1, 2. а) Йеговӕ Киристей ӕртӕ апостолемӕн ци ниффӕдзахста, ӕма еци фӕдзӕхстмӕ гӕсгӕ куд архайдтонцӕ? б) Аци статьяй дзурд цӕбӕл цӕудзӕй?

 НӔ ЭРИ 32 анзи Комуадзӕни фӕсте апостолтӕ Петур, Иаков ӕма Иоанн Киристей хӕццӕ Ермони хонхмӕ иссудӕнцӕ ӕма уоми дессаги цӕстӕбӕлуайӕн фӕууидтонцӕ. «Уоми сӕ рази [Йесо] ӕ хузӕ раййивта ӕма ӕ цӕсгон хори хузӕн ниррохс ӕй, ӕ уӕледарӕс ба рохси хузӕн цӕхӕртӕ калун райдӕдта» (Матф. 17:1–4). Еци цӕстӕбӕлуайӕн ку нӕма фӕцӕй, уӕд апостолтӕ фегъустонцӕ, Хуцау куд загъта: «Айӕ ӕй мӕ уарзон Фурт, арази кӕмӕй дӕн, еци Фурт. Игъосетӕ имӕ» (Матф. 17:5). Аци ӕртӕ апостолей цардӕй бӕрӕг ӕй, ӕцӕгӕйдӕр Киристемӕ ке игъустонцӕ, е. Ӕма мах дӕр фӕндуй уотӕ архайун.

² Аци дууӕ статьяй дзурд цӕуй, нӕ бон куд ӕй Киристемӕ игъосун, уобӕл. Айразиккон статьяй ӕркастан, ци гъӕуама мабал кӕнӕн, уомӕ. Аци статьяй ба радзубанди кӕндзиан, цӕхуӕн дууӕ гъуддаги гъӕуама кӕнӕн, уобӕл.

3. Матфеййи 7:13, 14 цӕхуӕн фӕдзӕхст финст ес?

³ Бакӕсӕ Матфеййи 7:13, 14. Киристе загъта, ӕрмӕстдӕр дууӕ нади ке ес: сӕ еу ӕй фӕтӕн ӕма уӕрӕх, иннӕ ба – унгӕг. Ӕма си кӕци равзардзиан, е ба нӕхецӕй кӕнгӕ ’й. Уомӕй ӕхсидзгӕдӕр унаффӕ царди нӕййес, уомӕн ӕма уомӕй кӕнгӕ ’й не ’носон цард.

4. Фӕтӕн нади туххӕй дӕ бон ци ӕй зӕгъун?

 ⁴ Аци дууӕ нади цӕмӕй хецӕн кӕнунцӕ, уой гъӕуама хуарз лӕдӕрӕн. Беретӕ фӕтӕн над равзарунцӕ, уомӕн ӕма ибӕл ӕнцон цӕуӕн ӕй, фал ӕй лӕдӕргӕ дӕр нӕ кӕнунцӕ, еци надбӕл сӕ Сайтан ке кӕнуй ӕма сӕ фӕстагмӕ мӕлӕтӕй ӕндӕр ке неци хезуй (1 Кор. 6:9, 10; 1 Иоан. 5:19).

5. Еуӕй-еуетӕ ци бакодтонцӕ, цӕмӕй унгӕг над иссирдтайуонцӕ ӕма ибӕл цӕун райдӕдтайуонцӕ?

