1-2. (a) Vaposetolo jaYesu vatatu vavalwezele kulinga vyuma muka, kaha vakwileko ngachilihi? (b) Vyuma muka natushimutwila muchihande chino?

 HANYIMA yaPaseka mu 32 C.E., kaposetolo Petulu, naYakova, naYowano vamwene chakumwenesa. Omu vapwile helu lyapili yayisuku chikuma pamo Pili Helemone, Yesu alyalumwine mweka. “Kumeso enyi kwamunyikile nge likumbi, kaha uvwalo wenyi wahelu wapwile zwalala nge mumunyi.” (Mateu 17:1-4) Omu chakumwenesa chapwile kwakamwihi nakukuma, vaposetolo vevwile Kalunga mwahanjika ngwenyi: “Ou ikiye Mwanami, ou ngwazanga, ou ngwevwila kuwaha. Mwivwililenunga.” (Mateu 17:5) Jila vayoyelelemo vaze vaposetolo vatatu yasolwele chikupu nge vevwililile kulizu lyaYesu. Twatela kulondezeza chakutalilaho chavo.

² Muchihande chinafumuho twalinangulanga nge kwivwilila kulizu lyaYesu chalumbununa kulitwamina kulinga vyuma vimwe. Muchihande chino natushimutwila havyuma vivali vize Yesu atulwezele ngwenyi tulingenga.

3. Kweseka naMateu 7:13, 14, vyuma muka twatela kulinga?

³ Tangenu Mateu 7:13, 14. Yesu avulukile vikolo vivali vyakulihandununa vyakutwala kujijila jivali jakulihandununa, yimwe “yakuhweka” yikwavo “yakupalakanya.” Kwatwama kaha jijila jivali, shikaho mutu atela kulisakwila ivene jila atela kutambukamo. Echi hichuma chachilemu twatela kusakula kulinga mwomwo hakiko hapendamina kuyoya chahaya myaka.

4. Uno munahase kulumbununa ngachilihi jila “yakuhweka”?

⁴ Twatela kutachikiza chihandwa chatwama hali eji jijila jivali. Jila “yakuhweka” mweji kuyanga vatu vavavulu mwomwo yayashi kutambukamo. Chaluvinda, vatu vavavulu vali nakutwalaho  kutambuka mujila kana, nakukavangiza vatu vavavulu vaze vanakutambukamo. Kavatachikiza ngwavo Satana Liyavolo ikiye ali nakuvazondola vatambuke mujila kanako, kaha nawa yili nakutwala kukunonga.—Koli. 1, 6:9, 10; Yowa. 1, 5:19.

5. Vyuma muka vanalingi vatu vamwe mangana vawane jila “yakupalakanya” nakuputuka kutambukamo?

⁵ Jila yikwavo yapwa “yakupalakanya,” kaha Yesu ambile ngwenyi vali nakuyiwana vapwa vavandende. Mwomwo ika? Vesi yakavangizaho, Yesu ahuhumwine vaka-kumukavangiza vazangame navapolofweto vamakuli. (Mateu 7:15) Vatu vavavulu vawana ngwavo kwatwama mauka akwitava amavulu chikuma, kaha eji kuhanjikanga ngwawo eji kunangulanga muchano. Mauka kana alingisa vatu vavavulu vapwenga muchitanga nakulitwamina kutonda jila yakutwala kukuyoya. Oloze jila kana vanahase kuyiwana. Yesu ambile ngwenyi: “Kachi nge namutwamanga mumazu ami, kaha chikupu vene munapu mutumbaji twami. Namutachikiza muchano, kaha muchano naumilingisa kupwa vakulihehwa.” (Yowa. 8:31, 32) Tweji kumisakwililanga hakuwana nge kamwakavangijile vatu vavavuluko, oloze mwatondele tondele muchano. Mwaputukile kulinangula Mazu aKalunga mangana mutachikize vyuma asaka tulingenga, kaha mwevwililile kukunangula chaYesu. Mwalinangwile nawa nge, Yehova asaka mulihende kukunangula chamukwitava chamakuli, nakwecha kulinga vilika vyamakumbi akunoka vize vyafuma mukwitava chamakuli. Mwatachikijile ngwenu kulinga vyuma asaka Yehova, nakwecha kulinga vyuma vize ahunga chinahase kupwa chachikalu. (Mateu 10:34-36) Kachapwile chachashi kwalumunako vyuma vimwe mukuyoya chenuko. Chipwe ngocho, mwazachile kweseka noho hakumina ngolo jenu, mwomwo mwazanga Senu wamwilu kaha mwasaka kumwivwisa kuwaha. Twafwelela ngwetu Yehova eji kumivwilanga kuwaha.—Vishi. 27:11.

