1-2. (a) Wanem nao Jehovah talem thrifala aposol blo Jesus for duim, and hao nao olketa followim datwan?(b) Wanem nao bae iumi storyim lo disfala article?

BIHAEN lo Pasova lo 32 C.E., aposol Peter, James, and John lukim wanfala vision wea lukluk blo Jesus hem change. Taem thrifala standap lo wanfala hae maunten wea maet hem Maunt Hermon, olketa lukim “feis bilong [Jesus] shaen olsem sun and kaleko bilong hem barava white fogud.” (Matt. 17:1-4) Lo end blo vision olketa aposol herem God sei lo olketa: “Disfala man hem Son bilong mi wea mi lovem and wea mi hapi long hem. Iufala mas herem samting wea hem talem.” (Matt. 17:5) Wanem thrifala aposol duim lo laef blo olketa showimaot olketa herem and followim toktok blo Jesus. Iumi tu laek for followim example blo olketa.

² Lo article bifor diswan, iumi storyim hao for herem toktok blo Jesus hem minim iumi mas no duim samfala samting. Bat lo disfala article bae iumi storyim tufala samting wea Jesus sei for iumi mas duim.

3. Olsem Matthew 7:13, 14 storyim, wanem nao iumi mas duim?

³ Readim Matthew 7:13, 14. Lo scripture hia Jesus storyim tufala gate. Sapos iumi go insaed lo smolfala gate bae iumi followim wanfala smol road wea “no isi for wakabaot lo hem,” and sapos iumi go insaed lo nara gate bae iumi  followim road wea “waed.” No eni nara road hem stap for iumi followim, so iumi mas chusim wanfala lo tufala road hia. Diswan hem barava important disison bikos wanfala road nomoa hem lead go lo laef olowe.

4. Explainim kam road wea “waed.”

⁴ Hem important for tingim wanem nao mekem tufala road hia difren. Datfala road wea “waed,” staka pipol followim bikos hem isi. And samfala gohed followim datfala road bikos olketa no laek difren from olketa narawan. Olketa no luksavve hao Satan nao laekem pipol for followim disfala road, and hao road hia lead go lo dae.​—1 Cor. 6:9, 10; 1 John 5:19.

5. Wanem nao iu duim wea helpem iu for followim datfala smol road?

⁵ Datfala smol road hem difren from road wea “waed,” and Jesus sei samfala pipol nomoa faendem road hia. Why nao olsem? Bikos lo next verse Jesus storyim olketa laea profet bae kamap. (Matt. 7:15) Distaem staka thousand religion stap wea sei olketa teachim tru samting. Datwan mekem staka million pipol konfius and no savve which religion nao tru wan, so olketa givap for trae faendem datfala smol road wea lead go for laef. Nomata olsem, samfala faendem datfala road. Jesus sei: “Sapos iufala followim teaching bilong mi, iufala barava disaepol bilong mi nao. Iufala bae savve long samting wea tru, and datwan bae mekem iufala free.” (John 8:31, 32) Hem gud iu no laek followim datfala road wea waed, and iu lukaotem truth. Iu studyim Bible for lanem wanem God laekem iu for duim and iu herem olketa teaching blo Jesus. Samfala samting iu lanem hem hao Jehovah laekem iu for lusim olketa teaching blo false religion, and for stop for celebratem olketa samting olsem Christmas and Easter. Iu luksavve tu hao taem iu changem samfala samting lo laef for duim wanem Jehovah laekem, maet datwan no isi. (Matt. 10:34-36) Taem iu duim olsem, maet iu kasem hard taem. Nomata olsem, iu waka hard for change from iu lovem Jehovah and laek for duim wanem hem laekem. Hem mas barava hapi lo iu!​—Provebs 27:11.

6. Olsem Sams 119:9, 10, 45, 133 storyim, wanem nao savve helpem iumi for gohed followim datfala smol road?

⁶ Sapos iumi start finis for wakabaot lo datfala smol road, wanem nao savve helpem iumi for gohed followim road hia? Tingim disfala tokpiksa. Lo samfala ples olketa wakem rail lo saed road for stopem trak for no foldaon lo road wea steep and smol. Datfala rail hem for protectim draeva for no accident. Hard for eniwan komplen abaotem datfala rail and sei hem mekem laef hard for olketa. Olketa standard blo Jehovah hem olsem datfala rail. Olketa standard hia helpem iumi for gohed followim datfala smol road.​—Readim Sams 119:9, 10, 45, 133.

