1-2. (a) Was hot Kot kexikt Pheeter, Tyako un Yoohan se mache, un meechte se tas aan keheert hon? (b) Was tuun mer in tiise artikel noo kuke?

NOO TËM Oostre fest fon 32 N.K., hon ti aphostele Pheeter, Tyako un Yoohan was wunerliches kesiin. Uf een hooche përich, tsiimlich sicher te Hermom, is Yeesus foer tëne keënert kep. Ti Piipel saat: “Sayn kesicht hot soo wii ti sun kexaynt un sayn tsaych is hel wii tas licht kep.” (Mat. 17:1-4) Neekst am ën fon te wisyoon, hon ti aphostele keheert Kot saan: “Tas is mayn Soon, te keliipte, tee woo ich aan nëme. Heert tee aan.” (Mat. 17:5) Meechte ti aphostele tas kemacht hon? Yawool! Ti aat wii se keleept hon, hot ketsaycht tas se Yeesus aan keheert hon. Un meyer wole tëne sayn payxpiil noo mache.

² Im letste artikel, hon mer kelërnt tas Yeesus sayn xtim heere petayt noo lose etliche tinge mache. Awer in tiise artikel, tuun mer 2 tinge siin woo Yeesus kesaat hot tas mer mache sole.

3. Tëm noo Matheus 7:13, 14, was sole mer mache?

³ Lees Matheus 7:13, 14. * Mërk mool tas Yeesus kexproch hot iwer 2 unerxiitliche toore woo tsu 2 unerxiitliche weeche nëme. Een weech is “prayt” un te aner is “xmaal”. Es kept khee trite weech. In was fer weech tuun mer keen? Yeete eene fon  uns mus tas raus suuche. Tas is te wichtichste ëntxlus woo mer mache mise, wayl ploos eene fon te weeche nëmt tsum eewiche leepe.

4. Wii teest tuu te “prayt” weech pexraype?

⁴ Meyer sole uns net ferkese ti unerxiit tswixich ti 2 weeche. Ti meyerste layt suuche te “prayt” weech raus, wayl es laychter is aan tëm keen. Wii traurich tas fiile wole aan tiise weech plaype ploos wayl ti meyerste aan tëm keen! Awer tii mërke net tas tiise weech fom Taywel is. Un woo nëmt tas hin? Tsum toot. (1 Kor. 6:9, 10; 1 Yo. 5:19)

5. Was hon fiile kemacht fer te “xmaal” weech fine un aan fange aan tëm keen?

⁵ Awer te aner weech is kans anerste: tee is “xmaal”, net “prayt”. Un Yeesus saat tas weenich layt tëm fine khene. Weeche was? Es is interesant tas Yeesus hot im neekste wersikel kesaat tas sayn tisipele solte sich uf phase mit te falxe profeete. (Mat. 7:15) Etliche layt rechne tas es tausente relichyoone kept. Ti meyerste fon tëne saan tas se ti woerheet in lërne. Tas lost milyoone layt oone muut orer konfus. Tes weeche, lose se noo te weech suuche woo tsum eewiche leepe nëmt. Awer es is meechlich tiise weech fine! Yeesus hot kesaat: “Wën teyer in mayn wort playpt, sayt teyer wërklich mayn tisipele. Teyer tuut ti woerheet khëne; un ti woerheet tuut aych fray mache.” (Yoo. 8:31, 32) Wii kuut tas tuu net kemacht host was ti meyerste mache! Xtats tas, host tuu ti woerheet kesuucht. Tuu host een tiif xtuutyum fon Kot sayn Wort kemacht fer se wise was eyer fon uns ferlangt. Un tuu host aan keheert Yeesus sayn inlërnunge. Tsum payxpiil: tuu host kelërnt tas Yeehoowa wil hon tas tuu ap xtost ti inlërnunge fon te falx relichyoon un tas tuu noo lost se fayre ti fayertaache woo mit te falx relichyoon se tuun hon. Tuu host aach kelërnt tas es khan xweyer sin tiise tinge im xtich lose fer Yeehoowa kefale. (Mat. 10:34-36) Im xtant, waar tas net laycht fer tich tiise ënerunge mache. Awer, wayls tuu tayn Fater Yeehoowa liipst un wayls tuu tëm froo lose wilst, host tuu net uf kep. Tee wërt wool aarich froo mit tich sin! (Xpr. 27:11)