6. Kweseka naSamu 119:9, 10, 45, 133, vyuma muka navitukafwa tutwaleho kutambuka mujila yakupalakanya?

⁶ Kachi nge tunaputuka kutambuka mujila yakupalakanya, vyuma muka navitukafwa tutwaleho kutambukamo? Talenu chakutalilaho chino. Jijila jimwe jize jahita kujipili vahakako vipato mangana vikinge nyamutekenya naminyau yenyi. Vyeji kukafwanga nyamutekenya ahone kufuma mujila nakupwa muponde. Kakweshi nyamutekenya nahase kuyayavala nge namono chipato kanako. Chochimwe nawa, jishimbi jaYehova jatwama muMbimbiliya japwa nge chize chipato. Jeji kutukafwanga tutwaleho kutambuka mujila yakupalakanya.—Tangenu Samu 119:9, 10, 45, 133.

7. Uno vakweze vatela kumona ngachilihi jila yakupalakanya?

⁷ Enu vakweze, uno shimbu jimwe mweji kushinganyekanga ngwenu jishimbi jaYehova japwa jajikalu kukavangiza tahi? Omu mukiko asaka Satana mushinganyekenga. Asaka mushinganyekenga havatu vaze vali vanakutambuka mujila yakuhweka nahavyuma vanakulinga, mwomwo veji kusolokanga nge vali nakulivwisa kuwaha kuyoya. Nahase kumilingisa mushinganyeke ngwenu kamweshi nakulivwisa kuwaha kuyoya ngana mwavakwenu vaka-shikola, chipwe vatu vaze namumona haInternet. Satana asaka nawa mushinganyeke ngwenu jishimbi jaYehova jeji kumilingisanga muhone kulivwisa chikuma kuwaha kuyoya. * Oloze anukenu ngwenu, Satana kasaka vaze  vali nakutambuka mujila yakuhweka vatachikize vyuma navikavasolokela kulutweko. Oloze Yehova eji kulwezanga vaze veji kutambukanga mujila yakutwala kukuyoya vyuma vyamwaza navakalivwisa kuwaha.—Samu 37:29; Isa. 35:5, 6; 65:21-23.

8. Vyuma muka vakweze navalinangula kuli Olaf?

⁸ Talenu vyuma vyasolokelele ndumbwetu walunga Olaf * mangana mumone chishina munahase kulinangulako. Vakwavo vaka-shikola vamushinjililile alinge ujila. Omu avalumbunwinyine ngwenyi Vinjiho jaYehova veji kukavangizanga jindongi jamuMbimbiliya, vanyike vamapwevo vamwe mushikola vamushinjililile chikuma alinge navo ujila. Oloze ou ndumbwetu atwalileho lika kulinga vyuma vyakwoloka. Ou keshi ukiko ukalu amwene kahako. Ahanjikile cheka ngwenyi: “Valongeshi vangushinjililile ngufwile kuya kushikola yahelu mwomwo nachilingisa vatu vanguvumbike. Vahanjikile ngwavo nge kangweshi kuya kushikola kanako, kaha kangweshi kuwana milimo yakulumbunukako.” Vyuma muka vyakafwile  ndumbu Olaf ahonese vyeseko kana? Ambile ngwenyi: “Ngwalikachilenga chikuma navandumbwami muchikungulwilo. Vapwile kwijiva nge vaka-tanga yami. Kaha nawa ngwaputukile kulinangula chikuma Mbimbiliya. Kahechi changukafwile ngukunyuke ngwami ngunawane muchano. Kaha kutwala muze vangumbapachishile.”

9. Vyuma muka vatela kulinga vaze vali nakusaka kupwa mujila yakupalakanya?

⁹ Satana asaka mufume mujila yakutwala kukuyoya. Asaka mupwenga hamukana wavaze vali mujila yakuhweka ‘yili nakutwala kukunonga.’ (Mateu 7:13) Oloze tunahase kutwalaho lika kutambuka mujila yakupalakanya kachi nge natutwalaho kwivwilila kuli Yesu nakutwalaho kumona jila kana kupwa mukingo. Tutalenu havyuma vyeka vize Yesu ahanjikile ngwenyi twatela kulinga.