7. Hao nao olketa young wan shud ting lo olketa standard blo Jehovah?

⁷ Maet samfala young wan tingse olketa standard blo Jehovah hem strict tumas. Satan laekem iufala for tingse olketa narawan garem gudfala laef winim iufala. Maet iufala lukim olketa piksa wea olketa classmate postim lo Internet, and tingse laef blo iufala hem boring. Satan laekem iu for tingse iu no savve enjoyim laef taem iu followim olketa standard blo  Jehovah. * Hem gud for tingim diswan: Satan no laekem olketa wea followim road wea waed for savve wanem bae kasem olketa lo end blo road hia. Bat Jehovah laekem iu for savve sapos iu gohed followim datfala smol road bae kasem olketa nambawan samting lo future.​—Sams 37:29; Aesaea 35:5, 6; 65:21-23.

8. Wanem nao olketa young wan savve lanem from experience blo Olaf?

⁸ Olketa young wan savve lane from experience blo Olaf. * Samfala gele lo class blo hem trae for switim hem for duim sex witim olketa. Hem talem olketa hem wanfala Jehovah’s Witness and hem followim olketa standard lo Bible. Datwan mekem olketa gele hia just switim hem go moa for duim sex witim olketa. Bat Olaf no duim datwan. Hem kasem nara hard taem tu.  Olaf sei: “Olketa teacher laekem mi for go lo university for mekem pipol respectim mi. And olketa sei sapos nomoa bae mi no kasem gud waka or garem gudfala laef.” Wanem nao helpem Olaf for no followim wanem olketa laekem? Hem sei: “Mi fren gud witim olketa brata and sista lo kongregeson and olketa olsem famili blo mi. And tu, mi waka hard for studyim Bible. Datwan mekem mi sure mi insaed lo truth, and mi disaed strong for worshipim Jehovah.”

9. Wanem nao iumi mas duim mekem iumi gohed followim datfala smol road?

⁹ Satan laekem iumi for stop for followim road wea lead go lo laef. Hem laekem iumi for joinim olketa narawan for followim datfala road wea waed and wea lead go lo dae. (Matt. 7:13) Nomata olsem, iumi savve gohed for followim datfala smol road taem iumi followim toktok blo Jesus, and luksavve olketa standard blo Jehovah bae protectim iumi. Distaem bae iumi storyim nara samting wea Jesus talem iumi for duim.

10. Olsem Matthew 5:23, 24 storyim, wanem nao Jesus sei iumi shud duim?

¹⁰ Readim Matthew 5:23, 24. Jesus storyim samting wea barava important lo olketa Jew, wea hem nao for go lo temple and givim animal lo priest for sakrifaesim. Jesus sei taem wanfala Jew lo there, then hem tingim brata blo hem feel nogud lo hem, hem mas leavim animal hia and “go stretem datfala problem witim brata blo hem.” Hem barava important for duim diswan bifor hem givim sakrifaes lo Jehovah.

11. Storyim wanem Jacob duim for mek peace witim Esau.

¹¹ Iumi savve lanem hao for stretem problem witim narawan taem iumi ting raonem story blo Jacob lo Bible. Jacob go stap lo difren ples for 20 year, then God iusim wanfala angel for talem hem for go bak lo hom blo hem. (Jenesis 31:11, 13, 38) Bat hem savve brata blo hem Esau lo there, and Esau laek for killim hem dae. (Jenesis 27:41) Datwan mekem Jacob “fraet tumas.” (Jenesis 32:7) So wanem nao Jacob duim for mek peace witim brata blo hem? Hem prea lo Jehovah firstaem, then hem sendem go staka animal lo Esau olsem present. (Jenesis 32:9-15) Then taem Jacob meet witim Esau hem baodaon lo Esau sevenfala taem for showimaot respect lo hem. From Jacob hambol and showimaot respect lo brata blo hem, datwan helpem tufala for mek peace.​—Jenesis 33:3, 4.

12. Wanem nao iumi savve lanem from example blo Jacob?

¹² Iumi lanem gud samting from wanem Jacob duim bifor hem meetim Esau, and hao hem showimaot respect lo Esau taem hem meetim hem. Jacob askem Jehovah tu for helpem hem. Then hem duim samting followim datfala prea and go for mek peace witim Esau. Taem tufala meet, Jacob no laek pruvim hem nao stret and Esau nao rong. Goal blo Jacob hem for stretem problem blo tufala. Hao nao iumi savve followim example blo Jacob?

13-14. Wanem nao iumi shud duim sapos iumi mekem eni brata or sista feel nogud?

