1-2. a) I biny byambiilobw bapostol basat ba Yeez bwa kulong, ni balongel biny? b) I biny bitwiiyiiy kutal mu ciin bwaal eecy?

HAANYIM a Paasak wa mu dya 32 H.H.Y., bapostol aab: Pyeel, Jak, ni Jah bamween bwaal bwa kukem butal bu mu cilot. Hafikilobw ha mulund a Hermon, Yeez waalabukil kuuhal kwa biiyij bindiy. “Hal indiy waakady ubalal bu diib ni bizang bindiy byaakady bitook tooh bu citookej.” (Mat. 17:1-4) Kuuhal kwa bwaal butal bu mu cilot kuhebw, bapostol bumvwiil Mawej uleeb neey: “Mwiinoow i Mwaan a mim unady muhit kukat. Kudyey i kunady muteek micim ya mim yoos. Mumvwiilaay.” (Mat. 17:5) Bapostol basat aab baakady baleej mu shikacil aabab mwaakadyobw bumvwiil Yeez. Tudy bakat kulond cileejel cyaabab.

² Mu ciin bwaal cishaal, tulongel neey: kumvw diiy dya Yeez kumvumvwiij kulek kulong myand kahand. Mu ciin bwaal eecy, twiiyiiy kukontonon myand yibidy yaakady Yeez muleeb bwiitut kulong.

3. Bilondeshel mukand a Matewus 7:13, 14, bikaam tulong biny?

³ Bal Matewus 7:13, 14. Manyik neey: Yeez waakady muleeb bwa bibel bibidy byaakady mwa kufikij baat ku njil ibidy yishilangan, njil “mutam” ni njil “mukeeh.” Kakwiinoh bend njil mwiisat. Bikaam twiisungwiil kayeet njil utudy mwa kuyiil. I diihangadik ditam didy woos wa kutudy mwa kwangat—bwaal kudy teng njil aakaabumw udy mwa kwiitufikij ku buumy bwa mwendeleel.

4. I mushind kaay uwudy mwa kumvwiij njil “mutam”?

⁴ Bikaam tumanyik kushilangan kudy hakacy ha njil ibidy eey. Njil “mutam” i udy ni baat bavul bwaal i biheehel bwa kuyiilomw.  Bya kakunying, baat bavul i bakat kushaal mu njil aamw ni muut woos i mukat kulong cidyey mukat bwa kulong. Kabiin bamanyik neey: Dyabol ki uloolombol baat mu njil oow, ki njil oow, ki ufiifikij baat ku lufw.​—1 Kor. 6:9, 10; 1 Jah 5:19.

5. I mushind kaay udy bakwaabw biikashishomw bwa kumanyik njil “mukeeh” ni batwaadij kwendelomw?

⁵ Njil mukwaabw udy mushilangan ni njil “mutam,” i njil “mukeeh,” ni Yeez uleebel bwa njil oow neey: baat bakeeh i bayiiyilomw. Bwabiny? I bya buseeb, bwaal mu verseh uloolond, Yeez waakady mudyumwiij biiyij bindiy habitaatal baprofet ba makos. (Mat. 7:15) Baat bakwaabw baleeleeb neey: kudy bitendeleel bivul byeeh bileeleeb neey: baloolongweesh myand ya biin-biin. Miliyo ya baat bavul i bakooyel mu mabok eecy i babwiikil hiiwul ha mees kudy malongweesh ma kondakany maloolong bwa balek kutweel mu njil ufiifikij ku buumy. Ki kudy mushind a kutweel mu njil oow. Yeez uleebel neey: “Anwaakooyel ku may maam, nwiikaakal biiyij baam ba biin-biin. Nwiiyiiy kumanyik myand ya biin-biin, ni myand ya biin-biin yiiyiiy kwiinushiy baat biishikacil.” (Jah 8:31, 32) I bilengel, bwa munudy balek kulong myand ya bwiin yiloolong baat bavul; hamut a kulong naak, nudy bakaam myand ya biin-biin. Nutwaadijil kulong Diiy dya Mawej bikasakan bwa kumanyik cikaakaamey bwa tulong, ni nwaakady bumvw malongweesh ma Yeez. Mu myand yikwaabw eey, nulongel neey: Yehow ukaakaam bwa tulek malongweesh ma citendeleel cya makos ni tulek kusangeel mafuk madyaakal bapangaan basangeel. Udy mulong cikwaabw myand yisasangeej Yehow mu shikacil iibuh, ni kabiishoh bend biheehel bwa kulong nook. (Mat. 10:34-36) Kabyaakadyoh bend bikuheehedyel bwiibuh kulongolol myand mu shikacil iibuh. Cikwaabw, waakady musuminyin bwa kulong nook bwaal waakady mukat Taat iibuh a mu diiwul ni ukacil bwa ku musangeej. I musangal kaay udyey nend bwiibuh!​—Tus. 27:11.

