1, 2. a) ¿Jesuspaj apostolcunaca ima mandashcatataj chasquircacuna? b) ¿Cai yachaipica imatataj yachashun?

HUATA 32 pascua qꞌuipaca Pedro, Santiago, Juanca Jesús shujtajyarijtami shuj muscuipi shina ricurcacuna. Paicunaca tal vez Hermón urcupimi cashcangacuna. Jesusca paicunapaj ñaupajpimi shujtaj laya tucurca. Bibliapica: “Paipaj ñahuica inti shina achijnicuj, paipaj jahua churanapish luz shina achijnicujmi tucurca” ninmi (Mateo 17:1-4, NWT ). Chaita ricushca qꞌuipaca apostolcunaca Jehová Dios ima nijtami uyarcacuna. Diosca: “Caimi, ñuca cꞌuyashca Churi. Paipimi cushicuni. Paita uyaichij” nircami (Mateo 17:5). Cai quimsa apostolcunaca Jesús ima yachachishcatami paicunapaj causaipi pajtachishcata ricuchircacuna. Ñucanchijpish chashnallatajmi paicunapaj ejemplota catisha ninchij.

² Pasaj yachaipica Jesús ima yachachishcata uyashcata ricuchingapajca mana yallitaj preocuparina cashcata, shujtajcunata mana juzgana cashcamantami yacharcanchij. Cai yachaipica imamanta quichqui ñanpi purina cashcata, shujtajcunahuanpish alli tucungapaj imata rurana cashcatami yachashun.

3. Mateo 7:13, 14-pi nishca shinaca ¿imatataj rurana canchij?

³ (Mateo 7:13, 14-ta liyipai). Jesusca: ‘Ishqui pungumi tiyan. Shuj punguca quichqui ñantami apan. Caishuj punguca ancho ñantami apan’ nircami. Ishqui ñanllami tiyan. Chaimantami cada uno maijan ñanpi purinata agllana canchij. Quichqui ñanpi purinata agllashpaca huiñai causaitami charishun.

4. ¿Ancho ñanca ima shinataj can?

⁴ Ishqui ñancuna chꞌican cashcataca allimi intindina canchij. Ancho ñanpi purina fácil cashcamantami achca gentecunaca  chaita agllashcacuna. Huaquincunacarin chai ñanmantaca mana llujshishcacunachu. Paicunaca Diablo chai ancho ñanpi purishpa huañuiman apacushcataca mana cuentata cuncunachu (1 Corintios 6:9, 10; 1 Juan 5:19).

5. ¿Huaquincunaca quichqui ñanpi yaicushpa chaipi puringapajca imatataj rurashcacuna?

⁵ Jesusca: ‘Caishuj ñanca quichquimi chaipi yaicunataca ashacunallami agllanga’ nircami. ¿Imamanta? Jesusca llullashpa yachachijcunamantaca cuidaringuichij nishpami advirtirca (Mateo 7:15). Mundo enteropica achca religioncunami tiyan. Paicunaca verdadtami yachachinchij nishpami yuyancuna. Achca religión tiyashcamantami achca gentecunaca ima religionta mana cati tucushpa desanimarishcacuna. Chaimantami paicunaca huiñai causaiman apaj ñanpi purinatapish mana decidincuna. Pero Jesusca huiñai causaiman apaj ñanpi puri tucunguichijmi nircami. Paica: ‘Ñuca yachachishcacunata catirashpaca, ñuca yachacujcunatajmi canguichij. Chashna cashpami, mana llullataca rijsinguichij. Chai mana llullami huatashca shinamanta cacharichinga’ nircami (Juan 8:31, 32). Quiquin ancho ñanpi mana purinata agllashcamanta, ashtahuanpish huiñai causaiman apaj ñanpi purinata decidishcamantami cushilla sintirinchij. Canca Bibliata estudiai callarishpaca Jehová Dios ima mandashcatami intindishcangui. Shinallataj Jesús yachachishcatapishmi cazushcangui. Por ejemplo, Jehová Dios panda religioncunamanta caruyachun mandashcata, mana alli fiestacunapi mana participana cashcata, huaquin costumbrecunamanta llujshina cashcatachari intindircangui. Maipica Jehová Dios mandashcata pajtachina mana jahualla cashcata, tucui mana alli ruraicunata huashaman saquingapaj esforzarina cashcatapishmi yachashcangui (Mateo 10:34-36). Sinchi cajpipish Diosta achcata cꞌuyashcamanta paipaj ñaupajpi alli ricuringapajmi chaita rurashcangui. Chaimantami Jehová Diosca canmantaca cushilla sintiringa (Proverbios 27:11).

