1, 2. a) Kʼaru keʼtaqlaak chi xbʼaanunkil ebʼ li oxibʼ chi apóstol ut, chanru keʼnaʼlebʼak? b) Kʼaru tqil saʼ li tzolom aʼin?

NAQ ak xnumeʼk li Paswa re li chihabʼ 32, li apóstol Pedro, Santiago ut Juan keʼril jun li moy u li kʼajoʼ xchʼinaʼusal. Li Jesús kixkʼutbʼesi ribʼ chiruhebʼ saʼ jun li tzuul li jwal nim xteram, maare saʼ li tzuul Hermón. Li Santil Hu naxye: «Li rilobʼaal kilemtzʼunoʼk kamaʼ li saqʼe ut li raqʼ kisaqoʼk kamaʼ li saqenk» (Mat. 17:1-4). Naq xeʼraqeʼk rilbʼal li moy u, ebʼ li apóstol xeʼrabʼi li kixye li Yos: «Aʼin li walal raaro inbʼaan. Rikʼin aʼan nasahoʼk inchʼool: aʼan cherabʼihaq» (Mat. 17:5). Rikʼin li xwanjikebʼ, li oxibʼ chi apóstol, keʼxkʼutbʼesi naq relik chi yaal keʼxpaabʼ li Jesús, ut naqaj ajwiʼ xkʼambʼal qe rikʼinebʼ.

² Saʼ li tzolom rubʼelaj, xqatzol naq xpaabʼankil li Jesús naraj xyeebʼal naq tqakanabʼ xbʼaanunkil junjunq li naʼlebʼ. Saʼ li tzolom aʼin, tqil wiibʼ li naʼlebʼ li kixye li Jesús naq tento tqabʼaanu.

3. Joʼ naxye saʼ Mateo 7:13, 14, kʼaru tento tqabʼaanu?

³ (Taayaabʼasi Mateo 7:13, 14). Qakʼehaq reetal naq li Jesús kixye naq wank wiibʼ li okebʼaal: jun nakʼamok saʼ li bʼe «nim ru» ut li jun chik saʼ li bʼe «kachʼin ru». Wiibʼ ajwiʼ li bʼe. Li junjunq yaal re bʼar wank tixsikʼ. Jwal wank xwankil li bʼe li tqasikʼ, xbʼaan naq aʼin tixbʼaanu naq tqataw li junelik yuʼam.

4. Chan raj ru taachʼolobʼ li bʼe «nim ru»?

⁴ Tento naq chʼolchʼooq chiqu li xjalanil li wiibʼ chi bʼe.  Naabʼalebʼ nekeʼxsikʼ li bʼe «nim ru» xbʼaan naq moko chʼaʼaj ta wank chisaʼ. Ra xyeebʼal, abʼan naabʼalebʼ nekeʼkanaak saʼ li bʼe aʼin joʼ nekeʼxbʼaanu li xkʼihalil li poyanam. Inkʼaʼ nekeʼxkʼe reetal naq li naraj laj Tza aʼan naq teʼxik saʼ li bʼe li nakʼamok saʼ li kamk (1 Cor. 6:9, 10; 1 Juan 5:19).

