1-2. (a) Iesu ena aposetolo taudia toi be edena oda herevana idia abia bona dahaka idia karaia? (b) Inai atikol ai dahaka do ita herevalaia?

PASOVA 32 C.E. murinai, aposetolo Petero, Iamesi, bona Ioane be matahanai idauna ta idia itaia. Ororo ta ena ataiai, reana unai be Heremona Ororona ena kahana ta ai, Iesu be edia vairanai ena toana ia idau. “Ena vairana be dina bamona ia diaridiari, bona ena dabua be idia kurokuro momokani, diari bamona.” (Mat. 17:1-4) Unai matahanai ena dokona ai aposetolo taudia be Dirava ena gadona idia kamonai, ia gwau: “Inai be egu Natuna, egu lalokau, ia lau lalonamo henia. Ia umui kamonai henia.” (Mat. 17:5) Unai murinai aposetolo taudia toi be edia mauri dalana amo idia hahedinaraia Iesu idia kamonai henia. Ita ura edia haheitalai ita tohotohoa.

² Atikol 50 ai ita diba, Iesu ena gadona ita kamonai ena anina be gau haida ita karaia lasi be namo. Inai atikol ai, Iesu ia gwau do ita karaia gaudia rua do ita herevalaia.

3. Mataio 7:13, 14 hegeregerena, dahaka ita karaia be namo?

³ Mataio 7:13, 14 duahia. Iesu ese geiti rua ia herevalaia bona idia be dala rua idia lao henia, ta be “lababa herea” bona ta be “maragi momokani.” Dala ihatoina ia noho lasi. Namona be ita sibona ese abia hidi ita karaia edena dala ai do ita raka. Unai abia hidi be mai anina bada, badina mauri hanaihanai ia lao henia dalana be tamona sibona.

4. “Lababa herea” dala be edena bamona do oi herevalaia?

 ⁴ Unai dala rua edia idau ita laloatao be namo. Taunimanima momo be ia “lababa herea” dalana dekenai idia raka. Madi, momo be unai taudia idia badinaia bona unai dala ai idia raka noho. Idia laloparara lasi Satani Diabolo be idia ia hakaua noho bona unai be mase ia lao henia dalana.​—1 Kor. 6:9, 10; 1 Ioa. 5:19.

5. Edena dala ai haida be ia “maragi momokani” dala idia davaria bona badinaia matamaia?

⁵ To dala ma ta be “maragi momokani,” bona Iesu ia gwau haida sibona ese unai dala idia tahua. Dahaka dainai? Badina Mataio 7:15 ai, Iesu ese ena murinai idia raka taudia ia hadibaia peroveta koikoi taudia dekena idia naria namonamo. Taunimanima haida idia gwau tomadiho tausen momo idia noho bona idia momo ese hereva momokani idia hadibaia. Unai dainai, momo idia lalomanoka eiava idia daradara bona idia ura lasi mauri ia lao henia dalana idia tahua. To unai dala idia davaria diba. Iesu ia gwau: “Bema egu hereva umui badinaia, umui be momokani egu hahediba taudia, bona hereva momokani do umui diba, bona hereva momokani ese umui do ia ruhaia.” (Ioa. 8:31, 32) Oi ai hanamoa, badina hutuma oi badinaia lasi, to hereva momokani oi tahua. Oi ese Dirava ena ura oi dibaia totona Baibel oi stadilaia namonamo, bona Iesu ena hadibaia herevadia oi kamonai henia. Bona oi dibaia gauna ma ta be, Iehova ia ura tomadiho koikoi ita dadaraia bona idia moalelaia dina badadia lalonai ita vareai lasi. Danu oi diba Iehova hamoalea totona eda mauri ai senisi ita karaia neganai, unai be mai ena hekwarahi. (Mat. 10:34-36) Reana oi gaukara goada unai bamona senisi oi karaia totona. To, emu guba Tamana oi lalokau henia bona oi ura ia oi hamoalea dainai, senisi oi karaia noho. Ia be oi dekenai ia moale bada!​—Aon. 27:11.

