1-2. (1) Tiheeni arummwa araru a Yesu yaalamuleliwaaya weera, nave awo yaakhulenle hai? (2) Tiheeni nnahaalaahu othokororya mmwaha yoola?

AMANLE Paska a mu 32 E.K., murummwa Pedro, Yakopo, ni Yohani yaakhalano yawoona yootikhiniha. Vasulu va mwaako, mwawooneya Mwaako Hermoni, Yesu aatatuxiwa ohoolo waya. “Ethoyi awe yaahaarya ntoko nsuwa, soowara sawe saaheela ntoko omwaleela.” (Mat. 17:1-4) Ehalaka vakhaani omala yawoona yeela, arummwa yaahiiwa nsu na Muluku nriki: “Ola ti mwanaka mmoharu kinamukwelaaka, yoowo kinahakalalaakano. Mum’wiriyaneke.” (Mat. 17:5) Arummwa yaala araru yaahooniherya wi yaananwiriyana Yesu moorweela wa mukhalelo aya wa okumi. Hiyaano ninnachuna ochariha yootakiherya aya.

² Mmwaha ovirale, noohuserya wi onwiriyana Yesu onataphulela ohiya weera ichu ikina. Mmwaha yoola, nnahaala othokororya ichu piili seiho Yesu olonceiye wi nnaphwanela weera.

3. Mwawiiwanana ni Mateu 7:13, 14, tiheeni nnaphwanelaahu weera?

³ Mwaalakhanye Mateu 7:13, 14. Moone wi Yesu oothariha milako miili soohiyana sinakeriha mu iphiro piili soohiyana, mphiro “mutokweene” ni mphiro “wawuuraanyeya.” Hiwaavo mphiro waneeraru. Hiyaano nnaphwanela othanla mukhatiihu ephiro taani nnachunaahu ocharaka. Ela yoolakelela yoochuneya nnaphwanelaahu opaka—woona wi pahiru mphiro mmoha tonakeriha wookumini woohimala.

4. Ti mwawiihai mwaahaalaanyu othariha mphiro “mutokweene?”

⁴ Nnaphwanela otitelela wuupuwelela ohiyana orivovo variyari va miphiro seiha miili. Achu ancipale ari mu mphiro  “mutokweene” nthowa nawi ti wookhweya ochara. Moothananiha, ancipale annathanla otitelela weeca mu mphiro yoola ni ochariha muloko yoowo oneeca mummo. Awo haniiwexexa wi Satana tonaweeriha achu wi yeeceke mu ephiro yeela, nave wi ephiro yeela enakeriha wootoloxiwani.—1 Kor. 6:9, 10; 1 Yoh. 5:19.

5. Wiilipiserya taani achu akina apankaaya wi ephwanye mphiro “wawuuraanyeya” ni opacerya weeca mummo?

⁵ Moohiyana ni mphiro “mutokweene,” mphiro mukina ti “wawuuraanyeya,” nave Yesu aaloca wi tavakhaani anawerya ophwanya. Ntakhara heeni? Ti yoophwanelela wi, mu eversikulu enacharela, Yesu aahaalopola omuchara awe vooloca sa alipa a miririmu oowoka. (Mat. 7:15) Achu ancipale analoca wi sookhalavo ikerexa sincipale, nave sincipale sa seiho sinaloca wi sinahusiha eparipari. Nthowa na okhalavo ikerexa sincipale, achu ancipale annaceecheya ni waakanyeryeya nave ophiyerya wi haneererya waavya ephiro enakeriha wookumini. Nyenya ti wooweryeya ophwanya mphiro yoowo. Yesu aaloca: “Moomwi mukhalaru mmasu aka, muri chiri oohuserya aka; munarwa musuwela eparipari nave eparipari eyo enamootaphulaani.” (Yoh. 8:31, 32) Ti yaphaama wi nyuwaano himweenre ntoko achu ancipale aneeraaya; ohiya yeeyo, nyuwaano moophwanya eparipari. Nyuwaano mwaapacerya ohuserya mwawiiseela Masu a Muluku wi musuwele yeeyo owo onachuneiye wa hiyaano, ni owiriyana mahusiheryo a Yesu. Opwaha ichu soothene, nyuwaano moohuserya yeeyo Yehova onaweheryeiye wa hiyo wi mukhooce mahusiheryo a malapelo atheru ni ohiya ifesta seiho saapacenrye ni malapelo atheru. Nyuwaano tho moohuserya wi opaka yeeyo Yehova onachuneiye ni opaka matorokelo mu okumi anyu wi mmuhakalalihe Yehova, tahi yookhweya. (Mat. 10:34-36) Hiwaari wookhweya wa nyuwaano opaka matorokelo oochuneya. Nyenya mwaahiilipiserya wi mpake matorokelo nthowa nawi munnamusivela Tiithi anyu a wirimu nave munnachuna omuhakalaliha yoowo. Owo aatepa ohakalala vancipale ni nyuwaano!—Masi. 27:11.

