1-2. (a) Yinki Nzambi zabisaka bantumua tatu ya Yesu basala, mpe basadilaka ntumu yango? (b) Yinki beto ketadila na disolo yayi?

NA MANIMA ya Paki ya mvula 32 N.B., ntumua Petelo, Yakobo mpe Yoane, vuandaka bambangi ya mbona meso mosi ya kukamua. Na zulu ya mongo mosi ya yinda, mbala yankaka yalenda vuanda kitini ya mongo ya Hermoni, Yesu kitukaka na ntuala na bau. ‘Yilungi na yandi vuandaka kulezima lokola ntangu, mpe bilele na yandi ya zulu kumaka kulezima lokola ntemo.’ (Mat. 17:1-4) Ntangu mbona meso yango vuandaka kuma na nsuka na yau, bantumua kuwaka Nzambi metuba: ‘Yayi Muana na munu, yina munu kezolaka mingi, yina munu mendima. Beno kuwa yandi.’ (Mat. 17:5) Bantumua yango tatu monisaka na luzingu na bau ya mvimba ti bavuandaka kuwa Yesu. Beto kele na nsatu ya kulanda kifuani na bau.

² Na disolo yina lutaka, beto longukaka ti kuwa ndinga ya Yesu zola monisa kubika kusala mambu yankaka. Na disolo yayi, beto ketadila mambu zole yina Yesu tubaka ti beto fueti sala.

3. Na kutadila Matayo 7:13, 14, yinki beto fueti sala?

³ Tanga Matayo 7:13, 14. Kuzimbakana ve ti Yesu tubilaka baporte zole ya kusuasana yina kena kunata na banzila zole ya kusuasana, nzila ya “nene” mpe nzila ya ‘dikaka.’ Banzila kele tatu ve. Beto fueti pona samu na beto mosi nzila yina beto ketambudila. Yakele nzengolo mosi ya mfunu kuluta beto fueti baka—samu mosi kaka kati na banzila yango kena kunata na luzingu ya mvula na mvula.

4. Yinki mutindu nge lenda sasila nzila ya “nene”?

 ⁴ Beto fueti lunda na makanisi lusuasanu yina kele kati na banzila yango zole. Bantu mingi kele na nzila ya “nene” samu yakele pete samu na kutambula na yau. Diambu ya kiadi, bantu mingi kena kupona kubikana na nzila yango mpe bakena kulanda kimvuka ya bantu yina kena kutambula na yau. Bakena kuzaba ve ti Satana Diabulu kena kutinda bantu bakota na nzila yango mpe nzila yango kena kunata na lufua.—1Bk. 6:9, 10; 1Yn 5:19.

5. Yinki bangolo bantu yankaka salaka samu na kumona nzila ya ‘dikaka’ mpe samu na kubanda kutambula na yau?

⁵ Na lusuasanu na nzila ya “nene,” nzila yankaka kele ya ‘dikaka,’ mpe Yesu tubaka ti bantu fioti kaka kele na dikoki ya kumona yau. Samu na yinki? Diambu ya kiese, na verse melanda Yesu kena kukebisa banlonguki na yandi samu na bambikudi ya luvunu. (Mat. 7:15) Bantu yankaka ketubaka ti yakele na mafunda ya mabundu, mpe mingi kati na yau ketubaka ti bakelongaka kedika. Lokola mabundu kele mingi, bantu mingi kena kulemba nzutu to bakena kuzaba ve dibundu ya kedika mpe bakena kumeka kutu ve kusosa nzila yina kena kunata na luzingu. Kasi dikoki ya kumona nzila yango kele. Yesu tubaka: ‘Kana beno mebikana na mpova na munu, beno kele mpenza banlonguki na munu, mpe beno kezaba kedika, mpe kedika kepesa beno kimpuanza.’ (Yoa. 8:31, 32) Diambu ya kiese kele, nge landaka ve kimvuka ya bantu kasi nge sosaka nde kedika. Nge bandaka kulonguka na mpinda Mpova ya Nzambi samu na kuzaba mambu yina yandi kelombaka beto, mpe nge kuwaka malongi ya Yesu. Na kati ya mambu yango yankaka, nge longukaka ti Yehova kena kulomba beto beto manga malongi ya mabundu ya luvunu mpe beto lemba kusala bafeti yina mekatuka na mimeseno ya bapayen. Nge longukaka diaka ti yalenda vuanda mpasi kusala mambu yina Yehova kena kulomba mpe kubika mambu yina yandi keyinaka. (Mat. 10:34-36) Mbala yankaka yavuandaka pete ve samu na nge kusala bansobolo yina kelombamaka. Kasi nge tatamanaka kusala bansobolo samu nge kezolaka Tata na nge ya dizulu mpe nge kele na nsatu ya kusepedisa yandi. Yandi sepelaka mpenza na nge!—Bin. 27:11.