6. Salamo 119:9, 10, 45, bona 133, hegeregerena, dahaka ese ita ia durua dala maragina ai ita noho totona?

⁶ Dala maragina ita badinaia matamaia neganai, dahaka ese ita ia durua unai dala ai ita raka noho totona? Mani inai haheitalai ita laloa. Tano haida ai, ororo dekenai idia noho dala ena saidi ai magu maragidia idia karaia, unai ese draiva bona ena motuka be dika amo ia gimaia. Draiva be unai magu maragidia totona do ia maumau lasi! Baibel ai Iehova ena hakaua herevadia be unai magu maragina bamona. Iena taravatu ese ita idia gimaia dala maragina ai ita raka noho totona.​—Salamo 119:9, 10, 45, 133 duahia.

7. Matamata taudia ese dala maragina be edena bamona idia laloa be namo?

⁷ Matamata taudia e, nega haida umui mamia Iehova ena taravatu umui badinaia be auka, a? Satani ia ura unai bamona umui laloa. Ia ura dala badana ai idia raka taudia umui tohotoho, badina toana be edia mauri idia moalelaia. Ia ura do oi laloa emu mauri oi moalelaia lasi, badina emu sikuli turadia eiava Intanet ai oi itaia taudia bamona oi karaia lasi. Satani ia ura do oi laloa Iehova ena taravatu ese oi ia koua dainai, emu mauri oi moalelaia momokani lasi. * Inai oi laloatao: Satani ia ura lasi dala badana dekenai idia raka taudia do idia diba unai dala ena dokona ai dika do idia davaria. To Iehova ia ura oi diba, bema dala maragina ai oi raka noho mauri namona do oi davaria.​—Sal. 37:29; Isa. 35:5, 6; 65:21-23.

8. Matamata taudia be Olaf ena haheitalai amo dahaka idia dibaia?

 ⁸ Tadikaka matamata, Olaf, ena ekspiriens amo do ita dibaia gaudia mani ita laloa. * Ena klas turadia ese ia idia doria matabodaga karadia ia karaia totona. Idia ia hamaoroa Iehova ena Witnes taudia be Baibel ena kara maoromaoro taravatudia idia badinaia neganai, ena klas kekenidia haida be ia idia tohoa loulou idia ida ia mahuta hebou totona. To Olaf be kara maoromaoro ia badinaia goada. Bona hahetoho ma haida ia davaria danu. Olaf ia gwau: “Egu tisa ese lau idia hagoadaia iunivesiti do lau lao, unai amo taunimanima ese lau do idia matauraia. Bona idia gwau bema unai bamona lau karaia lasi, moni gaukara namona do lau davaria lasi bona egu mauri ai do lau moale lasi.” Dahaka ese Olaf ia durua, unai bamona hahetoho ia dadaraia totona? Ia gwau: “Egu kongrigeisen ai tadikaka taihu lau tura henia namonamo. Idia be egu famili bamona. Danu Baibel lau stadilaia namonamo bona lau laloa dobu, unai amo lau  abia dae inai be hereva momokani. Unai dainai, egu lalona lau hadaia Iehova lau hesiai henia totona.”

9. Dala maragina ai ita noho totona dahaka ita karaia be namo?

⁹ Satani ia ura mauri lao henia dalana ita rakatania. Ia ura “mase ia lao henia” dala badana ai idia raka taudia ita tohotohoa. (Mat. 7:13) To, dala maragina ai do ita raka noho bema Iesu ita kamonai henia noho bona unai dala be gimaia gauna bamona ita laloa. Iesu ia gau do ita karaia gauna ma ta mani ita laloa.

