1-2. (a) Etɛ è ka ɖegbe nú mɛsɛ́dó Jezu tɔn atɔn ɖɔ ye ni wà? Nɛ̌ ye ka wà nǔ gbɔn? (b) Etɛ mǐ ka na gbéjé kpɔ́n ɖò xóta elɔ mɛ?

ÐÒ DINDINWAYIXWE xwè 32 H.M. tɔn gudo ɔ, Piyɛ́ɛ, Jaki kpo Jaan kpo ee nyí mɛsɛ́dó lɛ é mɔ nǔmimɔ jiwǔ ɖé. Ðò só ɖaxó ɖé jí ɔ, Jezu huzu agbaza ɖò nukún yetɔn mɛ; é sixu nyí fí ɖé ɖò Ɛmɔ́ɔ Só ɔ jí. “Nukún tɔn mɛ nɔ kɔ́n ɖi hwesivɔ ɖɔhun; bɔ awu tɔn lɛ wé pépé.” (Mat. 17:1-4) Ee nǔmimɔ ɔ xwè vivɔnu é ɔ, mɛsɛ́dó lɛ sè bɔ Mawu ɖɔ: “Vǐ ce vívɛ́ná wɛ mɛ elɔ nyí; xomɛ nɔ hun mì dó wǔtu tɔn; mi ɖótó è.” (Mat. 17:5) Mɛsɛ́dó atɔn lɛ ɖexlɛ́ ɖɔ emi ɖótó Jezu gbɔn gbɛ̀ e ye zán é gblamɛ. Mǐ jló na xwedó kpɔ́ndéwú yetɔn.

² Ðò xóta e wá yì é mɛ ɔ, mǐ kplɔ́n ɖɔ tó ɖiɖó Jezu nɔ byɔ ɖɔ è ni ɖó  nǔɖe lɛ wiwa te. Ðò xóta elɔ mɛ ɔ, mǐ na gbéjé nǔ e Jezu ɖɔ mǐ ɖó na wà é we kpɔ́n.

3. Sɔgbe xá Matie 7:13, 14 ɔ, etɛ mǐ ka ɖó na wà?

³ Xà Matie 7:13, 14. Ð’ayi wu ɖɔ hɔn vovo we xó wɛ Jezu ɖɔ, bɔ ye nɔ kplá mɛ jɛ ali vovo we jí; ɖě tíìn bo “d’agba” bɔ ɖevo “sóbwé.” Ali atɔngɔ́ ɖě ɖè ǎ. Mǐɖesu wɛ na sɔ́ ali e jí mǐ na gbɔn é. Gbeta taji hugǎn ɖé wɛ gbeta enɛ nyí, ɖó ali lɛ ɖokpo géé jɛn nɔ kplá mɛ, bɔ è nɔ mɔ gbɛ̀ mavɔmavɔ.

4. Tinmɛ nǔ e ali e “gbló” é nyí é.

 ⁴ É byɔ ɖɔ mǐ ni hɛn vogbingbɔn e ɖò ali we lɛ tɛntin é d’ayi mɛ. Mɛ gegě wɛ nɔ gbɔn ali e “gbló” é jí ɖó é vɛ́ gbɔn ǎ. É blawǔ ɖɔ mɛ gegě wá gbeta ɔ kɔn bo na nɔ gbɔn ali enɛ jí, lobo na nɔ wà nǔ lee mɛ e ɖò ali enɛ gbɔn wɛ lɛ é bǐ nɔ wà gbɔn é. Ye tuùn ɖɔ Satáan Awoví wɛ ɖò tintɛnkpɔn wɛ, bo na dɔn mɛ lɛ dó ali enɛ e nɔ kplá mɛ yì kú é jí ǎ.—1 Kɔ. 6:9, 10; 1 Jaan 5:19.

