1-2. a) Ino ty raha nampanaovi-Ndranahary ani-apostoly telo rey, le ino ty nataon-drozy? b) Ino ty hodinihintsika amy lahatsoratsy toy ato?

 NANDEHA tamy vohitsy raiky zay teny ry apostoly Petera, Jakoba, noho Jaona tafara kelikelini-Paska tao 32. Mety tamy Vohitsy Hermona teny vasa io. Nisy raha miavaky nihitan-drozy tamy zay. Niova ty tarehini-Jesosy, le nihitan-drozy maso mihintsy. “Namirapiratsy manahaky masoandro ty tarehiny, le nanjary nipelapelatsy manahaky hazavà ty akanjony ivelany.” (Mat. 17:1-4) Lafa narìny ho tampitsy fahità iny le niren-drozy Ndranahary nivola hoe: “Toy ro anako teako sady mahazo hatò amiko. Janjino ie.” (Mat. 17:5) Natoroni-apostoly telo reo tafaran’iny hoe nijanjy ani-Jesosy vatany rozy. Nihita tamy ty fomba fiainan-drozy raha zay. Ta hanahaky an-drozy koa tsika.

² Nihitantsika tamy lahatsoratsy taloha tao iny hoe laha mijanjy ty feoni-Jesosy tsika le misy raha sisany tsy ataontsika sasy. Fa amy lahatsoratsy toy ato tsika handiniky raha roe nivolanini-Jesosy hoe tokony hataontsika.

3. Laha hentea ty Matio 7:13, 14, ino ty tokony hataontsika?

³ Vakio Matio 7:13, 14. Ambinao va fa niresaky vavahady roe samby hafa Jesosy eo! Manday amy lala “malalaky” ty vavahady raiky le mana amy lala “maifitsy” ty raiky. Tsy misy lala fahatelo eo. Tsy maintsy mifily raiky amy lala roe reo zany tsika. Io ty farany bevata amy ze fanapahan-kevitsy ataontsika, satria mianky amy zay ty hahavy antsika ho velo zisiky farany.

4. Manao akory ty mikasikasiky ani-lala “malalaky” io?

⁴ Tokony hotiarovintsika avao ty maha samby hafa ani-lala roe reo. Maro mpandeha lala “malalaky” iny satria mora andehana.  Mampalahelo fa maro ty mifily handeha amy lala io na manarakefa avao le manao ze raha ataon’olo mandeha amy lala io koa. Tsy hain-drozy fa Satana Devoly ro mitariky an-drozy ho any, sady fahafatesa ty amy farani-lalany io any.​—1 Kor. 6:9, 10; 1 Jaona 5:19.

5. Ino ty ezaky nataon’olo sisany mba hahitany noho handehanany amy lala “maifitsy” iny?

⁵ Tsy manahaky ani-lala “malalaky” iny azy lala “maifitsy” io. Tsy maro ty mahita ani-lala io hoasani-Jesosy. Fa manino? Soa ho hay fa nampitandremini-Jesosy amy mpaminany sandoky ty mpanori-dia azy, amy andininy manaraky eo. (Mat. 7:15) Misy mivola hoe misy an’arivony ty fivavaha, le samby manao mampianatsy ty marina iaby ty ankamaroany. Fa maro loatsy ty fivavaha ka fa vozaky ty olo na fa tsy hitany ty ho rambesy, farany ie tsy miezaky mila ani-lala mana amy fiaina iny. Kanefa azo atao soa ty mahita ani-lala io. Nivola Jesosy hoe: “Laha tsy miala amy safàko nareo le tena mpianatsiko vatany, le ho hainareo ty marina, le ty marina hanafaky anareo.” (Jaona 8:31, 32) Soa avao fa tsy nanaraky olo maro rey iha fa nila ty tena marina. Nanomboky nidinihinao soa ty Safà-Ndranahary le nihainao hoe ino ty teany hataonao, bakeo iha nijanjy ty fampianarani-Jesosy. Anatini-raha nianaranao, ohatsy, hoe teani-Jehovah laha halantsika ty fampianarani-fivavahan-diso le tsy ataontsika sasy ze fety noho fombafomba baka amy fivavahan-diso. Lasa hainao koa hoe mety tsy ho mora ty hanova ty fiainanao mba hahavitanao manao ty raha teani-Jehovah. (Mat. 10:34-36) Mety nisarotsy taminao ty nanao ani-fanovà reo. Fe niezaky avao iha satria teanao Babanao an-danitsy any iny ka ta hahazo hatò aminy iha. Azo antoky fa falifaly biby zay ie ao mahita anao!​—Ohab. 27:11.