6. Tëm noo Psalm 119:9, 10, 45, 133, was tuut uns helfe in tëm xmaal weech plaype?

⁶ Was khan uns helfe wayter in tëm xmaal weech keen? Kuk mool tiise ferklaychung. Uf etliche pletse, kepts xmaale xtroose woo uf te përiche sin. Tes weeche, fer sicherheet fer te xofeer kepe, xtele se kleene maure neewich ti xtroos. Weeche ti xitsung fon tiise maure, tuun ti khaare net soo ticht aan te rënte khome un aach net përich runer faare. Kewis, teet nimant sich pexweere: ‘Tiise kleene maure lose mich net fray faare!’ Yeehoowa sayn kesetse, woo in te Piipel xteen, sin wii tiise kleene maure: tii helfe uns wayter in tëm xmaal weech plaype. (Lees Psalm 119:9, 10, * 45, * 133. *)

7. Wii wil Yeehoowa hon tas ti yunge te xmaal weech siin?

⁷ Wëns tuu yung pist, xpiirst tuu als mool tas Yeehoowa sayn kesetse tsu xtreng sin orer tas se tayn frooheet xteele? Tas is was Satanaas wil. Tee wil hon tas tuu tenkst: ‘Yeehoowa sayn kesetse tuun mich ploos xteere. Es weyer peser in tëm prayt weech keen. Tat, mache ti layt ales was se wole! — tii hon  wërklich een froo leepe.’ * Fer tich soo se tenke mache, im xtant penutst Satanaas tayn xuul koleke orer layt woos tuu in te internet siist. Awer tenk imer traan: Satanaas wil net hon tas tii woo im prayt weech keen, raus fine woo tiise weech hin nëmt. Yeehoowa is kans anerste: tee hot uns xon ketsaycht tas mer een xeen leepe kriin tuun wën mer wayter in tëm xmaal weech plaype. (Psal. 37:29; Isa. 35:5, 6; 65:21-23)

8. Was khene ti yunge mit Olaf sayn payxpiil lërne?

⁸ Kuk mool ti speryens fon een yunge pruuter woo Olaf * heest. Tëm sayn xuul koleke wolte tëm tswinge sëks mache mit etliche meet fon te xuul. Awer tee hot aus keleet tas Yeehoowa sayn Tsayer leepe tëm noo was ti Piipel saat. Wii etliche meet fon te xuul tas keheert hon, hon se sich noch mee aan kextrengt fer sëks mit tëm mache. Awer Olaf is fest keplip un hot wayter tas richtiches kemacht. Un tas waar net tas letste kefoer woo Olaf mit keleept hot.  Tee saat: “Mayn leerer wolte mich tenke mache tas ich mist tsu te uniwersiteet keen. Tii hon kesaat tas ploos tan teete ti layt mich respektiire. Tii hon aach kesaat tas, wën ich tas net mache teet, teet ich net een kuut aarwayt orer een froo leepe hon.” Wii khont Olaf torich tas ales triwer wech khome? “Ich hon tichte froynte in te kemaynt kemacht — saat eyer. — Tii waare wii een familye fer mich. Ich hon aach ti Piipel ërnst xtutiirt. Woo mee ich ti Piipel xtutiirt hon, woo sicher waar ich tas es ti woerheet waar. Tes weeche, hon ich ëntxlist mich taafe lose un Yeehoowa tiine.”

9. Was sole mer mache wën mer wole wayter im xmaal weech plaype?

⁹ Satanaas hët kërn tas tuu raus keengst fom weech woo tsum eewiche leepe nëmt. Tee hët kërn tas tuu mache teest was ti meyerste am mache sin: in tëm prayt weech keen “woo tsu te fernichtung nëmt”. (Mat. 7:13) Awer, wën mer wayter Yeesus aan heere un tiise weech wii een xitsung siin, tuun mer im xmaal weech plaype. Yets, wole mer noch was siin woo Yeesus kesaat hot mer mache sole.

