1, 2. (α) Καγιά εντολή ντιντιλί κο τριν απόστολοι ι Ιησούσκε, ντα σο κερντέ βον; (β) Σο κα ντικχάς ανταλέ μαθημάστε;

ΣΟΡΑΝ κατά Πάσχας 32 K.X., ο απόστολοι Πέτρος, Ιάκωβος ντα Ιωάννης ντικχλέ εκ εντυπωσιακή φαντασία. Εκχέ βουτσσέ βεσέστε, μπέκιμ κο βες Αερμών, ο Ιησούς αλλαντάς μορφή ανγκλά-λέντε. «Λέσκο μούι λέλας-πες σαρ ο κχαμ ντα λέσκε σέα αβιλέ παρνέ σαρ ο φως». (Ματθ. 17:​1-4) Κάνα μπιτίνελας η φαντασία, ο απόστολοι ασουντέ ι Ντεβλές τι βακερέλ: «Ακαβά ισί μο Τσσαβό σο μανγκάβα-λες μπουτ, ισινόμ ευχαριστιμέ λέσαρ. Τι ασουνέν-λες». (Ματθ. 17:5) Ο τριν απόστολοι από αζομάν σικαντέ οντουλέντζαρ σο κερένας πουμαρέ ζωγιάτε ότι ασουνένας μπαγιά ι Ιησούς. Μανγκάσα τι μοιάζας λέντε.

² Κο γιαβέρ μάθημας, σικλιλάμ ότι τι ασουνάς ι φωνή ι Ιησούσκι μανγκέλα τι βακερέλ μα τι κεράς κάποια πράγματα. Ανταλέ μαθημάστε, κα ντικχάς κάποια πράγματα σο ο Ιησούς βακερντάς ότι πρέπει τι κεράς.

3. Σο πρέπει τι κεράς σαρ βακερένα ο εδάφια Ματθαίος 7:​13, 14;

³ Διαβάνεν Ματθαίος 7:​13, 14. Ντικχέν ότι ο Ιησούς βακερντάς ντουέ πορτένγκε σο γκερένα ντουέ ντρομέντε, ο εκ τανό ισί «άνετος» ντα ο γιαβέρ «δύσκολος». Νανέ τρίτος ντρομ. Αμέν πρέπει τι τραμπίνας καλέ ντρομέστε κα πφιράς.  Ανταγιά ισί η πιο σημαντική απόφαση σο κα λας σόσκε σάντε εκ ντρομ γκερέλα κι ζωή για πάντα.

4. Σαρ κα βακερένας ότι ισί ο «άνετος» ντρομ;

⁴ Ισί λατσσό τι ανάς αμαρέ γκοντιάτε ι διαφορά σο τθερένα ανταλά ντούι ντρομά. Μπουτ τζενέ ισί κο «άνετος» ντρομ επειδή ισί εύκολος. Δυστυχώς, μπουτ τζενέ τραμπίνενα τι ατσσόν ανταλέ ντρομέστε ντα τι κερέν οντουβά σο κερένα ο τζενέ σο ισί ανταλέ ντρομέστε. Να αγαβένα ότι ο Μπενγκ ισί οντουβά σο κερέλα ι τζενέν τι πφιρέν ανταλέ ντρομέστε ντα ότι λέσκο ντρομ να ανέλα λατσσέ αποτελέσματα.​—1 Κορ. 6:9, 10· 1 Ιωάν. 5:19.

5. Καλά προσπάθειες κερντέ μερικά τζενέ για τι αρακχέν ο «δύσκολος» ντρομ ντα τι αρχίνεν τι πφιρέν λέστε;

