MWAHA WOOSOMIYA 51
Nhihiye uviriyana ncu na Yesu
“Ula Mwanaka, nonfentaaka ni nomwaaminnyaaka. Munviriyane.”—MAT. 17:5.
NCIPO 54 “Este É o Caminho”
NINHALA WIITTHUCANI? *
1-2. a) Isiyani Nluku yaarumalyaawe maapostolu upanka, ni niireke ayo yahopanka iyo itthwiiyo? b) Isiyani inhaleehu wiitthuca nhina ula mwahoola?
NAVINRE Paasikuwa o mwaakha wo 32, apostolu Peturu, Tiyaku ni Joau yahoona itthu yootikhiniha. Yesu ahaacisa wa mwaakoni woorekama, atthunaka weehaniya Hermom, ni ikhovyaawe yahorukunusiya ayo yamoonaka. Ibiiblya ineera: “Ikhovyaawe yahopharela toko ncuwa, ni ikuwo cawe cahopharela toko iluusu.” (Mat. 17:1-4) Maapostolu ahinaaya umaliha woona iyo itthwiiyo, yahomwiiwa Nluku eeraka: “Ula Mwanaka, nonfentaaka ni nomwaaminnyaaka. Munviriyane.” (Mat. 17:5) Apostolu Peturu, Tiyaku ni Joau yaheettela ayo moolumwaayo. Ukhuma nne nihukunne mpaka waakhwilyaaya, yahonviriyana Yesu. Hiiva nimpheela waatakiha ayo maapostolwaayo.
2 Nhina mwaha woosomiya uvinre, niheetthuca mananna onviriyana Yesu, nihiyaka upanka citthu ciniirenlyaawe wiira nihiye upanka. Vano nhina ula mwahoola, ninaahala wiitthuca citthu piili Yesu ciiralyaawe wiira nihaana nipankaka.
“NKELELE NKHORA WOOPHURYA”
3. Toko cinthoonyeraaya Matewus 7:13, 14, isiyani inlamuliyeehu upanka?
3 Nsome Matewus 7:13, 14. * Yesu ahowiirela attharyaawe wiira ciri mikhora miili cinrweeha mittala coovirikana. Uhaavo nkhora “wowaatapuwa” ni uhaavo nkhora nkiina “woophurya”. Khuuvo nkhora woneeraru, masi ciri mikhora miili paasi. Khula ntthu haana athanlaka nkhorani unhalaawe ukelela. Iyo ikhanle itthu yuulupale inlamuliyeehu uthanla, kontha nkhora unhaleehu uthanla pooti uniphwanyiha awula unihaleeliha ukumi woohimala.
4. Nttonkace mananna ciryaaya iparapaari “yowaatapuwa”.
4 Nihiliyale wiira nnyo mikhora miilinnyo cinaavirikana. Atthu enci anthala nkhora “wowaatapuwa” kontha ukhanle nkhora woohirika ukela ni iparapaaraaya uyo nkhorooyo khinrika weettiya. Ikhanle itthu yooriipiha nrima uwoona atthu enci yathanlaka weetta iyo iparapaareeyo ni yapankaka citthu cimpakaaya atthu enci ntuninyani. Masi ayo atthwaayo khancuwela wiira iyo ikhanle iparapaara ya Sotwani ni inrweeha wuukhwani.—1 Akor. 6:9, 10; 1 Joau 5:19.