5. Nɛ̌ mɛɖé lɛ ka tɛ́n kpɔ́n bo mɔ ali e “sóbwé” é bo jɛ gbingbɔn jí jí gbɔn?

⁵ Ali e gbló é gbɔn vo nú ali e sóbwé, bɔ Jezu ɖɔ ɖɔ mɛ kpɛɖé wɛ nɔ ba mɔ é. Aniwu? Nǔ e sɔ́ akpakpa mɛ é wɛ nyí ɖɔ ɖò wemafɔ e bɔ d’ewu é mɛ ɔ, Jezu gb’akpá nú mɛ dó gbeyiɖɔ adingbannɔ lɛ wu. (Mat. 7:15) Mɛɖé lɛ nɔ ɖɔ ɖɔ sinsɛn afatɔ́n mɔ̌kpan wɛ ɖè, bɔ ye mɛ gegě nɔ ɖɔ ɖɔ emi nɔ kplɔ́n nǔgbo ɔ mɛ. Ðó sinsɛn lɛ sukpɔ́ tawun wutu ɔ, awakanmɛ ko kú mɛ gegě, bɔ ye flú bǐ, bo tlɛ sɔ́ nɔ tɛ́n kpɔ́n bá ba ali e nɔ kplá mɛ yì gbɛ̀ mɛ é ǎ. Amɔ̌, è sixu mɔ ali enɛ. Jezu ɖɔ: “Enyi mi sè gbè nú mì ɔ, mi nyí ahwanvu ce lɛ nǔgbo. Mi na tuùn nǔgbo ɔ, bɔ nǔgbo ɔ na ɖè mi sín kannumɔgbenu.” (Jaan 8:31, 32) É nyɔ́ tawun ɖɔ a kún xwedó ahwan ɔ ó, é nyɔ́ wà ɔ, a ba nǔgbo li ɔ mɔ. A jɛ Xó Mawu tɔn kplɔ́n jí ganji, bá mɔ tɛn dó tuùn nǔ e é byɔ ɖò mǐ sí lɛ é, bo lɛ́ ɖótó nǔkplɔnmɛ Jezu tɔn lɛ. Ðò nǔ e a kplɔ́n lɛ é mɛ ɔ, a kplɔ́n ɖɔ Jehovah nɔ ɖó nukún ɖɔ mǐ ni gbɛ́ adingban-núkplɔnmɛ sinsɛn tɔn lɛ, bo ma nɔ ɖu xwè e cá kan xá sinsɛn nǔvú lɛ é ó. A lɛ́ kplɔ́n ɖɔ nǔ e Jehovah byɔ lɛ é wiwa kpo aca ɖěɖee ma nɔ nyɔ́ nukún tɔn mɛ ǎ lɛ é jijodó kpo sixu vɛwǔ. (Mat. 10:34-36) Huzuhuzu e jɛxa lɛ é biblo sixu vɛwǔ nú we. É ɖò mɔ̌ có, a kpò ɖò gǎn dó wɛ, ɖó a yí wǎn nú Tɔ́ towe jixwé tɔn ɔ, bo lɛ́ ba ɖɔ nǔ towe ni nyɔ́ nukún tɔn mɛ. Xomɛ ɖó na ko hun i tawun dó wǔ wɛ!—Nǔx. 27:11.

6. Sɔgbe xá Ðɛhan 119:9, 10, 45, 133 ɔ, etɛ ka sixu d’alɔ mǐ bɔ mǐ na nɔ ali e sóbwé é jí?

⁶ Dìn e mǐ ko jɛ ali e sóbwé é jí gbɔn jí é ɔ, etɛ ka sixu d’alɔ mǐ bɔ mǐ na nɔ jí? Ð’ayi nǔjlɛdonǔwu elɔ wu. Ðò tò ɖé lɛ mɛ ɔ, è nɔ xwè nǔ kpákan ɖɔhun kpɛví ɖé gbɔn tónu nú sókanmɛli e sóbwé lɛ é. Kpákan kpɛví enɛ nɔ d’alɔ mɛ lɛ, bɔ enyi ye ɖò ali ɔ jí gbɔn wɛ ɔ, ye nɔ sɛkpɔ́ só lɛ tútútú, alǒ zɛ sín ali ɔ jí ǎ. Mɛ ɖebǔ na ɖɔ ɖɔ kpákan enɛ na zɔ́n bɔ ali ɔ jí gbingbɔn na gló emi, alǒ é na gblewǔ emi, kabǐ na zɔ́n bɔ emi na kú ǎ! Nǔgbododó Jehovah tɔn ɖěɖee ɖò Biblu mɛ lɛ é cí kpákan enɛ ɖɔhun. Ye nɔ d’alɔ mǐ bonu mǐ na nɔ ali e sóbwé é jí.—Xà Ðɛhan 119:9, 10, 45, 133.

