1, 2. 1) ¿Tlake kinnauatijkej eyij apóstoles ma kichiuakaj, uan tlake kichijkej? 2) ¿Tlake tikitasej ipan ni tlamachtili?

IPAN xiuitl 32 kema ya panotoya nopa iljuitl Pascua, apóstoles Pedro, Santiago uan Juan kiitakej se ueyi tlamantli. Kema itstoyaj ipan se ueyi tepetl, uelis ipan se tepetl tlen Hermón, Jesús “kipatlak itlachialis iniixtla”. Biblia kiijtoua: “Ixayak kauanki keja Tonati uan iyoyo mokuepki chipauak keja tlauili” (Mat. 17:1-4). Kema nechka tlamiskia tlen kiitakej, kikajkej kema Jehová kiijtok: “Ya ni noKone tlen nikiknelia. Nijpia miak pakilistli ika tlen kichiua. Xijtlakakilikaj” (Mat. 17:5). Kej monejnemiltijkej ni eyij apóstoles, kinextijkej nelia kitlakakiliyayaj Jesús, uan tojuantij nojkia tijnekij tijchiuasej kej inijuantij.

² Ipan tlamachtili 50, timomachtijkej tijtlakakilisej Jesús kiijtosneki ayokmo tijchiuasej se keski tlamantli. Uan ipan ni tlamachtili tikitasej ome tlamantli tlen Jesús kiijtok moneki tijchiuasej.

3. Kej kiijtok Jesús ipan Mateo 7:13, 14, ¿tlake moneki tijchiuasej?

³ (Xijpoua Mateo 7:13, 14, TNM). * Jesús kiijtok onka ome kaltemitl tlen amo sanse, se “patlauak” uan se “pitsaktsi”. Kej tikitaj, onka san ome ojtli. Sejse tlen tojuantij moneki kitlapejpenis ipan tlake ojtli itstos. Tlauel ipati kuali tijtlapejpenisej pampa nopa techpaleuis tijpiasej o amo nopa nemilistli tlen axkema tlamis.

4. ¿Kenijkatsa tikixtomaskia nopa ojtli patlauak?

⁴ Tlauel ipati tijmatisej kenke amo eli sanse nopa ome ojtli. Miakej yauij ipan nopa ojtli patlauak pampa amo ouij  kimatij nemisej nopaya. Miakej kiampa kichiuaj san pampa kinitaj sekinok nopaya yauij. Inijuantij amo kikuamachiliaj tlaj Satanás kineki nopaya ma yakaj, uan kiampa kintsontlamiltisej (1 Cor. 6:9, 10; 1 Juan 5:19).

5. ¿Tlake kichijtokej se keskij uan kiampa itstosej ipan nopa ojtli pitsaktsi?

⁵ Nopa ojtli pitsaktsi amo eli kej nopa seyok ojtli pampa Jesús kiijtok nopaya amo miakej yauij. ¿Kenke? Ipan nopa seyok versículo, Jesús kiijtok moneki timomokuitlauisej pampa itstoskiaj tlakajkayauanij (Mat. 7:15). Onka tlauel miak religiones uan nochi kiijtouaj tlamachtiaj tlen melauak. Yeka, tlauel miakej amo kimatij tlake religión eli melauak uan ayokmo kinekij kitemosej. Maske kiampa pano, Jesús kiijtok: “Tlaj mojmostla inkichijtiasej tlen niinmechiljuia, uajka nelia initstosej innomomachtijkauaj. Uan inkimatisej tlen melauak, uan nopa tlen melauak inmechtojtomas para uelis innemisej inmajkajtokej” (Juan 8:31, 32). Tlauel kuali pampa ta amo tikintokilik sekinok uan tijnejki tijmatis tlen melauak. Yeka, pejki kuali timomachtia Biblia uan kiampa tijkuamachilik tlen Jehová kineki ma tijchiuakaj uan tijtlakakilik tlen Jesús tlamachtik. Se neskayotl, tijyekok Jehová amo kipaktia ma tijchiuakaj tlen tlamachtiaj sekinok religiones, ayokmo ma tiiljuichiuakaj uan amo ma tijchiuakaj tlen maseualmej momajtokej kichiuaj, tlen Biblia amo tlamachtia. Nojkia, tikitak kemantika ouij tijchiuas tlen Jehová kiijtoua uan tijkauas tlen achtouia tijchiuayaya (Mat. 10:34-36). Maske uelis tijmatki ouij tijpatlas kej timonejnemiltiyaya, tijchijki se ueyi kampeka tijyolpakiltis Jehová pampa tikiknelia uan tijnejki kuali ma mitsita. Yeka, xikilnamikto ya tlauel yolpaki pampa tijtekipanoua (Prov. 27:11).

