1-2. (a) Adieyi Nzambi kakanikina antumwa tatu za Yesu mu vanga? Nga bavanga wo kikilu? (b) Nkia mambu tulongoka mu longi diadi?

VAVA kiavioka e lambu dia Nduta muna mvu wa 32 wa Tandu Kieto, Petelo, Yakobo ye Yoane wa ntumwa bamona e mona-meso. Ekolo bakala vana mongo andá, nanga vana Mongo a Keremone, Yesu wakituka vana bakala. “E ndose andi ikezimini nze ntangwa, e mvuatu miandi mivuidi kezima nze ntemo.” (Mat. 17:1-4) Vitila e mona-meso kiafokoka, antumwa bawá nding’a Nzambi vava kavova vo: “Ndioyo i Mwan’ame anzolwa, ona iyangalelanga. Nunwila.” (Mat. 17:5) I diau kikilu bavanga antumwa tatu awaya. Yamuna lufwa lwau, basonga muna zingu kiau vo Yesu bawilanga. Oyeto mpe tuzolele tanginina mbandu au.

² Muna longi diaviokele, twalongokele vo owila nding’a Yesu divavanga vo twayambula vanga maka mambu. Mu longi diadi, tulongoka mambu mole mana Yesu kavova vo tufwete vanga.

3. Landila e sono kia Matai 7:13, 14, adieyi tufwete vanga?

³ Tanga Matai 7:13, 14. Muna sono kiaki Yesu mielo miole kayika mifilanga mu nzila nzole zaswaswana. E nzila imosi ‘yasanzuka,’ yankaka “yamfinangani.” Yesu kayika nzila yantatu ko, nzila zole kaka. Konso muntu mu yeto kafwete sola e nzila kekangalela. Ezazi i nzengo zisundidi o mfunu tufwete baka, avo moyo a mvu ya mvu tuzolele vua.

4. Aweyi tulenda sasila e nzila ‘yasanzuka’?

⁴ Diambote twasungamenanga vo e nzila zole zazi zaswaswanana kikilu. Wantu ayingi besolanga e nzila ‘yasanzuka’  kadi yasazu mu kangalela yo. Diankenda mu mona vo ayingi muna wantu awaya, bazolele kwamanana kangalela mu nzila yayi yo tanginina mavangu ma awana bekangalelanga mo. Kansi, ke bebakulanga wo ko vo e nzila yayi ya Satana wa Nkadi ampemba ye ku lufwasu kaka ifilanga.—1 Kor. 6:9, 10; 1 Yoa. 5:19.

5. Adieyi wantu ayingi bavanga muna solola e nzila “yamfinangani” yo kangalela mo?

⁵ Kansi e nzila ‘yasanzuka’ yaswaswana kikilu ye nzila “yamfinangani.” Kadi Yesu wavova vo akete kaka bekangalela mo. Ekuma? Mu kuma kia ngunza zaluvunu. I dianu Yesu kalukisila alandi andi muna Matai 7:15. Akaka bevovanga vo vena ye mafunda ye mafunda ma mabundu ye mabundu mama mawonso mevovanga vo ludi melonganga. Muna kuma kiaki, wantu ayingi bekatikisanga malongi melongwanga muna mabundu mama yo yambula nkutu vava e nzila ifilanga ku moyo a mvu ya mvu. Kansi balenda kwau solola e nzila yayi. Yesu wavova vo: “Avo nusikila muna diambu diame, nu alongoki ame kieleka, nuzaya e ludi, e ludi kikunuvevola.” (Yoa. 8:31, 32) Avo wasolwele kala e ludi yo lembi landa e ndonga, diambote kikilu wavangidi. Watomene longoka e Bibila yo bakula dina Nzambi kevavanga kwa ngeye. Muna mpila yayi wayantikidi wila nding’a Yesu. Walongokele vo Yave ovavanga vo wavenga malongi ma mabundu maluvunu yo yambula kembelela nkinzi ke mina ngwizani ko ye nkanikinu mia Bibila. Wabakwidi mpe vo oyambula e mambu mama yo yangidika Yave ke diasazu ko. (Mat. 10:34-36) Nanga diampasi diakedi kwa ngeye mu vanga e nsobani zazi. Kana una vo i wau, wavangidi e nsobani zazi kadi Yave wa Se diaku dia zulu ozolanga ye ntim’andi ozolele yangidika. Kieleka, Yave otoma yangalalanga mu kuma kiaku.—Nga. 27:11.

