1-2. (a) Iesu ena hahediba tatoi be dahaka haheḡani e abia, bona idia be dahaka e kara? (b) Ina atikol ai dahaka baita herevalaimu?

PASOVA 32 C.E. ai, aposetolo Petro, Iakobo, bona Ioane ese matahanai idauna ta e itaia. Ororo badana ta ai, reana Heremon Ororona ai, Iesu na idia vairadiai toana e idau. “Ia vairana e idau, e hururu-hururu dina na heto, ena dabua danu e kuroka-kuroka diari na heto.” (Mat. 17:1-4) Una matahanai dokonai, aposetolo ese Dirava gadona e kamonaia eto: “Natugu binai, egu lalokau; lau ia na lalo namo heniamu: ia erena ba kamonai.” (Mat. 17:5) Unu aposetolo tatoiosi ese edia mauri dalana amo e hahedinaraia Iesu na e kamonai henia. Ta uramu idia baita tohotohodia.

² Atikol gunana ai ta diba, Iesu gadona baita kamonai anina na, ia ese e gwaurai basita kara ḡaudia na basita kara. Ina atikol ai, ita na Iesu ese e gwaurai baita kara ḡaudia rua baita herevalaimu.

3. Mataio 7:13, 14 ena hereva heḡereḡerena, dahaka baita kara be namo?

³ Mataio 7:13, 14 ba duahi. Iesu ese ikoukou idaudia rua e herevalai bona unu ikoukou na dala idaudia rua e lao henidia, ta be ‘dala na lababa’ bona ta be “dala na rotona.” Dala ihatoina ta na lasi. Namona na ita ta ta siboda ese baita abia hidi edena dalai baita raka. Una na ita ese baita karaia mai anina bada abi hidina, badina una abi hidi dainai mauri hanaihanai baita abiamu eiava lasi.

4. ‘Dala lababana’ be ede bo herevalaia tomamu?

 ⁴ Namona na unu dala ruaosi edia idau na baita diba. ‘Dala lababana’ na momo ese e rakalaiamu badina irakalaina na haraḡa. Madi, momo na e uramu una dala ai e rakamu taudia hutuma muridia amo bae raka. To asie lalopararamu una na Satana Diabolo ese e uralaiamu dalana, bona una dala dokona na mase.​—1 Kor. 6:9, 10; 1 Ioa. 5:19.

5. Haida be dahaka e kara dala rotonana bae dibaia bona bae rakalaia totona?

⁵ “Dala rotona” na ‘dala lababana’ amo idau, bona Iesu na e gwa taunimanima gadoi ese e davariamu. Dahaka dainai? Dala ruaosi e herevalaidia murinai, Iesu ese ena hahediba taudia na e hamaorodia peroveta taudia koikoidia nahuadia bae toho. (Mat. 7:15) To, haida na e gwaumu tomadiho na momo herea, bona idia momo na e gwaumu hereva momokanina e hahedibalaiamu. Taunimanima milion momo na unu tomadiho ese e hahekwakwanaidiamu bona e ha daradaradiamu dainai, asie uramu mauri e laomu dalana bae tahua. To, una dala na bae davaria diba. Iesu na e gwa: “Umui ese egu hereva ba badinadia, bena egu hahediba korikori ai baola. Hereva momokani danu ba diba; bona hereva momokani ese baine ruhamui nege.” (Ioa. 8:31, 32) Umui ese hutuma na so badinadia, to sibomui ese hereva momokani o tahua. Dirava ena Hereva o stadilaia goadagoada bena iena ura o dibaia, bona Iesu ena hahediba herevadia o kamonai. O diba ḡaudia haida na, Iehova na e uramu ita ese tomadiho koikoi edia hahediba herevadia baita dadarai bona tomadiho koikoi amo e vara holidei idauidau basita moalelai. Danu, o diba Iehova e uramu ba kara ḡaudia ba badina bona se uramu karadia ba dadarai na auka. (Mat. 10:34-36) Reana o hekwarahi emu kara ba haidaua, to o haheauka badina Tamamu gubai na o lalokau heniamu bona o uramu Ia ese baine lalonamo henimu. Ia na oiemu ai e moale dikadikamu!​—Her. 27:11.

