koḇe kosofarari nyan ḇepyum sena ine.

² Ro farkarkor ḇepon ya, kofarkor kwar snar infa komnaf Yesus kmaren ḇyena, fandun fa komnai kofrur roi ḇeḇeso. Kirine, ro farkarkor ine, nari kawos roi risuru fandun fa kofrur ya.

3. Imnis anun ḇero Matius 7:13, 14, rosai na kofrur kaku ya?

³ Wasya Matius 7:13, 14. Yesus ikofen nyan risuru monda, isoine ”nyan ḇemkei” ma ”nyan ḇemkei ḇa”. Mboi nyan ḇekyor no ḇa. Inja koiso ḇekinfir nyan risaiso imbe kombran rona. Inema snemuk ḇefandun kaku kofrur na, snar snemuk kofrur ine iso na ḇefasnai nari kokenem fyoro ke roḇa.

4. ”Nyan ḇemkei” ani imnis rariso?

⁴ Fandun fa koswarepen nyan risuru Yesus ikofen ine. Snonggaku ḇebor sya skinfir nyan ḇemkei kukro napyan  fa simbran rona. Skinfir fa sroro nyan ani monda ma siso snonggaku ḇembran ro diwa sya. Faḇye kaku, sfawi ḇa ḇo Setan manggundiso ḇemarisen simbran ro diani, ma nyan ani ḇeyun ḇe marmar ya.​—1 Kor. 6:9, 10; 1 Yoh. 5:19.

5. Rariso Yesus manfamyan ḇyansya sisrow ”nyan ḇemkei ḇa” ma simbran ro dia?

⁵ Nyan oser ya wer iso nyan ḇemkei ḇa, ma Yesus doḇe na kermgun monda ḇesrow na. Rosai ḇefnai ya? Snar imnis Yesus danun ro mnuk ḇeuser ya, nabi ḇekakuḇa sibor sawninyan snonggaku sya. (Mat. 7:15) Imnis sikofen na, kirine agama ḇebor nasya, ma ḇebor ro si soḇo sbuk farkarkor napnapes. Roi ine ifnai ḇo, snonggaku yuta ḇebor sya sikmome ma sḇaḇir snar agama ono ḇa ḇekaku. Mbarya, simewer sisewar fa sisrow nyan ḇeyun ḇe kankenem ya. Ḇape kakuya, nyan ani bisa sisrow na. Yesus doḇe, ”Kaku ḇeri rofyor mkokin nako wos ayena, rarirya mkoḇe manfamyan kaku ḇe aya ma nari mkofawi napnapesya ma napnapesya nari ḇyuk ḇaḇemkei faro mko.” (Yoh. 8:31, 32) Auma Yesus manfamyan ḇyedi, inja na wakso snonggaku ḇebor sya ḇa. Ḇape, ḇesewar fa wasrow kakaku ya. Wafarkor Allah Wos Ḇyena kuker sne ḇesiper ma swewar rosai Allah imarisen ro koni. Na wamnaf kako Yesus farkarkor ḇyena. Imnis ra, kofarkor snar Yahwe imarisen insa kopampum farkarkor agama ḇekakuḇa ma koso awero munara-munara ḇeramuma ro agama ḇekaku ḇa na. Wafarkor kako snar imbude wafrur fararwe fa wafrur Yahwe imarisen ima napyan ḇa. (Mat. 10:34-36) Imbude ine iso wakḇaḇir ya. Rariryano, wasusu awer, snar waswar Kma koḇedi ro nanggi ma imbe wafrur imarisen. Inja Yahwe na imarisen kaku myam sasewar Bena!​—Ams. 27:11.

