1-2. (a) Yika Zambi ambile hanga apostolo atatu alinge? Shina ayo kwononokene? (b) Yika mutulilongesa ha mutwe uno?

HANYIMA lia Chizomboka cha mwaka 32 M.J, apostolo Petulu, Tiangu ni Yoano, yamona mu usolwelo yimwe yuma ya kukomwesa. Ha umwe mulundu usuku, kota ku chimwe chihela ha Mulundu wa Hermone, Yesu yalumuka kumeso jo. Mbimbiliya yinambe ngwo: “Ku meso jenyi yikupanguka ngwe tangwa, ni mahina jenyi yapwa atoma ngwe pangu.” (Mateu 17:1-4) Muze te usolwelo kanda uchihwa, apostolo yevwa liji lia Zambi ngwo: “Yono mwe Mwanami, ngunamuzange chikolo, muli iye ngunawahilila; mwivwenu Iye.” (Mateu 17:5) Apostolo jacho atatu, yalinga chocho. Ku mwono wo weswe, ayo yasolola ngwo kakutwama kulita ni yize Zambi ambile. Ni yetu tunazange kwimbulula chilweza cho.

² Ha mutwe wasala, twalilongesa ngwetu, kupanjika liji lia Yesu chinalumbunuka kwecha kulinga yuma yimwe. Ha mutwe uno, mutulilongesaho yuma yiali yize Yesu ambile ngwenyi twatamba kuyilinga.

3. Kulita ni Mateu 7:13, 14, yika twatamba kulinga?

³ Tanga Mateu 7:13, 14. Yesu kahanjikile hakutwala ku yikolo yaali yalisa, hita chikolo te chinatwale ku yimwe jila. Jila yimwe “kuyatoha” yikwo “yikehe.” Kukushi jila yamuchitatu, kuli wika majila aali. Hita umwe wa kuli yetu katamba kusakula  jila yize mendela. Chino chili chiyulo chilemu chinji, mumu mwono wetu wa mutolo unakwate ha chiyulo chino.

4. Kuchi muhasa kulumbununa jila yinene?

⁴ Kutwatambile kuvulama ngwetu majila wano aali kanalise chinji. Atu anji kakusakula jila yinene, mumu chili chashi kwendelamo. Chaluyinda, atu anji kakusakula kununga mu jila yacho ni kulinga yuma yize atu anji akulinga. Alioze, ayo kanyingikine ngwo, jila yacho yili ya Satana nawa ngwo yakutwala wika ku kufwa.—1 Kori. 6:9, 10; 1 Yoa. 5:19.

5. Yika atu anji alingile mba awane jila yikehe ni kwendelamo?

⁵ Alioze, jila yikehe yalisa, nawa Yesu kambile ngwenyi, waze akuyiwana akehe. Mumu liaka? Mumu lia aprofeta a mahuza. Kashika, Yesu atowezele tumbaji twenyi ni maliji ali ha Mateu 7:15. Atu anji kakwamba ngwo, kuli mayingeleja anji alisa, nawa ngwo eswe kakuliamba ngwo, kakulongesa umwenemwene. Hachino, tununu a tununu twa atu kakwecha kufupa uwayilo wamwenemwene hanji ngwetu, keshi kusa tachi hanga afupe jila yize yinatwale ku mwono wa mutolo. Alioze, mutuhasa kuwana jila yacho. Yesu yamba ngwenyi: “Nyi munutwama mu maliji jami, mba chamwenemwene munupwa tumbaji twami. Kumunukanyingika umwenemwene, mba umwenemwene kumuukanutusula.” (Yoa. 8:31, 32) Nyi hiwawana umwenemwene ni kwecha kulinga yuma yize atu anji akulinga, tunakuchichimieka! Walilongesa chinji Mbimbiliya ni kunyingika yize Zambi anazange hanga ulinge ni kupanjika malongeso a Yesu. Chakutalilaho, walilongesele ngwo Yehova kanazange hanga wehuke malongeso a mu uwayilo wa mahuza, ni kulitwamina kulinga yiwanyino ya matangwa akunanga yize asele kuli atu waze te keshi kuwayila Yehova. Kwamba pundu, ni yena wamwene ngwe kwecha kulinga yuma yacho ni kulinga yize Yehova anazange muchihasa kupwa chikalu. (Mateu 10:34-36) Hanji kwecha kulinga yuma yacho kuchakapwile chashi kuli yena. Chipwe chocho, kuwakahongele mumu wakuzanga Tatenu Yehova, nawa unazange kumuvwisa kuwaha. Pundu lume, Yehova kanawahilila chinji ni yena!—Yishi. 27:11.