5. Kʼaru xeʼxkʼe xchʼool chi xbʼaanunkil junjunq li poyanam re xtawbʼal li bʼe kachʼin ru ut re naq teʼoq chisaʼ?

⁵ Li Jesús kixye naq li bʼe «nim ru», jalan chiru li «kachʼin ru», xbʼaan naq moko naabʼalebʼ ta nekeʼok aran. Kʼaʼut? Qakʼehaq reetal naq, saʼ li jun chik raqal, li Jesús kixye naq weent tqabʼaanu rikʼinebʼ li bʼalaqʼ aj propeet (Mat. 7:15). Ak xtzʼilmank rix naq wank chi mil ebʼ li paabʼal, ut li xkʼihalil nekeʼxye naq nekeʼxkʼut li yaal. Saʼ xkʼabʼaʼ naq wank naabʼal li paabʼal, chi miyon ebʼ li poyanam nekeʼchʼinaak xchʼool ut inkʼaʼ nekeʼxnaw kʼaru teʼxbʼaanu, chi moko nekeʼxyal xsikʼbʼal li bʼe li nakʼamok saʼ li yuʼam. Abʼan naru teʼxtaw, xbʼaan naq li Jesús kixye: «Wi junelik eetzʼejwalihom eeribʼ rikʼin li waatin, tzʼaqal intzolomex; teenaw li yaal ut li yaal taaʼachʼabʼanq eere» (Juan 8:31, 32). Us naq laaʼat, inkʼaʼ xaabʼaanu li nekeʼxbʼaanu li xkʼihalil li poyanam, xaasikʼ bʼan li yaal. Xat-ok xtzʼilbʼal rix chiʼus li Raatin li Yos re xnawbʼal li naraj naq taabʼaanu ut xaapaabʼ li kixkʼut li Jesús. Xaatzol naq li Jehobʼa naraj naq tqatzʼeqtaana li naxkʼut li bʼalaqʼil paabʼal ut naq inkʼaʼ chik tootzʼaqonq saʼebʼ li najteril naʼlebʼ li chalenaq saʼ li bʼalaqʼil paabʼal. Xaatzol ajwiʼ naq wank sut chʼaʼaj xbʼaanunkil li naxpatzʼ qe li Jehobʼa ut xkanabʼankil li naʼlebʼ li inkʼaʼ nawulak chiru (Mat. 10:34-36). Maare xchʼaʼajkoʼk chaawu xkanabʼankil aʼin, abʼan saʼ xkʼabʼaʼ naq nakaara laachoxahil Yuwaʼ ut nakaawaj xtawbʼal li rusilal, inkʼaʼ xchʼinaak laachʼool. Jwal sa tana xchʼool li Jehobʼa aawikʼin (Prov. 27:11).

6. Joʼ naxye saʼ Salmo 119:9, 10, 45, 133, kʼaru ttenqʼanq qe re naq inkʼaʼ tooʼelq saʼ li bʼe kachʼin ru?

⁶ Wi ak xooʼok chi wank saʼ li bʼe kachʼin ru, kʼaru ttenqʼanq qe re naq junelik wanqo aran? Qakʼehaq junaq li eetalil. Saʼ junjunq li tenamit, saʼebʼ li tzuul wankebʼ li bʼe kachʼin ru bʼarwiʼ nekeʼxkʼe ebʼ li ramlebʼ re naq tixkol ribʼ laj chʼeʼol bʼelebʼaal chʼiichʼ ut li xbʼelebʼaal chʼiichʼ. Li ramlebʼ aʼin, nakʼanjelak re naq inkʼaʼ teʼnachʼoq chire li bʼe malaj teʼtʼaneʼq taqʼa. Peʼyaal naq maaʼani raj t-oq xyeebʼal naq li ramlebʼ aʼin, inkʼaʼ nakʼanjelak? Joʼkan bʼiʼ, li naʼlebʼ li naxkʼe qe li Jehobʼa saʼ li Santil Hu chanchan li ramlebʼ aʼin: nakʼanjelak re naq inkʼaʼ tooʼelq saʼ li bʼe kachʼin ru (taayaabʼasi Salmo 119:9, 10, 45, 133).

7. Chanru teʼril li saaj li bʼe kachʼin ru?

⁷ At saaj, ma wank sut nakaakʼoxla naq li naʼlebʼ li naxkʼe li Jehobʼa maakʼaʼ nakatxkanabʼ xbʼaanunkil? Aʼan naraj laj Tza naq taakʼoxla. Naraj naq taakʼe reetal li nekeʼxbʼaanu li nekeʼxik saʼ li bʼe nim ru ut chanchan tawiʼ naq jwal sahebʼ saʼ xchʼool. Naraj naq taakʼoxla naq moko sa ta saʼ laachʼool joʼebʼ laawechtzolom ut ebʼ li poyanam li nekeʼelk saʼ internet, ut naq li naʼlebʼ li naxkʼe li Jehobʼa moko nakatxkanabʼ ta xyalbʼal xsahil laayuʼam. * Abʼan, jultikaq aawe naq laj Tza maakʼaʼ naraj re li taakʼul naq yooqat  chi xik saʼ li bʼe nim ru. Abʼanan, li Jehobʼa ak xkʼut chaawu li teʼxkʼul li nekeʼxik saʼ li xbʼehil li yuʼam (Sal. 37:29; Is. 35:5, 6; 65:21-23).

