1-2. (a) Anni i nekagi ta tallu nga apostol ni Jesus nga mawag tu kuadda, anna kingngua da kari yatun? (b) Anni i gigiammuattam taw nga artikulo?

KABALIN na Paskua ta 32 C.E., nemammatan da apostol Pedro, Santiago, anna Juan i tadday nga kappabbaw nga sirmata. Egga ira ta atannang nga vukig nga awayya na tu ta Vukig Hermon turi ta nanguli i kasissinnan ni Jesus ta pagara-arubangadda. “Nannawag i muka na nga kunne ta bilag anna nabbalin tu makatulang i kafuraw na sinnun na.” (Mat. 17:1-4) Tapus naginna na apostol ira i kinagi na Dios: “Yaw i iddeddukak-ku nga Ana ku nga kuruga makapagayaya niakan. Ginnan nu yaya!” (Mat. 17:5) Pinakurug na tallu nga apostol ta interu pattoleda nga nagginna ira kani Jesus. Kayà tam gapa ira nga parigan.

² Ta nappasa nga artikulo, nagigiammu tam nga nu ginnattam i ngaral ni Jesus mawag tu egga ira i ariattam ngana kuan. Taw gapa nga artikulo, ammuattam i dua nga kinagi ni Jesus nga mawag tu kuattam.

3. Segun ta Mateo 7:13, 14, anni i mawag tu kuattam?

³ Bibbigan i Mateo 7:13, 14, NW. Kinagi ni Jesus nga egga i dua nga klase na trangka nga mappange ta dua nga klase na dalan. “Alawa” i tadday nga dalan tapus “asilo” gapa i tadday. Awan tu mekatallu nga dalan. Mawag gafu tu mappili  ittam laman ta dua nga dalan nu sitaw i pallakarattam. Yaw i pinaka-importante nga desision nga mawag tu kuattam megafu ta nakadepende tatun i mannanayun nga inango tam.

4. Anni i “alawa” nga dalan?

⁴ Mawag tu agga-nono tam i nadduman na dua nga dalan. Aru i totolay ta “alawa” nga dalan megafu ta mabi laman nga lakaran yatun. Manaki da nga manaw tatun anna tuttuttuladda laman i magaru nga lumaka-lakag tatun. Ari da malippawa nga si Satanas nga Diablo i mangipoppollu ta pallakag tatun nga dalan anna mappange yatun nga dalan ta kadaral.​—1 Cor. 6:9, 10; 1 Juan 5:19.

5. Anni i kingngua na karuan tapenu malegadda i “asilo” nga dalan anna mamegafu nga lumakag tatun?

⁵ “Asilo” gapa i tadday nga klase na dalan anna kinagi ni Jesus nga pilippiga laman i makaleg tatun. Ngatta? Makapa-interes nga kabalin nga kagian ni Jesus i meyannung tatun, inabisowan na i tagatuttul na ira kontra ta appe-profeta ira. (Mat. 7:15) Rinivu i relihion ira anna magaru ta nira i makkakkagi nga ituttuddu da i kinakurug. Gafu ta karu na relihion sangawe, aru i dismayadu onu maguluan yari tu ari da ngana purueban nga alegan i dalan nga mappange ta inango. Ngem puede nga malegan yatun nga dalan. Kinagi ni Jesus: “Nu parulattan nu i tuttuddù, kurug tu disipulo takamu; ay kannammuan nu i kurug anna yaw i mamalubbang nikamu.” (Juan 8:31, 32) Pia ngana laman ta ariammu nga sinuttul i magaru anna inaleg mu lagapa i kinakurug. Pinegafuanammu nga gigiammuan tu mapia i Biblia tapenu mammuammu i ikikkiddaw na Dios nittam anna nagginna ka gapa ta tuttuddu ni Jesus. Nagigiammum gapa nga ikikkiddaw ni Jehova nga mawag tu panakitattam i tuttuddu na falsu nga relihion anna iyemmattam i selebrasion anna neyugaliattam ira nga annangngua nga naggafu ta pagano. Napakurug mu gapa nga nu karuan, ari tu mabi nga iyaplika i ikikkiddaw ira ni Jehova. (Mat. 10:34-36) Awayya na nga narigatakka nga kuan yatun ira nga panguli ngem determinadu ka nga kuan yatun megafu ta ayatammu i Yamam ta langi anna kayà mu yayya nga mapagayayya. Siguradu nga napagayayya mu si Jehova ta kingnguam!—Prov. 27:11.

