1-2. a) Ka yo mandé 3 adan apòt a Jézi fè é kijan yo suiv lòd-lasa ? b) Ka nou ké vwè adan awtik-lasa ?

 AN LAN 32, apré Lapak, lapòt Pyè, lapòt Jak é lapòt Jan vwè on vizyon ki té èstraòwdinè toubònman. Yo té asi on gwo montangn, pétèt on koté asi mòn Èwmon la é yo vwè kò a Jézi chanjé douvan yo. « Figi a-y mété-y ka kléré kon solèy-la é lenj a-y vin blan kon limyè-la » (Mat. 17:1-4). On ti moman avan sé apòt-la fin vwè vizyon-lasa, yo tann Jéova palé ba yo. Mi sa i di-yo : « Mi Gason an mwen, sila an enmé onlo la, é i ka fè-mwen plézi. Kouté-y » (Mat. 17:5). Jan-la sé 3 apòt-la viv la aprésa montré kè yo kouté Jézi. É nou osi, nou vé suiv ègzanp a yo.

² Adan awtik a simenn pasé, nou vwè kè lè on moun ka kouté vwa a Jézi, sa vé di kè i ka arété fè sèwten biten. Adan awtik-lasa, nou ké palé dè 2 biten Jézi ka mandé-nou fè.

3. Dapré Matyé 7:13, 14, ka pou nou fè ?

³ (Li Matyé 7:13, 14). Jézi palé dè 2 pòt ki ka wouvè asi 2 chimen. Prèmyé chimen-la « laj » é dézyèm la « étwèt ». Men, i pa palé dè on twazyèm chimen. Alò, fò-noutout chwazi ki chimen nou ké pran. Désizyon-lasa, sé-y ki pi enpòwtan adan vi an nou pas sé on sèl chimen ki ka menné a lavi étèwnèl.

4. Si fò ou té palé dè chimen-la ki « laj » la, ka ou té’é di ?

⁴ On biten pou nou mèt an lèspri an nou, sé kè sé 2 chimen-lasa vréman diféran. Asi chimen-la ki « laj » la, ni onpakèt moun pas ou pé maché la alèz a-w. É malérèzman, onlo moun préféré rété asi chimen-lasa pas yo anvi  fè kon toutmoun. Men an réyalité, yo pa’a rann-yo kont kè sé Dyab-la ki vé kè yo pran chimen-lasa é kè an bout a-y sé lanmò (1 Kor. 6:9, 10 ; 1 Jan 5:19).

5. Sèwten moun pòté bon mannèv pou yo té touvé chimen-la ki étwèt la é pou yo té pé sa maché anlè-y. Ki éfò yo fè ?

⁵ Jézi di kè dézyèm chimen-la étwèt é kè pa ni onlo moun ki ka touvé-y. Poukwa ? Sa Jézi di adan vèwsé-la ki ka vin apré la entérésan toubònman. I avèti disip a-y é i di-yo fè atansyon èvè sé fo-pwofèt-la (Mat. 7:15). Dapré sa sèwten moun ka di tin plizyè milyé rèlijyon diféran é près yotout ka di kè sé yo ki adan lavérité. Tousa ka dékourajé onlo moun é sé moun-la pa menm sav kikoté pou yo ay. Alò, yo pa menm ka éséyé chèché chimen-la ki ka menné a lavi. Men, poutan toutmoun pé touvé chimen-lasa. Mi sa Jézi di : « Si zò ka rété kolé èvè sa an ka di, zò sé disip an mwen menm, é zò ké konnèt lavérité, é lavérité ké libéré-zòt » (Jan 8:31, 32). Men érèzman, ou pa fè kon toutmoun, ou chèché lavérité. Ou pran tan pou étidyé Pawòl a Bondyé oséryé pou vwè ka i ka mandé-nou fè é ou kouté sa Jézi ka anségné. Pa ègzanp, ou aprann kè Jéova vlé pa kè nou kouté sa sé fo-rèlijyon-la ka anségné é i vlé pa kè nou pawtisipé adan fèt a yo nonplis. Ou rann-vou kont osi kè sa pa toujou fasil dè fè sa Jéova ka mandé-nou fè. É pou nou lagé tout mové labitid nou té ni ki pa’a fè-y plézi, a pa on ti afè (Mat. 10:34-36). Sèten sa pa té fasil pou-w dè fè tout sé chanjman-lasa adan vi a-w. Men ou pa lagé pas ou enmé Pap’a-w ki an syèl-la é ou vlé fè-y plézi. Lè i ka gadé-w, a pa ti fyèw i dwèt fyèw ! (Pwov. 27:11).

