1-2. (a) Batumwa ba kwa Yesu basatu bebakambizhe kuba ka, kabiji baubile byepi? (b) Tusakwisamba pa ka mu uno mutwe?

 KIJIILO kya Lupitailo kya mu mwaka wa 32 C.E. byo kyapwile, batumwa basatu, ko kuba’mba Petelo, Yakoba ne Yoano bamwene kimwesho kya kukumya. Byo bajinga peulu ya mutumba walepesha, kyamweka lubaji lwa mutumba wa Helemone, Yesu waalukile. “Kilungi kyanji kyasamine nobe juba ne bivwalo byanji byatokeletu too nobe kyeya.” (Mat. 17:1-4) Ku mpelo ya kino kimwesho, batumwa baumvwine Lesa saka amba’mba: “Uno ye Mwanami ye natemwa, mo mmwena lusekelo. Mumvwinai.” (Mat. 17:5) Bwikalo bwa bano batumwa basatu bwamwesheshe’mba baumvwijile Yesu. Ne atweba twafwainwa kulondela mu ngayo yabo.

² Mu mutwe wafumako, twafunjile kuba’mba kumvwina jiwi ja kwa Yesu kulumbulula kuleka kuba bintu bimo. Mu uno mutwe, tusakufunda bintu bibiji Yesu byo aambile’mba byo twafwainwa kuba.

3. Kwesakana na byaamba Mateo 7:13, 14, twafwainwa kuba byepi?

³ Tangai Mateo 7:13, 14. Yesu watongwele bibelo bibiji byaya ku mashinda abiji, jishinda “jabaya” ne jishinda “jakatazha kwendamo.” Kechi watongwelepo jishinda ja busatu ne. Twafwainwa kwisajilapo atweba bene jishinda jo tukeba kuyamo. Kino kyo kintu kyanema bingi kyo twafwainwa kufuukulapo, mambo po paimena bumi bwetu bwa myaka ne myaka.

4. Mwakonsha kulumbulula byepi jishinda “jikatampe”?

 ⁴ Twafwainwa kuvulukanga lupusano luji pa ano mashinda abiji. Bantu bavula baji mu jishinda “jikatampe” mambo kechi jakatazha kwendamo ne. Kya bulandatu ke kya kuba’mba bantu bavula basalapo kutwajijila kwenda mu jino jishinda, kabiji balondelatu jibumba ja bantu babena kwendamo. Bakankalwa kuyuka kuba’mba Satana Diabola ye ubena kutundaika bantu kuya mu jino jishinda, kabiji jino jishinda jitwala ku lufu.—1 Ko. 6:9, 10; 1 Yoa. 5:19.

5. Bamo baubile byepi pa kuba’mba bataane jishinda “jakatazha kwendamo” ne kutendeka kwendamo?

⁵ Kupusanako na jishinda “jikatampe,” jishinda jikwabo “jakatazha kwendamo,” kabiji Yesu waambile’mba bejitaana bachechetu. Mambo ka? Mu kyepelo kyalondelapo, Yesu wajimwineko baana banji ba bwanga ku bangauzhi ba bubela. (Mat. 7:15) Bantu bamo bamba’mba kuji bupopweshi bwavula bingi, kabiji bonse bamba’mba bafunjisha bukine. Na mambo a kuba’mba kuji bupopweshi bwavula bingi, bantu bavulañana kya kuba bakankalwa kukeba jishinda jitwala ku bumi. Pano bino, jino jishinda jakonsha kutanwa. Yesu waambile’mba: “Umvwe saka mulama byambo byami, ko kuba’mba mwi baana bami ba bwanga, kabiji mukayuka bukine, ne bukine bukemukasulula.” (Yoa. 8:31, 32) Kyawamakotu ke kya kuba’mba anweba kechi mwalondejile jibumba ne; mwakebele bukine. Mwatendekele kufunda Mambo a Lesa na mukoyo pa kuba’mba muyuke bintu Lesa byo akeba’mba tubenga, kabiji mwaumvwijile mafunjisho a kwa Yesu. Bintu bimo byo mwafunjile ke bya kuba’mba Yehoba ukeba atweba kukana mafunjisho a bupopweshi bwa bubela ne kuleka kusekelela moba a kukookoloka afuma ku bisho bya bupopweshi bwa bubela. Kabiji mwafunjile kuba’mba kuba bintu bikeba Yehoba ne kuleka bisho bimufichisha ku muchima kechi kwapeela ne. (Mat. 10:34-36) Kampe kechi kimupeelejile kupimpula bwikalo bwenu ne. Nangwa byonkabyo, mwatwajijile kwingila na ngovu mambo mwatemwa Shenu wa mwiulu kabiji mukeba kusangajika muchima wanji. Waumvwine bingi bulongo pa kumona byo mwibikileko.—Maana 27:11.

