1-2. (a) Parentah aha do na itangar tolu apostel ni Jesus, janah sonaha sidea mandalankon ai? (b) Aha do na laho iulas hita bani artikel on?

DOBKONSI ari Paskah tahun 32 M, iarahkon Jesus ma apostel Petrus, Jakobus, ampa Johannes hu sada dolog na ginjang. Ijai itonggor sidea do mubah bohi ni Jesus “marsinalsal songon mata ni ari, anjaha hiouni lopak songon na lihar”. (Mat. 17:1-4) Bani ujungni panonggoran ai, itangar sidea ma sora ni Naibata. Nini do, “On do Anak haholongan-Ku, marosuh do uhur-Hu bani, tangihon hanima ma ia!” (Mat. 17:5) Sadokah goluh ni tolu apostel ai, ibotoh hita do anggo sidea tongon-tongon manangihon Jesus. Hita pe sihol do homa maniru pambahenan ni sidea ai.

² Bani artikel na salpu, domma iparlajari hita sonaha carani manangihon Jesus marhitei lang be mangkorjahon na ihasogamkon ia. Bani artikel on, iulas hita ma dong dua na maningon ibahen hita laho patuduhkon anggo hita manangihon Jesus.

3. Domu bani Mateus 7:13, 14, aha do na maningon ibahen hita?

³ Basa Mateus 7:13, 14. Ihatahon Jesus do dong dua dalan. Sada ai ma dalan na “bolag” janah sada nari dalan na  “etek” atap na sompit. Lang adong na ihatahon dalan na patoluhon. Artini maningon hita sandiri do na mamilih dalan na ija do na maningon idalani hita. Mase? Halani pitah sada dassa dalan na ujungni hu hagoluhan.

4. Sonaha do dalan na “bolag” ai?

⁴ Maningon ibotoh hita do aha bedani dua dalan ai. Bahat do halak na mardalan i dalan na “bolag” ai janah bahat do na marosuh ijai halani urah do mardalan bani dalan ai. Tapi lang ibotoh sidea sasintongni Sibolis do na mangojur sidea mardalan i dalan ai, janah hamatean do ujungni dalan ai.​—1 Kor. 6:9, 10; 1 Joh. 5:19.

5. Sonaha piga-piga halak mambotoh dalan na “sompit” ai janah sonaha sidea mardalan ibagas dalan ai?

⁵ Sobali dalan na “bolag”, dong do dalan na “sompit”. Anjaha ihatahon Jesus otik do na mardalan i dalan na sompit ai. Mase? Halani ihatahon Jesus do homa adong do nabi-nabi palsu. (Mat. 7:15) Sonari on adong marribu ugama janah ganupan sidea mangaku mangajarhon hasintongan. Halani ai gabe bahat ma halak na lang mambotoh dalan na ija do na marujung hu hagoluhan. Hassi pe sonai boi do jumpah hita dalan ai. Ihatahon Jesus, “Anggo totap nasiam ibagas hatangku, sintong ma nasiam susianku. Tandaon nasiam ma hasintongan in, anjaha paluahon ni hasintongan in ma nasiam.” (Joh. 8:31, 32) Tapi legan do ham pakon halak na mabuei. Domma iparlajari ham Bibel janah itangihon ham do homa parentah ni Jesus. Lang be homa ham dihut bani perayaan ugama palsu halani domma ibotoh ham lang marosuh Jahowa bani perayaan ai. Janah ibotoh ham homa anggo ham mandalankon na domma iparlajari ham bahat do tantangan na laho roh. (Mat. 10:34-36) Hassi pe lang urah mambahen ganup perubahan ai, tapi pos ma uhurmu malas do uhur ni Jahowa halani domma marusaha ham mandalankon parentah-Ni.​—Pod. 27:11.

6. Domu bani Psalmen 119:9, 10, 133, aha do na boi mangurupi hita ase boi totap mardalan i dalan na sompit?

⁶ Aha ma na boi mangurupi hita ase boi totap mardalan i dalan na sompit? Pardiateihon ma ilustrasi on. Anggo ham mamboan kendaraan hu gunung janah sompit dalanni, somalni dong do pagar pembatas dalan. Pagar pembatas ai marguna ase hita ulang madohortu hu topi ni dalan ase ulang madabuh hita hu lombang. Tontu lang adong na marpangahap gabe susah do sidea halani pagar pembatas ai. Sonai ma homa prinsip ni Bibel. Boi do ai manlinggomi janah mangurupi hita ase totap mardalan i dalan na sompit.​—Basa Psalmen 119:9, 10, 133.

