1-2. (a) Nama pesan ke dipadah ngagai tiga iku rasul Jesus, lalu nama digaga sida? (b) Nama deka dipejuraika kitai ba artikel tu?

PENGUDAH Hari Paska kena 32 M., rasul Peter, James, enggau John meda genera ti ngalitka ati. Ba atas siti bukit ti tinggi, engka ba Bukit Hermon, Jesus berubah gamal di mua sida. ‘Mua iya manchar baka mata hari, lalu gari iya bebali beperenching burak.’ (Mat. 17:1-4) Ba pengujung genera nya, sida ninga Petara madah: ‘Tu Anak ke dikesayauka Aku. Aku rinduka iya. Pendingka iya!’ (Mat. 17:5) Pengudah meda genera nya, ari chara pengidup sida, nunjukka tiga iku rasul tu ningaka Jesus. Kitai mega deka neladan sida.

² Ba artikel sebedau tu kitai udah belajar, enti kitai mendingka Jesus, kitai patut badu ngereja sekeda utai. Ba artikel tu, kitai deka bejuraika dua iti utai ke diasuh Jesus kereja kitai.

3. Nitihka Matthew 7:13, 14, nama patut dikereja kitai?

³ Bacha Matthew 7:13, 14. Peratika, Jesus bisi nyebut dua iti pintu ti mai ngagai dua iti jalai ti bebida. Siti nya jalai ti “luas” lalu siti da agi jalai ti “mar.” Jesus nadai nyebut bisi jalai ti ketiga. Kitai enda tau enda milih kediri empu jalai ke deka ditengah kitai. Tu pemutus ti pemadu penting ke patut  digaga kitai laban semina siti aja jalai ke nuju ngagai pengidup ti meruan belama iya.

4. Padahka gaya jalai ti “luas.”

⁴ Kitai patut seruran ingatka bida entara dua iti jalai tu. Mayuh orang nengah jalai ti “luas” laban nya senang dititihka. Sida milih deka terus ba jalai nya sereta nitihka utai ke dikereja orang mayuh. Tang sayau amat, sida enda sedar Sitan ke meransang orang nitihka jalai tu, lalu jalai tu nuju ngagai pengerusak.—1 Kor. 6:9, 10; 1 Jhn. 5:19.

5. Nama digaga sekeda orang ngambika ulih tetemuka jalai ti “mar” lalu nitihka jalai nya?

⁵ Siti agi jalai ke disebut Jesus nya jalai ti “mar,” lalu tu enda sama enggau jalai ti “luas.” Jesus madahka semina mimit aja orang ulih tetemuka jalai ti “mar.” Nama kebuah? Peratika ba Matthew 7:15, Jesus nangkan bala murid iya pasal nabi ti pelesu. Sekeda orang madahka bisi beribu iti jalai pengarap lalu mayuh ari sida ngumbai diri ngajar pemendar. Ketegal bisi mayuh jalai pengarap, mayuh orang saru sereta berasai asa ati, lalu badu agi ngiga jalai ke nuju ngagai pengidup. Tang jalai nya ulih ditemu. Ku Jesus madah: ‘Enti kita bepegai ba jaku aku, kita amat murid aku, lalu kita deka nemu pemendar, lalu pemendar deka ngelepaska kita.’ (Jhn. 8:31, 32) Nuan patut dipuji laban enda nitihka orang mayuh. Nuan bebendar ngiga pemendar. Nuan berengkah belajarka Bup Kudus enggau silik agi lalu mendingka ajar Jesus. Ari utai ke dipelajar nuan, nuan nemu Jehovah dekaka kitai nulak semua ajar sereta pengerami ke bisi kaul enggau pengarap ti pelesu. Tang nuan mega nemu, enda senang deka ngereja utai ti dikedekaka Jehovah sereta nulak ajar ti enda ngelantangka ati Iya. (Mat. 10:34-36) Taja pia, nuan bebendar ngaga ubah ba pengidup. Jehovah tentu gaga ati enggau semua utai ti dikereja nuan, laban Iya nemu nuan rindu sereta keran deka ngelantangka ati Iya!—J-lam. 27:11.

