1-2. (a) Unsang sugo ang nadawat sa tulo ka apostoles ni Jesus, ug giunsa nila kana pagtuman? (b) Unsay atong hisgotan niining artikuloha?

HUMAN sa Paskuwa sa 32 C.E., si apostol Pedro, Santiago, ug Juan nakakitag katingalahang panan-awon. Sa usa ka taas nga bukid, tingali sa usa ka bahin sa Bukid sa Hermon, nakita nila nga nausab ang panagway ni Jesus. “Ang iyang nawong misidlak sama sa adlaw, ug ang iyang besti migilaw sama sa kahayag.” (Mat. 17:1-4) Sa hapit nang matapos ang panan-awon, nadungog sa mga apostoles ang Diyos nga miingon: “Kini mao ang akong Anak, ang akong gihigugma, nga akong giuyonan. Pamati kamo kaniya.” (Mat. 17:5) Gipamatud-an sa tulo ka apostoles sa ilang paagi sa pagkinabuhi nga namati sila kang Jesus. Gusto nato silang sundogon.

² Sa miaging artikulo, atong nakat-onan nga ang pagpamati kang Jesus nagpasabot nga mohunong ta sa pagbuhat sa pipila ka butang. Niining artikuloha, atong hisgotan ang duha ka butang nga giingon ni Jesus nga angay natong buhaton.

3. Sumala sa Mateo 7:13, 14, unsay angay natong buhaton?

³ Basaha ang Mateo 7:13, 14. Matikdi nga si Jesus naghisgot ug duha ka ganghaan nga padulong sa duha ka lainlaing dalan—“luag” nga dalan ug “gamay” nga dalan. Walay ikatulong  dalan. Kinahanglang mopili ta kon unsang dalana ang atong subayon. Kini ang labing importanteng desisyon nga atong himoon kay usa lang niana nga dalan ang motultol sa kinabuhing walay kataposan.

4. Unsay imong ikaingon bahin sa “luag” nga dalan?

⁴ Kinahanglan natong hinumdoman ang mga kalainan niining duha ka dalan. Ang “luag” nga dalan popular kay sayon ra ning subayon. Makapaguol, daghan ang nagpabilin nianang dalana ug nagsunod sa ginabuhat niadtong tanan nga nagasubay niana. Wala nila maamgohi nga si Satanas nga Yawa ang nagdani sa mga tawo nga mosubay nianang dalana, ug ang iyang dalan moresultag kamatayon.—1 Cor. 6:9, 10; 1 Juan 5:19.

5. Unsang mga paningkamot ang gihimo sa pipila aron makaplagan ang “gamay” nga dalan ug makasubay niana?

⁵ Dili sama sa “luag” nga dalan, ang laing dalan “gamay,” ug si Jesus miingon nga diyutay lang ang nakakaplag niana. Ngano? Makapainteres nga sa sunod nga bersikulo, gipasidan-an ni Jesus ang iyang mga sumusunod batok sa bakak nga mga propeta. (Mat. 7:15) Ang pipila nag-ingon nga dunay libolibong relihiyon, ug kadaghanan niana nag-angkon nga nagtudlo sa kamatuoran. Minilyon ang nadismayar o naglibog tungod sa kadaghan sa relihiyon mao nga wala na sila mangita sa dalan nga motultol sa kinabuhi. Pero puwedeng makaplagan ang maong dalan. Si Jesus miingon: “Kon kanunay ninyong tumanon ang akong gitudlo, kamo ako gyong mga tinun-an, ug kamo mahibalo sa kamatuoran, ug ang kamatuoran magpahigawas kaninyo.” (Juan 8:31, 32) Maayo nga wala ka mosunod sa ginabuhat sa kadaghanan; hinunoa, nangita ka sa kamatuoran. Imong gitun-an pag-ayo ang Pulong sa Diyos aron mahibaloan kon unsay gusto niya nga buhaton nato, ug namati ka sa mga gitudlo ni Jesus. Imong nakat-onan nga gidahom ni Jehova nga isalikway nato ang mga pagtulon-an sa bakak nga relihiyon ug hunongon ang mga selebrasyon nga paganog sinugdanan. Nakat-onan sab nimo nga dili sayon ang paghimo sa kabubut-on ni Jehova ug pagbiya sa mga buhat nga wala niya uyoni. (Mat. 10:34-36) Tingali nalisdan ka sa paghimo niini nga mga kausaban. Pero, padayon kang naningkamot kay gihigugma nimo ang imong langitnong Amahan ug gusto nimong mabatonan ang iyang pag-uyon. Seguradong napalipay nimo siya!—Prov. 27:11.

