1-2. (a) Abapostoli bakaJesu abathathu bayalwa ukuthi benzeni begodu bayithatha njani indaba leyo? (b) Khuyini esizokucoca ngayo esihlokwenesi?

NGEMVA kwephasika laka-32 C.E., umpostoli uPitrosi, uJakopo noJwanisi babona umbono okarisako. Nabasentabeni ede, ekungenzeka bekuyiNtaba iRherimo, uJesu watjhuguluka phambi kwabo. “Ubuso bakhe baphazimula njengelanga, izambatho zakhe zamanya njengokukhanya.” (Mat. 17:1-4) Ngekupheleni kombono loyo, abapostolaba bezwa uZimu athi: “Le yiNdodanami, engiyithandako, engiyamukeleko. Yilaleleni.” (Mat. 17:5) Abapostoli abathathwaba batjengisa ukuthi bayamlalela uJesu ngendlela ebebaphila ngayo. Sifuna ukulingisa isibonelo sabo.

² Esihlokweni esidlulileko, sifunde ngokuthi ukulalela ilizwi lakaJesu kutjho ukulisa izinto ezithileko. Esihlokwenesi, sizokucoca ngezinto ezimbili uJesu athi kufuze sizenze.

3. UMatewu 7:13, 14, uthi yini ekufuze siyenze?

³ Funda uMatewu 7:13, 14. Utjhejile na ukuthi uJesu ukhuluma ngamayege amabili atjhinga eendleleni ezingafaniko? Okuyindlela ‘ebanzi’ nendlela ‘eminyeneko.’ Akunandlela yesithathu. Kufuze sizikhethele thina indlela esizokukhamba ngayo. Lesi siqunto esiqakatheke khulu esingasenza ngombana ukuphila okungapheliko kuyame kiso.

4. Ungayihlathulula njani indlela ‘ebanzi?’

⁴ Kuqakathekile ukwazi umehluko hlangana neendlela ezimbilezi. Banengi abakhamba endleleni ‘ebanzi’ ngombana kulula ukukhamba ngayo. Ngokudanisako, abanengi bakhetha ukukhamba endleleni le begodu baziphathe ngendlela engathabisi uZimu. Abalemuki ukuthi nguSathana  olinga ukudosa abantu ukuthi bakhambe endleleni le begodu isiphetho sakhona kukufa.—1 Kor. 6:9, 10; 1 Jwa. 5:19.

5. Abanye abantu balinge njani ukufumana indlela ‘eminyeneko’ bebakhamba kiyo?

⁵ Ngokungafani nendlela ‘ebanzi,’ enye indlela “iminyene” begodu uJesu wathi bambalwa abayifumanako. Kubayini? Okurarako kukuthi evesini elilandelako, uJesu uyelelelisa abalandeli bakhe ngabaphorofidi bamala. (Mat. 7:15) Abantu abanengi bathi kuneenkolelo ezinengi begodu ezinengi zakhona, zithi zifundisa iqiniso. Ngebanga lokuthi kuneenkolelo ezinengi, abantu badanile namkha bahlangahlangene, okwenza ukuthi bangazitshwenyi ngokufuna indlela etjhinga ekuphileni. Nanyana kunjalo, indlela etjhinga ekuphileni ingafumaneka ngombana uJesu wathi: “Nanihlala elizwini lami, kwamambala nibafundi bami nizolazi iqiniso, begodu iqiniso lizonitjhaphulula.” (Jwa. 8:31, 32) Okuthabisako kukuthi akhenge ulandele inengi kodwana kunalokho ufune iqiniso. Uthome ukufunda ngokudephileko iliZwi lakaZimu bona uthole ukuthi khuyini ayifuna kithi bewalalela neemfundiso zakaJesu. Ezinye zezinto ozifundileko kukuthi uJehova ulindele ukuthi sale iimfundiso zamala besilise ukugidinga amaholideyi anomsuka wamala. Ufunde nokuthi nawenza amatjhuguluko ekuphileni kwakho bona uthabise uJehova, ngezinye iinkhathi angekhe kube bulula. (Mat. 10:34-36) Kungenzeka akhenge kube bulula ukwenza amatjhuguluko atlhogekako. Nanyana kunjalo, ulingile ngebanga lokuthi uthanda uBabakho wezulwini bewufuna nokumthabisa. Kumthabisa khulu okwenzileko!—IzA. 27:11.

