1-2. (a) Vapostori vatatu va Jesu vakavhunjwa kuitenyi, ivona vakaitenyi? (b) Zvicinyi zvatinozovona pa jijo iyi?

PASURE po Phasika ya 32 Kristu Aviya, mupostori Pedhru, Jakobo na Johani vakavona civoniso cinoshamaisa. Pavainga vari panyezuro po Dundhu Hermoni, Jesu wakaphinduka panyezuro paro. “Kumeso kwake kwakabwaka inga zuva, nguvo jake jakamonikira inga rujhu.” (Mateu 17:1-4) Civoniso ici pacainga phedo no kupera, ivona vakazwa izwi ra Mwari reciti: “Nga uwu Mwana wangu anodiwa, anondidakajisa. Mupurukirenyi.” (Mateu 17:5) Vapostori vatatu ava vakavonesa ngo maponero avaiita kuti ivona vaipurukira Jesu. Itusu tinoda kutevejera muezaniso wavo.

² Pajijo yakapera, takavona kuti kupurukira izwi ra Jesu zvinoreva kutama kuita zviro zvimweni. Pajijo iyi, tinozovona zviro zviviri zvakananga Jesu kuti tinodikana kuzviita.

3. Mukuzwirana na Mateu 7:13, 14, tinodikana kuitenyi?

³ Verenganyi Mateu 7:13, 14. Vonanyi kuti Jesu wakananga ngo musuvo muviri jakasiyana jinoendesa kumakwanja maviri akasiyana. Gwanja rimwe ‘rakakura’ no gwanja rimweni “doko.” Iyena aazivi kunanga ngo gwanja ro citatu. Ndisu tinokheta tega kuti igwanja rapi ratinoda kushandisa. Ici icivaringo cinosisira maningi catingaita, ngokuti igwanja rimwe basi rinotungamirira ku upenyu ucingaperi.

4. Maizosanangurisa kudini gwanja ‘rakakura’?

 ⁴ Tinodikana kunasa kuziva musiyano wo makwanja maviri aya. Vandhu vazinji vari mugwanja ‘rakakura’ ngokuti arinesi kufamba. Zvinosuruvarisa ngo zvokuti vandhu vazinji vanosana kuramba vari mu gwanja iri, veciita zviro zvakafanana no zvinoitwa ngo vandhu vazinji vari mondhomo. Ivona avazwisisi kuti anotungamirira gwanja iri ndi Sathana Dhiyabho. Irona rinoendesa ku rufu.—1 VaKorinte 6:9, 10; 1 Johani 5:19.

5. Vamweni vakavangisira kudini kuti vawane gwanja “doko” no kufamba mu gwanja iri?

⁵ Mukusiyana no gwanja ‘rakakura,’ gwanja rimweni i “doko,” Jesu wakananga kuti vandhu vashoma ndivona vaizoriwana. Ngenyi? Zvinokhahamarisa ngo zvokuti, pavhesi inotevera Jesu wakangwaja vateveri vake ngo pamusoro po vaporofeti vokunyepa. (Mateu 7:15) Vandhu vamweni, vanonanga kuti kuno zviuru zvo magerejha, asi zvizinji zvakona zvinonanga kuti zvinojijsa cokwadi. Zvecivoneka kuti kuna magerejha akawanda, vandhu vazinji vakasuruvara ngokuti iwona aaripi kuvabesera kuwana gwanja rinoendesa ku upenyu. Asi gwanja rondhoro ringawanika. Jesu wakati: “Kudari mukagara meciita zvandinonanga imwimwi muri vajiji vangu kamare, munozoziva cokwadi. Cokwadi cinozomusujunura.” (Johani 8:31, 32) Zvinodakajisa ngo zvokuti imwimwi amuzivi kutevera zvaiitwari ngo vandhu vakawanda, imwimwi makapsaka cokwadi. Makatanga kuvangisira kuti mujije Soko ra Mwari, kuti muzive kuti ngozvapi zvaanoda kwatiri no kupurukira jijiso ja Jesu. Pakati po zviro zvimweni zvamakajija, imwimwi makajija kuti Jehovha anovetera kuti itusu tirambe jijiso jo magerejha okunyepa no kutama kuceukija mafiriyadho akabatana no magerejha o kunyepa. Makajijazve kuti kuita zvinoda Jehovha no kuita cinjo mu upenyu hwenyu kuti mumudakajise, zvingava zviro zvinonesa. (Mateu 10:34-36) Zvingamunesera kuti muite cinjo iji. Asi makaenderera mberi meciita cinjo ngo kuti munoda Baba wenyu vo kudenga no kuda kuvadakajisa. Ivona vakadakara maningi ngo zvamakaitari.—Mazwi Akangwara 27:11.