6. Nitihka Masmur 119:9, 10, 45, 133, nama ulih nulung kitai mengkang ba jalai ti mar?

⁶ Lebuh kitai berengkah bejalai ba jalai ti mar, nama ulih nulung kitai mengkang ba jalai nya? Peratika sempama tu. Ba sekeda menua, raga besi dipasang sepemanjai jalai ti sempit ba endur ke bebukit. Tuju raga besi dipasang ngambika orang ke deriba enda kelalu ke tisi jalai, lalu tu ulih nyaga nyawa orang ke deriba. Ketegal tu, nadai orang deka mutap lalu madah raga besi nya ngachau pejalai sida! Standard Jehovah ba Bup Kudus sama baka raga besi nya, ke nulung kitai mengkang ba jalai ti mar.—Bacha Masmur 119:9, 10, 45, 133.

7. Nama runding ti patut dikembuan bala nembiak pasal jalai ti mar?

⁷ Kita ke nembiak, kati kita kekadang ngasaika standard Jehovah nya kelalu terit? Sitan deka nuan berunding baka nya. Iya deka nuan beratika pengidup sida ke nengah jalai ti luas laban utai ke digaga sida bakaka ngerinduka ati. Sitan deka nuan ngumbai, pengidup nuan enda semanah pengidup nembiak ke serambau enggau nuan tauka sida ke dipeda ba internet. Iya deka nuan berunding standard Jehovah nagang nuan ari ngulihka pengaga ati ti bendar ba pengidup. * Tang kingatka, Sitan enggai sida ke nitihka jalai ti  luas nemu utai ke deka nyadi ba pengujung jalai nya. Taja pia, Jehovah udah madah pengidup ke deka diulih nuan enti nuan mengkang ba jalai ti mar.—Mas. 37:29; Isa. 35:5, 6; 65:21-23.

8. Nama ulih dipelajarka bala nembiak ari teladan Olaf?

⁸ Peratika nama utai ti ulih dipelajarka nuan ari pengalaman seiku menyadi lelaki ke biak ti benama Olaf. * Nembiak ke sekelas enggau iya ngumbuk iya ngereja ulah seks. Lebuh iya nerangka Saksi-Saksi Jehovah idup sejalai enggau standard moral Bup Kudus, sekeda nembiak indu ba kelas iya bebendar agi ngumbuk iya ngereja pengawa seks enggau sida. Tang Olaf keran deka ngereja utai ti betul. Olaf mega napi penanggul ke bukai. Iya madahka: “Bala pengajar nekan aku belajar ba universiti. Sida madahka nya deka ngasuh orang bebasaka aku. Ku sida enti aku enda sekula tinggi, aku enda ulih mujur ba pengidup.” Nama utai ke nulung Olaf enda alah lebuh ditekan? Iya madah:  “Aku ngemansangka kaul ti rapat enggau bala menyadi ba eklisia. Sida udah nyadi baka ruang bilik aku empu. Aku mega berengkah belajarka Bup Kudus enggau silik agi. Mayuh agi aku belajarka Bup Kudus, majak agi aku andal tu meh pemendar. Asil iya, aku keran agi deka nyembah Jehovah.”

9. Nama patut digaga sida ke deka mengkang ba jalai ti mar?

⁹ Sitan deka nuan ninggalka jalai ti nuju ngagai pengidup. Iya deka nuan nitihka orang mayuh lalu nengah jalai ti luas ke “nuju ngagai pengerusak.” (Mat. 7:13) Enti kitai deka mengkang ba jalai ti mar, terus meh mendingka Jesus lalu ngumbai jalai nya tau nyaga kitai. Diatu, aram kitai bejuraika utai bukai ke diasuh Jesus kereja kitai.