6. Kulita ni Samu 119:9, 10, 45, 133, yika muyihasa kutukwasa kununga ni kwendela mu jila yikehe?

⁶ Yika muyitukwasa mba tununge ni kwendela mu jila yikehe? Tunyongenu ha chilweza chino. Matapalo waze ali ku sesa lia chimbongo, kakutungako yikangalo hanji yipanga yize yakukwasa shofwele hanga ende kanawa. Nyi kukushi yipanga yacho, shofwele mahasa kupiasuka mu tapalo ni kulimbuka ni mashinyi. Alioze niumwe shofwele kechi kuhasa kwamba ngwenyi, yipanga yacho kuyishi kukwasa yakupinjisa wika! Chizechene nawa, shimbi ja Yehova jize jili mu Mbimbiliya jili ngwe yipanga yacho. Jakutufunga ni kutukwasa hanga tununge ni kwendela mu jila yikehe.—Tanga Samu 119:9, 10, 45, 133.

7. Mumu liaka akweze katambile kunyonga ngwo jila yikehe yakwakinda kulenga?

⁷ Nyi uli mukweze, mashimbu amwe hanji wakunyonga ngwe, shimbi ja Yehova jili jikalu chinji, jakukukwika kulinga yuma yize wakuzanga. Yino ye Satana anazange hanga ulinge. Iye kanazange hanga unyonge ngwo, chili chipema kwendela mu jila yinene, muze atu eswe akulinga yize anazange. Kanazange hanga unyonge ngwo, kuushi kulenga ku mwono ngwe chize akulinga alongi-ni-akwenu ni atu waze wakumona ha internet. Satana kanazange hanga unyonge ngwo, kukaula  shimbi ja Yehova chinapinjisa wika mwono we. * Alioze iwuluka ngwe: Satana kazangile hanga waze anendela mu jila yenyi anyingike yize yinaashimbwila kulutwe. Alioze Yehova katwamine chize. Iye kanazange hanga unyingike yiwape yize muzuka nyi mununga ni kwendela mu jila yize yakutwala ku mwono.—Samu 37:29; Iza. 35:5, 6; 65:21-23.

8. Yika akweze mahasa kulilongesa ha chilweza cha Olaf?

⁸ Tutalenu yize akweze mahasa kulilongesa ha chilweza cha ndumbu Olaf. * Amwe a kuli alongi-ni-akwo, te kakumushinjila hanga alisumbakenye ni ana-mapwo ku shikola. Muze ambile ngwenyi, kali chela cha Yehova nawa ngwo kakukaula shimbi ja mu Mbimbiliya, amwe ana mapwo a mu kalasa yo, yapihilila. Ayo yasa tachi jinji hanga iye alisumbakenye no. Alioze, Olaf yamana ki, kafwile  mu muheto wacho. Iye kapalikile nawa mu kapinda mukwo. Olaf, yamba ngwenyi: “Alongeshi jami kapwile ni kungushinjila hanga nguye ku shikola yinene. Ayo te kakwamba ngwo, chino muchitwala atu hanga anguvumbike nawa ngwo mungufumbuka ku mwono.” Mba yika yakwashile Olaf kukumba yeseko yacho? Mwene yamba ngwenyi: “Napwile ni usepa ukolo ni mandumbu mu chikungulwila, nawa ayo kapwile ngwe asoko jami. Yinguputuka nawa kulilongesa chinji Mbimbiliya. Muze te nakulilongesa chinji Mbimbiliya te nakupwa ni shindakenyo ngwami, hinawana umwenemwene. Chino changukwashile kununga ni kulingila Yehova.”

9. Yika twatamba kulinga nyi tunazange kununga mu jila yikehe?

⁹ Satana kanazange ukatuke mu jila ya mwono hanga wendele mu jila yize atu anji akusakula, jila yinene yize yakutwala “ku kwonwona.” (Mateu 7:13) Alioze, yetu tunazange kununga ni kwivwa liji lia Yesu, ni kwendela mu jila yikehe yize yakutufunga. Haliapwila mutumona chuma chikwo Yesu ambile chize twatamba kulinga.

