1-2. (a) Eaa ta te tokotoru apotetoro a Iesu i akaueia kia rave, e akapeea ratou te ariu atu anga? (e) Eaa ta tatou ka uriuri i roto i teia atikara?

I MURI ake i te Pasa o te mataiti 32 T.N., kua kite te au apotetoro ko Petero, Iakobo e Ioane i tetai orama umere. Tei runga ratou i tetai maunga teitei, penei te Maunga Heremona, e kua akatukeia a Iesu ki mua ia ratou. “Kakā atura tona mata mei te rā ra, teatea atura tona kakau mei te mārama.” (Mata. 17:1-4) Vaitata ki te openga o te orama, kua akarongo te au apotetoro i te reo o te Atua i te na ko anga: “Ko taku Tamaiti akaperepere teia, kua mareka rava au iaia; e akarongo kotou iaia.” (Mata. 17:5) Kua akapapu te oraanga o teia tokotoru apotetoro i muri mai e kua akarongo ratou kia Iesu. Ka inangaro katoa tatou kia aru i to ratou akaraanga.

² I te atikara i mua atu ana, kua apii tatou e me akarongo ki te reo o Iesu, te aiteanga auraka tatou e rave i tetai au angaanga. I teia atikara, ka uriuri tatou e rua mea ta Iesu i karanga e kia rave tatou.

3. Ia Mataio 7:13, 14, eaa ta tatou ka rave?

³ E tatau ia Mataio 7:13, 14. Kua taiku a Iesu e rua ngutupa e taki atura ki nga ara e rua, te ara “pararauare” e te ara “piri.” Kare e toru ara. Ka anoanoia tatou kia iki e ko teea te ara ta tatou ka aere na runga. Ko teia te ikianga puapinga rava atu ta tatou ka rave no te mea e okotai ara te taki atura ki te ora mutu kore.

4. Akapeea koe me akataka i te ara “pararauare”?

 ⁴ Ka anoanoia tatou kia akamaara i te tuke i rotopu i teia nga ara. E maata te tangata tei na runga i te ara “pararauare” no te mea e māmā ua i te aaere na reira. Te mea tangi, e manganui tei iki kia noo tamou ki runga i teia ara e te aru i ta te katoatoa e rave ra. Kare ratou e mārama e te tauta nei a Satani te Tiaporo i te akanauru i te tangata kia aaere na runga i teia ara te ka taki atu ki te mate.—1 Kori. 6:9, 10; 1 Ioa. 5:19.

5. Akapeea tetai pae te tauta anga i te kimi i te ara “piri” e te akamata i te aere na runga i te reira?

⁵ Tei tuke ki te ara “pararauare,” ko te ara “piri oki” tetai mai ara, e kua karanga a Iesu e tokoia ua ake tei kite atu i teia ara. No teaa ra? Te mea umere, i te irava i aru mai, kua akamatakite a Iesu i tana au pipi i te au peroveta pikikaa. (Mata. 7:15) Karanga tetai pae e tauatini ua atu au akonoanga tei karanga e te apii ra ratou i te tuatua mou. No te mea e maata te au akonoanga tukeke, e manganui tei taitaia e kua akavareia, no reira kare ratou e tauta i te kimi i te ara te taki atura ki te ora. Inara, ka kitea teia ara. Karanga a Iesu: “I tāpu tika kotou i taku tuatua, e pipi tikai kotou naku i reira: Ka kite ïa kotou i te tuatua-mou, e na te tuatua-mou kotou e akarangatira.” (Ioa. 8:31, 32) Mea meitaki, kare koe i aru ana i te urupu tangata; mari ra kua kimi koe i te tuatua mou. Kua akamata koe i te apii oonu i te Tuatua a te Atua e kua kite mai koe i tana e umuumu maira e kua akarongo koe ki ta Iesu au apiianga. Kua apii katoa koe e te tapapa maira a Iehova ia tatou kia patoi i te au apiianga a te akonoanga pikikaa e te akamutu i te piri atu ki te au akaepaepa anga tei akamata na roto i te au peu etene. E kua apii koe e me rave i te au tauianga i roto i te oraanga ei akamareka ia Iehova, kare ïa i te mea māmā. (Mata. 10:34-36) Noatu ra, kua tauta rai koe i te rave i teia no toou inangaro i toou Metua i te rangi e te akamareka iaia. Mareka rava aia ia koe!—Mase. 27:11.

