1-2. (a) Kuzê ki Deus manda três apóstlu di Jizus pa faze, i modi ki es reaji? (b) Kuzê ki nu sta ben odja na kel studu li?

DIPÔS di Páskua di anu 32, apóstlu Pedru, Tiagu i Juan odja un kuza ki dexa-s dimiradu. Riba di un monti, talvês na algun párti di Monti Ermon, es odja Jizus ta transforma ses dianti. ‘Se róstu fika ta límia sima sól, i se ropa bira ta límia sima lus.’ (Mat. 17:1-4) Antis di kel vizon tirmina, kes apóstlu obi vós di Deus ta fla: ‘Kel-li é nha Fidju ki N ta ama, ki ta da-m txeu alegria. Nhos obi ku el.’ (Mat. 17:5) Kes três apóstlu prova na ses manera di vive ma es obi ku Jizus. Nos tanbê nu krê imita ses izénplu.

² Na kel studu ki pasa, nu prende ma pa nu obi ku Jizus, nu ten ki para di faze alguns kuza. Na kel studu li, nu sta ben odja dôs kuza ki Jizus fla ma nu debe faze.

3. Sima sta na Mateus 7:13, 14, kuzê ki nu debe faze?

³ Lé Mateus 7:13, 14. Repara ma Jizus pâpia di dôs porton ki ta leba pa dôs strada diferenti. Un é ‘largu’, i kel otu é ‘pertadu’. Ka ten tirseru strada. Nu ten ki skodje ki strada ki nu krê anda na el. Kel-li é kel disizon más inportanti ki nu pode toma pamodi nos vida pa tudu ténpu ta dipende di el.

4. Modi ki é kel strada ‘largu’?

 ⁴ Nu ka debe skese ma kes dôs strada é diferenti. Txeu algen ta skodje kel strada ‘largu’, pamodi é fásil anda na el. I é tristi di odja ma kes algen ta prifiri kontinua ta anda na kel strada la i es ta faze mésmu kuza ki tudu algen na kel strada sta ta faze. Es ka da kónta ma kel strada é di Satanás i ma úniku lugar ki el ta leba é mórti. — 1 Cor. 6:9, 10; 1 João 5:19.

5. Ki sforsu alguns algen faze pa atxa kel strada ‘pertadu’ i kumesa ta anda na el?

⁵ Diferenti di kel strada ‘largu’ kel otu strada é ‘pertadu’, i Jizus fla ma é poku algen ki ta atxa-l. Pamodi? Na kel otu versíklu, Jizus aviza se sigidoris pa toma kuidadu ku profétas falsu. (Mat. 7:15) Alguns algen ta fla ma ten milharis di relijion i maioria di es ta fla ma es ta inxina verdadi. Pamodi kel-li, milhons di algen sta dizanimadu i konfuzu, i nen es ka ta tenta djobe kel strada ki ta leba pa vida. Má nu pode atxa kel strada ki ta leba pa vida. Jizus fla: ‘Si nhos kontinua na nhas palavra, nhos é nhas disiplu di verdadi, i nhos ta konxe verdadi i verdadi ta liberta nhos.’ (João 8:31, 32) Bu merese ilojiu pamodi bu ka sta faze kel ki maioria di algen sta ta faze; envês di kel-li, bu djobe verdadi. Bu tra ténpu pa bu studa Palavra di Deus dretu, pa bu prende kuzê ki el krê pa nu faze i bu faze kes kuza ki Jizus inxina. Pur izénplu, bu prende ma Jeová ka krê pa nu seta kes ensinu di relijion falsu, i pa nu ka partisipa na ninhun di kes komemorason ki ben di relijion falsu. Tanbê bu prende ma é ka fásil bandona kes kuza mariadu i faze kes kuza ki ta agrada Jeová. (Mat. 10:34-36) Talvês ka foi fásil faze kes mudansa li. Má bu ka dizisti pamodi bu ta ama Jeová i bu krê agrada-l. Di sertéza el sta kontenti ku bo! — Pro. 27:11.

6. Sima sta na Salmo 119:9, 10, 45 i 133, kuzê ki ta djuda-nu kontinua ta anda na kel strada pertadu?

⁶ Kuzê ki ta djuda-nu kontinua ta anda na kel strada pertadu? Pensa na kel izénplu li. Alguns strada pertadu ki ta fika na kes lugar altu, sima montanha, ten un sérka di proteson pa proteje kondutor i se karu. Si ka ten kel proteson, kel kondutor pode sai di strada i panha asidenti. Ningen ka ta flaba ma kes proteson ka ta sirbi pa nada ô ma el sta trapadja-s na strada. Leis di Jeová ki nu ta atxa na Bíblia é sima kel sérka di proteson. Es ta proteje-nu i es ta djuda-nu kontinua ta anda na kel strada pertadu. — Lé Salmo 119:9, 10, 45, 133.