6. Kwesakana na byaamba Salamo 119:9, 10, 45, 133, ñanyi bintu byakonsha kwitukwasha kutwajijila kwenda mu jishinda jakatazha kwendamo?

⁶ Inge twatendeka kwenda mu jishinda jakatazha kwendamo, ñanyi bintu byakonsha kwitukwasha kutwajijila kwenda mu jino jishinda? Langulukai pa kino kifwanyikizho. Mu byalo bimo, kunsa ya mikwakwa yapita pa mitumba babikako byela bya kuzhikijila myotoka ne bendesha myotoka. Abino byela bizhikijila bendesha myotoka kuchina kuba’mba bakendelanga kwapela mukwakwa. Kafwako bantu bejizhanya’mba abino byela byatama mambo bibalengela kubula kuponena munshi ya mutumba ne kwikozha nangwa kufwa ne. Malamuna a Yehoba aji mu Baibolo ajitu nobe bino byela byo babika kwapela mukwakwa. Ano malamuna etukwasha kutwajijila kwenda mu jishinda jakatazha kwendamo.—Tangai Salamo 119:9, 10, 45, 133.

7. Banyike bafwainwa kumonanga byepi jishinda jakatazha kwendamo?

⁷ Anweba banyike, abya bimye bimo mumona nobe malamuna a Yehoba emulengela kubula kuba bintu byo mukeba kuba mu bwikalo bwenu nyi? Ino yo milanguluko Satana yo akeba’mba mwikale nayo. Ukeba’mba mute muchima pa bintu bibena kuba boba babena kwenda mu jishinda jabaya, mambo bamweka nobe babena kwiyowa bwikalo. Wakonsha kwingijisha bintu byuba bakwenu pa sukulu nangwa byo mumona pa Intaneti  kwimulengela kumvwa nobe mubena kushalapo bintu bileta lusekelo. Satana ukeba’mba mulangulukenga’mba malamuna a Yehoba abena kwimulengela kubula kwiyowa bwikalo. * Bino vulukainga kino: Satana kechi ukeba’mba bantu babena kwenda mu jishinda janji bayuke kintu kikebamwekela kulutwe ne. Pakuba Yehoba aye wimubuula bintu byo anengezhezha boba batwajijila kwenda mu jishinda jaya ku bumi.—Sala. 37:29; Isa. 35:5, 6; 65:21-23.

8. Banyike bakonsha kufunjilako ka kwi Olaf?

⁸ Langulukai pa byo mwakonsha kufunjilako ku mulongo ukitwala wa jizhina ja Olaf. * Bakwabo mo bafunjilanga sukulu bamukanjikizhenga kuba’mba atendeke kuba bulalelale. Byo ebalumbulwijile kuba’mba Bakamonyi ba kwa Yehoba balondela malamuna a mu Baibolo aamba pa byubilo byawama, bansongwakazhi  bamo bakizhizhemo ne kukizhamo kumujimbaika kuba’mba alaale nabo. Bino Olaf watwajijile kukosa. Kabiji luno kechi lo lweseko lonkatu lo apichilemo ne. Olaf waambile’mba: “Bafunjishi pa sukulu bantundaikilenga’mba nkaye na kufunda pa sukulu mukatampe pa kuba’mba nkatumbalale. Bambuujile kuba’mba inge nabula kuya ku sukulu mukatampe, kechi nkatwela nkito yawama ne.” Ñanyi kintu kyakwashishe Olaf kushinda ano meseko? Waambile’mba: “Naikele na bulunda bwakosa na balongo ne banyenga bajinga mu kipwilo kyetu. Bajingatu nobe kisemi kyami. Kabiji natendekele kuteshako bingi muchima kufunda Baibolo. Kuchikamenamo kufunda Baibolo kwankwashishe kushiinwa kuba’mba buno bo bukine. Kyafuminemo, nafuukwilepo kutwajijila kwingijila Yehoba.”