6. Bilondeshel mukand a Misambw 119:9, 10, 45, 133, i biny bidy mwa kwiitwambulwiish bwa kushaal mu njil mukeeh?

⁶ Hatudy batwaadij kwendel mu njil mukeeh, i biny bidy mwa kwiitwambulwiish bwa kushaalomw? Tutalaay cileejel eecy. Mu bibunj bivul i biibak cibambal kuush kwa njil mukeeh, uhiihicil ku buteng kwa mulund, bwa hiikal mashiny makaam kuhon, meeyetelok. Cibambal cya kweeyetel eecy, cilaalam baat bendendesh mashiny bwa—bendel teng mu njil bwa kaay bahon mu cihong. Bendesh bavul ba mashiny kabakuleeboh bend neey: cibambal eecy i ciibak bwa kwiibalongel bibiih, kwiibahambwiish eecy bwa kwiibazuh, ki cidyok bwa kwiibalam! Bya mushind aakaabumw, mikenj ya Yehow yidy mu Bibl, yidy bu cibambal eecy. Mikenj yindiy yitwambambulwiish bwa kushaal mu njil mukeeh.​—Bal Misambw 119:9, 10, 45, 133.

7. I mushind kaay udy baasand batal njil mukeeh?

⁷ Nun baasand, nudyaakalok misang yikwaabw nulang neey: mikenj ya Yehow yinukaakakeshok bwa kulong myand yinudy bakat eeny? Ki cidy Sataan ukaam bwiinun kulang. I mukat bwa nulong myand yiloolong baat bady mu njil mutam, bwaal i yiy myand yilaalangobw neey i yilengel ku mees kwaababw. Udy mwa kukal mudimw ni balund neeb ba mu kalaas eecy ni myand yiwutaatal ku Enternet bwiinun kulang neey: nwiibuubudishomw myand yilengel yivul ya mu shikacil. Sataan ukaakaam bwa nulang neey: kulond mikenj ya Yehow kwiinubuubudish shikacil a musangal. * Ki manyikaay neey: Sataan kiin mukat bwa baat bady mu njil indiy bamanyik ciikalobw mwa kuhet ku bulekel kwa lwend  lwaabab. Cikwaabw, Yehow i muleej baat bendendel mu njil ufiifikij ku buumy shikacil a musangal wiikalobw mwa kuhet.​—Mis. 37:29; Ye. 35:5, 6; 65:21-23.

8. I biny bidy baasand mwa kulongel ku cileejel cya Olaf?

⁸ Talaay cinudy mwa kulongel ku cileejel cya mwiin-kweet Olaf ucidy saand. * Balony ba mu kalaas kaabab baakady bamusak bwa kwiitweejey mu bulongavy. Haakadyey mumvwiij neey: Batemw ba Yehow badyaakal baneemek may matam mady mu Bibl habitaatal bukalang mu shikacil, ba sangiikaj bakwaabw ba mu kalaas kaabab bangacil bwaal bu cihumbish ni baakady bakaam kwend nend masandy. Ki Olaf waakady mwiiswiik bwa kulong teng cidy cilengel. Ni bwiinoobw kabwaakady teng bwaal bwaakaabumw bwaakadyey mutwiilangan naabw. Olaf uleeleeb neey: “Balongweesh baam baakady bateet bwa kujaadikil neey: mim mukalong tulaas tutam twa Iniversiteh, baat biikaakal baneemek. Baakady bayambil neey: mim ciy mulong nook, cya kwiikaloh bend ni musangal mu shikacil aam.” I biny byaakady byambulwiish Olaf bwa kukasakeeney diiteet eedy? Uleeleej neey: “Naakady  mukashish bulund bwaam ni biin mu cisumbw ciitut. Bashaadil bu biin mu cisak cyaam. Cikwaabw natwaadijil kulong Bibl bikasakan. Kondol kwaam kwa mifund ya mu Diiy dya Mawej kwaakady kujaadikil neey: myand yinaakady nalong yaakady ya biin-biin. Bu cihet, nangacil dihangadik dya kukadil Yehow mudimw.”

9. I biny bidyobw balomb baat bady bakat kushaal mu njil mukeeh?

⁹ Sataan i mukat bwa ulek njil ufiifikij ku buumy. I mukat bwa ulond baat bavul bady mu njil mutam ‘ufiifikij baat ku lufw.’ (Mat. 7:13) Nook, twiiyiiy kushaal mu njil mukeeh teng tut batungunuk ni kukooyel Yeez ni kutal njil oow bu cyaab cilengel cya kusokotel. Tukontononaay kaabaak bwaal bukwaabw budy Yeez muleeb butudy mwa kulong.

