LONGO DIA 51
Landulenu ‘Gumutegelela’
‘Yowu Mun’ami ngana zumba muavula. Mutegelelenu.’—MAT. 17:5.
LUNGIMBO 54 “C’est ici le chemin”
NDAGA JIDI MU LONGO EDI *
1-2. (a) Itshi Nzambi watogele apostolo thathu a Yesu ha gukalagala? Itshi apostolo ene akalegele? (b) Itshi tuza mutadila mu longo edi?
GUNGIMA dia Wano wa Pake wa givo 32 gungima dia guvualewa gua Yesu, mupostolo Phetelo, Yakoba nu Yone, amonele vizio imoshi ya gushimana. Yesu wayile nawo gu mulundu umoshi waleha, yajiya gukhala egi Mulundu wa Helemona. Gungima, wasombegesele gutuama diawo. ‘Phala yenji yasendesele guhenya gifua tangua. Milele yenji ya holu yasendesele guhenya gifua muanya.’ (Mat. 17:1-4) Tangua vizio yene yakhalele mutshigina guhua, apostolo avuile Nzambi muzuela egi: ‘Yowu Mun’ami ngana zumba muavula, wana gungusuanguluisa. Mutegelelenu.’ (Mat. 17:5) Aposto awa thathu amonesele diago mu monyo wawo egi ategelele Yesu. Esue nji tuatshigina gulandula gifezegeselo giawo.
2 Mu longo diabalega, tuamonele egi gutegelela dijui dia Yesu guakotelesa egi tudi naye gubemba gutshita ndaga jiko. Uvi mu longo edi tuza mumona ndaga mbadi Yesu wazuelele egi tudi naye gukalagala.
“NGINENU MU MUFULO WAZONDA”
3. Matayo 7:13, 14 idi muzuela egi tudi naye gutshita itshi?
3 Tanga Matayo 7:13, 14. Mu vese eji Yesu udi muzuelela mifulo mbadi idi mubata mu njila mbadi jia gudisha: njila “yakoma” nu njila “yakama.” Njila ya thathu ishigo guene. Esue hakhetu tudi naye gutomba njila itshi tuatshigina guya. Didi desizio dimoshi dia ndando handaga njila idi phamba imoshi idi mubata gu monyo wa mayilago.
4. Itshi wajiya guzuela mukunda nu njila “yakoma”?
4 Tudi naye gujiya gudisha gudi mukatshi dia njila jiene mbadi. Athu avula ana tshigina njila ya “yakoma” handaga yakhalago lamba ha guwenda muene. Ana tomba guya mu njila yene nu ana landula makalegelo a athu avula adi muya mu njila yene. Uvi anago gujiya egi muthu wana shinjiga athu ha guya mu njila yene udi Satana Diabulu, njila yene idi mubata gu gufua.—1 Kol. 6:9, 10; 1 Yone 5:19.
5. Ndaga jitshi athu ako atshitshile ha gumona njila “yakama,” nu ha guwenda mu njila yene?
5 Njila “yakoma” idi yagudisha nu njila ya “yakama,” handaga Yesu wazuelele egi athu phamba azonda ana mona njila yakama. Mukunda natshi? Handaga mu verse yalandula Yesu wawambelele alandudi enji ha gutemena baprofete a mambo. (Mat. 7:15) Mangino ikombelelo idi yavula. Enya ikombelelo yene ana zuela egi ana longesa giamatshidia. Luholo ikombelelo idi yavula, athu avula ana guleba muila nu anago gujiya giamatshidia giana longesa Biblia. Hene anago nji gukamba ha gujiya njila yana bata gu monyo. Uvi ajiya gumona njila yene. Yesu wazuelele egi: “Gula muasala agujinginyina gu mbimbi jiami, mudi diago alandudi ami, giamatshidia mbagimikatula mu uhiga.” (Yone 8:31, 32) Idi ndaga yabonga ha gumona egi enue muatshitshilego gifua muana tshita athu avula. Uvi muakambele ha gujiya giamatshidia gia Biblia. Mualongugile Mbimbi ya Nzambi ha gujiya ndaga jiana gutshigina muene, muategelele nji malongo a Yesu. Mukatshi dia ndaga jiene, muamonele egi Yehowa udi gututoga ha gutuna malongo a ikombelelo ya mambo nu ha gubemba gukalagala mawano a aphagano. Mualongugile nji egi yakhala ndo ndaga yaleba ha gusombegesa makalegelo etu nu gutshita ndaga Yehowa udi gututoga. (Mat. 10:34-36) Gutshita usombegeshi wa luholo elu guakhala lamba. Uvi muatshitshile ngolo handaga muana zumba Tata wenu wa mu dilu, muana tshigina nji gumusuanguluisa. Hene Yehowa wasuangulugile muavula nu enue!—Ish. 27:11.
