1-2. (a) Aayapostoli yaJesus oya li ya pewa elombwelo lyashike? (b) Oshike tatu ka kundathana moshitopolwa shika?

KONIMA yOpaasa yomo 32 E.N., omuyapostoli Petrus, Jakob, naJohannes oya mono emoniko ekumithi. Sho ya li kondundu ondeendeka, tashi vulika ondundu yaHermon, Jesus okwa shituka komeho gawo. “Oshipala she osha adhima ngetango, noonguwo dhe odha yele dha fa uuyelele.” (Mat. 17:1-4) Pehulilo lyemoniko ndyoka, aayapostoli mboka oya uvu Kalunga ta popi ta ti: “Nguka Omumwandje omuholike nde mu hokwa, mu uveni.” (Mat. 17:5) Sho aayapostoli mboka yatatu ya kala ya pititha komeho okulongela Jehova, osha ulike kutya oya kala taya pulakene kuJesus. Otwa hala okulandula oshiholelwa shawo.

² Moshitopolwa sha tetekele, otwi ilonga kutya ohatu ulike kutya otatu pulakene kewi lyaJesus mokweetha po okuninga iinima yontumba. Moshitopolwa shika, otatu ka kundathana kombinga yiinima iyali mbyoka Jesus e tu lombwela tu kale hatu ningi.

3. Shi ikolelela kuMateus 7:13, 14, oshike tu na okuninga ninga?

³ Lesha Mateus 7:13, 14. Ndhindhilika kutya Jesus okwa popya iiyelo iyali ya yoolokathana mbyoka tayi fala koondjila dha yoolokathana, ano ondjila “ya mbwalangandja” nosho wo ndjoka “ya thinana.” Kapu na ondjila ontitatu. Otse yene tu na okuhogolola kutya ondjila yini tatu ka enda. Ndyoka olyo etokolo lya simanenena tatu vulu okuninga, oshoka otashi ti omwenyo nenge eso.

4. Ondjila “ya mbwalangandja” oyini?

⁴ Otwa pumbwa okukaleka momadhiladhilo eyooloko ndyoka li li pokati koondjila ndhoka mbali. Aantu oyendji oya lamba  ondjila ndjoka ya “mbwalangandja” molwaashoka oshipu okweenda muyo. Shi nikitha oluhodhi, oyendji ohaya hogolola okulamba ondjila ndjoka nokuholela shoka oongundu dhaantu mboka taya ende muyo taya ningi. Ihaye shi ndhindhilike mo kutya Satana Ondiyapoli oye ta nwetha mo aantu ya lambe ondjila ndjoka, nondjila ndjoka otayi fala mekano. — 1 Kor. 6:9, 10; 1 Joh. 5:19.

5. Oonkambadhala dhini yamwe ya ninga ya mone ondjila ndjoka “ya thinana” noya tameke okweenda muyo?

⁵ Mepingathano nondjila ndjoka “ya mbwalangandja,” ondjila onkwawo ‘oya thinana,’ na Jesus okwa ti kutya aantu owala aashona taye yi mono. Omolwashike mbela? Shoka oshihokithi, movelise ndjoka ya landula ko, Jesus okwa londodha aalanduli ye kombinga yaahunganeki aafundja. (Mat. 7:15) Otaku tengenekwa kutya oku na omalongelokalunga omayovi, nogendji gomugo ohaga ti kutya ohaga longo aantu oshili. Aantu omamiliyona oya ngwangwana noya posipalekwa komalongelokalunga ngoka, noihaya kambadhala nokuli okukonga ondjila ndjoka tayi fala komwenyo gwaaluhe. Ihe ondjila ndjoka otayi vulu okumonika. Jesus okwa ti: “Ngele tamu vulika koohapu dhandje, nena kapu na omalimbililo, one aalongwa yandje. Ne otamu ka tseya ihe oshili, noshili otayi ke mu mangulula.” (Joh. 8:31, 32) Oshi shi okupandulwa sho inoo lamba oongundu dhaantu, ihe pehala lyaashono owa kongo oshili. Owa tameke okukonakona Oohapu dhaKalunga nuukeka wu ilonge iitegelelwa ye, nowa vulika komalongo gaJesus. Shimwe ishewe, owi ilongo kutya Jehova okwa tegelela tu ikaleke kokule nomalongo gomalongelokalunga giifundja nowu ethe po okudhana omasiku gomafudho ngoka ga yama kuupagani. Otashi vulika wo wa mona kutya kasha li oshipu okweetha po okuninga iinima mbyoka Jehova e tonde. (Mat. 10:34-36) Otashi vulika kaasha li oshipu kungoye okuninga omalunduluko ngoka. Nonando ongawo, molwaashoka owu hole Tate gwoye gwomegulu, owa tsikile okukambadhala okuninga omalunduluko, opo wu mu nyanyudhe. Kapu na omalimbililo kutya okwe ku hokwa! — Omayel. 27:11.