10. Bilondeshel Matewus 5:23, 24, Yeez uleebel bwa tulong biny?

¹⁰ Bal Matewus 5:23, 24. Yeez uleejel bahambidil biin Yuud baakady bamukun mat bwaal bwa buseeb bwaakadyobw mwa kulong. Lang ket: muut udy ku tempel ni ukaam kwaakish mutam a baIumbul ba milambw mulambw a nyam. Hiikaley muvuluk neey: udy ni bwaal ni mwaanaabw kahand, byaakady bikaam ashiy mulambw ni ‘ahingomw.’ Bwabiny? Bwaal kwaakady bwaal bwa buseeb buvul bwaakadyey mwa kulong kuuhal kwa kulambuley Yehow mulambw. Yeez utootookesh bwaal oobw uleeb neey: Anj ndaak “nukahwaanakan ni mwaaneen.”

11. Umvwiij mushind waakady Jakobw mukaam diitalal hakacy indiy ni mwaanaabw Ezaw.

¹¹ Tudy mwa kuhet malongweesh ma buseeb habitaatal mushind a kukaam diitalal ha kukontonon bwaal buhetel Jakobw mu shikacil. Haanyim a Jakobw muman kwaaluk mu cibunj cyaakadyobw bamulel mivw 20 yiman kuhit, Mawej umwambiil ku dyambulwiish dya mwanjel bwa hahingomw kwaababw. (Kbwa. 31:11, 13, 38) Ki kwiin aak, waakadyok ni bilumbw. Mwaanaabw, Ezaw, waakady ukaam kumuzuh. (Kbwa. 27:41) Jakobw “mooy umukwaacil, micim yaamubusik mund” bwaal mwaanaabw waakady mumumvwiil cinj cikasakan. (Kbwa. 32:7, NWT) I biny byaakady Jakobw mulong bwa kukaamey diitalal hakacy indiy ni mwaanaabw? Cya kuuhal, waakady musambil Yehow ni mucim woos wamwambiil bwaal bwaakady bumutond. Haanyim, waakady mutumin mwaanaabw Ezaw biit bya bukish. (Kbwa. 32:9-15) Ku bulekel kwa byoos, hasambakeenobw baatalangan hal-ni-hal, Jakobw waakady mwangat diihangadik dya kuneemek Ezaw. Jakobw ubandamin kuuhal kwa Ezaw—waakafik ni haash, kiin musang umw eecy yibidy, ki ubandamin bikuuk mwandamuteket! Ni kwiihweekesh ni kaneemw koos, Jakobw ukaamin diitalal hakacy indiy ni mwaanaabw.​—Kbwa. 33:3, 4.

12. I biny bituloolongel ku cileejel cya Jakobw?

¹² Tuheehetel dilongweesh ku mushind waakady Jakobw mwiilongolol bwa kuhetangan ni mwaanaabw ni mushind a kufweej habwiih ni Ezaw. Jakobw waakady musambil Yehow ni kwiihweekesh bwa kumwambulwiishey. Haanyim, waakady mulong myand yaakady yihetangan ni diisambil dilongeley ni kulongey cidy cyaakady mwa kumwambulwiish bwa kukaam diitalal ni mwaanaabw. Haakadyobw basambakeen, Jakobw kaakady mukat bwa kutwiishangan ni Ezaw bwa kumanyik udy mubing naay ni udy mufw naay. Kiihacil ka Jakobw kaakady ka kukaam diitalal hakacy indiy ni mwaanabw. I mushind kaay utudy mwa kwiidikij cileejel cya Jakobw?

13-14. Tut bafulwiij mwiin-kweet mund, bikaam tulong biny?

¹³ Bikaam tut bendendel mu njil ufiifikij ku buumy tukaam bwa kushikat talal ni baan-beet. (Rom 12:18) I biny bitudy mwa kulong tut batal  neey: tudy bafulwiij mwiin kwiitabij neet mund? Teng bu Jakobw, bikaam tusambil Yehow ni mucim iitut woos. Tudy mwa kulomb Yehow bwa iitwambulwiish bwa tukaam diitalal hakacy iitut ni mwiin-kweet.

¹⁴ Cikwaabw, bikaam twiisambil cisang ciitut mwa kwiikontonon. Tudy mwa kwiiyihanguj majooj bu mudy aam: ‘Niitaatab cilem cyaam, mukat kulomb lus ni kwiihweekesh, ni nakaam diitalal eeny? I mushind kaay udy Yehow ni Yeez mwa kumvw hanangangat diihangadik dya kukaam diitalal hakacy aam ni mwiin-kweet mwaan-mulum eecy mwaan-mukaj?’ Maalabul miitut miiyiiy kwiitusak bwa kulond diiy dya Yeez ni kwiihweekesh bwa kuy katal mwiin-kweet bwa kukaam diitalal. Hatuloolong nook, twiidiidikij cileejel cya Jakobw.