10. Kulita ni Mateu 5:23, 24, yika Yesu ambile yize twatamba kulinga?

¹⁰ Tanga Mateu 5:23, 24. Ha chisoneko chino, Yesu kanahanjika ha chimwe chuma chize chapwile ni ulemu unji ku mwono wa A-Yunda. Tunyongenu umwe mutu mu tembele yoze unambe kuhana kashitu kuli Sasendote hanga amulambule ngwe chitapo. Hachino, iye mewuluka ngwo, keshi kulivwashana ni umwe ndumbu, chocho mahichika chitapo chenyi ‘maya’ ni kuliwana ni ndumbwenyi. Mumu liaka? Mumu te kali ni chuma chilemu chize atamba kulinga kuhiana kuhana chitapo kuli Yehova. Yesu kasolwele zwalala ngwenyi: ‘Lianga kuya ukalivwashane ni ndumbwe.’

11. Lumbununa yize Yakomba alingile mba alivwashane ni Esau.

¹¹ Mutuhasa kulilongesa yuma yinji yilemu hakutwala ku kuneha sambukila, ha kuhengwola yize yalingiwile ku mwono wa Yakomba. Yakomba katwamine miaka 20 mu chifuchi cha yilambala, kulutwe kupalikila muli mungelo, Zambi yalweza Yakomba hanga ahiluke mu chifuchi muze asemukinyine. (Uputu. 31:11, 13, 38) Alioze, kwapwile umwe kapinda. Yayo Esau, kafupile kumushiha. (Uputu. 27:41) Yakomba “yevwa woma wunji, yalipikala” ni kunyonga ngwenyi, yayo te machimuvwila kole. (Uputu. 32:7) Mba kuchi Yakomba ahashile kulivwashana ni yayo? Chitangu, iye yalemba ni mbunge yeswe kuli Yehova hakutwala ku chikuma chacho. Hanyima, yatuma yawana kuli Esau. (Uputu. 32:9-15) Kusulaho, muze haliwana ni Esau, yamusolwela vumbi. Iye kakaliumbile ha chisuho chimuwika hanji yaali, alioze ha yisuho shimbiali! Yakomba kahashile kulivwashana ni yayo, mumu kalikehesele ni kusolola vumbi.—Uputu. 33:3, 4.

12. Yika mutuhasa kulilongesa ha chilweza cha Yakomba?

¹² Mutuhasa kuwana longeso lilemu ha yize Yakomba alingile hanga alivwashane ni yayo. Yakomba kalikehesele ni kwita ukwaso kuli Yehova. Chocho, yasa tachi jinji ha kulinga yeswe yize te mahasa hanga yuma yeswe yende kanawa muze maliwana ni yayo. Muze Yakomba aliwanyine ni Esau, kakafupile kusolola yoze wahengesele. Chuma afupile wika chapwile kulivwashana ni yayo. Kuchi mutuhasa kwimbulula chilweza cha Yakomba?

13-14. Yika twatamba kulinga nyi twalemekene umwe ndumbu ku mbunge?

¹³ Nyi tunazange kununga mu jila ya mwono, twatamba kulivwashana ni mandumbu jetu. (Roma 12:18) Mba yika twatamba kulinga nyi twalemekene umwe ndumbu ku mbunge? Chizechene ngwe Yakomba, twatamba kulemba kuli Yehova ni mbunge yeswe. Mutuhasa kwita kuli Yehova hanga atukwase tulivwashane ni ndumbwetu.

¹⁴ Twatamba kusa mashimbu hanga tulihengwole, ni kulihula ngwetu: ‘Shina munguhasa kwecha kulizata ha kulikehesa hanga ngwite ukonekeno kuli ndumbwami ni kulivwashana nenyi? Kuchi Yehova ni Yesu mevwa ha kumona ngwo, yami nalianga kuya hanga ngulivwashane ni ndumbwami?’ Kumbululo lietu ha yihula yino, mulihasa kutukwasa hanga twivwe liji lia Yesu, ni kulikehesa ha kufupa ndumbwetu hanga tulivwashane nenyi. Nyi twachilinga, mutuhasa kwimbulula chilweza cha Yakomba.