6. Shi ikolelela kEpisalomi 119:9, 10, 45, 133, oshike tashi vulu oku tu kwathela tu tsikile okweenda mondjila ndjoka ya thinana?

⁶ Ngele twa tameke okweenda mondjila ndjoka ya thinana, oshike tashi vulu oku tu kwathela tu tsikile okweenda muyo? Natu tale kethaneko tali landula. Miilongo yimwe, oondjila ndhoka dhe enda koondundu ohadhi kala dhi na omishigo kominkulo. Omishigo ndhoka odhi lile po okugamena oohauto nosho wo aahingi kaaya gwe ko kopate. Kapu na omuhingi ta ka nyenyeta kutya omishigo ndhoka odhi li engambeko kuye unene. Omithikampango dhaJehova ndhoka tadhi adhika mOmbiimbeli odha fa omishigo ndhoka. Omithikampango dhe odhi lile po oku tu kaleka tatu ende mondjila ndjoka ya thinana. — Lesha Episalomi 119:9, 10, 45, 133.

7. Aagundjuka oye na okutala ko ngiini ondjila ndjoka ya thinana?

⁷ Aagundjuka, mbela omathimbo gamwe ohamu kala mu uvite kutya omithikampango dhaJehova odhe mu ngambeka unene? Satana osho a hala mu dhiladhile ngawo. Okwa hala mu kale tamu gandja eitulomo kwaashoka mboka taya ende mondjila ya mbwalangandja taya ningi, ano kunkene taya monika ya fa taya tyapula onkalamwenyo. Okwa hala wo wu kale to dhiladhila kutya ito nyanyukilwa onkalamwenyo ngaashi aanasikola pamwe nangoye nenge aantu mboka ho mono komakwatathano gopaintaneta. Satana okwa hala wu dhiladhile kutya omithikampango dhaJehova otadhi  ku imbi wu nyanyukilwe onkalamwenyo pakuudha. * Ihe dhimbulukwa kutya Satana ina hala mboka taya ende mondjila ndjoka ya tseye kutya otayi ya fala peni. Mepingathano naashoka, Jehova okwa hala wu tseye onkalamwenyo ombwanawa ndjoka to ka kala wu na ngele owa tsikile okweenda mondjila ndjoka tayi fala komwenyo. — Eps. 37:29; Jes. 35:5, 6; 65:21-23.

8. Oshike shoka aagundjuka taya vulu okwiilonga koshiholelwa shaOlaf?

⁸ Natu tale shoka tatu vulu okwiilonga moshimoniwa shomumwatate omugundjuka gwedhina Olaf. * Aanasikola pamwe naye oya li ye mu thiminike a ye momilalo. Sho e ya yelithile kutya Oonzapo dhaJehova ohadhi iyutha komithikampango dhOmbiimbeli, aakadhona yamwe yomongundu yawo oya tameke nokuli oku mu thiminika shi vulithe shito a ye nayo momilalo. Nonando ongawo, Olaf ina zimina  nando e shi ninge. Ka li owala a thiminikwa a ye momilalo. Olaf okwa ti: “Aalongi yandje oya li haya ladhipike ndje ndi lalakanene elongo lyopombanda, opo ndi kale nda simanekwa. Oya li ya lombwele ndje kutya ngele inandi mona elongo lyopombanda itandi ka pondola monkalamwenyo.” Oshike sha kwathele Olaf kii igandje komathiminiko ngoka? Okwa ti: “Onda panga uukuume wopothingo naantu yomegongalo lyetu. Oya kala ye li ongaakwanezimo yandje. Onda tameke wo okukonakona Ombiimbeli ndi itula mo shi vulithe nale. Sho nda kala tandi konakona Ombiimbeli muule, onda tameke okukala nda tompwa lela kutya ndjika oyo oshili. Shoka osha ningitha ndje ndi kale nda tokola toko ndi longele Jehova.”

9. Mboka ya hala okutsikila okweenda mondjila ndjoka ya thinana oya tegelelwa ya ninge shike?

⁹ Satana okwa hala wu puke mo mondjila ndjoka tayi fala komwenyo. Okwa hala wu wayimine aantu oyendji mboka taya ende mondjila ndjoka “tayi fala mekano.” (Mat. 7:13) Nonando ongawo, itatu ka etha po okweenda mondjila ndjoka ya thinana, ngele otwa tsikile okupulakena kuJesus nokutala ko ondjila ndjoka yi li egameno kutse. Ngashingeyi natu ka kundathaneni kombinga yoshinima shilwe shoka Jesus e tu lombwela tu kale hatu ningi.

