1-2. (a) Abasathu b’okwa bakwenda ba Yesu mubabwirwa erikolhaki, kandi mubakolha kyahi? (b) Thukendi kania okuki omo mwatsi ono?

ENYUMA w’Ekiro ky’Erikyuruka 32 E.K., abakwenda, ya Petero, Yakobo, na Yoane ibane omwa siri nga nzoli mubalhangira ebikaswekaya. Oko kithwe kiiri kutsibu, obundi oko Kithwe Hermoni, Yesu mwahindukibwa embere syabu. “Obusu bwiwe mubwakangabasania ng’eryuba, n’esyongyimba siwe musyabya nyeru-nyeru ng’ekyakakalha.” (Mt. 17:1-4) Esyonzoli sikayahwa, abakwenda mubowa Nyamuhanga akabugha athi: “Oyu ni Mughalha waghe mwanze, namamutsemera ndeke; mumwowe!” (Mt. 17:5) Abakwenda basathu aba mubakangania omwa ngebe yabu ku mubowa Yesu. Thwanzire ithwagherererya eky’erileberyako kyabu.

² Omo mwatsi owahwere, muthw’ighire ngoku eriowa omulenge wa Yesu kikamanyisaya erileka erikolha bindu birebe. Omo mwatsi ono, thukendi kania okwa bindu bibiri ebya Yesu abugha athi thutholere ithwakolha.

3. Ngoku kiri omu Matayo 7:13, 14, thutholere ithwakolhaki?

³ Soma Matayo 7:13, 14. Lhangira ngoku Yesu mwahulha esyongyo ibiri esiri mbaghane esikalholhaya omo nzira ibiri esithasosene, “enene-nene” n’enzira “nge.” Sihali enzira eyakasathu. Thutholere ithwayisombolera eya thukendi lhabamo. Eri ly’erithwamu likulhu erya thwanga kolha​—engebe yethu y’erikotha yiseghemere kulyo.

4. Wanga bugha wuthiki okwa nzira “nene-nene”?

 ⁴ Thutholere ithwabya ithun’ibukire embaghane eyiri ahakathi-kathi k’esyonzira ibiri esi. Enzira “nene-nene” yasibwe kundi kyolhobire erilhaba muyo. Eky’obulighe, abangyi babirithwamu erisighalha omo nzira eyo n’erikwama ekingungu ky’abandu abakalhaba muyo. Bakalemawa eriminya ngoku Sitani Diabolo yukasighika enzira eyi, kandi ngoku enzira yiwe yikalholhaya okw’ihera.​—1 Kor. 6:9, 10; 1 Yn. 5:19.

5. Ni kaghalha kahi ako abandi babirihiraho eriminya enzira “nge” n’eritsuka erilhaba muyo?

⁵ Mbaghane n’enzira “nene-nene,” eyindi nzira ni “nge,” kandi Yesu mwabugha athi abake babakathoka eribanayo. Busana naki? Ekikatsemesaya, omwa mulhondo owakakwamako, Yesu mwakunga abigha biwe athi bayitheghaye okwa baminyereri b’amabehi. (Mt. 7:15) Eribaririra likakanganaya ngoku hali esyongumi sy’amadini, kandi esyosi sikabugha sithi sikakangiriraya ekwenene. Busana n’amadini mangyi, esyomiliyoni sy’abandu babirihwa amani kutse erilibana kw’ameso ikyaleka nibya ibabya isibanga lengesya erisondya enzira eyikakolhaya oko ngebe. Aliwe enzira eyo yangana banika. Yesu mwabugha athi: “Mwamabya mukakolha ebinywe byaghe, imuli bigha baghe kwenene. Kandi mwasyaminya ekwenene, n’omwatsi w’ekwenene asyabaha obwiranda.” (Yn. 8:31, 32) Wukasimawa eribya imuwuthakwama ekingungu; aliwe, muwasondekania ekwenene. Muwatsuka eriyeghesya ndeke Ekinywe kya Nyamuhanga eriminya eby’akathuyithaghako, kandi muwahulikirira esyongangirirya sya Yesu. Ebighuma by’okwa bya w’igha, muw’igha ngoku Yehova anzire ithwaghana esyongangirirya sy’amadini w’amabehi n’erileka erisangira omwa biro bikulhu ebiwithe enzuko y’ekikafiri. Kandi muw’igha ngoku kyangana kalha erikolha ebya Yehova akathuyithaghako n’erilekera ighuma emitse eyo atheligha. (Mt. 10:34-36) Kyanganabya imukyakukalira erikolha esyombinduka esikayithaghisibawa. Aliwe, muwathabikyako kundi wanzire Thatha wawu w’elhubulha kandi wanzire iniakusima. K’atholere eribya iniakakutsemera!​—Emi. 27:11.