7. Linlin tɛ mɛ winnyawinnya lɛ ka ɖó na nɔ ɖó dó ali e sóbwé é wu?

⁷ Mɛ winnyawinnya lɛ è mi, mi nɔ lin hweɖelɛnu ɖɔ tónúsíse nú nǔgbododó Jehovah tɔn lɛ vɛwǔ dín wɛ à? Nǔ e Satáan ba ɖɔ a ni lin é nɛ. É ba ɖɔ a ni sɔ́ ayi ɖó nǔ e wà wɛ mɛ e ɖò ali e gbló ɔ jí gbɔn wɛ lɛ é ɖè é jí, ɖó é cí ɖɔ ye wɛ ɖò gbɛ̀ jɔ gbɛ̀ ɔ ɖu wɛ ɖɔhun. É sixu zán nǔ e wà wɛ wemaxɔmɛvígbɛ́ towe lɛ ɖè lɛ é, alǒ nǔ e a nɔ mɔ ɖò Ɛntɛnɛti jí lɛ é dó bló bonu a ni lin ɖɔ nǔɖe ɖò wǔtu towe gbɔ wɛ. Satáan ba ɖɔ a ni lin ɖɔ nǔgbododó  Jehovah tɔn lɛ ɖò gbɛ̀ ɔ sín vivǐ ɖuɖu bǐ mlɛ́mlɛ́ sín ali sú dó we wɛ. * Amɔ̌, nɔ flín nǔ elɔ: Satáan ba ɖɔ mɛ ɖěɖee ɖò ali emitɔn jí gbɔn wɛ lɛ é ni tuùn fí e ali ɔ kplá ye xwè é ǎ. Amɔ̌, Jehovah ɖè nǔ e ɖò sɛxwetɛn nú mɛ ɖěɖee ɖò ali e nɔ kplá mɛ yì gbɛ̀ mɛ é jí lɛ é xlɛ́ nyi wɛn.—Ðɛh. 37:29; Eza. 35:5, 6; 65:21-23.

8. Etɛ kpɔ́ndéwú Olaf tɔn ka sixu kplɔ́n mɛ winnyawinnya lɛ?

⁸ Mǐ ni ɖɔ xó dó nǔ e kpɔ́ndéwú dɔnkpɛvu e nɔ nyí Olaf é tɔn sixu kplɔ́n mǐ é jí. * Wemaxɔmɛvígbɛ́ tɔn lɛ gbidí kɔ n’i bonu é na ɖóxó xá mɛ. Hwenu e é tinmɛ ɖɔ Kúnnuɖetɔ́ Jehovah tɔn lɛ nɔ zán gbɛ̀ sɔgbe xá nǔgbododó jlɔjlɔ Jehovah tɔn ɖěɖee ɖò Biblu mɛ lɛ é ɔ, ɖyɔvǐ e ɖò klási tɔn é ɖé lɛ lɛ́ dó gǎn d’eji bo na bló bɔ  é na ɖóxó xá ye. Amɔ̌, Olaf ba na wà nǔ ɖagbe. Gɔ́ na ɔ, enyi ali enɛ nu kɛɖɛ wɛ è gbidí kɔ n’i ɖè ǎ. Olaf ɖɔ: “Mɛ̌si ce lɛ ɖɔ xó bǐ ɖɔ nyi ɖó na yì kplɔnyiji-alavɔ, lé enɛ wɛ na zɔ́n bɔ mɛ lɛ na sí mì. Ye ɖɔ ɖɔ kplɔnyiji-alavɔ mɛvo ɔ, nyi kún na mɔ azɔ̌ ɖagbe ɖé, alǒ ɖó gbɛzán awǎjijɛnɔ ɖé ó.” Etɛ ka d’alɔ Olaf b’ɛ ɖí xwi xá kɔgbidínúmɛ enɛ lɛ? É ɖɔ: “Un zun xɔ́ntɔn vívɛ́ xá nɔví e ɖò agun ce mɛ lɛ é. Ye cí xwédo ɖé ɖɔhun nú mì. Un lɛ́ jɛ Biblu kplɔ́n jí dó nǔjɔnǔ mɛ. Bǎ e mɛ un kplɔ́n nǔ yì ɖó é ɔ, bǎ enɛ mɛ wɛ un nɔ kánɖeji ɖɔ un ko mɔ nǔgbo ɔ yì ɖó. Wǎgbɔ tɔn ɔ, un wá gbeta ɔ kɔn bo na bló baptɛm.”