9. Aba bakeba kutwajijila kwenda mu jishinda jakatazha kwendamo bafwainwa kuba byepi?

⁹ Satana ukeba’mba musendukemo mu jishinda ja ku bumi. Ukeba’mba mutendeke kwendela pamo na bantu bavula baji mu jishinda jikatampe ‘jitwala ku lonaiko.’ (Mat. 7:13) Nangwa byonkabyo, tukatwajijila kwenda mu jishinda jakatazha kwendamo inge twatwajijila kumvwina Yesu ne kumona jino jishinda amba luzhikijilo lwetu. Pano twayai twisambe pa kintu kikwabo Yesu kyo aambile’mba kyo twafwainwa kuba.

10. Kwesakana na byaamba Mateo 5:23, 24, Yesu waambile’mba twafwainwa kuba byepi?

¹⁰ Tangai Mateo 5:23, 24. Yesu waambile pa kintu kyanemene bingi ku Bayudea bamutelekelenga. Fwanyikizhai kuba’mba muntu wafika pa nzubo ya Lesa kabiji winengezha kupana nyama wanji wa kitapisho ku ñanga. Umvwe pa kyonkakyo kimye wavuluka kuba’mba uji na mambo na mulongo wanji, wafwainwe kusha mulambo wanji ne kuya. Mambo ka? Ñanyi kintu kyanemene kukila kupana mulambo kwi Yehoba? Yesu walumbulwile’mba: “Patanshi kapwane na mulongo wobe.”

11. Lumbululai bintu byaubile Yakoba pa kuba’mba apwane ne Isao.

¹¹ Twakonsha kufunda lufunjisho lwanema bingi ku kintu kyamwekele mu bwikalo bwa mushakulu Yakoba. Yakoba wafumine ku kyalo ko asemekejilwe ne kuya na kwikala ku kyalo kingi pa myaka 20. Byo ajinga kokwa, Lesa kupichila mwi malaika wamukambizhe kubwela kwabo. (Nte. 31:11, 13, 38) Pano bino, pajinga lukatazho. Kolojanji aye Isao wakebelenga kumwipaya. (Nte. 27:41) Yakoba “waakaminwe bingi ne kukakilwa” kuba’mba kolojanji watwajijila kumubila mfika ne kumuzhingijila. (Nte. 32:7) Yakoba waubile byepi pa kuba’mba apwane na kolojanji? Kitanshi, walombelepo na mukoyo kwi Yehoba pa luno lukatazho. Kabiji watumijile Isao bupe bwavula bingi. (Nte. 32:9-15) Kepo bano bankasa ne kolo byo bamonañene kilungi na kilungi, Yakoba wamwesheshe mushingi kwi Isao. Wafukamine kwi Isao, kechi jimotu ne, bino bimye bitanu na bibiji. Na mambo a kwipelula ne kumwesha mushingi, Yakoba wapwaine na kolojanji.—Nte. 33:3, 4.

12. Tufunjilako ka ku byaubile Yakoba?

¹² Tufunjilako lufunjisho lwanema bingi kwi Yakoba byo anengezhezhe bintu saka akyangye kumonañana ne Isao, ne byo aubile kimye kyo afikile kwajinga uno kolojanji. Yakoba wipelwile ne kulomba bukwasho kwi Yehoba. Kepo aubijile bintu monka mwayijile lulombelo lwanji kupichila mu kubapo bintu bimo pa kuba’mba kimye kyo akamonañana na kolojanji pakekale mutende. Bano bankasa ne kolo byo bamonañene, Yakoba kechi waambile pa watamishe ne wabujile kutamisha pe aye ne Isao ne. Yakoba kyo akebelenga ke kupwana ne  kolojanji. Twakonsha kulondela byepi byaubile Yakoba?

13-14. Inge twazhingijisha mukwetu wa mu lwitabilo, twafwainwa kuba byepi?

¹³ Atweba tubena kwenda mu jishinda jaya ku bumi, twafwainwa kwikalanga mu mutende na balongo mu kipwilo. (Loma 12:18) Twakonsha kuba byepi inge twayuka’mba twazhingijisha mukwetu wa mu lwitabilo? Byonka byaubile Yakoba, twafwainwa kulomba na muchima yense kwi Yehoba. Twakonsha kumulomba kwitukwasha kupwana na mulongo wetu.

¹⁴ Kabiji twafwainwa kwikalapo na kimye kya kulanguluka pa byubilo byetu. Twakonsha kwishikisha mepuzho nabiji ano: ‘Nanchi naswa kuba’mba natamishe kabiji nafwainwa kwipelula ne kulomba lulekelo lwa mambo, ne kupwana na mukwetu nyi? Yehoba ne Yesu bakomvwa byepi inge natendekelapo kuya na kupwana na mulongo wami nangwa nyenga?’ Mikumbu ya ano mepuzho yakonsha kwitutundaika kumvwina Yesu ne kwipelula ne kuya na kwisamba na mukwetu wa mu lwitabilo pa kuba’mba tupwane. Umvwe twauba bino, ko kuba’mba tubena kulondela byaubile Yakoba.

