1-2. (a) Ebɛnadze na Nyankopɔn hyɛɛ Jesus n’asomafo baasa dɛ wɔnyɛ, na wɔyɛɛ hɔn adze dɛn? (b) Ebɛnadze na yebosusu wɔ adzesua yi mu?

ABER a wodzii Apaho no wɔ afe 32 H.B. wiei no, Jesus n’asomafo no mu baasa Peter, James nye John hun enyido-adzehu bi a nna ɔyɛ nwanwa. Jesus kɔr kokwaa tsentsen bi do. Obotum aba dɛ nna ɔyɛ Bepɔw Hermon n’afã beebi, na ɔsakyeree wɔ hɔn enyim. Kyerɛwnsɛm no kã dɛ: “N’enyim hyerɛɛn dɛ ewia, na n’atar yɛɛ fitaa dɛ kan.” (Matt. 17:1-4) Ber a enyido-adzehu no reba n’ewiei no, asomafo no tsee Nyankopɔn ne ndze dɛ ɔrekã dɛ: “Oyi nye mo Dɔba a ɔsɔ m’enyi: hom ntsie no.” (Matt. 17:5) Mbrɛ dɛm asomafo baasa yi bɔɔ hɔn bra no kyerɛɛ dɛ wotsiee Jesus ampa. Yɛpɛ dɛ yesũasua dza wɔyɛe no.

² Yehunii wɔ adzesua a odzi iyi enyim no mu dɛ sɛ yetsie Jesus ne ndze a ɔkyerɛ dɛ onnyi dɛ yɛyɛ ndzɛmba bi. Adzesua yi mu no, yɛbɔhwɛ ndzɛmba ebien bi a Jesus kãa dɛ yɛnyɛ.

3. Dɛ mbrɛ Matthew 7:13, 14 ma yehu no, ebɛnadze na ɔwɔ dɛ yɛyɛ?

³ Kenkan Matthew 7:13, 14. Hyɛ no nsew dɛ Jesus kãa abow ebien a wɔdze kɔ kwan ebien do ho asɛm. Kwan kor yɛ “tɛtɛr” na kor yɛ “heaheaba.” Wɔannkã kwan a otsĩa ebiasa biara ho asɛm. Hɛnankasa na ɔwɔ dɛ yɛpaw kwan a yɛbɛnantsew  do. Iyi yɛ gyinae a no ho hia paa a ɔwɔ dɛ yesi wɔ hɛn asetsena mu. Osiandɛ, ɔno na ɔbɛkyerɛ dɛ yebenya onnyiewiei nkwa anaa yennkenya.

4. Ebɛkã ɔkwan “tɛtɛr” no ho asɛm dɛn?

⁴ Ɔwɔ dɛ yɛma nsonsonee a ɔda akwan ebien no ntamu no tsena hɛn adwen mu. Nyimpa pii na wɔnam ɔkwan “tɛtɛr” no do, osiandɛ ɔnnyɛ dzen dɛ wɔbɛnantsew do. Awerɛhosɛm nye dɛ, nyimpa pii esi gyinae dɛ wɔbɔkɔ do anantsew dɛm kwan no do na wɔaayɛ dza nyimpadɔm a wɔnam do no yɛ no bi. Wonnhu dɛ Satan Abɔnsam na oripiapia hɔn dɛ wɔmfa kwan a wɔdze kɔ ɔsɛɛ mu no do.​—1 Cor. 6:9, 10; 1 John 5:19.