6. Salamo 119:9, 10, 45, 133 heḡereḡerena, dahaka ese baine duruda dala rotonana ai baita raka noho?

⁶ Dala rotonana ai ta rakamu lalonai, dahaka ese baine duruda dounu una dala ai baita raka? Mani ina haheitalai a laloa. Ororo ai dala isediai seseahu e atodia badina na taritari tauna bona ena motuka baine gimadia totona. Unu seseahu dainai, motuka tari tauna na dala iseisenai basine heau o dala amo basine heau dobi. Motuka tari taudia na basie gwaumu unu seseahu ese edia taritari na e hadikaiamu! Iehova ena taravatu Baibul lalonai na una seseahu heḡereḡerena. Iena taravatu ese be durudamu dala rotonana ai dounu baita raka.​—Salamo 119:9, 10, 45, 133 ba duahi.   

7. Matamata taudia ese dala rotonana be ede bae laloa toma?

⁷ Matamata taudia e, nega haida o mamiamu Iehova ena taravatu be oi e koumumu, a? Satana na e uramu unu ba lalo toma. Ia na e uramu oi na dala lababana ai e rakamu taudia ese e moalelaimu karadia ba lalo bada. Ia ese turamu skuli gabudiai eiava intanet ai o itamu ḡaudia be ḡaukaralaidiamu bena bo mamiamu oi na ḡau namodia haida o readiamu. Satana na e uramu ba laloa Iehova ena taravatu ese oi na e koumumu mauri ba moalelaia. * To ina na ba laloatao: Satana na se uramu dala lababana  ai e rakamu taudia ese dala dokonai baine vara ḡauna bae dibaia. To, Iehova ese mauri dalanai e rakamu taudia ediai be havaraiamu ḡauna na e hahedinaraia ḡoevaḡoeva.​—Sal. 37:29; Isa. 35:5, 6; 65:21-23.

8. Matamata taudia be Olaf ena haheitalai amo dahaka e dibamu?

⁸ Tadikaka matamatana ladana Olaf, * ena ekspiriens amo bo dibaiamu ḡauna mani a laloa. Ena klas taudia ese e doria mahuta hebou karana baine karaia. Ia na Iehova ena Witnes ese Baibul ena kara maoromaoro taravatudia e badinamu karana e herevalaia neganai, ena klas kekenidia haida na e laloava una na idia e tohodiava dainai dounu e urava bae doria bae mahuta hebou. To Olaf na kara maoromaoro dainai e gini goada. Ia na dia una hahetoho mo e davaria. Olaf na e gwa: “Egu teacher ese lalogu e ania education badana baina abia, unu amo ladagu baine bada. E hamaorogu bema una basina karaiamu, egu mauri ai basina kwalimumu.” Dahaka ese Olaf e durua una hahetoho e dadaraia? Ia na e gwa: “Egu  kongrigeisin taudia na bamodiava. Idia na egu ruma bese na heto. Danu Baibul istadilaina karana na laloa bada. Egu stadi karana na habadaia neganai, na diba momokani ina na hereva momokani. Una dainai, lalogu na hadaia Iehova baina hesiai henia.”

9. E uramu dala rotonana ai dounu bae raka taudia be dahaka bae kara na namo?

⁹ Satana na e uramu oi baine tohomu mauri e laomu dalana ba rakatania. Ia na e uramu oi na taunimanima hutuma ida dala badana ai ba raka, una na “mase gabuna e laomu dalana.” (Mat. 7:13) To, bema ta uramu dala rotonana ai baita raka, namona na Iesu baita kamonai henia bona baita laloa una dala rotona na ita igimada ḡauna. Hari, Iesu ese e gwauraia baita karaia ḡauna ma ta baita herevalaiamu.

