1, 2. (1) ¿Kʼãrẽta jarasi Daizezebara Juan, Santiago akʉza Pedroʼa? (2) ¿Kʼãrẽta kʼawuadai naʉ̃ artikulodera?

POAGA 32 paskua berabarida tẽã, Pedro, Santiago akʉza Juanta katuma Hermón kʼawa panasi: «Mama [Jesu] awuarasia ãzhi kĩrãbita, izhi kĩrã ʉ̃nasia ʉ̃madau kĩrãkʼa, izhi wuara totroa ʉ̃nasia ʉ̃na kĩrãkʼa» (Mat. 17:1-4). Ãya mawũã akʉkʉanʉne Daizezeba jarasi: «Naʉ̃ mʉ warra mʉãrã kʉãgʼa, mʉrã izhi kʼarea sobia bʼʉa, izhi bedʼeara ũrĩũdua» (Mat. 17:5). Pedro, Santiago akʉza Juan ãyi sãwũãbʉdeba ũdubisida Jesu bedʼea ũrĩbʉta, dayirãbida ãyide kĩrãkʼa okĩrãpanʉ.

² Artikulo berabaridade kʼawuasida kʼãrẽta idubʉibarabasita. Naʉ̃ artikulode kʼawuadayi kʼãrẽta jarasita Jesuba oibarata.

3. Mateo 7:13, 14de jarabʉdera, ¿kʼãrẽta oibara dayirã aba abakaʉba?

³ (Akʉra Mateo 7:13, 14). Jesubara jarasi o ũmebʉta o pẽsũabʉta akʉza o zromata. Mamina dayirã aba abakaʉba jidaibara saʉ̃ ode wãita, dayirãba bia jidabʉbʉrʉ ewari jõmaʉ̃nẽ baseabʉ.

4. Jara ũrĩbira sãwũãchuta o zromara.

⁴ Naʉ̃ o jidaira dayirã jõmaʉ̃ba biʼia krĩchaibara.  Ẽbẽra mejãchaʉba kãga o zromata maʉ̃ odera kʼaiba kasea ẽ baera. Mamina ẽbẽra mejãchaʉba kʼawuada ẽ Diaruba [Ãtomĩa] zokʼabʉta akʉza kãgabʉta beimarẽã (1 Cor 6:9, 10; 1 Juan 5:19).

5. ¿Ʉ̃kʉrʉra kʼãrẽ zareata obʉ o pẽsũade wãita?

⁵ Jesubara jarasi, ẽbẽra wiña wãita o pẽsũadera. ¿Kʼãrẽa? Ẽbẽra mejãchaʉba jaradiapanʉ baera sewa nebʉrata Daizeze ʉ̃rʉ (Mat. 7:15). Naʉ̃ drʉadera biobʉ religionʼra, maʉ̃ kʼarea ẽbẽrabara kʼawua ẽ saʉ̃ religionba wãrĩnuta jaradiabʉta. Mamina Jesuba jarasi, maraba ũrĩbʉbʉrʉ mʉ̃ bedʼeata mʉ̃ kʼaidubemarabayi akʉza jarasi: «Wãrĩnuba ẽdrʉbigayi» (Juan 8:31, 32). Kʼãrẽ bia, bʉa oẽ basi baera wuabema ẽbẽraba obʉ kĩrãkʼa, awuarabʉrʉ jʉrʉsi saʉ̃ta wãrĩnuta Daizeze Bedʼeata kʼawua jʉ̃drʉsi kʼawuaita kʼãrẽta zokʼabʉta Daizezeba. Akʉza ũrĩsi Jesuba jaradiabʉta adewara kʼawuasi edaʉde dayirãitara zareta aripe oita Jeowaba jarabʉra akʉza daya nãã obada idubʉita (Mat. 10:34-36). Bʉitara naʉ̃ra zarebasi baibara, mamina Jeowata sobiabikĩrãbasi baera idubʉsi nãã kayirua obadara. Maʉ̃ kʼarea Jeowara mejãcha sobiabaibara bʉ kʼarea (Prov. 27:11).