6. Segun ta Salmo 119:9, 10, 45, 133, anni i makoffun nittam tapenu mattalupaddian ta asilo nga dalan?

⁶ Oras tu nigafu tam ngana nga lumakag ta asilo nga dalan, anni i makoffun ta nittam tapenu mattalupaddian ittam tatun? Nonopan yaw nga ilustrasion. Ta karuan ira nga nasion, egga ira i gibaw ta aggig na dalan ta vuku-vukig tapenu maprotektan i driver anna i takena. Makoffun yatun tapenu ari nga mataga i driver ta gatag. Awan vuluvuga tu driver nga marreklamo nga makagurun yatun nga gibaw. Megitta i estandarte ira ni Jehova ta Biblia tatun nga gibaw. Makoffun yatun ira tapenu mattalupaddian ittam ta asilo nga dalan.​—Bibbigan i Salmo 119:9, 10, 45, 133.

7. Kunnasi nakuan nga imammatan na kabataan ira i asilo nga dalan?

⁷ Sikamu nga kabataan, matageno nu kari nu karuan nga kuruga istrikto i estandarte ira ni Jehova? Kayà ni Satanas nga kunnatun i nonopammu. Kayà na nga nonopammu nga makakkasta i kukukuan danuri na lumaka-lakag ta alawa nga dalan anna pia paga lagu ira ta mage-enjoy ira. Kayà na nga ipatageno ta nikaw nga ari tu kunnari kasaya i pattolem  kumpara ta kukukuan na kaeskuelam onu na masingi-singammu ta Internet. Kayà na gapa nga nonopammu nga fugaddan naka na estandarte ira ni Jehova tapenu magenjoy. * Ngem daddammammu yaw: Manaki ni Satanas nga masingan danuri na lumaka-lakag ta dalan na i pappangetadda. Dakal i nadduman natun kani Jehova nga manawag nga nipasingan na nikaw i makasta nga pappangetan danuri na mattalupaddian ta dalan na inango.​—Sal. 37:29; Isa. 35:5, 6; 65:21-23.

8. Anni i magigiammu na kabataan ira kani Olaf?

⁸ Innattam nu anni i magigiammu tam ta kabataan nga brother nga si Olaf. * Feffuersan yayya na kaklase na ira nga magangngua tu imoral. Nipakanawag na nga tadday yayya nga Saksi ni Jehova anna tuttuttulan na i atannang nga estandarte ta moral na Biblia. Ngem imbes tu magimmang i babbay nga  kaklase na, mas pakakuadda lallagu nga fuersan yayya nga maki-sex ta nira. Nitaddaggan ni Olaf i fustu. Ari laman gapa tu yatun i inarubanna. Kunnaw paga i inistoria ni Olaf: “Kukkumbinsian nà na mestrù ira nga mageskuela ta unibersidad tapenu kanu umatannang i anningan na totolay niakan. Kinagi da nga mawag tu mak-college ngà tapenu makkasta saw i pattolè.” Anni i nakoffun kani Olaf tapenu panakitan yatun nga pamipilit? Kinagi na: “Mas nga nakiddukko ngà ta kakongregasiokku ira. Gitta na kafamilià ngana ira. Mas gapa nga ginigiammù tu mapia i Biblia. Durante nga mas umara-aru i magigiammù, mas nakumbinsi ngà nga yaw i kinakurug. Megafu tatun, naddesision ngà nga mappa-baptize.”