10. Mataio 5:23, 24 hegeregerena, Iesu ia gwau dahaka do ita karaia be namo?

¹⁰ Mataio 5:23, 24 duahia. Iesu idia kamonai henia Iuda taudia dekenai idia laloa bada negana ta ia herevalaia. Mani oi laloa ta be dubu helaga ai do ia bouboulaia animal be hahelaga tauna dekenai do ia henia. Unai negai, unai tauna ia laloatao ena tadikaka be ia dekenai ia lalohisihisi, bona boubou gauna be unuseniai do ia rakatania bona do ‘ia lao.’ Dahaka dainai? Badina Iehova dekenai ena harihari gauna ia do henia lasi neganai, mai anina bada gauna ta ia karaia guna be namo. Iesu ia gwau: “Emu tadikaka ida maino oi karaia guna.”

11. Iakobo be edena dala ai Esau ida maino ia karaia?

¹¹ Maino karaia totona Iakobo ena haheitalai amo mai anina bada gaudia haida do ita dibaia. Iakobo be ena tano ia rakatania bona lagani 20 murinai, Dirava ese aneru ta amo ia oda henia ena tano dekenai ia giroa lou totona. (Gen. 31:11, 13, 38) To hekwakwanai be inai, Iakobo ena kakana, Esau, ia ura ia do ia hamasea. (Gen. 27:41) Iakobo ia “gari bada bona ia lalohekwarahi” badina ia laloa, ena kakana be ia dekenai ia do badu noho. (Gen. 32:7) Iakobo be edena dala ai ena tadikaka ida maino ia karaia? Matamanai, unai hekwakwanai be Iehova dekenai ia gurigurilaia loulou. Bena, Esau dekenai harihari gauna namo hereana ta ia siaia. (Gen. 32:9-15) Bona Iakobo be Esau ia itaia neganai, hemataurai karana ia hahedinaraia. Ia be Esau dekenai nega tamona o rua ia tui diho lasi to nega 7 ia tui diho! Iakobo ia manau bona hemataurai karana ia hahedinaraia dainai ena tadikaka ida maino ia karaia.​—Gen. 33:3, 4.

12. Iakobo ena haheitalai amo dahaka ita dibaia?

¹² Iakobo be ena tadikaka hedavari henia totona ia hegaegae dalana bona Esau ia kara henia dalana amo gau ta ita dibaia. Iakobo be mai manau ida Iehova ena heduru totona ia noinoi. Bena ia hekwarahi ena tadikaka ida maino ia karaia totona, unai amo ia hahedinaraia ena guriguri hegeregerena ia kara. Iakobo be Esau ida idia hedavari neganai, daika be maoro bona daika be kerere ia hepapahuahulaia lasi. Iakobo ena tahua gauna be ena tadikaka ida maino do ia karaia. Edena dala ai Iakobo ena haheitalai ita tohotohoa diba?

13-14. Bema eda tadikaka ita hahisia, dahaka ita karaia be namo?

¹³ Bema ita ura mauri ia lao henia dalana ai ita raka noho, namona be eda tadikaka taihu ida maino ai ita noho. (Roma 12:18) Bema ita laloparara iseda tadikaka ta ita hahisia, dahaka ita karaia be namo? Iakobo bamona, namona be mai lalona ibounai ida Iehova ita guriguri henia. Ia ita noia ita do ia durua eda tadikaka ida maino ita karaia totona.

¹⁴ Danu nega ita atoa do ita karaia gaudia ita laloa totona. Sibona dekenai inai henanadai ita laloa: ‘Lau be mai ura ida lau gwau lau kerere, a? Mai manau ida lau sori bona maino lau karaia, a? Bema dala lau karaia egu  tadikaka o taihu ida maino lau karaia, Iehova bona Iesu edia hemami be edena bamona?’ Unai henanadai haerelaia karana ese ita do ia durua, Iesu ita kamonai henia bona mai manau ida eda tadikaka taihu ida maino ita karaia totona. Unai amo, ita be Iakobo ena haheitalai ita tohotohoa.

