1-2. (a) Na cava ratou vakaroti kina na tolu na yapositolo, na cava ratou qai cakava? (b) Cava eda na veivosakitaka ena ulutaga qo?

NI OTI na Lakosivia ena 32 G.V., eratou raica e dua na raivotu vakatubuqoroqoro na yapositolo o Pita, Jemesa, kei Joni. E matalia na kena irairai o Jisu e matadratou ena dua na ulunivanua cecere, rairai o Ulu i Erimoni. “E serau na matana me vaka na matanisiga, qai ramase na nona isulu e sau me vaka na cina.” (Maciu 17:1-4) Voleka ni oti na raivotu qori, ratou rogoca na yapositolo ni kaya na Kalou: “Qo na Luvequ lomani, au vakadonuya. Dou rogoci koya.” (Maciu 17:5) Eratou vakaraitaka sara ga ena nodratou bula na tolu na yapositolo ni ratou vakarorogo vei Jisu. Eda na via vakatotomuri ratou tale ga.

² Ena ulutaga sa oti, eda vulica kina ni okati ena noda vakarorogo vei Jisu noda muduka eso na ka eda cakava tiko. Eda na vulica ena ulutaga qo e rua na ka e tukuna o Jisu meda cakava.

3. Na cava e tukuni ena Maciu 7:13, 14 meda cakava?

³ Wilika Maciu 7:13, 14. Dikeva ni tukuna o Jisu e rua na matamata erau basika ina rua na sala, e dua e “galala” dua tale e “rabalailai.” E sega ni dua na ikatolu ni sala. E dodonu meda na digia na sala meda muria. Qo na vakatulewa bibi duadua meda cakava, ena vakatau tiko kina noda bula tawamudu.

4. O na vakamacalataka vakacava na sala e “galala”?

⁴ Meda nanuma tiko na kedrau duidui na sala qori. Na  sala “galala” e levu era taleitaka ni rawarawa na lakova. Ka ni rarawa ni levu era digia mera muria tiko ga na sala qori kei ira na le levu era lako tiko kina. Era sega ni kila ni o Setani na Tevoro e veiuqeti sara tiko ga me muri na sala qori e basika ga ina mate.—1 Kor. 6:9, 10; 1 Joni 5:19.

5. Na sasaga cava era cakava eso mera kila na sala “rabalailai” qai muria tiko ga?

⁵ Na veibasai ni sala “galala” ya na sala “rabalailai.” E kaya o Jisu ni le lailai ga era na kunea. Na vuna? Dikeva mada na tikina e tarava e vakaroti ira tiko kina nona imuri o Jisu me baleti ira na parofita lasu. (Maciu 7:15) Eso era kaya ni vica vata na udolu na matalotu, levu tale ga era kaya nira vakavulica tiko na ka dina. E vica vata na milioni era yalolailai se vakamatabokotaki tu ena veilecayaki ni lotu nira sa sega mada ga ni via qara na sala e basika ina bula tawamudu. Ia e rawa ni kune na sala qori. E kaya o Jisu: “Oni noqu tisaipeli dina ke oni muria tiko ga na noqu vosa, oni na kila na ka dina, na ka dina ena qai sereki kemuni.” (Joni 8:31, 32) O vakavinavinakataki ni o sega ni muri ira tu ga na le levu, ia o qara na ka dina. O vulica vakatitobu na Vosa ni Kalou mo kila na ka e vinakata. O rogoca tale ga na ivakavuvuli i Jisu. Kena ikuri, o vulica ni namaka o Jiova meda cata na ivakavuvuli ni lotu lasu, me kua ni marautaki na olodei e yavutaki ena lotu butobuto se na kena ivakavuvuli. O vulica tale ga ni ka ni sasaga toka me vakayacori na ka e vinakata o Jiova, oya me sagai me biu tani na ivalavala e sega ni vakadonuya. (Maciu 10:34-36) De dua ena sega ni rawarawa mo veisau. Ia o vosota tiko ga ena nomu lomana na Tamamu vakalomalagi ni o vinakata me vakadonui iko. Dua na ka nona marautaki iko!—Vkai. 27:11.

6. Na cava ena vukei keda meda dei ena sala rabalailai me vaka e tukuni ena Same 119:9, 10, 45, 133?

⁶ Nida sa tekivu muria ga na sala rabalailai, na cava ena vukei keda meda dei kina? Vakasamataka na ivakatautauvata qo. E itataqomaki vua na draiva kei na nona motoka na bai era biu ena batinisala qiqo ena ulunivanua. Kena inaki na bai qori me taqomaki ira na draiva mera kua ni volekata sara na batinisala se sivita yani. Levu na draiva era na sega ni vosa kudrukudrutaka na bai qori. Na ivakatagedegede gona i Jiova ena iVolatabu e vaka sara ga na bai qori! Nida muria eda na dei tiko ga ena sala rabalailai.—Wilika Same 119:9, 10, 45, 133.