8. Kʼaru naru nekeʼxtzol ebʼ li saaj rikʼin li kixkʼul laj Olaf?

⁸ Kʼoxla li nakatruuk xtzolbʼal rikʼin li kixkʼul laj Olaf, * jun li hermaan saaj. Ebʼ li rechtzolom nekeʼxmin ru re naq tixmux ribʼ. Naq kixchʼolobʼ chiruhebʼ naq ebʼ laj testiiw re li Jehobʼa nekeʼxyuʼami li naxye li Santil Hu, wiibʼ oxibʼ li tuqʼixq xeʼxyal rix ut xeʼraj xqʼunbʼesinkil re naq tixmux ribʼ rikʼinebʼ. Abʼan aʼan inkʼaʼ kitʼaneʼk saʼ ruqʼebʼ, ut moko kaʼaj tawiʼ aʼin kixkʼul. Naxye: «Ebʼ laj kʼutunel xeʼxmin wu re naq tinxik saʼ li nimla tzolebʼaal, xbʼaan naq aʼin tixkʼe inwankil. Wi inkʼaʼ tinbʼaanu, xeʼxye we naq moko tintaw ta junaq inchaabʼil kʼanjel ut naq moko sahaq ta saʼ linchʼool». Chanru kiruuk xnumsinkil aʼin? Aʼan naxchʼolobʼ: «Xinsikʼ ebʼ linchaabʼil amiiw saʼ li chʼuut ut xwilebʼ joʼ injunkabʼal. Joʼkan ajwiʼ, xinʼok xtzolbʼal chiʼus  li Santil Hu. Naq xinyal inqʼe chi xtzʼilbʼal rix li Santil Hu, qʼaxal xchʼolaak chiwu naq xintaw li yaal ut qʼaxal xʼalaak saʼ inchʼool kʼanjelak chiru li Jehobʼa».

9. Kʼaru tento tqabʼaanu wi naqaj wank saʼ li bʼe kachʼin ru?

⁹ Laj Tza naraj naq tooʼelq saʼ xbʼehil li yuʼam, ut naq tooxik chirixebʼ li xkʼihalil li kristiʼaan li nekeʼxik saʼ li bʼe nim ru li nakʼamok saʼ li kamk (Mat. 7:13). Abʼan, wi inkʼaʼ naqakanabʼ rabʼinkil li Jesús ut naqil li bʼe kachʼin ru joʼ jun li kolbʼa ibʼ, inkʼaʼ tqakanabʼ bʼeek chisaʼ. Qilaq jun chik li naʼlebʼ li kixye li Jesús naq tento tqabʼaanu.

10. Joʼ naxye saʼ Mateo 5:23, 24, kʼaru kixye li Jesús naq tento tqabʼaanu?

¹⁰ (Taayaabʼasi Mateo 5:23, 24). Saʼebʼ li raqal aʼin, li Jesús yook chaq chi aatinak chirix jun li naʼlebʼ li qʼaxal wank xwankil choʼq rehebʼ laj judiiy li yookebʼ chaq rabʼinkil. Qakʼoxlaq naq junaq li kristiʼaan wank saʼ li rochoch li Yos ut naq ok re chi xqʼaxtesinkil re laj tij jun li xul re naq tixmayeja. Maare saʼ li hoonal aʼan, nachalk saʼ xchʼool naq li ras riitzʼin wank jun xchʼaʼajkilal rikʼin, tento tixkanabʼ li xul ut txik. Kʼaʼut? Xbʼaan naq tento tixbʼaanu jun li naʼlebʼ li qʼaxal wank xwankil naq toj maajiʼ naxyeechiʼi li xmayej chiru li Jehobʼa. Li Jesús kixye chi tzʼaqal re ru: «Ayu xbʼenwa chi xkʼambʼal aawibʼ saʼ usilal rikʼin laawas aawiitzʼin».