5. Isiyani atthu enci ipankilyaaya wiira aphwanye iparapaara “yoophurya” ni yeette nhina iyo iparapaareeyo?
5 Masi iparapaara “yoophurya” iri mananna makhwaawe, ni Yesu aheera wiira atthu anthanla iyo iparapaareyo akhanle vakaani. Nlattuni? Nlattu wo maporofeeta owootha. Iyo phi itthu Yesu yaahimenryaawe attharyaawe nhina Matewus 7:15. Ntuninyani motheene, cihaavo ittiini imiliyawu cene, masi ittiini cotheenennyo cineehimya wiitthuciha ikhweeli. Nlattu wo iyo, atthu enci anaahiya utotha ikhweeli awula anaakhala oonyoonyiya nlattu woohicuwela ittiinini ineetthuciha ikhweeli. Masi wanaakhitirya uphwanya iparapaara inrweeha wuukumini woohimala. Yesu enre: “Mwaahihiyeke utthara moolumwaaka, nnaahala ukhala khweeliini attharyaaka. Ni nnaarwaa ucuwela ikhweeli, ni ikhweeli inaahala wuutaphulani.” (Joau 8:31, 32) Wakhala wiira nyuuva nhophwanya iphiro ineetteliya ikhweeli ni nholakela weettela iyo iphirweeyo ni uhaatakiha atthu enci, unawuuphwanelani uttottopeliya. Nyuuva nhosoma cinene Ibiiblya, nheetthuca citthu Nluku cimpheelaawe wiira mpanke ni nhancera uviriyana ncu na Yesu. Wootakihera, nheetthuca wiira Yehova nopheela wiira nyuuva nhiye ukupali citthu cowoothiya cineetthucihiya mmattiinini. Nyuuva nnaacuwela wiira uhiya citthu cotheenennyo ni upanka ile impheelaawe Yehova unaarika. (Mat. 10:34-36) Pooti ukhalaka wiira wahoorikani upanka marukunuso muukumini winyu. Waanookhalaru commo, nyuuva khanhiyale urukunusa makhalelweenyu kontha nnawaafenta Athumwaninyu, Yehova, ni nnopheela waatteeliha nrima. Khweeliini, Yehova naakhala ootteeliya nrima cinene nlattu woowoonani mpankaka commo!—Miru. 27:11.
ISIYANI INHALA WUUKAVIHERANI UHIHIYA WEETTA MPARAPAARANI YOOPHURYA?
Malamulo ni ikano ca Yehova cinaanikavihera uhihiya weetta mparapaarani “yoophurya” (Nwehe iparaagarafu 6-8) *
6. Khampa cinhimyaaya Isaalimu 119:9, 10, 45, ni 133, isiyani inhala unikavihera uhihiya weetta mparapaarani yoophurya?
6 Isiyani inhala wuukaviherani wiira nhihiye weetta mparapaarani yoophurya? Muupuwele ila itthwiila. Iparapaara coophurya cinci cinkhalaka mmamyaakoni ni pooti utekeliya iluwani yankaani wiira atthu anvira ahimore. Unari wiira nnyo iparapaarannyo khacaatekeliya mwaaluwani, anakaaro atthunaka yanhala uhapuwa ni upanka asitente. Khweeliini, khaavo ntthu aahala wuupuwela wiira iyo iluwaniiyo khinafayita ni inaarikarikiha weetta. Inanna imocaaru, malamulo a Yehova amphwanyannya mbiiblyani ankhala khampa iluwani. Ayo malamulwaayo anaanikhikicera ni anaanikavihera uhihiya weetta iparapaara yoophurya inrweeha wuukumini.—Nsome Isaalimu 119:9, 10, 45, 133. *
7. Kontha isiyani khunlamuliya wuupuwela wiira iparapaara yoophurya khinoohiya utaphuwaka?
7 Wakhala wiira weeva ummiravo, unawuupuwelaka wiira malamulo a Yehova khanoohiya utaphuwaka wiira upanke citthu cimpheelaa? Sotwani nopheela wiira weeva wuupuwele commo. Uyo nopheela wuupankiha wuupuwela wiira phataari weetta iphiro yowaatapuwa ni upanka khula itthu inhala wuucivela. Ciicammo, aavarelaka nteko atthu anaasomanaa ni internet, Sotwani nopheela wuupankiha weeva wuupuwela wiira khuneelawa. * Masi uhiliyale: Sotwani khampheela uwoona wuupuwelaka wiira iphiro yowaatapuwa inrweeha wuutankanyiyani. Iyo kahi phi itthu inoophelelaawe Yehova. Uyo noopheelela ukumi womaana ni nopheela wiira uhihiye weetta munttalani unrweeha wuukumi woohimala.—Isaa. 37:29; Isai. 35:5, 6; 65:21-23.
8. Itthu yankhumelenle Olaf inwiitthuciha isiyani amirawo?
8 Moone itthu yankhumelenle munna mmoca neehaniya Olaf. * Asithiyana yaasomanaawe khayaahiya unkhanyereriha wiira aarupane. Ukati waahimeryacilyaawe wiira uyo aari Saahiti a Yehova ni eettela citthu cineetthucihaaya Ibiiblya, asithiyana akhwaawe yahancera wiivaherera imweeni wiira aarupane kontha yaapheela untteha ni umoona khampa khweeliini eettela Ibiiblya. Olaf aholipa ni khaapankile itthu yaakhanyererihiyaawe. Masi kahi iyo paahi. Olaf neera: “Mapurosooryaaka yahokikhanyereriha wiira kirwee kasome icikola yuulupale. Ayo yenre wiira karwaaka usoma nnyo icikolannyo phaahalaaka uhisimiya ni upuha.” Isiyani yanlipihale munna Olaf uyo ukatyuuyo? Uyo neera: “Mi kaanawaapatthanana mayamunna owanlokoni ni ayo yaakhala khampa amucyaaka. Ciicammo, kaheekurumica usoma Ibiiblya cinene ni ukati waasomaaka, kaanaatepa ukupali wiira kahophwanya ikhweeli. Phimaana, kaholakela uhihiya unvaresesa Yehova.”
