1, 2. a) ¿Kukwe meden nuain mananbare nitre apóstol nimä Jesukwe ie aune kani ngäbiti ño kwetre? b) ¿Dre rabai gare nie kukwe ja tötikara nekänti?

PENTECOSTÉS kä 32 ye bitikäre, apóstol Pedro, Santiago aune Juan ie kukwe ñan tuabare mikani tuare ye tuani kwetre ja okwä jeñebiti. Ngutuä keteiti, ye abokän ngutuä Hermón ye ken raba ruin nie, Jesús bä nikwitani niaratre okwäbiti. Biblia tä niere: “Ñänä trä dirare ye kwrere Jesu ngwäre bä namani amne, dän Jesubtä abko trä namani ngwen bürere kä trä dirare kwrere” (Mat. 17:1-4). Kukwe mikani tuare ye jatanina krüte ngwane, Ngöbökwe kukwe ne niebare ye kukwe juruabare nitre apóstol ie: “Ni ne abko ti Odei tare kri tikwe. Niara käi nuäre krübäte tibtä, aisete niara kukwei nua munkwe” (Mat. 17:5). Nitre nimä ne käkwe nünanbare ño yebiti Jesús kukwe nuabare kwetre bämikani kwetre aune ni tö ja ngwanbätä niaratre erere.

² Jesús kukwe nuata nikwe ye abokän ni ñaka rabadre kukwe ruäre nuainne ye meden gärätä rababa gare nie kukwe ja tötikara känebätä. Aune ni rabadre kukwe ketebu nuainne niebare Jesukwe ye rabai gare nie kukwe ja tötikara nebätä.

3. Mateo 7:13, 14 tä niere erere, ¿ni rabadre dre nuainne?

³ (Ñäkädre Mateo 7:13, 14 yebätä). * Jukwe kubu tärä niebare Jesukwe aune kwatire kwatire ye tä niken ni ngwena ji jene jenebiti. Kwati, ye abokän kwata kri aune kwati abokän krä chi. Ji mada ñaka tärä. Ni näin jukwe medente ta ye ni itire itire rabadre den nuaindre jai. Kukwe diandre nuaindre jai ye ütiäte krubäte ñobätä ñan aune ye köböire ja nire käre raba nemen nikwe o ñakare.

4. ¿Ji kwata kri ye abokän ño mä raba mike gare?

 ⁴ Ji krobu ñaka ja erebe ye tädre gare metre nie ye ütiäte krubäte. Ji kwata kri yebiti nitre kwati tä niken ñobätä ñan aune yebiti nuäre nändre. Nitre kwati tä ja töi mike näin ji yebiti ñobätä ñan aune nitre kwati tä näin ji yebiti yebätä. Ji niken ni ngwena gata kokwäre yebiti nitre rikadre ye Satana diablu tö ye ñaka gare ietre jabätä (1 Cor. 6:9, 10, TNM; 1 Juan 5:19).

5. ¿Ji krä chi kwandre nitre ruäre ie aune yebiti nändre kwetre yekäre tätre dre nuainne?