¹³ Iumi wea wakabaot followim road blo laef laek for stap gud witim olketa brata  and sista blo iumi. (Rome 12:18) Wanem nao iumi savve duim sapos iumi luksavve iumi mekem wanfala brata or sista feel nogud? Olsem Jacob, iumi shud prea lo Jehovah firstaem. Askem Jehovah for helpem iumi for stretem problem witim datfala brata or sista.

¹⁴ Ting raonem tu wanem iumi savve duim for stretem problem hia. Maet iumi tingim olketa kwestin olsem: ‘Waswe, mi willing for go stretem problem witim brata or sista hia, for sei sorre, and for sei mi nao rong? Waswe, sapos mi go stretem datfala problem bae Jehovah and Jesus hapi lo datwan?’ Ansa blo iumi for olketa kwestin hia savve helpem iumi for followim toktok blo Jesus for mek peace witim brata or sista blo iumi. Datwan showimaot iumi followim example blo Jacob.

15. Sapos iumi followim principle lo Ephesus 4:2, 3, hao nao datwan savve helpem iumi for mek peace witim samwan?

¹⁵ Tingim nogud samting wea maet happen sapos Jacob praod and laek pruvim hu nao stret and hu nao rong. Dastawe hem gud for hambol taem iumi go for stretem problem witim brata or sista blo iumi. (Readim Ephesus 4:2, 3.) Provebs 18:19 sei: ‘Had tumas fo go kolsap long brata hu hemi kros long yu, bikos hemi olsem biktaon wetem wolston raonem. Raoa blong hem, olsem aean geit wea olketa lokem.’ Sapos iumi hambol and sei sorre, datwan savve helpem datfala brata or sista for letem iumi kam insaed datfala “aean geit” for mek peace witim hem.

16. Wanem moa iumi shud ting raonem, and why nao olsem?

¹⁶ Bifor iumi go stretem problem, ting raonem tu wanem iumi bae talem and hao iumi bae talem. Taem iumi go story witim samwan wea feel nogud, iumi shud garem goal for helpem hem for fren bak moa witim iumi. Maet hem talem samting wea mekem iumi feel nogud, and maet datwan mekem iumi kros or iumi laek for talem hem hao iumi garem gudfala reason for wanem iumi duim. Bat datwan bae no help for stretem problem. Tingim, hem important for mek peace witim brata or sista blo iumi winim for pruvim hu nao stret and hu nao rong.​—1 Cor. 6:7.

17. Wanem nao iumi savve lanem from example blo Gilbert?

¹⁷ Tingim Gilbert wea waka hard for mek peace witim dota blo. Hem sei: “Mi  and dota blo mi no stap gud. For winim tufala year, mi trae for story kaen lo hem mekem mitufala savve stap gud moa.” Wanem moa Gilbert duim? “Bifor mitufala savve story, mi prea firstaem and disaed strong for no kros sapos hem talem samting wea mekem mi feel nogud, and mi redi for forgivim hem. Mi luksavve mi shud no trae for pruvim lo hem mi nao stret. Waka blo mi hem for mek peace witim hem.” Wanem nao kamaot from datwan? Gilbert sei: “Distaem mi garem peace lo mind from mi stap gud witim dota blo mi.”

18-19. Sapos iumi luksavve wanfala brata or sista feel nogud lo iumi, wanem nao iumi shud disaed strong for duim, and why nao olsem?

¹⁸ So sapos iumi luksavve iumi mekem wanfala brata or sista feel nogud, wanem nao iumi shud disaed strong for duim? Hem for followim wanem Jesus talem for stretem problem witim narawan. Prea lo Jehovah abaotem datwan, and depend lo holy spirit blo hem for helpem iumi for mek peace. Datwan bae showimaot iumi herem and followim toktok blo Jesus and bae mekem iumi hapi.​—Matt. 5:9.

¹⁹ Iumi hapi tumas Jehovah iusim Jesus Christ, “hed bilong kongregeson,” for givim iumi kaonsel wea savve helpem iumi. (Eph. 5:23) Olsem aposol Peter, James, and John, iumi laek gohed “herem samting wea [Jesus] talem.” (Matt. 17:5) Iumi storyim hao iumi savve duim datwan taem iumi stretem problem witim brata or sista wea feel nogud lo iumi. Sapos iumi herem and followim wanem Jesus talem and gohed followim smol road wea lead go lo laef, iumi savve kasem staka blessing distaem and enjoyim laef lo future.