7. Sonaha ma namin pangahap ni na maposo bani dalan na sompit ai?

⁷ Hanima na maposo, ai ongga do hanima marpangahap gabe susah do goluhmu halani mandalankon prinsip ni Bibel? Sihol do Sibolis ase hanima marpingkir sonai. Sihol do homa ia ase hanima marpangahap dearan do goluh ni halak na mardalan i dalan na bolag. Sihol do homa ia ase nasiam marpingkir gabe susah ma goluhmu anggo mangihutkon prinsip ni Bibel. Sihol do homa ia ase ham marpangahap dearan do goluh ni hasomanmu sasikolah atap goluh ni halak na ididah ham i Internet. * Tapi dingat ma lang ongga Sibolis patugahkon sonaha do ujungni halak  na mardalan i dalan na bolag ai. Tapi Jahowa sihol do Ia manogu-nogu halak ase totap mardalan i dalan na sompit na manogu hu hagoluhan sadokah ni dokahni.​—Ps. 37:29; Jes. 35:5, 6; 65:21-23.

8. Parlajaran aha ma na idapot na maposo humbani pangalaman ni si Olaf?

⁸ Pardiateihon ma pangalaman ni sada garama na margoran si Olaf. * Iarahkon hasomanni sakalas ma ia ase berhubungan seks. Hassi pe domma ihatahon ia anggo ia Saksi Jahowa janah mangihutkon prinsip ni Bibel, tapi bahat ope hasomanni naboru na mangarahkon ia berhubungan seks. Hassi pe sonai, totap do lang ra si Olaf. Lang pitah ai tantanganni. Si Olaf mangkatahon, “Gurungku pe iojur do ahu ase kuliah. Ihatahon sidea, ai do na boi mambahen ahu dapot horja na dear janah marmalas ni uhur.” Aha ma na mangurupi si Olaf? Ihatahon ia use, “Lambin orot ma ahu marhasoman pakon sanina botou. Sidea domma songon kaluarga bangku.  Lambin ringgas do homa ahu marlajar Bibel. Halani domma lambin bahat na huparlajari, gabe lambin huarusi ma on do hasintongan ai. Ujungni ididi ma ahu.”

9. Aha do na maningon ibahen hita ase totap mardalan i dalan na sompit ai?

⁹ Sihol do Sibolis ase hita lang be mardalan i dalan na sompit. Tapi sihol do ia ase hita mangihutkon halak na mabuei na mardalan i “dalan hu hamagouan” ai. (Mat. 7:13) Dingat ma ase boi hita totap mardalan i dalan na sompit ai, maningon tongtong do itangihon hita Jesus janah porsaya ma hita on do dalan na sintong na boi manlinggomi hita. Sonari ulas hita ma use parentah ni Jesus na legan na maningon ihorjahon hita.

10. Domu bani Mateus 5:23, 24, aha do parentah ni Jesus hubanta?

¹⁰ Basa Mateus 5:23, 24. Bayangkon ma situasi on. Dong sada perayaan na ponting tumang bani halak Jahudi. Dong ma sada halak na domma sirsir laho mambere galangan binatang. Tapi idingat ia ma dong hasomanni na marsogam ni uhur hu bani. Halani ai, maningon “laho ma” ia manadingkon galanganni ai. Mase? Dong sada na ponting tumang na maningon ibahen ia paima mambere galangan ai bani Jahowa. Aha ma ai? Jesus mangkatahon, “Laho ma ho lobei mardear ampa saninamai.”

11. Aha do na ibahen si Jakob ase boi mardamei pakon si Esau?

¹¹ Dong do parlajaran na ponting na boi idapot hita humbani contoh na ibahen si Jakob. Dobkonsi 20 tahun ia manadingkon hutani, iparentahkon Jahowa ma marhitei malekat, ase mulak ia hu hutani. (1 Mus. 31:11, 13, 38) Tapi lang urah ai halani abangni, ai ma si Esau sihol mamunuh ia. (1 Mus. 27:41) Jadi “mabiar tumang ma ia anjaha sosak” halani mardomdom ope abangni ai hu bani. (1 Mus. 32:7) Aha ma na ibahen si Jakob ase boi mardamei pakon abangni ai? Parlobei, martonggo do ia hubani Jahowa. Dobkonsi ai, ikirim ia ma hadiah hubani si Esau. (1 Mus. 32:9-15) Dobkonsi pajumpah sidea, manrogop ma si Jakob bani si Esau, lang pitah sahali atap dua hali tapi pitu hali do ibahen ia sonai. On patuduhkon halak na toruh maruhur do si Jakob ai anjaha hormat bani si Esau. Ai ma na mambahen sidea boi mardamei.​—1 Mus. 33:3, 4.

12. Aha do na boi iparlajari hita humbani contoh ni si Jakob?

¹² Dong do parlajaran na boi idapot hita humbani contoh na ibahen si Jakob. Martonggo do ia lobei mangindo pangurupion hubani Jahowa. Dob ai, marusaha do ia mambahen songon na itonggohonni ai ase boi mardamei pakon saninani ai. Sanggah pajumpah sidea, lang iulas si Jakob ise do na sintong ampa na salah. Tapi marusaha do si Jakob ase boi mardamei pakon saninani ai. Sonaha do hita boi maniru si Jakob?