6. Mwawiiwanana ni Salumu 119:9, 10, 45, 133, tiheeni enahaala onikhaviherya otitelela weeca mu ephiro yawuuraanyeya?

⁶ Vano hiyaano nipacenrye weeca mu ephiro yawuuraanyeya, tiheeni enahaala onikhaviherya otitelela okhala mummo? Muthokororye niphwanaphwaniho nla. Mu ilapo ikina, annaheliwamo maniilya mu mixewe seiho sinavira mmiyaako. Maniilya yaala anaheliwamo wi yaakhapelele alipa aweeciha—wi yaakhaviherye awo osepa oya muxerexere mwa muxewe naari omorela oparo. Haavo muchu aahaala waakaaha alocaka wi maniilya yaala ennamooceeliha oya okhwipi wa muxewe wi aphoreye naari okhwa! Malakiheryo a Yehova anaphwanyeya Mpiipiliyani ari ntoko maniilya yaala. Malakiheryo yaala annanikhaviherya otitelela weeca mu ephiro yawuuraanyeya.—Mwaalakhanye Salumu 119:9, 10, 45, 133.

7. Ti mwawiihai amiravo anaphwanelaaya woonaka mphiro wawuuraanyeya?

⁷ Amiravo, apwanne ilukuluku ikina munniisoona wi hamunawerya opaka ichu ikina seiho mwaachunaanyu wakhala wi munniiwelela malakiheryo a Yehova? Ti yeeyo Satana onachuneiye wi nyuwaano muupuweleke. Owo aahaala osiveliwa owoonaani mutikitheryeyaka mwa yeeyo yaale aneeca mu ephiro etokweene anapakaaya, nthowa nawi awo anooneya wi annapuha okumi. Owo onachuna wi muupuweleke wi nyuwaano hamunapuha okumi ntoko ancipale a asinthamwene anyu  ooxikola naari achu yaawo munawoonaanyu mu interneti. * Nyenya muupuwele ela: Satana hanachuna wi yaale aneeca mu ephiro yeela yoone weiwo mphiro yoola onaakerihaayawo. Nyenya Yehova onachuna wi musuwele mukhalelo okumi anyu onahaalaaya okhala woohakalaliha wakhala wi mootitelela weeca mu ephiro ya okumi.—Sal. 37:29; Isa. 35:5, 6; 65:21-23.

8. Tiheeni amiravo anaweryaaya ohuserya orweela wa yootakiherya ya Olaf?

⁸ Muthokororye yeeyo muneeraanyu muhuserye orweela wa yaweereya ya munna ori mmiravo oniichaniwa Olaf. * Asinthamwene awe ooxikola yaanamukhinyererya owo opaka mararuwo. Vaavaa aatharihenleiye wi owo Namoona a Yehova nave aakhala mwawiiwanana ni malakiheryo a Mpiipiliyani, asimwali akina ooxikola yaahiilipiserya ophiyerya vaavaa yaaweryelaayavo wi epake mararuwo ni yoowo. Nyenya Olaf aakhala aweemeleleya  wa yeeyo yaari yaphaama. Nyenya ola hiwaari okhinyererya pahiru yoowo aakumanneiyeno. Olaf ooloca: “Ahusiha aka yaaheererya okilekecha wi kivolowe mu ixikola sa vasulu woona wi eyo yaahaala weeriha wi achu ekicicimiheke. Awo yaakileela wi kaaheerano yeela, nki kikhumelele phaama mookumini.” Tiheeni yaamukhavihenrye Olaf ovootha okhinyererya yoola? Owo oothariha: “Miyaano kaapaka onthamwene ni achu a mmuloko aka. Awo yaakhala ntoko amusi aka. Kaapacerya tho omuhuserya Piipiliya mwawiiseela. Vaavaa kaahuseryaaka mwawiiseela, kaapacerya olekecheya wi ela chiryene eparipari. Ntoko yookhumelela, kaalakelela omurumeela Yehova.”

9. Tiheeni enachuneya wa yaale anachuna otitelela okhala mu ephiro yawuuraanyeya?

⁹ Satana aahaala osiveliwa oweerihaani ohiya mphiro onakeriha wookumini. Owo onachuna wi mukhale ni achu ancipale aneeca mu mphiro mutokweene ‘onakeriha wootoloshiwani.’ (Mat. 7:13) Nyenya, nnahaala otitelela weeca mu ephiro yawuuraanyeya wakhala wi nootitelela onwiriyana Yesu ni woona mphiro owo ntoko naakiho. Vano hankooni nthokororye echu ekina yeeyo Yesu olonceiye wi nnaphwanela weera.