6. Laha hentea ty Salamo 119:9, 10, 45, 133, ino ty afaky manampy antsika tsy hiala amy lala maifitsy iny?

⁶ Lafa nanomboky nandeha amy lala maifitsy iny tsika, ino ty afaky manampy antsika tsy hiala amy lala io mihintsy? Diniho tse moa toy. Amy faritsy sisany, sirtò amy lala maifitsifitsy rey, le tsy maintsy misy arofàny ty amy sisini-lala rey. Mety ho azon-doza ty olo mbeo laha mahazo sisiny marè na lositsy miala amy lala iny. Miaro zany arofàny rey. Tsy hisy olo hitaray amy raha rey ka hanao ho zao hoe: ‘Manino zahay sakasakana amy raha retỳ io? Tsy engan-drozy zahay ho lositsy hiala amy lala toy soa haràtsy na ho maty!’ Manahaky arofàny io ty fitsipikini-Jehovah amy Baiboly ao, satria manampy antsika handeha amy lala maifitsy iny.​—Vakio Salamo 119:9, 10, 45, 133.

7. Manao akory ty tokony ho fahitani-tanora ani-lala maifitsy iny?

⁷ Laha tanora iha, mahatsapa va iha kindraiky hoe mamehifehy anao marè ty fitsipikini-Jehovah? Zay mihintsy ty teani-Satana hoeritseretinao. Teany hifantoky amy ty raha ataon’olo mandeha amy lala malalaky rey any iha, satria atao raha mahazo tavy fiaina olo rey. Teany iha hieritseritsy hoe tsy soa ty fiainanao, satria tsy manahaky ty ahini-mpiaraky mianatsy aminao reo na tsy manahaky ty ahin’olo amy internet ao. Teani-Satana hieritseritsy iha hoe manakasaka anao ty fitsipikini-Jehovah ka misy raha mahasambatsy sisany fe tsy azonao. * Fe tiarovo zao: Tsy teani-Satana ho hain’olo manaraky azy amy lala  malalaky any rey hoe aia ty hiafarani-lala io. Fe mifanohitsy amy zay ty ataoni-Jehovah. Teany ho hainao hoe tena ho soasoa biby ty fiainanao laha tsy miala amy lala mana amy fiaina iny iha.​—Sal. 37:29; Isaia 35:5, 6; 65:21-23.

8. Ino ty azoni-tanora ianara baka amy tantarani-Olaf?

⁸ Diniho hoe ino ty azonao ianara baka amy rahalahy tanora mana anara Olaf toy. * Nampirisiky azy hanao firaisa ty mpiaraky mianatsy aminy, fe nihazavaniny tamin-drozy hoe Vavolombeloni-Jehovah ie ka manaraky ty torolalani-Baiboly. Vomaiky nanjeky somonjara sisany tan-dakilasy ao rezay ka nitao azy hanao firaisa amin-drozy, kanefa tsy nety mihintsy Olaf. Fe tsy zay avao. Nivola Olaf hoe: “Niezaky nandresy lahatsy ahy mpampianatsy anay rey hoe tokony hianatsy amy iniversitè eny aho soa hohajan’olo. Laha tsy manao ani-zay aho hoasan-drozy le tsy hahita asa soa sady tsy ho sambatsy mihintsy.” Ino ty nanampy ani-Olaf? Hoy ty asany: “Nifandramby soa tamin’olo tamy fiangona eo aho, le lasa manahaky fianakaviako mihintsy rozy. Nazoto  nianatsy Baiboly koa aho. Le arakarakini-nianarako, vomaiky aho niresy lahatsy hoe toy ty tena marina. Farany aho nitapa-kevitsy hanompo ani-Jehovah avao.”

9. Ino ty raha tokony hataoni-ze olo tsy ta hiala amy lala maifitsy iny?

⁹ Teani-Satana hiala amy lala mana amy fiaina iny iha. Manitranitra ie laha iha manaraky olo maro mana amy lala “mandeha amy fandripaha” any rey. (Mat. 7:13) Fe tsy hiala amy lala maifitsy iny tsika laha mijanjy ani-Jesosy avao sady mieritseritsy hoe miaro antsika lala io. Ino koa ty raha hafa nivolanini-Jesosy hoe tokony hataontsika? Handiniky ani-zay tsika henanizao.