9. Isiyani inlamuliyeehu upanka wiira nihihiye weetta mparapaarani yoophurya?
9 Sotwani nopheela wiira nyuuva nhiye weetta iparapaara inrweeha wuukumini ni nopheela uwoonani mweettaka iparapaapa inthanlaaya atthu enci “inrwaana wuutankanyiyani.” (Mat. 7:13) Masi hi niholakela unviriyana Yesu ni weetta iparapaara yoophurya innikhikicera. Vano, nttwee noopele mwaha itthu ikhwaawe Yesu inirumalyaawe wiira nipanke.
MUMMALIHE NANROKOTTOLE NIMUNNEENYU
10. Toko cinthoonyeraaya Matewus 5:23, 24, isiyani Yesu inirumalyaawe upanka?
10 Nsome Matewus 5:23, 24. * Nhina nnyo iveerusunnyo, Yesu nawuuluma itthu yuulupale ayuuta yaapankesaaya. Mmuupuwele nyuuta nari ntempulu apheelaka unvaha nankuttho inamaawe wiira ivahereriye khampa itthuvo. Masi hinaaya uvaha, uyo nawuupuwela wiira haana nanrokottole nintthu nkhwaawe. Vano, hataa ukhalaka wiira uvaherera itthuvo yaari itthu yuulupale cinene, uyo naahiya iyo inameeyo ni naarwaa untotha uyo ntthuuyo. Nlattuni umpankaawe commo? Uyo mpaka commo kontha ihaavo itthu yuulupale cinene uvikana unvaha itthuvo Yehova. Yesu ahohimya iyo itthwiiyo ukati wenryaawe co: “Wammalihe nanrokottole nimunnaa.”
Yakopi aheeyeviha ni ahommaliha nanro- kottole aarinaawe nimuulupalyaawe. Nyuuva nnaahala upanka toko Yakopi? (Nwehe iparaagarafu 11-12) *
11. Isiyani Yakopi yaapankilyaawe wiira akhitiri ummaliha nanrokottole aarinaawe nimuulupalyaawe?
11 Itthu yankhumelenle Yakopi inaaniitthuciha ikano yofayita cinene nhina ummaliha nanrokottole. Yakopi ahothama ilapo yaayariyaawe ni ahoviriha myaakha 20 akhalaka ilapo ikhwaawe. Vano, Yehova ahoruma nlayikha urwaa umwiirela Yakopi wiira aturuwele ilapo yaayariyaawe. (Upha. 31:11, 13, 38 Masi yahaavo itafaawuti imoca. Isawu aholakela umwiiva Yakopi. (Upha. 27:41) “Yakopi ahosanka venci ni ahoova” kontha ooniha wiira muulupalyaawe nanlelo aananlupattha. (Upha. 32:7) Vano isiyani yankavihenre Yakopi ummaliha nanrokottole aarinaawe nimuulupalyaawe? Woopacera, uyo ahonlompa Yehova ninrimaawe wotheene ni ahonhimyera uyo mwahooyo. Ciicammo, Yakopi ahotthenkaca itthuvo wiira anvahe Isawu. (Upha. 32:9-15) Ni ukati woonanacalyaawe ni Isawu, Yakopi aheeyeviha ni ahonttitthimiha. Yakopi ahokhoroma uhoolo wa Isawu kahi ikwaha imoca awula piili, masi ikwaha saapa! Yakopi aakhitinri ummaliha nanrokottole aarinaawe nimuulupalyaawe kontha aheeyeviha ni ahothoonyera ihisima.—Upha. 33:3, 4.
12. Itthu yaapankilyaawe Yakopi inniitthuca isiyani?
12 Itthu Yakopi yaapankilyaawe wiira ammalihe nanrokottole aarinaawe nimuulupalyaawe inaaniitthuciha itthu yofayita. Yakopi aheeyeviha ni aholepela ukaviheriya ni Yehova. Vano aheekurumica upanka yotheene yaakhitiryaawe wiira ammalihe nanrokottole aarinaawe nimuulupalyaawe. Woonananaca wawe ni Isawu, Yakopi khaamananihile uthoonyera tipani aarina isariya ni tipani ahaarina. Itthu yaapheelaawe Yakopi waari ummaliha nanrokottole aarinaawe nimuulupalyaawe. Ninlamuliya untakiha cani Yakopi?