6. Dapré Sòm 119:9, 10, 45, 133, ka ki ké édé-nou rété asi chimen-la ki étwèt la ?

⁶ Nou koumansé maché asi chimen-la ki étwèt la men ka ki ké édé-nou pou nou rété asi-y ? An-nou pran on ègzanp. Lè ou k’ay an montangn, souvantfwa, ni dé koté ki danjéré toubònman. Kifè, yo ka mèt on bayè pou anpéché-w tonbé an fon-la. Ès zò ka di kè sé moun-la ké di poukwa yo mèt sa la pas sa ka anpéché-yo fè sa yo vlé ? Awa ! Adan Labib nou ka touvé prensip a Jéova é nou pé konparé sé prensip-lasa èvè bayè-la ki ka anpéché-nou tonbé an fon la. Sé prensip-lasa ka édé-nou rété asi chimen-la ki étwèt la (li Sòm 119:9, 10, 45, 133).

7. Lèwvwè yo ka palé sé jenn-la dè chimen-la ki étwèt la, kijan pou yo vwè chimen-lasa ?

⁷ Léjenn, èskè dépawfwa zò ka touvé kè prensip a Jéova ka anpéché-zòt fè sa zò té’é anvi fè ? Sé sa Satan bizwen mèt an tèt a zòt. I bizwen montré-zòt tousa sé moun-la ki asi chimen laj la pé fè pou ba-zòt lenprésyon kè sé moun-lasa ka pran pyé a yo. I bizwen zò mèt an tèt a zòt kè kanmarad-lékòl a zòt oben sé moun-la ki ka mèt tout vi a yo asi Entèwnèt ka anmizé-yo plis ki zòt. I bizwen fè-zòt konprann kè prensip a Jéova ka anpéché-zòt viv vi a zòt b. Men on biten pou zò sonjé sé kè i pa’a di ponmoun ka ki an bout a chimen-lasa. Men li Jéova i vé zò sav jan vi a zòt ké bèl siwvwè zò ka  rété asi chimen a lavi (Sòm 37:29 ; Iz. 35:5, 6 ; 65:21-23).

8. Ka ègzanp a Olaf pé aprann sé jenn-la ?

⁸ An-nou vwè sa ki rivé on jenn frè non a-y sé Olaf c. Kanmarad-lékòl a-y té ka mèt présyon asi-y pou i té menné on vi ki pa pwòp. É lèwvwè i èspliké-yo kè sé Témwen a Jéova la ka rèspèkté sa Labib ka mandé adan domenn-lasa, sé a moman-lasa déotwa fi adan klas a-y mèt plis présyon si-y ankò pou i té kouché èvè yo. Men magré tousa, Olaf pa lagé. É a pa sa tousèl Olaf sibi. Mi sa i ka rakonté : « Pwofésè an mwen té ka éséyé pran tèt an mwen pou an té fè gran lékòl. Yo té ka di-mwen kè sé té sèl mwayen pou an té réyisi vi an mwen. » Ka ki édé Olaf pou i pa té lésé-yo pran tèt a-y ? Mi sa i ka èspliké : « An vin pibon zanmi ankò èvè frè é sè a lasanblé an mwen. Yo vin kon on fanmi pou mwen. An mèt-mwen ka étidyé Labib plis ankò é pli an té ka  étidyé é pli an té sèten kè sé té lavérité. Kifè, an té byen désidé a fè Jéova plézi. »

9. Si on moun vé rété asi chimen-la ki étwèt la, ka pou i fè ?

⁹ Satan vé kè ou sòti anlè chimen-la ki ka menné a lavi. I vé kè ou fè kon lamajorité a moun ka fè é kè ou maché asi chimen-la ki laj la é ki « ka menné a ladèstriksyon » (Mat. 7:13). Si ou ka kontinyé kouté Jézi é si ou sèten kè chimen étwèt la ké pwotéjé-w, ou ké rété asi chimen-lasa. Konnyéla, an-nou vwè ondòt biten kè Jézi ka mandé-nou fè.