9. Kunnasi ittam makapattalupaddian ta asilo nga dalan?

⁹ Kayà ni Satanas nga panawammu i dalan nga mappange ta inango. Kayà na gapa nga mevulu ka ta magaru nga totolay nga lumaka-lakag ta alawa nga dalan nga “mappange ta kadaral.” (Mat. 7:13, NW ) Ngem makapattalupaddian ittam ta asilo nga dalan nu tulu-tuloy ittam nga magginna kani Jesus anna nu imammatattam nga proteksion yatun nga dalan. Ikonsidera tam ngana i tadday paga nga kinagi ni Jesus nga mawag nga kuattam.

10. Anni i kinagi ni Jesus ta Mateo 5:23, 24 nga mawag tu kuattam?

¹⁰ Bibbigan i Mateo 5:23, 24. Kakkagian tatun ni Jesus i kuruga importante nga kuan na Judio ira nga maggigginna ta nisa. Imajinammu i tadday nga tolay ta templo nga iyalawa na ngana ta pari i tavvung na nga ayam. Nu gavva nga neraddamman na nga egga i taki na nono nisa na wagi na, mawag tu ‘panawan na labbi i regalu na ta altar.’ Ngatta? Megafu ta egga i mawag tu kuan na nige na nga mangitavvung kani Jehova. Manawag i kinagi ni Jesus: ‘Umay ka labbi ta wagim nga makippakoma.’

11. Anni ira i kingngua ni Jacob tapenu makippakoma kani Esau?

¹¹ Aru i magigiammu tam kani Jacob meyannung ta pakippakoma. Ma-20 ragun ngana yayya nga ari maddian ta lugar nga nikeyanakan na turi ta zinog yayya na Dios gukaban na tadday nga anghel tapenu manoli tari. (Gen. 31:11, 13, 38) Ngem egga i problema. Igato yayya nga patayan na manung na nga si Esau. (Gen. 27:41) “Grabe i assing ni Jacob anna mavuru-vurung yayya” ta awayya na tu mataki paga i nono na manung na ta nisa. (Gen. 32:7) Anni i kingngua ni Jacob tapenu makippakoma ta manung na? Ollu, nipakimemallo na yatun kani Jehova. Tapus, nangiyawa yayya tu aru nga regalu kani Esau. (Gen. 32:9-15) Turi ta nakkasingan ngana i mawwagi, si Jacob i nagollu nga nangipasingan tu pangikakua kani Esau. Ari laman yayya nga mittan onu mamiddua nga nakkummag kani Esau, nu ari, mamippitu! Mapakalinno anna marespeto nga nakippakoma si Jacob ta manung na.​—Gen. 33:3, 4.

12. Anni i magigiammu tam kani Jacob?

¹² Egga i magigiammu tam ta kingngua ni Jacob nige yayya nga makissimmu ta manung na anna nu kunnasi na nga inarannian si Esau. Mapakalinno nga nappoffun si Jacob kani Jehova. Tapus kingngua na i nipakimallo na. Kingngua na gapa i ngamin tapenu memammo i pakissimmu na uli ta manung na. Turi ta nakkasingan ngana ira, ari ngana nakitturia si Jacob kani Esau nu sinni i fustu anna nu sinni i makalliwa. I gakkag ni Jacob ay makippakoma ta manung na. Kunnasi tam yayya nga maparigan?

13-14. Anni i mawag nga kuattam nu natakitattam i wagi tam?

¹³ Nu kayà tam nga lumakag ta dalan nga mappange ta inango, mawag tu pattalupaddianattam i memammo nga relasiottam ta wawwaragi tam. (Roma 12:18) Ngem kunnasi nu nammuattam nga natakitattam balo i kapangngurug tam? Parigattam nakuan si Jacob anna makimemallo ittam kani Jehova nga bendisionan na nakuan i pangikagumattam nga makippakoma ta wagi tam.

¹⁴ Mawag gapa nga usitakkattam i baggi tam. Awayya tam nga iyavu ta baggi tam: ‘Alsakku kari i pride ku tapus aminakku nga egga gapa i liwa ku, makkiddaw tu dispensa, anna makippakoma? Anni tamma i matageno ni Jehova anna ni Jesus nu sakan i magollu nga makippakoma ta wagì?’ Nu pannonopattam danatun, mapaguyu ittam nga magginna kani Jesus anna mapakalinno nga arannian i wagi tam tapenu makippakoma. Nu kunnatun i kuattam, maparigattam si Jacob.