6. Ro Mazmur 119:9, 10, 45, 133 ya, rosai ḇefnoḇek ko fa kosya pdef ro nyan ḇeyun ḇe kankenem ya?

⁶ Fafisu kombran ro nyan ḇemkei ḇa ine kwar, rosai na ḇefnoḇek ko pdef ro nyan ani? Kwarapan sarḇer ḇeuser ine: Rofyor kun oto ro sampak ḇemkei ḇa ro moḇ ḇeḇeurek bon na, inoido komam srir pagar ḇedwarek ro sampak andir na. Na kokofen ḇa pagar ani nafrur kofrar kuker mkei ḇa. Inja, Yahwe farkankin Ḇyena ro Refo imnis ra pagar srir fa ḇedwarek nyan ani. Yahwe byuk farkarkin ani insamaido kosya pdef ro nyan ḇeyun ḇe kankenem ya.​—Wasya Mazmur 119:9, 10, 45, 133.

7. Rosai na romawa babo sya siswarepen ḇekur nyan ḇemkei ḇa?

⁷ Roma babo mgoya, fyorno ido mgoḇaḇir Yahwe farkankin Ḇyena nadwarek manggenem mgo ke? Setan imarisen mgokara rarirya. Syewar fa ifrur mgomarisen fa mgoso snonggaku ḇembran ro nyan ḇemkei ya snar kenem sena rya nafrur marisen. Imarisen mgokara snar na mgofafko fyor mgoso ḇa rosai bati mgoḇesi ro rumfarkor sifrur na ḇaido rosai mgomam ro Internet na. Setan ifrur insa kokara ḇo koḇo Yahwe farkankin Ḇyena nafrur kosmai marasrisen ro kenem koḇena ḇa. * Ḇape waswarepen, Setan ikofenḇair ḇe snonggaku  ḇembran ro nyan ḇemkei ansya ḇa snar nyan ani dun ḇe marmari. Ḇape, Yahwe iḇese kuker Setan i, Yahwe ima ikofenbos snar mgoma na mgosmai kankenem ḇepyum ro ras ḇarpon iyama fyor mgosya ro nyan ḇeyun ḇe kankenem ya.​—Mz. 37:29; Yes. 35:5, 6; 65:21-23.

8. Rosai na kofarkor ro roma babo sya imnis Olaf fawar ḇyedi?

⁸ Bisa mgofarkor ro naek babo oso ḇenir Olaf fawar ḇyedi. * Bati ḇero rumfarkor ḇyesi sidafdifer ker i fa ifrur fararur farḇuk ya. Mboi ikofenḇair ḇe si ima Saksi Yahwe rirya, inja imewer ifrur fararur farḇuk fyor fyakawin ḇaim snar iso farkankin ro Refo ya. Ḇape fafisu srower roi ikofena mura, bati eḇe bin sine sembuk kaku i fa denefus si. Rariryano, Olaf ryower si ḇa, mḇoi ḇyesewar kaku fa ifrur roi ḇenapes. Guru ḇyansya sidif Olaf i kako. Doḇo, ”Guru ayesya sisewar fa sifrur yakyar snar yaḇekuliah insama snonggaku sya smam kyof awer aya. Soḇo yaḇekuliah ḇa ido na yakḇeamber  ḇa.” Rosai ḇefnoḇek Olaf i fa pyampum dafdifer ro rumfarkor na? Ikofen radine, ”Yaḇebati kuker naek srar ro sidang sya. Sima simnis ra karyer ayesi. Yafarkor Refo ine kuker kakaku wer. Fafisu yafarkor nabor ker na ido, nafrur yakyar snar inema kakaku rirya. Mura, nafrur fa yaḇebaptis.”

9. Insamaido kosya pdef ro nyan ḇemkei ḇa rosai na kofrur kaku ya?

⁹ Setan imarisen kobur nyan ḇeyun ḇe kankenem ya. Imarisen koso snonggaku ḇebor ḇesya ro nyan ḇemkei ḇeyun ḇe marmari. (Mat. 7:13) Insa kosya pdef ro nyan ḇemkei ḇa, fandun fa komnaf Yesus i ḇesya kwar. Koswarepen kako snar na kokenem pyum fyor kosya ro nyan ani pdef. Kirine, mgorama kawos Yesus anun ḇyena ḇeuser ine.