7. Pamodi ki jóvens ka debe atxa ma é midjór sta na kel strada largu?

⁷ Jóvens, alvês nhos ta atxa ma sigi leis di Jeová ka ta dexa nhos faze kel ki nhos krê? É si ki Satanás krê pa nhos pensa. El krê pa nhos pensa ma é midjór sta na kel strada largu, undi ki tudu algen pode faze kuzê ki el krê. El krê pa bu pensa ma bu ka sta pruveta  vida sima bus koléga di skóla i kes algen ki bu ta odja na internet. Satanás krê pa bu pensa ma sirbi Jeová sta ta trapadja bu vida. * Má lenbra di kel-li: Satanás ka krê pa bu sabe kuzê ki sta spéra-u na fin di kel strada largu. Má nos Deus, Jeová, é diferenti. El krê pa bu odja kel vida sábi dimás ki bu ta ben ten si bu kontinua ta anda na kel strada ki ta leba pa vida. — Sal. 37:29; Isa. 35:5, 6; 65:21-23.

8. Kuzê ki jóvens pode prende ku izénplu di Olavu?

⁸ Odja kuzê ki nu pode prende ku spiriénsa di un irmon ki txoma Olavu. * Se kolégas di skóla faze-l preson pa el faze séksu ku es. Kantu el fla-s ma el é Tistimunha di Jeová i ma el ta vive  sima Bíblia ta fla, alguns minina di se turma fika ta faze-l más preson inda pa el faze séksu. Má Olavu mante firmi, i é ka sô kel prubléma li ki el pasa pa el. Olavu fla: “Nhas profesor tenta konvense-m pa N bai universidadi pa pesoas pode ruspeta-m. Tanbê es fla-m ma si N ka faze kel-la, N ka ta ten un bon trabadju i un vida filís.” Kuzê ki djuda Olavu lida ku tudu kes kuza li? El fla: “N bira más amigu di irmons di nha kongregason. Es bira sima nha família. N kumesa ta studa Bíblia más asériu i kantu más N studa, N fika ku más sertéza ma kel-li é verdadi. Pamodi kel-li, N fika disididu na kontinua ta sirbi Jeová.”

9. Kuzê ki nu debe faze si nu krê kontinua ta anda na kel strada pertadu?

⁹ Satanás krê pa bu sai di kel strada ki ta leba pa vida i pa bu anda djuntu ku maioria di algen ki sta na kel strada largu ki ‘ta leba pa distruison’. (Mat. 7:13) Anos nu sta disididu na kontinua ta obi vós di Jizus i ta anda na kel strada pertadu ki ta proteje-nu. Gósi nu ta ben odja otu kuza ki Jizus fla ma nu debe faze.

10. Sima sta na Mateus 5:23, 24, kuzê ki Jizus fla ma nu debe faze?

¹⁰ Lé Mateus 5:23, 24. Jizus pâpia di un kuza rei di inportanti na adorason di judeus. Imajina ma un algen na ténplu tene se animal na mô, prontu pa ntrega saserdóti pa faze sakrifisiu. Si kel algen lenbra ma se irmon tene algun kuza kóntra el, el debe dexa kel sakrifisiu la i ‘bai’. Pamodi? Kuzê ki pode sér más inportanti di ki oferese sakrifisiu pa Jeová? Jizus fla klaru: ‘Primeru, faze pas ku bu irmon’.

11. Splika modi ki Jakó konsigi faze pas ku Izaú.

¹¹ Óras ki nu ta pensa na kuzê ki kontise na vida di Jakó, nu ta prende un lison inportanti sobri faze pas. Dipôs ki Jakó pasa uns 20 anu lonji di kel téra ki el nase, Jeová uza un anju pa fla-l pa el volta pa la. (Gén. 31:11, 13, 38) Má tinha un prubléma. Izaú ki éra se irmon más grandi, krê mataba el. (Gén. 27:41) Jakó staba ‘fadigadu i ku txeu medu’ pamodi inda el ta atxaba ma se irmon staba ku ódiu di el. (Gén. 32:7) Modi ki Jakó konsigi faze pas ku se irmon? Primeru, el pâpia ku Jeová di korason sobri kel asuntu. Dipôs el manda Izaú txeu prezenti. (Gén. 32:9-15) I kantu el nkontra ku Izaú, el mostra-l ruspetu. Jakó nbaxa se dianti ka un, ka dôs, má 7 bês! Jakó konsigi faze pas ku se irmon pamodi el foi umildi i el mostra-l ruspetu. — Gén. 33:3, 4.