15. Kuchi kukaula yize yili ha A-Efwesu 4:2, 3, muchihasa kutukwasa kulivwashana ni ndumbwetu?

¹⁵ Shina unanyingika yize kachi yalingiwileko nyi Yakomba kalizachile muze ayile kuliwana ni yayo? Kachi yuma yapihile chinji. Kashika, muze mutuya ni kulivwashana ni umwe ndumbu, twatamba kulikehesa. (Tanga A-Efwesu 4:2, 3.) Yishima 18:19 unambe ngwo: “Mukwenu nyi wamuvulumuna, chikalu kuwana nenyi; kupupa limbo likolo chashi. Milonga yino yakala ngwe njalo ja mbonge.” Kwita ukonekeno ni kulikehesa muchihasa kutukwasa kwazulula njalo ja “mbonge” yacho.

16. Yika twatamba kulinga muze tunayi ni kulivwashana ni umwe ndumbu, nawa mumu liaka?

¹⁶ Twatamba kunyonga kanawa muze mutuya ni kuhanjika ni ndumbwetu ni chize mutuhanjika nenyi. Muze hitwalilulieka, twatamba kuya ni kufupa ndumbwetu yoze twalemekanga ku mbunge ni kusa tachi hanga apwe nawa sepa lietu. Ku uputukilo iye mahasa kwamba yuma yize kutushi kuzanga. Ha mashimbu jacho, muchihasa kupwa chashi kwivwa uli ni kufupa kulikalila, alioze nyi twalinga chino kuchishi kutukwasa kulivwashana. Kanda uvulama ngwe, kulivwashana ni ndumbwe, chili chilemu chinji kuhiana kufupa kusolola yoze wahengesanga.—1 Kori. 6:7.

17. Yika muhasa kulilongesa ha chilweza cha Gilbert?

 ¹⁷ Ndumbu Gilbert, kasele tachi jinji hanga alivwashane ni mwanenyi. Yamba ngwenyi: “Yami ni mwanami wa pwo, te kutushi kulivwashana. Ha miaka kuhiana yaali, nasele tachi jinji nguhanjike nenyi ni uhumikizo hanga tulivwashane.” Yika Gilbert alingile nawa? Mwene ngwenyi: “Hita shimbu te nakufupa kuhanjika ni mwanami, napwile ni kulemba, nawa te nakulianga kululieka manyonga jami hanga ngulihumikize nyi iye mangwamba maliji api.” Nanyingikine ngwami, ngunafupiwa kupwa ni mbunge ya kukonekena. Nalilongesele ngwami kuchafupiwile kusolola yoze walinga upi, alioze te ngunafupiwa wika kuneha sambukila. Mba yika yalingiwileko? Gilbert yamba ngwenyi: “Musono, nguli ni sambukila ya ku mbunge, mumu nakulivwashana ni asoko jami eswe.”

18-19. Nyi twalemeka umwe ndumbu ku mbunge yika twatamba kulinga, nawa mumu liaka?

¹⁸ Yika watamba kulinga nyi munyingika ngwe, walemeka umwe ndumbu ku mbunge? Kaula chiyulo cha Yesu hanga ulivwashane ni ndumbwe. Lemba kuli Yehova hakutwala ku chikuma chacho, nawa jikijila ha spiritu yisandu hanga yikukwase kupwa mukwa-sambukila. Nyi wachilinga, muwahilila nawa musolola ngwo, unapanjika liji lia Yesu.—Mateu 5:9.

¹⁹ Chili chipema chinji kunyingika ngwo, mumu lia zango, Yehova kakuzachisa Yesu Kristu “mutwe wa chikungulwila” hanga atusongwele. (Efwe. 5:23) Chizechene ngwe apostolo Petulu, Tiangu ni Yoano, tunazange kununga ni ‘kwivwa’ liji lia Kristu. (Mateu 17:5) Ha mutwe uno, twalilongesa chize mutuhasa kulivwashana ni ndumbu yoze twalemeka ku mbunge. Nyi twachilinga ni kununga mu jila yikehe yize yakutwala ku mwono, mutuwahilila haliapwila, nawa kulutwe lia matangwa mutukapwa ni uwahililo wa mutolo.