6. IRhubo 119:9, 10, 45, 133, lithi khuyini engasisiza sihlale sisendleleni eminyeneko?

⁶ Nasele sikhamba endleleni eminyeneko, khuyini engasisiza sihlale sikiyo? Cabanga ngesibonelwesi. Iinsimbi ezifakwa hlanu kwendlela entabeni, zifakwa lapho bona zivikele umtjhayeli nekoloyakhe. Iinsimbezi zenzelwe ukusiza abatjhayeli bona bangaphumi endleleni. Abasibanengi abatjhayeli abangaghoghoyila ngokuthi iinsimbezi ziyabakhandela nabatjhayelako! Iimthetho kaJehova efumaneka eBhayibhelini ifana neensimbi ezifumaneka hlanu kwendlela. Isisiza ngokuthi sihlale sisendleleni eminyeneko.—Funda IRhubo 119:9, 10, 45, 133.

7. Abantu abatjha kufuze bayiqale njani indlela eminyeneko?

⁷ Bantu abatjha, kghani ngezinye iinkhathi nizwa kwangathi imithetho kaJehova iyanikhandela ukwenza izinto enizifunako? Ngilokho uSathana afuna nikucabange. Ufuna nidzimelele ekuphileni kwalabo abasendleleni ebanzi ngombana kubonakala ngathi bathabela ukuphila. Usebenzisa lokho abantu enifunda nabo abakwenzako namkha lokho enikubona ku-Inthanethi bona nizizwe ngasuthi niyasalela. USathana ufuna nizizwe ngasuthi umthetho kaJehova unikhandela ukuthi nithabele ukuphila ngokuzeleko. * Khumbula ukuthi akafuni abantu abakhamba ngendlela le babone ukuthi  iphelelaphi. Ngakelinye ihlangothi, uJehova usivezele ngokukhanyako ukuthi balindelwe yini labo abahlala basendleleni etjhinga ekuphileni.—Rhu. 37:29; Isa. 35:5, 6; 65:21-23.

8. Khuyini abantu abatjha abangayifunda esibonelweni saka-Olaf?

⁸ Akhe sicabange ngesibonelo somfowethu osesemutjha, u-Olaf. * Abantu ebekafunda nabo bebamgandelela ukuthi aziphathe kumbi ngokwamabhayi. Nakabahlathululela ukuthi aboFakazi bakaJehova baphila ngeenkambiso zeBhayibheli ezisezingeni eliphezulu, abanye abantazana baluka amano bebamlinga ukuthi aziphathe kumbi nabo ngokwamabhayi. U-Olaf wakujamela okulungileko. Wagandelelwa nangenye indlela godu. U-Olaf uthi: “Abotitjhere bebathi kufuze ngiye eYunivesithi ngombana abantu bazongihlonipha. Bathi ngaphandle kwayo, angeze ngiphumelele ekuphileni.” Khuyini eyamsiza waqalana nokugandelelokhu? Uthi: “Ngatjhidelana khulu nabantu  engilotjha nabo uZimu. Baba njengomndeni kimi. Ngathoma nokufunda iBhayibheli ngokuzimisela. Nangilokhu ngiraga nokufunda iBhayibheli, ngathoma ukuqiniseka ukuthi leli liqiniso. Lokho kwangenza ngazimisela khulu ukulotjha uJehova.”

9. Khuyini ekufuze yenziwe ngilabo abafuna ukuhlala basendleleni eminyeneko?

⁹ USathana ufuna silise ukukhamba endleleni etjhinga ekuphileni. Ufuna sikhambe endleleni ekhanjwa linengi “etjhinga ekubhujisweni.” (Mat. 7:13) Sizokuhlala sisendleleni eminyeneko nasizokuragela phambili silalela uJesu besithathe indlela le njengesivikelo. Nje, akhe sicoce ngokhunye uJesu athi kufuze sikwenze.

