1, 2. a) Ka adundehani heresibirubei ǘrüwa hádangiñe lani Hesusu apostolugu ani ida liña heresibiruni? b) Kaba wariha lidan aturiahani le?

LÁRIGIÑE luéyuri Esefuruni lidan irumu 32, arihatiña apostolugu Féduru, Santiagu luma Huan aban arufudúni le wéiriguti. Luagu aban wübü íñuti, háfuga luagu luwübüri Erümón, aba lámuñedagun larihín Hesusu ñein hagibugiñe. Ariñagatu Bíbülia: “Aba lámiridun ligibu kei weyu, aba táharudun ladaüragun kei larugounga” (Mat. 17:1-4). Lidoun lagumuchagüle arufudúni, aba haganbuni apostolugu lumalali Bungiu le ariñagubei: “Anihán niráü le hínsiñebei nun, le aubei óunwenbu lan nugundan; adüga huméi le lubeibei” (Mat. 17:5). Lau ligaburi hawinwanduni ǘrüwagubei apostolugu ha habagari, arufuda hamuti aganba hamani larufudahan Hesusu ani busentiwa wáyeihaniña.

² Lidan aturiahani le lubaragiñebei le, furendeitiwa dan le lan waganbuni Hesusu, mini lan mosu lan wígiruni wadügün fiu katei. Lidan aturiahani le, warihiba bián katei le lariñagubei Hesusu lunti lan wadügüni.

3. Según Matéu 7:13, 14, ka lunbei wadügüni?

³ (Aliiha huméi Matéu 7:13, 14). Ariha wamá ariñaga lan Hesusu biámañein lan bena ani kada lan aban lídangiñe barǘ lumutiwa  lidoun ámuñegueinarügü üma, anihein aban tuleti luma aban le bürüraüti. Úati amu üma luéi. Lunti lanúadiruni kada aban wádangiñe kaba lan lídangiñe lárügüda. Súdiniti le lunbei wanúadiruni ladüga gayaraati líchugun ibagari magumuchaditi woun.

4. Kaba hamuga hariñaga luagu üma le tulebei?

⁴ Súdiniti lun furangu lan wasubudiruni ka lan mini lubéi bián üma le. Gíbetiña gürigia anúadiratiña houdin luéigiñe üma le tulebei ladüga ménrengun lan leibugúniwa lídangiñe. Híruti gibe hamá gürigia éibugutiña lidan üma le ladüga hafalaruniña hiibe-agei gürigia. Ani míchutiña fe Satanási lan, le Mafia, busenbei lun luéigiñe hamá üma le lunbei lanügüniña lidoun óunweni (1 Ko. 6:9, 10; 1 Huan 5:19).

5. Ka áfaaguni adüga hamaalibei fiu lun hadariruni üma bürüraüti luma lun hagumeserun éibuga luéigiñe?

⁵ Amu luéi üma le tulebei, le aban bürüraüti, ani ariñagati Hesusu lóuguabaña lan adariruti. Ka uagu? Súdiniti lidan lan le aban bérusu, wéridi lumutiwa Hesusu luagu lunti lan wóunigiragun woungua hawéi profetagu yéetiña (Mat. 7:15). Según lakutihóun, anuhein saragu milu relihión ani tiibe-agei, ariñagatu tarufudahañein lan inarüni. Tau saragu relihión, ibidiñeti houn saragu míñunu gürigia kaba lan hadüga, aba lábürühan harüna ani aba máfaagunhaña lan lun háluahani üma le lunbei lanügüniña lidoun ibagari magumuchaditi. Gama lumoun, gayaraati hadariruni, lugundun ariñagati Hesusu: “Anhaün agunfulira lau nererun, hiábinba lun nani humá disipulugu le tímatimaati. Ábame hasubudiruni inarüni, ábame lesefurunün inarüni” (Huan 8:31, 32). Ma lubuidun áluaha humani inarüni lubaragiñe hafalaruniña hiibe-agei gürigia. Aba hagumeserun aturiahoun Lererun Bungiu buidu buidu lun gayara lan hafurendeirun luagu lilurudun ani aganba humuti larufudahan Hesusu. Kei hénpulu, furendei humaali aguraba lan Heowá lun wígiruni arufudahani le tánina relihión mama inarünitu luma lun wígiruni gadan lániwa fedu le ñǘbuinbei tídangiñe relihión mama inarünitu luma burí échuni le múaranbei luma larufudahan Heowá. Ani subudi wamuti giñe anihein lan dan hénrengu lan ladügǘniwa le lamuriahabei Heowá luma lun wígiruni échuni le aubei magundan lan (Mat. 10:34-36). Másiñati meha hénrengu lan hun hadügüni asansiruni burí le, keiti hínsiñe lubéi Húguchi Bungiu le siélubei hun ani busentün hagundaaragüdüni, mábürühanti harüna. Chóuruti gunda lan Heowá hau (Ari. 27:11).