10. Nitihka Matthew 5:23, 24, nama diasuh Jesus kereja kitai?

¹⁰ Bacha Matthew 5:23, 24. Ba ayat nya, Jesus nyebut pasal utai ti dikemeratka orang Judah, iya nya maya sida meri pemeri ba Rumah Sembiang. Gambarka seiku orang deka nyerahka jelu ngagai imam nyadika pemeri. Enti maya nya iya teingatka bisi menyadi enda nyamai ati enggau iya, iya patut ninggalka jelu nya lalu mansang ngagai menyadi nya. Nama kebuah? Laban bisi utai ke penting agi ari meri pemeri ngagai Jehovah. Jesus enggau terang madahka: “Bebaik dulu enggau iya.”

11. Nama digaga Jakop kena bebaik enggau Esau?

¹¹ Kitai deka belajarka chara bebaik enggau orang bukai ari utai ke kala nyadi ba Jakop. Pengudah 20 taun Jakop pansut ari menua endur iya ada, Petara meri pesan nengah seiku melikat ngasuh Jakop pulai baru ngagai menua iya. (P-kal. 31:11, 13, 38) Tang Jakop napi siti penanggul. Menyadi iya ke tuai, Esau, kala deka munuh iya. (P-kal. 27:41) Ketegal nya, Jakop berasai “takut sereta irau ati” laban Esau engka agi pedis ati enggau iya. (P-kal. 32:7) Nama utai ke digaga Jakop ngambika ulih bebaik enggau Esau? Terubah, iya besampi ngagai Jehovah pasal pekara tu. Udah nya, iya nganjung mayuh pemeri ngagai Esau. (P-kal. 32:9-15) Kepenudi iya, lebuh seduai iya betemu baru, Jakop ngena peluang nya nunjukka basa ngagai Esau. Iya meremi ngagai Esau, ukai sekali tauka dua kali, tang tujuh kali! Ketegal Jakop baruh ati sereta nunjukka basa, iya mujur bebaik enggau Esau.—P-kal. 33:3, 4.

12. Nama ulih dipelajarka kitai ari teladan Jakop?

¹² Kitai ulih belajar ari chara Jakop nyediaka diri sebedau iya betemu enggau Esau sereta chara iya mansang ngagai Esau. Enggau baruh ati, Jakop besampi ngagai Jehovah minta tulung. Udah nya, iya ngereja utai ti sejalai enggau sampi iya. Jakop ngereja utai ke ulih iya kena bebaik enggau Esau. Lebuh Jakop betemu enggau Esau, iya enda bekelikuh pasal sapa ke betul enggau sapa ke salah. Tuju Jakop nya deka bebaik enggau Esau. Baka ni kitai ulih neladan Jakop?

13-14. Nama patut digaga kitai enti kitai udah ngemediska ati menyadi Kristian?

¹³ Enti kitai deka terus ba jalai ti nuju ngagai pengidup, kitai enda tau enda bebaik enggau bala menyadi Kristian. (Rom. 12:18) Tang baka ni enti kitai udah ngemediska ati seiku menyadi Kristian? Baka Jakop, kitai patut minta tulung ari Jehovah nengah sampi. Kitai ulih minta Jehovah merekatka  pengawa kitai ti bebendar deka bebaik enggau menyadi nya.

¹⁴ Kitai mega patut ngena awak meresa diri empu. Kitai ulih nanya diri: ‘Kati aku sanggup madahka diri salah, baruh ati minta ampun lalu bebaik enggau iya? Nama asai ati Jehovah enggau Jesus enti aku bebendar deka bebaik enggau menyadi Kristian aku?’ Saut kitai ulih meransang kitai mendingka Jesus sereta enggau baruh ati mansang ngagai menyadi nya ngambika ulih bebaik enggau iya. Kitai ulih nitihka teladan Jakop lebuh ngereja tu.