LUHOLO TUAJIYA GUSALA MU NJILA YAKAMA
Malongo a Nzambi nu mikhuala yenji yana gutukuatesa ha gusala mu njila “yakama” (Tala paragrafe 6-8) *
6. Ha gutadila Ngimbo 119:9, 10, 45 nu 133 itshi yajiya gutukuatesa ha gusala mu njila yakama?
6 Gula tuasendesa guwenda mu njila yakama, itshi yajiya gutukuatesa ha gusala mu njila yene? Tutadilenu gifuzegeselo egi. Mu ifutshi iko, gula njila idi yazonda mu mulundu, ana tunga luphango sambua nu sambua dia njila yene hagula awendeshi a tumiyo adibambe nu tumiyo tuawo. Luphango luene luana kuatesa awendeshi a tumiyo ha gusala mu njila adi muya. Gushigo nga muwendeshi mumoshi wajiya gudisagesa nga guzuela egi luphango elu, ludi gutukanga njila ha guwenda luholo tudi mutshigina. Mikhuala ya Yehowa idi mu Biblia idi gifua luphango luene. Yana gutukuatesa ha gusala mu njila yakama.—Tanga Ngimbo 119:9, 10, 45, 133.
7. Luholo lutshi mavuala adi naye gutadila njila yakama?
7 Mavuala matangua ako muana tangiza egi mikhuala ya Yehowa idi yakola ba? Satana wana tshigina egi mutangize ngenyi. Wana tshigina egi mukalagale ndaga jiana kalagala athu ana wenda mu njila yakoma. Handaga athu ene ana monesa gifua adi nu gusuanguluga. Wana tshigina mutangize nji egi mushigo nu gusuanguluga gifua mafuta enu a khalasa nga athu ako muana mona mu Internet. Satana wana tshigina mutangize egi mikhuala ya Yehowa yana gumikanga njila ha gutshita ndaga mudi mutshigina. * Jiyenu ndaga eyi: Satana ganago gutshigina egi athu adi muwenda mu njila yenji ajiye fundo njila yene mbayabata. Uvi Yehowa wana tshigina mujiye gubonga mbamuheta gula muasala mu njila idi mubata gu monyo.—Ngi. 37:29; Yesh. 35:5, 6; 65:21-23.
8. Longo ditshi mavuala ajiya guzula mu gifegeselo gia phangi Olaf?
8 Tutadilenu longo mavuala ajiya guzula mu gifezegeselo gia phangi Olaf. * Mafuta enji a khalasa akhalele gumushinjiga ha gutshita uthambi. Waawambelele egi Matemue a Yehowa ana tumagela mikhuala ya Biblia. Ana akhetu ako a mu khalasa diawo amuwambelele egi mukhuala wene udi wakola. Hene asendesele gumushinjiga ha gubungisa n’enji muila. Uvi Olaf walanduile gukalagala ndaga jiabonga. Wataganele nji nu malamba ako. Udi muzuela egi: “Alongeshi ami akhalele gunguwambela egi ngudi naye gungina université hagula athu angunemese. Anguwambelele egi gula nganginyilego université mbangushigo muheta mudimo wabonga nga gukhala nu gusuanguluga.” Itshi yakuatesele Olaf ha gukolesela mu malamba ene? Udi muzuela egi: “Ngakolesele ufuta wami nu aphangi a mu hungu dietu. Abuile gifua enya fami yami. Ngasendesele nji gulonguga Biblia muavula. Gulonguga guene guangukuatesele ha gukotelesa egi ngudi mu giamatshidia. Gutshita ngenyi guangukuatesele ha guzula desizio dia gukombelela Yehowa.”
9. Athu adi mutshigina gusala mu njila yakama adi naye gutshita itshi?
9 Satana wana tshigina egi mukatuge mu njila idi mubata gu monyo. Wana tshigina nji egi mukalagale ndaga athu avula ana tshita, muwende nji mu njila yakoma idi “mutuameza gu gufua.” (Mat. 7:13) Uvi mbatusala mu njila yakama gula tudi mulandula gutegelela Yesu nu gumona egi njila yene idi guene ha gutubamba. Henyaha tutadilenu ndaga iko yazuelele Yesu tudi naye gutshita.
KAMBA GUHUIMA NU PHANGI’AYE
10. Ndaga itshi Yesu wazuelele mu Matayo 5:23, 24 tudi naye gutshita?
10 Tanga Matayo 5:23, 24. Yesu wawambelele enya Yuda anyi akhalele gumutegelela ndaga imoshi ya ndando. Wazuelele egi, gula muthu mumoshi udi mu tempelo udi mutshigina guhana mulambu wa shitu gudi nganga-nzambi, uvi wawunguluga egi udi nu mulonga nu phangi’enji, udi naye gubemba mulambu wenji ‘gavutuga.’ Mukunda natshi? Handaga guakhalele nu ndaga imoshi ya ndando muthu muene wakhalele naye gutshita gutuama dia guhana mulambu wenji gudi Yehowa. Yesu wazuelele egi: “Nda thomo ukambe guhuima nu phangi’aye.”