5. Ebɛn mbɔdzen na binom bɔe ansaana woruhu ɔkwan “heaheaba” no na woeetum anantsew do?

⁵ Ɔkwan “heaheaba” no nntse dɛ “tɛtɛr” no. Jesus kãa dɛ nyimpa kakraabi na wohu. Ebɛnadze ntsi a? Wɔ nyiyimu a odzi hɔ no mu no, Jesus bɔɔ n’ekyirdzifo no kɔkɔ wɔ nkɔnhyɛfo atorfo ho. (Matt. 7:15) Wobu akontaa dɛ, ɔsom mpempem pii na ɔwɔ hɔ, na hɔn mu dodowara kã dɛ wɔkyerɛkyerɛ nokwar no. Iyi ntsi, nyimpa ɔpepem pii hɔn abaw mu ebu na hɔn adwen etu afora ma ntsi, wɔnnhaw hɔnho mpo dɛ wɔbɔhwehwɛ kwan a ɔkɔ nkwa mu no. Naaso, ɔnnyɛ dzen dɛ wobohu. Jesus kãa dɛ: “Sɛ hom tsena m’asɛm mu a, nna hom yɛ m’esuafo ampa; na hom bohu nokwar no, na nokwar no bɛyɛ hom adehye.” (John 8:31, 32) Yɛkamfo wo dɛ ehwehwɛɛ nokwar no na enndzi nyimpa dodow no ekyir. Eyeer woho sũaa Nyankopɔn n’Asɛm no ama eehu dza ɔhwehwɛ fi wo hɔ, na itsiee Jesus ne nkyerɛkyerɛ. Bio so, isũaa dɛ Jehovah hwɛ kwan dɛ ebɔpow ator som nkyerɛkyerɛ na aatwe woho efi afahyɛ ahorow a ofi abosonsɔr mu no ho. Afei so, ibohun dɛ obotum ayɛ dzen dɛ ebɛyɛ Jehovah n’apɛdze na aatwe woho efi ndzɛmba a n’enyi nngye ho no ho. (Matt. 10:34-36) Bi a nna ɔnnda famu mma wo dɛ ebɛyɛ nsesa a ɔtsetse dɛm. Naaso osiandɛ edɔ wo sor Egya no na epɛ dɛ esɔ n’enyi ntsi, eyeer woho dɛ ebɛyɛ dɛm. Dza ayɛ yi ama Jehovah n’enyi agye!​—Mbɛ. 27:11.

6. Dɛ mbrɛ Ndwom 119:9, 10, 45, 133 kyerɛ no, ebɛnadze na ɔbɔboa hɛn ma yeetum anantsew ɔkwan heaheaba no do?

⁶ Sɛ yɛhyɛ ase dɛ yɛrenantsew ɔkwan heaheaba no do a, ebɛnadze na ɔbɔboa hɛn ma yaakɔ do anantsew do? Ma yensusu dɛm mfatoho yi ho. Wɔ aman ahorow bi mu no, wɔdze ndadze agye kaar kwan a ɔwɔ bepɔw do no ho. Wɔayɛ dɛm mbrɛ ɔbɛyɛ a ɔbɔbɔ ahɛnkafo no nye hɔn hɛn no ho ban amma woeemmfi bepɔw no do annhwe famu. Hɛnkanyi biara nnyi hɔ a ɔbɛkã dɛ adze a ɔtse dɛm no ma noho kyer no! Jehovah ne mbra a ɔwɔ Bible mu no tse dɛ ndadze a wɔdze agye kwan ho no. Ɔboa hɛn ma yetum nantsew ɔkwan heaheaba no do.​—Kenkan Ndwom 119:9, 10, 45, 133.

7. Ɔwɔ dɛ mbabun bu ɔkwan heaheaba no dɛn?

⁷ Mbabun, ana ɔtɔ da a hom tse nka dɛ Jehovah ne mbra kyekyer hom? Dɛm na Satan pɛ dɛ hom tse nka. Ɔpɛ dɛ hom dze hom adwen si ndzɛmba a hɔn a wɔnam kwan tɛtɛr no do no reyɛ no do. Ɔpɛ dɛ hom nya adwen dɛ wɔregye hɔn enyi araa ma! Obotum afa dza wo skuulfo yɛ no do anaa dza ihu wɔ intanɛt do ama aatse nka dɛ atɔ mu. Satan pɛ dɛ inya adwen dɛ Jehovah ne mbra no kyekyer wo, na ɔmma innya  enyigye a epɛ no wɔ asetsena mu. * Naaso ma ɔntsena w’adwen mu dɛ: Satan mmpɛ dɛ hɔn a wɔnam ɔkwan a ɔkɔ ɔsɛɛ mu no do no hu dza ɔbɔto hɔn daakye. Naaso Jehovah dze, ɔama ehu nhyira a hɔn a wɔkɔ do nantsew ɔkwan a ɔkɔ nkwa mu no do no benya no.​—Ndw. 37:29; Isa. 35:5, 6; 65:21-23.