15. Kwingijisha jifunde jiji pa Efisesa 4:2, 3 kwakonsha kwitukwasha byepi kupwana na mulongo wetu?

¹⁵ Fwanyikizhai kyakonsheshe kumweka inge kya kuba Yakoba wilundumikile pa kuya na kwisamba na kolojanji. Inge mwafumine bintu byatama bingi. Inge twaya ku mulongo na kupwana, twafwainwa kuba bino na muchima wa kwipelula. (Tangai Efisesa 4:2, 3.) Byambo bya Maana 18:19 byaamba’mba: “Mulongo ye bazhingijisha wakatazha kumufwomona, kukila ne muzhi uji na nsakwa yakosa, kabiji lutobo lwikala nobe mipingilo ya nsakwa yakosa.” Umvwe twalomba lulekelo lwa mambo ku muntu ye twalubankenye, kikamukwasha kuswa kubwezha mutende ne atweba.

16. Ñanyi kintu kyo twafwainwa kulangulukishapo, kabiji mambo ka?

¹⁶ Kabiji twafwainwa kulangulukishapo pa byo tukamba ku mulongo wetu ne jishinda jo tukebyambilamo. Inge twamona’mba twinengezha, twafwainwa kuya na kwisamba na ye twazhingijishe pa kuba’mba atontoloke. Kimye kitanshi, wakonsha kwamba byambo byabula kufwainwa. Kyapeela bingi kuzhingila nangwa kweseka kwikangaizha pa kintu kyo twaubile, bino nanchi kuba bino kwakonsha kuleta mutende nyi? Ine mwane ne. Vulukainga kuba’mba kupwana na mulongo wenu kwanema  kukila kwamba pa walubankenye ne wabujile kulubankanya.—1 Ko. 6:7.

17. Mwakonsha kufunjilako ka ku byaubile ba Gilbert?

¹⁷ Mulongo wa jizhina ja Gilbert waingijile na ngovu pa kuba’mba ekalenga mu mutende na bakwabo. Washimikizhe’mba: “Najinga na makatazho avula bingi na umo mu kisemi kyami. Kukila pa myaka ibiji, naesekele na ngovu kwisamba ne aye mu mutende pa kuba’mba tupwane.” Ñanyi kintu kikwabo kyaubile ba Gilbert? Baambile’mba: “Saka nkyangye kwamba na uno wa mu kisemi, nalombanga ne kunengezha milanguluko yami kuba’mba mbule kuzhingila inge wañambila byambo byabula kufwainwa. Nenengezhezhanga jimo kulekela mambo. Nafunjile kuba’mba kechi nafwainwa kwibingisha ne, kabiji nayukile kuba’mba mwingilo wami wajinga wa kubwezha mutende.” Ki ka kyafuminemo? Ba Gilbert baambile’mba: “Lelo jino, nji na mutende wa mu milanguluko mambo mbena kwikala mu mutende na bonse ba mu kisemi kyami.”

18-19. Inge twazhingijisha mukwetu, twafwainwa kuba byepi, kabiji mambo ka?

¹⁸ Mwafuukulapo kuba byepi inge kya kuba mwayuka’mba mwazhingijisha mukwenu mwina Kilishitu? Londelai mukambizho wa kwa Yesu wa kupwana. Lombai kwi Yehoba pa lo lo lukatazho, kabiji ketekelai mupashi wanji wazhila kwimukwasha kupwana. Umvwe mwauba bino, mukekala na lusekelo, kabiji kikamwesha’mba mubena kumvwina Yesu.—Mat. 5:9.

¹⁹ Tusanchila bingi Yehoba pa kwitutangijila mu butemwe kupichila mu “mutwe wa kipwilo,” Yesu Kilishitu. (Efi. 5:23) Twayai tutwajijile ‘kumumvwina,’ byonkatu byaubile batumwa basatu, Petelo, Yakoba, ne Yoano. (Mat. 17:5) Twafunda byo twakonsha kuba pa kuba’mba tupwane inge twazhingijisha mukwetu mwina Kilishitu. Kupichila mu kuba bino ne kutwajijila kwenda mu jishinda jakatazha kwendamo, tukatambula mapesho avula ne kwikala na lusekelo lwa myaka ne myaka.