⁵ Ji krä chi ye ñaka ja erebe ji kwata kri yebe aune nitre braibe krubäte ie tä kwen niebare Jesukwe. ¿Ñobätä? Nikwe ja ngibiadrebiti nitre kukwe ngwarbe niekä yebätä, yebiti Jesukwe ni mikani mokre bersikulo mada yekänti ye kwin krubäte (Mat. 7:15). Kukwe keta kabre mikata täte aune bäsi jökrä tä kukwe metre driere nieta kwetre ye nie tärä. Kukwe keta kabre mikata täte yebätä nitre kwati di nianinanka aune tä nianinte aune ji meden niken ni ngwena ja nire kokwäre ye niaratre ñaka ja di ngwen känene mada. Akwa ye raba kwen ietre ñobätä ñan aune Jesukwe niebare: “Munkwe nünandikä kärekäre ti kukweibtä ne ngwane, mun rabadi ja töitikaka era metre tibe. Ye ngwane, kukwe era metre Ngöböbtä rükadi gare munye amne kukwe era yebti mun rabadi tikaninte” (Juan 8:31, 32). Mä ñaka nikani nitre kwati jiebiti, ñakare aune mäkwe kukwe metre känänbare ye kwin krubäte. Mä jatani ja tötike kwin Bibliabätä Ngöböta kukwe meden ükete mikakäre täte ye mikakäre gare jai aune kukwe meden driebare Jesukwe ye mäkwe kukwe nuani. Ñodre, kukwe ngwarbe mikata täte ye tä kukwe ngwarbe driere ye mäkwe ñaka kadre ngäbiti aune fiesta bätä kukwe nuainta kite kukwe ngwarbe yekri ye mäkwe ñaka nuaindre mada namani gare mäi. Jehovata dre ribere nie mikakäre täte aune kukwe meden kämekäme nuainta ye ñaka ka ngäbitita kwe ye ñaka nuäre mikakäre täte namani gare mäi (Mat. 10:34-36). Mäkwe ja töi kwitadre kukwe yebätä ye ñaka namani nuäre mä kräke, akwa Jehová nämäne tare mäkwe aune mä kadre ngäbiti kwe ye ie mä tö namani yebätä mäkwe ñaka ja di ngwani nekä raba ruin nunye. Mäkwe ja töi mikani kukwe ye nuainne yebätä kätä juto krubäte Jehovabätä raba ruin nunye (Prov. 27:11).

6. Salmo 119:9, 10, 45 aune 133 tä niere erere, ¿dre raba ni dimike ne kwe ni tädre jankunu ji krä chi yebiti?

⁶ Ni nibira näin ji krä chi yebiti ngwane, ¿dre raba ni dimike ne kwe ni tädre näin jankunu ji krä chi yebiti? Ani kukwe keteiti bämike. Juta ruäre känti ji niken ngutuäbätä ta yekänti ji ye kräbäre jondron tä mikani nitre karo ngwanka aune karo ye kriemikakäre. Jondron tä mikani ji kräbäre ye köböire karo ñaka raba niken jikrä ye ken o rikadre ngutuäbätä moto yekäre. Ñobätä jondron mikata ji kräbäre ye ñaka tä nemen blo nitre karo ngwanka ye kräke, ¿ñan ererea? Ye erere arato, kukwe ükaninte Ngöbökwe mikakäre täte tä kwen nie Bibliabätä ye abokän jondron tä mikani ji kräbäre ye kwrere, tä ni dimike ne kwe nikwe nändre jankunu ji krä chi yebiti (ñäkädre Salmo 119:9, 10, 45, 133 yebätä). *

7. ¿Ji krä chi ye rabadre tuin ño monsotre bati ie?

⁷ Monso bati, ¿kukwe ükateta Jehovakwe mikakäre täte ye köböite mä ñan raba kukwe mada nuainne ye erere tärä nemen ruin mäi ruäre ngwane? Mäkwe töbikadre kore ye ie Satana tö. Nitre tä näin ji kwata kri yebiti tätre dre nuainne aune tä kä ngwen juto krubäte  jabätä ye mäkwe mikadre ñärärä ye ie niara tö. Nitre nänkä kwelate mäbe aune nitre tuata mäkwe internete ye tä kä ngwen juto krubäte jabätä aune Jehovata kukwe ükete mikakäre täte ye köböite kukwe kwin käi ngwanta juto jabätä ye ñaka raba nemen mäkwe rabadre ruin mäi yei niara tö. * Akwa ji Satanakwe yebiti nire nire tä näin ye näin ngwena dre kokwäre ye Satana ñaka tö mikabätä gare jire ie, ye mäkwe ngwan törö jai. Akwa, nire tä näin ji krä chi tä niken ni ngwena ja nire kokwäre yebiti yekwe dre rabai mrä ye Jehovata mike gare metre ye nemen gare mäi (Sal. 37:29; Is. 35:5, 6; 65:21-23).

