1, 2. 1) ¿Jesuspa quimsa discipuluncuna ima mandatutataj wiyacärishga y imatataj rurapäcurgan? 2) ¿Imatataj ricärishun cay yachacuycho?

32 WATACHO Pascua pasashganchona Pedro, Santiago y Juan juc almiraypaj visiunta ricapäcurgan. Hermón jircapa juc ragrancho discipuluncunapa naupancho jucnirajman ticrargan. Bibliami cayno wilacun: “Qaqlan intinöraq chipchipyarqan y röpanpis pasaypa yoraq rikakur chipchipyarqan” (Mat. 17:1-4). Visión ushacaycaptinna Diospa voznin wiyacargan, cayno: “Paymi kuyay Tsurï. Paypitami kushishqa kaykä. Pay nishushqaykita wiyakäriy” (Mat. 17:5). Chay quimsa discipulucunaga imano cawacushganchomi wiyacoj cashgan ricacaj, chaynolami noganchipis paycunano wiyacoj cayta munanchi.

² Pasashgan yachacuycho ricashcanchi Jesusta wiyacurga imacunata mana ruranapaj. Cananga Jesús imata ruranapaj nimashganchita ishcayta yachacushun.

3. Mateo 7:13, 14 textucuna nishganno, ¿imata ruranapätaj Jesús nergan?

³ (Leiriy Mateo 7:13, 14). Jesús nergan ishcay puncucuna caycashganta y apan jucnin caj “anchu” caminupa y jucnin cajga “kichki” caminupa. Más nänicunaga manami canchu. Y quiquinchimi acrashwan maygan nänipa aywanapaj. Chaymi imaycamapis cawanapaj nänita acranapäga shumajmi acrashwan.

4. ¿Ima ninquimanraj “anchu” caj nänipita?

⁴ Jucnin jucnin cay nänicuna mayman apacushganta alirämi tantiashwan. Achcajmi “anchu” nänita acrapäcun, chaypa aywayta fácil captin. Nircurpis chaypa aywajcunaga  cuticamuyta munanchu, chayga laquicuypämi. Chay näniga wanuylamanmi apacun. Runacunaga cuentata gocunchu quiquin Diablo chayman chayachiyta munashganta (1 Cor. 6:9 10; 1 Juan 5:19).

5. ¿Imatataj waquincuna rurapäcush rasunpa caminuta tarinanpaj y chaypa purir galaycunanpaj?

⁵ Jucnin caj “anchu” näni caycaptinpis, jucnin cajga “kichki” nänimi, cay caj nänita walca runacunala tarinanpämi Jesús nergan. ¿Imanir? Gatejnin versiculuchomi Jesús nergan pajta luta profetacuna engañamashwan (Mat. 7:15). Maychicaj religiuncunami cay munducho caycan y lapancunami nipäcun rasunpa cajta yachachicärishganta. Chauraga caycho o waccho religiuncuna caycaptenga runacunaga laquinarmi calpachacärinnachu rasunpa caj nänita taripäcunanpaj. Pero Bibliaga wilacunmi imano taripäcunanpaj, cayno nin: “Yachachishäcunata wiyacorga rasunpa disïpulöcunami canquipaj. Chaymi Tayta Diospita rasunpa cajta musyanquipaj. Chay rasunpa cäga jorgushunquipaj libri canayquipämi” (Juan 8:31, 32). Alapa alimi, gamga achca runacuna aywaycashganpa aywaycanquichu. Bibliata leirmi y casucurmi rasunpa caj caminuta tarishcanqui y Jesuspa wiyacushpayquipis caycho caycanqui. Mayna yachacushcanqui luta religiuncunawan mana talucänayquipaj y costumbrincunatapis mana ruranayquipaj. Alimi chayga, Jehová nishgannolami lapanta ruraycanqui (Mat. 10:34-36). Ichanga gampäga sasano cashga cambiucunata ruranayquipaj y mana alicunata guepaman jaguinayquipaj, pero Jehovata cuyarmi guepaman cutishcanquichu. Mayraj chaypita Taytalanchi Jehová cushicun (Prov. 27:11). 

6. Salmo 119:9, 10, 45, 133 textucuna wilacushganno, ¿imataj yanapämashwan quichqui caj nänilacho puriycänapaj?

⁶ Mayna quichqui caj nänicho caycarga, ¿imataj yanapämäshun guepaman mana cutinapaj? Mä tantiarcushun. Jircacunacho quichqui camino captenga öraga cantuncunalachomi imalatapis churapäcun pipis mana cuchpacänanpaj. Chay tuncapacunaga yanapacunmi patacunapa mana jegarpunapaj. Chauraga seguro purinapaj caminuman ticracurin, ¿piraj quejacunman chayta ricarga? Chaynolami Bibliacho caycaj Jehovapa mandatuncunaga, quichqui caminucho tuncapacuna japuy caycan (leiriy Salmo 119:9, 10, 45, 133).