6. Landila e sono kia Nkunga 119:9, 10, 45, 133, nki kikutusadisa mu kwamanana muna nzila yambatakani?

⁶ Nki kikutusadisa mu kwamanana kangalela muna nzila yambatakani? Badika e nona eki. Muna zunga yankaka, wantu bavanga e nzila yabatakana vana miongo muna muviokelanga makalu. Dianu vo, besianga e nkaku vana mbel’a nzila zazi muna tanina makalu muna sumbula. Kondwa kwa nkaku miami, anati a makalu balenda vengomoka muna nzila yo bwila e sumbula. Kansi, ke vena nati a kalu ko olenda vova vo e nkaku miami ke mina kwandi mfunu ko ye mvuanga mitwasanga. Diau dimosi mpe, e nkanikinu mia Yave milenda tezaneswa ye nkaku miami. Mikututaninanga kimana twakwamanana muna nzila yambatakani.—Tanga Nkunga 119:9, 10, 45, 133.

7. Aweyi aleke bafwete badikilanga e nzila yambatakani?

⁷ Aleke, nga ezak’e ntangwa numonanga vo e nkanikinu mia Yave luvevoko lweno mikakidilanga? I diau kikilu Satana kazolele vo nuayindula. Satana ozolele nuayindula vo diambote mu kangalela muna nzila yasanzuka ina wantu awonso balenda vangila konso diambu bazolele. Satana osadilanga akweno a sikola ye internete muna kunufila mu yindula vo ke luna sadila zingu kieno mu mpila yambote ko. Ozolele nuayindula vo e nkanikinu mia Yave, kiese kieno mikakidilanga. * Kansi, nusungamenanga e diambu edi: Satana kazolele ko vo awana bekangalelanga mu nzila yasanzuka bazaya mana mekubavingilanga kuna mfoko a nzila yayi. Kansi,  Yave waswaswana. Ozolele vo wazaya e zingu kiambote okala kiau avo okwamanene kangalela muna nzil’a moyo.—Nku. 37:29; Yes. 35:5, 6; 65:21-23.

8. Adieyi aleke balenda longoka muna nona kia mpangi Olaf?

⁸ Tala dina diabwila mpangi Olaf * una vo nleke. Akaka muna akwandi a sikola bankomekenanga kimana kata e zumba ye wan’a ndumba kuna sikola. Vava kasasila vo yandi Mbangi a Yave ye nkanikinu mia Bibila kalemvokelanga, akaka muna wan’a ndumba zazi bayantika nkutu vanga mawonso kimana mpangi Olaf kavukana yau. Kansi, mpangi Olaf wasikila ye kwikizi, kabwa muna ntonta zazi ko. Kuna kwalanda, mpangi Olaf wawanana diaka ye ntonta zankaka. Wavova vo: “Alongi ame mpe kuna sikola bankomekenanga vo yatanga sikola zandá kimana wantu batoma kunzitisa yo kala ye zingu kiambote.” Nki kiasadisa mpangi Olaf mu zizidila e ntonta zazi? Wavova vo: “Yavanga kikundi ye mpangi zayingi muna nkutakani ana bakituka se yitu yame. Yayantika mpe longoka Bibila  una ufwene. Konso ntangwa yatoma longokanga e Bibila, yakalanga ye ziku vo mu ludi ngina. Muna kuma kiaki, yabaka e nzengo za kwamanana sadila Yave.”

9. Adieyi tufwete vanga avo tuzolele kwamanana muna nzila yambatakani?

⁹ Satana ozolele vo wayambula kangalela muna nzila ifilanga ku moyo a mvu ya mvu yo landa e nzila ina wantu ayingi bekangalelanga, i sia vo, nzila yasanzuka ina ‘ifilanga ku lufwasu.’ (Mat. 7:13) Kansi, avo tuzolele kwamanana kangalela muna nzila yambatakani, tufwete wilanga nding’a Yesu yo badikila nzila yayi se lutaninu kwa yeto. Owau, yambula twabadika diambu diankaka dina Yesu kavova vo twavanga.