10. Shi ikolelela kuMateus 5:23, 24, oshike shoka Jesus e tu lombwela tu ninge?

¹⁰ Lesha Mateus 5:23, 24. Jesus okwa li a popi oshinima shimwe shoka sha simana noonkondo kAajuda mboka ya li taya pulakene kuye. Kala andola wa fa wu wetu gumwe e ya kotempeli noku li pokupa omuyambi oshinamwenyo shoka a hala a yambe. Ngele omuntu okwa dhimbulukwa kutya okwa ningathana nagumwe, okwa li e na okuthiga po otempeli e ‘ta yi manga.’ Omolwashike mbela? Oshike mbela tashi vulu okukala sha simana shi vulithe okuyambela Jehova eyambo? Jesus okwe shi popi sha yela a ti: “[Tango] paathana ombili namukweni.”

11. Jakob okwa ningi po shike a pange ombili naEsau.

¹¹ Otatu vulu okwiilonga iiyilongomwa ya simana kombinga yokupanga ombili nayalwe, mokukonakona oshinima shimwe shoka sha li sha ningilwa Jakob. Konima sho Jakob a tembuka mo mevi moka a kala ha zi uule womimvo 20, Kalunga okwe mu lombwele okupitila momuyengeli a galukile mo. (Gen. 31:11, 13, 38) Ihe opwa li pu na uupyakadhi. Omumwayinamati gwosheeli, Esau, okwa li a hala oku mu dhipaga. (Gen. 27:41) Jakob okwa li a “haluka e ta kunkwa,” oshoka okwa li ta dhiladhila kutya otashi vulika Esau natango e mu kwatela onkone. (Gen. 32:7) Jakob okwa ningi po shike, opo a pange ombili naEsau? Shotango, okwa galikana Jehova i itula mo kombinga yuupyakadhi mboka. Opo nduno e ta tumine Esau omagano. (Gen. 32:9-15) Hugunina, sho ya tsakanene oshipala noshipala, Jakob okwa katuka onkatu a ulukile Esau esimaneko. Okwi inyongamene Esau pevi, halumwe, ihe oluheyali! Sho Jakob i ifupipike nokuulukila Esau esimaneko, kungawo okwa panga ombili naye. — Gen. 33:3, 4.

12. Oshike tatu ilongo koshiholelwa shaJakob?

¹² Otatu ilongo oshiilongomwa komukalo moka Jakob i ilongekidha a tsakanene naEsau nokunkene e mu ihumbatele. Jakob okwa li i ifupipike e ta pula Jehova ekwatho. Opo nduno okwa katuka metsokumwe negalikano lye mokukatuka oonkatu a pange ombili naEsau. Sho ya tsakanene, Jakob ka li a nyenyeta kutya ye ina ninga sha sha puka nenge kutya Esau oye e etitha uupyakadhi mboka wa li pokati kawo. Elalakano lyaJakob olya li okupanga ombili naEsau. Ongiini tatu vulu okulandula oshiholelwa shaJakob?

13-14. Oshike tu na okuninga po, ngele otu uvitha nayi omwiitaali omukwetu?

¹³ Tse mboka tatu ende mondjila ndjoka tayi fala komwenyo otwa hala okukala hatu lalakanene okukala tu na ombili nooitaali ooyakwetu. (Rom. 12:18) Oshike tu na okuninga po uuna twa ndhindhilike kutya otwa uvitha nayi omwiitaali omukwetu? Ngaashi Jakob a li a ningi, otu na okupula Jehova ekwatho. Otatu vulu oku mu pula a yambeke oonkambadhala ndhoka tatu ningi tu pange ombili naangoka twa ningathana naye.

¹⁴ Otwa pumbwa wo okukala hatu kutha ethimbo tu ikonakone. Otatu vulu okwiipula omapulo ngaashi: ‘Mbela ohandi kala ngaa nda hala okwiifupipika, okugandja ombili nokupanga ombili nayalwe? Jehova naJesus otaya ka kala ye uvite ngiini ngele onda katuka oonkatu ndi pange ombili nomwiitaali ngoka nda uvitha nayi?’ Omayamukulo gomapulo ngoka otaga vulu oku tu inyengitha tu pulakene kuJesus nokwiifupipika, opo tu kale hatu panga ombili nayalwe. Ngele otwe shi ningi, kungawo otatu landula oshiholelwa shaJakob.