6. Salmo 119:9, 10, 45 akʉza 133de jarabʉdebara, ¿sãwũã kʼarebai Daizeze ode bʼaita?

⁶ Dayirãta o pẽsũade panʉbʉrʉ, ¿kʼãrẽba kʼarebai naʉ̃ odeba ãĩ wã ẽ baita? Bari jaraita, ʉ̃kʉrʉ drʉadera okida bʉepanʉare jiorro omata yi motode akʉza karro wãbʉta udu wã ẽ marẽã. Ẽbẽra yi ode motode mawũã ẽ bʉrʉ karrode wãbʉra kĩrʉ ẽ bayi maʉ̃ jiorro bʉepanʉ kʼareara. Maʉ̃ jiorrora Daizeze Bedʼeara kĩrãkʼabʉ, naʉ̃ba kʼarebabʉ dayi Daizeze ode kʼẽrẽpa bʼaita (akʉra Salmo 119:9, 10, 45, 133).

7. ¿Warrarabara sãwũã akʉibara o pẽsũabʉra?

⁷ Warrara, ¿maraitara jipa zareaka Daizezeba zokʼabʉ oira? Diarubara kãgabʉ bʉa akʉmarẽã warrara naʉ̃ drʉadebʉba obʉta akʉza mejãcha sobiapanʉta yi Daizeze ode panʉraira. Akʉza krĩchamarẽã kãgabʉ, bʉa Daizezeba zokʼabʉta obʉ baera bʉra sobiabʉ ẽãta warrara kolegiodebʉ kĩrãka akʉza ẽbẽra internetʼne ũdukʼawuabʉ kĩrãkʼa *. Kĩrãbera jõma yi o zromane panʉra Diaru kʼaidupanʉ baera beita, mamina Jeowabara nebiata diayi yi o pẽsũade panʉara (Sal. 37:29; Is. 35:5, 6; 65:21-23).

8. ¿Warrara kʼãrẽta kʼawuaseabʉ Olaf nebʉradebara?

⁸ Atia ũrĩnaña dayi mebẽã Olaf * berabarida nebʉrata. Yi neũdukʼawua kolegiodebemaba kãgabasi iyi mia erkʼãĩmarẽã. Iya jara ũrĩbiside Jeowa ʉ̃rʉ Kʼawuabipanʉrãbara obʉta  Daizeze Bedʼeaba zokʼabʉ̃ta, aramaʉ̃ta wẽrãra kolegiodebemaba krĩchasida kʼaiba nãã mia erkʼãĩbita. Mamina iyira maʉ̃ʼa yi edebi ẽ basi. Iya jarabʉ: «Adewara mʉ̃ʼa nejaradiabarirabara jarasi mʉ̃ta wãmarẽã unibersidaeda wãbʉbʉrʉ nekʼãrẽ bia mejãcha erbaita». ¿Kʼãrẽta osi mebẽã Olafbara maʉ̃ra jõma awuantaita? Iyara jara ũrĩbibʉ: «Jʉrʉsita neũdukʼawua bia kongregasione. Maʉ̃rara iyi mebẽrãra kĩrãkʼabasita. Akʉza biʼia kʼawua jʉ̃drʉsi Daizeze Bedʼea ʉ̃rʉ, naʉ̃ba kʼarebasi audre zarea bʼaita Jeowa ode».

9. ¿Kʼãrẽta odaibara o pẽsũadeba ãĩ wã ẽ baita?

⁹ Diarubara kãgabʉ o ewari jõmaʉ̃ne babibʉdeba ãĩ wãnamarẽã. Ẽbẽrarã mejãchaʉta o zromane wãmarẽã, mawũã jõmaʉ̃ta beimarẽã (Mat. 7:13). Mamina ũrĩnara Jesuba zokʼabʉta akʉza akʉdara o pẽsũa dayi  ewari jõmaʉ̃nẽ babibʉta, namaʉ̃ba ẽdrʉda ẽ bayi. Atia akʉdayi awuru bedʼea Jesuba jaradata dayirãba oibarata.

10. Mateo 5:23, 24de jarabʉdera, ¿kʼãrẽta nããra omarẽã jarasi Jesubara?

¹⁰ (Akʉra Mateo 5:23, 24). Jesubara naʉ̃ testodera bedʼea biata jarasi judioraita. Krĩchara ẽbẽra abaʉba templode nedʉwʉrʉta diaitanʉmʉta sakripisio omarẽã saserdoteʼa. Maʉ̃ mawũã diaidekʉde kĩrãbesibʉrʉ mebẽã abaʉta iyiʉ̃me biabʉ ẽãta, maʉ̃ idubʉ kʼãrãpe wãibarabasi yi mebẽãma ibiade panaita. ¿Kʼãrẽa mawũã oibarabasi? Jesuba jarasi baera ũrĩbisi «naara bʉzhi mebeata ibiadʼe odua».