15. Efeso 4:2, 3 ena hakaua herevana ita badinaia neganai, edena dala ai ita ia durua eda tadikaka ida maino ita karaia?

¹⁵ Bema Iakobo be Esau dekenai daika be maoro bona kerere ia hepapahuahulaia, do ia vara gauna mani oi laloa! Reana idia hedavari neganai, hekwakwanai do ia vara. Hekwakwanai hamaoromaoroa totona eda tadikaka dekenai ita lao neganai ita manau be namo. (Efeso 4:2, 3 duahia.) Aonega Herevadia 18:19 ia gwau: “Tau ta ese ia habadua turana ida maino ia karaia be auka, siti mai magu aukana bamona, bona idia huanai ia vara heai karadia be magu goadana ena geiti badadia bamona.” Eda tadikaka dekenai sori herevana ita gwauraia neganai, unai ese do ia durua ita ida maino ia karaia totona.

16. Dahaka ita laloa be namo bona dahaka dainai?

¹⁶ Danu iseda tadikaka dekenai do ita gwauraia herevana bona do ita gwauraia dalana ita laloa namonamo. Bena ita hahisia tauna ita hereva henia bona do ita durua ia ida eda hetura karana ita hanamoa lou totona. Reana matamanai do ia gwauraia herevadia ese iseda hemami ia hadikaia diba. Do ia auka lasi ita badu eiava iseda maoro ita gwauraia totona, to unai bamona ita karaia neganai maino do ia vara, a? Lasi. Namona be ita laloatao iseda tadikaka ida maino ita karaia be mai anina bada, to daika be maoro bona daika be kerere ita diba be gau badana lasi.​—1 Kor. 6:7.

17. Gilbert ena haheitalai amo dahaka ita dibaia?

¹⁷ Tadikaka ta ladana, Gilbert ia gaukara goada maino ia karaia totona. Ia gwau: “Lau bona egu natuna kekeni huanai hekwakwanai momo idia vara. Lagani rua gunanai, lau gaukara goada maino dalanai ia ida hekwakwanai lau hamaoromaoroa totona, unai amo emai hetura karana do ia namo lou.” Gilbert be dahaka ia karaia danu? Ia gwau: “Egu natuna ida lau do herevahereva lasi neganai, lau guriguri bona egu lalona lau hegaegaelaia, unai amo ia gwauraia herevana ta ese egu lalona do ia hahisia lasi. Iena dika lau gwauatao be namo. Lau laloparara egu maoro lau herevalaia noho be anina lasi, to maino lau karaia gau badana.” Dahaka namo ia vara?  Gilbert ia gwau: “Hari, lalomaino lau abia, badina egu famili ida hetura karana namona ai moalelaia.”

18-19. Bema ta ita hahisia dahaka ita karaia be namo bona dahaka dainai?

¹⁸ Bema oi laloparara emu tadikaka o taihu ta ena lalona oi hahisia, dahaka oi karaia be namo? Maino ita karaia totona Iesu ena hakaua dalana ita badinaia. Iehova dekenai ia vara hekwakwanai oi herevalaia bona maino karaia totona ena lauma helaga ena heduru dekenai oi tabekau. Bema unai bamona oi karaia, do oi moale, bona oi hahedinaraia oi be Iesu oi kamonai henia.​—Mat. 5:9.

¹⁹ Ita moale bada badina Iehova ese “kongrigeisen ena kwarana,” Iesu Keriso amo hakaua dala namodia ia henia. (Efe. 5:23) Aposetolo taudia Petero, Iamesi, bona Ioane hegeregerena, namona be iseda lalona ita hadaia Iesu ita “kamonai henia” totona. (Mat. 17:5) Unai ita karaia dalana be, iseda tadikaka o taihu ita hahisia neganai, namona be ia ida maino ita karaia. Bona danu mauri ia lao henia dala maragina ai ita raka noho, unai amo hari bona vaira nega ai ia doko diba lasi moalena do ita abia.