1-2. (a) Apostolu aYesu asatu ayilejeli kwiladi, nawa elili ñahi? (b) Tukuhanjekadi muchinu chibaaba?

HANYIMA yachipandakenu chamu 32 C.E., kapostolu Petulu, Yakoba niYowanu amweni chimwenu chakuhayamisha. Hadiña hampidi yayilehi, hadaha mpidi yaHerimoni. Amumweni Yesu nakuhimpika mmwekenu yindi. “Kumesu indi kwatoñekeli neyi itena nawa yakuvwala yindi yahewulu yatookeli nankashi neyi chejeji.” (Mat. 17:1-4) Chelili ichi chimwenu hichikumana, apostolu atiyili Nzambi nakuhosha nindi: “Iwu diyi Mwanami, inakeña, inatiyaña kuwaha. Mutiyililenu.” (Mat. 17:5) Yuma yeliliwu awa apostolu muchihandilu chawu, yamwekesheli nawu amutiyilili Yesu. Twatela kuyimbujola.

² Muchibaaba chinafumihu, twadizili netu kutiyilila izu daYesu kwatalisha mukulekahu yuma yikwawu. Muchinu chibaaba, tukuhanjeka hayuma yiyedi yahosheliyi Yesu nindi twatela kuyila.

3. Kwesekeja naMatewu 7:13, 14, chumanyi chitwatela kwila?

³ Tañenu Matewu 7:13, 14. Ilukenu nenu Yesu wateneni yiisu yiyedi yambuka yatwalaña kunjila jiyedi jashiyashana, njila “yabwambwañana” ninjila “yanyanya.” Kwosi njila yamuchisatuku. Twatela kuditondela etu aweni njila yitwatela kwendamu. Ichi dichuma chalema chitwatela kufuukulahu muloña dihanashindameni wumi wetu wahaya nyaaka.

4. Lumbululenu chekala njila “yabwambwañana.”

 ⁴ Twatela kwiluka chaambu chidi haniji njila jiyedi. Njila “yabwambwañana” ayiluka kudi antu amavulu muloña yaswayi kwendelamu. Chawushona, antu amavulu atondahu kwenda muniyi njila nawa elaña yuma yoyimu yelaña antu endañamu. Akañanyaña kwiluka nawu mwini iyi njila hiSatana Diyabolu nawa iyi njila yindi yatwalaña kukufwa.—1 Kor. 6:9, 10; 1 Yow. 5:19.

5. Antu amakwawu elili ñahi hakwila awani njila “yanyanya” nawa atachiki kwendamu?

⁵ Kwambukaku nanjila “yabwambwañana,” njila yikwawu “yanyanya” nawa Yesu wahosheli nindi antu antesha hohu diwu ayiwanaña. Muloñadi? Muvasi yalondelahu, Yesu wayisoñamishili atumbanji twindi kutalisha hadi atuprofwetu akutwamba. (Mat. 7:15) Antu ahoshaña nawu kudi nsakililu jajivulu nawa ahoshaña nawu atañishaña chalala. Chineli kudi nsakililu jajivulu, antu amavulu azeyaña hela kuluwankana naniji nsakililu chakwila alekaña kukeñakeña njila yaya kuwumi. Ilaña iyi njila anateli kuyiwana. Yesu wahosheli nindi: “Neyi mukutwalekahu kuhemba mazu ami, chalala mudi atumbanji twami, nawa mukwiluka chalala, chalala nichena chikuyifumisha muwuduñu.” (Yow. 8:31, 32) Chachiwahi nankashi muloña himwelili chuma neyi chelañawu antu ejimaku; ilaña mwakeñakeñeli chalala. Mwatachikili kudiza Izu daNzambi kulonda mwiluki yuma yakeñañayi Nzambi nindi twileña nawa mwatiyilili kuntañishilu yaYesu. Hakachi kayuma yimwadizili mwadizili nenu Yehova wakeñaña nindi tukaaneña ntañishilu yamunsakililu yakutwamba nawa tubuleña kwanakana mafuku akunooka afuma munsakililu yakutwamba. Mwadizili cheñi nenu kwila yuma yakeñayi Yehova nikuleka yuma yahelayi chapela wanyi. (Mat. 10:34-36) Hadaha chayikalilili kuhimpa. Hela chochu, mwazatili nañovu kulonda muhimpi muloña mwamukeña Tata yenu wamwiwulu nawa munakukeña kumuzañalesha. Wayitiyili kuwaha.—Yish. 27:11.