6. Ia Salamo 119:9, 10, 45, 133, eaa te ka tauturu ia tatou kia noo tamou ki runga i te ara piri?

⁶ Me akamata tatou i te aere na runga i te ara piri, eaa te ka tauturu ia tatou kia noo tamou ki runga i te reira? Akamanako ana i teia akatutuanga. Ka riro tetai arai i te ope o te mataara pipiri i runga i tetai maunga ei paruru i te tangata e to ratou apinga akaoro. Te akakoroanga o teia arai—kia kore te tangata e akaoro i tona motoka vaitata ki te ope o te maunga e kia kore te reira e topa mei runga i te maunga. Kare e maata te tangata te ka kopekope e ka karanga e te tāpu ra teia arai ia ratou mei te akaoro i to ratou motoka mei runga i te maunga! Aite rai to Iehova au turanga i roto i te Pipiria mei te arai. Ka tauturu tona au turanga ia tatou kia noo tamou ki runga i te ara piri.—E tatau ia Salamo 119:9, 10, 45, 133.

7. Akapeea te au mapu me akara i te ara piri?

⁷ E te au mapu, te manako ra ainei koe e kare koe e akatikaia kia rave i taau i anoano me aru koe i to Iehova au turanga? Ka inangaro a Satani kia manako akapera koe. Inangaro aia ia koe kia akamou i toou manako ki runga i te au mea ta te aronga e aere ra na runga i te ara pararauare e rave ra no te mea i te akara anga, e mataora ake to ratou oraanga. Inangaro aia kia manako koe e kare toou oraanga e mataora ana mei toou au oa apii rai me kore te aronga taau e kite ra i runga i te Initaneti.  Inangaro a Satani kia manako koe e te tāpu ra to Iehova au turanga ia koe kia kore e rauka ia koe te tu mataora i roto i toou oraanga. * Inara akamaara i teia: Kare a Satani i inangaro i te aronga e aere ra na runga i tona ara kia kite eaa tei te openga o te ara. Inara i tetai tua, te akakite maira a Iehova mei teaa rai te mataora o te oraanga me noo tamou koe ki runga i te ara e taki ra ki te ora.—Sala. 37:29; Isa. 35:5, 6; 65:21-23.

8. Eaa ta te au mapu ka apii mei te akaraanga o Olaf?

⁸ Akamanako ana i taau ka apii mei tetai taeake mapu ko Olaf. * Kua māro tona au oa apii iaia kia rave i te pirianga ainga. Te akamārama anga aia e ka akono te Au Kite o Iehova i te au turanga meitaki o te Pipiria no te tu tika, kua tauta pakari atu tetai au tamaine i roto i tona pupu apii i te akakeu  iaia kia piri ainga atu kia ratou. Inara kua vai ngaueue kore ua a Olaf e kua rave i te mea tika. Kare ra ko teia ua te taomianga tei tupu kiaia. Karanga a Olaf: “Kua tauta toku au puapii i te opara iaku kia aere ki te apii teitei no te mea ka akangateiteiia au e te tangata. Akakite mai ratou e me kare au e rave i te reira, kare e rauka iaku te ngai angaanga meitaki e kare toku oraanga e mataora.” Eaa tei tauturu ia Olaf kia patoi i teia au taomianga? Karanga aia: “Kua akatupu au i te pirianga vaitata ki te aronga i roto i taku putuputuanga. Riro mai ratou mei toku ngutuare rai. Kua akamata katoa au i te apii maata atu i te Pipiria. Te oonu anga atu i taku apii, kua papu roa iaku e ko teia te tuatua mou. Tei tupu, kua inangaro maata au i te tavini ia Iehova.”

9. Eaa tei umuumuia no te aronga tei inangaro i te noo tamou ki runga i te ara piri?

⁹ Ka inangaro a Satani ia koe kia akaruke i te ara o te ora. Inangaro aia ia koe kia aru i te maataanga o te tangata e kia aere na runga i te ara pararauare “e tae atu ei ki te mate.” (Mata. 7:13) Inara, ka noo tamou tatou ki runga i te ara piri me akarongo ua rai kia Iesu e me akamaara e ka riro teia mataara ei paruru ia tatou. I teianei, ka uriuri tatou i tetai apinga ke atu ta Iesu i karanga mai e kia rave tatou.