6. Sumala sa Salmo 119:9, 10, 45, 133, unsay makatabang nato sa pagpabilin diha sa gamay nga dalan?

⁶ Dihang makasubay na ta sa gamay nga dalan, unsay makatabang nato nga makapabilin niana? Tagda ni nga ilustrasyon. Ang ali sa daplin sa gamay nga dalan sa bukid magsilbing proteksiyon sa drayber ug sa iyang sakyanan. Makatabang ni aron ang drayber dili mopidpid pag-ayo sa daplin sa dalan o mahulog sa pangpang. Wala gyoy drayber nga moreklamo nga ang maong ali makababag niya! Ang mga prinsipyo ni Jehova nga naa sa Bibliya sama nianang ali. Ang iyang mga prinsipyo makatabang nato sa pagpabilin diha sa gamay nga dalan.—Basaha ang Salmo 119:9, 10, 45, 133.

7. Unsay angayng pag-isip sa mga batan-on sa gamay nga dalan?

⁷ Mga batan-on, mobati ba mo usahay nga estrikto ra kaayo ang mga prinsipyo ni Jehova? Kanay gusto ni Satanas nga inyong hunahunaon. Gusto niya nga magpokus mo sa ginahimo niadtong nagsubay sa luag nga dalan  kay morag malipayon kaayo sila. Gusto niya nga maghunahuna mo nga laay ang inyong kinabuhi kon itandi nianang sa inyong mga klasmet o sa mga tawo nga inyong makita sa Internet. Patuohon mo ni Satanas nga ang mga prinsipyo ni Jehova nakapugong ninyo nga ma-enjoy pag-ayo ang kinabuhi. * Pero hinumdomi ninyo kini: Dili gusto ni Satanas nga makita niadtong nagsubay sa iyang dalan kon asa paingon kanang dalana. Sa laing bahin, klarong gipakita ni Jehova kaninyo kon unsay nagpaabot niadtong magpabilin sa dalan sa kinabuhi.—Sal. 37:29; Isa. 35:5, 6; 65:21-23.

8. Unsay makat-onan sa mga batan-on kang Olaf?

⁸ Tagda kon unsay imong makat-onan sa eksperyensiya sa batan-ong brader nga si Olaf. * Gipresyur siya sa iyang mga klasmet  nga makigsekso. Dihang gipatin-aw niya nga ang mga Saksi ni Jehova nagsunod sa taas nga sukdanan sa Bibliya bahin sa moralidad, ang pipila niya ka klasmet nga babaye nahagit ug naningkamot pa gani sa pagdani niya nga makigsekso nila. Pero mibarog si Olaf sa kon unsay husto. Ug dili lang ni ang presyur nga iyang giatubang. Si Olaf miingon: “Gikombinsir ko sa akong mga titser nga moeskuwela sa unibersidad aron mahimo kong inila. Giingnan ko nila nga kon dili nako nâ buhaton, dili ko molampos.” Unsay nakatabang kang Olaf nga masuklan ang pagpresyur kaniya? Siya miingon: “Nakigsuod ko sa mga igsoon sa kongregasyon. Nahisama silag akong pamilya. Ug mas gitun-an nako pag-ayo ang Bibliya. Tungod niana, mas nakombinsir ko nga mao ni ang kamatuoran. Ingong resulta, determinado ko nga moalagad kang Jehova.”

9. Unsay kinahanglang buhaton niadtong gustong magpabilin sa gamay nga dalan?

⁹ Gusto ni Satanas nga mobiya mo sa dalan nga padulong sa kinabuhi. Gusto niya nga mosunod mo sa kadaghanan nga nagsubay sa luag nga dalan “padulong sa kalaglagan.” (Mat. 7:13) Pero makapabilin ta sa gamay nga dalan kon padayon tang mamati kang Jesus ug isipon ang maong dalan ingong proteksiyon. Karon, hisgotan nato ang laing giingon ni Jesus nga angay natong buhaton.