6. Kwesekeja naMasamu 119:9, 10, 45, 133, chumanyi chinateli kutukwasha kutwalekahu kwenda munjila yanyanya?

⁶ Neyi tunatwalekihu kwenda munjila yanyanya, chumanyi chinateli kutukwasha kutwalekahu kwendamu? Talenu ichi chakutalilahu. Ikoli dashañawu kunsa yanjila yahita kumpidi dakiñaña ñendeshi nimotoka yindi. Idi ikoli adishaku kulonda dimukiñeña ñendeshi, kulonda yabuli kupwempuka. Kwosi ñendeshi wunateli kuhosha nindi idi ikoli datama muloña dankañeshaña kupwempuka hela kudikatisha. Nshimbi jaYehova jekala muBayibolu jekala neyi idi ikoli. Nshimbi jindi jatukwashaña kwenda munjila yanyanya.—Tañenu Masamu 119:9, 10, 45, 133.

7. Atwansi atela kumona ñahi njila yanyanya?

⁷ Enu atwansi komana mpinji yikwawu mwatoñojokaña nenu nshimbi jaYehova jayikañeshaña kwila yuma yimwakeñaña kwila? Dichinakukeñayi Satana nindi mutoñojokeña. Nakukeña nindi mwileña yuma yelaña antu endaña munjila yabwambwañana, muloña amwekanaña neyi anakudiluñisha. Nateli kuzatisha yuma yelañawu akwenu akashikola hela yuma yimwamonaña haintaneti kulonda mutoñojokeña nenu munakushalahu yuma yayiwahi. Satana nakukeña nindi mutoñojokeña nenu nshimbi jaYehova jinakuyikañesha enu kudiluñisha yuma yayiwahi  muchihandilu. * Ilaña anukenuña nenu: Satana nakukeña antu anakwenda muniyi njila abuli kwiluka jikayimwekena kumbidi. Ilaña Yehova nakukeña nindi mwiluki chihandilu chenu chichakekala neyi mutwalekahu kwenda munjila yaya kuwumi.—Mas. 37:29; Isa. 35:5, 6; 65:21-23.

8. Atwansi anateli kudizilaku chumanyi kudi manakwetu Olaf?

⁸ Talenu yuma yimunateli kudizila kuyuma yamumwekeneni manakwetu wakansi Olaf. * Akwawu akashikola amukanjikijileña kwila wuvumbi. Chayilejeliyi nindi aYinsahu jaYehova ovwahilaña nshimbi jamuBayibolu, atwansi awambanda atachikili kumukanjikija nankashi nawu eli nawu wuvumbi. Ilaña manakwetu Olaf wakaanini. Nawa  kudi kukala kukwawu kwamweniyi. Olaf wahosheli nindi: “Antañishi jami ankanjikijileña nawu niyi kushikola yeneni kulonda antu akankomokeña. Anlejeli nawu neyi nakaya wanyi, nakazataña wanyi nawa nakekala wanyi namuzañalu muchihandilu.” Chumanyi chamukwashili manakwetu Olaf kukaana idi ikakeja? Wahosheli nindi: “Nadikundileña nankashi nawamanakwetu niahela amuchipompelu chetu. Niwena ekalili tuhu neyi chisaka chami. Natachikili kudiza Bayibolu nankashi. Chinadizileña nenjili nakwiluka nami ichi dichalala. Chafuminimu, natachikili kumukalakela Yehova.”

