1, 2. (1) ¿Kasa aluwataanaka anain Pedro, Santiago otta Juan? (2) ¿Kasakaʼa naaʼinrüin? (3) ¿Kasa wekirajaainjatka anain sünain ekirajaayakat tüü?

SÜCHIKIJEE tü Pascua eejatkat soʼu juyakat 32, eeʼiranajaasü nukuwaʼipa Jesuu nuʼupala Pedro, Santiago ooʼulaka Juan. Eesüjaʼa chajatüle tia saaʼu wanee uuchi chajatkat Hermón. Anuu sünüiki tü Bibliakat: «Chuwatsü maʼi nuʼupünaa [Jesuu] maa aka naaʼin chi kaʼikai. Otta nüsheʼin, jorojorotsü maʼi» (Mat. 17:1-4). Soʼunnaa tia, naapakalaka na aluwataaushikana nünüiki Maleiwa sünain maa: «Anii chi Tachonkai aishikai tapüla. Talatüshi maʼi taya nümaa. Jüüjüü jümata sümüin nünüiki» (Mat. 17:5). Sünainjee tü naaʼinrakat naya aluwataaushikana, jaʼyasü naaʼu jüüjüüin naya sümüin nünüiki Jesuu. Meesia wakuwaʼipa maʼaka naaʼin nayakana.

² Wekirajaaitpa anain sünain ekirajaaya 50 wooʼulaainjatüin waneirua kasa süpüla woonooin sümaa nünüiki Jesuu. Sünain ekirajaayakat tüü, wekirajaweerü anain piamasü kasa waaʼinrajatka naashin Jesuu.

3. ¿Kasa waaʼinrajatka saashin Mateo 7:13, 14?

³ (Paashajeʼera Mateo 7:13, 14). Nüküjain Jesuu eein piamasü wopu, wane jerutsü ooʼulaka wane mouisü. Piamasü wopu eeka neʼe. Wayainjana aneekaka waneʼewai wakua jaralüinjatüin tü woʼunakalü aluʼu. Wayaawatüinjatü aaʼu jaralüinjatüin  tü woʼunuinjatkalü aluʼu süpüla katüinjatüin woʼu waneepia.

4. ¿Jamüsü süchekünaka maʼin tü wopu jerutsükat?

⁴ Wayaawatüinjatü saaʼu kasain kayaawasein tü piamasükat wopu. Tü wopu jerutsükat, wainma na oʼunakana suluʼu süka mapüleein oʼunaa suluʼu, wainma na ayatakana suluʼuin tia wopukot süka noʼunuin süchiirua tü sümakat wainma wayuu. Nnojotpejeʼe nayaawatüin saaʼu niain Satanaa chi Yolujaakai acheküin napüleerua süpüla noʼunuinjanain suluʼu tü wopu sünainmüinkat outaa (1 Cor. 6:9, 10; 1 Juan 5:19).

5. ¿Kasa nooʼulaaka suulia naaʼinrüin waneinnua wayuu süpüla noʼunuinjanain suluʼu tü wopu mouisükat?