8. Ebɛnadze na mbabun botum esũa efi Olaf no nhwɛdo no mu?

⁸ Ma yensusu hɛn nua aberantsɛ bi a wɔfrɛ no Olaf n’asɛm no ho, na yɛnhwɛ dza yebotum esũa efi mu. * Nna no skuulfo pɛ dɛ wɔdaadaa no ma ɔbɔ ndwamanbra. Ɔkãa kyerɛɛ hɔn dɛ ɔyɛ Jehovah Dasefo, na ɔdze Bible mu mbra a ɔfa abrabɔ ho no bɔ ne bra. Aber a ɔkãa dɛm no, no skuulfo mbaa no bi dze sii hɔn enyi do dɛ wɔbɛyɛ araa ma ɔnye hɔn aada. Olaf amma hɔn efir no ammpa no,  ɔkɔr do yɛɛ dza ɔtsen. Nnyɛ dɛm ɔhaw yi nko na ohyiae. Olaf kãa dɛ: “M’akyerɛkyerɛfo tutui guu m’asomu dɛ monkɔ skuulpɔn, osiandɛ ɔno bɛma nkorɔfo ebu me anaa woedzi me nyi. Wɔkãa dɛ sɛ mannkɔ a, mirinnya edwuma papa biara nnyɛ na mirinnya enyigye wɔ asetsena mu.” Ebɛnadze na ɔboaa Olaf ma ogyinaa nhyɛdo yi ano? Ɔkãa dɛ: “Menye enuanom a wɔwɔ m’asafo mu no bɔɔ pampee. Wɔbɛyɛɛ dɛ m’ebusua ankasa. Afei so, mehyɛɛ ase sũaa Bible no kɔr ekyir. Bible no a musũae kɔr ekyir no boaa me ma megyee dzii paa dɛ mowɔ nokwar no mu. Iyi maa misii m’adwen pi dɛ mobɔsom Jehovah.”

9. Hɔn a wɔpɛ dɛ wɔkɔ do nantsew ɔkwan heaheaba no do no, ebɛnadze na ɔwɔ dɛ wɔyɛ?

⁹ Satan dze, dza ɔpɛ ara nye dɛ ibefi kwan a ɔkɔ nkwa mu no do. Ɔpɛ dɛ ekɛka nyimpa pii a wɔnam ɔkwan tɛtɛr a “wɔdze kɔ sɛɛ mu” no do no ho. (Matt. 7:13) Naaso, sɛ yɛkɔ do tsie Jesus na yehu ɔkwan heaheaba no dɛ ɔbɔ hɛnho ban a, yebotum akɔ do anantsew do. Afei, hom mma yɛnhwɛ biribi fofor a Jesus kãa dɛ yɛnyɛ.

10. Dɛ mbrɛ Matthew 5:23, 24 ma yehu no, ebɛnadze na Jesus kãa dɛ yɛnyɛ?

¹⁰ Kenkan Matthew 5:23, 24. Wɔ kyerɛwsɛm yi mu no, Jesus kãa biribi a nna no ho hia Jewfo a woritsie no no paa. Twa ho mfonyin hwɛ dɛ Jewnyi bi aba asɔrfi hɔ na ɔdze abowa a ɔdze robɔbɔ afɔr no rema ɔsɔfo no. Sɛ dɛm aber no ɔkaa wɔ hɔ dɛ no nua wɔ asɛm tsia no a, nna ɔwɔ dɛ ogyaa n’afɔrbɔdze no wɔ hɔ na ofi hɔ “kɔ.” Ebɛnadze ntsi a? Nna ebɛnadze na no ho hia koraa kyɛn afɔr a ɔrobɔbɔ ama Jehovah no? Jesus kãa no pefee dɛ: “Dzi kan . . . nye wo nua nkɔbɔ mu.”

11. Ebɛnadze na Jacob yɛe dze siesiee ɔnye Esau ntamu asɛm no?

¹¹ Sɛ yesusu asɛm bi a osii wɔ egyapanyin Jacob n’asetsena mu no ho a, ɔbɔboa hɛn ma yeenya esuadze a mfaso wɔ do wɔ mbrɛ yɛnye afofor besiesie hɛn ntamu no ho. Jacob fii no kurow mu kɛtsenaa beebi. Ɔno ekyir bɛyɛ mfe 20 no, Nyankopɔn nam ɔbɔfo bi do kãa kyerɛɛ no dɛ ɔnsan nkɔ no kurow mu. (Gen. 31:11, 13, 38) Naaso nna ɔhaw bi wɔ hɔ. Mber bi a etwa mu no, nna no nua Esau pɛ dɛ oku no. (Gen. 27:41) Nna Jacob nyim dɛ no nua Esau da ho ara wɔ no ho ebufuw na iyi maa “n’akoma tuu kɛsenara na no ho hiahiaa no.” (Gen. 32:7) Ebɛnadze na Jacob yɛe dze siesiee ɔnye no nua no ntamu asɛm no? Odzii kan fii n’akoma mu bɔɔ asɛm no ho mpaa. Ɔno ekyir no, ofii n’akoma mu kɛkyɛɛ Esau adze. (Gen. 32:9-15) Ekyir koraa no, aber a enuanom a hɔn ntamu atsetsew no hyiae no, Jacob daa enyidzi edzi kyerɛɛ Esau. Jacob bɔɔ no mu adze mpɛn esuon wɔ Esau n’enyim! Jacob brɛɛ noho adze na ɔdaa obu edzi kyerɛɛ Esau. Iyi maa ɔnye no siesiee hɔn ntamu asɛm no.​—Gen. 33:3, 4.