10. Ino ty raha nivolanini-Jesosy amy Matio 5:23, 24 ao hoe tokony hataontsika?

¹⁰ Vakio Matio 5:23, 24. Niresaky mikasiky fotoa raiky tena bevata tamy Jiosy nijanjy azy reo Jesosy teo. Mba eritsereto moa hoe ingy misy olo raiky avy amy tempoly ao. Manday biby hatao soro ie. Fa parè ie amin’io, le fa alohany etia mpisoro iny manampatsy ty tanany handramby ani-biby iny. Laha amy fotoa zay ie ro mahatiaro hoe misy rahalahiny manan’alahelo aminy le tsy maintsy engany eo tse biby iny, le ‘mandeha’ ie. Ino ty antony? Satria mbo misy raha bevata mila ataony tse alohani-hanaterany fanomeza ho ani-Jehovah. Ino koa lahy ty raha mbo bevata mandilatsini-hoe manao soro ho ani-Jehovah? Mazava ty raha nivolanini-Jesosy hoe: “Mandehana tse milongo amy rahalahinao iny.”

11. Ino ty raha nataoni-Jakoba mba hifanaraky soa ndraiky rozy amy Esao?

¹¹ Misy fianara soa mikasiky filongoa io ty tantarani-Jakoba. Roampolo tao eo ho eo tafarani-nialani-Jakoba baka an-tanindrazany any, le naniraky anjely Ndranahary mba hivola taminy hoe mila mimpoly any ndraiky ie. (Gen. 31:11, 13, 38) Fe toy ty problemo: Ta ho namono azy Esao rahalahiny tamy ie nihitany farany. (Gen. 27:41) “Natahotsy biby” Jakoba sady “niasa loha”, satria nieritseritsy ie hoe mety mbo meloky aminy avao zay Esao. (Gen. 32:7) Ino ty nataoni-Jakoba mba hifanarahany amy rahalahiny iny ndraiky? Voalohany, nivavaky tamy Jehovah mikasiky ani-raha zay ie. Bakeo ie nandefa kadò maromaro ho ani-Esao. (Gen. 32:9-15) Farany, lafa nifankahita rozy mirahalahy le nasehony hoe nanaja ani-Esao ie. Niankohoky talohani-Esao eo ie, tsy indraiky indroe avao, fa impito mihintsy! Niambany noho nampiseho fanajà Jakoba ka nifanaraky soa ndraiky rozy amy rahalahiny iny.​—Gen. 33:3, 4.

12. Ino ty ianarantsika baka amy Jakoba?

¹² Ianaran-draha ty raha nataoni-Jakoba talohani-hifankahitany tamy Esao noho ty raha nataony lafa ie namonjy azy. Niambany Jakoba ka nangataky fanampea tamy Jehovah. Bakeo ie nanao raha nifanaraky tamy vavaky nataony iny ka nanao ze fara heriny ie mba hilongoa tamy rahalahiny iny. Lafa nifankahita rozy, le tsy nialy hevitsy tamy Esao ie hoe ia ty marina le ia ty diso. Ze hahavy an-drozy hifanaraky soa avao ro tan-tsainy tao. Akory ty azontsika anahafa ani-Jakoba?

13-14. Ino ty tokony hataontsika laha tsika nanao raha nampalahelo mpiara-manompo?

¹³ Laha ta handeha amy lala mana amy fiaina iny tsika, le tsy maintsy miezaky mifanaraky soa amy rahalahy noho anabavintsika reo. (Rom. 12:18) Ino ty tokony hataontsika laha hitantsika hoe misy mpiara-manompo lasa malahelo amy ty raha nataontsika? Mila  mivavaky baka amy fo tsika, manahaky nataoni-Jakoba iny avao. Afaky mangataky amy Ndranahary tsika mba hanampy antsika hifanaraky soa amy rahalahintsika iny ndraiky.

¹⁴ Tokony hodinihintsika koa ty vatantsika. Afaky mieritseritsy fanontanea manahaky ani-retoa tsika: ‘Parè va zaho hivola aminy hoe diso aho? Miambany avao va aho ka parè hiala tsiny mba hifanaraky soa ndraiky zahay? Hanao akory Jehovah noho Jesosy laha zaho ro manao raha voalohany mba hahavy anay amy rahalahiko iny hifanaraky soa ndraiky?’ Lafa mamaly fanontanea ho reo tsika le ho voatosiky hijanjy ani-Jesosy, le hiambany ka hamonjy ani-mpiara-manompo iny mba hilongo aminy ndraiky. Afaky manao manahaky ani-Jakoba tsika lafa manao ani-zay.