6. Según Sálumu 119:9, 10, 45, 133, ka gayaraabei wadügüni lun wakipuragun woungua lidan üma “le bürüraübei”?

⁶ Anhein gumeseediwa lubéi éibuga luéigiñe üma “le bürüraübei”, kaba íderaguawa lun werederun ñein? Ru wamá aban hénpulu. Anihein ageiraü le ñein lubéi burí bürüraü lan üma luagu wübü, ábati híchugun baríeiru lárurugu lun chóuruñu lan abugahati dan le labugahanu lugune. Adügati baríeiru ligía lun mayarafadun hamá abugahatiña saragu luagun laru üma o lun magarabaagun hamá lidoun gudungu. Ma úabei hamuga ni aban abugahati ekeharuti luagu berese lan baríeiru ligía lun? Ítarameme, seriwiti giñe lilurudun Heowá le wadarirubei tidan Bíbülia kei baríeiru le ichugúbei laru üma: huuti lun wakipuragun woungua lidan üma “le bürüraübei” (aliiha huméi Sálumu 119:9, 10, 45, 133).

7. Ida liña lunti lan harihini nibureintiña üma “le bürüraübei”?

⁷ Nibureinti, anihein san dan genege lan bun deregüdaya lan lilurudun Heowá? Ligía labusenrubei Mafia lun basaminaruni. Álugati lun betenirun lun le hadügübei ha éibugubaña luéigiñe üma le tulé buribei luma lun genege lan buidu lan lidin houn. Busenti lun bafiñerun beferidiruña lan somu katei buiti, kéiburi le  hásügürübei bánigu paaná leskuelarugu hama burí gürigia ha barihubaña lidan Internet, lúmati ladügüña lan nege lilurudun Heowá lun beferidiruni katei buiti le lídanbei ibagari. * Haritaguabei meberesen lan Mafia lau kaba lan asusereda houn ha éibugubaña luéigiñe lémeri. Ánheinti Heowá, arufuda laali bun furangu kaba lan heresibira gürigia ha éibugubaña lídangiñe üma le anügübei lidoun ibagari (Sal. 37:29; Isa. 35:5, 6; 65:21-23).

8. Ka gayaraabei hafurendeiruni nibureintiña lídangiñe lani Olaf hénpulu?

⁸ Samina humá kaba lan hafurendeira lídangiñe le lásügürübei aban íbiri gíriti Olaf. * Aba hadügüdarun lánigu paaná leskuelarugu luagu lun gadan lani magíaguni. Dan le lafuranguagüdünbalin houn adundeha tani Bíbülia habagari gefentiña luagu Heowá, saragu hádangiñe würiña irahüñü ha tílana lani külase, ábatima hadügüdarun  luagu lun larounrun hama. Lau sun lira, mábürühanti tidoun hasadaran ani mámarügüñein dan ligía, hóuchagua hamuti amu dan. Ariñagati: “Dǘgüdatiña giñe numaisturungu nuagu lun nidin tidan luban furendei íñuti, ladüga nege ligía lan adügübei lun wéirigu lan gürigia. Ariñagatiña nun ánhana lan midin, ni kátabadina lan lidan ibagari”. Ida liña lawanduni Olaf saragu óuchawaguni le? Afuranguagüdati: “Aba náluahan umadagu buítiña lidan damuriguaü. Ani barǘ numutiña kei niduheñu. Ábatima seriu lan meha naturiahanu Bíbülia. Éibutima nahulilidun lidan naturiahan, éibutima nachoururuni lídanñadina lan inarüni ani aba nanúadirun neseriwidun lun Heowá”.