9. Etɛ è ka byɔ ɖò mɛ ɖěɖee ba na nɔ ali e sóbwé ɔ jí lɛ é sí?

⁹ Nǔ e ba wɛ Satáan ɖè é wɛ nyí ɖɔ a ni gosin ali e nɔ kplá mɛ yì gbɛ̀ mavɔmavɔ mɛ é jí. É ba ɖɔ a ni wà nǔ lee mɛ gegě ɖ’ewu gbɔn é, bo gbɔn “fí e è nɔ gbɔn, bo nɔ yì dɔn” é. (Mat. 7:13) Amɔ̌, enyi mǐ kpò ɖò tó ɖó Jezu wɛ, bo nɔ mɔ ɖɔ ali e sóbwé é jí gbingbɔn nɔ nya xɛ ɖò mɛ jí ɔ, mǐ na kpò ɖò ali enɛ jí gbɔn wɛ. Dìn ɔ, mi nú mǐ ni ɖɔ xó dó nǔ ɖevo e Jezu ɖɔ mǐ ɖó na wà é jí.

10. Sɔgbe xá Matie 5:23, 24 ɔ, etɛ Jezu ka ɖɔ ɖɔ mǐ ɖó na wà?

¹⁰ Xà Matie 5:23, 24. Ðò wemafɔ enɛ lɛ mɛ ɔ, Jezu ɖɔ xó dó nǔɖe wu, bɔ é ɖò taji tawun nú Jwifu e ɖò tó ɖó è wɛ lɛ é. Dǒ nukúnmɛ kpɔ́n ɖɔ mɛɖé wá tɛmpli ɔ mɛ, bo ɖò gbesisɔmɛ bo na sɔ́ kanlin e na savɔ̌ na wɛ é ɖè é jó nú vɔsanúxwlémawutɔ́ ɖé. Enyi mɛ ɔ flín ɖò ganxixo enɛ mɛ ɖɔ hwɛgbe ɖé ɖò nɔzo emitɔn kpo emi kpo tɛntin ɔ, é ɖó na jó kanlin ɔ dó, “bo yì.” Aniwu? Ðó nǔ ɖevo ɖò taji tawun bɔ è ɖó na wà hwɛ̌, cobo na xwlé vɔsanú tɔn Jehovah. Jezu ɖɔ nyi wɛn ɖɔ: “Yì dóhwɛ gbɔ xá nɔzo towe hwɛ̌.”