10. Raris Yesus anun ḇyena ḇero Matius 5:23, 24 ya, rosai na kofrur ḇepon resari?

¹⁰ Wasya Matius 5:23, 24. Ro mnuk anane, Yesus dap roi oso ḇefandun kaku faro snonggaku Yahudi ḇemnaf i sya, isoine faro sḇuk farsarser ya. Kwarapan kada fafisu ḇyena: Snonggaku Yahudi oso ryama ḇe bait, ma fyasos kwar fa byuk aiwan farsarser oso faro imam. Ḇape, fafisu kyara smai naek ḇyedi isya imsori, fandun fa kyaḇer ma ryir farsarser ani resari. Rosai ḇefnai ya? Rosai ḇefandun syadi ro farsarser faro Yahwe? Yesus ikofenbos radine, ”Rwa bedasi ḇepon kuker naek bedi resari.”

11. Fawar pan rosai Yakub ifrur na fa ḇyedame kuker Esau i.

¹¹ Na kofarkor ro Yakub moḇ ḇyedasi ḇaido ḇyedame rai. Ibur mnu marin ḇyedi kwar ro swaf taun ri 20. Ramnai, Yahwe iwan malaikat oso fa ikofen ḇe Yakub fa ibur ḇe diwa. (Kej. 31:11, 13, 38) Ḇape samswen ya iso, eba ḇyani Esau i imbe myuni. (Kej. 27:41) Inja, Yakub ”imgak kaku ma ḇyeḇirḇar”. (Kej. 32:7) Inja rosai Yakub ifrur ya insama ḇyedame kuker ḇebari? Ḇepon ya, ḇyenadi kaku faro Yahwe I. Ramnai, fyarem hadiah nabor kaku ḇe Esau i. (Kej. 32:9-15) Ro fafisu susrow yae su anya, Yakub byansuba ro ḇarpon Esau i, rarwan ri oser ḇaido suru monda ḇa, mboi byansuba rarwan rifik! Snar Yakub imbe ryun manggundi ma ḇyesyowi Esau i, inja bisa ḇyedame kuker eba ḇyani.​—Kej. 33:3, 4.

12. Rosai kofarkor ro Yakub nyan ḇepyum ḇyena ine?

¹² Na kosmai farkarkor ḇefandun kaku ro rosai Yakub ifrur nane fyor isrow ḇaim kuker ḇebari ma rari fyasnai na fyor susrow yae su. Yakub kuker sne ḇerun dor fafnoḇek ro Yahwe, ramnai ifrur imnis roi ḇyenadi ya. Ifrur roi ḇeḇeso bisa ḇefrur eba ḇyedi imarisen ḇyedame kukeri. Rofyor susrow su anya, Yakub ryama fa isewar mansei ḇekaku ma ḇesasar ya ḇa. Aroḇa, ḇoi Yakub imbe ḇyedame kuker eba ḇyedi iso ḇefandun ya. Moḇsa na kaksofarari Yakub nyan ḇepyum ḇyena rai?

13-14. Kofrur min koḇesya simsor ido, rosai na kofrur kaku ya?

¹³ Insa kosya pdef ro nyan ḇeyun ḇe kankenem, fandun fa kokain pyum kuker naek srar koḇesya ḇaido komarisen koḇedame kuker si. (Rm. 12:18) Kofrur min Kristen oso imsor ido, rosai nari kofrur ya? Imnis Yakub i, fandun fa koḇenadi  sambraḇ ḇe Yahwe I. Kor Yahwe ifnoḇek ko fa koḇedame kuker naek srar koḇesya.

¹⁴ Ko kako fandun fa komam manggun ko. Kwara pan kada: ’Yamarisen yasawen kakara aya iso ḇekaku ya, ma yara yor maf kuker sne ḇesiper, ma yaḇesewar fa yaḇedame kuker i ke? Rariso Yahwe ma Yesus sneḇaḇir suḇena fyor yaḇesewar ḇepon fa yaḇedame kuker min yedi?’ Kuker kokarauser fakfuken ḇeradine, bisa nadif ko fa koḇedame kuker naek srar koḇesi, raris moḇ Yesus imarisen na. Rariso kosofarari Yakub nyan ḇyena ro roi anine?