ISIYANI INHALA UNIKAVIHERA UMMALIHA NANROKOTTOLE?
13-14. Isiyani inlamuliyeehu upanka wakhalaka wiira nihontthekela munneehu?
13 Napheelaka uhihiya weetta mparapaarani inrweeha wuukumini woohimala, nihaana niiwananaka nimayamunneehu. (Aroo. 12:18) Masi wakhalaka wiira nihontthekela munneehu, isiyani inlamuliyeehu upanka? Nihaana nintakihaka Yakopi ni unlompa Yehova. Pooti wanonlepeleehu Yehova wiira anikavihere ummaliha nanrokottole nimunneehu.
14 Ciicammo, nihaana nikumihaka ukati ni wuupuwela ala makohwaala: ‘Mi kinaakupali uhiya uttuli wiicoona waka wiira kiiyevihe, kilepele nsammaha ni kimmalihe nanrokottole? Yehova ni Yesu anhala ukhala cani yakoonaka wiira kiheekurumica urwaa umuulumana munnaaka awula nuunwaaka wiira kimmalihe nanrokottole nuuyo?’ Wiipanka ayo makohwaayo pooti univaha ikuru wiira niiwelele ncu na Yesu, wiira niiyevihe ni wiira nintothe munneehu nipheelaka ummaliha nanrokottole rineehu nuuyo. Napankaka commo, ninaahala ukhitiri untakiha Yakopi.
15. Upanka itthu yantikhiye nhina Efesu 4:2, 3, unhala unikavihera cani ummaliha nanrokottole nimunneehu?
15 Woonela winyu, isiyani yaahala wiirannyaa unari wiira Yakopi ahothoonyera wiicoona ukati waakumanacilyaawe ni Isawu? Ayo atthunaka khayaahala ukhitiri ummaliha nanrokottole yaarinaaya. Phimaana, napheelaka ummaliha nanrokottole rineehu nimunneehu, nihaana niiyevihaka. (Nsome Efesu 4:2, 3. *) Miruku 18:19 ineera: “Munneehu ootthekeliya naarika umuulumana upwaha inanna cinrikaaya ukela isittatti yoolipihaciya; ni ahaavo ananrokottole anlipa khampa matthukeliyo isittatti cookhikiceriya cinene.” Ulepela nsammaha niiyevihaka pooti unikavihera utthukula ikattiyatto co iyo isittatti ‘yoolipihaciyeeyo.’
16. Isiyani inlamuliyeehu wuupuwela nihinaaya urwaa ummaliha nanrokottole nimunneehu, ni nlattuni?
16 Napheelaka urwaa ummaliha nanrokottole nimunneehu, nihaana nipaceraka wuupuwela isiyani inhaleehu urwaa wuuluma ni mananna oohala urwaa wuuluma. Vano, noonaka wiira niheetthenkaca, nihaana nintothaka uyo munnooyo ni upanka yotheene inhaleehu ukhitiri wiira aturuwele ukhala mpatthaniihu. Pooti ukhalaka wiira wiipaceroni, uyo naahala wuuluma citthu cihinhala unicivela. Yeerannyaaka iyo itthwiiyo, nyuuva pooti uwaakuvyeelani urusiya ni umananiha wiicaakiha. Masi upanka commo, khunhala wuukaviherani ummaliha nanrokottole. Nhiliyale: ummaliha nanrokottole rineenyu nimunneenyu phi itthu yuulupale uvikana uthoonyera tipani rina awula hirina isariya.—1 Akor. 6:7.
17. Isiyani yiitthucileenyu niitthu yaawiirannyenle amunna Gilbert?
17 Amunneehu aneehaniya Gilbert yahaana yiikurumicaka wiira ammalihe nanrokottole yaarinaaya nimwanaya. Ayo aneera: “Mi ni mwanaka mwanthiyana khaneewanana. Cahovira myaakha miili kimananihaka umuulumana saana ni ummaliha nanrokottole arineehu.” Isiyani-tho ayo amunnaayo yaapankilyaaya? Ayo aheera: “Khula ikwaha yaarwaaka umuulumana mwanaka, mi kaapacera ulompa. Kaanaamananiha wiitthenkaca tookooni wiira kicuwele itthu yowuuluma awula yoopanka akiviruwelaka. Mi kancuwela wiira kahaana kipheelaka unlevelela. Uyo ukatyuuyo, mi kaheetthuca wiira itthu yofayita cinene khawaari uthoonyera wiira mi kahaana isariya, masi waari ummaliha nanrokottole wiira nikhalakhale niiwanananaka.” Amunna Gilbert anaahimya itthu yeerannyeele wiikurumica waya upanka commo: “Nnaco, kihaana nnema wanrimani waka kontha kinawiiwanana sana-saana nimwanaka.”