10. Kweseka naMateu 5:23, 24 chuma muka chize ahanjikile Yesu twatela kulinga?

¹⁰ Tangenu Mateu 5:23, 24. Yesu avulukile chuma chize chapwile chachilemu kuli vaYuleya vaze vapwile nakumwivwilila. Achishinganyekenu mutu ali hatembele, kaha nalizange kuhana chimuna wakuvatula kuli kapilishitu. Kachi nge mwanuka ngwenyi ali namulonga nandumbwenyi, kaha atela kuseza uze chimuna ‘nakuya.’ Mwomwo ika? Mwomwo kuli chuma chimwe chachilemu atelanga kulinga shimbu kanda ahane wana wenyi kuli Yehova. Yesu ambile ngwenyi: “Chatete kalivwasane nandumbwove.”

11. Vyuma muka alingile Yakova mangana alivwasane nayayenyi Esau?

¹¹ Tunahase kulinangula vishina vyavilemu kutalisa kukulivwasana navakwetu hakukekesa vyuma vyasolokele kuli kakuluka yetu Yakova. Yakova afumine kulifuchi lyenyi nakuya nakutwama kulifuchi lyeka hamyaka kafwe 20, kaha Kalunga amulwezele kuhichila muli kangelo akinduluke kulifuchi lyenyi. (Kupu. 31:11, 13, 38) Oloze chapwile chachikalu kukinduluka, mwomwo yayenyi Esau asakile kumujiha. (Kupu. 27:41) “Yakova evwile woma nakulizakamina chikuma” ngwenyi pamo yayenyi achili lika nakumulamina koko. (Kupu. 32:7) Vyuma muka alingile Yakova mangana alivwasane nayayenyi? Chatete, alombele kuli Yehova nakumulweza ukalu kana. Chamuchivali, atuminyinyine yayenyi wana. (Kupu. 32:9-15) Chamuchitatu, omu amwene yayenyi, Yakova alingile chuma chize chasolwele nge amuvumbikile. Alifukwile kuli yayenyi mapapa 7. Hakuwana nge Yakova alinyishile nakuvumbika yayenyi Esau, ngocho alivwasanyine nayayenyi, kaha vatwamine mukuunda.—Kupu. 33:3, 4.

12. Vyuma muka natulinangula kuli Yakova?

¹² Tunahase kulinangulako chishina kujila yize Yakova alingilililemo vyuma mangana aliwane nayayenyi, nachuma alingile omu apandamine kuli yayenyi. Yakova alombele Yehova amukafwe. Kufumaho, alingile kweseka navyuma alombele hakuzata nangolo mangana alivwasane nayayenyi. Omu valiwanyine, Yakova kasakile kusopesa yayenyi mangana vawane owo apihishileko. Chuma afwilile shina kulivwasana. Uno tunahase kumulondezeza ngachilihi?

13-14. Vyuma muka twatela kulinga kachi nge tunevwisa kupihya ndumbwetu?

¹³ Etu tuli nakutambuka mujila yakuya kukuyoya, twatela kutwamanga mukuunda navandumbwetu. (Loma 12:18) Vyuma muka twatela kulinga kachi nge tunamono ngwetu tunevwisa kupihya ndumbwetu? Twatela kulomba kuli Yehova ngana muze alingile Yakova.  Twatela kumulweza atukafwe mangana tutwame mukuunda nandumbwetu.

¹⁴ Twatela nawa kushinganyeka havyuma twatela kulinga. Twatela kulihulisa vihula vyakufwana nge vino: ‘Kutala ngunahase kwitavila ngwami yami ngunalimbenje, nakulikonekela, nakulivwasana tutwame cheka mukuunda tahi? Uno Yehova naYesu navevwa ngachilihi kachi nge nangulingako vyuma vimwe mangana tutwame cheka mukuunda nandumbwami?’ Jila natukumbulwilamo evi vihula nayitulingisa tusolole ngwetu tuli nakwivwilila kuli Yesu nakuya kuli ndumbwetu mangana tulivwasane nakutwama cheka mukuunda. Nge natulinga ngocho, kaha tuli nakulondezeza Yakova.

15. Uno kukavangiza lundongi lwatwama hali Wavaka-Efwesu 4:2, 3 nachitukafwa ngachilihi tufwile kutwama mukuunda nandumbwetu?