9. Ka lunbei wadügüni anhein busén wabéi werederun lidan émeri “le bürüraübei”?

⁹ Busenti Satanási lun wáfuridun lídangiñe émeri le anügübaliwa lidoun ibagari lun gayara lan woudin úara hama saragu gürigia ha éibugubaña lídangiñe üma le anügübaliña gürigia lidoun günringuaü (Mat. 7:13). Ánhawa asigira aganbei Hesusu ani ariha wameime üma “le bürüraübei” kei aban üma le óunigirubaliwa, madireirunbadiwa luéi. Ariha wamá ábanya katei le lariñagubei Hesusu woun lun wadügüni.

10. Según Matéu 5:23, 24, ka lariñagubei Hesusu lunti lan wadügüni?

¹⁰ (Aliiha huméi Matéu 5:23, 24). Lidan bérusu le, layanuhaña Hesusu luagu aban katei súdiniti houn huríu ha aganbubalin. Samina wamá luagu aban gürigia ebelura ténpulurugun lun lederegerun aban animaalu lun fádiri lun ladagaragüdüni. Anhein aritagua anihein lan somu katei lidan aban líbiri lubá, mosu meha lígiruni animaalu ligía ñein lun gayara lan lidin arandara luma líbiri. Ka uagu? Ka meha katei gayaraabei súdinitima lan luéi ladagaragüdüniwa lun Heowá? Ariñaga lumuti Hesusu furangu: “Ábame bidin arandara luma gürigia ligía”.

11. Ka ladügübei Hakobu lun gayara lan larandarun luma Esaú?

¹¹ Gayaraati wafurendeirun katei buiti luáguti arandaruni, lau wakutihani le asuseredubei lidan libagari Hakobu. Dan meha le barühali Hakobu kéiburi 20 irumu awinwanda dise luéi lageira, aba lóunahan Bungiu aban ánheli ariñaga lun lun lagiribudun lageiroun (Agu. 31:11, 13, 38). Lau sun lira, anihein meha aban turobuli: busenti meha Esaú, le líbugaña, láfaruni hilagubei (Agu. 27:41). Nidiheriti meha Hakobu, hanufude ligía luéi sándigili lan Esaú iyereehabúni luagu (Agu. 32:7). Ka ladügübei Hakobu lun gayara lan larandarun luma líbugaña? Furumiñe, furíeiti lun Heowá tídangiñe sun lanigi. Libiaman, aba lóunahan saragu idewesei lun Esaú (Agu. 32:9-15). Ani, le lǘrüwan, dan le yarafaali Hakobu lun líbugaña, aba labuluchagun ligibugiñe arufuda inebesei. Buluguati mámarügü aban ni biama wéiyaasu, buluguati sedü wéiyaasu. Lau ǘnabuguni luma inebesei, aba larandarun Hakobu luma líbiri (Agu. 33:3, 4).

12. Ka wafurendeirubei lúmagiñe Hakobu?

¹² Gayaraati wafurendeirun aban puntu súdiniti lídangiñe ligaburi laranserun Hakobu lubá ladunragun luma líbiri luma ida liña lan layarafadun lun. Furumiñe, aba lamuriahan lau ǘnabuguni luma Heowá lun líderaguni. Lárigiñe, aba lóuserun úara luma le lamuriahabei lidan furíei lau ladügüni sun liyaraati lun buidu lan léibugun katei danme le ladunragun luma Esaú. Ani, dan le hadunragunbei, meredeti asigeneha luma luagu ka lan hádangiñe garichabei. Le meha labusenrubei, lun larandarun luma líbiri. Ida luba wáyeihani?

13, 14. Ka lunbei wadügüni anhein charaadiwa lubéi lun aban íbiri?

¹³ Wagía le éibugubei lídangiñe üma le anügübei lidoun ibagari, busentiwa wáfaagun lun ñein lan darangilaü wadan hama wíbirigu  (Rom. 12:18). Ligíati, ka lunbei wadügüni ánhawa íchiga fe adügaadiwa lan somu katei wuribati lun aban kristiánu? Ítara kei Hakobu, lunti wafurieidun tídangiñe sun wanigi lun Heowá ani amuriaha wagíame luma lun labiniruni áfaaguni le wadügübei lun warandarun luma wábiri.

¹⁴ Ábaya katei, lunti wasagarun dan lun wakutihagun woungua. Kei hénpulu, gayaraati wálügüdagun woungua: “Aransetina san lun nabuguni igarihabu luma lun namuriahan ferudun lau ǘnabuguni lun gayara lan ñein lan darangilaü? Ida luba san lasandiragun Heowá luma Hesusu houngua ánhana arandara tuma níbiri o luma níbiri?”. Gayaraati línchahaniwa óunabagülei lun waganbuni Hesusu luma lun wayarafadun lau ǘnabuguni lun wábiri lun warandarun luma. Gayaraati líderaguniwa lani Hakobu hénpulu.