6. Kej kiijtoua Salmo 119:9, 10, 45 uan 133, ¿tlake techpaleuis nojua tiitstosej ipan nopa ojtli pitsaktsi?

⁶ Tlaj ya tiitstokej ipan nopa ojtli pitsaktsi, ¿tlake techpaleuis nojua tiitstosej nopaya? Ma tikitakaj ika se neskayotl. Ipan se keskij altepemej nopa carreteras amo patlauak, yeka inakastla kitlalijtokej se tepostli tlen kinpaleuia carros. Kema se carro nopaya yaui, nopa tepostli kipaleuia amo ma mokuatepexiui. Yon se maseualmej amo kualani pampa kitlalijkej nopa tepostli. Sanse kej nopa tepostli, toTeotsij itlanauatiljuaj tlen eltok ipan Biblia, techpaleuia nojua ma tiitstokaj ipan nopa ojtli pitsaktsi (xijpoua Salmo 119:9, 10, 45, 133).

7. ¿Kenijkatsa moneki kiitasej telpokamej nopa ojtli tlen pitsaktsi?

⁷ Telpokatl, ¿timoiljuia Jehová itlanauatiljuaj amo mitskaua tijchiuas se keski tlamantli tlen mitspaktia? Satanás kineki kiampa ximoiljui. Kineki xikita katli yauij ipan nopa ojtli patlauak nesij tlauel yolpakij. Nojkia, kineki ximoiljui ta amo tiyolpaki kej sekinok, uelis kej katli ininuaya timomachtia o katli tikinita ipan redes sociales. Uan kineki ximoiljui toTeotsij itlanauatiljuaj amo mitspaleuia xiyolpaki. * Tlaj kiampa mitspano, xikilnamiki Satanás  amo kineki ma kimatikaj katli yauij ipan nopa ojtli patlauak, teipa kintsontlamiltisej. Uan ta kuali tijmati tlen Jehová kitenkajtok: katli yauij ipan nopa ojtli tlen pitsaktsi kiselisej nemilistli tlen axkema tlamis (Sal. 37:29; Is. 35:5, 6; 65:21-23).

8. ¿Tlake uelis kiyekosej telpokamej tlen kipanok Olaf?

⁸ Xikita tlake uelis tijyekos tlen kipanok se toikni telpokatl katli itoka Olaf. * Katli ininuaya momachtiyaya kitetsopayayaj ma moteka ininuaya ichpokamej. Kema kiniljuik moyakana ika tlen Biblia tetlajtolmaka, miakej ichpokamej katli ininuaya momachtiyaya, kinejkej kichiualtisej ma moteka ininuaya. Maske miakpa kitetsopkej, ya mosentlalijtoya amo kiampa kichiuas. Olaf kipanok seyok tlamantli. Ya kiijtoua: “Katli nechmachtiyayaj nechtetsopayayaj ma nimomachti universidad pampa nopa kichiuaskia ma nechtlepanitakaj. Nechiljuiyayaj tlaj amo nijchiuaskia, amo aka nechpatiitaskia”. ¿Tlake kipaleuik amo kichiuas tlen sekinok kiiljuijkej?  Ya kiijtoua: “Nikintemok kuali nouampoyouaj ipan tlanechikoli, uan nikinitak kej nochampoyouaj. Nojkia, nojua kuali nimomachtik Biblia, nopa nechpaleuik ma nikita nelnelia melauak tlen tlamachtia uan ma nimosentlali nojua nijtekipanos Jehová”.

9. ¿Tlake techpaleuis amo tikisasej tlen nopa ojtli pitsaktsi?

⁹ Satanás kineki ma tikisakaj tlen nopa ojtli tlen “teuika kampa nemilistli” uan ma tikintokilikaj katli yauij ipan nopa ojtli “tlen teuika kampa tetsontlamiltiaj” (Mat. 7:13, TNM). Tlaj nojua tijtlakakilijtosej Jesús uan tikitaj nopa ojtli pitsaktsi kej kampa uelis timomanauisej, techpaleuis amo ma tikisakaj. Nama, tikitasej seyok tlamantli tlen Jesús kiijtok moneki tijchiuasej.