8. ¿Kukwe namani bare Olafbätä yebätä dre raba nemen gare monsotre bati ie?

⁸ Ja mräkä bati kädekata Olafbätä * dre namani bare yebätä dre raba nemen gare mäi yebätä töbike. Nitre nänkä kwelate ben käkwe  nuaninte krubäte ne kwe rabadre nemen kämekäme ni madabe. Kukwe ükaninte Ngöbökwe tä Bibliabätä ye nitre testiko Jehovakwe tä ja jie ngwenbiti ye mikani gare kwe ngwane, meritre bati kwati kwelate tö namani jakabätä ben aune ja di ngwani kwetre ne kwe rabadre nemen kämekäme bentre. Akwa niarakwe ñaka kukwe käme ye nuainbare aune kukwe ye ñan aibe ben ja tuani kwe. Tä niere: “Ti rikadre universidate ye nitre dirikä nämä ti töi mike nuainne ja dibiti ñobätä ñan aune ye köböire ti raba nemen käikitaninkä. Ti ñaka nuaindi ngwane ti ñaka rabai nemen ütiäte nämäntre niere tie”. ¿Dre käkwe dimikani ja tuakäre kukwe yebe? Niarata mike gare: “Tikwe ja ketamuko kwin känänba konkrekasionte. Niaratre ye rababa ti mräkätre ye kwrere. Ti jataba ja tötike bäri bökän Bibliabätä. Ti jataba ja tötike bäri kwin ngwane, kukwe metre nämä tikwe ye jataba nemen gare bäri metre tie aune ti töi rababa kwatibe sribibätä Jehová kräke”.

9. ¿Ni tö nänbätä jankunu ji krä chi yebiti ngwane nikwe dre nuaindre?

⁹ Ji niken ni ngwena ja nire kokwäre yebätä nikwe kämikadrekä aune ji kwata kri tä niken ni ngwena gata kokwäre yebiti nitre kwati kä jökräbiti tibien tä näin yebe ni rikadre gwaire ye ie Satana tö (Mat. 7:13). Akwa, Jesuta dre niere ye nikwe kukwe nuain jankunu aune ji krä chi ye tä ni kriemike ye kwrere nikwe mikai tuin jai ngwane, nikwe ñaka kämikaikä jirebätä. Nikwe kukwe mada nuaindre niebare Jesukwe ye ani mike ñärärä mada.

10. Mateo 5:23, 24 tä niere erere, ¿nikwe dre nuaindre niebare Jesukwe?

¹⁰ (Ñäkädre Mateo 5:23, 24 yebätä). Kukwe ütiäte krubäte nuain nämäne nitre judío yekwe yebätä blitabare Jesukwe bersikulo nekänti. Ni iti tädre templote juto biare jondron nire biankäre kukwadre sacerdote ie ye bämike ja töite. Akwa tädre yete ngwane, kukwe nämäne ja mräkä iti ben kwe ye rükadreta törö ie, rabadre jondron nire ye tuenmetre aune niken mentokwäre. ¿Ñobätä? ¿Dre tädre bäri ütiäte kräke jondron biandre kukwadre Jehovai kwe ye kräke? Jesukwe niebare metre ta: “Mäkwe ja mäkäta käne mä mräkä yebe”.

11. ¿Jacob dre dre nuainbare ja mäkäkäreta Esaú ben?