⁵ Ο γιαβέρ ντρομ νανέ σαρ ο «άνετος», αλλά ισί «δύσκολος», ντα ο Ιησούς βακερντάς ότι χάνικ τζενέ αρακχένα-λες. Σόσκε; Κο γιαβέρ εδάφιος, ο Ιησούς βακερντάς πι μαθητένγκε για το ψεύτικοι προφήτες. (Ματθ. 7:​15) Μερικά τζενέ βακερντέ ότι υπαρχίντιβενα χιλιάδες θρησκείες ντα ο πο μπουτ λένταρ βακερένα ότι σικλιαρένα ι αλήθεια. Επειδή υπαρχίντιβενα αζόμ μπουτ θρησκείες, μπουτ τζενέ χασαρντέ πουμαρί ζορ ή ισί μπερδεμέ ντα να προσπαθίνενα τι αρακχέν ο ντρομ σο γκερέλα κι ζωή. Αλλά ανταβά ντρομ μπορίνελα τι αρακχίντιβελ. Ο Ιησούς βακερντάς: «Άμα κα ατσσόν μι λαφίστε, ισινέν μπαγιά μο μαθητές, ντα κα σικλιόν ι αλήθεια ντα η αλήθεια κα ελευθερώνελ-τουμέν». (Ιωάν. 8:​31, 32) Ισί μπουτ λατσσό, σο να κερένα οντουβά σο κερένα ο πο μπουτ τζενέ, αλλά ρόντενα τι αρακχέν ι αλήθεια. Αρχισάλεν τι σικλιαρέν-τουμέν λατσσές κατά Λάφι ι Ντεβλέσκο για τι σικλιόν σο μπεκλεντίνελα βοβ αμένταρ, ντα ασουντέν οντουλά σο σικλιαρντάς ο Ιησούς. Αντρέ ανταλέντε, σικλιλέν ότι ο Ιεχωβά μπεκλεντίνελα αμένταρ μα τι ασουνάς οντουλά σο σικλιαρέλα η ψεύτικη θρησκεία ντα τι τσσιναβάς ο γιορτές σο αβένα κατά ψεύτικη θρησκεία. Σικλιλέν επίσης ότι μπέκιμ τι αβέλ δύσκολος τι κεράς οντουβά σο μπεκλεντίνελα αμένταρ ο Ιεχωβά ντα τι κεράς αλλαγές αμαρέ ζωγιάτε σο κερένα λέσκο γκι. (Ματθ. 10:​34-36) Μπέκιμ μα τι αβέλας τουμένγκε εύκολος τι κερέν ο αλλαγές σο χρειαζίντιβελας. Όμως, να τσσιναντέν τι κερέν προσπάθειες επειδή μανγκένα τουμαρέ νταντές ι Ιεχωβάς ντα μανγκένα τι τθερέν λέσκι ευλογία. Καζόμ μπουτ πρέπει τι κερντέν λέσκο γκι!​—Παρ. 27:11.

6. Σο κα βοηθίνελ-αμέν τι ατσσάς κο δύσκολος ντρομ σαρ βακερένα ο εδάφια Ψαλμός 119:9, 10, 45, 133;

⁶ Αφού αρχισάλαμ τι πφιράς κο δύσκολος ντρομ, σο κα βοηθίνελ-αμέν τι ατσσάς λέστε; Ανέν τουμαρέ γκοντιάτε ακαβά παράδειγμας. Ο σίδερα σο ισί κι νάκρη εκχέ στενέ ντρομέστε αρακχαβένα ι τζενές σο οδηγίνελα ντα λέσκο αυτοκίνητος. Ο σίδερα κερντιλέ για τι αρακχαβέν ι οδηγών​—βοηθίνενα-λεν μα τι τζαν μπουτ πασέ κι νάκρη κι ντρομέσκι ντα μα τι περέν κο γκρεμός. Καέκ οδηγός να κα βακερέλας ότι ανταλά σίδερα πφάντενα λέσκο ντρομ! Ο κανόνες ι Ιεχωβάσκε σο ισί κι Αγία Γραφή ισί σαρ ανταλά σίδερα. Βοηθίνενα-αμέν τι ατσσάς κο δύσκολος ντρομ.​—Διαβάνεν Ψαλμός 119:9, 10, 45, 133.