10. Dapré Matyé 5:23, 24, ka Jézi ka mandé-nou fè ?

¹⁰ (Li Matyé 5:23, 24.) Jézi té ka palé dè on évènman ki té vréman enpòwtan pou sé Juif-la ki té ka kouté-y la. Imajiné kè on moun k’ay an Tanp-la é kè i k’ay ba prèt-la zannimo-la i menné la pou fè on sakrifis ba-y é kè a moman-lasa i ka sonjé kè frè a-y ni on biten kont li, ka pou i fè ? Ében fò i lésé zannimo-la la é woupati. Men poukwa fò i fè sa ? Pou Jéova, fò i té fè on biten ki té pi enpòwtan ki sakrifis-la i té k’ay ofè la. É Jézi èspliké sa byen, mi sa i di : « Koumansé pa wouvin byen èvè frè a-w. »

11. Rakonté ka Jakòb fè pou wouvin byen èvè Ézayi.

¹¹ Lè nou ka pran tan gadé on biten ki pasé adan vi a Jakòb, nou ka aprann onlo biten entérésan ki pé édé-nou wouvin byen èvè frè é sè an nou. Sa té ka fè 20 an Jakòb té kité péyi-la i lévé la, lè Jéova sèvi èvè on zanj pou di-y viré koté-lasa (Jén. 31:11, 13, 38). Men pwoblèm-la sé kè frè a-y Ézayi té di kè i té’é tchouyé-y (Jén. 27:41). « Jakòb trapé lafrous é i santi-y angwasé ». I té pè pas pétèt i té ka pansé kè frè a-y té vé tchouyé-y toujou (Jén. 32:7). Ka i fè pou wouvin byen èvè frè a-y ? Prèmyé biten i fè sé palé Jéova dè pwoblèm a-y. Aprésa, i voyé plizyè kado ki té ni onlo valè pou Ézayi (Jén. 32:9-15). É finalman lèwvwè yo jwenn, Jakòb pran douvan pou montré frè a-y jan i té ni rèspé ba-y. I bésé atè douvan-y. I pa fè sa onsèl fwa sèlman, ni 2 fwa men i fè sa 7 fwa. Jakòb té ni imilité é i aji èvè onlo rèspé épi frè a-y. Sé konsa i wouvin byen èvè-y (Jén. 33:3, 4).

12. Ka ègzanp a Jakòb ka aprann-nou ?

¹² Sa Jakòb fè avan i ay jwenn frè a-y é jan-la i fè èvè-y la pé aprann-nou onlo biten. Konm Jakòb té ni imilité, i mandé Jéova édé-y. Aprésa, i aji annakò èvè priyè a-y pas i fè tousa i té pé pou wouvin byen èvè frè a-y. É finalman, lèwvwè yo jwenn, Jakòb pa éséyé montré kimoun ki té ni rézon oben kimoun ki té ni tò men sa i té vé sé wouvin byen èvè frè a-y. Kijan nou pé imité-y ?

13-14. Siwvwè nou fè on biten ki fè on frè an nou oben on sè an nou mal, ka pou nou fè ?

¹³ Si nou vé kontinyé maché asi chimen a lavi, fò-nou fè éfò pou nou toujou anpé èvè frè é sè an nou (Wom. 12:18). Men vinvwè nou ka rann-nou kont kè nou fè on frè oben on sè on biten ki fè-y mal, ka pou nou fè ? Ében kon Jakòb, prémyé biten pou nou fè sé priyé Jéova. Nou pé mandé-y édé-nou pou fè sa ki fo pou nou wouvin byen èvè frè an nou oben sè an nou.

¹⁴ Fò-nou pran tan analizé-nou osi. Pa  ègzanp, nou pé mandé-nou : « Ès an paré a aji èvè imilité, a di kè sé mwen ki té ni tò é a mandé padon pou wouvin byen èvè frè an mwen oben èvè sè an mwen ? Ka Jéova é Jézi ké rèsanti si an ka fè tousa ki fo pou wouvin byen èvè frè an mwen oben sè an mwen ? » Si nou ka réponn a sé kèsyon-lasa, sa ké ban-nou anvi kouté Jézi é sa ké pousé-nou aji èvè imilité èvè frè é sè an nou é nou ké fè tousa nou pé pou nou wouvin byen èvè yo. É adan domenn-lasa, nou pé suiv ègzanp a Jakòb.

15. An Éfézyen 4:2, 3 nou ka touvé on bèl ti konsèy. Kijan konsèy-lasa pé édé-nou wouvin byen èvè frè an nou oben sè an nou ?