7. Me vakacava nodra rai na itabagone me baleta na sala rabalailai?

⁷ Kemuni na itabagone, oni nanuma ni sa rui kaukaua tale na ivakatagedegede i Jiova? Qori na ka e vinakata o Setani moni nanuma. E vinakata moni kauaitaka vakalevu na ka era cakava tiko na muria na sala galala, ni vaka mera marautaka sara tiko ga vakalevu nodra bula. Ena rawa ni vakayagataka na ka era cakava tiko na nomu icaba e koronivuli se ka o raica ena Internet mo nanuma kina ni o sega ni marautaka tiko na veika qori. E saga tale ga o Setani mo nanuma ni ivakatagedegede sara ga i Jiova e vakavuna tiko nomu sega ni marautaka  na bula. * Ia mo nanuma tiko qo: E sega ni vinakata o Setani mera raica o ira na muria tiko nona sala na itinitini ni nodra ilakolako. Ena yasana adua, o Jiova sa vakamatatataka sara tu ga na ka ena cakava vei ira na muria tiko ga na sala e basika ina bula.—Same 37:29; Aisea 35:5, 6; 65:21-23.

8. Na cava era vulica na itabagone vei Orisi?

⁸ Vakasamataka mada na ka o rawa ni vulica ena ivakaraitaki ni dua na tacida tagane itabagone o Orisi. * Era temaki koya nona lewenikalasi me veiyacovi. Ni vakamacalataka ni o ira na iVakadinadina i Jiova era dau muria na ivakatagedegede savasava ni iVolatabu, era saga sara eso na goneyalewa mera veiyacovi kei koya. Ia e dei tiko ga o Orisi ena ka e  dodonu. Eso tale na ka e vakatovolei kina. E kaya: “Era uqeti au noqu qasenivuli meu vuli torocake, ni ka dokai. Era kaya ke sega, au na sega tale ga ni rawaka.” E vorata vakacava o Orisi na veivakatovolei qori? E tukuna, “Au saga meu veivolekati kei ira ena ivavakoso. Era vaka ga noqu lewenivuvale. Au vakabibitaka tale ga noqu vuli iVolatabu. Na titobu ga ni noqu vuli, na levu ni noqu vakadeitaka ni qo na ka dina. Au gumatua sara ga ni qaravi Jiova.”

9. Na cava meda cakava meda dei kina ena sala rabalailai?

⁹ E vinakata o Setani mo biuta na sala e basika ina bula. E saga mo muri ira e levu ena sala galala “e basika ina rusa.” (Maciu 7:13) Ia eda na dei ena sala rabalailai ke da vakarorogo vei Jisu. Meda raica tale ga na sala qori me itataqomaki. Meda raica tale mada qo e dua na ka e tukuna o Jisu meda cakava.

10. Na cava e kaya o Jisu ena Maciu 5:23, 24 meda cakava?

¹⁰ Wilika Maciu 5:23, 24. E vakamacalataka o Jisu vei ira na vakarorogo tiko vua e dua na gauna bibi duadua vei ira na Jiu. Vakasamataka e dua e vakarau lai solia tiko vua na bete ena valenisoro nona isoro manumanu. Ke nanuma mai ena gauna qori ni dua na ka e beitaki koya tiko kina o tacina, e dodonu me biuta tu na isoro me “lako.” Na vuna? Na cava e bibi sara mai na vakacaboisoro vei Jiova? E vakamatatataka o Jisu: “Drau lai veivakameautaki mada kei tacimu.”

11. Vakamacalataka nona saga o Jekope me veivakameautaki kei Iso.

¹¹ Dua na ka bibi eda vulica me baleta na veivakameautaki nida vakasamataka na ka e yaco ena nona bula na peteriaki o Jekope. E biuta o Jekope na vanua e sucu kina me rauta ni 20 na yabaki, oti sa qai vakaroti koya e dua na agilosi e vakayagataka na Kalou me lesu tale kina. (Vkte. 31:11, 13, 38) Ia e dua na leqa, a vinakata na tuakana o Iso me vakamatei koya. (Vkte. 27:41) E tuburi Jekope “na rere levu, e lomaleqa tale ga” ni se rairai lomacataki koya tiko ga o tuakana. (Vkte. 32:7) Na cava e cakava o Jekope me veivakameautaki kina? Kena imatai, e masulaka sara ga vei Jiova na ituvaki qori. Oti sa qai vakau iloloma vei Iso. (Vkte. 32:9-15) Ni rau sota na veitacini qo, e vakaliuliu o Jekope me vakaraitaka nona dokai Iso. E cuva vakavitu vua, sega ni vakadua ga se vakarua! Nona yalomalumalumu kei na veidokai o Jekope, e veivakameautaki kina kei tuakana.—Vkte. 33:3, 4.

12. Na cava eda vulica vei Jekope?

¹² Eda vuli ena nona vakarautaki koya o Jekope me lai sotavi Iso kei na sala e torovi koya kina. E yalomalumalumu o Jekope ni kerea nona veivuke o Jiova. Sa qai cakava na ka e masulaka ni cakava eso na ka me vinaka kina nodrau sota kei tuakana. Ni rau sota e sega ni veiba kei Iso o Jekope me kilai o cei e donu se cala. Nona inaki sara ga me veivakameautaki kei tuakana. Eda rawa ni vakatotomuri koya vakacava?