6. Ngoku kiri omwa Esyonyimbo 119:9, 10, 45, 133, ni byahi ebyanga thuwathikya erisighalha omo nzira nge?

⁶ Ni byahi ebyanga thuwathikya erisighalha omo nzira nge thwamabiritsuka erilhaba muyo? Thulebaye eky’erileberyako kino. Ebyuma ebikatheghaya ebiri okwa musike w’enzira nyike ey’omwa bithwe bikatheghaya ematoka n’oyukaghendayayo. Bikolirwe eritheya abakaghendaya​—eribawathikya nuku sibalhabe hakuhi-kuhi n’omusike w’enzira kutse eriyilengya kugho. Sihali oyukaghendaya ematoka n’omughuma oyuwanga bugha athi ebyuma ebyo bikabakakiraya! Ebihano bya Yehova ebiri omwa Biblia biri ng’ebyuma ebyo. Ebihano biwe bikaleka ithwabya ithune omwa nzira nge.​—Soma Esyonyimbo 119:9, 10, 45, 133.

7. Abalere batholere ibathunga malengekaniaki okwa nzira nge?

⁷ Abalere, mbwino hakanayira imwayowa ebihano bya Yehova nga byabiribakakirya kutsibu? Sitani kwanzire imwayowa muthya. Anzire iwahira amalengekania w’okwa ebya abali omo nzira nene bakakolha kutse okwa ngebe eyikabya nga yuwene eyo balimu. Angana kolesya ebya banywani bawu okwa sukuru bakakolha kutse ebya wukalebaya okwa Intaneti erileka wuyowe nga wukathalha okwa  tseme. Sitani anzire iwalengekania wuthi ebihano bya Yehova bikaleka iwathatsemera engebe omwa buswire. * Aliwe wibuke kino: Sitani syanzire abali omwa nzira yiwe bakaminya ekikendi syabahikako. Okwa lhundi lhuhandi, Yehova abirikukangania eby’akendi syakolera abakasighalha omwa nzira y’engebe.​—Esy. 37:29; Isa. 35:5, 6; 65:21-23.

8. Ni kyahi ekya balere bang’igha okwa ky’erileberyako kya Olaf?

⁸ Thalengekania okwa ekya wang’igha okwa kyalholirweko kya mughalha wethu omulere ya Olaf. * Abakasoma nabu mubamuhira kw’akahathikano k’eriyingirya omwa by’obutswatswa. Abere akasoborera ngoku Abema ba Yehova bakaghendera okwa bihano bye Biblia eby’esyongeso, abandi basika omwa klasi mubalengaho kutsibu erimuthetha bathi akole nabu emyatsi y’engyingo. Aliwe Olaf mwamakirira  ekihikire. Mwabana n’akandi kahathikano. Olaf akabugha athi: “Abasomesya baghe mubalengaho erinyilighisya bathi ngatholere ingasoma kali-kali kundi kikendi leka ingasikibwa. Mubambwira ambu namathendi kolha ekyo, isinendi tsema omo ngebe.” Ni kyahi ekya wathikaya Olaf erighana akahathikano ng’ako? Akabugha athi: “Munanywana abaIi omwa kithunga kyethu. Mubabya ng’ab’okw’ingye. Kandi munatsuka erigha e Biblia ya kutsibu. Nabere ng’ongera erigha, ku nanongera indya eriligha ngoku eyi y’ekwenene. Busana n’ekyo, munathwamu erikolera Yehova.”

9. Ni byahi ebikayithayisibawa okw’abo abanzire erisighalha omwa nzira nge?

⁹ Sitani anzire iniakw’iha omwa nzira eyikakolhaya okwa engebe. Anzire iwayiyunga okwa bangyi abali omwa nzira nene “eyikalholhaya okw’ihera.” (Mt. 7:13) Aliwe, ithukendi sighalha omwa nzira nge thwamalholha embere erihulikirira Yesu n’erilhangira enzira eyo ng’obutheya. Neryo thulebaye ekindi kindu ekya Yesu abugha athi thutholere ithwakolha.