6. Salmo 119:9, 10, 45, 133-pi nishca shinaca ¿quichqui ñanmanta ama llujshingapajca imatataj rurana canchij?

⁶ ¿Quichqui ñanpi purishpa catingapaj, chai ñanmanta amataj llujshingapajca imataj ayudanga? Cai ejemplopi yuyashun. Huaquin llajtacunapica ñancuna quichqui cashcamanta o lomacuna tiyashcamantami ñan muyundijpica fierrocunata churancuna. Chashnami carrocuna ñanmanta ama llujshichun o ama singuchun jarcan. Carrota manejajcunaca ñan muyundijpi churashca fierrocunaca yangamantami can nishpaca mana yuyancunachu. Bibliapi tiyaj mandashcacunaca cai ñan muyundijpi fierrocuna tiyaj shinami can. Cai mandashcacunaca quichqui ñanpi purishpa catichunmi ayudan (Salmo 119:9, 10, 45, 133-ta liyipai).

7. ¿Jovencuna quichqui ñanpi purishpa catinamantaca imatataj yuyanguichij?

⁷ Joven, ¿canca maipica Diospaj mandashcacunata cazunaca sinchimi can nishpachu yuyashcangui? Diablomi chashna yuyachun munan. Diabloca ancho ñanpi purij gentecuna cushilla causacushcata shina yuyachunmi munan. Chaimantami Diabloca escuelapi compañerocuna, internetpi ricurij gentecuna cushilla causacushcata shina ricuchun munan. Yaya Diospaj mandashcacunata cazunapish yanga shina cashcata ricuchunmi munan. Diabloca ancho ñanpi purijcuna ima shina tucurinata yachachunca mana munanchu. * Pero  Jehová Diosca paita sirvijcuna paipaj ñanpi purishpa huiñai causaita charinataca achijtami intindichishca (Salmo 37:29; Isaías 35:5, 6; 65:21-23).

8. ¿Huauqui Olafpaj ejemplomantaca jovencunaca imatataj yachai tucuncuna?

⁸ Olaf shuti huauquipaj experienciamanta yachashun. * Paitaca colegiopica compañeracunaca paihuan chayarichunmi munarcacuna. Pero cai huauquica testigo de Jehovacunaca Biblia ima yachachishcata pajtachishpa chaita mana rurashcatami chai jovencunamanca intindichirca. Chaimi cai huambracunaca colegiopica paicunahuan chayarichun obligasha nircacuna. Pero paica chaitaca mana rurarcachu. Shinallataj huauqui Olafca shujtaj chꞌimbapuraitapishmi charirca. Paica: “Ñuca profesorcunaca universidadmanmi rina cangui. Chaiman mana rishpaca imapaj mana sirvinguichu” nircami. ¿Cai huauquica ima shinataj chai jarcaicunahuan chꞌimbapurarca? Paica: “Congregacionpimi alli amigocunata mashcarcani. Paicunami ñucapaj shuj familia shina carca. Bibliatapish alli estudiangapajmi  esforzarircani. Bibliamanta ashtahuan estudiashpaca Jehová Diospaj mandashcacuna ima cashcatami alli intindircani. Chaimantami Diosta sirvingapajca decidido carcani” ninmi.

9. ¿Huiñai causaiman apaj ñanpi purishpa catingapajca imatataj rurana canchij?

⁹ Diabloca Diosta sirvijcuna quichqui ñanmanta llujshishpa, Diosta mana sirvijcunahuan ancho ñanpi rishpa huañuchunmi munan (Mateo 7:13). Pero Jesús yachachishcacunata uyashpaca quichqui ñanmantaca mana llujshishunchu. Ashtahuanpish chai ñanpi purishpaca mana llaquipi urmanatami cuentata cushun. Cunanca Jesús imata ashtahuan rurachun mandashcata yachashun.