⁵ Tü wane wopukot shia tü mouisükat. Palitchon na wayuu oʼunakana suluʼu naashin Jesuu. Nüküjain Jesuu eejüinjatüin waaʼin noulia na nünüikimaajanayaakana Maleiwa (Mat. 7:15). Watta maʼin saalii iküleesia maaʼulu, na wayuu suluʼukana ekirajüshii naya tü shiimainkat nüchiki Maleiwa naashin. Sutuma wattain saalii iküleesia wainma maʼin wayuu nnojotka ayaawatüin saaʼu jaralüin tü ekirajakat tü shiimainkat nüchiki Maleiwa otta nnojotsü nachajaain sukuwaʼipa süpüla noʼunuinjanain suluʼu tü wopu sünainmüinkat kataa oʼuu. Eepejeʼe süpüla nousütüin anain tia wopukot süka nümüin Jesuu mayaa: «Müleka joonoole sümaa tanüiki waneepia, shiimüinshaana jiain tekirajüin. Je jiyaawateerü aaʼu tü shiimainkat süpüla jujuittüinjanain sütüma suulia achepchiaa» (Juan 8:31, 32). Anataʼaleeshijaʼa maʼin pia süka püchajaain sukuwaʼipa süpüla pütüjaain saaʼu tü shiimainkat nüchiki Maleiwa suulia puʼunuin süchiirua sukuwaʼipa wayuu. Ekirajaashi pia sünain tü Bibliakat süpüla pütüjaain saaʼu tü nümakat Maleiwa jee jüüjüüin pia sümüin tü nikirajakalü anain Jesuu. Jamüshijaʼa pia piyaawata aaʼu piyoutuinjatüin tü alawaa shikirajakalü anain tü iküleesiakalüirua. Nnojoishi pia sünainpünaain miʼiraa jee akuwaʼipaa nnojotka pansaain sümaa tü nümakat Jeʼwaa. Pütüjaaitpa aaʼu nnojoluin mapüleein aaʼinraa tü nuchuntakat Jeʼwaa wamüin otta wooʼulaainjatüin suulia tü kasa mojukat noʼuluʼu (Mat. 10:34-36). Eesüjaʼa kapüleepuʼule pümüin puuʼulaain suulia tü kasa mojusükat, puuʼulaapejeʼe suulia aaʼinraa tia süka alin püpüla Jeʼwaa otta talateein nia putuma. Talatakajasaʼa maʼin naaʼin Jeʼwaa pümaa (Prov. 27:11).

6. Saashin Salmo 119:9, 10, 45, 133, ¿kasa waaʼinrajatka süpüla ayatüinjanain waya suluʼuin tü wopu mouisükat?

⁶ ¿Kasa waaʼinrajatka süpüla ayatüinjanain waya suluʼuin tü wopu mouisükat? Jülüjataa waaʼin tüü: suluʼu waneirua mma kasepüsü atumawaa tü karateet saaʼupünaakat uuchi suulia sujutuuin kemion alataka suluʼupünaa. ¿Aashin nnojoleechin jashichin chi oʼunakai suluʼupünaa tia karateet kasepükat? Tü karateet kasepükat müsü aka saaʼin tü nümakat Maleiwa suluʼu tü Bibliakat süka saaʼinmajüin waya (paashajeʼera Salmo 119:9, 10, 45, 133).

7. ¿Kasa jülüjainjatka naaʼin wanee jimaʼai jee wanee majayülü süchiki tü wopu mouisükat?

⁷ Piakai jimaʼaikai, piakat majayütkat, ¿shiimainche müin kapükai saaʼin pukuwaʼipa sutuma tü nümakat Jeʼwaa? Shiaʼaya keeʼireeka naaʼin Satanaa jülüjain paaʼin. Jülüjeesü paaʼin nutuma müin talatakai maʼin naaʼin na wayuu oʼunakana suluʼu tü wopu jerutsükat sutuma tü naaʼinrakat. Jülüjeesü paaʼin nutuma nnojoluin talatüin paaʼin maʼaka talatüin naaʼin na koleejiajiraakana pümaa, na wayuu piʼrakana suluʼu Internet otta müin  kapükai saaʼin pukuwaʼipa sutuma tü nümakat Jeʼwaa. * Sotuinjatpejeʼe paaʼin nnojoluin kasajatüin nümüin Satanaa tü alatajatkat namüin na wayuu suluʼukana tü wopu jerutsükat. Eekajasaʼa Jeʼwaa nüküjain pümüin tü kasa anasü eejeetkat namüin na wayuu suluʼukana tü wopu mouisükat (Sal. 37:29; Is. 35:5, 6; 65:21-23).

8. ¿Kasa natüjeetka na jimaʼaliikana jee na majayünnüükana sünainjee tü naaʼinrakat Olaf?