12. Ebɛnadze na yesũa fi Jacob hɔ?

¹² Ndzɛmba a Jacob yɛe ansaana orikehyia Esau nye dza ɔyɛe ber a ohyiaa no no, yenya esuadze bi fi mu. Jacob fii ahobrɛadze mu serɛɛ Jehovah hɔ mboa. Afei ɔyɛɛ ne mpaabɔ no ho edwuma; ɔyɛɛ dza obotum biara dɛ ɔnye no nua no bɔbɔ mu asomdwee mu. Aber a wohyiae no, Jacob annyɛ biribiara annkyerɛ dɛ ɔno na n’asɛm yɛ dɛw. Nna dza Jacob pɛ ara nye dɛ ɔnye no nua no besiesie hɔn ntamu. Yebesi dɛn esũasua dza ɔyɛe no?

13-14. Sɛ yɛfom hɛn nua bi a, ebɛnadze na ɔsɛ dɛ yɛyɛ?

¹³ Sɛ yɛpɛ dɛ yɛkɔ do nantsew nkwa kwan no do a, ɔsɛ dɛ yɛnye hɛn nuanom tsena asomdwee mu. (Rom. 12:18) Sɛ yehu dɛ yɛafom hɛn nua bi a, ebɛnadze na ɔwɔ dɛ yɛyɛ? Ɔwɔ dɛ yefi hɛn akoma mu bɔ mpaa dɛ mbrɛ Jacob yɛe no. Yebotum aserɛ Jehovah dɛ onhyira mbɔdzen a yɛrobɔ dɛ yɛnye hɛn nua no besiesie hɛn ntamu no do.

¹⁴ Afei so, ɔwɔ dɛ yɛgye ber hwehwɛ hɛn mu. Yebotum ebisa hɛnho nsɛm bi tse dɛ: ‘Ana mowɔ ɔpɛ dɛ mebɛgye mo mfom ato mu, mibefi ahobrɛadze mu apa kyɛw, na maahwehwɛ asomdwee? Sɛ midzi kan tu anamɔn dɛ menye mo nua bi besiesie hɛn ntamu asɛm a, Jehovah na Jesus bɛtse nka dɛn?’ Mbuae a yɛdze bɛma no bɛka hɛn ma yeetsie Jesus na yeefi ahobrɛadze mu akɔ hɛn nua no nkyɛn dɛ yɛnye no rikesiesie hɛn ntamu. Yɛyɛ dɛm a nna yerusũasua dza Jacob yɛe no.

15. Ebɛn kwan do na asɛm a ɔwɔ Ephesusfo 4:2, 3 no bɔboa hɛn ma yeesiesie yɛnye hɛn nua bi ntamu asɛm?

¹⁵ Fa no dɛ aber a Jacob hyiaa Esau no, ɔyɛɛ biribi dze kyerɛɛ dɛ ɔno na n’asɛm yɛ dɛw, ehwɛ a nkyɛ ebɛn asɛm besi? Nkyɛ ɔrennyɛ asɛm papa koraa! Sɛ yɛkɔ hɛn nua bi nkyɛn dɛ yɛnye no rikesiesie hɛn ntamu asɛm a, ɔwɔ dɛ yɛbrɛ hɛnho adze. (Kenkan Ephesusfo 4:2, 3.) Mbɛbusɛm 18:19 kã dɛ: “Onua a wɔafom no no, ɔyɛ dzen dɛ nsa bɛka no, sen kurow dzendzen: na dɛm aperper no tse dɛ aban adaban.” Sɛ yefi hɛn akoma mu pa kyɛw a, ɔbɛma oenya ɔpɛ dɛ ɔnye hɛn besiesie asɛm no.

