ບົດຄວາມສຶກສາທີ 51
ໃຫ້ ‘ເຊື່ອຟັງພະເຢຊູ’ ຕໍ່ໆໄປ
“ນີ້ຄືລູກຮັກຂອງເຮົາ ເຮົາພໍໃຈໃນຕົວລາວຫຼາຍ. ພວກເຈົ້າຕ້ອງເຊື່ອຟັງລາວ.”—ມທ. 17:5
ເພງ 54 ທາງເສັ້ນນີ້ແຫຼະ
ໃຈຄວາມສຳຄັນ *
1-2. (ກ) ອັກຄະສາວົກສາມຄົນຂອງພະເຢຊູຖືກສັ່ງໃຫ້ເຮັດຫຍັງ ແລະເຂົາເຈົ້າເຮັດແນວໃດ? (ຂ) ເຮົາຈະຮຽນຫຍັງໃນບົດຄວາມນີ້?
ຫຼັງຈາກທີ່ສະຫຼອງປັດສະຄາປີ ຄ.ສ 32 ແລ້ວໆ ອັກຄະສາວົກເປໂຕ ຢາໂກໂບ ແລະໂຢຮັນກໍໄດ້ເຫັນນິມິດທີ່ໜ້າປະທັບໃຈ. ຕອນທີ່ເຂົາເຈົ້າຢູ່ເທິງພູສູງໆເຊິ່ງອາດຈະເປັນສ່ວນໜຶ່ງຂອງພູເຫເຣໂມນ ລັກສະນະຂອງພະເຢຊູກໍໄດ້ປ່ຽນໄປຕໍ່ໜ້າ ເຂົາເຈົ້າ “ໜ້າຂອງເພິ່ນເປັ່ງແສງຄືກັບດວງຕາເວັນ ແລະເຄື່ອງນຸ່ງຂອງເພິ່ນກໍຂາວເຈີດຈ້າ.” (ມທ. 17:1-4) ຕອນທີ່ນິມິດນັ້ນໃກ້ຈະຫາຍໄປ ພວກອັກຄະສາວົກໄດ້ຍິນສຽງຂອງພະເຈົ້າທີ່ບອກວ່າ: “ນີ້ຄືລູກຮັກຂອງເຮົາ ເຮົາພໍໃຈໃນຕົວລາວຫຼາຍ. ພວກເຈົ້າຕ້ອງເຊື່ອຟັງລາວ.” (ມທ. 17:5) ອັກຄະສາວົກທັງສາມຄົນນີ້ສະແດງໃຫ້ເຫັນວ່າເຂົາເຈົ້າເຊື່ອຟັງພະເຢຊູໂດຍວິທີທີ່ ເຂົາເຈົ້າໃຊ້ຊີວິດ. ເຮົາຄວນຮຽນແບບຕົວຢ່າງຂອງເຂົາເຈົ້າ.
2 ໃນບົດຄວາມກ່ອນ ເຮົາໄດ້ຮຽນຮູ້ວ່າການຟັງສຽງຂອງພະເຢຊູໝາຍຄວາມວ່າເຮົາຄວນເຊົາເຮັດ ບາງຢ່າງ. ແລະໃນບົດຄວາມນີ້ເຮົາຈະມາເບິ່ງວ່າ ພະເຢຊູເວົ້າເຖິງສອງຢ່າງຫຍັງແດ່ທີ່ເຮົາຄວນເຮັດ.
“ໃຫ້ເຈົ້າເຂົ້າໄປທາງປະຕູແຄບ”
3. ຕາມມັດທາຍ 7:13, 14 ເຮົາຄວນເຮັດຫຍັງ?
3 ອ່ານມັດທາຍ 7:13, 14. ຂໍໃຫ້ສັງເກດວ່າພະເຢຊູໄດ້ເວົ້າເຖິງທາງ ສອງເສັ້ນທີ່ແຕກຕ່າງກັນ. ທາງໜຶ່ງ “ກວ້າງໃຫຍ່” ແລະອີກທາງໜຶ່ງ “ແຄບ” ບໍ່ມີທາງທີສາມໃຫ້ເລືອກ. ດັ່ງນັ້ນ ເຮົາຕ້ອງເລືອກເອງວ່າເຮົາຈະຍ່າງຢູ່ທາງໃດ. ການເລືອກນີ້ສຳຄັນຫຼາຍເພາະທາງທີ່ຈະພາໄປເຖິງຊີວິດຕະຫຼອດໄປມີພຽງທາງດຽວເທົ່ານັ້ນ.