¹⁵ Achishinganyekenu nge Yakova alivwimbile nakusopesa yayenyi mangana vawane owo apihishile, kachi vyuma muka vyasolokele? Kachi kwapwile ukalu waunene. Nge natuya kuli ndumbwetu mangana tukalikonekele, twatela kusolola muchima wakulinyisa. (Tangenu Wavaka-Efwesu 4:2, 3.) Mukanda waVishimo 18:19 wamba ngwawo: “Ndumbwove unavulumuna mwakakamisa muchima wenyi kwijiva nge nganda yakujingulwisa kembwe. Kaha jipami jimwe jinapu nge tupachiso twakuzuvo yakukola.” Ndumbwetu uze tunapihisa kumuchima nafwane nge ‘zuvo yakukola,’ oloze nge natulikonekela kaha nachimukafwa afwile kulivwasana nayetu mangana tutwame mukuunda.

16. Vyuma muka twatela kuvangila kulinga nge tuli nakusaka kuhanjika nandumbwetu uze tunapihisa kumuchima, kaha mwomwo ika?

¹⁶ Twatela kuvangila kushinganyeka kanawa havyuma natuhanjika kuli ndumbwetu uze tunapihisa kumuchima nomu natuvihanjikilamo. Kufumaho, twatela kuya nakuhanjika nenyi mujila yize nayitulingisa tulivwasane nakutwama cheka mukuunda. Ou ndumbwetu nahase kuhanjika mazu amapi kuli etu. Tunahase kupihilila chipwe kufwila kulihakwila, oloze kulinga ngocho kacheshi kumilingisa mutwame mukuundako. Tachikizenu ngwenu kutwama mukuunda nandumbwenu chikiko chachilemu kuhambakana kutachikiza owo napihisa.—Koli. 1, 6:7.

17. Vyuma muka tunalinangula kuli ndumbwetu Gilbert?

¹⁷ Ndumbwetu Gilbert azachile nangolo mangana atwame navakwavo mukuunda. Ambile ngwenyi: “Kangwalivwasanyinenga kanawa namwanami wapwevoko. Hamyaka yakuzomboka  yivali, ngwazachile nangolo hakuhanjika nenyi mujila yakuunda mangana tuputuke cheka kulivwasana.” Vyuma vyeka muka alingile ndumbwetu Gilbert? Ambile ngwenyi: “Shimbu kanda nguhanjike namwanami haukalu wetu, ngwavangilililenga kulomba, nakushinganyeka ovyo nangulinga kachi nge mwahanjika mazu amapi. Shimbu yosena ngwalizangile kumukonekela. Chuma ngwafwililile shina kuneha kuunda keshi kulisolola ngwami kangwapihishileko.” Vyuma muka vyafuminemo? Ndumbwetu Gilbert ambile ngwenyi: “Makumbi ano ngwapwa wakuwahilila mwomwo nguli nakutwama mukuunda natanga yami yosena.”

18-19. Vyuma muka twatela kulinga nge tunevwisa ndumbwetu kupihya kumuchima, kaha mwomwo ika?

¹⁸ Chuma muka mwatela kufwila kulinga kachi nge munatachikiza ngwenu munevwisa ndumbwenu kupihya kumuchima? Kavangizenu mazu ahanjikile Yesu aze nawamikafwa mutwame mukuunda. Lwezenu Yehova ukalu wenu, nakupendamina hashipilitu yenyi mangana yimikafwe mutwame mukuunda. Nge namulinga ngocho namupwa vakuwahilila, nakusolola ngwenu muli nakwivwilila kuli Yesu.—Mateu 5:9.

¹⁹ Twawahilila chikuma hakuwana nge Yehova eji kutuhananga jindongi jamwaza kuhichila muli Yesu Kulishitu uze apwa “mutwe wachikungulwilo.” (Efwe. 5:23) Tufwilenu ‘kumwivwililanga’ ngana muze alingile kaposetolo Petulu, naYakova, naYowano. (Mateu 17:5) Tunashimutwila omwo tunahase kwivwilila kuli Yesu hakutwama mukuunda nandumbwetu uze tunevwisa kupihya kumuchima. Nge natulinga ngocho, nakutwalaho kutambuka mujila yakupalakanya yakutwala kukuyoya, kaha natupwa vakuwahilila oholyapwa nakulutwe.