10. Mwawiiwanana ni Mateu 5:23, 24, tiheeni Yesu olonceiye wi nnaphwanela opaka?

¹⁰ Mwaalakhanye Mateu 5:23, 24, BNM. Yesu aathariha elukuluku yeeyo yaari yoochuneyaxa wa Ayuta yaawo yanwiriyana yoowo. Mmwaanyiherye muchu mu empa ya Muluku ari ooreheryeya oomunnya namukucho mwaaxinama wi apahiwe mukucho. Wakhala wi elukuluku yeele muchu ohuupuwela wi ookhalano nthowa ni munnawe, owo aaphwanela ohiya mukucho nave ‘akookele oculi.’ Ntakhara heeni? Tiheeni yaari yoochuneyaxa opwaha ovaha mukucho wa Yehova? Yesu oothariha: “Wapacerye waataana ni munnaa.”

11. Tiheeni Yakopo eenreiye wi apake murecele ni Esawu?

¹¹ Nnanwerya ohuserya mahusiheryo ookhweleya vooloca sa opaka murecele moorweela wa othokororya yaweereya ya okumi wa Yakopo. Yakopo amanle okhuma mu elapo aayariweiye mu iyaakha 20, Muluku aamulamulela owo moorweela wa munkeelo wi akookelewo. (Map. 31:11, 13, 38) Nyenya naakhalavo nikacamiho. Munnawe a mutokotoko, Esawu, aachuna omwiipha yoowo. (Map. 27:41) Yakopo aakhala “awuukhuwaxa ni woova” wi munnawe iiha nivano ari oonyeenyeya ni yoowo. (Map. 32:8, 32:7, TNM) Tiheeni Yakopo eenreiye wi apake murecele ni munnawe? Yoopacerya, owo aavekela ni murima awe woothene wa Yehova vooloca sa mwaha yoola. Voocharela, owo aarumiha yamahala wa Esawu. (Map. 32:9-15) Vookuchulani, vaavaa aakumanneiye ni munnawe ethoi ni ethoi, Yakopo taapacenrye wooniherya ncicimiho wa Esawu. Owo aahimukokhorela Esawu ohiya ekwaha emoha, naari piili, nyenya ikwaha thanu napiili! Mwawiiyeviha ni mwa ncicimiho, Yakopo aapaka murecele ni munnawe.—Map. 33:3, 4.

12. Tiheeni nihusenryaahu orweela wa yootakiherya ya Yakopo?

¹² Ninnaphwanya nihusiheryo orweela wa mukhalelo Yakopo iireherenryeiye wi akumane ni munnawe ni mukhalelo owo aamwaacamenleiye Esawu. Mwawiiyeviha Yakopo aaveka nikhaviheryo wa Yehova. Voocharela owo aaheera ichu mwawiiwanana nnivekelo nawe moorweela wa opaka owetha wawe wi apake murecele ni munnawe. Vaavaa aakumanneiye ni munnawe, Yakopo haakhulanne ni Esawu vooloca sa taani aarino mathowa ni taani ahaarino mathowa. Yakopo aarino  yoolakelela ya opaka murecele ni munnawe. Ti mwawiihai nneeraahu ncharihe yootakiherya ya Yakopo?

13-14. Wakhala wi noomunyeenyeiha mukhwiihu a munroromeloni, tiheeni nnaphwanelaahu weera?

¹³ Hiyaano nnachara ephiro enakeriha wookumini, nnachuna opaka murecele ni annihu. (Aro. 12:18) Tiheeni nnaphwanelaahu weera wakhala wi nohoona wi noomunyeenyeiha nthamwene ahu a munroromeloni? Hiihaa ntoko Yakopo, nnaphwanela ovekela wa Yehova ni murima ahu woothene. Nnaphwanela omveka owo wi anikhaviherye opaka murecele ni munnihu.

¹⁴ Hiyaano tho nnaphwanela omaliha elukuluku niisaalikhelaka mukhatiihu. Nnanwerya wiipakela makoho ntoko ala: ‘Apwanne kinneemererya yoohesa aka, oveka nikhurumuwelo mwawiiyeviha, ni opaka murecele? Ti mwawiihai Yehova ni Yesu anoonaaya wakhala wi kinnapacerya opaka murecele ni munna aka naari murokora aka?’ Maakhulo ahu ananwerya onceenyerya onwiriyana Yesu ni mwawiiyeviha omwaacamela mukhwiihu a munroromeloni wi nipake murecele. Neerano hiihaa, nnanwerya ochariha yootakiherya ya Yakopo.