15. Kukooyel diiy ditam didy mu Biin Efez 4:2, 3 kwiitwambambulwiish bwa kukaam diitalal ni mwiin-kweet bicy?

¹⁵ Lang ket bwa cyaakady mwa kulongek bu Jakobw mwiikal kay mwiihweekesh hasambakeenobw ni mwaanaabw! Baakady mwa kulongelangan myand yibiih menmen. Hatuyaay kudy mwiin-kweet bwa kulengejangan nend, bikaam tulong myand ni kwiihweekesh. (Bal Biin Efez 4:2, 3.) Tusumw 18:19 uleeleeb neey: “Mwaaneen udyobw batuk, ukaady mukasakan bwa kumb diiy muhitok teng ni cibunj cikasakan.” Kulomb muut lus ni kukaam diitalal, kudy bu “cibunj cikasakan.”

16. I bwaal kaay bukwaabw butudy mwa kulangil, ni bwabiny?

¹⁶ Cikwaabw, bikaam twiikal badimuk bwa myand yitwiikal mwa kwambil mwiin-kweet ni mushind utwiikal mwa kwiiyileeb. Tut batal neey: tukaady habwiih, bikaam tukatal mwiin-kweet ni kiihacil ka kumwambulwiish bwa aful kakunying kadyey naak ku micim ni bwa kulengejangan nend bwa kushaal mu diitalal. Cya kuuhal, udy mwa kukuleeb may mady mwa kukutah ku micim. Bidy mwa kwiikal biheehel bwiitut kufulul mund eecy tudy mwa kutwaadij kwiibingish tut kaayeet, ki kulong nook, i mushind mulengel wa kukaam diitalal eeny? Bwaal, kabiishoh bend naak. Manyik neey: kukaam diitalal ni mwiin-kween kudy ni mushing muvul, hamut a kukokangan bwa kumanyik udy mubing naay ni udy mufw naay.​—1 Kor. 6:7.

17. I dilongweesh kaay ditudy mwa kuhetel ku cileejel cya Gilbert?

¹⁷ Mwiin-kweet Gilbert waakady wiikashishomw bwa kwiikaley mushikik a baat talal. Uleeleeb neey: “Katwaakadyoh bend tuhetangan ni mwaaneet mwaan-mukaj wa mu cisak. Mukacy mwa mivw yibidy, naakady mwiikashishomw bwa kumwambil myand yoos hatook ni  kiihacil ka kukaam diitalal hakacy a mim nend.” I bwaal kaay bukwaabw bulongel Gilbert? “Kuuhal kwa kwiisambey ni mwaanaabw a mu cisak, uleeleeb neey: Naakady mwa kusambil ni kulongolol meej maam bwa cihatuloh bend may mady mwa kumutah ku micim. Naakady mwiihangadij bwa kumufwiil lus. Cyaakadyoh bend mukat kubing naay, ni namanyikil neey: Naakady ni diibanz dya kukaam diitalal.” Kumweekel bihet kaay? Gilbert uleeleeb: “Leeloow, nady mushikat ku micim talal ni nady mushikat bilengel ni biin mu cisak ciitut boos.”

18-19. Tut bafulwiij muut mund, bikaam twiiswiik bwa kulong biny, ni bwabiny?

¹⁸ Nook, i biny biwudy mwa kulong uw mutal neey: udy mulongel mwiin Krist neeb myand yibiih? Lond myand yidy Yeez muleeb bwa kukaam diitalal. Ambil Yehow myand yiwudy naay, ni spirit indiy wiiyiiy kukwambulwiish bwiibuh kwiikal mushikik a baat talal. Uw mulong nook, wiiyiiy kwiikal ni musangal, ni wiiyiiy kuleej muwumvumvw diiy dya Yeez.​—Mat. 5:9.

¹⁹ Tudy ni dyanyish kudy Yehow bwa mudyey mwiitwaakish may ma lukat ma kulond ku dyambulwiish dya Yeez Krist udy “ku mut kwa Ekeleziy.” (Ef. 5:23) Tut mwa kwiiswiik bwa ‘kumumvwiil’ teng bu mulongel bapostol aab: Pyeel, Jak, ni Jah. (Mat. 17:5) Tudy bakontonon mutudy mwa kulong nook hatukaakaam diitalal ni mwiin Krist neet utudy balongel bibiih. Hatuloolong nook ni hatushaashaal mu njil mukeeh ufiifikij ku buumy, twiiyiiy kuhet kis muvul kaabaak ni musangal a mwendelel mu mafuk maciiyiiy.