10. Tëm noo Matheus 5:23, 24, was hot Yeesus kesaat mer mache sole?

¹⁰ Lees Matheus 5:23, 24. * In tiise wërter, hot Yeesus kexproch iwer een ewënt woo aarich wichtich waar fer ti yuuter woo tëm keheert hon. Iwerlee tich tas yemant im thempel waar. Tee is fërtich fer sayn fii opfer fer te priister ap kepe. Awer tan, tuut eyer sich erinere tas sayn pruuter etwas keeche tëm hot. Was sol eyer tan mache? Tee sol ‘sayn opfer tat lose un fat keen’. Warom? Wayl foer sayn opfer tsu Yeehoowa ap kepe, mus eyer was wichticher mache. Was is tas? Yeesus hot tas taytlich kelos mit te wërter: “Mach eyerst friit mit tayn pruuter.”

11. Was hot Yaakop kemacht fer friit mit sayn pruuter mache?

¹¹ Meyer khene een wichtich lisyoon lërne iwer friit mache, mit etwas woo in Yaakop sayn leepe pasiirt is. Yaakop waar xon unkefeer 20 yoore wayt fon sayn haymlant kewees. Tan, torich een engel, hot Yeehoowa tëm kexikt tsurik keen. (Xee. 31:11, 13, 38) Awer, es waar een propleem kewees. Wii Yaakop fon sayn haymlant fat kang is, wolt Esau, sayn elter pruuter, tëm um pringe. (Xee. 27:41) “Yaakop is unruych un aarich ëngstlich kep” wayl eyer ketenkt hot tas sayn pruuter tëm noch kehast hot. (Xee. 32:7) Was hot Yaakop kemacht fer friit mit sayn pruuter mache? Eyerst hot eyer een hërtslich kepeet too triwer kemacht. Nochter, hot eyer een krooshërtslich kexenk fer Esau kexikt. (Xee. 32:9-15) Un wën eyer tsum xlus Esau ketrof hot, hot Yaakop tëm respekt ketsaycht. Yaakop hot sich foer Esau niter kepikt, net 1 mool; net 2 mool; awer 7 mool! Yaakop hot es hin kriit friit mit sayn pruuter mache wayl eyer teemuutich waar un respekt ketsaycht hot. (Xee. 33:3, 4)

12. Was lërne mer mit Yaakop sayn payxpiil?

¹² Meyer lërne een wichtich lisyoon mit te aat wii Yaakop friit mit sayn pruuter kemacht hot. Tee waar teemuutich kewees un hot Yeehoowa sayn hilef ferlangt. Tan, tëm noo sayn kepeet, hot eyer sayn pestes kemacht tas ales kuut ap laafe teet wën eyer sayn pruuter trefe teet. Un wën Yaakop Esau ketrof hot, hot eyer net fersuucht se pewayse weer richtich orer ferkheert waar. Nee; tëm sayn tsiil waar friit mit sayn pruuter mache. Wii khene mer Yaakop sayn payxpiil noo mache?

13-14. Was sole mer mache wën mer een pruuter pelayticht hon?

¹³ Wën mer wole im weech keen woo tsum eewiche leepe nëmt, mise mer te friit mit unser priiter hale. (Rom. 12:18) Awer, un wën mer mërke tas mer een pruuter pelayticht hon, was sole mer mache? Soo wii Yaakop, mise mer een hërtslich kepeet tsu Yeehoowa mache. Meyer khene tëm hilef ferlange fer friit mit unser pruuter mache.

¹⁴ Meyer sole aach tsayt hoole fer uns selepst noo kuke. Meyer khene uns soo sorte frooche mache: ‘Sin ich wilich fer se saan tas ich ferkheert sin, mich mit teemuut ëntxultiche un tan friit mache? Wii tuun Yeehoowa un Yeesus sich xpiire wën ich te eyerste xrit kepe fer friit mit mayn pruuter orer xwester mache?’ Tiise frooche antworte khan uns ti kraft kepe fer Yeesus aan heere un unser pruuter mit teemuut suuche fer friit mit tëm mache. Soo, kriin mer es hin Yaakop sayn payxpiil noo mache.