⁵ Фӕтӕн надӕй уӕлдай иннӕ над ба ӕй унгӕг, ӕма Киристе загъта, беретӕ ’й ке не ’ссерунцӕ. Цума цӕмӕн? Иннӕ стихи Киристе ӕ фӕдбӕлдзӕугутӕн загъта, цӕмӕй сӕхе хезонцӕ мӕнгӕ пахампартӕй (Матф. 7:15). Еуӕй-еу бӕрӕггӕнӕнтӕмӕ гӕсгӕ абони ӕгас дуйней дӕр мингай динтӕ ес, ӕма сӕ фулдӕр зӕгъунцӕ, рӕстдзийнадӕбӕл ке ахур кӕнунцӕ. Уойбӕрцӕ фӕйнӕхузи динтӕ ӕма ахурӕдтӕ ке ес, уомӕ гӕсгӕ адӕнӕй берети фӕндгӕ дӕр нӕбал кӕнуй, цардмӕ ка кӕнуй, еци над агорун. Фал ӕй уӕддӕр алке бон дӕр ӕй иссерун. Киристе загъта: «Кӕд мӕ дзурдмӕ гӕсгӕ цӕрайтӕ, уӕд ӕцӕгӕйдӕр мӕ ахуркӕнуйнӕгтӕ уодзиайтӕ, ӕма базондзиайтӕ рӕстдзийнадӕ, ӕма уӕ рӕстдзийнадӕ иссӕребарӕ кӕндзӕй» (Иоан. 8:31, 32). Фал ду раст бакодтай: адӕнӕн сӕ фулдӕри фӕдбӕл нӕ рацудтӕ ӕма рӕстдзийнадӕ агурдтай. Уой фӕсте Хуцауи Дзурд ахур кӕнун райдӕдтай, уомӕн ӕма дӕ фӕндадтӕй базонун, ӕ зӕрдӕмӕ ци цӕуй ӕма ци нӕ цӕуй, уой. Удта Киристей амундтӕмӕ гӕсгӕ архайун райдӕдтай. Уомӕй уӕлдай ма ’й базудтай, Йегови уотӕ ке фӕндуй, цӕмӕй мӕнгӕ динӕй дӕхе райеуварс кӕнай ӕма мӕнгӕ хуцӕуттӕн ковуни хӕццӕ баст ӕгъдӕуттӕ ӕма бӕрӕгбӕнттӕ ниууадзай. Ӕма ’й дӕхецӕй зонис, е ӕнцон ке нӕй (Матф. 10:34–36). Царди цӕхуӕндӕр ӕййивддзийнӕдтӕ искӕнун ӕнцон н’ адтӕй, фал уӕддӕр дӕ къохтӕ не ’руагътай, уомӕн ӕма нӕ уӕларвон Фидӕ Йегови уарзис ӕма дӕ фӕндуй, цӕмӕй ди ӕ зӕрдӕ рохс кӕна. Уой туххӕй ди Йеговӕ хъӕбӕр сӕрустур ӕй! (Ӕмб. 27:11).

6. Ци нин банхус кӕндзӕй, цӕмӕй, цардмӕ ка кӕнуй, еци надӕй ма райеуварс уӕн? (Псалом 119:9, 10, 133).

⁶ Ци нин банхус кӕндзӕй, цӕмӕй, цардмӕ ка кӕнуй, еци надӕй ма райеуварс уӕн? Ӕрхӕссӕн уӕхӕн цӕветтон: арӕх хонхи унгӕг нӕдтӕбӕл надгӕрон цӕгиндзитӕ ниссадзунцӕ, цӕмӕй ӕнай-ӕнойти машинӕ къӕхӕнӕй ма ратӕха. Машинттӕбӕл ка фӕццӕуй, уонӕй уотӕ неке зӕгъдзӕй, аци цӕгиндзитӕ мӕ фӕндон цӕун нӕ уадзунцӕ, зӕгъгӕ, уомӕн ӕма ’й лӕдӕрунцӕ, етӕ син сӕ цард ке гъӕуай кӕнунцӕ. Библий ци уагӕвӕрдтӕ ес, етӕ дӕр цӕгиндзити хузӕн ӕнцӕ. Гъӕуай нӕ кӕнунцӕ, цӕмӕй, цардмӕ ка кӕнуй, еци надӕй ма райеуварс уӕн ӕма къӕхӕнӕй ма ратӕхӕн. (Бакӕсӕ Псалом 119:9, 10, 133.)

7. Унгӕг над ӕцӕгӕйдӕр ӕригӕнтти размӕлун нӕ уадзуй? Ба ’й лӕдӕрун кӕнӕ.