9. Chumanyi chatela kwilawu antu anakukeña kwenda munjila yanyanya?

⁹ Satana nakukeña mufumi munjila yaya kuwumi. Nakukeña mwendeleña hamu nawantu ejima endelaña munjila yabwambwañana “yatwalaña kukujilumuka.” (Mat. 7:13) Hela chochu, tukutwalekahu kwenda munjila yanyanya neyi tutwalekahu kumutiyilila Yesu nikumonaña iyi njila netu yinakutukiña. Ichi tuhanjekenu hachuma chikwawu chahosheliyi Yesu nindi tuchiileña.

10. Kwesekeja naMatewu 5:23, 24, Yesu wahosheli nindi twatela kwiladi?

¹⁰ Tañenu Matewu 5:23, 24. Yesu walumbulwili mpinji yadiña yalema nankashi kudi aYudeya adifukwileña nawa adiña nakumutiyilila. Fwikijenu muntu nayi kutembeli hakukeña kuhana mulambu wakanyama kudi kapristu. Hayoyeniyi mpinji neyi yanuka nindi wudi namuloña namanakwindi, watela kushiya mulambu nawa ‘wukufunta.’ Muloñadi? Muloña kudi chuma chalema chateleleli kwilayi henohu kanda yahani mulambu kudi Yehova. Yesu washimwini nindi: “Sambilaku kutiyañana namanakweyi.”

11. Chumanyi cheliliyi Yakoba hakwila yaleti kuwunda naEsawu?

¹¹ Tunateli kudizilaku yuma yalema kutalisha hakuleta kuwunda neyi tushinshika hayuma yamwekeni muchihandilu chankakulula Yakoba. Chimwahitili yaaka 20 kufuma hafumini Yakoba kumukala wawu, Nzambi wamulejeli Yakoba kufunta kumukala wawu kuhitila mudi kañelu. (Kutach. 31:11, 13, 38) Ilaña kwadiña kukala. Yayindi Esawu wakeñeleña kumujaha. (Kutach. 27:41) Yakoba “watiyili woma waweni, nimuchima mwivumu la-ku” nindi hadaha manakwindi wuchidi wamuhembela nkunyi. (Kutach. 32:7) Chumanyi cheliliyi Yakoba hakwila yaleti kuwunda namanakwindi? Walombeli kudi Yehova nakumulejamu iyi nsañu. Kuhiñahu wamutemesheleli Esawu yawaana. (Kutach. 32:9-15) Nkumininaku, chadibulakeniwu mesu namesu, Yakoba wadizozeli kudi Esawu. Yakoba wamubandaminini Esawu mapampa 7. Yakoba wadizozeli nawa wamwekesheli kalemesha nawa ichi chuma chamukwashili kuleta kuwunda namanakwindi.—Kutach. 33:3, 4.

12. Chumanyi chitunadizili kudi Yakoba?

¹² Twadizilañaku kuchuma cheliliyi Yakoba hadiloñesheliyi kuya nakudibulakana namanakwindi nicheliliyi hampinji yadibulakeniyi naEsawu. Yakoba wamulombeli Yehova kulonda yamukwashi. Kuhiñahu, welili kwesekeja namwalombeliyi. Wazatili nañovu kulonda yaleti kuwunda namanakwindi. Chadibulakeniwu, Yakoba hatachikili kubobola naEsawu kulonda amoni waluwañesheli niwabulili kuluwañeshaku. Ilaña Yakoba wafwilileña kuleta kuwunda namanakwindi. Tunateli kumwimbujola ñahi?

13-14. Chumanyi chitwatela kwila neyi tumuneñesha mukwetu mukwakwitiya?

¹³ Etu tunakwenda munjila yaya kuwumei,  twatela kwikala mukuwunda nawamanakwetu. (Rom. 12:18) Tunateli kwila ñahi neyi twiluka netu tunamuneñeshi mukwetu mukwakwitiya? Kufwana Yakoba, twatela kumulomba Yehova. Twatela kumulomba kulonda yatukwashi kuleta kuwunda namanakwetu.

¹⁴ Twatela kudishinshika cheñi chitwekala. Twatela kudihula awa malwihu: ‘Komana netejaña neyi naluwañeshi, nadanakenaña nawa naletaña kuwunda? Neyi nileta kuwunda namanakwami hela namuhela, Yehova niYesu akutiya ñahi?’ Ñakwilu yetu kunawa malwihu yikutuletesha kumutiyilila Yesu nikuleta kuwunda nawakwetu akwakwitiya. Neyi twila yumiyi, tukumwimbujola Yakoba.