7. Σαρ πρέπει τι ντικχέν ο τερνέ ο δύσκολος ντρομ;

⁷ Τερνάλεν, μήπως μπάζιμα νιωθίνενα ότι ο κανόνες ι Ιεχωβάσκε να μουκχένα-τουμέν τι κερέν οντουλά σο μανγκένα; Ανταβά μανγκέλα ο Μπενγκ τι πακιάν. Κα μανγκέλας τι ντικχέν οντουλέν σο πφιρένα κο άνετος ντρομ ντα καζόμ λατσσές ντικχίντιβελα ότι νακχένα. Βοβ μανγκέλα τι πακιάν ότι να κερένα τουμαρί ζωή σαρ κερένα-λα τουμαρέ συμμαθητές ή ο τζενέ σο ντικχένα κο  Ίντερνετ. Ο Μπενγκ μανγκέλα τι αμντίνεν ότι ο κανόνες ι Ιεχωβάσκε να μουκχένα-τουμέν τι νακχέν λατσσές τουμαρέ ζωγιάτε. * Αλλά τι ντεν-τουμέν γκοντί ακαβά: Ο Μπενγκ να μανγκέλα τι ντικχέν οντουλά σο πφιρένα λέσκε ντρομέστε κάι γκερέλα-λεν ανταβά ντρομ. Οκιά μπάνταρ, ο Ιεχωβά μανγκέλα τι τζανέν καζόμ σουκάρ κα αβέλ τουμαρί ζωή άμα κα ατσσόν κο ντρομ κι ζωγιάκο.​—Ψαλμ. 37:​29· Ησ. 35:5, 6· 65:​21-23.

8. Σο μπορίνενα τι σικλιόν ο τερνέ κατά Όλαφ;

⁸ Σκεφτίνεν σο μπορίνενα τι σικλιόν οντουλένταρ σο νακχλάς εκ τερνό πφραλ σο βακερένα λέσκε Όλαφ. * Λέσκε συμμαθητές ζορισκιαρένας-λες τι κερέλ μπίλατζανε πράγματα. Κάνα βακερντάς λένγκε ότι ο Μάρτυρες ι Ιεχωβάσκε τζουβντιόνα αντικάς σαρ βακερένα ο κανόνες ι Γραφιάκε, μερικά τσσαγιά λέσκε ταξιάταρ προσπαθιντέ  τι κερέν-λες τι σοβέλ λέντζαρ. Αλλά ο Όλαφ ατσσιλό σταθερός. Ντα να νακχλάς σάντε ανταγιά δυσκολία. Ο Όλαφ βακερέλα: «Μο καθηγητές προσπαθίνενας τι κερέν-μαν τι τζαβ κο πανεπιστήμιος σόσκε αντικάς ο τζενέ κα σεβάνενας-μαν. Βακερένας μάνγκε ότι, άμα να κα κεράβας-λες ανταβά, να κα αρακχάβας λατσσί μπουτί ή να κα αβάβας ευτυχισμέ μι ζωγιάτε». Σο βοηθιντάς-λες μα τι ασουνέλ-λεν; Βοβ βακερέλα: «Αβιλόμ λατσσό αμάλ ι πφραλέντζαρ μι κχανγκιριάτε. Βον αβιλέ σαρ φαμιλί μάνγκε. Επίσης, αρχισάλομ τι σικλιαράβ-μαν πο λατσσές κατά Αγία Γραφή. Καζόμ πο λατσσές σικλιαράβας-μαν, αζόμ πο σίγουρος αβάβας ότι ανταγιά ισί η αλήθεια. Οτθάρ, μανγκάβας σαρέ μι γκίσαρ τι υπηρετίναβ ι Ιεχωβάς».

9. Σο πρέπει τι κερέν οντουλά σο μανγκένα τι ατσσόν κο δύσκολος ντρομ;

⁹ Ο Μπενγκ κα μανγκέλας τι κερέλ-τουμέν τι νασέν κατά ντρομ σο γκερέλα κι ζωή. Μανγκέλα τι κερέν οντουβά σο κερένα ο πο μπουτ τζενέ ντα τι πφιρέν κο άνετος ντρομ «σο οδηγίνελα κι καταστροφή». (Ματθ. 7:​13) Όμως, αμέν κα ατσσάς κο δύσκολος ντρομ άμα να τσσιναβάσα τι ασουνάς ι Ιησούς ντα τι ντικχάς ότι ανταβά ντρομ ισί αμαρέ αρακχαϊμάσκε. Για τι ντικχάς ακανά σο γιαβέρ βακερντάς ο Ιησούς ότι πρέπει τι κεράς.