11. Etɛ lɛ Jakɔbu ka wà cobo dóhwɛ gbɔ xá Esawu?

¹¹ Tan e kúnkplá gbɛzán tɔ́gbó Jakɔbu tɔn é ɖé na d’alɔ mǐ bɔ mǐ na kplɔ́n nǔ xɔ akwɛ lɛ dó hwɛ didó gbɔ wu. Ee Jakɔbu gosin jɔtɛn tɔn, bɔ é bló xwè 20 mɔ̌ gudo é ɔ, Mawu gbɔn wɛnsagun ɖé jí bo ɖegbe n’i ɖɔ é ni lɛkɔ yì xwé. (Bǐb. 31:11, 13, 38) Amɔ̌, é sixu lɛkɔ mɔ̌ kpowun ǎ. Fofó tɔn Esawu ba bo na hu i. (Bǐb. 27:41) “Xɛsi ɖaxó ɖé jɛ [Jakɔbu jí,] bɔ awakanmɛ kú i,” ɖó fofó tɔn sixu kpò ɖò xomɛ sin dó è wɛ. (Bǐb. 32:8) Etɛ Jakɔbu ka wà, bá dó dóhwɛ gbɔ xá fofó tɔn? Jɛ nukɔn hwɛ̌ ɔ, é xoɖɛ vívɛ́ sɛ́dó Jehovah dó xó ɔ wu. Enɛ gudo ɔ, é ɖè nǔ e é hɛn lɛ é ɖě, bo sɛ́dó Esawu. (Bǐb. 32:10-16) Gudo mɛ hwenu e ye mɛ we lɛ wá mɔ yeɖée é ɔ, Jakɔbu wɛ ɖè afɔ nukɔntɔn ɔ, bo wlí yɛ̌yi nú Esawu. É ɖekɔ́ nú Esawu, é nyí ɖokpo ǎ, é ka lɛ́ nyí we ǎ, loɔ, azɔn tɛnwe kwíɖíkwíɖí wɛ é wà mɔ̌. Jakɔbu sɔ́ éɖée hwe, bo ɖè sísí xlɛ́ Esawu, lobo dóhwɛ gbɔ xá ɛ.—Bǐb. 33:3, 4.

12. Etɛ kpɔ́ndéwú Jakɔbu tɔn ka kplɔ́n mǐ?

¹² Lee Jakɔbu sɔnǔ gbɔn cobo yì mɔ Esawu é kpo lee é kpé è gbɔn é kpo kplɔ́n nǔɖe mǐ. Jakɔbu sɔ́ éɖée hwe, bo byɔ alɔdó Jehovah tɔn. Enɛ gudo ɔ, é ɖexlɛ́ ɖɔ nǔ e takúnmɛ emi xoɖɛ dó é ɖu ayi mɛ nú emi, bo wà nǔ e wu é kpé é bǐ, bo dóhwɛ gbɔ xá nɔví tɔn. Hwenu e nɔví nɔví lɛ mɔ yeɖée é ɔ, Jakɔbu jɛ ɖiɖɔ nú Esawu jí ɖɔ mɛ lě sín hwɛ wɛ jɔ, bɔ mɛ lě sín hwɛ kú ǎ. Nǔ e gbé nya wɛ Jakɔbu  ɖè é wɛ nyí ɖɔ é ni dóhwɛ gbɔ xá nɔví tɔn. Nɛ̌ mǐ ka sixu xwedó kpɔ́ndéwú Jakɔbu tɔn gbɔn?

13-14. Enyi mǐ jɛ dò nú nǔɖitɔ́ hatɔ́ ɖé ɔ, etɛ mǐ ka ɖó na wà?

¹³ Enyi mǐ jló na nɔ ali e nɔ kplá mɛ yì gbɛ̀ mɛ é jí ɔ, mǐ ɖó na nɔ nɔ fífá mɛ xá nɔví mǐtɔn lɛ. (Hlɔ. 12:18) Enyi mǐ ɖ’ayi wu ɖɔ mǐ jɛ dò nú nǔɖitɔ́ hatɔ́ ɖé ɔ, etɛ mǐ ka ɖó na wà? Jakɔbu ɖɔhun ɔ, mǐ ɖó na xoɖɛ sɛ́dó Jehovah kpo ayi bǐ kpo. Mǐ sixu byɔ Jehovah ɖɔ é ni kɔn nyɔna dó gǎn e dó wɛ mǐ ɖè, bá dóhwɛ gbɔ xá nɔví mǐtɔn é jí.