6. Mukuzwirana na Nduyo 119:9, 10, 45, 133, ngozvapi zvingatibesera kuti tirambe tiri mu gwanja doko?

⁶ Kudari tatanga kufamba mu gwanja iri doko, zvicinyi zvingatibesera kuti tienderere mberi tiri mondhomo? Vonanyi muezaniso unotevera basi. Fenzi jiri mu mbhiripiri mo dundhu jakaitihwa kujivirira vatekenyi vo karu no karu javo, kuti ivona vave vakangwaririka no kuvabesera kuti vatame kubuda mucitaka. Asi vatekenyi vamweni, vanon’gun’guta vecinanga kuti fenzi iji jiri kuphingaija maningi. Ndhungamiriro ja Jehovha jinowanika mu Bhaibheri jakadari inga fenzi iji. Ndhungamiriro iji jinotibesera kuti tirambe tiri mugwanja doko.—Verenganyi Nduyo 119:9, 10, 45, 133.

7. Majaha anodikana kuvona kudini gwanja rakadodoka?

⁷ Majaha, nguva jimweni munorangarira kuti ndhungamiriro ja Jehovha jiri kumubzinyirira here? Sathana anoda kuti murangarire kudaro. Anoda kuti mubatikane ngo zviya zviri kuitwa ngo vaya vari mugwanja rakakura. Ngokuti zvinovoneka inga kuti ivona vano upenyu hunodakajisa. Iyena anoda kuti murangarire kuti amuna mudakaro mu upenyu inga vadoni venyu vo kucikora kana vandhu vamweni vamunovona mu interneti. Iyena anodazve kuti murangarire kuti ndhungamiriro ja Jehovha, jiri kumuita kuti mutame kuva no mudakaro wakaperera mu upenyu  hwenyu. * Asi ceukijanyi izvi, Sathana aadi kuti vaya vari kufamba mu gwanja rake vazive zvavanozowana kumbejiyo. Asi Jehovha anoda kuti muzive kumbeji kunoshamaisa kwamunozova nako, kudari mukaendera mberi mecifamba mu gwanja ro upenyu.—Nduyo 37:29; Isaia 35:5, 6; 65:21-23.

8. Majaha angajijenyi ngo muezaniso wa Orafi?

⁸ Vonanyi zvamungajija ngo muezaniso wo mujaha umweni anodanwa Orafi. * Vadoni vake vo kucikora vaimuvangirija kuti iyena aite zvouhure. Paakavasanangurira kuti Zvapupu zva Jehovha zvinopona mukuzwirana no ndhungamirro jakakhwirira jo Bhaibheri, vasikane vamweni vaiijija navo vakaejazve kumuvangirija kuti iyena avatane naivona. Asi Orafi aazivi kutendera kuvangirijwa uku. Iyena  wakasonganazve no cineso cimweni. Orafi wakati: “Majiporosori angu akandivhunja kuti ndaidikana kuenda ku univherisidhadhe ngokuti vandhu vaizondireremeja. Ivona vakandivhunja kuti kudari ndikatama kuita izvo, andicaizobudirira mu upenyu.” Zvicinyi zvakabesera Orafi kuti arambe kuvangirijwa uku? Iyena wakati: “Ndakava no ushamwari wo phedo no hama no hambzaji jiri mu ungano yangu. Ivona vakava inga mbhuri yangu kamare. Cimwenizve ndakaengejera kujija kwangu Bhaibheri. Pandaiengejera kujija kwangu, kukhohwa kwandaiita kuti ici icokwadi kwaiengejekavo. Inga muviyo, ndakatema civaringo cokushandira Jehovha.”