10. NgokukaMatewu 5:23, 24, uJesu wathi kufuze senzeni?

¹⁰ Funda uMatewu 5:23, 24. UJesu wahlathulula isenzakalo ebesiqakatheke khulu kumaJuda ebakamlaleleko. Cabanga ngomuntu othileko osethempelini olungele ukunikela ngesilwana esithileko kumphiristi njengomhlatjelo. Nangabe ngesikhatheso umuntu loyo ukhumbulile ukuthi umfowabo unokuthileko ngaye, bekufuze atjhiye umhlatjelwakhe “akhambe.” Kubayini? Khuyini eqakatheke ukudlula ukwenza umhlatjelo kuJehova? UJesu wathi: “Libalelana nomfowenu qangi.”

11. UJakopo wenzani bona enze ukuthula no-Esewu.

¹¹ Singafunda iimfundo eziqakathekileko ngokulibalela nasiqala isenzakalo esithileko ekuphileni kwakaJakopo. Ngemva kokuthi uJakopo akhamba endaweni abelethelwa kiyo iimnyaka ebalelwa kwema-20, uZimu wamyala ngengilozi ukuthi abuyele khona. (Gen. 31:11, 13, 38) Nanyana kunjalo, bekunomraro. Umfowabo olizibulo u-Esewu bekafuna ukumbulala. (Gen. 27:41) UJakopo “wethukwa khulu bewakhathazeka” bona umfowabo kungenzeka ukuthi usafukamele ivunda. (Gen. 32:7) Wenzani bona enze ukuthula nomfowabo? Kokuthoma, wathandaza ngokubuyelelweko kuJehova ngendaba le. Ngemva kwalokho, wathumela isipho somusa ku-Esewu. (Gen. 32:9-15) Ekugcineni, nakahlangana no-Esewu, wazithoba. Wahloma ihloko phasi, ingasi kanye namkha kabili kodwana kalikhomba! Ngokuzithoba nangehlonipho, wenza ukuthula nomfowabo.—Gen. 33:3, 4.

12. Khuyini esiyifundako esibonelweni sakaJakopo?

¹² Sifumana isifundo ngendlela uJakopo alungiselela ngayo bona ayokuhlangana nomfowabo nangendlela aya ngayo kuye. UJakopo wabawa isizo kuJehova ngokuthobeka. Ngemva kwalokho wenza ngokuvumelana nomthandazwakhe ngokuthatha amagadango wokwenza ukuthula nomfowabo. Nabahlanganako, uJakopo akhenge anghanghisane no-Esewu ngokuthi ngubani owenze umtjhapho namkha ongakenzi umtjhapho. Umnqopho kaJakopo bekukukwenza ukuthula nomfowabo. Singasilingisa njani isibonelo sakhe?

13-14. Kufuze senzeni nasiphethe umuntu esilotjha naye uZimu kumbi?

¹³ Nangabe sifuna ukuhlala sisendleleni eya ekuphileni, kufuze silibalele abantu esilotjha nabo uZimu. (Rom. 12: 18) Khuyini ekufuze siyenze nasilemuka ukuthi simphethe kumbi umuntu esilotjha naye uZimu? NjengoJakopo, singathandaza kuJehova ngokusuka ehliziyweni. Singambawa bona asisize senze ukuthula nomfowethu.

¹⁴ Kufuze sithathe isikhathi sethu sizihlolisise. Singazibuza iimbuzo enjengale: ‘Inga-kghani ngiyavuma ukuthi ngenze umtjhapho, ngizithobe bengenze ukuthula? UJehova noJesu bazozizwa njani nangithatha igadango lokwenza ukuthula nomfowethu namkha udadwethu?’ Iimpendulo zemibuzo le zingasenza silalele uJesu begodu ngokuzithoba, senze ukuthula nabantu esilotjha nabo uZimu. Ngendlela le, singalandela isibonelo sakaJakopo.