4. ຂໍໃຫ້ອະທິບາຍວ່າທາງກວ້າງໃຫຍ່ເປັນແນວໃດ.
4 ເຮົາຕ້ອງເຂົ້າໃຈວ່າສອງເສັ້ນທາງນີ້ແຕກຕ່າງກັນຫຼາຍແທ້ໆ. ຄົນສ່ວນຫຼາຍເລືອກເດີນທາງທີ່ “ກວ້າງໃຫຍ່” ຍ້ອນມັນໄປງ່າຍສະດວກສະບາຍ ແລະມີຫຼາຍຄົນເດີນທາງນີ້. ແຕ່ໜ້າເສຍດາຍ ເພາະເຂົາເຈົ້າບໍ່ຮູ້ວ່າຊາຕານໄດ້ພະຍາຍາມໃຫ້ເຂົາເຈົ້າຢູ່ໃນທາງນີ້ເຊິ່ງເປັນທາງທີ່ນຳໄປສູ່ຄວາມຕາຍ.—1 ກຣ. 6:9, 10; 1 ຢຮ. 5:19
5. ບາງຄົນໄດ້ພະຍາຍາມເຮັດຫຍັງເພື່ອຈະຢູ່ໃນທາງແຄບ?
5 ຍັງມີອີກທາງໜຶ່ງທີ່ພະເຢຊູເວົ້າເຖິງນັ້ນກໍຄື “ທາງແຄບ” ແລະເພິ່ນບອກວ່າຈະມີບໍ່ເທົ່າໃດຄົນທີ່ພົບທາງນີ້. ຍ້ອນຫຍັງ? ໃນຂໍ້ພະຄຳພີຕໍ່ມາ ພະເຢຊູເຕືອນພວກລູກສິດໃຫ້ລະວັງພວກຜູ້ພະຍາກອນປອມ. (ມທ. 7:15) ບາງຄົນບອກວ່າ ມີຫຼາຍພັນສາສະໜາທີ່ບອກວ່າຕົວເອງສອນຄວາມຈິງ. ຫຼາຍລ້ານຄົນຈຶ່ງຮູ້ສຶກສັບສົນແລະທໍ້ໃຈຈົນເຊົາຊອກຫາທາງທີ່ພາໄປເຖິງຊີວິດ. ແຕ່ເຂົາເຈົ້າສາມາດພົບທາງນີ້ໄດ້ ເພາະພະເຢຊູບອກວ່າ: “ຖ້າພວກເຈົ້າເຮັດຕາມທີ່ຂ້ອຍສອນສະເໝີ ພວກເຈົ້າກໍເປັນລູກສິດຂອງຂ້ອຍແທ້ໆ. ແລະພວກເຈົ້າຈະຮູ້ຈັກຄວາມຈິງ ແລ້ວຄວາມຈິງຈະເຮັດໃຫ້ພວກເຈົ້າເປັນອິດສະຫຼະ.” (ຢຮ. 8:31, 32) ໜ້າຊົມເຊີຍຫຼາຍແທ້ໆທີ່ເຈົ້າບໍ່ໄດ້ເຮັດຕາມຄົນສ່ວນຫຼາຍ ແຕ່ເຈົ້າໄດ້ຊອກຫາຄວາມຈິງ ຕັ້ງໃຈສຶກສາຄຳພີໄບເບິນເພື່ອຈະຮູ້ວ່າພະເຈົ້າຢາກໃຫ້ເຮົາເຮັດຫຍັງ ແລະເຈົ້າໄດ້ເຊື່ອຟັງຄຳສອນຂອງພະເຢຊູ. ນອກຈາກນັ້ນ ເຈົ້າຍັງໄດ້ຮຽນຮູ້ວ່າພະເຢໂຫວາບໍ່ຢາກໃຫ້ເຮົາເຮັດຕາມຄຳສອນຂອງສາສະໜາປອມແລະຢາກໃຫ້ເຮົາເຊົາເຂົ້າຮ່ວມພິທີກຳຫຼືການສະຫຼອງບຸນຕ່າງໆທີ່ມາຈາກສາສະໜາປອມ ເຊິ່ງການເຮັດແບບນີ້ບໍ່ງ່າຍເລີຍ. (ມທ. 10:34-36) ເຖິງວ່າການປ່ຽນແປງຊີວິດແບບນີ້ມັນອາດຈະບໍ່ງ່າຍ ແຕ່ເຈົ້າໄດ້ພະຍາຍາມປ່ຽນແປງຕົວເອງຍ້ອນວ່າຮັກພະເຢໂຫວາແລະຢາກເຮັດໃຫ້ເພິ່ນພໍໃຈ. ເພິ່ນຄືຊິຮູ້ສຶກດີໃຈແລະພໍໃຈໃນຕົວເຈົ້າຫຼາຍແທ້ໆ!—ສຸພາ. 27:11
ວິທີທີ່ຈະຢູ່ໃນທາງແຄບ
ຄຳແນະນຳແລະຄຳສອນຂອງພະເຈົ້າຈະຊ່ວຍເຮົາໃຫ້ຢູ່ໃນທາງ “ແຄບ” ຕໍ່ໆໄປ (ເບິ່ງຂໍ້ 6-8) *
6. ຕາມຄຳເພງ 119:9, 10, 45, 133 ສິ່ງໃດຊ່ວຍເຮົາໃຫ້ຢູ່ໃນທາງແຄບຕໍ່ໄປໄດ້?