⁷ Ӕригӕнттӕ, уотӕ уӕмӕ некӕд фӕккӕсуй, ӕма уӕ Йегови уагӕвӕрдтӕ размӕлунтӕ нӕ уадзунцӕ? Сайтани фӕндуй, цӕмӕй раст гъе уотӕ гъуди кӕнайтӕ. Фӕтӕн надбӕл ка цӕуй, уони цард Сайтан уотӕ рӕсугъд бавдесуй, цӕмӕй дӕмӕ уотӕ кӕсун райдайа, ӕма етӕ дзӕбӕх игъӕлдзӕг цард кӕнунцӕ, ду ба – нӕ. Ӕма дӕ цӕмӕй уобӕл баууӕндун кӕна, уой туххӕй аллихузи мадзӕлттӕй фӕппайда кӕнуй, зӕгъӕн, интернетӕй кенӕ ба ма де ’нгӕрттӕй дӕр. Фӕндуй ӕй, цӕмӕй дӕмӕ уотӕ  кӕсун райдайа, ӕма Йегови уагӕвӕрдти туххӕй царди хуӕрзтӕй цох дӕ *. Фал ди еу гъуддаг иронх ма уӕд: еци фӕтӕн надбӕл ка цӕуй, уонӕн сӕ кӕрон цӕхуӕн уодзӕй, уой Сайтан римӕхсгӕ кӕнуй, Йеговӕ ба нин ӕргом загъта, унгӕг над ка равзурста, уонӕмӕ цӕхуӕн цард ӕнгъӕлмӕ кӕсуй, уой (Пс. 37:29; Ис. 35:5, 6; 65:21–23).

8. Олӕф ӕригӕнттӕн фӕнзуйнаг цӕмӕй ӕй?

⁸ Ӕркӕсӕн еу ӕригон ӕнсувӕр Олӕфи * хабармӕ. Ӕ къласи кизгуттӕ ин арӕх фӕдздзориуонцӕ, цӕмӕй сӕ хӕццӕ ӕмуат ӕрцӕуа. Фал син Олӕф фӕззӕгъидӕ, Библимӕ гӕсгӕ ке цӕруй ӕма си ци финст ес, уой сӕрти хезун ӕй ке нӕ фӕндуй. Уой туххӕй еуӕй-еу кизгуттӕ никки карздӕр фӕцӕнцӕ ӕма имӕ ниллӕууиуонцӕ, фал син неци рауадӕй. Фӕстӕдӕр ма Олӕф ӕндӕр фӕлварӕнбӕл дӕр исӕмбалдӕй: «Мӕ ахургӕнгутӕ  мин дзурдтонцӕ, цӕмӕй институтмӕ бацӕуон, уомӕн ӕма, дан, дин ӕнӕ уомӕй адӕни цӕсти кадӕ нӕ уодзӕй, удта, дан, дӕхецӕн хуарз куст дӕр не ’ссердзӕнӕ». Цума еци рӕстӕг Олӕфӕн ци банхус кодта? Е зӕгъуй: «Ӕмбурди мӕхецӕн хуарз ӕмбӕлттӕ иссирдтон. Етӕ мин мӕхе бийнонти хузӕн иссӕнцӕ. Уомӕй уӕлдай ма Библи дӕр лӕмбунӕгдӕр ӕртасун райдӕдтон. Ӕма ’й куд фулдӕр ӕртастон, уотӕ ’й никки хъӕбӕрдӕр лӕдӕрдтӕн, айӕ рӕстдзийнадӕ ке ӕй. Уой фӕрци мӕ бафӕндадтӕй донаргъуд райсун ӕма Йегови Ӕвдесӕн исун».

9. Ци кӕнун нӕ гъӕуй, цӕмӕй унгӕг надӕй ма райеуварс уӕн?

⁹ Сайтани фӕндуй, цӕмӕй, цардмӕ ка кӕнуй, еци надӕй райеуварс уӕн. Ӕ нисан ӕй, цӕмӕй нӕ фӕтӕн надмӕ расайа. Еци надбӕл беретӕ федар къахдзӕфтӕй сӕ исӕфтмӕ цӕунцӕ (Матф. 7:13). Фал Киристемӕ ку игъосӕн ӕма ’й ку лӕдӕрӕн, ци надбӕл цӕуӕн, е нӕ берӕ бӕллӕхтӕй ке гъӕуай кӕнуй, уӕд си неци хузи райеуварс уодзиан. Гъӕйдӕ нур ба ӕркӕсӕн, Киристе ма нин ке кӕнун кодта, еци гъуддӕгтӕй дуккагмӕ.