10. Σο βακερντάς ο Ιησούς ότι πρέπει τι κεράς σαρ βακερένα ο εδάφια Ματθαίος 5:​23, 24;

¹⁰ Διαβάνεν Ματθαίος 5:​23, 24. Ο Ιησούς κερντάς λάφι εκχέ πραγμάσκε σο ισινέ μπουτ δύσκολος ι Ιουδαιόνγκε σο ασουνένας-λες. Ανέν τουμαρέ γκοντιάτε εκχέ τζενές κο ναός σο ισί έτοιμος τι ντελ εκ ζώος εκχέ αρχιερεάστε σαρ θυσία. Άμα αζομάν ντινάας-πες γκοντί ότι λέσκο πφραλ τθερέλας κάτι λέσαρ, έπρεπε τι μουκχέλ ο ζώος ντα “τι νασέλ”. Σόσκε; Σο κα μπορίνελας τι αβέλ πο σημαντικός κατά θυσία σο κα κερέλας ι Ιεχωβάσκε; Ο Ιησούς βακερντάς: «Πρώτα κερ ειρήνη τι πφραλέσαρ».

11. Σο κερντάς ο Ιακώβ για τι κερέλ ειρήνη πι πφραλέσαρ;

¹¹ Μπορίνασα τι σικλιάς σαρ τι κεράς ειρήνη κατά Ιακώβ. Πασέ 20 μπρεσά αφού ο Ιακώβ νασλόας πι τθεμέσταρ, ο Ντεβέλ βακερντάας λέσκε αντράλ εκχέ αγγελόσταρ τι βουρτίνελ οτθέ. (Γέν. 31:​11, 13, 38) Αλλά ισινέ εκ πρόβλημας. Ο πο μπαρό πφραλ λέσκο, ο Ησαύ, μανγκέλας τι μουνταρέλ-λες. (Γέν. 27:​41) Ο Ιακώβ «νταρασάλο ντα τσσουντάς μπουτ πι γκίστε» μα τι ισινέ ο πφραλ λέσκο ατζέκ ατζέκ χολιαμέ λέσαρ. (Γέν. 32:7) Σαρ προσπαθιντάς ο Ιακώβ τι κερέλ ειρήνη πι πφραλέσαρ; Πρώτα, κερντάς προσευχή αντράλ πι γκίσταρ κο Ιεχωβά ανταλέσκε. Σοράν, μπουτσσαντάς εκ χουλανό δώρος κο Ησαύ. (Γέν. 32:​9-15) Ντα κάνα ντικχλάς πι πφραλές, ο Ιακώβ σικαντάς λέσκε σεβασμός. Πελό κοτσίντζαρ ανγκλάλ κο Ησαύ, όχι εκ, όχι ντούι, αλλά εφτά φαρ! Επειδή ο Ιακώβ ισινέ ταπεινός ντα σικαντάς σεβασμός κο Ησαύ, κερντάς ειρήνη πι πφραλέσαρ.​—Γέν. 33:3, 4.

12. Σο σικλιάσα κατά Ιακώβ;

¹² Σικλιάσα κάτι σημαντικός κατά προετοιμασία σο κερντάς ο Ιακώβ για τι τζαλ πι πφραλέστε, κο Ησαύ, ντα οντουλένταρ σο κερντάς για τι κερέλ λέσαρ λάφι. Ο Ιακώβ μανγκλάς ταπεινά κατά Ιεχωβά βοήθεια. Σοράν, σικαντάς ότι κερντάς οντουβά σο μανγκλάς πι προσευχιάτε κάνα κερντάς ο πο λατσσό για τι αρακχέλ-λεν πι πφραλέσαρ. Κάνα ο ντούι πφραλά ντικχλέ-πες, ο Ιακώβ να μανγκλάς τι αρακχέλ κον τθερέλας δίκιος ντα κον να τθερέλας. Οντουβά σο μανγκέλας ο Ιακώβ ισινέ τι κερέλ ειρήνη πι πφραλέσαρ. Σαρ μπορίνασα αμέν τι μοιάζας λέστε;