12. Kuzê ki nu ta prende ku izénplu di Jakó?

¹² Nu ta prende un lison inportanti sobri modi ki Jakó faze pas ku se irmon, Izaú. El foi umildi i el pidi Jeová pa djuda-l. Dipôs el aji di akordu ku se orason. El faze se midjór pa faze pas ku se irmon. Kantu es nkontra, Jakó ka tenta mostra Izaú kal di es ki tinha razon. Se obijetivu éra faze pas ku se irmon. Modi ki nu pode imita izénplu di Jakó?

13-14. Si nu ofende un irmon, kuzê ki nu debe faze?

¹³ Si nu krê kontinua ta anda na strada ki ta leba pa vida, nu meste mante pas ku nos irmons. (Rom. 12:18) Kuzê ki nu debe faze si nu da kónta ma nu ofende un irmon? Sima Jakó, nu debe faze orason di korason pa Jeová i pidi-l pa el djuda-nu faze pas ku nos irmon.

¹⁴ Nu debe tra ténpu pa nu pensa na kuzê ki nu faze. Nu pode faze perguntas sima kes-li: ‘N sta dispostu na seta ma é mi ki fadja i pidi diskulpa ku umildadi i faze pas? Modi ki Jeová ku Jizus ta xinti si N bai faze pas ku nha irmon ô nha irman?’ Nos respósta pode pô-nu ta obi ku Jizus i ser umildi pa nu bai djobe kel irmon pa nu faze pas ku el. Asi, nu ta sigi izénplu di Jakó.

15. Modi ki aplika kel prinsípiu ki sta na Efésios 4:2, 3, ta djuda-nu faze pas ku nos irmon?

¹⁵ Imajina kuzê ki pode kontiseba si Jakó ba diskutiba ku se irmon sobri kal di es ki tinha razon! Rezultadu ta sérba diferenti. Óras ki nu ta bai faze pas ku nos irmon, nu meste ser umildi. (Lé Efésios 4:2, 3.) Provérbios 18:19 ta fla: ‘É más difísil txiga na un irmon ki sta maguadu di ki na un sidadi ku paredis fórti, i ten uns géra ki é sima kes tranka di un fortaléza.’ Si nu ser umildi i nu pidi diskulpa, nu ta konsigi entra na kel ‘fortaléza’.

16. Óras ki nu ta bai faze pas ku un irmon, na kuzê ki nu debe pensa i pamodi?

¹⁶ Tanbê nu debe pensa dretu na kuzê ki nu ta fla i na modi ki nu ta fla. Óras ki nu sta priparadu, nu debe bai na kel irmon ki sta maguadu ku obijetivu di tra kel mágua na se korason. Na komésu el pode fla-nu un kuza ki nu xinti ka sábi. É fásil nu fika xatiadu i tenta ranja diskulpa. Má kel-li ta djuda-nu konsigi faze pas? Klaru ki nau. Lenbra ma faze pas ku nos irmon é más inportanti di ki prova ken ki ten razon ô nau. — 1 Cor. 6:7.

17. Kuzê ki bu pode prende ku izénplu di Jilbértu?

 ¹⁷ Un irmon ki txoma Jilbértu sforsa txeu pa faze pas. El fla: “N tevi txeu prubléma ku nha fidju-fémia. Pa más di dôs anu, N sforsa pa N pâpia ku el ku kalma pa nu pode fazeba pas.” Kuzê más ki Jilbértu faze? El fla: “Tudu bês, antis di nu papiaba, N ta fazeba orason i N ta lenbra ma N ka debe fikaba xatiadu si el flaba algun kuza ki magua-m. N prende ma N ka debe tenta provaba ma N tinha razon, i ma nha responsabilidadi éra faze pas.” Kuzê ki kontise dipôs? Jilbértu fla: “Oji N ta xinti pas pamodi N ta da dretu ku tudu algen di nha família.”

18-19. Si nu mágua un irmon, kuzê ki nu debe sta disididu na faze i pamodi?

¹⁸ Má kuzê ki bu debe sta disididu na faze si bu da kónta ma bu mágua un irmon? Jizus fla pa nu faze pas. Pâpia ku Jeová sobri kel asuntu i kunfia ma se spritu santu ta djuda-u mante pas. Si bu faze kel-li, bu ta ser filís i bu ta mostra ma bu sta obi ku Jizus. — Mat. 5:9.

¹⁹ Nu sta kontenti pamodi Jeová sta ta orienta-nu ku amor através di Jizus, ki é ‘kabésa di kongregason’. (Efé. 5:23) Sima apóstlu Pedru, Tiagu i Juan, nu debe sta disididu na ‘obi ku’ vós di Jizus. (Mat. 17:5) Na kel studu li, nu odja modi ki nu ta faze pas ku un irmon ki sta xatiadu ku nos. Si nu faze si i nu kontinua ta anda na kel strada pertadu ki ta leba pa vida, nu ta resebe txeu bensons gósi i nu ta ten un vida filís ki nunka más ka ta kaba.