6. Na kutadila Nkunga 119:9, 10, 45, 133, yinki lenda sadisa beto beto bikana na nzila ya dikaka?

⁶ Ntangu kaka beto mebanda kutambula na nzila ya dikaka, yinki lenda sadisa beto beto bikana na yau? Beto tadila kifuani yayi. Kanisa ntete mua mapangu ya bisengo (garde-fou) yina baketulaka pembeni pembeni ya mongo samu na kutanina shofere mpe ntomabilu na yandi. Mua mapangu yango mesalamaka samu na kutanina luzingu ya bashofere—yakesadisaka bau babika pusana pembeni pembeni ya banzila. Muntu mosi ve ketuba ti mapangu yango kena tula bau dikaka samu na kutambula mbote na nzila to mpe samu na kuluala to kufua! Bansikudukusu ya Yehova yina kele na Biblia kele lokola mapangu yango. Bansikudukusu na yandi kesadisaka beto beto bikana na nzila ya dikaka.—Tanga Nkunga 119:9, 10, 45, 133.

7. Yinki mutindu bantuenia fueti tadila nzila ya dikaka?

⁷ Bantuenia, na bantangu yankaka beno kekanisaka ti bansikudukusu ya Yehova kele mpasi? Satana kele na nsatu beno kanisa nde mutindu yina. Yandi kele na nsatu beno tula dikebi na mambu yina bantu yina ketambulaka na nzila ya nene kena kusala, samu yakemonanaka lokola bakele na luzingu ya mbote. Yandi zola beno kanisa ti beno kele na luzingu ya kiese ve mutindu yakena kumonana na bankundi na beno ya kalasi to na bantu yina beno kena kumona na Internet. Satana zola beno kanisa ti  bansikudukusu ya Yehova kena kupekisa beno beno sadila luzingu mutindu beno fueti sadila yau. * Kasi kuzimbakana ve diambu yayi: Satana zola ve ti bantu yina kena kutambula na nzila na yandi bamona diambu yina kena kuvingila bau na nsuka. Kasi Yehova zola nge zaba mutindu luzingu na nge kevuanda ya mbote kana nge mebikana na nzila ya luzingu.—Nk. 37:29; Yez. 35:5, 6; 65:21-23.

8. Yinki dilongi bantuenia lenda baka na kifuani ya Olaf?

⁸ Tala dilongi yina nge lenda baka na disolo ya mpangi mosi ya bakala ya ntuenia na nkumbu ya Olaf. * Bankundi na yandi ya kalasi vuandaka tula yandi mbamba samu yandi sala pite. Ntangu yandi sasilaka ti Bambangi ya Yehova kezitisaka malongi ya Biblia yina metadila bikadulu ya mbote na luzingu na bau, bankundi na yandi yankaka ya kalasi ya banketo mekaka kutinda yandi na kingolo yandi sangisa nzutu na bau. Kasi Olaf kangamaka na mambu yina  kele mbote. Mpe yau kaka ve diambu ya mpasi yandi vuandaka kutana na yau. Olaf metuba: “Banlongisi na munu vuandaka tula munu mbamba ti munu tanga iniversite samu yau kesala ti bantu yankaka pesa munu lokumu. Bavuandaka zabisa munu ti kana munu tanga iniversite ve munu kebaka ve kisalu ya mbote mpe luzingu na munu kevuanda na kiese ve.” Yinki sadisaka Olaf yandi nunga mbamba yina? Yandi metuba: “Munu salaka kinkundi ya ngolo na bampangi ya kimvuka na munu. Bakumaka lokola bantu ya dibuta na munu. Munu bandaka diaka kulonguka Biblia mingi. Lokola munu vuandaka tanga mingi, munu kumaka kundima mingi ti yakele kedika. Yau salaka ti munu baka nzengolo ya kusadila Yehova.”

9. Yinki melombama na bantu yina zola kubikana na nzila ya dikaka?

⁹ Satana kele na nsatu ya kukatula nge na nzila yina kena kunata na luzingu. Yandi kele na nsatu nge sala mambu yina bantu mingi kesalaka mpe nge tambula na nzila ya nene yina ‘kenataka na lufua.’ (Mat. 7:13) Kasi, beto kebikana na nzila ya dikaka kana beto kena kutatamana kuwa Yesu mpe beto kena kutadila nzila yango lokola lutanunu. Bika beto tadila diambu yankaka yina Yesu tubaka beto fueti sala.