10. Landila e sono kia Matai 5:23, 24, nkia diambu Yesu kavova vo tufwete vanga?

¹⁰ Tanga Matai 5:23, 24. Muna sono kiaki, Yesu wayika diambu diamfunu dina Ayuda bavanganga muna zingu kiau. Yindula vo mosi muna yau wele kuna tempelo ye bulu kiandi kimana ngang’ambuta katambika kio se kimenga. Kansi, vana vau osungamene vo mpangi andi diambu kambakidi, oyambwidi o lukau lwandi, wele vutulwisa ngwizani yo mpangi andi. Ekuma kavangidi wo? Kadi vena ye diambu disundidi o mfunu kafwete vanga vitila katambika lukau lwandi kwa Yave. Yesu watoma dio kiesesa vo: “Wenda teka wizana yo mpangi aku.”

11. Sasila dina Yakobo kavanga muna vutulwisa e ngwizani yo mpangi andi Esau.

¹¹ Dina diabwila Yakobo dilenda kutulonga diambu diamfunu mu kuma kia vutulwisa e ngwizani ye mpangi zeto. Vava Yakobo kaviokesa mvu 20 muna nsi yankaka, Yave muna nzil’a mbasi wamvovesa vo kavutuka kuna nsi andi yakingutukila. (Tuku 31:11, 13, 38) Kansi diambu diakala vo. Esau wa mbuta andi, wazola kumvonda. (Tuku 27:41) Muna kuma kiaki, Yakobo wabakama kwa “wonga yo telamwa moyo” kadi wayindulanga vo mpangi andi wakinu kunlundila makasi. (Tuku 32:7) Kansi, aweyi Yakobo kavutulwisila e ngwizani yo mpangi andi? Entete, wasamba kwa Yave yo kumvovesa mawonso makala muna ntim’andi. I bosi, watuma tukau kwa Esau wa mpangi andi. (Tuku 32:9-15) Kuna kwalanda, vava Yakobo kawanana yo mpangi andi Esau, wavita o ntu muna kunsonga luzitu. Wafukama vana ntadisi a Esau, ke nkumbu mosi ko ngatu nkumbu miole, kansi nkumbu nsambwadi. Mu kuma kia lulembamu yo luzitu kasonga, Yakobo wavutulwisa e ngwizani yo mpangi andi.—Tuku 33:3, 4.

12. Adieyi tulenda longoka muna nona kia Yakobo?

¹² Vena ye diambu diamfunu tulenda longoka muna dina Yakobo kavanga muna vutulwisa e ngwizani yo mpangi andi Esau. Kuna lulembamu lwawonso, Yakobo walomba lusadisu lwa Yave muna sambu. I bosi, Yakobo wavanga mana kalenda muna vutulwisa e ngwizani yo mpangi andi. Vava Yakobo kawanana yo Esau, kavava kunkwikidisa ko vo yandi wakala ye ndungidi. E kani dia Yakobo i vutulwisa e ngwizani yo mpangi andi. Ozevo, aweyi tulenda tanginina e mbandu a Yakobo?

13-14. Adieyi tufwete vanga avo mpangi eto tukendelekele?

¹³ Avo tuzolele kwamanana kangalela muna nzil’a moyo, tufwete vutulwisa e ngwizani yo mpangi zeto. (Roma 12:18) Kansi, adieyi tufwete vanga avo mpangi eto tukendelekele? Nze Yakobo, entete tufwete samba kwa Yave  yo lomba vo katusadisa kimana twavanga luvuvamu yo mpangi eto.

¹⁴ Tufwete mpe vaulanga e ntangwa muna kukiyuvulanga e yuvu nze yayi: ‘Nga yakubama ngina mu yambula lulendo lwame yo lomba ndoloki kuna lulembamu lwawonso yo vutulwisa ngwizani? Aweyi Yave yo Yesu bemona avo mvitidi o ntu mu kwenda vutulwisa ngwizani yo mpangi ame?’ E mvutu zeto muna yuvu yayi zilenda kutufila mu wila nding’a Yesu ye kuna lulembamu lwawonso tuvava mpangi eto kimana twavutulwisa luvuvamu. Muna mpila yayi, tutanginina mbandu a Yakobo.