13, 14. Άμα προσβαλιντάμ εκχέ πφραλές, σο πρέπει τι κεράς;

¹³ Άμα μανγκάσα τι πφιράς κο ντρομ σο γκερέλα κι ζωή, πρέπει τι τθεράς ειρήνη αμαρέ πφραλέντζαρ. (Ρωμ. 12:​18) Σο πρέπει τι κεράς άμα αγαντάμ ότι προσβαλιντάμ εκχές αμαρέ πφραλένταρ; Σαρ ο Ιακώβ, πρέπει τι κεράς προσευχή αντράλ αμαρέ γκίσταρ κο Ιεχωβά ντα τι μανγκάς λέσταρ τι ευλογίνελ ο προσπάθειες σο κα κεράς για τι αρακχάς-λεν αμαρέ πφραλέσαρ.

¹⁴ Επίσης, πρέπει τι ντας αμαρέ σαατίσταρ για τι σκεφτίνας σο κεράσα. Μπορίνασα τι πουτσάς-αμέν: “Ισινόμ έτοιμος τι βακεράβ ότι κερντόμ λάθος, τι μανγκάβ ταπεινά συγνώμη ντα τι κεράβ ειρήνη; Σαρ κα νιωθίνελ ο Ιεχωβά ντα ο Ιησούς άμα κα τζαβ τι κεράβ ειρήνη μι πφραλέσαρ ή μι πφενιάσαρ;” Ο απαντήσεις ανταλέ ερωτησιέντε κα κερέν-αμέν τι ασουνάς ι Ιησούς ντα τι τζας ταπεινά αμαρέ πφραλέστε για τι κεράς ειρήνη. Για τι κεράς-λες ανταβά, μπορίνασα τι κεράς οντουβά σο κερντάς ο Ιακώβ.

15. Σαρ μπορίνελα η αρχή ι εδαφιόνγκι Εφεσίους 4:2, 3 τι βοηθίνελ-αμέν τι κεράς ειρήνη αμαρέ πφραλέσαρ;

¹⁵ Ανέν τουμαρέ γκοντιάτε σο κα μπορίνελας τι αβέλ-πες άμα ο Ιακώβ κα σικαβέλας μπαρικανιπέ κάνα κα ντικχέλας πι πφραλές! Ο πράγματα κα αβένας μπουτ μπέτι. Κάνα τζάσα αμαρέ πφραλέστε τι κεράς ειρήνη λέσαρ, πρέπει τι αβάς ταπεινοί. (Διαβάνεν Εφεσίους 4:2, 3) Ο εδάφιος Παροιμίες 18:​19 βακερέλα: «Ισί πο δύσκολος τι κοβλιαρές εκχέ χολιαμέ πφραλές παρά τι τσσουβές-τουτ εκχέ τθεμέστε σο ισί λατσσές αρακχαντό, ντα χάνικ καβγκάδες ισί σαρ ο αμπάρες εκχέ φρουριόσκε». Άμα κα μανγκάς ταπεινά συγνώμη μπέκιμ τι τσσουβάς-αμέν οντουλέ “φρουριόστε”.