6 ເມື່ອເຮົາເລີ່ມເດີນທາງໃນທາງແຄບ ສິ່ງໃດຈະຊ່ວຍເຮົາໃຫ້ຢູ່ໃນທາງນີ້ຕໍ່ໄປໄດ້? ຂໍໃຫ້ເຮົາຄິດເຖິງຕົວຢ່າງນີ້: ໃນທາງແຄບໆທີ່ລຽບຕາມພູເຂົາຈະມີຮົ້ວກັ້ນຂອບທາງ. ຮົ້ວນີ້ຈະຊ່ວຍປົກປ້ອງຜູ້ຂັບຂີ່ບໍ່ໃຫ້ຂີ່ໄປໃກ້ຂອບທາງຈົນເກີນໄປ ຫຼືຊ່ວຍບໍ່ໃຫ້ຕົກອອກຈາກຂອບທາງ. ຄືຊິບໍ່ມີໃຜທີ່ຈະຈົ່ມວ່າ ຮົ້ວນີ້ຈຳກັດພື້ນທີ່ໂພດແລະເຮັດໃຫ້ເຂົາເຈົ້າເດີນທາງບໍ່ສະດວກ! ມາດຕະຖານຂອງພະເຢໂຫວາທີ່ຢູ່ໃນຄຳພີໄບເບິນກໍປຽບຄືກັບຮົ້ວກັ້ນຂອບທາງ ເພາະມັນຈະຊ່ວຍເຮົາໃຫ້ຢູ່ໃນທາງແຄບຕໍ່ໄປໄດ້.—ອ່ານຄຳເພງ 119:9, 10, 45, 133
7. ຜູ້ທີ່ຍັງໜຸ່ມຄວນຈະເບິ່ງວ່າທາງແຄບເປັນແນວໃດ?
7 ຜູ້ທີ່ຍັງໜຸ່ມ ບາງເທື່ອເຈົ້າຮູ້ສຶກວ່າມາດຕະຖານຂອງພະເຢໂຫວາເຄັ່ງຄັດໂພດບໍ? ຊາຕານຢາກໃຫ້ເຈົ້າຮູ້ສຶກແບບນັ້ນ. ມັນຢາກໃຫ້ເຈົ້າອິດສາຊີວິດຂອງຄົນທີ່ຢູ່ໃນທາງກວ້າງແລະຄິດວ່າຊີວິດນີ້ຈະມີຄວາມສຸກຖ້າໄດ້ເຮັດຄືກັບໝູ່ຢູ່ໂຮງຮຽນຫຼືຄົນອື່ນໆທີ່ເຫັນໃນອິນເຕີເນັດ. ນອກຈາກນັ້ນ ຊາຕານຍັງຢາກໃຫ້ເຈົ້າຄິດວ່າມາດຕະຖານຂອງພະເຢໂຫວາເຮັດໃຫ້ເຈົ້າບໍ່ມີອິດສະຫຼະ ແລະບໍ່ສາມາດໃຊ້ * ແຕ່ຂໍໃຫ້ຈື່ໄວ້ວ່າ ຊາຕານບໍ່ຢາກໃຫ້ຄົນທີ່ຢູ່ໃນທາງຂອງມັນຮູ້ວ່າປາຍທາງນັ້ນຈະເປັນແນວໃດ. ກົງກັນຂ້າມ ພະເຢໂຫວາຢາກໃຫ້ເຈົ້າຮູ້ວ່າຊີວິດຈະດີຂະໜາດໃດຖ້າຢູ່ໃນທາງຂອງເພິ່ນ.—ເພງ. 37:29; ເອຊາ. 35:5, 6; 65:21-23
ຊີວິດໄດ້ຢ່າງເຕັມທີ.8. ຜູ້ທີ່ຍັງໜຸ່ມ ເຈົ້າໄດ້ຮຽນຫຍັງຈາກເລື່ອງຂອງໂອລາບຟ໌?