10. Kej kiijtoua Mateo 5:23, 24, ¿tlake kiijtok Jesús moneki tijchiuasej?

¹⁰ (Xijpoua Mateo 5:23, 24). Ipan ni versículos, Jesús kiijtok se keski tlamantli tlen tlauel kipatiitayayaj judíos katli kitlakakilijtoyaj. Ma timoiljuikaj se akajya kiuika kampa sacerdotes se piltlapialtsi katli kimakaskia Jehová kej tlakajkaualistli. Tlaj kiilnamikiskia mokualanijtoya iuaya se iuampo, uajka amo kinamikiyaya temakas nopa tlakajkaualistli. ¿Kenke? Pampa onkayaya seyok tlamantli tlen monekiyaya kichiuas achtoui. ¿Tlake tlamantli? Jesús kiijtok: “Xia achtoui para ta uan moikni ma ximotlapojpoljuikaj uan ximoyoltlalikaj ika tlen panok”.

11. ¿Tlake kichijki Jacob kema moyoltlalik ika Esaú?

¹¹ Tlauel techpaleuis tlaj tikitaj tlen Jacob kichijki kema moyoltlalik iuaya Esaú. Kema Jacob kipixtoya 20 xiuitl itstoya uejka tlen ichampoyouaj, Jehová kiiljuik ika se iluikaejketl sampa ma tlakuepili (Gén. 31:11, 13, 38). Jacob kimatki ouij pampa achtouia Esaú kinekiyaya kimiktis (Gén. 27:41). Yeka, tlauel majmauiyaya uan mokuesouayaya pampa moiljuiyaya iikni nojua tlauel kualantoya (Gén. 32:7). ¿Tlake kichijki Jacob uan kiampa moyoltlalik ika Esaú? Achtoui momaijtok ika nochi iyolo. Teipa, kititlanilik se nemaktli (Gén. 32:9-15). Uan teipa kema mopantik iuaya Esaú kinextik tlauel kitlepanitayaya, yeka mouijtsonki chikompa imiakpa. Kema Jacob moyoltlalik ika iikni, kinextik amo moueyimatki uan kitlepanita (Gén. 33:3, 4).

12. ¿Tlake tijyekouaj tlen Jacob kichijki?

¹² Tlauel techpaleuis tlen achtoui kichijki Jacob uan tlen kichijki kema mopantik iuaya iikni. Achtoui, amo moueyimatki uan kiiljuik Jehová ma kipaleui. Teipa, kichijki tlen kiijtok kema momaijtok, uan kiampa kuali yolpakiskia kema mopantiskia iuaya Esaú. Uan, kema mopantijkej, Jacob amo kiilnamikilik Esaú tlen uejkajkia panotoya. Ya san kinekiyaya moyoltlalis iuaya. ¿Kenijkatsa uelis tijchiuasej kej ya?

13, 14. ¿Tlake uelis tijchiuasej tlaj timoyolkokouaj ika se toikni?

¹³ Katli tiitstokej ipan nopa ojtli tlen pitsaktsi, tijnekij tiitstosej ika tlaseuilistli ika nochi toikniuaj (Rom. 12:18). Yeka, ¿tlake moneki tijchiuasej tlaj timoyolkokouaj iuaya se toikni? Sanse kej Jacob, moneki timomaijtosej ika Jehová ika nochi toyolo uan tikiljuisej ma techpaleui  tijchiuasej kampeka tiitstosej ika tlaseuilistli iuaya toikni.

¹⁴ Nojkia, moneki tijkixtisej tonali tikitasej kenijkatsa tielij. Yeka, uelis timotlatsintokisej: “¿Nijchiua kampeka amo nimoueyimatis, nikiniljuis sekinok ma nechtlapojpoljuikaj uan kiampa niitstos ika tlaseuilistli ininuaya? ¿Kenijkatsa kiyolmatisej Jehová uan Jesús tlaj nijchiuas kampeka nimoyoltlalis iuaya se toikni?”. Kej tijnankilisej ni tlajtlanili techpaleuis nojua ma tijtlakakilikaj Jesús uan ma timotlapojpoljuikaj ika toikniuaj uan amo ma timoueyimatikaj. Tlen kichijki Jacob techpaleuia kiampa tijchiuasej.