15. Manino ty Efesianina 4:2, 3 ro manampy antsika hifanaraky soa amy rahalahintsika reo?

¹⁵ Ho nanao akory hoasanao laha Jakoba nialy hevitsy tamy Esao hoe ia ty marina le ia ty diso? Mety ho niraty aloha ty niafarani-zay. Mila manao manahaky Jakoba iny koa tsika lafa mandamy tsy fifanaraha amy rahalahintsika. Lafa mamonjy azy tsika, le mila miambany. (Vakio Efesianina 4:2, 3.) Hoy ty Ohabolana 18:19: “Sarotsy azo mandilatsy tanà misy manda ty rahalahy nanaova raha mampalahelo, le misy fifamalea sisany manahaky sakada vy fanilia tilikambo rey.” Manahaky “tilikambo” mihily io ty rahalahy raiky lafa malahelo amy ty raha nataontsika, fe lafa miala tsiny tsika le mety ho parè hifanaraky soa amintsika ndraiky ie.

16. Ino koa ty raha tokony hodinihintsika soa, le ino ty antony?

¹⁶ Tokony hodinihintsika soa koa ty raha hovolanintsika amy rahalahintsika iny noho ty fomba hivolanantsika azy. Lafa parè amy zay tsika le miresaky aminy, fe ze hahavy antsika hifanaraky soa aminy ndraiky ro tena kendrentsika. Mety hivola raha tsy teantsika tse ie amy voalohany. Mety hampeloky antsika raha zay na mety hahavy antsika hiezaky hanamarina ty vatantsika. Fe hampisy filongoa va laha zay ty ataontsika? Aia koa. Tiarovo fa ty filongoa ro tena vatan-draha fa tsy hoe ia ty marina na ia ty diso.​—1 Kor. 6:7.

17. Ino ty azonao ianara baka amy Gilbert?

¹⁷ Tena niezaky ho mpampilongo rahalahintsika mana anara Gilbert zay. Hoy ty asany: “Maro ty raha nampifanola anay amy anakampelako zay. Niezaky avao aho tanatini-roe tao mahery. Niresaky aminy moramora avao  aho soa zahay hifanaraky soa ndraiky.” Ino koa ty raha hafa nataoni-Gilbert? “Saky hiresaky aminy aho, le mivavaky sandrany tse sady tiaroviko avao hoe tsy tokony heloky aho laha marerè ty raha volaniny bakao. Nila nanenga hadisoa aho. Haiko hoe ty hampifanaraky soa anay an-trano ao ro tena andraikitsiko fa tsy ty hanaporofo hoe marina ty ahy.” Nanao akory ty vokany? Nivola Gilbert hoe: “Milamy soa ty saiko henanizao satria mifanaraky soa iaby zahay trano raiky.”

18-19. Ino ty tokony hataontsika laha misy mpiara-manompo malahelo amy ty raha nataontsika, le ino ty antony?

¹⁸ Tokony ho tapa-kevitsy hanao akory zany iha lafa misy mpiara-manompo hitanao hoe malahelo amy ty raha nataonao? Oriho tari-dalani-Jesosy mikasiky fifanaraha soa amin’olo iny. Resaho amy Jehovah raha iny, le miantehera amy ty fanahiny masy mba hanampy anao ho mpampilongo. Ho falifaly iha laha manao ani-zay, sady atoronao koa hoe mijanjy ani-Jesosy iha.​—Mat. 5:9.

¹⁹ Manao mahavelo bevata ani-Jehovah tsika satria tea antsika ie. Mitari-dala antsika ie ka ampiasany Jesosy Kristy, azy lohani-fiangona iny. (Efes. 5:23) Enga ane tsika mba hanao manahaky ani-apostoly Petera, Jakoba, noho Jaona ka ho tapa-kevitsy ‘hijanjy’ ani-Jesosy. (Mat. 17:5) Nidinihintsika teo hoe manao ani-zay tsika lafa miezaky mifanaraky soa amy ty mpiara-manompo amintsika laha nisy raha nataontsika nampalahelo an-drozy. Laha manao ani-zay avao tsika sady tsy miala amy lala maifitsy mana amy fiaina any iny, le hahazo fitahia maro henanizao sady tsy ho tampitampitsy ty hasambarantsika amy hoavy.