8 ໃຫ້ເຮົາມາເບິ່ງວ່າເຮົາຈະໄດ້ບົດຮຽນຫຍັງຈາກປະສົບການຂອງພີ່ນ້ອງໄວລຸ້ນຄົນໜຶ່ງທີ່ຊື່ໂອລາບຟ໌. * ໝູ່ທີ່ຢູ່ໃນໂຮງຮຽນກົດດັນລາວໃຫ້ເຮັດຜິດສິນລະທຳທາງເພດ. ເມື່ອລາວອະທິບາຍວ່າພະຍານພະເຢໂຫວາເຮັດຕາມຫຼັກການດ້ານສິນລະທຳທີ່ຢູ່ໃນຄຳພີໄບເບິນ ພວກຜູ້ຍິງທີ່ຢູ່ໃນຫ້ອງຂອງລາວກໍແຮ່ງພະຍາຍາມຍົວະລາວໃຫ້ມີເພດ ສຳພັນນຳ. ແຕ່ລາວໄດ້ຢືນຢັດໝັ້ນຄົງກັບສິ່ງທີ່ຖືກຕ້ອງ. ໂອລາບຟ໌ບໍ່ໄດ້ຖືກກົດດັນພຽງແຕ່ເລື່ອງດຽວເທົ່ານັ້ນ. ລາວບອກວ່າ: “ອາຈານໄດ້ກົດດັນຂ້ອຍໃຫ້ຮຽນຕໍ່ສູງໆເພື່ອຈະມີໜ້າມີຕາໃນສັງຄົມ ແລະເພິ່ນບອກວ່າຖ້າບໍ່ເຮັດແບບນີ້ ຂ້ອຍຈະບໍ່ປະສົບຜົນສຳເລັດໃນຊີວິດ.” ສິ່ງໃດຊ່ວຍໂອລາບຟ໌ໃຫ້ຕ້ານທານກັບແຮງກົດດັນເຫຼົ່ານີ້ໄດ້? ລາວບອກວ່າ: “ເປັນຍ້ອນວ່າຂ້ອຍມີສາຍສຳພັນທີ່ໃກ້ຊິດກັບພີ່ນ້ອງໃນປະຊາຄົມ. ເຂົາເຈົ້າເປັນຄືກັບຄົນໃນຄອບຄົວຂອງຂ້ອຍເລີຍ. ນອກຈາກນັ້ນ ຂ້ອຍໄດ້ເລີ່ມສຶກສາຄຳພີໄບເບິນຢ່າງຈິງຈັງຫຼາຍຂຶ້ນ. ແຮ່ງຂ້ອຍສຶກສາພະຄຳພີຫຼາຍເທົ່າໃດ ຂ້ອຍກໍແຮ່ງໝັ້ນໃຈຫຼາຍຂຶ້ນວ່ານີ້ແມ່ນຄວາມຈິງ. ໃນທີ່ສຸດຂ້ອຍກໍຕັດສິນໃຈຮັບໃຊ້ພະເຢໂຫວາ.”
9. ຖ້າເຮົາຢາກຢູ່ໃນທາງແຄບຕໍ່ໆໄປ ເຮົາຕ້ອງເຮັດແນວໃດ?
9 ຊາຕານຢາກໃຫ້ເຮົາອອກຈາກທາງທີ່ຈະພາເຮົາໄປເຖິງຊີວິດ. ມັນຢາກໃຫ້ເຮົາເຮັດຄືກັບຄົນສ່ວນຫຼາຍທີ່ຢູ່ໃນທາງກວ້າງເຊິ່ງ “ພາໄປເຖິງຄວາມພິນາດ.” (ມທ. 7:13) ແຕ່ເຮົາຈະຍັງຢູ່ໃນທາງແຄບຕໍ່ໄປໄດ້ຖ້າເຮົາເຊື່ອຟັງພະເຢຊູແລະເບິ່ງວ່າທາງແຄບນີ້ຊ່ວຍປົກປ້ອງເຮົາ. ຕອນນີ້ໃຫ້ເຮົາມາເບິ່ງອີກສິ່ງໜຶ່ງທີ່ພະເຢຊູບອກໃຫ້ເຮົາເຮັດ.