10. Sumala sa Mateo 5:23, 24, unsay giingon ni Jesus nga angay natong buhaton?

¹⁰ Basaha ang Mateo 5:23, 24. Dinhi, si Jesus naghisgot sa usa ka bahin sa pagsimba nga importante kaayo sa mga Hudiyo nga naminaw kaniya. Imadyina ang usa ka tawo diha sa templo nga andam nang mohatag sa iyang halad nga mananap ngadto sa saserdote. Kon nianang tungora mahinumdoman sa maong tawo nga ang iyang igsoon may kahiubos kaniya, kinahanglan niyang biyaan ang halad ug ‘molakaw.’ Ngano? Unsa man diay mas importante pa kay sa pagtanyag ug halad kang Jehova? Si Jesus klarong miingon: “Pakigdait una sa imong igsoon.”

11. Unsay gihimo ni Jacob aron makigdait kang Esau?

¹¹ Makakat-on tag importanteng mga leksiyon bahin sa pagpakigdait pinaagi sa pagsusi sa usa ka hitabo sa kinabuhi sa patriarkang si Jacob. Human sa mga 20 ka tuig nga wala si Jacob sa iyang yutang natawhan, ang Diyos nagsugo kaniya pinaagi sa usa ka anghel nga mobalik didto. (Gen. 31:11, 13, 38) Apan dihay problema. Ang iyang magulang nga si Esau nagtinguha sa pagpatay kaniya. (Gen. 27:41) Si Jacob “nahadlok pag-ayo ug nabalaka” nga basig ang iyang igsoon naghambin pag kasuko kaniya. (Gen. 32:7) Unsay gihimo ni Jacob aron makigdait sa iyang igsoon? Una, kinasingkasing nâ niyang giampo kang Jehova. Dayon, nagpadala siyag daghang regalo kang Esau. (Gen. 32:9-15) Ug dihang nagkita na sila, si Jacob nagpakitag pagtahod kang Esau. Siya miyukbo kang Esau, dili lang kausa o kaduha, kondili kapito! Pinaagig pagpaubos ug pagtahod, si Jacob nakigdait sa iyang igsoon.—Gen. 33:3, 4.

12. Unsay atong makat-onan kang Jacob?

¹² Duna tay makat-onan sa gihimo ni Jacob una siya makig-atubang ug dihang nakig-atubang na siya kang Esau. Si Jacob mapainubsanong nangayog tabang kang Jehova. Dayon milihok siya uyon sa iyang pag-ampo pinaagi sa paghimo sa iyang maarangan aron mahimong maayo ang iyang pagpakigkita sa iyang igsoon. Dihang nagkita na sila, si  Jacob wala makiglalis kang Esau bahin sa kon kinsay husto ug sayop. Ang tumong ni Jacob mao ang pagpakigdait sa iyang igsoon. Unsaon nato siya pagsundog?

13-14. Kon dunay igsoon nga nahiubos kanato, unsay angay natong buhaton?

¹³ Kon gusto natong magpadayon sa pagsubay sa dalan padulong sa kinabuhi, kinahanglang maayo tag relasyon sa atong mga igsoon. (Roma 12:18) Unsay angay natong buhaton kon maamgohan nato nga ang usa ka igsoon nahiubos kanato? Sama kang Jacob, kinahanglang kinasingkasing tang moampo kang Jehova. Puwede nato siyang hangyoon nga panalanginan ang atong mga paningkamot nga makigdait sa atong igsoon.

¹⁴ Kinahanglan pod tang maggahin ug panahon sa pagsusi sa atong kaugalingon. Puwede natong pangutan-on ang atong kaugalingon: ‘Andam ba kong moangkon sa akong sayop, mapainubsanong mangayog pasaylo, ug makigdait? Unsa kahay bation ni Jehova ug Jesus kon maningkamot ko nga makigdait sa akong igsoon?’ Ang mga tubag niana magpalihok nato sa pagpamati kang Jesus ug pagduol sa atong igsoon uban ang pagpaubos aron makigdait kaniya. Nianang paagiha, atong masundog si Jacob.