Wajiya gulandula gifezegeselo gia Yakoba handaga muene wakambele guhuima nu phangi’enji nu gudibulumuisa guagasue (Tala paragrafe 11-12) *
11. Ndaga itshi Yakoba wakalegele ha gukamba guhuima nu Esau?
11 Tutadilenu gifezegeselo gia Yakoba ha guheta malango ajiya gutukuatesa ha gukamba guhuima nu aphangi. Yakoba wayile mukhala gualeha nu gifutshi giavualewe muene ivo hehi nu 20, gungima Yehowa wamuwambelele mu njila ya muanjelo egi avutuge mu gifutshi giene. (Gis. 31:11, 13, 38) Uvi guakhalele nu ndaga yakhalele gumusagesa. Phangi’enji Esau wakhalele mutshigina gumushiya. (Gis. 27:41) Yakoba ‘wavile woma wavula, gikenene giamukuatele nji.’ Wazuelele egi yajiya gukhala egi phangi’enji udi gumuvila khabu. (Gis. 32:7) Itshi Yakoba wakalegele ha gukamba guhuima nu phangi’enji? Thomo, wakombelele muavula mukunda nu ndaga yene. Ya mbadi, watumidile Esau bakado. (Gis. 32:9-15) Gungima, tangua Yakoba watagenele nu Esau wamunemesele. Wafugamele gutuama dienji mbala sambadi. Yakoba wadibulumuishile gutuama dia Esau, wamunemesele nu wakambele n’enji guhuima.—Gis. 33:3, 4.
12. Longo ditshi wazula mu gifezegeselo gia Yakoba?
12 Tuamona luholo Yakoba wadilondele ha guya mutagana nu phangi’enji. Wakombelele Yehowa nu gudibulumuisa guagasue hagula amukuatese. Gungima wakalegele ndaga mugudivua nu gisambu gienji. Watshitshile ngolo ha gukamba guhuima nu phangi’enji. Tangua adimonele nu phangi’enji, Yakoba gakambelego gujiya gula nanyi wakhalele nu gubola. Uvi wakhalele mutshigina gukamba guhuima nu phangi’enji. Luholo lutshi tuajiya gulandula gifezegeselo gia Yakoba?
LUHOLO TUAJIYA GUKAMBA GUHUIMA NU APHANGI’ETU
13-14. Gula tuakalagala ndaga yasagesa phangi mumoshi, itshi tudi naye gutshita?
13 Esue tudi muwenda mu njila idi mubata gu monyo, tudi naye gukamba guhuima nu aphangi’etu. (Lomo 12:18) Itshi tudi naye gutshita gula tuakotelesa egi tuakalagala ndaga imoshi yasagesa phangi’etu? Tudi naye gukombelela Yehowa nu mutshima umoshi gifua muatshitshile Yakoba. Tuajiya gumutoga atukuatese ha gukamba guhuima nu aphangi’etu.
14 Tudi naye guditadila muabonga. Tuajiya gudihula mihu eyi: ‘Gula tudi nu mulonga nu phangi, ngana tshingina diago egi gubola gudi guami ba? Ngana toga pardo nu gudibulumuisa guagasue ha gukamba guhuima ba? Yehowa nu Yesu mbaadivua luholo lutshi gula ngazula desizio dia gukamba guhuima nu phangi’ami?’ Mvutu jietu gu mihu eyi, jiajiya gumonesa egi tudi mukalegela ndaga jiazuelele Yesu ha guya mumona phangi’etu nu gudibulumuisa guagasue ha gukamba guhuima. Ngenyi mbatumonesa egi tudi mulandula gifezegeselo gia Yakoba.
15. Luholo lutshi longo didi mu Efeso 4:2, 3 diajiya gutukuatesa ha gukamba guhuima nu phangi’etu?
15 Tangiza ndaga yakhalele naye gubua gula nga Yakoba wahudile Esau nu lulendo luagasue egi nanyi wakhalele nu gubola! Ndaga jiakhalele naye gubola diago. Gula tuaya mumona phangi ha gukamba guhuima, tudi naye gukhala nu gudibulumuisa. (Tanga Efeso 4:2, 3.) Ishima 18:19 idi muzuela egi: ‘Gula akalegela phangi gubola, wana gubua muenya ndaga jiakola gubalega luphango luakola lua dimbo. Gumana guko guakhala gifua mitshi ana jitshigila inzo yakola.’ Gula tuatotesela phangi, yajiya gumukuatesa ha gukamba guhuima nu esue.
