1, 2. 1) ¿Imatá Jehová Jesuspa kinsa apostolesninman kamacherqa, chanta imatá paykuna ruwarqanku? 2) ¿Imatá kay yachaqanapi yachakusun?

 KAY 32 watapi Pascua pasayta Pedrowan, Santiagowan, Juanwan ima Jesusta uj jina rijchʼayniyojman tukusqanta rikorqanku. Chaytaj ichapis Hermón orqo patapi kanman karqa. Biblia nin: “Uyanqa inti jina kʼancharerqa, ropantaj yurajman tukorqa kʼanchay jina”, nispa (Mat. 17:1-4). Apostolesqa chaypi kashaspa Diosta kayta nimojta uyarerqanku: “Kaymin munasqa Wawayqa, pitachus allinpaj qhawani. Payta uyariychej”, nispa (Mat. 17:5). Kinsantin apostolesqa, kausayninkupi imastachus ruwasqankuwan Jesusta uyarisqankuta sutʼita rikucherqanku. Noqanchejpis paykuna jina Jesusta uyariyta munanchej.

² Ñaupaj semanapi yachakorqanchej Jesusta uyarinapajqa, imastachus manaña ruwananchejchu kasqanta. Kay yachaqanapitaj yachakusun Jesús iskay imasta ruwananchejta niwasqanchejta.

3. Mateo 7:13, 14 nisqanman jina, ¿imatataj ruwananchej tiyan?

³ (Mateo 7:13, 14 leey). Jesusqa nerqa iskay punkus kasqanta. Sapa punkutaj mana kikin ñanmanchu pusasqanta. Iskay ñanlla tiyan. Ujnin ñanqa “jatun” chayri ancho, ujnintaj “kʼullku”. Sapa ujninchej maynintachus rinanchejta ajllakunanchej tiyan. Chaytataj allinta ajllananchej tiyan, imajtinchus wiñay kausayta japʼinanchejqa chaymanta kashan.

4. ¿Maymantaj “jatun” ñan pusan?

⁴ Sutʼita yachananchej tiyan, chay iskay ñankunaqa mana  kikinchu kasqankuta. Ashkha runasqa “jatun” ñanta riyta ajllanku, imajtinchus chayninta reyqa fácil. Ashkhastaj mana chay ñanmanta llojsipuyta munankuchu, ashkhas chayninta rishasqankurayku. Paykunaqa mana reparakunkuchu Kuraj Supay Satanás chay ñanta rinankuta munasqanta. Chay ñanqa wañuyman pusan (1 Cor. 6:9, 10; 1 Juan 5:19).

5. ¿Imastataj ruwarqanchej “kʼullku” ñanta tarinapaj?

⁵ “Jatun” ñanmanta nisqa, ujnin ñanqa “kʼullku”. Jesustaj nerqa chay ñanta tarejkunaqa pisilla kasqankuta. ¿Imajtintaj Jesús chayta nerqa? Payllataj chayman Mateo 7:15 versiculopi kuticherqa. Payqa chaypi nerqa llulla profetasmanta allinta qhawakunanchejta. Yachakusqanman jina may chhika religiones tiyan, chaymanta ashkhastaj ninku cheqa kajta yachachisqankuta. Chayrayku may chhika runasqa mana yachankuchu mayqenchus cheqa religión kasqanta. Nitaj kausayman pusaj ñantapis maskʼayta munankuñachu. Maskʼankuman chayqa tarinkuman, imajtinchus Jesús nerqa: “Nisqasniytachus kasukullankichejpuni chayqa, cheqamanta discipulosniy kankichej, cheqa kajtataj rejsinkichej, chay cheqa kajtaj kacharichisonqachej”, nispa (Juan 8:31, 32). Noqanchejtaj cheqa kajtapuni maskʼarqanchej. Diospa Palabranta sumajta estudiarqanchej imastachus kamachiwasqanchejta yachakunanchejpaj, Jesuspa yachachiwasqanchejtapis uyarerqanchej. Yachakorqanchej Jehovaqa llulla religionespa yachachisqankuta qhesachananchejta munasqanta, niñataj costumbresninkutapis ruwananchejta munasqanta. Yachakullarqanchejtaj Jehovaj kamachiykunasninman jina kausakuy, imastachus millaypaj qhawan chay imasta saqepuypis mana atikullasqanta (Mat. 10:34-36). Ichapis Jehovaj kamachiykunasninman jina kausakuyta mana atillarqanchejchu. Jinapis chayta ruwarqanchej payta munakusqanchejrayku, allinpaj qhawanawanchejtataj munasqanchejrayku. Chayrayku Jehovaqa may kusisqachá kashan chayta ruwasqanchejmanta (Pro. 27:11).