11. Kʼaru kixbʼaanu laj Jacob re xkʼambʼal ribʼ saʼ usilal rikʼin laj Esaú?

¹¹ Xtzʼilbʼal rix li kixkʼul laj Jacob, tooxtenqʼa chi xtawbʼal qanaʼlebʼ chirix chanru tqakʼam qibʼ saʼ usilal rikʼinebʼ li junchʼol. Naq 20 chihabʼ rokik chi wank saʼ najtil naʼajej, laj Jacob kiyeheʼk re xbʼaan jun li ánjel naq tsutqʼiiq wiʼ chik saʼ li xtenamit (Gén. 31:11, 13, 38). Abʼan wank jun li chʼaʼajkilal: naq laj Esaú, li ras, kiraj xkamsinkil (Gén. 27:41). Abʼan «kʼajoʼ naq kixiwak laj Jakob ut kiʼok xkʼaʼuxl» xbʼaan naq toj xikʼ naʼileʼk xbʼaan li ras (Gén. 32:7). Kʼaru kixbʼaanu laj Jacob re xkʼambʼal ribʼ saʼ usilal rikʼin li ras? Xbʼeen, kitijok chi anchal xchʼool chiru li Jehobʼa. Xkabʼ, kixtaqla re laj Esaú jun li nimla maatan (Gén. 32:9-15). Ut, rox, naq xeʼxtaw ribʼ, laj Jacob xbʼeenwa kiroxloqʼi laj Esaú. Moko jun sut ta ajwiʼ kixwiqʼibʼ ribʼ chiru laj Esaú, wuqubʼ sut bʼan. Laj Jacob kixkubʼsi ribʼ ut kiroxloqʼi laj Esaú re xkʼambʼal ribʼ saʼ usilal rikʼin (Gén. 33:3, 4).

12. Kʼaru naqatzol rikʼin laj Jacob?

¹² Tooruuq xtzolbʼal qanaʼlebʼ rikʼin laj Jacob naq kixkawresi ribʼ re xtawbʼal ribʼ rikʼin li ras ut chanru kiraatina. Xbʼeenwa, kixtzʼaama re li Jehobʼa naq chitenqʼaaq. Moqon, kixbʼaanu li kixtzʼaama saʼ li xtij naq kixyal xqʼe chi xbʼaanunkil li wank saʼ ruqʼ re naq sa t-ileʼq xbʼaan li ras ut naq maakʼaʼ tbʼaanuuq re. Ut, naq kiruuk chi aatinak rikʼin, moko kiʼok ta xpatzʼbʼal ani wank xmaak. Li naraj, aʼan xkʼambʼal ribʼ saʼ usilal rikʼin li ras. Chanru tooruuq xkʼambʼal qe rikʼin laj Jacob?

13, 14. Kʼaru tento tqabʼaanu wi xqatochʼ xchʼool junaq li hermaan?

¹³ Li wanko saʼ xbʼehil li yuʼam naqaj xkʼambʼal qibʼ saʼ usilal rikʼinebʼ li qechpaabʼanelil (Rom. 12:18). Joʼkan naq, kʼaru tento tqabʼaanu wi naqakʼe reetal naq xqatochʼ xchʼool junaq li hermaan? Joʼ laj Jacob,  tento naq tootijoq chi anchal qachʼool chiru li Jehobʼa ut tqatzʼaama re, naq chooxtenqʼaq chi xkʼambʼal qibʼ saʼ usilal rikʼin.

¹⁴ Joʼkan ajwiʼ, tento tqisi qahoonal re xtzʼilbʼal qix chiqajunqal. Qakʼoxlaq rix aʼin: «Ma ninyal inqʼe chi xkubʼsinkil wibʼ, xpatzʼbʼal xkuybʼal inmaak ut xkʼambʼal wibʼ saʼ usilal? Chanru trekʼa ribʼ li Jehobʼa ut li Jesús wi laaʼin xbʼeenwa ninsikʼ wank saʼ usilal rikʼinebʼ li wechpaabʼanelil?». Aʼ yaal li xsumenkil, aʼin toorekʼasi chi xpaabʼankil li Jesús, ut chi nachʼok rikʼinebʼ li hermaan re naq tqakʼam wiʼ chik qibʼ saʼ usilal rikʼinebʼ. Li kixbʼaanu laj Jacob naru tooxtenqʼa chi xbʼaanunkil aʼin.

15. Chanru nokooxtenqʼa li naʼlebʼ li natawmank saʼ Efesios 4:2, 3 chi xkʼambʼal qibʼ saʼ usilal rikʼinebʼ li qahermaan?

¹⁵ Kʼaru raj kikʼulmank wi laj Jacob inkʼaʼ raj kixkubʼsi xwankil naq kixtaw ribʼ rikʼin laj Esaú? Jalan tana raj li kikʼulmank. Joʼkan ajwiʼ tqabʼaanu, wi nokooʼaatinak rikʼin junaq li hermaan re xtuqubʼankil ru junaq li chʼaʼajkilal, tento naq tqakubʼsi qibʼ (taayaabʼasi Efesios 4:2, 3). Proverbios 18:19 naxye: «Moko chʼaʼaj ta xjukʼbʼal junaq suttzʼak chiru xkʼojobʼankil xchʼool junaq amiiw li xhobʼeʼk ut ra xkʼul. Li wechʼij ibʼ naxram li aatin kamaʼ wiʼ xnatʼbʼal rix li okebʼaal». Wi chi anchal qachʼool naqapatzʼ xkuybʼal qamaak, aʼin tixbʼaanu naq tteheʼq «li okebʼaal».