15. ¿Kenijkatsa tlen kiijtoua Efesios 4:2, 3 techpaleuia timotlapojpoljuisej ika se toikni?

¹⁵ ¿Tlake panotoskia tlaj Jacob kinextiskia moueyimati kema mopantik iuaya iikni? Uelis amo motlapojpoljuiskiaj. Yeka, tlaj tijnekij tijsenkauasej se kuesoli iuaya se toikni, moneki tijnextisej amo timoueyimatij (xijpoua Efesios 4:2, 3). Proverbios 18:19 kiijtoua: “Nelia ouij para sampa timouampojchiuas iuaya se moikni tlen tikixpanotok, uelis más axouij para tijtlanis se altepetl tlen yaualtik tsaktok ika tepamitl. Kualantli kinxejxeloua tlen achtoui mouampojchiuayayaj keja se puerta ika candado kixejxeloua tlen kalijtik uan kalteno”. Kema tikiljuiaj se akajya ma techtlapojpoljui, eli kejuak nopa llave tlen kitlapoua se “candado”.

16. ¿Tlake achtoui moneki timoiljuisej, uan kenke?

¹⁶ Achtoui moneki kuali timoiljuisej tlake tikiljuisej toikni uan kenijkatsa tikiljuisej. Kema ya tiitstosej iuaya, moneki tikilnamiktosej tijnekij kuali ma kiyolmati uan ma techtlapojpoljui ika tlen panok. Maske uelis kiijtos se tlenijki tlen amo techpaktis, moneki tijchiuasej kampeka amo nimantsi tikualanisej yon timotechtisej ika tlen panok pampa nopa amo techpaleuis timoyoltlalisej iuaya. Ma tikilnamiktokaj, tlauel ipati tiitstosej ika tlaseuilistli ininuaya toikniuaj, uan amo tikitasej ajkia mokuapolojtok (1 Cor. 6:7).

17. ¿Tlake tijyekoua tlen kichijki Gilbert?

¹⁷ Ma tikitakaj tlake kichijki toikni Gilbert pampa kinekiyaya itstos ika tlaseuilistli. Ya kiijtoua: “Amo kuali nimouikayaya iuaya se tlen nochampoyouaj. Kipano ome xiuitl nijchijki kampeka kuali nijnojnotsas  uan sampa kuali nimouikas iuaya”. ¿Tlake nojua kichijki? “Kema nikamanaltiyaya iuaya, achtoui nimomaijtouayaya uan nimoiljuiyaya tlake ueliskia nikijtos tlaj nechyolkokoskia. Monekiyaya nimosentlalijtos nitetlapojpoljuis uan amo san nimoiljuis ipan tlen na nechtekipachoua. Nikitak monekiyaya niitstos ika tlaseuilistli ininuaya sekinok”. Gilbert nojua kiijtoua: “Nama niitstok ika tlaseuilistli pampa kuali nimouika ininuaya nochi nochampoyouaj”.

18, 19. Tlaj tijyolkokojkej se akajya, ¿tlake moneki tijchiuasej?

¹⁸ ¿Tlake ueliskia tijchiuasej tlaj tikitaj tijyolkokojkej se toikni? Moneki tijchiuasej tlen Jesús kiijtok uan kiampa tiitstosej ika tlaseuilistli. Ma tikiljuikaj Jehová nopa kuesoli uan ma tijtlajtlanikaj itonal, kiampa tijsenkauasej nopa kuesoli. Tlaj kiampa tijchiuaj, uajka tiyolpakisej uan tijnextisej tijtlakakiliaj Jesús (Mat. 5:9).

¹⁹ Tlauel tijtlaskamatiliaj Jehová pampa ika miak tlaiknelili techyakana ika Jesús, katli kiyakana nochi tlanechikoli (Efes. 5:23). Sanse kej kichijkej Pedro, Santiago uan Juan, ma timosentlalijtokaj tijtlakakilisej Jesús (Mat. 17:5). ¿Kenijkatsa uelis tijchiuasej? Kema tijchiuaj kampeka tiitstosej ika tlaseuilistli ininuaya katli tikinyolkokouaj. Uan tlaj nochipa tiitstosej ipan nopa ojtli pitsaktsi tlen “teuika kampa nemilistli”, tijselisej miak tlateochiualistli nama uan nochipa tiyolpaktosej.