9. Vaya vanoda kuramba vari mugwanja rakadodoka zvicinyi zvavanodikana kuita?

⁹ Sathana anoda kuti imwimwi mutame kuenderera mberi mecifamba mugwanja rinoendesa ku upenyu. Iyena anoda kuti mubatane no vandhu vari mugwanja rakakura “rinoendesa kooparajwa.” (Mateu 7:13) Asi tinozoramba tiri mugwanja iri rakadodoka, kudari tikaenderera mberi tecipurukira Jesu no kuvona gwanja iri inga cijiviriro. Wari ngatende tivone ciro cimweni cakananga Jesu kuti tinodikana kuciita.

10. Mukuzwirana na Mateu 5:23, 24, Jesu wakananga kuti itusu tinodikana kuitenyi?

¹⁰ Verenganyi Mateu 5:23, 24. Apa Jesu wainga ecibhuya ngo pamusoro po ciitiko caisisira maningi caiitwa ngo Vajudha vainga vecimupurukira. Amborangariranyi mundhu ari mutemberi ecida kupa cinyama mupiri inga mupiro. Kudari panguva yondhoyo oceukija kuti hama yake ina ciri cesse na iyena, waindikana kusiya mupiro ‘wopinda.’ Ngenyi? Ngokuti pana ciro cinosisira caidikana kuita acito apira mupiro wake kuna Jehovha. Jesu wakajekesa izvi paakati: “Tangai waenda koita runyararo no hama yako.”

11. Jakobe wakaitenyi kuti aite runyararo na Izau?

¹¹ Tingajija zviro zvinosisira maningi ngo pamusoro po kuita runyararo, ngo kuvona ciitiko co upenyu hwa Jakobe. Jakobe paakapeja makumaviri o makore ari kunyika imweni, Mwari ecishandisa ngirozi wakamuvhunja kuti ahwirire ku nyika yake. (Genesi 31:11, 13, 38) Asi painga pano cineso. Nevanji vake Izau, vaida kumuuraya. (Genesi 27:41) Jakobe “wakathya kukuru wocamwa” ngokuti zvingaita kuti hama yake yainga icakaviga bundu ngo pamusoro pake. (Genesi 32:7) Jakobe wakaitenyi kuti aite runyararo no hama yake? Cokutaga, iyena wakaita mukumbiro kuna Jehovha ngo pamusoro pazvo. Tevere, wotumira cipo kuna Izau. (Genesi 32:9-15) Pakupejisira vo vaviri povakasongana, Jakobe ndiyena wakatanga kukhombhija kuti waireremeja Izau. Iyena wakagwadama pamberi pa Izau, haiwa kamwe nee kaviri, asi pavhaza jinokwana kuita nomwe. Jakobe ngo kujidodokesa kwese, wakakhombija kuti waireremeja Izau, woita runyararo naye.—Genesi 33:3, 4.

12. Tinojijenyi ngo muezaniso wa Jokobe?

¹² Zviripo zvatinojija ngo manera akanasirira Jakobe kuti aende kosongana na nevanji vake no manera aakakhwedera phedo navo. Ngo kujidodokesa kwese Jakobe wakakumbira besero ra Jehovha. Tevere iyena wakaita mukuzwirana no mukumbiro wake ngo kuita zvese zvaikwanisa kuti aite runyararo na nevanji wake. Iyena paakasongana na nevanji wake Izau aazivi kuvereketesana navo ecida kuvona kuti ndiyani wainga no razau no wainga acina. Jakobe waida basi kuita runyararo na nevanji wake. Tingatevejeresa kudini muezaniso wa Jakobe?

13-14. Kudari tikanyangajisa hama yedu, zvicinyi zvatinodikana kuita?

¹³ Kudari tinoda kuramba tecifamba mu gwanja rinoendesa ku upenyu tinodikana kuita runyararo no hama jedu. (Varoma 12:18) Zvicinyi zvatinodikana kuita kudari tikazwisisa kuti tanyangajisa hama yedu? Inga ndi Jakobe, tinodikana kuita mukumbiro kuna Jehovha. Tecikumbira kuti iyena akomborere kuvangisira kwedu pakuita runyararo no hama yedu.

¹⁴ Tinodikana kupsaka nguva kuti tijipopore pacedu. Tingajiita muvhunjo jakadari inga iji: ‘Ndinokwanisa kutendera kuti inini ndaposa, ndokumbira kuregerehwa no kuita runyararo? Jehovha na Jesu vanozozwa kudini kudari itusu tikatema civaringo cokuenda koita runyararo no hama yedu kana no hambzaji yedu?’ Mupinguro jedu jingatiita kuti tipurukire Jesu no kujidodokesa kwese topsaka hama yedu kuti tiite runyararo nayo. Tikaita kudaro tinonga tecitevejera muezaniso wa Jakobe.