15. Ro Efesus 4:2, 3 ya, rariso rari koḇena fyor koḇesewar fa koḇedame kuker naek srar koḇesya?

¹⁵ Kwara pan kada rosai na ḇejadi fyor Yakub kyara iso ḇekaku ya fyor isrow kuker Esau i. Imbude na suḇedame ḇa. Inja rofyor kosrow kuker naek koḇedi ma koḇedame kuker i, kofanduno sne ḇerun. (Wasya Efesus 4:2, 3.) Amsal 18:19 ikofen ḇo doḇe, ”Naek ḇesanekar syamswen syadi fa sikafyo i syadibur kota ḇena ayar karui, ma rakrok nasya imnis asyopder ḇero kedwa ḇeba ro ayar karui oso.” Ḇape, kor maf kuker sne ḇesiper bisa nafrur ”asyopder” ani ikbase.

16. Rofyor koḇedame kuker naek srar koḇesi, rosai na koswarepen ya, ma rosai ḇefnai ya?

¹⁶ Fafisu kawos ḇaim kuker naek ḇemsor ani, fandun fa kokara pyumo rosai nari imbe kawos na ma moḇsa kawos na rai. Rofyor kawos kukeri, koswarepen snar fandun koḇena iso insa kofrur sneri iduf wer ḇa. Imbude randakya na ikofen roi ḇefrur marisen ḇa fyor korower na ḇaido imbude doḇo byuk sasar ḇe ko. Ine bisa nafrur fa komsor ḇo koḇe koiso ḇekaku ya. Ḇape kofrur rarirya ido, na sasewar koḇena fa koḇedame ine nun bon ḇepyum ke? Na oroḇa. Koswarepen snar koḇedame kuker naek srar koḇesya nefandun syadiburo imbe kosewar mansei ḇekaku ma ḇesasar ya.​—1 Kor. 6:7.

17. Rosai wafarkor ro Gilbert fawar ḇyena ine?

¹⁷ Mgomam fawar ro naek ḇenir Gilbert, ḇyesewar fa ifrur roi ḇeyun dame. Fyawar ḇo doḇe, ”Ḇepondima, aya kuker inai yeja nukain kuker payamyum ḇa. Swaf taun di suru syadi, yaḇesewar yawos pyum kuker i insa nurakrok ḇa.” Rosai Gilbert ifrur ya? ”Yawos kuker i ḇaim,  yaḇenadi ma yafasos sne yedi insa yamsor ḇa fyor dawos roi ḇefrur sneri duf. Fandun fa yabuk maf ḇe i. Ayano yasewar fa aya iso ḇekakuya ḇa, ma yafawi fandun fa yafrur kina yeja nggokain kuker payamyum.” Payamyum rosai skosmai na? Gilbert doḇe, ”Yamarisen snar ro kirine yakain pyum kuker kina ayesya kam.”

18-19. Kofrur snonggaku oso imsor ido, rosai na kofrur ya, ma rosai ḇefnai ya?

¹⁸ Inja, farkarkor rosai kun na? Wafrur min Kristen bedi oso imsor ido, waso Yesus anun ḇyena fa ḇedame. Benadi faro Yahwe, ma wor fanfnoḇek rur ḇesren Ḇyedi insa wafrur roi ḇeyun dame. Payamyum ḇyena iso nari wasmai aski ḇeba, ma nari fasnaiḇair snar auma wamnaf Yesus i.​—Mat. 5:9.

¹⁹ Kokofen kasumasa nabor naba snar Yahwe kuker sawarwar byuk akurfasnai ḇe ko roro Yesus Kristus, ’ḇeḇebru ro jemaat’. (Ef. 5:23) Iḇye kada koḇesewar kaku fa ’komnaf i’ raris manwawan Petrus, Yakobus, ma Yohanes sko. (Mat. 17:5) Insanja kawos kwar snar bisa kofrur na kuker (1) kosya pdef ro nyan ḇemkei ḇa ḇeyun ḇe kankenem ya ma (2) koḇedame kuker min Kristen koḇesya ḇemsor koni. Kofrur rarya ido, nari kosmai barakas nabor, ma ro ras ḇarpon iyama, nari kokenem fyoro-fyoro.