15. Baka ni Epesus 4:2, 3 ulih nulung kitai bebaik enggau menyadi Kristian kitai?

¹⁵ Uji gambarka utai ke ulih nyadi enti sema Jakop bekelikuh enggau Esau pasal sapa ke betul enggau sapa ke salah. Seduai iya tentu enda ulih bebaik enggau pangan diri. Nya alai, kitai patut baruh ati lebuh deka mutarka penanggul ke nyadi entara kitai enggau menyadi Kristian. (Bacha Epesus 4:2, 3.) Jaku Dalam 18:19 madahka: “Enti nuan belaya enggau sida, sida deka nikupka pintu sida lalu enggai ngemendarka nuan tama.” Lebuh kitai baruh ati minta ampun ngagai menyadi Kristian, iya deka senang agi bebaik enggau kitai.

16. Nama utai bukai ke patut diperundingka kitai, lalu nama kebuah?

¹⁶ Kitai mega patut berunding pasal utai ke deka disebut sereta baka ni kitai deka ngenataika nya ngagai menyadi ke pedis ati enggau kitai. Lebuh kitai udah besedia, kitai patut betemu enggau menyadi nya ngambika ulih ngemanahka baru kaul kitai enggau iya. Menyadi nya engka nyebut utai ti ngasuh kitai enda nyamai ati. Maya nya, kitai engka senang berasai ringat tauka deka ngetanka diri empu. Tang kati nya ulih nulung kitai bebaik enggau iya? Kingatka, ngetanka pemaik enggau menyadi nuan penting agi ari nentuka sapa ke betul enggau sapa ke salah.—1 Kor. 6:7.

17. Nama ulih dipelajarka nuan ari teladan Gilbert?

¹⁷ Seiku menyadi ke benama Gilbert bebendar deka ngetanka pemaik. Ku iya madah: “Aku bisi penanggul enggau anak indu aku. Pengelama dua taun, aku nguji deka berandau manah enggau iya ngambika ulih bebaik baru enggau iya.” Nama utai bukai ke digaga Gilbert? Ku iya nampung baru: “Sebedau aku  bejaku enggau iya, aku besampi dulu. Aku ngingatka diri ngambika enda ringat enti iya nyebut utai ti enda manah. Aku patut seruran sedia deka ngampun. Aku nemu ngetanka diri lalu madahka diri betul enda ulih ngemanahka kaul kami. Aku sedar aku patut ngetanka pemaik.” Nama asil iya? Ku Gilbert madahka: “Diatu, aku berasai lantang ati laban bisi kaul ti manah enggau semua kami sebilik.”

18-19. Nama patut digaga kitai enti udah ngemediska ati menyadi Kristian, lalu nama kebuah?

¹⁸ Nama patut digaga nuan enti nuan udah ngemediska ati menyadi Kristian? Pendingka lalau Jesus ke ngasuh kitai bebaik enggau menyadi Kristian. Padahka ngagai Jehovah pasal pekara tu, lalu bepanggai meh ba roh kudus Iya kena nulung nuan ngetanka pemaik. Enti nuan ngereja nya, nuan deka gaga ati lalu nunjukka diri mendingka Jesus.—Mat. 5:9.

¹⁹ Kitai amat beterima kasih ngagai Jehovah laban Iya nyediaka iring nengah “kepala eklisia,” iya nya Jesus Kristus. (Eps. 5:23) Aram meh kitai ‘mendingka iya,’ baka ke digaga rasul Peter, James enggau John. (Mat. 17:5) Lebuh kitai bisi ngemediska ati menyadi Kristian, kitai patut bebaik enggau iya. Tu nunjukka kitai mendingka Jesus. Lebuh kitai bebaik enggau menyadi Kristian sereta mengkang ba jalai ti mar ke nuju ngagai pengidup, kitai deka nerima mayuh berekat diatu sereta pengaga ati ti enda nemu abis jemah ila.