15. Kungasisiza njani ukusebenzisa ikambiso efumaneka kwebe-Efesu 4:2, 3 ukuthi senze ukuthula nomfowethu?

¹⁵ Cabanga ukuthi bekuzokwenzekani ngathana uJakopo wazikhakhazisa nakayokukhuluma nomfowabo! Umphumela bewuzokuba kukuthi bengeze baqeda kuhle. Kufuze sithobeke nasiyokwenza ukuthula nomfowethu. (Funda yebe-Efesu 4:2, 3.) IzAga 18:19 zithi: “Umfo okhubekileko ulikhuni kunedorobho elinemithangala, iye, ukucabana kufana nesiqabo sombhotjhongo.” Ukuzithoba nasibawa ukulitjalelwa kungasenza singene ‘embhotjhongweni’ loyo.

16. Khuyini ekufuze sicabangisise ngayo begodu kubayini?

¹⁶ Kufuze sicabangisise ukuthi sizokuthini kumfowethu nokuthi sizokutjho njani. Nasikulungeleko ukwenza njalo, singaya kumfowethu esimzwise ubuhlungu sinomnqopho wokususa ubuhlungu abuzwako. Angathoma ngokutjho amezwi ahlabako. Kungaba bulula ukusilingeka namkha ukuzilibalela kodwana kghani lokho kungenza ukuthi nigcine sele nilibalelene? Awa angeze. Khumbula ukuthi ukwenza ukuthula nomfowenu kuqakatheke khulu kunokwazi ukuthi ngubani otjhaphileko namkha ongakatjhaphi.—1 Kor. 6:7.

17. Khuyini ongayifunda esibonelweni saka-Gilbert?

¹⁷ Umfowethu u-Gilbert wasebenza ngamandla bona abe mumuntu owenza ukuthula. Uthi: “Benginemiraro eminengi  nendodakazami. Iimnyaka emibili yoke, ngalinga ngamandla ukuthi sibe netjhebiswano elihle godu.” Khuyini enye eyenziwa ngu-Gilbert? “Ngaphambi kokukhulumisana nendodakazami, bengithoma ngokuthandaza bengilungise nomkhumbulwami bona kungenzeka akhulume amagama ahlabako. Bekutlhogeka ukuthi ngikulungele ukulibalelela. Ngafunda ukuthi akukafuzi ngilinge ukuveza bona nginelungelo lokukwenza engikwenzileko kodwana bekufuze ngilinge ukwenza ukuthula.” Waba yini umphumela? Uthi: “Namhlanjesi, nginokuthula komkhumbulo ngebanga letjhebiswano elihle enginalo nawo woke amalunga womndenami.”

18-19. Nange kunomuntu esimzwise ubuhlungu, khuyini ekufuze sizimisele ukuyenza begodu kubayini?

¹⁸ Khuyini ekufuze uzimisele ukuyenza nawulemuka ukuthi awukamphathi kuhle omunye umKrestu? Landela isinqophiso sakaJesu sokwenza ukuthula. Khuluma noJehova ngendaba le bewuthembele emmoyenakhe ocwengileko ukuthi uzokusiza ube mumuntu owenza ukuthula. Nawenza njalo, uzokuthaba bewuzokutjengisa ukuthi uyamalalela uJesu.—Mat. 5:9.

¹⁹ Siyathokoza ngokuthi uJehova usinikele isinqophiso esinethando ngokusebenzisa ‘ihloko yebandla,’ uJesu Krestu. (Efe. 5:23) Kwanga singazimisela ‘ukuyilalela,’ njengompostoli uPitrosi, uJakopo noJwanisi. (Mat. 17:5) Sicoce ngeendlela esingenza ngazo ukuthula nomKrestu okungenzeka simzwise ubuhlungu. Ngokwenza njalo, nokuhlala sisendleleni eminyeneko etjhinga ekuphileni, sizokufumana iimbusiso ezinengi nje nethabo elingapheliko esikhathini esizako.