16. Σο πρέπει τι σκεφτίνας, ντα σόσκε;

¹⁶ Πρέπει επίσης τι σκεφτίνας λατσσές σο κα βακεράς αμαρέ πφραλέσκε ντα σαρ κα βακεράς-λες. Κάνα ισινάμ έτοιμοι, πρέπει τι κεράς λάφι ι τζενέσαρ σο ισί πφανγκέ γκίσκο ντα τι βοηθίνας-λες τι τθερέλ εκ λατσσί σχέση πάλι αμέντζαρ. Κι αρχή, μπέκιμ τι βακερέλ πράγματα σο να κα μπεϊντίνας. Ο εύκολος κα αβέλας τι χολιάνας ή τι προσπαθίνας τι αρακχάς αμαρό δίκιος. Αλλά κα βοηθίνελας ανταβά τι αρακχάς-λεν αμαρέ πφραλέσαρ; Νάα. Τι τθερέν τουμαρέ γκοντιάτε ότι ισί πο σημαντικός τι κερέν ειρήνη τουμαρέ πφραλέσαρ παρά τι αρακχέν κον τθερέλας δίκιος ντα κον να τθερέλας.​—1 Κορ. 6:7.

17. Σο σικλιόνα κατά Ζιλμπέρ;

 ¹⁷ Εκ πφραλ, ο Ζιλμπέρ, μαρέλας-πες τι κερέλ ειρήνη εκχέ τζενέσαρ. Βοβ βακερέλα: «Τθεράβας μπαρό πρόβλημας μι τσσαγιάσαρ. Για πο μπουτ από ντούι μπρεσά, μαράβας-μαν τι κεράβ λάσαρ λάφι λατσσιμάσαρ ντα με ηρεμία για τι αρακχάς-λεν πάλι». Σο γιαβέρ κερντάς ο Ζιλμπέρ; «Πριν τι κεράβ λάσαρ λάφι, κεράβας προσευχή ντα βακεράβας αντρέ μάντε μα τι χολιάναβ άμα κα κερέλας μάντζαρ λάφι μπέτι. Έπρεπε τι αβάβ έτοιμος τι συγχωρίναβ. Σικλιλόμ μα τι μαράβ-μαν τι αρακχάβ μο δίκιος ντα αγαντόμ ότι μι μπουτί ισινέ τι κεράβ ειρήνη». Καβά ισινέ ο αποτέλεσμας; Ο Ζιλμπέρ βακερέλα: «Αντιβές τθεράβα ειρήνη μι γκοντιάτε σόσκε τζάβα-λεν λατσσές σαρέ μι φαμιλιάσαρ».

18, 19. Άμα προσβαλιντάμ εκχέ τζενές σο πρέπει τι μανγκάς σαρέ αμαρέ γκίσαρ τι κεράς, ντα σόσκε;

¹⁸ Άρα, σο πρέπει τι μανγκέν τι κερέν άμα κα αγαβέν ότι προσβαλιντέν εκχέ πφραλές; Ντεν καν κι οδηγία κι Ιησούσκι τι κερέν ειρήνη. Κερέν λάφι κο Ιεχωβά ανταλέσκε ντα μουκχέν ο άγιος πνεύμας τι βοηθίνελ-τουμέν τι ντεν-λεν πέρα. Άμα κα κερέν-λεν ανταλά, κα αβέν ευτυχισμέ ντα κα σικαβέν ατζέκ εκχέ τροπόσαρ ότι ντένα καν ι Ιησούς.​—Ματθ. 5:9.

¹⁹ Ισινάμ πφερντέ εκτίμηση σο ο Ιεχωβά οδηγίνελα-αμέν αντράλ κατά «σορό ι κχανγκιριάκο», κατά Ιησούς Χριστός. (Εφεσ. 5:​23) Τι μανγκάς σαρέ αμαρέ γκίσαρ “τι ασουνάς-λες”, σαρ ο απόστολοι Πέτρος, Ιάκωβος ντα Ιωάννης. (Ματθ. 17:5) Ντικχλάμ σαρ μπορίνασα τι κεράς-λες ανταβά κάνα κεράσα ειρήνη εκχέ πφραλέσαρ σο προσβαλιντάμ. Άμα κα κεράς-λες ανταβά ντα κα ατσσάς κο δύσκολος ντρομ σο γκερέλα κι ζωή, κα λας μπουτ ευλογίες ακανά ντα ευτυχία σο κα ατσσόλ για πάντα ανγκλ’ αμέντε.