¹⁵ Ou ka imajiné-w sa ki té’é pasé si Jakòb té rété la ka diskité èvè frè a-y pou sav kimoun ki ni tò oben kimoun ki ni rézon ! Sèten ayen pa té’é maché. Lè nou k’ay vwè on frè oben on sè pou wouvin byen èvè-y fò-nou aji èvè imilité (li Éfézyen 4:2, 3). Mi sa Pwovèb 18:19 ka di : « Sa pi fasil pou pran on vil ki byen pwotéjé ki pou wouvin byen èvè on frè ki kòlè. Ni babyé ki kon ba ka fèmé pòt a on miray. » Lè nou ka mandé on moun padon, sa pé ba-y anvi wouvin byen èvè nou.

16. Ka pou nou sonjé, é poukwa ?

¹⁶ Fò-nou réfléchi byen pou nou vwè ka nou ké di moun-la ki faché èvè nou la é kijan nou ké palé ba-y. Fò pa nou oubliyé kè moun-lasa ka soufè, donk lèwvwè nou ké paré é kè nou ké ay owa a-y, sa pou nou sonjé sè kè fò-nou fè tousa nou pé pou nou wouvin byen èvè-y. Pétèt kè odépa, i ké di-nou dé biten ki ké fè-nou mal é nou pé’é anvi pran sa. Men siwvwè nou ka réponn, ès sa ké ranjé sitiyasyon-la ? Nou ka tou konprann kè non ! Fò-nou mèt fon an tèt an nou kè sa ki pi enpòwtan, sé wouvin byen èvè frè an nou oben sè an nou olyé nou chèché a gadé kimoun ki ni tò oben kimoun ki ni rézon (1 Kor. 6:7).

17. Ka ègzanp a Gilbert ka aprann-nou ?

¹⁷ On frè non a-y sé Gilbert pòté bon mannèv pou i té pé sa anpé èvè lézòt. Mi sa i ka rakonté : « An trapé on gwo pwoblèm èvè fi an mwen. Pannan plis ki 2 an, an fè tousa an té pé pou wouvè tchè an mwen ba-y é pou palé ba-y jantiman pou nou té wouvin byen. » Ka Gilbert fè  ankò ? Mi sa i ka di : « Avan an té ay palé ba-y, an té ka priyé é an té ka préparé-mwen pou an pé sa byen réyaji siwvwè i té ka di-mwen on biten ki té pé fan’an mal. Fò an té paré a padonné-y. An konprann byen kè fò pa an té chèché a ni rézon, men fò an té fè ansòt pou nou anpé yonn èvè lòt. » Ka sa pòté dè bon pou Gilbert ? Mi sa i ka réponn : « Jòdila lèspri an mwen trankil pas an ka antann-mwen byen èvè toutmoun adan fanmi an mwen. »

18-19. Siwvwè nou fè on moun lapenn, ka fò-nou byen désidé a fè é poukwa ?

¹⁸ Si nou ka rann-nou kont kè nou fè on moun lapenn, ka pou nou byen désidé a fè ? Fò-nou fè sa Jézi ka mandé-nou fè. Fò-nou wouvin byen èvè moun-lasa. Fò-nou palé Jéova dè sitiyasyon-lasa é fò-nou mandé-y lèspri sen a-y pou i pé sa édé-nou pou nou anpé èvè moun-lasa. Si sé sa nou ka fè, nou ké ni tchè-kontan é nou ké montré kè nou ka kouté Jézi (Mat. 5:9).

¹⁹ Jézikris sé chèf a lasanblé-la é Jéova ka sèvi èvè-y pou ban-nou onlo konsèy ki plen lanmou. A pa ti rèkonésans nou ni pou sa ! (Éféz. 5:23). Sé pousa, fò-nou byen désidé a kouté Jézi kon lapòt Pyè, kon lapòt Jak é kon lapòt Jan (Mat. 17:5). Adan awtik-lasa, nou vwè kè siwvwè nou fè on frè oben on sè lapenn, fò-nou fè éfò pou nou wouvin byen èvè-y. Konsa nou ké montré kè nou ka kouté Jézi. Si nou ka fè tousa nou pé pou nou anpé èvè lézòt é si nou ka kontinyé maché asi chimen a lavi, nou ké ni onlo byenfé é nou ké ni tchè-kontan pou touttan.