15. Okutula miilonga omayele ngoka taga adhika mAaefeso 4:2, 3 otaku vulu ngiini oku tu kwathela tu pange ombili nagumwe?

¹⁵ Dhiladhila andola shoka sha li tashi ka ningwa po, ando Jakob okwa li a kwatwa kuuntsa sho a tsakanene naEsau. Andola okutsakanena kwawo inaku enda nawa. Uuna tatu yi komwiitaali omukwetu tu ka pange ombili naye, otu na oku shi ninga neifupipiko. (Lesha Aaefeso 4:2, 3.) Omayeletumbulo 18:19 otaga ti: “Omumwayina a kotokelwa oku vule oshilando sha kola mokusindwa, noontamanana odha fa omweelo gwa patekeka.” Okugandja ombili neifupipiko otaku vulu okuningitha ngoka tu uvitha nayi a kale a hala okupanga ombili natse.

16. Oshike tu na okudhiladhila kombinga yasho, nomolwashike?

¹⁶ Otwa pumbwa wo okudhiladhila muule kombinga yaashoka tatu ka lombwela ngoka twa uvitha nayi, nosho wo nkene tatu ke shi mu lombwela. Uuna tatu popi naye, otwa pumbwa oku shi ninga momukalo ngoka tagu ulike kutya otwa hala pokati ketu naye pu kale ishewe pu na ombili. Petameko otashi vulika a popye oohapu inaadhi dhiladhilwa nawa. Shoka otashi vulika shi tu geyithe nenge tu ipopile kutya inatu ninga sha sha puka, ihe mbela okuninga ngawo otaku ka kandula po ngaa uupyakadhi?  Hasho. Ino dhimbwa kutya okupanga ombili nagumwe oku vule okumona kutya olye a puka nenge e li mondjila. — 1 Kor. 6:7.

17. Oshike to vulu okwiilonga koshiholelwa shomumwatate Gilbert?

¹⁷ Omumwatate gwedhina Gilbert okwa li a longo nuudhiginini a pange ombili nagumwe. Okwa ti: “Pokati kandje nomupambele gumwe opwa li uupyakadhi. Uule womimvo mbali, onda kala tandi ningi oonkambadhala ndi popye naye nengungumano tu pange ombili.” Omumwatate Gilbert okwa li wo a ningi po shike? Okwa ti: “Manga inaandi ka popya nomupambele ngoka, onda li handi galikana nokwiilongekidha kaandi geye uuna a popi sha shoka tashi vulu okuuvitha ndje nayi. Onda li nda pumbwa okukala ndi ilongekidha oku mu dhimina po. Ondi ilonga kutya inandi pumbwa aluhe okukala ndi itala ko kutya kandi na epuko, nonda li ndi shi kutya elalakano lyandje okupanga ombili nomupambele ngoka.” Oshizemo osha li shini? Omumwatate Gilbert okwa ti: “Kunena ondi na ombili yopamadhiladhilo, molwaashoka ondi na ekwatathano ewanawa naapambele yandje ayehe.”

18-19. Oshike tu na okukala twa tokola toko okuninga ngele otwa uvitha nayi gumwe, nomolwashike?

¹⁸ Oshike nduno wu na okukala wa tokola toko okuninga, ngele owa ndhindhilike kutya owa uvitha nayi omwiitaali omukweni? Landula ewiliko lyaJesus kombinga yokupanga ombili nayalwe. Popya naJehova kombinga yuupyakadhi mboka, e to etha ombepo ye ondjapuki yi ku kwathele wu kale ho lalakanene okupanga ombili nayalwe. Ngele owe shi ningi, oto ka kala wa nyanyukwa, notashi ka ulika kutya oto pulakene kuJesus. — Mat. 5:9.

¹⁹ Otwa pandula sho Jehova he tu pe ewiliko lyopahole okupitila ‘momutse gwegongalo,’ Jesus Kristus. (Ef. 5:23) Ngaashi omuyapostoli Petrus, Jakob naJohannes ya li ya ningi, natu kale twa tokola toko tu “pulakene kuye.” (Mat. 17:5) Moshitopolwa shika otwa kundathana kombinga yankene tatu vulu oku shi ninga, mokukala hatu panga ombili nooitaali mboka twa uvitha nayi. Ngele otwa kala hatu shi ningi nokutsikila okweenda mondjila ndjoka tayi fala komwenyo, otatu ka mona omalalekonuuyamba ogendji ngashingeyi nenyanyu itaali hulu po monakuyiwa.