10. Ia Mataio 5:23, 24, eaa ta Iesu i karanga mai e kia rave tatou?

¹⁰ E tatau ia Mataio 5:23, 24. Kua akataka mai a Iesu i tetai tupuanga puapinga tikai ki te aronga akamori ngati Iuda e akarongo maira iaia. Akamanako ana i tetai tangata i ko i te iero, kua papa aia i te oronga i tana atinga manu ki te taunga. E i taua taime tikai, kua maara iaia e e ara ta tona taeake iaia, no reira ka akaruke aia i tana atinga e ka “akamata i te aere.” No teaa ra? Eaa tei puapinga atu i te apai atinga na Iehova? Akakite tika mai a Iesu: “E ongi i to taeake,” koia oki, e akatupu i te ‘au kiaia.

11. Akataka mai i ta Iakoba tauta anga i te akatupu i te ‘au kia Esau.

¹¹ Ka kite tatou i te au apiianga manea no te akatupu i te ‘au me akara matatio i tetai tupuanga i roto i te oraanga o te tangata akarongo i taito, ko Iakoba. Te akaruke anga a Iakoba i tona enua anau e kua pou e 20 mataiti, akaue te Atua iaia na roto i tetai angera e oki aia ki tona enua anau. (Gene. 31:11, 13, 38) Inara e manamanata tetai. Kua inangaro tona tuakana ko Esau i te tamate atu iaia. (Gene. 27:41) “Mataku roa akerā Iakoba, e kua tumatetenga” aia e kua riri rai tona tuakana iaia. (Gene. 32:7) Eaa ta Iakoba i rave ei akatupu i te ‘au ma tona tuakana? Mea mua, kua pure akatenga aia kia Iehova no runga i te reira. E oti, kua tuku aia i tetai apinga aroa maata na Esau. (Gene. 32:9-15) E i te openga, te aravei anga raua, kua akangateitei a Iakoba ia Esau. Kua tupou aia ki raro i mua ia Esau—kare e tai taime me kore e rua taime, mari ra, e itu taime! Ma te tu akaaka e te akangateitei, kua akatupu a Iakoba i te ‘au ki tona tuakana.—Gene. 33:3, 4.

12. Eaa ta tatou ka apii mei te akaraanga o Iakoba?

¹² E apiianga ta tatou ka mou mai mei te tu i akateateamamao ei a Iakoba i te aravei i tona tuakana e tona tu kia Esau. Kua pati akaaka a Iakoba ia Iehova no te tauturu. E oti kua tauta aia i te akatupu i tana i pure na te rave i te au takainga kia akatupu i te ‘au ma tona tuakana. E i te aravei anga raua, kare a Iakoba i taumāro  ana kia Esau e noai te apa me kore koai tei tika. To Iakoba akakoroanga, kia akatupu i te ‘au ki tona tuakana. Akapeea tatou me aru i te akaraanga o Iakoba?

13-14. Me akariri tatou i tetai taeake irinaki, eaa ta tatou ka rave?

¹³ Me inangaro tatou i te aere na runga i te ara o te ora, ka tauta tatou i te akatupu i te pirianga ‘au ki to tatou au taeake. (Roma 12:18) Eaa ta tatou ka rave me kite mai tatou kua akariri tatou i tetai taeake irinaki? Mei ia Iakoba rai, e pure akatenga tatou kia Iehova. E pati tatou kia akameitaki mai aia i ta tatou tauta anga kia akatupu i te ‘au ki to tatou taeake.

¹⁴ E akapou katoa tatou i tetai taime no te akara matatio ia tatou uaorai. Penei ka ui tatou i teia au uianga kia tatou uaorai: ‘Ka puareinga ainei au i te karanga e noku te tarevake, kia tataraara ma te maru e kia akatupu i te ‘au? Eaa ta Iehova e Iesu ka manako me tauta au i te akatupu i te ‘au ki toku taeake me kore tuaine?’ Ka tauturu te pauanga ia tatou kia akarongo kia Iesu e kia aravei e te tuatua akaaka atu ki to tatou taeake irinaki ei akatupu i te ‘au. Na teia mataara, te aru nei tatou i te akaraanga o Iakoba.