15. Sa unsang paagi ang pagpadapat sa Efeso 4:2, 3 makatabang nato sa pagpakigdait sa atong igsoon?

¹⁵ Imadyina kon unsa kahay nahitabo kon si Jacob nagmapahitas-on dihang nakig-atubang siya sa iyang igsoon! Seguradong lahi gyod ang resulta niana. Kon makigdait ta sa atong igsoon, kinahanglan tang magmapainubsanon. (Basaha ang Efeso 4:2, 3.) Ang Proverbio 18:19 nag-ingon: “Mas lisod ang pagpakig-uli sa igsoon nga nasakitan kay sa pagpildi ug lig-ong siyudad, ug naay mga panaglalis nga morag mga trangka sa kuta.” Ang pagpaubos ug pagpangayog pasaylo makatabang aron makasulod ta niana nga “kuta.”

16. Unsay angay natong hunahunaon, ug ngano?

¹⁶ Kinahanglan sab natong hunahunaon pag-ayo kon unsay atong isulti sa atong igsoon ug kon unsaon kana pagsulti. Kon andam na ta, angay natong duolon ang igsoon nga nahiubos sa tuyo nga mahibalik ang atong maayong relasyon kaniya. Sa sinugdan, makasulti tingali siyag mga butang nga makapasakit nato. Basin masuko ta o mangatarongan, pero makatabang kaha nâ nga mahibalik ang  atong maayong relasyon kaniya? Dili gyod. Hinumdomi nga ang pagpakigdait sa imong igsoon mas importante kay sa pagpamatuod kon kinsay husto ug sayop.—1 Cor. 6:7.

17. Unsay imong makat-onan kang Gilbert?

¹⁷ Ang brader nga si Gilbert naningkamot pag-ayo nga mahimong makigdaiton. Siya miingon: “Dili gyod maayo ang akong relasyon sa akong anak. Sulod sa kapig duha ka tuig, naningkamot ko nga makig-estorya niya sa sinsero ug kalmado nga paagi aron mahibalik ang among maayong relasyon.” Unsa pay gihimo ni Gilbert? “Sa dili pa ko makig-estorya niya, mag-ampo ko ug andamon nako ang akong kaugalingon sa bisan unsang sakit nga mga pulong nga iya tingaling isulti. Kinahanglang andam kong magpasaylo. Nakakat-on ko nga dili ipamugos ang akong mga katungod. Ako pong nasabtan nga responsibilidad nako ang pagpakigdait.” Unsay resulta? Si Gilbert miingon: “Karon, duna koy kalinaw sa hunahuna kay maayo ang akong relasyon sa tanang membro sa akong pamilya.”

18-19. Kon dunay nahiubos nato, unsay angay natong buhaton, ug ngano?

¹⁸ Busa, unsay angay nimong buhaton dihang imong mahibaloan nga dunay igsoon nga nahiubos nimo? Sunda ang sugo ni Jesus nga makigdait. Iampo nâ kang Jehova, ug salig nga tabangan ka sa iyang balaang espiritu nga mahimong makigdaiton. Kon buhaton nimo kana, magmalipayon ka, ug gipakita nimo nga namati ka kang Jesus.—Mat. 5:9.

¹⁹ Mapasalamaton ta nga si Jehova naghatag natog mahigugmaong giya pinaagi sa “ulo sa kongregasyon,” si Jesu-Kristo. (Efe. 5:23) Hinaot nga magmadeterminado ta nga ‘mamati kaniya,’ sama sa gihimo ni apostol Pedro, Santiago, ug Juan. (Mat. 17:5) Atong nahisgotan kon unsaon kana paghimo pinaagi sa pagpakigdait sa igsoon nga nahiubos kanato. Pinaagi sa paghimo niana ug sa pagpabilin diha sa gamay nga dalan padulong sa kinabuhi, madawat nato ang daghang panalangin karon ug walay kataposang kalipay sa umaabot.