10. Mataio 5:23, 24 ena hereva heḡereḡerena, Iesu be e gwa dahaka baita kara na namo?

¹⁰ Mataio 5:23, 24 ba duahi. Iesu ese ia e kamonai heniava Iuda taudia ediai mai anina bada ḡauna ta e herevalaia. Mani a laloa, tau ta na dubu ai e ura ena boubou ḡauna na hahelaḡa tauna baine henia. Bema baine helalotao ia na tadikakana ida do se herohemaino, ena boubou ḡauna baine rakatania bena “bainela.” Dahaka dainai? Badina ia ese mai anina bada ḡauna ta baine karaia guna, gabeai ena boubou ḡauna baine heni. Iesu na e gwa: “Tadikakamu ida ba herohemaino guna.”

11. Iakobo na Esau ida baine herohemaino totona, dahaka e kara?

¹¹ Herohemaino karana ai, idaunega tauna Iakobo enai e vara ḡauna amo mai anina bada ḡaudia baita dibamu. Iakobo na idau hanua ai laḡani 20 e noho murinai, Dirava ese e haḡania ena hanua baine lou lao. (Gen. 31:11, 13, 38) To hekwakwanai ta na mia. Ia kakana, Esau na e ura ia baine alaia. (Gen. 27:41) “Iakobo na e gari dikadika, kudouna e hetaha” badina kakana ese reana dounu e badu heniava. (Gen. 32:7) Iakobo be dahaka e kara kakana ida bae herohemaino? Ḡau ginigunana na, Iehova enai una e ḡuriḡurilaia. Bena, harihari ḡaudia na e siai lao Esau dekena. (Gen. 32:9-15) Gabeai, raruosi e hedavari neganai, Iakobo na kakana Esau imatauraina karadia e kara. Esau vairanai e tui diho​—dia nega tamona o rua, to nega hitu! Iakobo na mai ena manau bona hemataurai ida kakana ida e herohemaino.​—Gen. 33:3, 4.

12. Iakobo ena haheitalai amo dahaka ta dibamu?

¹² Iakobo na e heḡaeḡae kakana baine hedavari henia bona e hereva henia dalana amo ḡau ta, ta dibaiamu. Iakobo na mai manauna ida Iehova e noia baine durua. Bena ena ḡuriḡuri heḡereḡerena, ḡau haida e kara kakana ida bae herohemaino totona. Raruosi e hedavari neganai, Iakobo na kakana ida se heai daika be maoro bona daika be kerere. Iakobo ena ura na kakana ida baine herohemaino. Iakobo ena haheitalai be ede baita tohotohoa toma diba?

13-14. Bema tadikakada ta hahisiamu, dahaka baita kara na namo?

¹³ Mauri dalana ai ta rakamu tauda na ta uramu tadikakada ida baita herohemaino. (Roma 12:18) Bema ta dibamu tadikakada ta na ta hahekwakwanaia, dahaka baita kara na namo? Iakobo heḡereḡerena, mai kudouda ibounai ida Iehova baita ḡuriḡuri henia. Baita noia baine duruda tadikakada ida baita herohemaino totona.

¹⁴ Nega baita ato siboda eda kara baita haeroa. Siboda ese ini henanadai baita heni: ‘Lau be mai manaugu ida ma haida ida na herohemainomu, a? Iehova bona Iesu be ede be lalo  tomamu, bema lau na ba hekwarahimu tadikakagu ida ba herohemainomu?’ Unu henanadai haeredia ese be durudamu Iesu baita kamonai henia, bona mai manauda ida tadikakada dekena baitala baita herohemaino. Una dala amo, Iakobo ena haheitalai baita tohotohoa dibamu.