15. Kunnasi makoffun i prinsipio ta Efeso 4:2, 3 nu makippakoma ittam ta wagi tam?

¹⁵ Anni tamma i nesimmu nu nakitturia si Jacob kani Esau? Magga ari ira nakkaayus! Nu makippakoma ittam ta wagi tam, mawag tu mappakalinno ittam. (Bibbigan i Efeso 4:2, 3.) Kagian na Proverbio 18:19: “Mas mariga nga makippakoma ta wagi nga natakitan anne ta mattallung ta napaderan nga siudad, anna egga ira i paddarama nga kasilladda na trangka ira na torre.” Nu mapakalinno ittam nga makiddispensa, awayya na nga matallung tam yatun nga “torre.”

16. Anni nakuan i pannonopattam tu mapia, anna ngatta?

¹⁶ Mawag gapa nga nonopattam tu mapia nu anni i kagiattam anna nu kunnasi tam ikagi yatun. Sonu kiyuvovugattam ngana i wagi nga nattaki i nono na, gakkag tam nakuan nga uffunan yayya nga malsa i taki na nono na ta nittam. Awayya na tu makekagi yayya tu gannug ira nga makataki ta nittam. Baka makaporay ka onu idefensam i baggim. Ngem nu kunnatun i reaksiommu, metolim kari i memammo nga relasion nu? Magga ari. Daddammammu nakuan nga mas importante nga metoli i memammo nga pavvulu nu na wagim anne ta mapakurug mu nu sinni i fustu anna nu sinni i makalliwa.​—1 Cor. 6:7.

17. Anni i magigiammu tam kani Gilbert?

¹⁷ Nikaguman ni Brother Gilbert nga makippakoma  anna itoli i memammo nga relasion na ta tanakuan. Niyistoria na: “Nakkaproblema kami na tadday nga madukko nga kafamilià. Ta unag na dua nga dagun, pinasa-pasensiakku nga malumamo nga kiyuvovugan yayya tapenu metoli i memammo nga relasiommi.” Anni paga i kingngua ni Gilbert? “Kada nige ku yayya nga kibbidan, makimallo ngà labbi tapus ikondisiokku i nono ku nga mawag tu ari ngà nga mapporay maski nu egga i ikagi na niakan tu makapataki anna pakomakku yayya. Ari ngana gapa importante niakan nu sinni i fustu anna nu sinni i makalliwa. Obligasiokku nga itoli i pia na pavvulu mi.” Anni i narresultan natun? Kinagi ni Gilbert: “Memammo ngana i nono ku sangawe megafu ta makasta ngana i relasiokku ta ngamin nga kafamilià.”

18-19. Nu egga i natakitattam, anni nakuan i determinasiottam, anna ngatta?

¹⁸ Anni gafu i determinasiommu nu ammum tu natakitammu i tadday nga wagi? Tuttulammu i bilin ni Jesus nga makippakoma. Ipakimallo mu kani Jehova yatun anna mattalo ka ta uffun na masanto nga espiritu na tapenu mawayyam nga makippakoma. Nu kunnatun i kuammu, magayayya ka anna mapakurug mu nga maggigginna ka kani Jesus.​—Mat. 5:9.

¹⁹ Mappappabalo ittam nga igigiya ittam ni Jehova gukaban na ulu na kongregasion nga si Jesu-Cristo. (Efe. 5:23) Determinadu ittam nakuan nga ‘ginnan yayya,’ kagitta da apostol Pedro, Santiago, anna Juan. (Mat. 17:5) Makua tam yatun nu makippakoma ittam ta wagi nga natakitattam anna mattalupaddian ittam ta asilo nga dalan nga mappange ta inango. Nu kunnatun i kuattam, malawa tam i aru nga bendision sangawe anna mannanayun nga pagayayya ta mappange.