16. Kʼaru tento tqakʼoxla rix ut, kʼaʼut?

¹⁶ Joʼkan ajwiʼ tento tqakʼoxla rix chiʼus kʼaru tqaye re li hermaan li kitochʼeʼk xchʼool ut chanru tqaye. Naq chʼolchʼo chik chiqu aʼin, tqasikʼ re naq sa wiʼ chik trekʼa ribʼ. Maare saʼ xtiklajik tixye qe li aatin li ra tnaq wiʼ. Abʼan moopoʼk chi moko tqaye naq moko laaʼo ta wank qamaak, xbʼaan naq aʼin inkʼaʼ tooxtenqʼa re xkʼambʼal wiʼ chik qibʼ saʼ usilal. Qajultikaq naq qʼaxal wank xwankil xkʼambʼal wiʼ chik qibʼ saʼ usilal rikʼin li qahermaan chiru xyeebʼal ani wank xmaak (1 Cor. 6:7).

17. Kʼaru nakaatzol rikʼin li kixkʼul laj Gilbert?

¹⁷ Qilaq chixjunil li kixbʼaanu laj Gilbert jun li hermaan re xsikʼbʼal li tuqtuukilal. Naxye: «Numtajenaq chaq linchʼaʼajkilal rikʼin jun linkomon. Numenaq wiibʼ chihabʼ xinyal inqʼe re aatinak saʼ tuulanil rikʼin re naq tqakʼam wiʼ chik qibʼ saʼ usilal». Kʼaru  chik kixbʼaanu? «Naq toj maajiʼ ninʼaatinak rikʼin linkomon, nintijok ut ninkawresi wibʼ re naq inkʼaʼ tinpoʼq wi tixye we junaq li aatin li tixtochʼ inchʼool. Tento naq tinkuyuq maak. Xintzol naq inkʼaʼ tinyal inqʼe chi xkʼutbʼesinkil naq moko laaʼin ta xinpaltoʼk, tento bʼan tinsikʼ wank saʼ tuqtuukilal». Kʼaru kikʼulmank? Laj Gilbert naxye: «Anaqwan sa chik nawekʼa wibʼ, xbʼaan naq ninkʼam wibʼ saʼ usilal rikʼin chixjunil ebʼ linkomon».

18, 19. Wi xqatochʼ xchʼool junaq li hermaan, kʼaru tento tqabʼaanu ut, kʼaʼut?

¹⁸ Kʼaru tento tqabʼaanu wi naqakʼe reetal naq xqatochʼ xchʼool junaq li hermaan? Xpaabʼankil li naxye li Jesús chirix naq tqakʼam qibʼ saʼ usilal rikʼinebʼ li junchʼol. Aatinaqo rikʼin li Jehobʼa chirix aʼin, ut qatzʼaamaq li xsantil musiqʼej re naq chooxtenqʼaq chi xtuqubʼankil ru li chʼaʼajkilal. Wi joʼkan naqabʼaanu, sahaq saʼ li qachʼool ut tqakʼutbʼesi naq yooko chi abʼink chiru li Jesús (Mat. 5:9).

¹⁹ Kʼajoʼ naqabʼanyoxi naq li Jehobʼa rikʼin rahok nokooxbʼeresi saʼ xkʼabʼaʼ li Jesukriist, li «najolomink rehebʼ laj paabʼanel» (Efes. 5:23, Wy). Joʼ kixbʼaanu li apóstol Pedro, Santiago ut Juan, qakʼehaq qachʼool chi rabʼinkil li Jesús (Mat. 17:5). Ak xqatzol naq tooruuq xbʼaanunkil aʼin wi naqakʼam qibʼ saʼ usilal rikʼin li hermaan li xqatochʼ xchʼool. Joʼkan ajwiʼ, wi inkʼaʼ nokooʼelk saʼ li bʼe kachʼin ru li nakʼamok saʼ li yuʼam, tqakʼul naabʼal li osobʼtesihom anaqwan ut sahaq saʼ qachʼool junqʼe junqʼe kutan.