10. Na kutadila Matayo 5:23, 24, yinki Yesu tubaka beto fueti sala?

¹⁰ Tanga Matayo 5:23, 24. Yesu tubilaka diambu mosi yina vuandaka na mfunu samu na Bayuda yina vuandaka kuwa yandi. Kanisa ntete muntu mosi na tempelo yina kele ya kukubama samu na kupesa kibulu na Nganga-nzambi ya nene samu yandi pesa nkayilu. Kana na ntangu yango kaka muntu yango mebambuka ti yandi kele na diambu na mpangi mosi, yalombaka yandi bika nkayilu mpe “yandi kuenda.” Samu yavuandaka na diambu yina meluta mfunu lombamaka kusala tekila yandi pesa dikabu na Yehova. Yesu tubaka puelele ti: ‘Ntete tula kiyenge na mpangi na nge.’

11. Yinki bangolo Yakobi salaka samu na kutula kiyenge na Ezau?

¹¹ Beto lenda baka malongi ya mbote na diambu metadila kutula kiyenge na kutadila mambu yina salamaka na luzingu ya Yakobi. Na manima ya kubika buala na yandi bamvula 20, Nzambi zabisaka Yakobi na nzila ya mbasi ti yandi vutuka. (Kuy. 31:11, 13, 38) Kasi yavuandaka na diambu mosi. Mpangi na yandi ya mbuta, Ezau, zolaka kufua yandi. (Kuy. 27:41) Yakobi vuandaka ‘banga mpe kukitungisa’ ti mpangi na yandi vuandaka kaka na nganzi samu yandi. (Kuy. 32:7) Yinki Yakobi salaka samu na kutula kiyenge kintuadi na mpangi na yandi? Ya ntete, yandi sambilaka Yehova na ntima na yandi ya mvimba samu na diambu yango. Na manima, yandi tindilaka Ezau dikabu. (Kuy. 32:9-15) Na nsuka, ntangu yandi monaka Ezau, Yakobi bakaka bankubukulu samu na kupesa yandi lokumu. Yandi fukamaka na ntuala ya Ezau—kaka mbala mosi ve, mbala zole ve, kasi mbala 7! Yakobi vuandaka na kumikitisa mpe yandi monisaka luzitu na Ezau, mpe yandi tulaka kiyenge kintuadi na mpangi na yandi.—Kuy. 33:3, 4.

12. Yinki dilongi beto mebaka na kifuani ya Yakobi?

¹² Beto mebaka dilongi na mutindu Yakobi kubamaka samu na kukutana na mpangi na yandi mpe mutindu yandi pusanaka na ntadisi ya Ezau. Yakobi lombaka lusadusu na Yehova na kumikitisa nionso. Na manima yandi monisaka ti yandi salaka mambu yina vuandaka na nguizani na kisambu na yandi na kusalaka nionso yina yandi lenda samu na kutula kiyenge na mpangi na yandi. Ntangu bakutanaka, Yakobi tubaka ve na Ezau ti nani salaka muninga mambu ya mbote mpe nani vuandaka na foti. Lukanu ya Yakobi vuandaka ya kutula kiyenge na  mpangi na yandi. Yinki mutindu beto lenda landa kifuani ya Yakobi?

13-14. Kana beto mesala diambu mosi yina mesala mpangi na beto na kimvuka mpasi, yinki beto fueti sala?

¹³ Kana beto zola tambula na nzila yina kena kunata na luzingu, beto fueti tula kiyenge na bampangi na beto. (Bar. 12:18) Yinki beto fueti sala kana beto mebakusa ti beto mesala diambu mosi yina mesala mpangi na beto na kimvuka mpasi? Mutindu mosi na Yakobi, beto fueti sambila Yehova na ntima ya mvimba. Beto lenda lomba yandi yandi sakumuna bangolo yina beto kesala samu na kutula kiyenge na mpangi na beto.

¹⁴ Beto fueti baka diaka ntangu ya kukitadila. Beto lenda kukiyuvusa biuvu lokola yayi: ‘Munu kele pene ya kundima foti, kulomba nlemvo na kumikitisa nionso, mpe kutula kiyenge? Yinki mutindu Yehova mpe Yesu kekukimona kana munu mebaka dibanza ya kutula kiyenge kintuadi na mpangi na munu ya bakala to ya nketo?’ Bamvutu na beto lenda tinda beto beto kuwa Yesu mpe beto pusana na kumikitisa nionso na ntadisi ya mpangi na beto ya kimvuka samu na kutula kiyenge. Na kusalaka mutindu yina, beto lenda landa kifuani ya Yakobi.