¹¹ Kukwe namani bare Jacobbätä yebätä ja tötikadre ye raba kukwe ütiäte ja töi kräke driere nie ja mäkädreta yebätä. Nämäne nüne juta madate ye käi nikanina kä 20 ta ngwane, rikadreta ja käite ye Ngöbökwe mikani gare ie ángel itibiti (Gén. 31:11, 13, 38). Akwa kukwe nämäne keteiti kisete: eteba umbre kwe Esaú ja töi mikani niara kämike (Gén. 27:41). Eteba kwe Esaú nämäne romon jankunu kräke yebätä nämäne töbike ngwane, nämäne nemen ja töibikaire aune kä jürä nämäne nemen krubätebätä (Gén. 32:7). ¿Jacob dre nuainbare ja mäkäkäreta eteba kwe ben? Kena, orabare ja brukwä ngöibiti kwe Jehovai. Ketebukäre, jondron juani kwe Esaú kräke (Gén. 32:9-15). Aune ketamäkäre, ja tuani ngwärere kwetre ngwane, Jacob ja töi mikani Esaú mike ütiäte jai. Ñaka ja mikani ngukodokwäbiti kwe bati o bobu aibe, ñakare aune nuainbare kwe bä kükü jire. Töi bobrebiti aune töi kwinbiti ja mäkäninta kwe eteba kwe ben (Gén. 33:3, 4).

12. ¿Jacob kukwe nuainbare yebätä dre raba nemen gare nie?

¹² Jacob ja ükaninte ño blitakäre Esaú ben aune blitabare ño kwe ben yebätä kukwe ütiäte raba nemen gare nie ja töi kräke. Kena, Jehovakwe dimikadre ye ribebare kwe ja töi bobrebiti. Biti, dre käräbare kwe orasionte ye ererebätä kukwe nuainbare kwe ne kwe gätädreta Esaú ben ngwane, rabadre bäri nuäre kräke kukwe ükatekäre. Aune mrä, blitabare kwe ben ngwane nirekwe kukwe metre nämäne yebätä ñan nikani ñäke jai kwärikwäri, ñakare  aune ja töi mikani kwatibe kwe ja mäketa eteba kwe ben. ¿Ni raba ja ngwen ño niara erere?

13, 14. Kukwe nuainbare nikwe matani tare ja mräkä madabätä ngwane, ¿nikwe dre nuaindre?

¹³ Ji niken ni ngwena ja nire kokwäre yebiti nita näin yebätä ni tö nünanbätä jäme ja mräkätre ben (Rom. 12:18). Ye medenbätä, nikwe kukwe nuainbare ye matani tare ja mräkä madabätä gadre nikwe ngwane, ¿nikwe dre nuaindre? Jacob erere, nikwe oradre ja brukwä ngöibiti Jehovai aune ni tö ja mäkäbätä ja mräkätre ben ye mikadre nemen bare kwin kwe ye nikwe ribedre ie.

¹⁴ Ne ben arato, nikwe kä diandrekä jai ja trä tuakäre. Ñodre, ni rabadre ngwentari jai: “¿Tita juto biare ñaka bikakäre kri mada? ¿Ngite juandre ta tibiti ye ti rabadre kärere töi bobrebiti aune ja mäketa? ¿Tikwe ja töi mikai ja mäketa ja mräkä o ja ngwai ben ngwane ja rabai ruin ño Jehová aune Jesús ie?”. Kukwe mikadre gare nikwe kukwe ngwantarita nebätä ye käkwe ni töi mikai Jesús kukwe nuin aune ja töi mike ja mäketa ja mräkätre ben töi bobrebiti. Jacob kukwe nuainbare ye raba ni dimike kukwe ye nuainne.

15. ¿Kukwe ja jie ngwankäre tä Efesios 4:2, 3 ye raba ni dimike ño ja mäkäkäreta ja mräkä ben?