15. Wii ti oryentiirung fon Ëfeser 4:2, 3 aan wëne, khan uns helfe friit mit unser pruuter mache?

¹⁵ Khanst tuu tich foer xtele was khent pasiirt sin wën Yaakop hoochmuutich weyer wën eyer Esau ketrof hot? Tas khent xlecht ap kelaaft sin… Tan, wën mer mit een pruuter xpreche keen fer friit mit tëm mache, mise mer teemuutich sin. (Lees Ëfeser 4:2, 3.) * Xpriiche 18:19 saat: “Es is laychter in een ferxtërkte xtat rin keen wii friit mit een pruuter woo pelayticht is mache, un es kept xtrayte woo soo wii ti richele fon een kastël sin.” Een pruuter woo pelayticht is, is wii tiise kastël. Awer, wën mer uns mit teemuut ëntxultiche, khan eyer ti richele uf mache — es wil saan, wilich sin fer friit mit uns mache.

16. Aan was noch sole mer tenke wën mer friit mit unser pruuter mache keen, un warom?

¹⁶ Meyer mise fiil tenke, net ploos aan was mer fer unser pruuter saan tuun, awer aach aan wii mer tas saan tuun. Wën mer xon too triwer ketenkt hon, khene mer mit unser pruuter xpreche keen. Tan, sole mer unser pestes mache fer tëm sayn froyntxaft tsurik kriin. Khan sin tas, am aanfang, tuut unser pruuter uns was saan woo sich net kuut heert. Es weyer laycht pees aan tiise xtun kepe orer fersuuche uns aus leye. Awer, meecht tas uns  helfe friit mit unser pruuter mache? Kewis net. Tenk imer traan: friit mit unser pruuter mache is wichticher wii se pewayse weer richtich orer ferkheert is. (1 Kor. 6:7)

17. Was khanst tuu lërne mit Gilbert sayn payxpiil?

¹⁷ Een pruuter woo Gilbert heest hot sich fiil aan kextrengt fer friit mit yemant fon sayn familye mache. Tee saat: “Ich hat fiile propleeme mit mayn tochter. Ich hon mich mee wii 2 yoore aan kextrengt fer mit tëne fertseele un friit mache.” Was noch hot Gilbert kemacht? “Imer wën ich mit tëne fertseele kang sin, hon ich een kepeet kemacht. Un ich hon mich aach foer perayt fer net pees kepe wën se krop mit mich weyer. Ich must fërtich sin fer se fertsaye. Ich hon kelërnt tas ich solt net khëmpfe fer se tsayche tas ich richtich waar. Nee; mayn flicht waar friit mit mayn meetche mache.” Was fer waar te resultaat kewees? “Hayt, ich xpiire mich in ruu — saat Gilbert —, wayl ich tuun kuut rom khome mit mayn kanse familye.”

18-19. Wën mer yemant pelayticht hon, was wole mer mache, un warom?

¹⁸ Un wëns tuu mërkst tas tuu een pruuter pelayticht host, was solst tuu mache? Kee Yeesus sayn aanreet noo: mach friit mit tëm. Xprech mit Yeehoowa too triwer un trau tas te hayliche kayst tich helfe tuut friit mache. Wëns tuu soo machst, kriist tuu frooheet un tuust aach tsayche tas tuu Yeesus aan heerst. (Mat. 5:9)

¹⁹ Meyer sin petanklich tas Yeehoowa uns liipliche oryentiirunge kept torich “te khop fon te kemaynt”, Yeesus Kristus. (Ëfe. 5:23) Soo wii Pheeter, Tyako un Yoohan, wole mer pextimt sin ‘tëm heere’. (Mat. 17:5) Een aat fer tas mache, wii mer kelërnt hon, is friit mache mit een pruuter woo mer pelayticht hon. Was tuut pasiire wën mer te friit suuche un im xmaal weech woo tsum eewiche leepe nëmt plaype? Meyer kriin seechen xon yets, un in te futuer, tuun mer froo fer imer sin!