10. ¿Mateo 5:23, 24-pica Jesusca imata rurachuntaj mandarca?

¹⁰ (Mateo 5:23, 24-ta liyipai). Cai versocunapica Jesusca chaipi caj judiocunamanmi shuj valishca yuyaicunata nirca. Caipi yuyashun. Shuj runachari Jehová Diosman shuj ofrendata cungapajca Diospaj temploman apamun. Paica curacunata mandajpaj ñaupajpi cashpachari paipaj huauquihuan pꞌiñarishcata yuyarin. Paica chaipi ofrendata saquishpami rina carca. ¿Imamanta? Jesusca Diosman ofrendata manaraj cushpa cambaj huauquihuan alli tucungui nishpami yachachirca.

11. ¿Jacobca Esauhuan alli tucungapajca imatataj rurarca?

¹¹ Shujtajcunahuan alli tucungapajca Jacobpaj valishca yuyaicunamantami yachai tucunchij. Jacobca 20 huatacunata charishpaca paipaj huasimantami carupi causanaman rirca. Pero Jehová Diosca shuj angelhuanmi cutin paipaj llajtaman tigrachun mandarca (Génesis 31:11, 13, 38). Paipaj punta huauqui Esauca Jacobtaca huañuchinatami decidishcarca (Génesis 27:41). Chaimantami Jacobca dimastij mancharishca, llaquirishca carca. Jacobca ñuca huauquica ñucahuanmi pꞌiñarishca canga nishpami yuyarca (Génesis 32:7). Pero ¿Jacobca paipaj huauquihuan alli tucungapajca imatataj rurarca? Puntapica, Jehová Diostami shungumanta ayudachun mañarca. Ishquipica, Esaumanmi valishca regalocunata curca (Génesis 32:9-15). Quimsapica, paipaj huauquihuan ñahui ñahui tupashpaca paitami jatunyachirca. Paipaj ñaupajpipish siete cutinmi cumurirca. Chashnami paica respetohuan, humildadhuan paipaj huauquihuan alli tucurca (Génesis 33:3, 4).

12. ¿Jacobpaj ejemplomantaca imatataj yachanchij?

¹² Jacobmantaca valishca yuyaicunatami yachai tucunchij. Paica paipaj huauquihuan tupangapajca allimi allichirirca. Jehová Diostapish ayudachunmi mañarca. Qꞌuipaca pai ima mañashcata pajtachingapaj, paipaj huauquihuan alli tupangapajmi esforzarirca. Paihuan ñahui ñahui parlashpaca pi culpata charishcataca mana nircachu. Ashtahuanpish paipajca paipaj huauquihuan alli tucunami importante carca. ¿Jacobpaj ejemplotaca ima shinataj pajtachina canchij?

13, 14. ¿Huauqui panicunahuan alli tucungapajca imatataj rurana canchij?

¹³ Huiñai causaiman apaj ñanpi puringapajca shujtajcunahuanmi alli apanacuna canchij (Romanos 12:18). Chaimanta ¿shuj huauquita o panita mana yuyashcapi llaquichishcata cuenta cushpaca paihuan alli apanacungapajca imatataj rurana canchij? Jacobca Jehová Diostaca shungumantami mañarca. Ñucanchijpish huauqui panicunahuan alli tucungapajca Jehová Dios ayudachunmi shungumanta mañana canchij.

 ¹⁴ Imapi mejorana cashcata ricungapajmi tiempota surcuna canchij. Por ejemplo, cashna nishpa tapurishunchij: “¿Shuj huauquihuan panihuan alli tucungapajca mana jatun tucushpa ñucanchijrajchu paicunata perdonachun mañanchij? ¿Shuj huauquihuan panihuan alli tucungapaj esforzarijpica Jehová Diospish, Jesuspish ima shinataj sintiringacuna?”. Cai tapuicunapi yuyashpaca Jesús ima yachachishcata ima shina pajtachinatami ricushun. Chashnami huauqui panicunahuanpish alli tucushpa, alli sintirishun. Caita pajtachingapajca Jacobpaj ejemplomi ayudanga.