¹⁵ Jacob ja tuani eteba kwe ben ngwane ja töi mikadre kwe bike bäri ngwane, ¿dre rabadre bare? Kukwe jene rabadre bare raba ruin nie. Ye erere arato, ni rikadre blite ja mräkä iti ben kukwe ükatekäre ngwane, ni rabadre nuainne ja töi bobrebiti (ñäkädre Efesios 4:2, 3 yebätä). Proverbios 18:19 tä niere: “Ja mräkä itibätä kukwe namani tare yekänti ñaka nuäre rikakäre juta tä kriemikani kwin ye kwrere aune ngüdraka tärä ye abokän ki krati dite ye kwrere”. Töi bobrebiti nikwe ngite juanmana ta jabiti, ye köböire ni raba niken “juta tä kriemikani kwin” yekänti ye kwrere.

16. ¿Ni rabadre töbike drebätä aune ñobätä?

¹⁶ Nikwe dre niedi aune nikwe niedi ño yebätä nikwe töbikadre kwin käne arato. Ni rabadrera juto ngwane nikwe ja töi mikadre blite ja mräkäbätä kukwe namani tare yebe kukwe meden ngidien ie ye ükatekäre. Kenanbe raba kukwe ñaka kwin niere nie raba ruin nie. Akwa, nikwe ñaka ja töi mikadre nemen romon jötrö ngwarbe o kukwe mike jabiti, ñan ñobätä aune ye käkwe ñaka ni dimikai ja mäketa ben. Ja mäkädreta ja mräkä ben ye bäri ütiäte nirekwe ja ngwani kwin o nirekwe  ja ngwani käme ye kräke, ye nikwe ngwandre törö jai (1 Cor. 6:7).

17. ¿Gilbert kukwe nuainbare yebätä dre nemen gare mäi?

¹⁷ Ja mräkä kädekata Gilbert ja di ngwani ja mäkäkäreta ye ani mike gare jai. Tä niere: “Kukwe nämä krubäte jabätä tikwe ti mräkä iti ben. Kä kubu biti bäri te tikwe ja di ngwanba blitakäre töi jämebiti aune metre ta ja ketakäreta kwin ben”. ¿Dre mada nuainbare kwe? “Tikwe blitadre ti mräkä yebe känenkri ti nämä orare aune kukwe tare niedre kwe tie ye kräke ti nämä ja töi ükete biare ñan mikakäre tare jabätä. Ti tädre juto biare ngite juankäre tabiti. Kukwe meden ie ti tö nämä ja kräke yebätä tikwe ñan ja töi mikadre metrere aune tikwe ja töi mikadre kwatibe nünanbätä jäme ye rükaba gare tie”. ¿Ye köböire dre namani bare? Gilbert tä niere: “Nengwane tita nüne jäme ñobätä ñan aune tita ja kete kwin ti mräkätre jökrä ben”.

18, 19. Kukwe nuainbare nikwe matani tare ja mräkä itibätä ngwane, ¿nikwe dre nuaindre aune ñobätä?

¹⁸ Ye medenbätä, kukwe nuainbare nikwe ye matani tare ja mräkä itibätä rabadre gare nie ngwane, ¿nikwe dre nuaindre? Nikwe ja mäkädreta niebare Jesukwe ye nikwe mikadre täte. Nikwe blitadre kukwe yebätä Jehovabe aune üai deme kwe känändre ni dimikadre kwe kukwe ükete yekäre. Nikwe ye erere nuaindi ngwane, kä täi juto nibätä aune nita Jesús kukwe nuin ye nikwe bämikai (Mat. 5:9).

¹⁹ Ja tare yebiti Jehová tä Jesukristo ni konkrekasion ji ngwanka yebiti ni jie ngwen yebätä nita debe bien krubäte (Efes. 5:23). Apóstol Pedro, Santiago aune Juan erere, ni töita kwatibe Jesús kukwe nuabätä (Mat. 17:5). Kukwe keteitibiti nikwe nuaindre ye abokän, kukwe nuainbare nikwe matani tare ja mräkäbätä yebe nikwe ja mäkädreta nibira gare nie. Ji niken ni ngwena ja nire kokwäre yebiti ni täi jankunu ngwane, kukwe kwin keta kabre rabai nikwe matare aune kä rabai juto nibätä kärekäre.