10. Матфеййи 5:23, 24 финст дзурдтӕмӕ гӕсгӕ ци гъӕуама кӕнӕн?

¹⁰ Бакӕсӕ Матфеййи 5:23, 24. Аци стихти Йесо ци хабари кой ракодта, е, ка имӕ игъуста, уонӕн дзӕбӕх зонгӕ адтӕй. Дӕ цӕститӕбӕл рауайун кӕнӕ: дзиуиттаг ӕ ковӕггаги хӕццӕ ковӕндонӕмӕ ӕрбацудӕй, цӕмӕй ӕй нивондӕн ӕрхӕсса. Гъема саугинмӕ куддӕр бацудӕй, уотӕ ба ӕ зӕрдӕбӕл ӕрбафтудӕй, ӕ синхон ибӕл цӕбӕлдӕр ке фӕззӕрдихудт ӕй. Ӕма ’й нур гъӕуй ӕ ковӕггаг уоми ниууадзун ӕма рандӕ ун. Цума цӕмӕн? Йеговӕн нивонд ӕрхӕссунӕй ӕхсидзгӕдӕр ма ести ес? Гъо. Ци, уой туххӕй ба Киристе комкоммӕ загъта: «Цо, де ’нсувӕри хӕццӕ бал бафедауӕ».

11. Иаков куд архайдта, цӕмӕй Исави хӕццӕ бафедудтайдӕ?

¹¹ Иннети хӕццӕ федаун куд гъӕуй, уомӕй нин фӕнзуйнаг ӕй рӕстгӕнӕг Иаков. Ӕ райгурӕн бӕстӕй ӕй ледзун ку багъудӕй, уомӕй имӕ еу 20 анзей фӕсте Хуцауи изӕд фӕззиндтӕй ӕма ин загъта, цӕмӕй фӕстӕмӕ раздахтайдӕ (Райд. 31:11, 13, 38). Фал е уотӕ ӕнцон н’ адтӕй. Кӕддӕр ӕй ӕ хестӕр ӕнсувӕр Исав марунмӕ гъавта (Райд. 27:41). Е ’нсувӕри хӕццӕ ’й нӕуӕгӕй фембӕлун ке гъӕудзӕй, уой Иаков ку базудта, уӕд хъӕбӕр фӕттарстӕй ӕма катай кӕнун райдӕдта (Райд. 32:7). Уотӕ имӕ кастӕй, ӕма имӕ е ’нсувӕр нур дӕр ма мӕстгун ӕй. Цума Иаков ци бакодта? Фиццагидӕр бал Йеговӕмӕ зӕрдибунӕй ракувта, уой фӕсте ба Исавӕн аллихузи лӕвӕрттӕ рарвиста (Райд. 32:9–15). Ӕма ку фембалдӕнцӕ, уӕд дӕр Иаков ӕхе хъӕбӕр сӕрниллӕг бадардта ӕма ин еу хатт нӕ, фал авд хатти ӕ сӕрӕй зӕнхи уӕнгӕ бакувта. Гъема ӕгас еци гъуддӕгти фӕрци Иаков е ’нсувӕри хӕццӕ бафедудта (Райд. 33:3, 4).

12. Иакови хабарӕй цӕбӕл ахур кӕнӕн?

¹² Иаков е ’нсувӕри хӕццӕ фембӕлунмӕ ӕхе ку цӕттӕ кодта ӕма ку фембалдӕнцӕ, уӕд дӕр ӕхе куд дардта, уомӕй берӕ цӕбӕлдӕрти ахур кӕнӕн. Фиццагидӕр бал Иаков Йеговӕмӕ сӕрниллӕгӕй ракувта ӕма си ӕнхус ракурдта, уой фӕсте ба ӕ кувдмӕ гӕсгӕ архайдта – е ’нсувӕрӕн аллихузи лӕвӕрттӕ рарвиста, цӕмӕй ин ӕ зӕрдӕ ӕрфӕлмӕн кодтайдӕ. Ӕма ку фембалдӕнцӕ, уӕд дӕр си фудгин ка адтӕй, уобӕл дзорун нӕ райдӕдта. Ӕ нисан адтӕй е ’нсувӕри хӕццӕ бафедаун. Цума мах бон ба куд ӕй Иакови фӕнзун?