15. Osadila nkanikinu una muna Efeso 4:2, 3, aweyi ulenda kutusadisila mu vutulwisa ngwizani yo mpangi eto?

¹⁵ Yindula dina diadi vangama kele vo Yakobo kasonga lulendo vava kawanana yo Esau wa mpangi andi! Mvuanga yadi ko bwa. Muna kuma kiaki, vava tukwenda vutulwisanga ngwizani yo mpangi eto, tufwete songanga lulembamu. (Tanga Efeso 4:2, 3.) Muna Ngana 18:19, tutanganga vo: “Olembeka mpangi ofwemene disundidi mpasi ke mu baka mbanz’a ngolo ko. Vena ye ntantani zina nze mbindi za mavitu ma mbanz’angolo.” Olomba e ndoloki kuna lulembamu lwawonso dilenda kutusadisa mu ziula e mbindi zazi.

16. Nkia diambu diankaka tufwete yindulanga vava tukwenda vutulwisanga ngwizani? Ekuma?

¹⁶ Tufwete toma yindulanga dina tuvova ye una tuvovela dio kwa mpangi eto. I bosi, vava tumona vo twakubama se twina, tulenda kwenda mokena yo mpangi ona tukendelekele ye kani dia vutulwisa e ngwizani. Nanga kuna lubantiku, o mpangi wakendalala olenda yika diambu dikutulweka o ntima. Muna kolo kiokio, diasazu mu funga makasi yo vava kuyitanina, kansi ovanga wo ke disadisa ko. Sungamena dio vo, ovutulwisa e ngwizani ye mpangi zeto disundidi o mfunu ke mu vava zaya ko kana nani una ye ndungidi yovo nani una ku ngielele.—1 Kor. 6:7.

17. Adieyi olongokele muna nona kia mpangi Gilbert?

¹⁷ Mpangi Gilbert ngolo kikilu kavanga muna vutulwisa e ngwizani yo mwan’andi. Wavova vo: “Mono yo mwan’ame ankento ke twawizananga ko. Mu mvu miole, yatezanga kwenda mokena yandi mu vutulwisa ngwizani, kansi kazolanga ko.” Adieyi diaka mpangi Gilbert kavanga? Wavova vo: “Konso ntangwa yayenda mokenanga yo mwan’ame, entete yasambanga kwa Yave yo kubika o ntim’ame  mu lembi kendalala avo umpovese diambu diambi. Yakubama yakalanga muna kunloloka. Yabakula vo ke diakala mfunu ko mu vava zaya kana nani una ye ndungidi, kadi e kani diame i vutulwisa e ngwizani.” Nkia nluta diatwasa? Mpangi Gilbert wavova vo: “O unu ngina ye luvuvamu lwa ntima kadi ngwizani ambote ngina yau ye esi nzo ame awonso.”

18-19. Avo mpangi tukendelekele, nkia kani tufwete kala diau? Ekuma?

¹⁸ Avo tubakwidi vo mpangi mosi tukendelekele, nkia kani tufwete kala diau? Sadila luludiku lwa Yesu lwa vutulwisa ngwizani. Zayisa e diambu diadi kwa Yave muna sambu yo kala ye vuvu vo mwand’andi avelela ukusadisa mu vutulwisa e ngwizani yo mpangi tukendelekele. Avo vangidi wo, okala ye kiese yo songa vo ovanganga mawonso muna wila e nding’a Yesu.—Mat. 5:9.

¹⁹ Diakiese mu zaya vo Yave osadilanga Yesu Kristu una vo i “ntu a nkutakani” muna kutuludika yo kutufila. (Efe. 5:23) Nze Petelo, Yakobo ye Yoane wa ntumwa, yambula twakala ye kani dia ‘wila’ nding’a Yesu. (Mat. 17:5) Mu longi diadi, tulongokele mana tufwete vanga muna vutulwisa e ngwizani yo mpangi ona tukendelekele. Avo tuvangidi wo yo kwamanana muna nzila yambatakani ifilanga ku moyo, tukala ye kiese owau yo vua e nsambu zakwele mvu kuna sentu.