16. Ndaga itshi tudi naye gutangiza gula tudi mutshigina guya mukamba guhuima nu phangi? Mukunda natshi?
16 Gula tudi mutshigina gukamba guhuima nu phangi, tudi naye nji gutangiza ndaga mbatuzuela nu luholo tudi naye gujizuela. Gula tuaya mumona phangi muene, felela dietu didi naye gukhala dia gulondega mulonga wamusagesa. Phangi muene wajiya guzuela ndaga jiajiya gutusagesa. Tuajiya guvua khabu muphushi nga gukamba gudimbingisa, uvi gutshita ngenyi guajiyilego gumikuatesa ha gukamba guhuima. Jiya egi gukamba guhuima nu phangi’aye gudi nu ndando yavula, ha fundo dia gukamba gudimbingisa.—1 Kol. 6:7.
17. Longo ditshi tuajiya guzula mu gifezegeselo gia phangi Gilbert?
17 Phangi Gilbert wakalegele ngolo ha gukhala mu guhuima nu enya fami yenji. Udi muzuela egi: “Ame nu mun’ami wa mukhetu tuakhalelego gudivua muabonga. Ngatshitshile ngolo ivo mbadi ha guta n’enji maga mu guhuima hagula tuvutugile ufuta wabonga n’enji.” Ndaga itshi iko phangi Gilbert watshitshile? “Gutuama dia guta n’enji maga, ngakhalele mutshita gisambu nu gutshita ngolo ha gutuna guvua khabu gula wanguwambela ndaga yabola. Ngakhalele naye gumutotesela, handaga ngakhalelego mukamba gudimbingisa, uvi ngakhalele mutshingina egi tukhale mu guhuima.” Gubonga gutshi Gilbert wahetele? Udi muzuela egi: “Mangino, ngudi mu guhuima handaga ame nu enya fami yami agasue tudi nu ufuta wabonga.”
18-19. Gula tuatshita ndaga imoshi yasagesa phangi, itshi tudi naye gutshita? Mukunda natshi?
18 Itshi udi naye gukalagala gula wakotelesa egi ndaga wazuedi nga watshitshi yasagesa phangi’aye? Udi naye gukamba guhuima gifua luholo Yesu wazuelele. Wambela Yehowa ndaga yene mu gisambu, mutoge nyuma yenji hagula igukuatese ukambe guhuima nu phangi’aye. Gula watshita ngenyi, mbawukhala nu gusuanguluga, mbawumonesa nji egi udi mutegelela Yesu.—Mat. 5:9.
19 Tudi muhana Yehowa mersi luholo wana gutuhana utuameji mu njila ya Yesu yago udi “fumu wa hungu.” (Ef. 5:23) Tuzulenu desizio dia ‘gutegelela Yesu’ gifua muatshitshile mupostolo Phetelo, Yakoba nu Yone. (Mat. 17:5) Mu longo edi tuamona luholo tuajiya gukamba guhuima gula tuakalagala ndaga imoshi yasagesa phangi’etu. Gula tuatshita ngenyi nu tuasala mu njila yakama idi mubata gu monyo, mbatuheta ishimbigo yavula mangino. Mbatukhala nji nu gusuanguluga gua mayilago mu masugu adi muza.
LUNGIMBO 130 Pardonnons volontiers
^ par. 5 Yesu udi gutuwambela ha gungina mu mufulo wazonda udi mubata mu njila ya monyo. Wana gutuwambela nji ha gukhala mu guhuima nu aphangi’etu. Uvi malamba atshi tuajiya gutagana nawo tangua tuana tshigina gutumagela mbimbi jienji? Luholo lutshi tuajiya gukolesela mu malamba ene?
^ par. 7 Tala muhu wa 6 wa gamukanda Mvutu jia Mihu 10 Mavuala ana Gudihula: “Luholo Lutshi Ngajiya Gutuna Matangi Abola a Mafuta?” Ngina nji ha fundo diasonegewa egi Le tableau s’anime, Résiste à la pression du groupe! mu jw.org.
^ par. 8 Mu longo edi, majina ako asombegesewe.
^ par. 56 UKOTELESHI WA IFUANESA: Gifua luholo luphango luana bamba muthu wana guwendasa gamiyo mu njila “yakama,” mikhuala ya Yehowa yana gutukuatesa ha gutuna gutala pornographie, gukalagala ndaga jia musonyi nga gutuna gutangiza egi makhalasa adi nu ndando yavula mu monyo wetu.
^ par. 58 UKOTELESHI WA IFUANESA: Yakoba wafugamene gutuama dia phangi’enji Esau mbala jiavula ha gukamba guhuima.