13, 14. Хуӕрӕ кенӕ ӕнсувӕри зӕрдӕ нӕбӕл ку рахода, уӕд куд гъӕуама архайӕн?

¹³ Цӕмӕй, цардмӕ ка кӕнуй, еци надӕй ма фӕххауӕццаг уӕн, уой туххӕй нӕ гъӕуй лимӕнӕй цӕрун, царди надбӕл нӕ фарсмӕ ка цӕуй, уони хӕццӕ (Ром. 12:18). Фал, зӕгъӕн, уотӕ рауадӕй, ӕма нӕбӕл кедӕр зӕрдӕ рахудтӕй. Уӕдта нин ци кӕнгӕ ’й? Фиццагидӕр бал гъӕуама Иакови хузӕн Йеговӕй ӕнхус ракорӕн, цӕмӕй еци адӕймаги хӕццӕ бафедауӕн.

¹⁴ Алкедӕр ни гъӕуама рӕстӕг рахецӕн кӕна ӕма ӕхе бафӕрса: «Ӕз ба цӕттӕ дӕн сӕрниллӕгӕй хатир ракорунмӕ? Йеговӕ ӕма Йесойӕн ӕхцӕуӕн нӕ уодзӕй, бафедаунмӕ фиццаг къахдзӕф ӕз ку искӕнон, уӕд?» Аци фарстатӕбӕл ку сагъӕс кӕнӕн, уӕд нин ӕнцондӕр уодзӕй Киристей фӕдзӕхстмӕ гӕсгӕ архайун ӕма не ’нсувӕри хӕццӕ бафедаун. Ӕма бабӕй нин аци гъуддаги дӕр Иаков фӕнзуйнаг ӕй.

15. Ефесӕгтӕмӕ 4:2, 3 финст уагӕвӕрд нин куд банхус кӕндзӕй не ’нсувӕри хӕццӕ бафедаунмӕ?

¹⁵ Нур, зӕгъӕн, Иаков Исави хӕццӕ фембалдӕй, ӕма си фудгин ка ӕй, уобӕл дзорун райдӕдтонцӕ. Уӕд сӕ хабар куд рауадайдӕ? Бустӕги ӕндӕрхузи. Мах ба аци хабарӕй цӕбӕл ахур кӕнӕн? Не ’нсувӕри хӕццӕ нӕ бафедаун ку гъӕуа, уӕд гъӕуама сӕрниллӕгӕй архайӕн. (Бакӕсӕ Ефесӕгтӕмӕ 4:2, 3.) Ӕмбесӕндти 18:19 финст ӕй: «Ӕ зӕрдӕ кӕмӕн искъахунцӕ, еци ӕнсувӕр федар горӕтӕй зиндӕр басӕттӕн фӕууй, ӕма буцӕутӕ еуӕй-еухатт фӕуунцӕ мӕсуги дуарӕхгӕнӕн гъӕди хузӕн». Фал сӕрниллӕгӕй «ни мин хатир кӕнӕ» ку зӕгъай, уӕд, зӕгъӕн ес, ӕма еци мӕсуги дуари дӕгъӕл дӕ къохи ӕй.

16. Расагъӕс кӕнун цӕбӕл гъӕуй ӕма цӕмӕн?