ໃຫ້ຄືນດີກັບພີ່ນ້ອງ
10. ຕາມມັດທາຍ 5:23, 24 ພະເຢຊູບອກໃຫ້ເຮົາເຮັດຫຍັງ?
10 ອ່ານມັດທາຍ 5:23, 24. ພະເຢຊູໄດ້ເລົ່າເຫດການສຳຄັນທີ່ຄົນຢິວຕ້ອງເຮັດ. ເພິ່ນບອກວ່າ ຖ້າມີບາງຄົນກຳລັງຈະເອົາສັດໃຫ້ປະໂລຫິດເພື່ອຖວາຍເປັນເຄື່ອງບູຊາ ແລ້ວນຶກຂຶ້ນໄດ້ວ່າມີພີ່ນ້ອງຄຽດໃຫ້ລາວ ລາວຈະຕ້ອງວາງເຄື່ອງຖວາຍໄວ້ແລ້ວໄປຫາຜູ້ນັ້ນ. ຍ້ອນຫຍັງ? ມີຫຍັງທີ່ສຳຄັນຫຼາຍກວ່າການຖວາຍເຄື່ອງບູຊາໃຫ້ພະເຢໂຫວາບໍ? ພະເຢຊູບອກວ່າ: ‘ໃຫ້ໄປຄືນດີກັບພີ່ນ້ອງກ່ອນ.’
ເຮົາຈະຮຽນແບບຕົວຢ່າງຂອງຢາໂຄບບໍທີ່ໄດ້ສ້າງສັນຕິກັບອ້າຍຂອງລາວ? (ເບິ່ງຂໍ້ 11-12) *
11. ຢາໂຄບໄດ້ເຮັດແນວໃດເພື່ອຈະຄືນດີກັບເອຊາວ?
11 ເຮົາໄດ້ຮັບປະໂຫຍດຈາກຕົວຢ່າງຂອງຢາໂຄບໃນເລື່ອງການຄືນດີກັບພີ່ນ້ອງ. ຫຼັງຈາກທີ່ຢາໂຄບອອກຈາກບ້ານເປັນເວລາ 20 ປີ ພະເຢໂຫວາກໍໄດ້ບອກລາວໃຫ້ກັບໄປບ້ານເກີດ. (ຕົ້ນ. 31:11, 13, 38) ແຕ່ບັນຫາຄືຢາໂຄບຈື່ໄດ້ວ່າ ຕອນນັ້ນເອຊາວອ້າຍຂອງລາວຄຽດໃຫ້ລາວແລະຢາກຈະຂ້າລາວ. (ຕົ້ນ. 27:41) ນີ້ຈຶ່ງເຮັດໃຫ້ລາວຮູ້ສຶກ “ຢ້ານແລະອຸກໃຈຫຼາຍ” ເພາະຄິດວ່າອ້າຍຍັງຄຽດໃຫ້ລາວຢູ່. (ຕົ້ນ. 32:7, ລ.ມ.) ແລ້ວຢາໂຄບເຮັດແນວໃດເພື່ອຈະຄືນດີກັບອ້າຍຂອງລາວ? ທຳອິດລາວໄດ້ອະທິດຖານເຖິງພະເຢໂຫວາກ່ຽວກັບເລື່ອງນີ້. ຈາກນັ້ນລາວໄດ້ສົ່ງຂອງຂວັນໄປໃຫ້ອ້າຍ. (ຕົ້ນ. 32:9-15) ແລະສຸດທ້າຍຕອນທີ່ລາວໄປພົບອ້າຍ ລາວໄດ້ໝູບໜ້າລົງຄຳນັບອ້າຍ ລາວບໍ່ໄດ້ໝູບໜ້າລົງພຽງແຕ່ໜຶ່ງເທື່ອຫຼືສອງເທື່ອເທົ່ານັ້ນ ແຕ່ລາວເຮັດເຖິງ 7 ເທື່ອ! ຍ້ອນຢາໂຄບຖ່ອມຕົວແລະສະແດງຄວາມນັບຖືຕໍ່ອ້າຍ ລາວຈຶ່ງສາມາດຄືນດີກັບອ້າຍໄດ້.—ຕົ້ນ. 33:3, 4
12. ເຮົາໄດ້ບົດຮຽນຫຍັງຈາກຕົວຢ່າງຂອງຢາໂຄບ?