¹⁴ Mǐ ɖó na lɛ́ ba hwenu, bo gbéjé mǐɖée kpɔ́n. Mǐ sixu lɛ́ kan nǔ lěhun lɛ byɔ mǐɖée: ‘Un ka ɖò gbesisɔmɛ, bo na yí gbè ɖɔ hwɛ ce kún jɔ ó, lobo sɔ́ nyiɖée hwe bo dó kɛnklɛn bá dóhwɛ gbɔ à? Enyi un ɖè afɔ nukɔntɔn ó bá dóhwɛ gbɔ xá nɔví sunnu, alǒ nɔví nyɔnu ce ɔ, nɛ̌ nǔ ka nɔ cí nú Jehovah kpo Jezu kpo?’ Xósin e mǐ na na nú nǔkanbyɔ enɛ lɛ é na sísɛ́ mǐ bɔ mǐ na ɖótó Jezu, bo sɔ́ mǐɖée hwe lobo sɛkpɔ́ nǔɖitɔ́ hatɔ́ mǐtɔn bá mɔ tɛn dó dóhwɛ gbɔ xá ɛ. Ðò ali enɛ nu ɔ, mǐ sixu xwedó kpɔ́ndéwú Jakɔbu tɔn.

15. Nɛ̌ nǔgbododó e ɖò Efɛzinu lɛ 4:2, 3 mɛ é zinzán ka sixu d’alɔ mǐ bɔ mǐ na dóhwɛ gbɔ xá nɔví mǐtɔn gbɔn?

¹⁵ Enyi Jakɔbu ko jɛ hwɛjijɔ ba jí hwenu e é yì mɔ nɔví tɔn é wɛ ɔ, dǒ nukún nǔ e sixu ko jɛ é mɛ kpɔ́n. Lee nǔ lɛ na fó gbɔn é na dɔn mɛ ɖebǔ ǎ. Enyi mǐ yì nɔví mǐtɔn gɔ́n, bo na ɖeɖɛ gbemanɔkpɔ́ ɖé kpo é kpo ɔ, mǐ ɖó na wà mɔ̌ kpo mɛɖéesɔ́hwe kpo. (Xà Efɛzinu lɛ 4:2, 3.) Nǔnywɛxó 18:19 ɖɔ: “Nɔví e è jɛ dò na ɔ nɔ sú ayi mɛ hɔn dó mɛ, bɔ é nɔ syɛn hú ahohó; mɔ̌ ɖokpo ɔ, adɔndindɔn nɔ sú ayi mɛ hɔn dó mɛ, bɔ é nɔ syɛn hɔntogbo e è glá ɔ ɖɔhun.” Enyi mǐ ka dó kɛnklɛn nú mɛ ɔ ɔ, é sixu d’alɔ ɛ, bɔ é na ɖò gbesisɔmɛ bo na dóhwɛ gbɔ xá mǐ.

16. Nǔ ɖevo tɛ jí mǐ ka ɖó na lin tamɛ dó? Aniwu?

¹⁶ É lɛ́ byɔ ɖɔ mǐ ni xwè sɔ bo lin tamɛ dó nǔ e mǐ na ɖɔ nú nɔví mǐtɔn é kpo lee mǐ na ɖɔ gbɔn é kpo jí. Enyi mǐ ɖò gbesisɔmɛ ɔ, mǐ ɖó na ɖɔ xó xá mɛ e mǐ jɛ dò na é, bo d’alɔ ɛ bonu é na lɛ́ ɖó kancica ɖagbe ɖé xá mǐ. Ðò bǐbɛ̌mɛ ɔ, é sixu jɛ nǔ e ma nyɔ́ sè ǎ lɛ é ɖɔ jí. É bɔwǔ tawun ɖɔ akpɔ ni ɖó mǐ, alǒ mǐ na jɛ hwɛjijɔ ba jí, amɔ̌, mɔ̌ wiwa ka na zɔ́n bɔ a na dóhwɛ gbɔ xá nɔví towe à? Ðebǔ ǎ! Flín ɖɔ hwɛ didó gbɔ xá nɔví towe ɖò taji tawun hú mɛ e sín hwɛ jɔ é kpo mɛ e sín hwɛ kú é kpo biba.—1 Kɔ. 6:7.