15. Ti mwawiihai opharihela nlakiheryo nnaphwanyeya mu Éfeso 4:2, 3 onanikhaviheryaaya opaka murecele ni munnihu?

¹⁵ Mwaanyiherye waakhanle wi Yakopo aahooniherya wiirumiha vaavaa aakumanneiye ni munnawe! Okumana wuuwu waahaala okumiherya makacamiho mancipale. Vaavaa nnayaahu opaka murecele ni munnihu, nnaphwanela okhala awiiyeviha. (Mwaalakhanye Éfeso 4:2, 3.) Masiposipo 18:19 oni: “Ovila omwaacamela munna aa omuchekenle opwaha ovolowa epooma yoolipihiwa; wiicana, ori ntoko mithipo soolipihano.” Vaavaa nnamvekaahu muchu nikhurumuwelo, eyo enanwerya omukhaviherya owo ochuna opaka murecele ni hiyaano.

16. Echu taani ekina nnaphwanelaahu wuupuwela, nave ntakhara heeni?

¹⁶ Nnaphwanela tho okhalano ekaasoope wa yeeyo nnayaahu oloca ni munnihu ni mukhalelo wa oloca. Wakhala wi nooreheryeya, nnaphwanela omwaacamela munnihu yoowo nimunyeenyeihalaahu ni yoolakelela ya oviihavo wiicela vyakala mmurimani mwawe. Voopaceryani, owo akhweya onanwerya oloca ichu sinahaala onnanara. Onanwerya okhala wookhweya onyeenyeya naari wiikuphelela, nyenya apwanne ela enahaala weeriha  wi okhalavo murecele? Mweeparipari hooye. Muupuwele wi okookiherya murecele ni munninyu ti yoochuneyaxa opwaha waavyaavya taani orino mathowa ni taani ohirino mathowa.—1 Kor. 6:7.

17. Tiheeni muhusenryaanyu orweela wa yootakiherya ya Gilbert?

¹⁷ Munna yoowo onichaniwa Gilbert aahiilipiserya wi akhale a murecele. Owo ooloca: “Elukuluku ekina kaakhalano nikacamiho ntokweene ni mmoha a veemusini vaka. Opwaha iyaakha piili, kaanapaka owetha waka wi kiloceke mooreera murima ni moomaleleya wi kitikitherye onthamwene waphaama.” Echu taani ekina Gilbert eenreiye? “Kihaakumve oloca ni muchu yoola, kaanapaka nivekelo ni orehererya muupuwelo aka wa masu oohiphwanelela owo akhweya aahaaleiye oloca. Miyaano kaanaphwanela okhala ooreheryeya okhurumuwela. Miyaano kaahoona wi nkaaphwanela weererya wiisooneiha wi nkaarino nthowa nave wi murici aka waari otikitherya murecele.” Teevi yaari yookhumelela ene? Gilbert ooloca: “Olelo, kookhalano murecele wa mmuupuweloni nthowa nawi kookhalano onthamwene waphaama ni oothene a veemusini vaka.”

18-19. Wakhala wi nohoona wi noomunyeenyeiha muchu, tiheeni nnaphwanelaahu olakelela weera, nave ntakhara heeni?

¹⁸ Vano, teevi enaphwanela okhala yoolakelelaanyu vaavaa munasuwelaanyu wi moomunyeenyeiha Mukristu mukhwiinyu? Mucharihe ohoolela wa Yesu wi mpake murecele. Muloce ni Yehova vooloca sa mwaha, nave muroromele wi munepa awe waweela onahaala wookhaviheryaani okhala a murecele. Wakhala wi moheerano yeela, munahaala okhala oohakalala, nave munahaala wooniherya wi munnanwiriyana Yesu.—Mat. 5:9.

¹⁹ Ninnamuthamalela vancipale Yehova onivahererya ohoolela woosivela moorweela wa “muru wa muloko,” Yesu Kristu. (Éfe. 5:23) Moolikana ni arummwa Pedro, Yakopo, ni Yohani, nnanwerya okhala oolakelela ‘onwiriyana.’ (Mat. 17:5) Noothokororya mukhalelo nneeraahu niwerye opaka murecele ni Mukristu mukhwiihu yoowo nimunyeenyeihalaahu. Moorweela wa weerano yeela ni otitelela weeca mu ephiro yawuuraanyeya enakeriha wookumini, nnahaala waakhela mareeliho mancipale hiihaano ni ohakalala woohimala omwaahiyu.