12 ເຮົາໄດ້ບົດຮຽນຫຍັງຈາກວິທີທີ່ຢາໂຄບກຽມຕົວເພື່ອຈະໄປພົບກັບອ້າຍຂອງລາວ? ທຳອິດລາວໄດ້ຂໍຄວາມຊ່ວຍເຫຼືອຈາກພະເຢໂຫວາ. ຈາກນັ້ນລາວກໍໄດ້ເຮັດຕາມທີ່ລາວອະທິດຖານໂດຍເຮັດທຸກສິ່ງທີ່ເຮັດໄດ້ເພື່ອຈະຄືນດີກັບອ້າຍ. ແລະຕອນທີ່ລາວໄປພົບກັບອ້າຍ ລາວບໍ່ໄດ້ບອກວ່າໃຜຜິດໃຜຖືກເພາະເປົ້າໝາຍຂອງລາວກໍເພື່ອຈະຄືນດີກັບອ້າຍ. ເຮົາຈະຮຽນແບບຕົວຢ່າງຂອງຢາໂຄບໄດ້ແນວໃດ?
ວິທີທີ່ຈະຄືນດີກັບພີ່ນ້ອງ
13-14. ເຮົາຄວນເຮັດຫຍັງຖ້າເຮົາມີບັນຫາກັບພີ່ນ້ອງ?
13 ຖ້າເຮົາຢາກຢູ່ໃນທາງທີ່ຈະພາໄປເຖິງຊີວິດ ເຮົາຕ້ອງຮັກສາສັນຕິສຸກກັບພີ່ນ້ອງ. (ຣມ. 12:18) ແລ້ວເຮົາຄວນເຮັດແນວໃດຖ້າເຮົາມີບັນຫາກັບພີ່ນ້ອງ? ຄືກັບຢາໂຄບ ເຮົາຄວນອະທິດຖານຂໍຄວາມຊ່ວຍເຫຼືອຈາກພະເຢໂຫວາໃຫ້ຊ່ວຍເຮົາຄືນດີກັບພີ່ນ້ອງ.
14 ນອກຈາກນັ້ນ ເຮົາຄວນກວດສອບເບິ່ງຕົວເອງໂດຍຖາມຕົວເອງວ່າ: ‘ຂ້ອຍຈະຍອມບອກບໍວ່າຕົວເອງເປັນຝ່າຍຜິດ ແລ້ວໄປຂໍໂທດພີ່ນ້ອງເພື່ອຈະຄືນດີກັນ? ຖ້າຂ້ອຍບໍ່ໄດ້ເປັນຝ່າຍເລີ່ມໄປຄືນດີກັບພີ່ນ້ອງ ພະເຢໂຫວາແລະພະເຢຊູຈະຮູ້ສຶກແນວໃດ?’ ຄຳຕອບຂອງຄຳຖາມເຫຼົ່ານີ້ຈະກະຕຸ້ນເຮົາໃຫ້ເຊື່ອຟັງພະເຢຊູ ແລະໃຫ້ເປັນຝ່າຍເລີ່ມໄປຄືນດີກັບພີ່ນ້ອງ. ຖ້າເຮົາເຮັດແບບນີ້ ເຮົາກໍກຳລັງຮຽນແບບຕົວຢ່າງຂອງຢາໂຄບ.
15. ຫຼັກການທີ່ຢູ່ໃນເອເຟໂຊ 4:2, 3 ຊ່ວຍເຮົາແນວໃດໃຫ້ຄືນດີກັບພີ່ນ້ອງ?
15 ລອງຄິດເບິ່ງວ່າ ຖ້າຢາໂຄບໄປຫາເອຊາວແລະພະຍາຍາມບອກວ່າ ໃຜເປັນຝ່າຍຖືກແລະໃຜເປັນຝ່າຍຜິດ ຜົນທີ່ອອກມາກໍຄືຊິແຕກຕ່າງຈາກທີ່ພະຄຳພີຂຽນໄວ້. ຄ້າຍຄືກັນ ເມື່ອເຮົາໄປຄືນດີກັບພີ່ນ້ອງ ເຮົາຕ້ອງມີຄວາມຖ່ອມ. (ອ່ານເອເຟໂຊ 4:2, 3) ສຸພາສິດ 18:19, ລ.ມ. ບອກວ່າ: “ການເອົາຊະນະພີ່ນ້ອງທີ່ຄຽດກໍຍາກກວ່າເອົາຊະນະເມືອງທີ່ແຂງແກ່ນ ແລະການຖຽງກັນເປັນຄືກັບກອນປະຕູປ້ອມປະການ.” ພີ່ນ້ອງທີ່ຄຽດໃຫ້ເຮົາປຽບຄືກັບ “ປ້ອມປະການ.” ຖ້າເຮົາຖ່ອມໃຈໄປຂໍໂທດລາວ ກໍຈະເຮັດໃຫ້ລາວຢາກຄືນດີກັບເຮົາ.