7. ¿Imatataj mozucuna nipäcunman quichqui caj nänipita?

⁷ Jovincuna, ¿Jehovapa mandatuncunata cäsucunapaj sasatanochu ricanqui? Mayraj Diabluga chayta munaycan, ancho caj caminupa aywaycajcunata ricaränayquita munan. ‘¿Imanirtaj waquincuna rurashganta mana rurächu, y imanirtaj paycunano cushicöchu?, Diospa mandamientuncunaga cushichimanchu’ nir yarpachacunayquitami munan. * Satanasga pantachicoj carmi ancho caj nänipa aywaycajcunata wilapanchu mayman chayananpaj cajta. Pero Taytalanchi Jehovaga  mayna wilapämashcanchi mayman chayanapaj cajta y ima bendiciuncunata chasquinapaj cajta (Sal. 37:29; Is. 35:5, 6; 65:21-23).

8. ¿Imatataj jovincuna yachacärinman César mozo hermanunchipita?

⁸ César joven hermanunchipita parlarcushun, mä imatash yachacunchi. Estudiaycaptinshi compañëruncuna cutin cutin nipäcoj maygan jipashwanpis cacunanpaj. Cesarga ‘Jehovapa testigunmi cä, Biblia nishgantami cäsucö’ nirganshi; chayta wiyaycur jipashcunaga ninacärergan ‘imaycatapis rurashun mayganchiwanpis punucunanpaj’ nir. Imano captinpis hermanunchega manami juchamanga ishquirganchu. Ima pruebacunapa mastaj pasargan, paymi nin: “Profesornëcunaga universidämanraj aywanäpaj nipäcamaj ‘chayrämi ali ricashga canqui y pipis respetashunqui’ nir”. Chaypa pasar cay mozo hermanunchi cayno wilacun: “Congregaciuncho ali amigucunata ashishgämi yanapämargan. Familiänomi capäcurgan. Bibliapitapis masraj yachacurgä,  chayta rurar más seguro cargä rasunpa caj caminucho caycashgäta. Jehovata servinäpäpis masraj calpachacurgä”. *

9. ¿Imatataj rurashwan quichqui caminulacho imaypis caycänapaj?

⁹ Satanasga munan quichqui nänipa aywaycashganchipita cuticamunapaj y ancho caj caminupa purir galaycunapaj, chayga wanuylamanmi apacun (Mat. 7:13). Pero Jesusta cäsucurga quichqui caj caminulachomi caycäshun. Cay caminuga chapämanchimi. ¿Ima masta ruranapätaj Jesús mandacurgan?, ricärishun.

10. Mateo 5:23, 24 textucuna nishganno, ¿imata ruranapätaj Jesús nergan?

¹⁰ (Leiriy Mateo 5:23, 24). Cay versiculucunachoga judiucuna shumaj tantiarcunanpämi Jesús parlaycargan. Cayman yarpärishun. Templucho juc sacerdotita pilapis juc uywata rupachinanpaj entregaycanman; chay hora yäracoj masinwan rabianachicushganta yarpar uywanta cachaycur aywacun. ¿Imanir? Jehovapaj sacrificiuta ruranapaj cajpita, ¿ima rurayraj más ali canman? Jesusmi cayno nergan: “Jinan öra aywanqui chay rabyachinacushayquita ashej. Tariycorga amistanqui”.

11. ¿Imacunatataj Jacob rurargan Esaú wauguinwan ali goyäcunanpaj?

¹¹ Unay Diosta sirvej Jacobpita parlarcushun, mä imatash yachacunchi piwanpis mana rabianacuypa goyäcunapaj. Marcanpita Jacob aywacushganpitaga 20 watacunanami pasargan; carucho caycaptinmi juc ángel nergan marcanpa cuticunanpaj (Gén. 31:11, 13, 38). Chay wichanga Esaú wauguinshi wanuchiyta munargan (Gén. 27:41). Wauguin ima rurayta munashganman yarparga Jacobga alapami manchacurgan (Gén. 32:7). ¿Imatataj Jacob rurargan wauguin Esaú piñashgala mana cacunanpaj? Puntataga Jehovatami ruwacurgan yanapänanpaj. Nircurpis Esauman regaluta apachicurgan (Gén. 32:9-15). Y Esauwan tincunanpäna caycarmi ganchis cuti gongurpacurcur gongurpacurcur aywargan saludananpaj. Chauraga, ¿imano runataj Jacob cargan? Respetuoso y ñanpu shonguyoj runa cargan (Gén. 33:3, 4).

12. ¿Imatataj Jacob rurashganpita yachacunchi?