11. ¿Kʼãrẽta osi Jacobʼbara yi mebẽãʉ̃me ibiade bʼaita?

¹¹ Yiza biata kʼawuaseapanʉ Jacobdeba, sãwũã mebẽrãbawara ibiadepanai ʉ̃rʉ. Jacob iyi drʉadeba jĩgarabʉta, poaga 20 berabaribʉrʉde Daizezeba angel aba zokʼabʉesi jẽda iyi drʉama zemarẽã (Gén. 31:11, 13, 38). Mamina Jacobʼra bedʼea zromata erbasi: yi mebẽã Esaúʼba iyita beakĩrãbasi baera (Gén. 27:41). Mamina Jacobʼra biode perabasi yi mebẽãra iyiʉ̃me wabida kĩrʉbʉ baera (Gén. 32:7). Aramaʉ̃ta, ¿kʼãrẽta osi Jacobʼbara maʉ̃ ara oita? Nããra Jeowa soiduba yiwidʼisi, yi ũmeta Esaúʼa nebiata mejãcha diabʉesi (Gén. 32:9-15). Yi ũbeata ãyi yi daucha zesidera aramaʉ̃ta Jacobʼra sãkokode kʉbesi Esaú nãã, iyara kĩrã abapai oẽ basi sãkokode kʉbe ma 7 osi, mawũã ũdubisi Jacobʼbara eda krĩchabʉta akʉza wawia oũdubibʉta yi mebẽãra (Gén. 33:3, 4).

12. ¿Kʼãrẽta kʼawuapanʉ Jacobdebara?

¹² Dayirãbara nekʼãrẽ biata kʼawuaseabʉ Jacobʼba yi mebẽã akʉ wãi nãã kʼãrẽ odadeba akʉza iyi sãwũã bedʼeadadeba nããra Jacobʼra Jeowa yiwidʼisi iyita kʼarebamarẽã, maʉ̃are osi iya yiwidʼidade. Mawũã yi mebẽã Esaúʼʉ̃me daucha zebʉrʉdera ibiade bedʼeadaita akʉza yi kʼaikʼaia ẽ basi adewara iya kãgabasi baera yi mebẽãʉ̃me aduʼa panaita.

13, 14. ¿Kʼãrẽta odaibara kʼawuasibʉrʉ daya mebẽã abaʉta kĩrʉbisita?

¹³ Yi Jeowa odepanʉrabara kãgapanʉ wuabemabawara aduʼa ibiade panaita (Rom. 12:18). Maʉ̃ kʼarea, ¿kʼãrẽta odaibara kʼawuasibʉrʉ daya mebẽã abaʉta kĩrʉbisita? Abarika Jacob kĩrãkʼa dayirãbara Jeowa soiduba widibara kʼarebamarẽã maʉ̃ mebẽãʉ̃me aduʼa bʼaita.

¹⁴ Adewara dayirãkʉza krĩchaibara: Mʉ̃ kayirua osidera, ¿mʉ̃a ũdusika mʉ̃ nemitia odara, jʉrʉsika wuabemabawara aduʼa bʼaita akʉza edabʉta ũdubisika? ¿Jeowata akʉza Jesuta sãwũã sentibaiba mʉ̃yiareba jʉrʉra aduʼa bʼaita mebẽrãbawara? Naʉ̃ ʉ̃rʉ bia krĩchabʉba kʼarebayi ũrĩkĩrãita  Jesuba jaradiabʉta, dayirãreba orradaita mebẽrãbawara ibiade aduʼa bʼaita. Jacob yizabara biode kʼarebayi maʉ̃ aripe oita.

15. ¿Sãwũã kʼarebabʉ Efesios 4:2, 3de jarabʉdebara mebẽrãbawara aduʼa bʼaita?