6. Salmo 119:9, 10, 45, 133 nisqanman jina, ¿imataj yanapawasunman kʼullku ñanllatapuni rinapaj?

⁶ Kʼullku ñanpiña kashanchej chay, ¿imataj yanapawasunman chaynillantapuni rinapaj? Kaypi piensarina, wakin suyuspeqa kʼullku auto ñankunaspi barandas tiyan. Chay barandastaqa churanku orqo kinraykunaspi chayri faldaspi, autos mana maymanpis cheqanta pasaykurpanankupaj. Chayqa autota apaykachajkunata mayta yanapan mana anchata ñan kantuman llojserpanankupaj chayri chinkaykunankupaj. Ni pipis chay barandasmantaqa ninmanchu: “Kay barandastaqa qhasita churanku, perjudicawan”, nispa. Bibliapi ima kamachiykunatachus Jehová qowasqanchejpis chay barandas jinallataj. Chay kamachiykunaqa mayta yanapawanchej kʼullku ñanmanta mana llojserpapunapaj (Salmo 119:9, 10, 45, 133 leey).

7. Jóvenes, ¿imatataj Jehová willawanchej kʼullku ñanmanta?

⁷ Joven, wakin kutisqa ichá yuyanki Jehovaj kamachiykunasnenqa, mana munasqayki imasta ruwajta saqesusqanta. Satanasqa chaytapuni yuyanaykita munashan. Payqa munan jatun ñanta rejkunaj ruwasqasninkuta qhawanaykita, chaypi kaspa kusisqa kasqankuta yuyanaykitataj. Satanasqa mayta yuyanaykita munan mana colegioykimanta compañerosniyki jinachu, nitaj Internetpi rikusqayki runas jinachu kusikushasqaykita. Satanasqa munallantaj yuyanaykita  Jehovaj kamachiykunasnenqa mana kusikojta saqesusqanta. * Payqa mana munanchu reparanaykita jatun ñanta rispaqa wañuyman chayanaykita. Jehovatajrí sutʼita willawanchej kausayman pusaj kʼullku ñanllatapuni rejtinchejqa, wiñay kausayta japʼinanchejta (Sal. 37:29; Isa. 35:5, 6; 65:21-23).

8. Jóvenes, ¿imatataj yachakuwajchej hermanonchej Omarpa experiencianmanta?

⁸ Hermanonchej Omarmanta parlarina. * Paypa experiencianqa mayta yanapawasunman. Paytaqa colegionmanta compañerosnin mayta tanqarqanku khuchichakuy juchata ruwananpaj. Paytaj compañerosninman sutʼincharqa, Jehovaj testigosnenqa Bibliaj kamachiykunasninman jina kausakusqanchejta. Chayta nejtintaj wakin compañerasnenqa  ninakorqanku, tukuy imata ruwanankuta paywan qhariwarmi jina puñuykunankupaj. Jinapis payqa Bibliaj nisqanta kasukullarqapuni. Chantapis paytaqa, mana chayta ruwayllamanchu tanqarqanku. Pay nin: “Profesoresneyqa niwaj kanku, universidadmanqa rinaypuni kasqanta. Ajinallamanta runasqa jatunpaj qhawanawankuta, respetanawankutataj. Nillawajtaj kanku, mana chayta ruwajteyqa mana trabajota tarinayta, nitaj kusisqachu kanayta”, nispa. ¿Imataj payta yanaparqa Bibliaj nisqanta kasukunallanpajpuni? Pay nin: “Congregacionpi sumaj amigosta tarinaypaj kallpachakorqani. Paykunaqa familiay jina karqanku. Astawantaj Bibliata estudiarqani. Bibliata astawan estudiaspaqa sutʼita repararqani kaypuni cheqa religión kasqanta. Ajinamanta astawan Jehovata sirviyta munarqani”, nispa.

9. ¿Imatá ruwasun kausayman pusaj kʼullku ñanllatapuni rinapaj?