⁸ Jülüjataa waaʼin tü watüjakat sünainjee tü naaʼinrakat wanee jimaʼai, Olaf nünülia. * Napüleerua aaʼinchi nia na koleejiajiraakana nümaa shiiʼiree mojeein nukuwaʼipa. Nüküjain namüin nüküjalin pütchi nüchiki Jeʼwaa jee naaʼinrüin tü sümakat tü Bibliakat. Shimeʼejaka naaʼin waneinnua jieyuu shiiʼiree süinkaweein nümaa, nnojotpejeʼe naaʼinrüin tia otta nnojotsü shiain neʼe alatüin nümüin tia. Anuu  nünüiki: «Napüleerua aaʼinchi taya na ekirajüliikana shiiʼiree toʼunuin suluʼu eʼikülee miyoʼu. Nnojorüle taaʼinrüin tia naashin, mojuteechi taya sutuma wayuu otta nnojoleerü anain takuwaʼipa watta kaʼi». ¿Kasa naaʼinraka Olaf süpüla nnojoluin naaʼinrüin kasa mojusü? Anuu nünüiki: «Aʼaleewajaashi taya namaa na wawalayuu laülaakana aaʼin, müshii aka saaʼin tapüshi tamüin. Shia taaʼinmaaka maʼin ekirajawaa sünain tü Bibliakat. Sutuma tia, tayaawatüitpa maʼin aaʼu tü shiimainkat nüchiki Maleiwa otta shiaitpa taaʼinmaaka maʼin aʼyatawaa nümüin Jeʼwaa».

9. ¿Kasa waaʼinrajatka suulia wojunujaain suulia tü wopu mouisükat?

⁹ Keeʼireesü naaʼin Satanaa wojunujaain suulia tü wopu sünainmüinkat kataa oʼuu süpüla wekerotüinjanain suluʼumüin tü wopu sünainmüinkat outaa (Mat. 7:13). Nnojoleena waya ojunujaain suulia tü wopu mouisükat ayatüle jüüjüüin waya sümüin tü nümakat Jesuu otta kojutule wamüin tü nümakat Jeʼwaa. Jooluʼu wekirajaa sünain wane kasa waaʼinrajatka naashin Jesuu.

10. ¿Kasa waaʼinrajatka naashin Jesuu suluʼu Mateo 5:23, 24?

¹⁰ (Paashajeʼera Mateo 5:23, 24). Nüküjain Jesuu suluʼu tia wetsiikulokalüirua wanee kasa anaka maʼin namüin na judío aapajakana nünüiki. Jamüshijaʼa nüsülajüinjachire wanee wayuu wanee mürüt nümüin Maleiwa suluʼumüin tü aʼwaajüleekat, shiasaʼa sototoole naaʼin kaainjalain wanee nuwala nuulia wanaa maʼin sümaa naapüinjatüin tü nüsülainkat nümüin chi sacerdootekai, nüpütüinjatü yala tü nüsülainkat jee oʼunuinjachi nia süpüla nukumajüin sukuwaʼipa tü mojujirawaakat. ¿Kasa alanaʼaleeinjatka nümüin chia wayuukai suulia nüsülajüin wanee mürüt nümüin Jeʼwaa? Naashin Jesuu nukumajüinjatü palajana sukuwaʼipa tü mojujirawaakat.

11. ¿Kasa naaʼinraka Jacob süpüla anajiraainjachin nia nümaa Esaú nüchikuaʼa?