10. Ngoku kiri omu Matayo 5:23, 24, ni kyahi ekya Yesu abugha athi thutholere ithwakolha?

¹⁰ Soma Matayo 5:23, 24. Yesu mwakania okwa kindu ekyabya kikulhu embere sy’Abayuda ababya bakamuhulikirira. Thathera akasasani omundu iniane okwa hekalu akanza eriha omuhereri y’obuhere bwiwe bw’ekisoro. Okwa ndambi eyo mundu iniakabya am’ibuka ngoku mulikyabu anamuwithe kw’omwatsi, iniakasighanaya ekisoro ekyo ‘iniaghenda.’ Busana naki? Ni kyahi ekirengire eriha obuhere oku Yehova? Yesu mwabugha ndeke-ndeke athi: “Wughende lhuba oko mulikyenyu, musangane nayu” erihiraho obuholho.

11. Soborera akaghalha ako Yakobo ahiraho erihiraho obuholho na Esau.

¹¹ Thwangan’igha amasomo w’omughaso awahambire okw’ihira h’obuholho omw’ilebya ebyabya omwa ngebe ya Yakobo. Yakobo abere abirighunza emyaka nga 20 iniane haali okwa kihugho ekya abuthirawamu, erilhabira omwa mumalaika, Nyamuhanga mwamubwira athi asubeyo. (Enz. 31:11, 13, 38) Aliwe habya ihane ekitsibu. Mughalha wabu omukulhu ya Esau, abya iniabirianza erimwitha. (Enz. 27:41) Yakobo “mubaha kutsibu, mwakwa buba” athi mughalha wabu anganabya iniakinamubikire kw’ekinigha. (Enz. 32:7) Yakobo mwakolhaki erihira h’obuholho na mughalha wabu? Eky’erimbere, mwasaba Yehova erilhua okwa muthima busana n’omwatsi oyo. Enyuma waho, amathumira Esau y’ekihembo. (Enz. 32:9-15) Erighunzerera, ababya ibabirighabulhana aba babere bakabanangana busu okwa busu, Yakobo mwabya w’erimbere erikangania Esau y’erisikya. Munamira Esau​—butsira murundi mughuma, kutse ibiri, aliwe mirundi musanju! Yakobo mwayikehya, amasikya Esau, amahiraho obuholho na mughalha wabu.​—Enz. 33:3, 4.

12. Eky’erileberyako kya Yakobo kikathweghesayaki?

¹² Thuk’igha erisomo okwa mibere Yakobo ayitheghekeramu erisanga-sangana na mughalha wabu Esau kandi ngoku amuhikira. Omw’iyikehya Yakobo mwasaba Yehova y’obuwathikya. Neryo mwakolha erikwamana n’erisaba liwe omw’ikolha bindu birebe erisubanamu na mughalha wabu. Babere bakabanangana, Yakobo mwathakakalhukana na Esau erianza eriminya oyuhikire n’oyuwire nga y’owahi. Ekilhubirirwa kya Yakobo lyabya iry’erihiraho obuholho na mughalha wabu. Thwanga gherererya thuthi eky’erileberyako kya Yakobo?

13-14. Thutholere ithwakolhaki thwamaponesya omwikirirya mulikyethu?

¹³ Ithwe nga bali omo nzira eyikalholhaya oko ngebe thwanzire ithwahiraho obuholho n’abalikyethu. (Abar. 12:18) Thutholere ithwakolhaki thwamaminya ngoku thwabiriponesya omwikirirya mulikyethu? Nga Yakobo, thutholere ithwasaba Yehova erilhua okwa muthima. Thwangana musaba thuthi atsumule akaghalha kethu ak’erihiraho obuholho na mulikyethu.

¹⁴ Kandi thutholere ithwahiraho obuthuku bw’eriyilebya. Ithwangana yibulya ebibulyo nga bino: ‘Nganayitheghekire erisaba ekighanyiro, n’erihiraho obuholho? Yehova na Yesu ibakendi yowa bathi namabya w’erimbere erihiraho obuholho na mulikyethu?’ Eby’erisubirya byethu byangana leka ithwahulikirira Yesu kandi omw’iyikehya ithwahikira mulikyethu nuku thuhireho obuholho. Omw’eki, ithwangana gherererya eky’erileberyako kya Yakobo.