15. Efesios 4:2, 3-pi nishca shinaca ¿shujtaj huauqui panicunahuan alli tucungapajca imatataj rurana canchij?

¹⁵ Caipi yuyashun. ¿Jacob paipaj huauquihuan jatun tucushpa tupanaman rishca cajpica imataj tucunman carca? Tal vez Jacob jatun tucushpa maijan culpata charishcata nijpica paipaj huauquica ashtahuanmi pꞌiñarinman carca. Chashnallatajmi shuj huauquihuan panihuan alli tucungapajca mana jatun tucushpa respetohuan parlana canchij (Efesios 4:2, 3-ta liyipai). Proverbios 18:19-pica: “Huauqui llaquichishcamanta shungu chugririshca runaca, pueblo muyundij jatun pircatapish yalli sinchi shungumi tucun. Pꞌiñanacushca huauquindijpaj shunguca, fierro aldabahuan huichcashca pungu shinami” ninmi. Shuj huauqui o panita paicunahuan alli tucungapaj mana jatun tucushpa parlajpica paicunaca ñucanchijhuan alli tucunatami mashcangacuna.

16. ¿Pihuan alli tucungapajca paicunahuan manaraj parlashpa imatataj alli yuyanaraj canchij?

¹⁶ Pihuan cutin alli tucungapajca paicunahuan manaraj parlashpami imata ninata, imata mana ninata alli yuyanaraj canchij. Ña listos cashpaca resintirishca cajcunahuanmi parlana canchij. Tal vez paicunahuan parlajpica pꞌiñarishca o sinchi shimicunatachari ninga. Pero ñucanchijca mana coleranachu canchij. Canmi culpata charingui nishpapish mana ninachu canchij. Chaita rurashpaca huauqui panicuna ñucanchijhuan alli tucuchunca mana ayudashunchu. Ashtahuancarin pi ima culpata charishcata ninapaj randica paicunahuan alli apanacunami importante can (1 Corintios 6:7).

17. ¿Huauqui Gilbertpaj ejemplomantaca imatataj yachanchij?

¹⁷ Huauqui Gilbertca shujtajcunahuan alli apanacungapajmi esforzarirca. Paica: “Ñucaca ñuca ushushihuanmi achca problemacunata charircani. Casi ishqui huata yallitami paihuan  parlangapaj, cutin alli apanacungapajca sinchita esforzarircani. Pero manaraj chaita rurashpaca Jehová Diostami ñuca ushushihuan alli apanacungapaj, sinchi shimicunata nijpipish ama ñuca rato pꞌiñaringapaj ayudachun mañarcani. Paita perdonangapajpish listomi cana carcani. Canmi culpata charingui ninapaj randica ñucaraj paihuan alli tucungapaj esforzarina cashcata intindircani. Chaita rurashcamantami cunanca tucui ñuca familiacunahuanca alli apanacuni” ninmi.

18, 19. ¿Shuj huauquita o panita mana alli tratashca cashpaca paicunahuan alli tucungapajca imatataj rurana canchij?

¹⁸ ¿Shuj panita o huauquita mana alli tratashcata cuentata cushpaca paicunahuan cutin alli apanacungapajca imatataj rurana canchij? Jesusca pꞌiñanacushcacunahuan alli tucuchunmi mandarca. Chaitami pajtachina canchij. Ashtahuancarin ima problematapish allichingapajca Jehová paipaj espíritu santota cuchunmi mañana canchij. Chaita rurashpaca cushillami sintirishun. Jesús yachachishcata uyashpa pajtachishcatapishmi ricuchishun (Mateo 5:9).

¹⁹ Jehová Dios paipaj Churihuan paipaj pueblota yachachicushcamantami achcata agradicinchij (Efesios 5:23). Pedro, Santiago, Juanca Jesús ima yachachishcatami pajtachircacuna. Ñucanchijpish chaillatatajmi rurasha ninchij (Mateo 17:5). Chaipajca maijan huauquihuan, panihuan alli tucungapajmi esforzarina canchij. Shinallataj huiñai causaiman apaj quichqui ñanpi purishpaca achca bendicioncunatami chasquishun, shamuj punllapicarin huiñaitami cushilla causashun.