¹¹ Wainma kasa watüjaka sünainjee tü naaʼinrakat Jacob süpüla wakumajüin sukuwaʼipa wanee mojujirawaa. Eepa 20 juya kepiain nia suluʼu wanee mma wattasü, nüküjain Jeʼwaa nümüin nükajee wanee aapiee nüleʼejüinjachin nüchikuaʼa nuumainpaʼamüin (Gén. 31:11-13, 38). Oʼutuneepejeʼe naaʼin nutuma Esaú chi nuwalakai (Gén. 27:41). Mmotkalaka maʼin Jacob sutuma tia (Gén. 32:7). ¿Kasa naaʼinraka Jacob süpüla anajiraainjachin nia nümaa Esaú? Palajana, oʼuraajüshi nia nümüin Jeʼwaa. Piama, asülajüshi nia kasa nümüin Esaú (Gén. 32:9-15). Apünüin, niʼrapa nia eesü waneirua kasa naaʼinraka süpüla kojutuinjachin nia nutuma otta akaratshitua nüsapainkain nümülatuʼu. Sutuma nnojoluin yaletüin naaʼin Jacob jee kojutuin nümüin chi nuwalakai, anajiraashi nia nümaa nüchikuaʼa (Gén. 33:1-4).

12. ¿Kasa watüjaka sünainjee tü naaʼinrakat Jacob?

¹² Eesü wanee kasa watüjaka sünainjee tü naaʼinrakat Jacob süpülapünaa nüpanapajüin chi nuwalakai otta sukuwaʼipa tü nünüikikat nümüin. Palajana, achuntushi kaalinwaa nümüin Jeʼwaa sümaa naaʼinrüin kasa wanaapünaa sümaa tü nuchuntakat nümüin süpüla anajiraainjachin nüchikuaʼa nümaa Esaú. Naashajaapa nümaa Esaú, nnojoishi aʼülüjaajiraain nümaa süchiki jaralin kasirüin tü alatakat. Shia jülüjaka naaʼin anajiraainjachin nia nümaa chi nuwalakai. ¿Kasa waaʼinrajatka süpüla washatüin nukuwaʼipa Jacob?

13, 14. ¿Kasa waaʼinrajatka mojule wanüiki nümüin wanee wawala?

¹³ Wayakana suluʼukana tü wopu mouisü sünainmüinjatkat kataa oʼuu, keeʼireesü waaʼin anajiraain waya namaa na wawalayuukana (Roma 12:18). ¿Kasa waaʼinrajatka mojule wanüiki nümüin wanee wawala? Oʼuraajüinjana waya nümüin Jeʼwaa süpüla nükaalinjain waya sünain anajirawaa nümaa chi wawalakai.

¹⁴ Anasü wasakireʼerüle waaʼin sünain tüü: «¿Kasa taaʼinrajatka süpüla nnojoluin yaletüin taaʼin wanaa sümaa takumajüin sukuwaʼipa wanee mojujirawaa nümaa wanee wawala? ¿Jameerü naaʼin Jeʼwaa otta Jesuu tayale aashajaain palajana süpüla takumajüin sukuwaʼipa wanee mojujirawaa?». Sutuma tü wayaawatakat sünainjee tia pütchikat, eeshii süpüla woonooin sümaa nünüiki Jesuu otta wachajaain sukuwaʼipa süpüla wakumajüin wanee mojujirawaa sümaa nnojoluin yaletüin waaʼin. Jooʼu wekirajaai sooʼomüin süchiki nukuwaʼipa Jacob.

15. Sünainjee tü sümakat Éfeso 4:2, 3, ¿kasa waaʼinrajatka süpüla wakumajüin sukuwaʼipa wanee mojujirawaa nümaa wanee wawala?

¹⁵ ¿Kasaje alataka nuʼunule Jacob sümaa yaletayaain naaʼin süpüla nüntiraainjachin nümaa chi nuwalakai? Eesüjaʼa süpüla nnojoluin anain tü alatakat. Sutuma tia, nnojoluinjatü yaletüin waaʼin wakumajapa sukuwaʼipa wanee mojujirawaa nümaa wanee wawala (paashajeʼera Éfeso 4:2, 3). Anuu sünüiki Proverbios 18:19: «Kapüleesü nümüin wanee wayuu anouteʼeraa wanee atkawaa nümaa nuwala, müsü aka saaʼin ashutaa saaʼu wanee pueulo miyoʼu süsepü, eesü atkawaa eekai müin aka saaʼin supuettoʼuse wanee pueulo akumajuushi süka kachueera». «Nnojotsü taaʼinjeein», wamüle nümüin chi wawala mojujiraakai amaa waya keeʼireejeerü naaʼin anajiraain wamaa.