15. Kuzatisha chishina chekala haAEfwesesa 4:2, 3, kunateli kutukwasha ñahi kuleta kuwunda namanakwetu?

¹⁵ Fwikijenu neyi chakwila Yakoba wadivwimbili mpinji yadibulakeniyi namanakwindi. Mwadi kufuma kukala. Neyi tunakuya nakuleta kuwunda namanakwetu, twatela kwikala adizoza. (Tañenu AEfwesesa 4:2, 3.) Yishimu 18:19 yahosha nawu: “Mana kwamuntu neyi anamuhilishi dehi wakala nankashi kumukokweja, kutambula mukala wampwembu chaswayi; yikonkojola yidi ochu yidi neyi nyikomenu yakwitala damalola.” Neyi tudanakena kudi mukwetu chinateli kumukwasha kuleta kuwunda nanetu.

16. Yumanyi yikwawu yitwatela kutoñojokahu, nawa muloñadi?

¹⁶ Twatela kutoñojokaña cheñi hayuma yitukuhosha kudi amanakwetu nichakuyihosha. Neyi tunadiloñeshi dehi, twatela kuhosha nindi munjila yikuletesha yatwanakeni nawa twiikali cheñi amabwambu. Hakusambila nateli kuhosha mazu anateli kutuneñesha. Chinateli kutuhilisha, hela kukeña kudihakwilaku etu aweni. Ilaña ichi chuma chikutukwasha kuleta kuwunda wanyi. Anukenu nenu kuleta kuwunda namanakwenu, dichuma chachiwahi kubadika kudiyiñisha nawu yeyi waluwañesha.—1 Kor. 6:7.

17. Yumanyi yimunadizili kudi manakwetu Gilbert?

¹⁷ Manakwetu Gilbert wazatili nañovu kulonda yaleti kuwunda. Wahosheli nindi: “Twatiyañeneña wanyi nantaña yami. Hadi yaaka yiyedi, nazatili nañovu kulonda tumanishi kukala mukuwunda nawa tutiyañaneña.” Chumanyi chikwawu cheliliyi? Manakwetu Gilbert wahosheli nindi: “Henohu kanda nihanjiki nantaña yami, nalombeli kulonda niluki chinatela kwila neyi yaneñesha.  Nafwilileña kumwanakena. Nelukili nami hinatela kudiyiñishaku, ilaña natela kuleta kuwunda.” Yumanyi yafuminimu? Gilbert wabombelelihu nindi: “Ichi nidi namuzañalu muloña nidi nawubwambu wawuwahi nawantaña jami ejima.”

18-19. Chumanyi chitwatela kwila neyi tunaneñeshi muntu, nawa muloñadi?

¹⁸ Hanu dinu, chumanyi chimwatela kwila neyi mwiluka nenu munamuneñeshi mukwenu mukwaKristu? Ovwahilenuña mazu aYesu akuleta kuwunda. Mulombenu Yehova nawa mwilenu yayinki spiritu yindi yajila kulonda yayikwashi kuleta kuwunda. Neyi mwila iyi yuma, mukwikala namuzañalu nawa mukumwekesha nenu munakumutiyilila Yesu.—Mat. 5:9.

¹⁹ Twatiyaña kuwaha hakwiluka netu Yehova wazatishaña “mutu wachipompelu” Yesu Kristu hakutulombola. (Efwe. 5:23) Tutwalekenuhu ‘kumutiyilila’ Yesu neyi chelili kapostolu Petulu, Yakoba niYowanu. (Mat. 17:5) Tunahanjeki chitwatela kumutiyilila kuhitila mukuleta kuwunda namukwetu mukwaKristu itunaneñeshi. Neyi twila iyi yuma nikutwalekahu kwenda munjila yanyanya yaya kuwumi, akutukiswila chayinu mpinji nawa twakekala namuzañalu kumbidi.