16. Ebɛn adze fofor na ohia dɛ yɛyɛ, na ebɛnadze ntsi a?

¹⁶ Adze fofor so a ohia dɛ yɛyɛ nye dɛ, ɔwɔ dɛ yɛdwen asɛm a yɛbɛkã akyerɛ hɛn nua no ho nye mbrɛ yebesi akã no. Yɛayɛ dɛm ewie no, ɔwɔ dɛ yɛkɔ hɛn nua a yɛafom no no nkyɛn a hɛn botae nye dɛ yɛnye no rikesiesie hɛn ntamu akasakasa no. Ahyɛse no dze, bi a ɔbɛkã nsɛm a ɔyɛ yaw akyerɛ hɛn. Naaso sɛ yɛma hɛn bu fuw anaa yɛkekã nsɛm bi dze yiyi hɛnho ano a, ana ɔno bɛma yeetum esiesie hɛn ntamu ma asomdwee aba? Oho koraa. Ma ɔntsena w’adwen mu dɛ wo nua a enye no besiesie hom ntamu no ho hia koraa kyɛn dɛ ebɛkyerɛ dɛ w’asɛm yɛ dɛw na ɔno n’asɛm nnyɛ dɛw.​—1 Cor. 6:7.

17. Ebɛnadze na ibotum esũa efi dza Gilbert yɛe no mu?

 ¹⁷ Onua bi a wɔfrɛ no Gilbert yeer noho dɛ ɔnye afofor bɛtsena asomdwee mu. Ɔkãa dɛ: “Nna menye mo busuanyi bi a ɔbɛn me paa ntamu nnyɛ papa. Mobɔɔ mbɔdzen dɛ mibefi m’akoma mu nye no akasa abotar mu mbrɛ ɔbɛyɛ a yebesiesie hɛn ntamu. Meyɛɛ dɛm bɔbor mfe ebien.” Ebɛnadze bio na Gilbert yɛe? Ɔkãa dɛ, “Aber biara a nna menye no bɛkasa no, nna midzi kan bɔ mpaa na misiesie m’adwen ama sɛ ɔkã nsɛm bi a ɔyɛ yaw a wɔannhaw me. Nna no ho hia dɛ migyaa nsɛm mu ma ɔka. Mubohun dɛ ɔnnsɛ dɛ mobɔ mbɔdzen dɛ mebɛkyerɛ dɛ emi na m’asɛm yɛ dɛw, mbom dza nna ohia nye dɛ mebɛma asomdwee atsena hɛn ntamu.” Ebɛnadze na ofii dza Gilbert yɛe yi mu bae? Ɔkãa dɛ: “Ndɛ, osiandɛ menye m’ebusuafo nyinara tse kama ntsi, m’asomu dwe me.”

18-19. Sɛ yɛafom obi a ebɛnadze na ɔsɛ dɛ yɛyɛ? Ebɛnadze ntsi na ɔwɔ dɛ yɛyɛ dɛm?

¹⁸ Dze besi ha yi, sɛ ihu dɛ afom wo nua Christiannyi bi a, ebɛnadze na ɔsɛ dɛ eyɛ? Fa Jesus n’afotu no yɛ edwuma, na enye no nkesiesie hom ntamu. Bɔ asɛm no ho mpaa na serɛ Jehovah dɛ ɔmfa no sunsum krɔnkrɔn no mboa wo ma enye wo nua no ntsena asomdwee mu. Sɛ eyɛ dɛm a w’enyi bɛgye, na ɔno so bɛkyerɛ dɛ iritsie Jesus ampa.​—Matt. 5:9.

¹⁹ Yɛda Jehovah ase dɛ ɔnam Jesus Christ a ɔyɛ “asɔr [anaa asafo no] ne tsir” no do ma hɛn akwankyerɛ a ɔdɔ wɔ mu. (Eph. 5:23) Dɛ mbrɛ asomafo Peter, James nye John tsiee Jesus no, hom mma yensi hɛn bo dɛ hɛn so ‘yebetsie no.’ (Matt. 17:5) Wɔ adzesua yi mu no, yeebohu dɛ sɛ yɛfom hɛn nuanom Christianfo na yɛnye hɔn siesie hɛn ntamu a, ɔkyerɛ dɛ yeritsie Jesus. Sɛ yɛnye hɛn nuanom tsena asomdwee mu, na yɛkɔ do nantsew ɔkwan heaheaba no do a yebenya enyigye ndɛ, na daakye so yebenya enyigye daa.