15. Ida liña líderaguniwa adundehani le lídanbei Éfesuna 4:2, 3 lun warandarun luma wábiri?

¹⁵ Kaba hamuga san asusereda lun hamuga ñüdün lan Hakobu lau pantaü luma anaaguni unguaü adunragua luma líbiri? Másiñati ámubei lan yebe katei. Ítarameme, ánhawa ñüdün ayanuha luma aban íbiri lun waransehan turobuli, lunti wadügüni lau ǘnabuguni (aliiha huméi Éfesuna 4:2, 3). Ariñagati Ariñawagúni 18:19: “Íderaguabei bíbiri ábame lágüdahanibu aban uburugu le derebuguti lubarieirun, gama lumoun ánhabu awuribuha luma, ladourubei lubenari buéi”. Ánhawa ariñaga lun lau ǘnabuguni luagu sarí wamani, gayaraati aba lan geléin lira lun webelurun tidoun lanigi.

16. Ka lunbei wasaminaruni ani ka uagu?

¹⁶ Mosu giñe wasaminaruni buidu kaba lan wariñaga ani ida luba lan wariñaguni. Danme le aranseediwa, lunti wayarafadun lun íbiri ligía lun gayara lan wareidaguagüdüni igarigu le tídanbei lanigi. Másiñati lagumeserun ariñaga dimurei burí gáriti woun. Lau sun lira, áfaagua wamá lun magañidun wamá ni lun wariñagun lun wagía lan garichabei, ladüga gayaraati ladügün lira lun ua lan darangilaü wádangua. Haritagua waméi darangilaü lan hama wíbirigu, ligía lan súdinitimabei luéi ka lan garichabei lumoun ka lan marichabei (1 Ko. 6:7).

17. Ka hafurendeirubei lídangiñe lani Gilbert hénpulu?

¹⁷ Ariha waméi sun áfaaguni le ladügübei aban íbiri le gíribei Gilbert lun láluahani darangilaü. Ariñagati: “Gaturobulintina meha saragu luma aban niduhe. Rédeitina lóugiñe bián irumu áfaagua lun nayanuhan luma furangu ani lau darangilaü lun gayaraaya lan buidu lan wanaagun woungua”. Ka amu katei ladügübei Gilbert? “Lubaragiñe nayanuhan luma niduhe, furíeitina  ani aba naranserun lun magañidun nan anhein ariñaga somu dimurei gáriti. Mosu meha aranseñu nuba lan lun feruduna nani. Furendeitina lun mageindagun nan luagu niricha, ani gunfuranda numuti le lan nánibei buligasion lun ñein lan darangilaü wadan”. Ida liña lagumuchun sun katei? Guentó, abahüdahati Gilbert: “Buiti nasandiragun nungua ladüga buíduhali nanaagun nungua hama sun niduheñu”.

18, 19. Ánhawa acharara lun somu íbiri, ka lunbei wadügübei, ani ka uagu?

¹⁸ Kati lunbei wadügüni ánhawa íchiga fe gáñigüda wamá lan somu íbiri? Gaganbadi wamá lun gumadi le líchugubei Hesusu lun wadügün lun ñein lan darangilaü. Ayanuha wamá luagu luma Heowá ani amuriaha waméi lani sífiri sandu lun líderaguniwa aransehei turobuli. Anhein wadüga ítara, gúndaabadiwa ani warufudubei waganbuñein lan lugumadin Hesusu (Mat. 5:9).

¹⁹ Teinki wamuti Heowá tídangiñe sun wanigi luagu layusuruni Hesukrístu, le lichügüdinabei damuriguaü, lun ladundehaniwa lau ínsiñeni (Efe. 5:23). Ítara kei apostolu Féduru, Santiagu luma Huan, aranseñu wamá lun waganbuni Hesusu (Mat. 17:5). Arihaadiwa aban lan lídangiñe igaburi lun wibihini lau warandarun luma furumiñeguarügü íbiri le unbei wacharara. Ánhawa eredera lidan üma “le bürüraübei” le anügübei lidoun ibagari le magumuchaditi, wibihiba saragu abiniruni lúmagiñe guentó ani gúndaabadiwa súnwandan.