13-14. Na cava meda cakava ke da vakacudruya e dua na tacida?

¹³ Nida muria tiko na sala e basika ina bula eda na via veivakameautaki  tale ga kei ira na mataveitacini. (Roma 12:18) Na cava meda cakava ke da kila nida vakacudruya e dua na tacida? Meda vakatotomuri Jekope mada ga ni masu mai vu ni lomana vei Jiova. Eda rawa ni kerei koya me vakalougatataka noda sasaga meda veivakameautaki kei ira na mataveitacini.

¹⁴ Me tiko tale ga na gauna meda dau dikevi keda kina. Eda rawa ni taroga eso na taro va qo: ‘Vakacava, au na tukuna niu cala, meu kere veivosoti ena yalomalumalumu qai saga na veivakameautaki? Na cava nona rai o Jiova kei Jisu keu vakaliuliu meu veivakameautaki kei ira na mataveitacini?’ Na kena isau ena uqeti keda meda vakarorogo vei Jisu da qai torova na tacida ena yalomalumalumu meda veivakameautaki. Eda rawa ni vakatotomuria kina na ivakaraitaki i Jekope.

15. Ena yaga vakacava noda muria na ivakavuvuli ena Efeso 4:2, 3 nida veivakameautaki kei na dua na tacida?

¹⁵ Vakasamataka ke a dokadoka o Jekope me veiba kei Iso! Ena duidui sara ga na kena itinitini. Nida torova e dua na tacida meda saga meda veivakameautaki, ena vinakati meda vakaraitaka na yalomalumalumu. (Wilika Efeso 4:2, 3.) E tukuni ena Vosa Vakaibalebale 18:19: “Na veitacini erau veicudruvi e dredre, e rawarawa na koro vakabai, na nodrau veiba e vaka na ivakadei ni valececere vakabai.” Noda kere veivosoti ena yalomalumalumu eda na rawa kina ni curuma na “valececere vakabai,” ya ni yalorawarawa na tacida qori meda veiyaloni.

16. Na cava meda vakasamataka, na vuna?

¹⁶ Meda vakasamataka vinaka tale ga na ka eda na kaya vei ira na tacida kei na kena itautau. Nida sa vakarau tu, meda qai torovi koya sara eda vakacudruya ena inaki me kua ni rarawa tale tiko na lomana. Ena rairai tukuna mai eso na ka eda sega ni taleitaka. Ena rawarawa sara meda cudru se da via vakadonui keda ga. Vakacava ena rawati kina na veivakameautaki kei na veiyaloni? Sega sara ga. Nanuma tiko ni bibi nomu veivakameautaki kei na tacimu, sega ni o koya e donu se cala.—1 Kor. 6:7.

17. Na cava o vulica vei Kalaveti?

 ¹⁷ Dua na tacida tagane o Kalaveti e dau saga tiko ga na bula veiyaloni. E kaya: “Dredre sara ga neirau veiyaloni kei na dua na wekaqu voleka. Sivia e rua na yabaki noqu saga meu dau vosa vakadodonu vua, vakamalua tale ga, me keirau veimaliwai vinaka kina.” Na cava tale e cakava o Kalaveti? “Ni bera niu lai vosa vua, au dau masu qai vakarautaka noqu vakasama ke mani tau mai eso na vosa e sega ni vinaka. Ena vinakati meu tu vakarau meu veivosoti. Au vulica meu kua ni dau vakadonui au ga, au kila ni noqu itavi ga meu veivakameautaki.” Na cava e qai yaco? E kaya o Kalaveti: “Au lomavakacegu tu nikua ni vinaka na noqu veimaliwai kei ira kece na wekaqu.”

18-19. Na cava meda cakava ke da vakacudruya e dua? Na vuna?

¹⁸ Na cava gona e dodonu mo cakava ke o kila ni o vakacudruya e dua na nomu itokani lotu vaKarisito? Muria na veidusimaki i Jisu me baleta na veivakameautaki. Masulaka vei Jiova na ituvaki qori qai nuitaka na veivuke ni nona yalo tabu mo veivakameautaki. Ni o cakava qori o na marau, o vakaraitaka tale ga ni o vakarorogo tiko vei Jisu.—Maciu 5:9.

¹⁹ Eda vakavinavinaka ni veidusimaki vakayalololoma o Jiova ni vakayagataka na “ulu ni ivavakoso” o Jisu Karisito. (Efeso 5:23) Meda vakadeitaka mada ga meda dau “rogoci koya” me vaka na yapositolo o Pita, Jemesa, kei Joni. (Maciu 17:5) Eda sa raica mai na sala eda rawa ni cakava kina qori nida saga meda veivakameautaki kei na dua na lotu vaKarisito eda vakacudruya. Nida cakava qori da qai dei ena sala rabalailai, eda na vakalougatataki vakalevu nikua qai sega ni mudu noda marau ena gauna e se bera mai.