17. Etɛ kpɔ́ndéwú Gilbert tɔn ka sixu kplɔ́n we?

 ¹⁷ Nɔví sunnu ɖé nɔ nyí Gilbert, bo dó gǎn tawun bá dó nyí fífákanxotɔ́. É ɖɔ: “Tagba gegě ɖò nyi kpo vǐ nyɔnu ce kpo tɛntin. Nú xwè we jɛji ɔ, un tɛ́n kpɔ́n bá ɖɔ xó xá ɛ ɖò fífá mɛ dó xó ɔ wu bonu mǐ na lɛ́ ɖó kancica ɖagbe ɖé.” Nǔ ɖevo tɛ Gilbert ka wà? “Enyi mǐ ja xó ɖɔ ɖó kpɔ́ gbé hweɖebǔnu ɔ, un nɔ xoɖɛ, bo nɔ flín nyiɖée ɖɔ enyi é ɖɔ xó e na d’akpɔ nú mì é ɖě nú mì ɔ, un kún ɖó na sin xomɛ ó. Un ɖó na ɖò gbesisɔmɛ bo sɔ́ hwɛ kɛ mɛ. Un kplɔ́n ɖɔ un kún ɖó na tɛ́n kpɔ́n, bá xlɛ́ ɖɔ hwɛ ce wɛ jɔ ó; nǔ e un ɖó na wà é wɛ nyí ɖɔ un na tɛ́n kpɔ́n bá xò fífá kan.” Etɛ mɛ é ka tɔ́n kɔ dó? Gilbert ɖɔ: “Égbé ɔ, un ɖó fífá ayi mɛ tɔn, ɖó kancica ɖagbe ɖé ɖò nyi kpo mɛ e ɖò xwédo ce mɛ lɛ é kpo tɛntin.”

18-19. Enyi mǐ jɛ dò nú mɛɖé ɔ, etɛ mǐ ka ɖó na kánɖeji bá wà? Aniwu?

¹⁸ Dìn ɔ, enyi a ɖ’ayi wu ɖɔ emi jɛ dò nú Klisanwun hatɔ́ ɖé ɔ, etɛ a ka kánɖeji bo na wà? Xwedó alixlɛ́mɛ Jezu tɔn e ɖɔ ɖɔ è ni xò fífá kan é. Ðɔ xó nú Jehovah dó xó ɔ wu, bo ɖeji dó gbigbɔ mímɛ́ tɔn wu ɖɔ é na d’alɔ we bɔ a na nyí fífákanxotɔ́ ɖé. Enyi a nɔ wà mɔ̌ ɔ, a na ɖ’awǎjijɛ, bo na lɛ́ xlɛ́ ɖɔ emi ɖò tó ɖó Jezu wɛ.—Mat. 5:9.

¹⁹ É sù nukún mǐtɔn mɛ tawun ɖɔ Jehovah nɔ na mǐ alixlɛ́mɛ e wanyiyi kpé lɛ é gbɔn Jezu Klisu e “kpa acɛ nú agun” ɔ é jí. (Efɛ. 5:23) Piyɛ́ɛ, Jaki kpo Jaan kpo e nyí mɛsɛ́dó lɛ é ɖɔhun ɔ, mi nú mǐ ni kánɖeji bo na nɔ “ɖótó è.” (Mat. 17:5) Mǐ ko gbéjé ali e nu mǐ sixu wà mɔ̌ ɖè é ɖé kpɔ́n; enɛ wɛ nyí ɖɔ, mǐ na nɔ dóhwɛ gbɔ xá Klisanwun hatɔ́ e mǐ jɛ dò na é ɖé. Mɔ̌ wiwa na zɔ́n bɔ mǐ na kpò ɖò ali e sóbwé, bo nɔ kplá mɛ bɔ è nɔ yì mɔ gbɛ̀ é jí; mǐ na mɔ nyɔna gegě dìn, bo na lɛ́ mɔ awǎjijɛ mavɔmavɔ ɖò sɔgudo.