15. Erighendera okwa musingyi owali omwa Abanya Efeso 4:2, 3 kyanga thuwathikya kithi erihiraho obuholho na mulikyethu?

¹⁵ Thalengekania Yakobo kw’akangania emiyiheko akasanga-sangana na mughalha wabu! Mwanga lhwiririre ebitsibu. Omughulhu thukahikira mulikyethu erighunzaho erithendi yitheghererania, thutholere ithwakikolha omw’iyikehya. (Soma Abanya Efeso 4:2, 3.) Emisyo 18:19 hathi: “Eriwathikya mughalha wabu oyuwabirihalibwa [eriponesibwa] likalire kwilhaba omuyi w’amaaka; n’amahaka ng’aya ali ng’emihomo y’enyumba y’omwami.” Erisaba ekighanyiro omw’iyikehya lyangana leka ithwahiraho obuholho.

16. Ni kindi kyahi ekya thutholere ithwalengekaniako, kandi busana naki?

¹⁶ Kandi thutholere ithwalengekania ndeke okwa bya thukendi bwira mulikyethu kandi nga thukendi bibugha thuthi. Thwamabiriyithegheka, thutholere ithwahikira oyo thwabiriponesya ithune n’ekilhubirirwa ky’erihiraho obuholho. Iniangana tsuka eribugha ebithethutsemesaya. Ikyangana thwolhobera erihithana kutse erianza eriyilhwirako, aliwe mbwino erikolha ekyo iryanahiraho obuholho? Eyihi na hake. Wibuke erihiraho obuholho na mulikyethu kilengire kutsibu erilebya oyuhikire n’oyuwire nga y’owahi.​—1 Kor. 6:7.

17. Eky’erileberyako kya Gilbert kyanga kweghesyaki?

¹⁷ Mughalha wethu oyukahulhawamo Gilbert  mwahiraho akaghalha erihiraho obuholho. Akabugha athi: “Nabya ngwithe erithendi yitheghererania lingyi na mwali waghe. Ahabw’emyaka eyilhabire okw’ibiri, munahiraho akaghalha eribya mw’okwenene n’erikania inganathekene erithoka erithasyabya buholho nayu.” Ni kindi kyahi ekya Gilbert akolha? “Inde nabugha nayu, iningatsuka erisaba n’eriyitheghekera ekyosi-kyosi ekithuwene ekyo angabugha. Munayithagha eribya inganayitheghekire erighanyira. Mun’igha erithendi lhwira okwa bughabe bwaghe, kandi munaminya ngoku olhukwamirwa lhwaghe ly’erihiraho obuholho.” Ni byahi ebyalhwiririramo? Gilbert akabugha athi: “Munabwire, ngathekene busana n’obughuma obwanga withe n’abosi omw’eka yaghe.”

18-19. Thutholere ithwathwamu erikolhaki thwamaponesya mundu mulebe, kandi busana naki?

¹⁸ Neryo kwesi, wutholere iwathwamu kyahi wamaminya ngoku wabiriponesya Omukristayo mulikyenyu? Kwama erihabulha lya Yesu ery’erihiraho obuholho. Bwira Yehova oko mwatsi oyo, kandi yikethere omulimu wiwe abuyirire erikuwathikya eribya oyukahiraho obuholho. Wamakolha ekyo, iwukendi tsema, kandi iwongera erikangania ku wukowa Yesu.​—Mt. 5:9.

¹⁹ Thukasima kundi Yehova akathuha obusondoli obw’olhwanzo erilhabira omu Yesu Kristo, omuthwe w’ekithunga. (Efe. 5:23) Thuthwemu ‘erimwowa’ ngoku abakwenda, ya Petero, Yakobo, na Yoane bakolha. (Mt. 17:5) Thwamabiriminya ngoku thwanga kolha ekyo omw’ihiraho obuholho n’Omukristayo mulikyethu oyo thwabiriponesya. Omw’ikolha ekyo n’erisighalha omo nzira nge eyikalholhaya oko ngebe, ithukendi bana emighisa mingyi lino n’etseme eya kera na kera ey’obuthuku obukasa.