16. ເພື່ອຈະຄືນດີກັບພີ່ນ້ອງ ເຮົາຄວນເຮັດຫຍັງອີກ ແລະຍ້ອນຫຍັງ?
16 ນອກຈາກນັ້ນ ເຮົາຄວນຄິດໃຫ້ດີກ່ອນວ່າຈະເວົ້າຫຍັງກັບພີ່ນ້ອງແລະເວົ້າແນວໃດ. ເມື່ອເຮົາໄປລົມກັບພີ່ນ້ອງຄົນນັ້ນ ເຮົາຄວນມີເປົ້າໝາຍທີ່ຈະຄືນດີກັນ. ທຳອິດ ລາວອາດຈະເວົ້າບໍ່ມ່ວນໃສ່ເຮົາເຊິ່ງອາດຈະເຮັດໃຫ້ເຮົາຮູ້ສຶກໃຈຮ້າຍ ແລະພະຍາຍາມຫາເຫດຜົນເຂົ້າຂ້າງຕົວເອງ. ແຕ່ການເຮັດແບບນັ້ນຈະຊ່ວຍເຮົາໃຫ້ຄືນດີກັບພີ່ນ້ອງບໍ? ບໍ່. ຂໍໃຫ້ຈື່ໄວ້ວ່າການຄືນດີກັບພີ່ນ້ອງສຳຄັນກວ່າການທີ່ຈະບອກວ່າຜູ້ໃດຖືກຜູ້ໃດຜິດ.—1 ກຣ. 6:7
17. ເຮົາໄດ້ບົດຮຽນຫຍັງຈາກຕົວຢ່າງຂອງກິວເບີດ?
17 ພີ່ນ້ອງຊາຍຄົນໜຶ່ງທີ່ຊື່ ກິວເບີດ ໄດ້ພະຍາຍາມຫຼາຍແທ້ໆທີ່ຈະສ້າງສັນຕິສຸກ. ລາວບອກວ່າ: “ຂ້ອຍມີບັນຫາຫຼາຍຢ່າງກັບລູກສາວ. ຫຼາຍກວ່າສອງປີທີ່ຂ້ອຍໄດ້ພະຍາຍາມເວົ້າດີໆແລະຄ່ອຍໆເວົ້າເພື່ອຈະຄືນດີກັບລາວ.” ແລ້ວກິວເບີດໄດ້ເຮັດຫຍັງອີກ? ລາວບອກວ່າ: “ກ່ອນທີ່ຂ້ອຍຈະລົມກັບລູກສາວ ຂ້ອຍໄດ້ອະທິດຖານແລະກຽມໃຈໄວ້ກ່ອນແລ້ວວ່າອາດຈະໄດ້ຍິນຄຳເວົ້າທີ່ບໍ່ດີ. ຂ້ອຍຕ້ອງພ້ອມທີ່ຈະໃຫ້ອະໄພລາວ ບໍ່ພະຍາຍາມບອກວ່າຕົວເອງເປັນຝ່າຍຖືກ ແລະເຂົ້າໃຈວ່າເປົ້າໝາຍຂອງຂ້ອຍກໍຄືຄືນດີກັບລາວ.” ແລ້ວຜົນເປັນແນວໃດ? ກິວເບີດບອກວ່າ: “ທຸກມື້ນີ້ຂ້ອຍຮູ້ສຶກສະບາຍໃຈຍ້ອນຂ້ອຍມີສາຍສຳພັນທີ່ດີກັບທຸກຄົນໃນຄອບຄົວ.”
18-19. ຖ້າເຮົາມີບັນຫາກັບພີ່ນ້ອງເຮົາຄວນຕັ້ງໃຈທີ່ຈະເຮັດຫຍັງ ແລະຍ້ອນຫຍັງ?