¹⁵ Jacobʼba jarada ʉ̃rʉ jarabasibʉrʉ Esaúʼa aña osita, ¿kʼãrẽta berabarikasi? Audre yõ kasida. Maʉ̃ba dayi mebẽãʉ̃me bedʼea zromata ara odaibʉrʉ krĩchaibara dayirã iyi edabʉta, (akʉra Efesios 4:2, 3). Proverbios 18:19ba jarabʉ: «Mebẽã kĩrʉbʉra pʉwʉrʉ audu serrabʉ kĩrãkʼabʉ». Ẽbẽra mejãcha kĩrʉnʉmʉnera iyi sora puerta serrabʉ kĩrãkʼabʉ, mamina dayirãba wididara dayi nemitia odata kĩrãduamarẽã, edaʉde ãyira dayirãbawara bedʼeakĩrãbʉ.

16. ¿Mebẽãʉ̃me bedʼeai nãã kʼãrẽta krĩchaibara?

¹⁶ Adewara biode yibia bayi nãã krĩchaita kʼãrẽta jaraita akʉza sãwũã jaraita, mawũã oda tẽã mebẽã dayiʉ̃me kĩrʉbʉʼʉ̃me bedʼeaibara dayirã krĩchara iyi sode pʉabʉta taʉbikĩrãbʉ. Mamina iyiʉ̃me bedʼeabʉrʉde edaʉde dayirã bedʼea mitiata jaraseabʉ, maʉ̃ kʼarea mejãcha kĩrʉrãra kĩrãbera dayirãra mebẽãʉ̃me ibiade aduʼa bakĩrãpanʉta. Audre yibia dayi mebẽrãbawara aduʼa bʼaita akʉnʉmaira iya kʼãrẽta bia osita mawũã ẽ bʉrʉ saʉ̃ta aña osita (1 Cor. 6:7).

17. ¿Bʉara kʼãrẽta kʼawuabʉ mebẽã Gilbertdeba?

¹⁷ Akʉdaya kʼãrẽta osita mebẽã abaʉba, yi trʉ̃ Gilbert. Wuabemabawara aduʼa bʼaita iya jara ũrĩbibʉ: «Mʉ̃ra bedʼea zroma erbasi mʉ̃yi kaume, poaga ũmeba mʉ̃ zarea obʉta iyiʉ̃me ibiade bedʼeaita, mawũã dai bedʼeapanʉ taʉ ẽ baita, ¿kʼãrẽba kʼarebasi mawũã oita? Mʉ̃ kauʼa bedʼeai nãã Jeowa yiwidʼibasi akʉza krĩchabasi kʼãrẽta oita iya mʉ̃ʼa bedʼea mitiata jaraira mʉ̃ krĩchara. Iya nemitia jõma odata kĩrãduaibasi akʉza jʉrʉbasi iyiʉ̃me ibiade aduʼa bʼaita, naʉ̃ta audre yibia. ¿Naʉ̃ba kʼãrẽne kʼarebasi mebẽã Gilbertʼa? Iya jarabʉ: «Mʉ̃ra idira mʉ̃ mebẽrã jõmaʉ̃nẽ  ibiade panʉ akʉza aduʼa bedʼeapanʉ».

18, 19. ¿Dayirãba mebẽrãta kĩrʉbisibʉrʉ kʼãrẽta oibara?

¹⁸ Mawuẽrã, ¿kʼãrẽta odaibara dayirãba kʼawuadara mebẽã abaʉta kĩrʉbisita? Ũrĩnaibara Jesuba zokʼadata mebẽrãbawara aduʼa bʼaita, Jeowa yiwidʼidaibara ãyi ʉ̃rʉ akʉza wididaibara Jeowa jaure zareaba kʼarebamarẽã maʉ̃ bedʼea zroma ara oita. Mawũã opanʉbʉrʉ sobiapanañi akʉza ũdubidayi Jesuba jaradata ũrĩpanʉta (Mat. 5:9).

¹⁹ Biode biga diapanʉ Jeowa yi warra Jesukristodeba dayirãta zokʼabʉ baera, iyira «kongregasion buru» (Efes. 5:23). Abarika Pedro, Santiago akʉza Juanba ũrĩna kĩrãkʼa dayirãbida ũrĩnadrʉ Jesuba jarabʉra (Mat. 17:5). Dayirãba ũrĩbʉ ũdubira jʉrʉibara dayi mebẽã kĩrʉbidaʉ̃me aduʼa bʼaita adewara dayirãta o pẽsũa panʉbʉrʉ idi nebiata mejãcha ũduyi akʉza ʉ̃ra zeidera ewari jõmaʉ̃nẽ aduʼa ibiade sobiapanañi.