15. Edena dalai Efeso 4:2, 3 ena hahekau herevana ibadinana karana ese baine duruda tadikakada ida baita herohemaino?

¹⁵ Mani a laloa, bema Iakobo na mai ena hekokoroku ida kakana bema heai henia, reana ḡau dikana ta bema vara. Bema tadikakada dekena ta laomu hekwakwanai baita hamaoromaoroa totona, namona na baita manau. (Efeso 4:2, 3 ba duahi.) Hereva Lada-isidia 18:19 na e gwaumu: “Tadikakana ese e kahaiamu tauna na hanua aukana na heto, a heiri-heiri na ruma aukana auridia na heheto.” Bema una tadikaka o taihu enai sori herevana baita gwauraiamu, una ese ia danu be duruamu baita herohemaino totona.

16. Dahaka danu baita laloa bada na namo, bona dahaka dainai?

¹⁶ Tadikakada enai baita gwaurai herevadia bona baita gwauraia dalana baita laloa namonamo na namo. Bema ita na da heḡaeḡae, namona na ta hahisia tauna baita hereva henia bona baita hekwarahi unu amo eda hetura karana ia ida basine dika. Reana matamanai, ia be gwauraimu herevadia ese laloda be hahisimu. Bona reana una dainai baita badumu eiava baita gwaumu ita na maoro bona ia na kerere, to unu baita kara tomamu neganai ita be herohemaino dalana ta badinaiamu, a? Lasi. Baita helalotao tadikakada ida baita herohemaino karana na mai anina bada, to daika be maoro bona daika be kerere na dia ḡau badana.​—1 Kor. 6:7.

17. Gilbert ena haheitalai amo dahaka o dibamu?

¹⁷ Tadikaka ta ladana Gilbert na e hekwarahi ta ida baine herohemaino. Ia na e gwa: “Natugu kekenina ida padamai ai hekwakwanai momo e vara. Laḡani rua mai kahana lalodiai, na hekwarahi mai momokanigu bona mai manaugu ida ia na hereva henia, emai hetura karana baine namo lou totona.” Gilbert be ma dahaka danu e kara? Ia na e gwa: “Ia ida do asia herevahereva lalodiai, na ḡuriḡuriva bona lalogu na haheḡaeḡaeava unu amo basina badu bema ia ese ihahisigu herevadia baine gwaurai. Namona na baina heḡaeḡae ena dika baina gwauatao. Lau na dibaia ḡauna na basina gwa lau na maoro, to na laloparara egu  maduna na maino baina havaraia.” Bena dahaka e vara? Gilbert na e gwa: “Hari, lalogu na e mainomu badina egu hetura karana egu ruma bese ida na namo.”

18-19. Bema tadikakada ta hahisia, laloda baita hadai dahaka baita kara, bona dahaka dainai?

¹⁸ Lalomu ba hadaia dahaka ba kara bema o dibamu tadikakamu ta na o hahisia? Namona na Iesu ena sisiba ba badinaia bona maino karaia. Iehova enai ba ḡuriḡurilaia, bona iena lauma helaḡa ena heduru ai ba tabekau, unu amo maino ihavarana tauna ai baola. Bema unu bo kara tomamu, oi na bo moalemu bona bo hahedinaraiamu Iesu o kamonai heniamu.​—Mat. 5:9.

¹⁹ Ita na ta moalemu badina Iehova na mai lalokauna ida kongrigeisin “kwarana,” Iesu Keriso amo ita e hakaudamu. (Efe. 5:23) Namona na laloda baita hadai ‘ia erena baita kamonai,’ aposetolo Petro, Iakobo, bona Ioane e kara heḡereḡerena. (Mat. 17:5) Tame diba, ita ese ta hahisia tadikakana o taihuna ida baita herohemainomu neganai, ta hahedinaraiamu Iesu erena na ta kamonaimu. Unu baita kara tomamu bona mauri e lao heniamu dala rotonana ai baita rakamu neganai, hari bona vaira negai hahenamo momo baita abimu.