13-14. Anggo dong hasoman na marborit ni uhur hubanta, aha ma na porlu ibahen hita?

¹³ Ase boi hita totap mardalan i dalan na manogu-nogu hu hagoluhan, maningon totap do hita mardamei pakon sanina botou. (Rom 12:18) Tapi sonaha anggo dong hasoman na marborit ni uhur hubanta? Songon si Jakob, martonggo ma hubani Jahowa ase boi iurupi ham mardamei pakon hasomanta ai.

¹⁴ Rimangi ma sungkun-sungkun on, ‘Anggo dong sanina botou na marborit ni uhur  hubangku, ai ra do ahu mangindo maaf, janah mardear pakon sidea? Anggo marusaha ahu mardamei pakon hasoman, sonaha ma pangahap ni Jahowa pakon Jesus mangidah ai?’ Anggo irimangi hita balos ni sungkun-sungkun ai, ai ma na mangojur hita manangihon parentah ni Jesus laho mardear pakon sanina botou. Anggo ibahen hita sonai, artini domma itiru hita si Jakob na martoruh ni uhur.

15. Domu bani Epesus 4:2, 3, aha ma na boi mangurupi hita ase mardamei pakon hasomanta?

¹⁵ Bayangkon ma anggo si Jakob roh manjumpahi saninani ai laho mangulas ise do sidea na sintong ampa na salah. Tontu lang dear hasilni. Sonai ma homa hita. Porlu do hita martoruh ni uhur sanggah manjumpahi hasomanta laho mardear. (Basa Epesus 4:2, 3.) Podah 18:19 mangkatahon, “Sanina na hona tipu, songon benteng na so tardohori do ai, anjaha parsalisihan songon pating-pating situtup rumah bolon.” Tapi anggo hita mangindo maaf bani hasomanta ai, boi do hita ujungni mardamei pakon sidea.

16. Aha do na maningon ipingkirhon hita, janah mase?

¹⁶ Porlu do homa ipingkirhon hita aha na sihol hatahononta janah sonaha carani mangkatahon ai. Mase? Halani ai do na mangurupi sidea ra mardamei pakon hita. Hassi pe sonai, ra do sidea mangkatahon na mambahen borit uhurta. Tapi ulang ma gabe manggila hita halani ai. Dingat ma sasintongni tujuanta laho mardamei do pakon sidea sedo laho mangindahi ise do na sintong ampa na salah.​—1 Kor. 6:7.

17. Aha do na boi iparlajari hita humbani pangalaman ni si Gideon?

¹⁷ Sada sanina na margoran si Gideon marusaha do ia mardamei pakon boruni. Ia mangkatahon, “Dong do parsoalanku pakon borungku. Sadokah dua tahun, marusaha do ahu pasaloseihon parsoalan ai janah mardamei pakonsi.” Aha ope na ibahen si Gideon? Ia mangkatahon, “Paima marsahap pakonsi, martonggo do lobei ahu mangindo pangurupion humbani Jahowa ase ulang borit uhurhu sanggah dong parsahap ni borungku ai na lang dear hubangku. Marusaha do homa ahu ase ulang marpangahap ahu do na sintong. Janah marusaha do homa ahu manalpuhon salahni.” Aha ma hasilni? Si Gideon mangkatahon, “Sonari domma malas uhurhu halani boi mardamei pakon ganup kaluargangku.”

18-19. Anggo dong sanina botou na marborit ni uhur hubanta, aha ma na maningon ibahen hita, janah mase?

 ¹⁸ Aha ma na sihol bahenonmu anggo dong sanina botou na marborit ni uhur hubamu? Marusaha ma mardamei pakon sidea. Tonggohon ma ai bani Jahowa janah pangindo ma pangurupion tonduy na pansing ase boi ham mardamei pakon sidea. Anggo ibahen ham sonai, gabe malas ma uhurmu janah boi do ai patuduhkon anggo ham domma mangihutkon parentah ni Jesus.​—Mat. 5:9.

¹⁹ Tontu martarima kasih tumang do hita hubani Jahowa halani domma ibere ia tugah-tugah hubanta marhitei ‘kopala ni kuria’, ai ma Jesus Kristus. (Ep. 5:23) Maningon ‘tangihon hita ma Jesus’, songon si Petrus, si Jakobus, ampa si Johannes. (Mat. 17:5) Domma iulas hita sonaha carani mardamei pakon sanina botou. Anggo totap hita mardamei pakon sidea, janah anggo tongtong hita mardalan i dalan na sompit na manogu hu hagoluhan, on boi mambahen hita marmalas ni uhur sonari on, sonai homa bani ari simagira.