¹⁶ Цӕмӕй не ’нсувӕри хӕццӕ бафедауӕн, уой туххӕй гъӕуама рагацау расагъӕс кӕнӕн, ку имӕ бацӕуӕн, уӕд ци дзордзиан ӕма куд дзордзиан, уобӕл. Нӕ нисан ци гъӕуама уа? Гъӕуама байархайӕн, цӕмӕй ӕ зӕрдирист иссӕуа. Ка ’й зонуй, ци нин дзора, уой хӕццӕ арази ма уӕн. Фал ибӕл ку бостӕ кӕнай кенӕ дӕхе рӕститӕ кӕнунбӕл ку фӕууай, уӕд дин е неци фӕййагъаз уодзӕй. Дӕ гъудий дарӕ: фудгин уи ка адтӕй, уой исбӕрӕг кӕнунӕй ӕхсидзгӕдӕр ӕй адӕймаги хӕццӕ бафедаун (1 Кор. 6:7).

17. Ӕнсувӕр Жильбери хабарӕй нӕ бон цӕбӕл ӕй исахур ун?

¹⁷ Еу ӕнсувӕр Жильбер архайуй, цӕмӕй  иннети хӕццӕ фӕрнӕй цӕра. Е радзурдта: «Мӕ кизги хӕццӕ кӕрӕдзей нӕ лӕдӕрдтан. Дууӕ анземӕй фулдӕр архайдтон, цӕмӕй ӕ хӕццӕ ӕргом, фал сабурӕй радзурдтайнӕ ӕма ӕ хӕццӕ бафедудтайанӕ». Цума ма Жильбер никкидӕр ци кодта? Е зӕгъуй: «Рагацау Йеговӕмӕ исковинӕ, цӕмӕй, ку дзубанди кӕнӕн ӕма мин ести ’схуст дзурд ку ракӕна, уӕд ибӕл цӕмӕй мӕ зӕрдӕ ма рахода. Гъӕуама хатир кӕнунбӕл исахур адтайнӕ. Ӕз ӕй балӕдӕрдтӕн, фудгин ни ка ӕй, уой исбӕрӕг кӕнун уотӕ ӕхсидзгӕ ке нӕй. Мӕ сӕйраг ихӕс адтӕй, цӕмӕй нӕ бийнонти астӕу фарнӕ уа». Цума ин си ести рауадӕй? Жильбер зӕгъуй: «Абони мӕ уод сабур ӕй, уомӕн ӕма нур ӕгас бийнонтӕй дӕр кӕрӕдзей хуарз лӕдӕрӕн».

18, 19. Еске зӕрдӕ нӕбӕл ку рахода, уӕд куд гъӕуама архайӕн ӕма цӕмӕн?

¹⁸ Мадта аци статья бакӕсгӕй куд архайдзӕнӕ, ку ’й базонай, кедӕр зӕрдӕ дӕбӕл ке рахудтӕй, уой? Архайӕ Киристей фӕдзӕхстмӕ гӕсгӕ: «Де ’нсувӕри хӕццӕ... бафедауӕ». Ковӕ Йеговӕмӕ ӕма ибӕл ма гурусхӕ кӕнӕ, ӕ сугъдӕг хъаурӕй дин ке банхус кӕндзӕй, цӕмӕй иннети хӕццӕ фӕрнӕй цӕрай. Гъе уотемӕй ӕцӕг амондгун уодзӕнӕ ӕма ’й бавдесдзӕнӕ, Киристемӕ ке игъосис (Матф. 5:9).

¹⁹ Мах Йеговӕй хъӕбӕр боз ан, ӕмбурди сӕргъи Киристей ке исӕвардта, ӕма нин уой фӕрци фӕлмӕнӕй разамунд ке дӕттуй (Еф. 5:23). Гъӕйдӕ мадта мах дӕр Петур, Иаков ӕма Иоанни хузӕн алкӕддӕр Киристемӕ игъосӕн (Матф. 17:5). Аци статья нин нӕ зӕрдӕбӕл ӕрлӕуун кодта, куд ӕхсидзгӕ ӕй, цӕмӕй нӕбӕл ке зӕрдӕ рахудтӕй, еци адӕймаги хӕццӕ бафедауӕн. Мадта хуӕртӕ ӕма ӕнсувӕрти хӕццӕ фӕрнӕй ку цӕрӕн ӕма, цардмӕ ка кӕнуй, еци надбӕл идарддӕр дӕр ку цӕуӕн, уӕд абони дӕр амондгун уодзиан ӕма еци амондӕй неци хузи фенӕхай уодзиан!