15. Me taangaangaia te kaveinga ia Ephesia 4:2, 3, akapeea te reira me tauturu ia tatou kia akatupu i te ‘au ki to tatou taeake?

¹⁵ Akamanako ana e kua akaparau a Iakoba i te aravei anga raua ko tona tuakana! Penei ka tupu te kino maata. Me aravei tatou i to tatou taeake ei akatupu i te ‘au, ka anoanoia kia rave i te reira ma te vaerua akaaka. (E tatau ia Ephesia 4:2, 3.) Te na ko ra a Maseli 18:19: “Te taeake ra kia riri, e tau ïa i te oire ketaketa; e to ratou taumāro anga, e tau i te tamou auri o te punanga ra.” Me tataraara tatou ma te tu akaaka, ka tauturu ia tatou kia tomo ki roto i te reira “oire ketaketa.”

16. Eaa ta tatou ka tau kia akamanako, e no teaa ra?

¹⁶ Ka tau katoa tatou kia akamanako meitaki eaa ta tatou ka tuatua, e akapeea me tuatua ki to tatou taeake. Me papa tatou, e tuatua tatou ki te tangata tei akaririia na roto i te tu te ka tauturu iaia kia akameitaki akaou i tona pirianga kia tatou. Penei i te akamataanga, ka tuatua aia i te au mea kare tatou e reka ana. Ka māmā ua ia tatou kia riri me kore kia  taumāro atu, inara me rave tatou i te reira, ka tupu ainei te ‘au? Kare rava. E akamaara, ko te akatupu i te ‘au ki to tatou taeake te mea puapinga atu i te kite e noai te apa me kore koai tei tika.—1 Kori. 6:7.

17. Eaa taau ka apii mei te akaraanga o Gilbert?

¹⁷ Kua tauta pakari tetai taeake ko Gilbert kia riro mai ei tangata akamoeau. Karanga aia: “Kua tupu te pekapeka maata i rotopu ia maua e taku tamaine. Tere atu i te rua mataiti, kua tauta au kia tuatua maru atu ma te ngakau tae ei akatupu i te pirianga meitaki kiaia.” Eaa atu ta Gilbert i rave? “I mua ake ka tuatua au kiaia, ka pure au e ka akamaara ua rai e auraka au e riri me tuatua kino mai aia kiaku. Kua anoanoia au kia papa ua i te akakore i te ara. Kua apii mai au e auraka e māro i toku tikaanga e kua mārama katoa au e naku te apainga kia akatupu i te ‘au.” Eaa tei tupu? Karanga a Gilbert: “I teia rā, e ngakau ‘au toku no te mea e pirianga meitaki toku ki te katoatoa i roto i toku ngutuare.”

18-19. Me kua akariri tatou i tetai taeake, eaa ta tatou ka tauta kia rave, e no teaa ra?

¹⁸ Eaa i reira taau ka rave me kite mai koe e kua akariri koe i tetai taeake Kerititiano? E aru i ta Iesu akoanga kia akatupu i te ‘au. Pure kia Iehova no te reira e e irinaki ki tona vaerua no te tauturu kia akatupu i te ‘au. Me pera koe, ka rekareka koe e ka akaari e te akarongo ra koe kia Iesu.—Mata. 5:9.

¹⁹ Mataora tikai tatou e te oronga maira a Iehova i te aratakianga aroa na roto i “te upoko ïa i te ekalesia,” ko Iesu Mesia. (Ephe. 5:23) Kia tauta tatou i te ‘akarongo kiaia,’ mei te au apotetoro rai ko Petero, Iakobo e Ioane. (Mata. 17:5) Kua akara tatou akapeea me rave i teia na te akatupu i te ‘au ki tetai taeake Kerititiano ta tatou i akariri. Me pera tatou e me noo tamou marie ki runga i te ara piri o te ora, e maata ua atu te au akameitakianga ta tatou ka rauka mai i teianei e te mataora mutu kore a te tuatau ki mua.