15. Yinki mutindu kusadila nsikudukusu yina kele na Baefezo 4:2, 3 lenda sadisa beto beto tula kiyenge na bampangi na beto?

¹⁵ Kanisa ntete kana Yakobi monisaka lulendo ntangu yandi kutanaka na mpangi na yandi! Kukutana na bau zolaka suka yimbi. Kana beto mekuenda na mpangi na beto samu na kutula kiyenge, beto fueti monisa kikadulu ya kumikitisa. (Tanga Baefezo 4:2, 3.) Bingana 18:19 metuba: ‘Mpangi yina bamesala yimbi kekumaka na mambu ya ngolo kuluta mbanza ya ngolo, mpe kuzonza yankaka kele lokola bayinti yina bakekangilaka bayinzo ya ngolo.’ Kana beto menlemvukila muntu, yalenda sadisa yandi yandi vuanda pene ya kutula kiyenge kintuadi na beto.

16. Yinki mambu beto fueti kanisa, mpe samu na yinki?

¹⁶ Beto fueti tula diaka dikebi na mambu yina beto ketuba na bampangi na beto mpe mutindu beto ketubila yau. Kana beto mekubama, beto fueti kuenda solola na mpangi yina kele na mpasi na ntima, na lukanu ya kusadisa yandi yandi vutula diaka nguizani ya mbote na beto. Na ebandeli, yandi lenda tuba diambu mosi yina lenda sala beto mpasi. Yalenda vuanda  pete samu beto fuema to beto meka kukinungisa, kasi kusala mutindu yina kesala ti kiyenge salama? Ata fioti ve. Kuzimbakana ve ti kutula kiyenge na mpangi na nge kele na mfunu kuluta kusosa kuzaba nani salaka diambu ya mbote to nani kele na foti.—1Bk. 6:7.

17. Yinki dilongi nge lenda baka na kifuani ya Gilbert?

¹⁷ Mpangi mosi ya bakala na nkumbu ya Gilbert salaka ngolo samu na kuvuanda muntu yina ketulaka kiyenge. Yandi metuba: “Munu vuandaka lutisa ntangu mosi ya mpasi kintuadi na muana na munu ya nketo. Banda bamvula zole, munu vuandaka sala ngolo samu na kusolola na yandi na kukuikama mpe na kimpombo na lukanu ya kuvutula nguizani ya mbote.” Yinki diambu yankaka Gilbert salaka? “Konso ntangu yina beto vuandaka solola, munu vuandaka sambila, mpe munu vuandaka kukibambula ti munu fueti kukitungisa ve kana yandi metuba diambu mosi ya yimbi samu na munu. Munu fueti vuanda pene ya kunlemvukila. Munu zabaka ti munu fueti meka ve kumonisa ti munu ve kele na foti mpe kiyekua na munu vuandaka ya kutula nde kiyenge.” Yinki mambote yabimisaka? Gilbert metuba: “Bubu yayi, munu kele na kiyenge na makanisi samu na nguizani ya mbote yina munu kele na yau na bantu nionso ya dibuta na munu.”

18-19. Kana beto luadisaka muntu mosi, beto fueti vuanda na nzengolo ya kusala yinki, mpe samu na yinki?

¹⁸ Na yau, yinki fueti vuanda nzengolo na nge kana nge mebakusa ti nge salaka mpangi mosi na kimvuka mpasi? Landa lutuadusu ya Yesu ya kutula kiyenge. Sambila Yehova samu na diambu yango, mpe lomba mpeve ya nlongo na yandi yasadisa nge nge vuanda muntu yina ketulaka kiyenge. Kana nge mesala mutindu yina, nge kevuanda na kiese mpe nge kemonisa ti nge kena kuwa Yesu.—Mat. 5:9.

¹⁹ Beto kele na butondi na Yehova samu na lutuadusu ya nzola yina yandi kena kupesa beto na nzila ya ‘mfumu ya kimvuka,’ Yesu Klisto. (Efe 5:23) Mutindu mosi na ntumua Petelo, Yakobo, mpe Yoane, beto lenda baka nzengolo ya ‘kuwa yandi.’ (Mat. 17:5) Beto mekatuka tadila mutindu beto lenda sala samu na kutula kiyenge kintuadi na bampangi na beto Baklisto yina salaka beto mpasi. Na kusalaka plina mpe na kubikanaka na nzila ya dikaka yina kena kunata na luzingu, beto kebaka balusakumunu mingi bubu yayi mpe na bilumbu kena kuiza beto kevuanda na kiese yina mekondua nsuka.