15. Kuitisa kudini kushandisa ndhungamiriro iri pana Vaefeso 4:2, 3 kunotibesera kuti tiite runyararo no hama yedu?

¹⁵ Rangariranyi kuti zvicinyi zvaizoitika kudari Jokobe waida kupsaka razau paakaenda kosongana no hama yeke. Mabhuyo avo aacaizopera ushoni. Patinoenda kobhuya no hama yedu kuti tiite runyararo na iyona, tinodikana kuva vandhu vanojidodokesa. (Verenganyi Vaefeso 4:2, 3.) Mazwi Akangwara 18:19 inoti: “Hama yakatukwa, inovangisisa kupinda rusingo; kupopana nayo kwakavanga, kupinda musuvo wo simbi.” Patinokumbira kuregerehwa, zvingatibesera kuti tiite runyararo.

16. Ngozvapi zvimweni zvatinodikana kurangarira, ngenyi?

¹⁶ Cimwenizve, tinodikana kunasa kurangarira ngo zvatinoda kuenda konanga kuno hama yedu no manera okuzvinanga ndiwona. Patinonga takanasiririka, tinodikana kuenda kobhuya no mundhu watanyangajisaya no cinangwa cokumubesera kuti tivezve no ushamwari waushoni. Pakutanga iyena angananga zviro zvingatiita kuti titame kujizwa ushoni. Zvondhozvo, zvaizotiita kuti tikasike kunyangajwa kana kutoeja kujipa razau. Waro kunanga kuti kuita izvi kunotibesera kuita runayraro? Haiwa. Ceukijanyi kuti kuita runyararo no hama yenyu, kunosisira maningi kupinda kupsaka kuti ndiyani ano razau ndiyani acina.—1 VaKorinte 6:7.

17. Ngozvapi zvamajija ngo muezaniso wa hama Jhiribertu?

 ¹⁷ Hama imweni inodanwa Jhiribertu yakashanda ngo simba kuti iite runyararo. Iyona yakati: “Ndainesana maningi no mwana wangu wokaji. Ko makore maviri, ndakavangisira kuti ndibhuye naye ngo njira yakathiva no yo runyararo kuti ndivezve no ushamwari na iyena.” Hama Jhiribertu vakaitenyizve? “Ndicito ndaenda kobhuya naye ndaiita mukumbiro no kujinasirira mu murangariro kuti nditame kukasika kunyangajwa kudari iyena akashaisha kundidavira. Ndaidikana kuva ndakanasiririka kuti ndiregerere. Ndakazwisisa kuti andicaidikana kueja kukhombija kuti ndina razau, asi ndaidikana kueja kuvangisira kuti tiite runyararo.” Ngowapi wakava muviyo? Hama Jhiribertu vakati: “Nyamasi uno, ndina runyararo wo mukati, ngokuti ndina ushamwari waushoni no vese vo pambhuri yangu.”

18-19. Kudari tanyangajisa ari wese zvicinyi zvatinodikana kuita, ngenyi?

¹⁸ Waro zvicinyi zvamunodikana kuita, kudari mukazwisisa kuti manyangajisa hama yenyu? Zwiranyi ndhungamiriro ya Jesu yokuita runyararo. Bhuyanyi na Jehovha ngo pamusoro po shwiroyo, mothemba kuti mujimu wake mucena unozomubesera kuti muite runyararo. Mukaita kudaro, munozova no mudakaro, munozovonesazve kuti imwimwi muri kupurukira zvakananga Jesu.—Mateu 5:9.

¹⁹ Tinobonga maningi Jehovha ngo kuti ari kutipa ndhungamiriro iyi ecishandisa “musoro wo ungano” Jesu Kristu. (Vaefeso 5:23) Tinodikana kutema civaringo co ‘kumupurukira’ inga ndi mupostori Pedhru, Jakobo na Johani. (Mateu 17:5) Tingaita izvi, ngo kuita runyararo no hama kana hambzaji yatanyangajisa. Ngo kuita kudaro no kuenderera mberi no tiri mu gwanja doko rinoendesa ku upenyu, tinozoashira makomborero akawanda wari uno no mudakaro ucikaperi kumbejiyo.