¹² ¿Imatataj yachacunchi Jacobpita wauguinwan tincunanpaj imano alistapacushganpita? Puntataga Jehovata mañacurgan yanapänanpaj. Nircurga mañacushgannola rurargan y ali shongulanwan calpachacurgan Esauwan tincuptin mana gongaypaj y cushicuypaj junaj cananpaj. Y tincurir parlapacäriptinpis mayganpis rabiashgalaga caycarganchu. Chayno cananpämi Jacobga Diosta ruwacurgan. ¿Imanotaj Jacobnola cashwan?

13, 14. ¿Imatataj rurashwan maygan hermanulanchitapis ofendirishga carga?

¹³ Dios pushamashganchi rasunpa caj caminucho caycarga piwanpis ali goyäcoj runami cashwan (Rom. 12:18). Chauraga, ¿imatataj rurashwan maygan hermanulanchitapis ofendirishganchi captenga? Jacob rurashgannolami Jehovata mañacushwan ofendishganchi hermanuwan perdunanacur ali goyäcunapaj.

 ¹⁴ Jinamanpis imano caycashganchiman yarpachacur cayno tapucushwan: “¿Imalapitapis ali tucuycächu?, ¿disculpacurchu ali shonguläwan waquincunata parlapä?, ¿imanoraj Jehová ricacunga y uysherunchi Jesuspis waquincunawan ali goyäcunapaj alapa calpachacurga?”. Juc shongula hermanunchicunawan caycarga Jesús nishgantami cäsucuycäshun. Imapitapis más aliga cristiano masinchiwan cushi cushila caycashganchimi.

15. ¿Imanotaj Efesios 4:2, 3 texto yanapämanchi hermanunchicunawan cushi cushila goyäcunapaj?

¹⁵ ¿Imaraj canman ali tucurcur y piñashgala Esauwan tincunanpaj Jacob aywaptenga? Peliarpis galacaycärinmanchi cargan. Chaynolami piwanpis parlanapaj aywarga Jacobnola humilde cashwan (leiriy Efesios 4:2, 3). Proverbios 18:19 texto cayno nin: “Markapa murällan sasa juchutsiy kashqanpitapis mas sasami kaykan wawqinwan rimanakushqa runata amistatsiyqa. Tsay runaqa barrëtawan trancashqa punkunömi kaykan”. ‘Disculpaycalämay’ ninacuptinchirämi piwanpis ali goyäcunchi.

16. ¿Imamantaj yarpachacushwan, y imanir?

¹⁶ Nircurpis ali canga ofendishga caycaj hermanunchita imano parlapänapaj puntalapitana yarpachacuptinchi. Munanchimi shongun nanaycaptenga aliyarcunanta, parlapashganchega jampi japuymi canman. Chayta rurarpis öraga piñashgano caycanman hermanunchega pero ama rabiacushunchu, pajta ali caycänapaj trucanga discutirpis galaycushwanmi. Imapitapis más aliga piwanpis cushi cushila goyäcuymi, manami ashiycashwanchu pipa culpanraycur problemacuna yurimushganta (1 Cor. 6:7).

17. ¿Imatataj yachacunqui Gilbert hermanunchipita?

¹⁷ Gilbert cristianupita parlarcushun, mä imatash rurargan piwanpis ali goyäcunanraycur. Paymi nin: “Juc familiäwanmi problema cargan. Nogaga ishcay watacunanomi calpachacurgä ali shimilapa parlar ali goyäcunapaj”. Nircurpis wauguilanchega familianwan manaraj parlar Diostash mañacoj y yarpachacojshi imatapis niycuptenga mana ofendicunanpaj. Caytapis wilacunmi: “Perdunacoj runa cayta munargä, ‘gammi culpayoj canqui’ ninäpa trucanga  ali goyäcunanchitami más munargä”. ¿Y imataj pasargan? Quiquinmi cayno nin: “Cananga chay familiäwan y waquincunawanpis cushi cushilami goyäcärë”.

18, 19. Pilatapis ofendishga carga, ¿imatataj rurashwan y imanir?

¹⁸ Chauraga, ¿imatataj rurashwan maygan hermanulanchitapis ofendirishga carga? Jesús mandacushganno amistanapäga jucla parlashwan. Jehovatapis wilapashwanmi ima pasaycashganta y espíritu santuntapis mañacushwan problemata alchanapaj. Chayta rurarga cushi cushilami cawacushun y uysherunchi Jesuspa voznintami wiyacuycäshun (Mat. 5:9).

¹⁹ Cushicuycunchimi churin Jesuswan Jehová pushaycalämaptinchi, payga congregaciunpa uman japuymi (Efes. 5:23). Payta imaypis wiyacushun Pedro, Santiago y Juan apostulcuna rurashganno (Mat. 17:5). Y yachacushganchinopis Jesustaga wiyacunchi ofendishganchi hermanuwan ali caycänapaj imaycata rurarmi. Y quichqui caj nänilacho puriycarga achca bendiciuncunatami chasquishun y shamoj tiempuchoga mana wanuypa cushi cushilanami cawacushun.