⁹ Satanasqa munan kausayman pusaj ñanmanta llojsipunanchejta, may chhika runaswan khuskataj wañuyman pusaj jatun ñanninta rinanchejta (Mat. 7:13). Jinapis Jesusta uyarillasunpuni, kʼullku ñanpi puriytaj allinninchejpaj kasqanta yachasun chayqa, mana chay ñanmanta llojsipusunchu. Qhepan parrafospi qhawarisun imata ruwanatawanchus Jesús niwasqanchejta.

10. Mateo 5:23, 24 versiculospi, ¿imata ruwananchejtataj Jesús nerqa?

¹⁰ (Mateo 5:23, 24 leey). Jesusqa kay versiculospi judíos altarman jaywanankuta apashaspa imatachus ruwanankumanta parlasharqa. Uj judío altarman jaywananta apashaspa hermanon paypaj phiñasqa kashasqanta yuyarikoj chayqa, altarpa ñaupaqenpi jaywananta saqeytawan chaymanta ripunan karqa. ¿Imajtintaj chayta ruwanan karqa? Imajtinchus Jesús sutʼita nerqa: “Hermanoykiwanraj ñaupajta allinyakamuy”, nispa. Chaytaqa ruwananpuni karqa niraj jaywananta Jehovaman jaywashaspa.

11. ¿Imatataj Jacob ruwarqa hermanonwan allinyakunanpaj?

¹¹ Jacobpa kausayninmanta parlarina. Paymantaqa mayta yachakusunman imaynatachus hermanonchejwan allinyakapuyta. Jacobqa 20 watasta jina jallpʼanmanta karupi tiyakorqa. Jehovataj uj angelnejta nerqa jallpʼanman kutipunanta (Gén. 31:11, 13, 38). Jinapis hermanon Esauqa wañuchiyta munarqa (Gén. 27:41). Jacobqa hermanon paypaj phiñasqallapuni kashasqanta yachaspa “mayta mancharikorqa, llakikorqataj” (Gén. 32:7). ¿Imastataj Jacob ruwarqa hermanonwan allinyakunanpaj? Ñaupajtaqa Jehovaman tukuy sonqo orakorqa, chaymantataj hermanonman ashkha regalosta apacherqa (Gén. 32:9-15). Chantá Jacobqa hermanonman qayllaykusqanman jina, qanchis kutita pampakama kʼumuykukorqa. Chaywantaj kʼumuykukoj sonqo kasqanta, hermanon Esauta respetasqanta ima rikucherqa. Ajinamantataj allinyakaporqanku (Gén. 33:3, 4).

12. ¿Imatá Jacobmanta yachakunchej?

¹² Jacob hermanonwan tinkunanpaj imaynatachus wakichikusqanmanta, imaynatachus payman qayllaykusqanmanta ima mayta yachakusunman. Ñaupajtaqa kʼumuykukoj sonqowan Jehová yanapananta mañakorqa. Chaymantataj mañakusqanman jina ruwananpaj kallpachakorqa hermanonwan allinyakunanpaj. Esauwan parlaspataj, mana nerqachu pichus juchayoj kasqanta. Astawanpis payqa hermanonwan allinyakapuytapuni munarqa. Noqanchejpis, ¿imaynatá Jacob jina  ruwasunman? Chayta qhepan parrafospi yachakusunchej.

13, 14. ¿Imatá ruwasunman ujnin hermanonchejta phiñarpachispa?

¹³ Kausayman pusaj ñanpi kajkunaqa, hermanosninchejwan allinpi kausakuyta munanchej (Rom. 12:18). ¿Imatá ruwasunman ujnin hermanonchejta phiñarpachisqanchejta reparakuspa? Jacob jina Jehovaman tukuy sonqo orakuna. Mañakunataj hermanonchejwan allinyakapunapaj yanapanawanchejta.

¹⁴ Chantapis tiempochakuna imaynachus kasqanchejpi piensarinapaj. Noqanchej juchayoj kasqanchejta ninapaj, kʼumuykukoj sonqowan perdonta mañakunapaj, allinyakunapaj ima, ¿wakichisqachu kashanchej? Hermanonchejwan chayri hermananchejwan allinyakapunapaj kallpachakojtinchej, ¿imaynataj Jehovawan Jesuswan sientekonqanku? Chaykunapi piensareyqa yanapawasun Jesusta uyarinapaj, kʼumuykukoj sonqowantaj hermanonchejwan allinyakapunapaj. Ajinamantaqa Jacob jina ruwasun.

15. ¿Imaynatá yanapawanchej Efesios 4:2, 3 yuyaychasqan hermanonchejwan allinyakapunapaj?