18-19. Wakhalaka wiira nihontthekela munneehu, isiyani inlamuliyeehu ulakela upanka, ni nlattuni?
18 Wakhalaka wiira nihontthekela munneehu, isiyani inlamuliyeehu ulakela upanka? Mweettele ikano yaavahalyaawe Yesu ni mummalihe nanrokottole nuuyo munnooyo. Mmuulumane Yehova munhimyeeraka uyo mwahooyo ni nkhuluvele nnepaawe wowaarya wiira wuukavihereni ummaliha nanrokottole rineenyu ni munneenyu. Mwapankaka commo, unaahala wuutteelani nrima ni nnaahala uthoonyera wiira khweeli nnanviriyana Yesu.—Mat. 5:9.
19 Unaareera ucuwela wiira Yehova honvahacera Yesu, Nhooleli nloko no makristau, unihoolela nhina meettelweehu otheene. (Efesu 5:23) Khampa apostolu Peturu, Tiyaku ni Joau caalakenlyaaya unviriyana Yesu, hiiva ciicammo nilakele unviriyana. (Mat. 17:5) Nhina ula mwahoola, niheetthuca mananna cinlamuliyeehu ummaliha nanrokottole. Napankaka iyo ni naahihiyeke weetta mparapaarani inrweeha wuukumini woohimala, ninaahala ukhala unitteelaka nrima ilelo, ni wahoolo, ninaahala uphwanya utteeliya nrima woohimala.
NCIPO 130 Nihaana nilevelelanaka
^ par. 5 Yesu honiitthuciha wiira nihaana nikelelaka nkhora woophurya umpiiha wuukumini. Uyo ciicammo honiitthuciha wiira nihaana niiwananaka nimiyamunneehu ni miyanunwiihu o wanlokoni. Masi isiyani innirikihela weettela ayo moolumwaayo? Ni isiyani inhala unikavihera waanana ayo marikarikwaayo?
^ par. 3 Matewus 7:13 Nkelele nkhora woophuryaa; kontha wowaatapuwa ukhanle nkhora ni yowoottootta ikhanle iphiro inrwaana wuutankanyiyani, ni enci phankelela; 14 masi, woophurya ukhanle nkhora ni yowoottootta ikhanle iphiro impiiha wuukumini, ni vakaani phanoonelela.
^ par. 6 Isaalimu 119:9 Isiyani mmirawo inlamuliyaawe upanka wiira hihiye ukhalana meettelo omaana? Uyo haana hiitthaalaka ni haana eettelaka nuulumo naa. 10 Kinawuutotha ninrimaaka wotheene. Uhikihiye kihapuwaka ni uhiya weettela malamulwaa. 45 Mi kinaahala weetta nipuro nonnema, kontha kinaatotha weettela marumwaa. 133 Weettihere saana meettelwaaka nnuulumoni naa; Ihikhale itthu yootakhala inhala ukikhitiri.
^ par. 7 Nwehe ibroxura 10 Perguntas Que os Jovens Fazem, nihoko 6 nineera: “Como posso enfrentar a pressão para fazer o que é errado?” ni moone ividiyu Resiste à Pressão dos Colegas! nsayitini jw.org. (Nkele wantikhiye ENSINOS BÍBLICOS > ADOLESCENTES.)
^ par. 8 Macina makhwaawe ahaakakhanihiya.
^ par. 10 Matewus 5:23 Phimaana, wakusaka itthuvwaa wiira wavaherere wakhilompini, ni nwo wuupuwelaka wiira uhaana nanrokottole nimunnaa, 24 uhiye itthuvwaa uhoolo waya ikhilompi ni urwee. Wammalihe nanrokottole nimunnaa, vano uhokolye wiira uvahe itthuvwaa.
^ par. 60 ILATARATO: Iparapaara yoophurya ihotekeliya iluwani inakhikicera atthu anvira. Iyo iluwaniiyo cikhanle ikano ca Yehova. Naahihiyeke weetta iyo iparapaareeyo ninaahala ukhitiri unyema citthu coohiloka, toko ipornografia, apatthani oohiloka ni ninaahala ukhitiri ulipa nakhanyererihiyaka ukela icikola cuulupale.
^ par. 62 ILATARATO: Yakopi wiira ammalihe nanrokottole, ahokhoroma ikwaha cinci uhoolo wa Isawu.