16. (1) ¿Kasa jülüjainjatka waaʼin süpülapünaa wakumajüin sukuwaʼipa wanee mojujirawaa? (2) ¿Jamüsü waaʼinrajatka tia?

¹⁶ Jülüjainjatü waaʼin palajana sukuwaʼipa tü wanüikinjatkat süpülapünaa waashajaain nümaa chi wawala mojujiraakai amaa waya. Süchikijee tia, aashajaainjana waya nümaa süka anakalü akuwaʼipa süpüla anajiraain waya wachikuaʼa nümaa. Eesüjaʼa süpüla airuʼuluin nünüiki wamüin. Wachecherüinjatpejeʼe waaʼin suulia jashichin waya nümüin jee nnojoliinjana kanüikiyaain waya. Soto waaʼin  shiain analeein maʼin anajiraale waya nümaa wanee wawala suulia watüjaain saaʼu jaralin kasirüin tü alatakat (1 Cor. 6:7, 8).

17. ¿Kasa pütüjaka sünainjee tü naaʼinrakat Gilbert?

¹⁷ Jülüjataa waaʼin tü naaʼinrakat wanee wawala, Gilbert nünülia, süpüla nukumajüin sukuwaʼipa wanee mojujirawaa. Anuu nünüiki: «Mojujiraashi taya nümaa wanee tapüshi. Alatüsü suulia piamasü juya tachajaain maʼin sukuwaʼipa süpüla anajiraainjachin taya tachikuaʼa nümaa». ¿Kasa maa naaʼinraka chi wawalakai? «Süpüla taashajaain nümaa chi tapüshikai, oʼuraajüshi taya nümüin Jeʼwaa süpüla tachecherüinjatüin taaʼin suulia jashichin taya nümüin airuʼurule nünüiki tamüin. Nnojotsü shiainjatüin taaʼinmaain tü aainjünakat tamüin, shiainjatü taaʼinmaaka anajiraainjachin taya nümaa chi tapüshikai», müshi Gilbert. ¿Kasa anasü niʼraka sünainjee tia? Anuu nünüiki: «Anajiraaichipa taya namaa napüshuaʼa na tapüshikana».

18, 19. (1) ¿Kasa waaʼinrajatka mojule wanüiki nümüin wanee wawala? (2) ¿Jamüsü waaʼinrüinjatka tia?

¹⁸ Sutuma tü wekirajaaitpakalü anain, ¿kasa waaʼinrajatka mojule wanüiki nümüin wanee wawala? Oonooinjana waya sümaa nünüiki Jesuu süpüla wakumajüinjatüin sukuwaʼipa wanee mojujirawaa. Waashajaa nümaa Jeʼwaa süchiki tia otta wachunta nümüin chi naaʼinkai süpüla wakumajüinjatüin sukuwaʼipa tü alatakat. Waaʼinrüle tia, talateerü waaʼin jee jaʼyeerü waaʼu woonooin sümaa nünüiki Jesuu (Mat. 5:9).

¹⁹ Talatüshii maʼin waya süka nuʼunirüin wakuwaʼipa Jeʼwaa nükajee Jesukürisüto, chi wekiipüʼükai (Éf. 5:23, 24). Woonoo sümaa nünüiki Jesuu maʼaka naaʼinrüin shia chi aluwataaushikai Pedro, Santiago ooʼulaka Juan (Mat. 17:5). Oonooshii waya sümaa nünüiki Jesuu wanaa sümaa wakumajüin sukuwaʼipa wanee mojujirawaa nümaa wanee wawala. Ayatüle waya suluʼuin tü wopu mouisü sünainmüinkat kataa oʼuu, watteerü saalii tü kasa anasü weʼreetkat maaʼulu otta talateerü waaʼin süpüla kaʼikat süpüshuaʼa.