¹⁵ Jacob hermanonwan tinkukoj rishaspa mana kʼumuykukunmanchu karqa chayqa, mana paywan allinyakapuyta atinmanchu karqa. Ajinallatataj noqanchejpis ujnin hermanonchejwan allinyakunapaj parlaj rispaqa, kʼumuykukoj kananchej tiyan (Efesios 4:2, 3 leey). Proverbios 18:19 nin: “Sumaj jarkʼachasqa llajtata atipayraj aswan fácil, allin sientesqa amigonchejpa sonqonta tiyaykuchinamantaqa. Phiñanakoyqa sinchʼi barrasniyoj punku jina runasta tʼaqanachin”, nispa. Hermanonchejmanta perdonta mañakuspaqa, yanapasun noqanchejwan allinyakapuyta munananpaj.

16. Niraj hermanonchejwan allinyakoj rishaspa, ¿imapitaj piensarinanchej tiyan chanta imaraykutaj?

¹⁶ Niraj uj hermanowan allinyakoj rishaspa, ñaupajtaqa piensarinanchej tiyan imatachus ninanchejpi, imaynatatajchus parlarinanchejpi. Sumajtaña piensarispataj noqanchejpaj phiñasqa kashan chay hermanowan parlarina, yanaparinataj noqanchejwan allinyakuyta munananpaj. Ichapis qallariypeqa sonqonchejta nanachinawanchejpaj jina imatapis nirpawasun. Jinapis ama phiñakunachu, nitaj ninachu paypuni juchayoj kasqanta. Chayqa mana yanapawasunmanchu paywan allinyakunapaj. Aswan allin hermanonchejwan allinyakapunanchej, pichus juchayoj kasqanta ninamantaqa (1 Cor. 6:​7).

17. ¿Imatataj hermanonchej Wilbermanta yachakunchej?

 ¹⁷ Hermanonchej Wilberqa ujnin familiarninwan allinyakunanpaj, mayta kallpachakorqa. Pay nin: “Ujnin familiarniywan ashkha problemasniyoj karqayku. Iskay wata kurajtapuni mayta kallpachakorqani paywan calmallawan, sutʼitataj parlarinaypaj. Ajinamanta allinyakapunaykupaj”, nispa. ¿Imatawantaj hermanonchej ruwarqa? Pay nillanpuni: “Niraj paywan parlarishaspa, orakorqani, wakichikorqanitaj sonqoyta nanachinawanpaj jina imatapis niwajtin mana phiñarpakunaypaj. Perdonanaypaj wakichisqa kasharqani. Yachakorqanitaj paywan allinyakuyta maskʼanay kasqanta, manataj noqapuni razonniyoj kasqaytachu”, nispa. Hermanonchej chayta ruwasqanrayku, ¿imataj karqa? Pay nillanpuni: “Kunanqa sonqo tiyasqa kani. Imaraykuchus tukuynin familiaywan allinta kausakuni”, nispa.

18, 19. Pejpa sonqontapis nanachinchej chay, ¿imatataj ruwananchej tiyan chanta imaraykutaj?

¹⁸ Mayqen hermanollatapis chayri hermanallatapis sonqonta nanachinchej chay, ¿imatataj ruwananchej tiyan? Jesús imatachus niwasqanchejta kasukuspa, paykunawan allinyakunanchej tiyan. Chantapis Jehovawan parlarina, mañakunataj chay problemata allinchanapaj espíritu santonwan yanaparinawanchejta. Chayta ruwasunchej chayqa kusisqa kasunchej, Jesusta uyarishasqanchejtataj rikuchisunchej (Mat. 5:9).

¹⁹ Mayta agradecekunchej Jehová munakuywan yanapashawasqanchejmanta. Payqa Jesusnejta yanapashawanchej, pichus “congregacionpa uman” (Efe. 5:23). Noqanchejqa apóstol Pedro jina, Santiago jina, Juan jinataj Jesusta uyariytapuni munanchej (Mat. 17:5). Chaytataj ruwanchej kay yachaqanapi yachakorqanchej jina, mayqen hermanoj sonqontachus nanacherqanchej chay hermanowan allinyakuyta maskʼaspa. Chantapis kausayman pusaj kʼullku ñanllapipuni kanapaj kallpachakusun chayqa, kunan ashkha bendicionesta japʼisunchej, wiñay wiñaypajtaj kusisqa kasunchej.