18 ເຮົາຄວນຕັ້ງໃຈທີ່ຈະເຮັດຫຍັງເມື່ອມີບັນຫາກັບພີ່ນ້ອງ? ໃຫ້ເຮົາເຮັດຕາມຄຳແນະນຳຂອງພະເຢຊູທີ່ບອກໃຫ້ໄປຄືນດີກັບພີ່ນ້ອງ. ບອກໃຫ້ພະເຢໂຫວາຮູ້ກ່ຽວກັບເລື່ອງນັ້ນ ແລ້ວຂໍພະລັງບໍລິສຸດຈາກເພິ່ນເພື່ອຊ່ວຍເຮົາໃຫ້ເປັນຄົນສ້າງສັນຕິສຸກ. ຖ້າເຮົາເຮັດແບບນີ້ ເຮົາກໍຈະມີຄວາມສຸກແລະກໍສະແດງວ່າເຮົາກຳລັງເຊື່ອຟັງພະເຢຊູ.—ມທ. 5:9
19 ເຮົາຢາກຂອບໃຈພະເຢໂຫວາທີ່ໃຫ້ຄຳແນະນຳກັບເຮົາຜ່ານທາງພະເຢຊູ ເຊິ່ງເປັນ “ຜູ້ນຳຂອງປະຊາຄົມ.” (ອຟຊ. 5:23) ຂໍໃຫ້ເຮົາເຮັດຄືກັບອັກຄະສາວົກເປໂຕ ຢາໂກໂບ ແລະໂຢຮັນໂດຍຕັ້ງໃຈທີ່ຈະ “ເຊື່ອຟັງເພິ່ນ.” (ມທ. 17:5) ໃນບົດຄວາມນີ້ ເຮົາໄດ້ຮຽນວ່າສິ່ງທີ່ສະແດງວ່າເຮົາເຊື່ອຟັງພະເຢຊູຄື ໄປຄືນດີກັບພີ່ນ້ອງທີ່ຄຽດໃຫ້ເຮົາ ແລະພະຍາຍາມຢູ່ໃນທາງແຄບຕໍ່ໆໄປເຊິ່ງຈະພາໄປເຖິງຊີວິດ. ເມື່ອເຮົາເຮັດແບບນີ້ ເຮົາກໍຈະໄດ້ຮັບພອນຫຼາຍຢ່າງໃນຕອນນີ້ແລະມີຊີວິດທີ່ມີຄວາມສຸກໃນອະນາຄົດ.
ເພງ 130 ເຮົາຕ້ອງໃຫ້ອະໄພກັນ
^ ຂໍ້ 5 ພະເຢຊູຢາກໃຫ້ເຮົາເຂົ້າໄປທາງປະຕູແຄບທີ່ຈະພາໄປເຖິງຊີວິດ ແລະເພິ່ນຍັງຢາກໃຫ້ເຮົາສ້າງສັນຕິກັບພີ່ນ້ອງ. ແຕ່ເຮົາອາດຈະມີບັນຫາຫຍັງແດ່ເມື່ອເຮັດຕາມຄຳແນະນຳນີ້? ແລ້ວເຮົາຈະເຮັດຕາມຄຳແນະນຳນີ້ໄດ້ແນວໃດ?
^ ຂໍ້ 7 ເບິ່ງປຶ້ມຄຳຕອບຂອງ 10 ຄຳຖາມທີ່ໜຸ່ມສາວຖາມ ຄຳຖາມທີ 6: “ຂ້ອຍຈະຕ້ານທານຄວາມກົດດັນຈາກໝູ່ໄດ້ແນວໃດ?” ແລະວິດີໂອສອນດ້ວຍພາບວາດສູ້ກັບແຮງກົດດັນຈາກໝູ່ລຸ້ນດຽວກັນ! (ພາສາໄທ) ຢູ່ທີເວັບໄຊ www.pr418.com (ໄປທີ່ ຄຳສອນຂອງຄຳພີໄບເບິນ > ໄວລຸ້ນ)
^ ຂໍ້ 8 ຊື່ສົມມຸດ
^ ຂໍ້ 56 ຄຳອະທິບາຍຮູບພາບ: ການທີ່ເຮົາຢູ່ໃນ “ທາງແຄບ” ທີ່ມີຮົ້ວທີ່ພະເຈົ້າຈັດໄວ້ຈະຊ່ວຍປົກປ້ອງເຮົາຈາກສິ່ງອັນຕະລາຍເຫຼົ່ານີ້ເຊັ່ນ: ການເບິ່ງຮູບລາມົກ ການຄົບຫາທີ່ບໍ່ດີ ແລະການຖືກກົດດັນໃຫ້ຮຽນສູງໆ.
^ ຂໍ້ 58 ຄຳອະທິບາຍຮູບພາບ: ຢາໂຄບໄດ້ໝູບໜ້າລົງພື້ນຫຼາຍເທື່ອເພື່ອຈະຄືນດີກັບອ້າຍລາວ.