1-2. a) Kɛkɔnge k’iyashimela apɔstɔlɔ asato wa Yeso djɛ nangha, ko wopo wɔkɔnge w’iyelola? b) Kɛkɔnge k’ɛnaso lɔ lá djamba djɛnɛ?

M’ƆKƆNGƆ wɔ Pasaka kel’ɔnɔnyi 32 D.D., ɔpɔstɔlɔ Pɛtɛlɔ nya Djakɔbɔ la Djɔanɛ wɛnaka ɛnɛlɔ kɛmɔtshi kɛ nkamɔ. L’onkókó ɔmɔtshi w’ekekete, nkoka ndjala l’Onkókó wɔ Hɛrɛmɔna, Yeso apilɔka lá ntondo kɛwɔ. ‘Elongi kɛnde k’apɛtaki etengo winá, la ntshendja djɛnde djelá djiko dj’apɛtaki etengo osase.’ (Mat. 17:1-4) T’ekomo kɛ ɛnɛlɔ kɛsɔ, apɔstɔlɔ wokaka Ndjambe atepela ante: ‘Ɔnɛ nde Wɔnami wɔ ngandji wawolami. Nyowokele.’ (Mat. 17:5) Apɔstɔlɔ asato wasɔ wɛnyɛka lá lowiko lɔwɔ lonkfumɔ djɛ iwɔ ndjokelaka Yeso. Iso nkɔpaka ndjokola ndjɔmbɔmba kɛwɔ.

² Lá djamba djemboheta, tekaka ente ndjekameyɛ djoyi djɛ Yeso nsakisolaka ntshika nangha akambo amɔtshi. Lá djamba djɛnɛ, tɔngɛna akambo ape wa Yeso ndatoshimela woyɛso ladjɛ nangha.

3. Lá nkilika Mateo 7:13, 14, kɛkɔnge k’oyɛso ladjɛ nangha?

³ Wala Mateo 7:13, 14. Tokote ente Yeso atepelaka lá nkambo djɛ wiso epe wɛtɔla tá mboka ipe yetshikitanyi, mboka ‘k’ekekete’ la mboka kɛ ‘daambi.’ Mboka k’esato kepalekɔ. Isɔmɛlɛ ladjɛ nsɔna mboka kɛmɔtshi k’oyɛso ladjɛ mpeta. Ɔsɔ alekɔ nkano djeleka djonyi dj’oyɛso ladjɛ ndɔsa, ladjikɛnde ngo mboka kɛmɔ toko ndeke lɔtɔla tá lowiko l’etshinda.

4. Kɔkɔndɔla wopo wolekɔ mboka ‘k’ekekete.’

 ⁴ Iso ladjɛ namaka lá wɔɔngɔ etshikitano welekɔ l’antenyɛ amboka ipe yɛsɔ. Lá mboka ‘k’ekekete’ anto efula ndjingelaka ladjikɛnde kepalekɔ okakasano nkɛnda l’eteyi. Nkambo djɛ yɛnyi nde, anto efula nsɔnaka djɛ ndjingela ngo tá mboka kɛsɔ, iwɔ nkilikaka ngo oloyi w’anto wingela l’eteyi. Iwɔ wapasipisoyɛ ambɔ Satana Djabolo ndeke ikɔkɔ yɛ mboka kɛsɔ, la mboka kɛnde kɛsɔ ntɔlaka tá nyɔyi.—1 Kɔ. 6:9, 10; 1 Dj. 5:19.

5. Welo wɛkɔnge w’ilisa anto amɔtshi dj’iwɔ ndjisola mboka kɛ ‘daambi’ la djɛ mbanga nkɛnda l’eteyi?

⁵ Etengo otshikitanawɔ la mboka ‘k’ekekete’, mboka kenkina kelekɔ daambi,’ la Yeso atepelaka ante ngo anto daambi ndeke lisolaka mboka kɛsɔ. Lamo? Nkambo djekamoyɛ nde, lá vɛrse djɛwɔlama, Yeso ewola ambeki wande nkambo dj’aprɔfɛtɛ y’engolo. (Mat. 7:15) Anto amɔtshi ntepelaka ambɔ, nunu djɛ ntolo dekɔ, la efula kɛ ntolo djɛkɔ mpomelaka ikole ambɔ olakanyɛwɔnde nsɔsɔlɔ. Mande ntolo mboleka efula, anto efula wambɔlɛmba kana wambingela l’okakando, ko wapohonaka kaanga mboka kɛtɔla tá lowiko. Koko mboka kɛsɔ nkoka ntanema. Yeso atepelaka ante: ‘Ntsha nyo ntshikala lá elakanyelo wɛmi, mbɔ nyo nyolekɔ nsɔsɔlɔ ambeki wami, ko nyongewa akambo wa nsɔsɔlɔ ko akambo wa nsɔsɔlɔ wangonyotshungola.’ (Dj. 8:31, 32) Tombokowandola, ladjikɛnde wɛ otákilika oloyi w’anto, koko ohonaka akambo wa nsɔsɔlɔ. Wɛ otateyɛka la wekelo wɔ lotshimola w’Otepela wɔ Ndjambe djɛ ndjeka kɛnɛ k’ɔtɔlɔmbande djɛ nangha, la wɛ ekameyaka elakanyelo wɛ Yeso. L’anteyi k’akambo ankina wangeke, wɛ ekaka djɛ Yehova ntɔlɔmbaka dj’iso ntona elakanyelo w’engolo la ntshika nangha wafɛtɛ yeposa má ntolo dj’engolo. Wɛ ekaka lonkina ente nangha kɛnɛ kɛ Yehova ɔtɔlɔmbande, la ndjopa losambi la nanghedji djepokana l’ɛkɔpa kɛnde nkoka ndjala itondo y’okakasano. (Mat. 10:34-36) Nangha etshikitano wɛlɔmbama wɛsɔ, atayala nkambo djɛ wɔdju. Koko, wɛ okindjɛka nangha etshikitano wɛsɔ mande wɛ nkɔpaka Papa kɛko kel’olongo la nkɔpaka nde nkawola. Lá nsɔsɔlɔ nde ayalaka l’osasa lá nkambo djɛko!—Woo. 27:11.

6. Lá nkilika Yeembo 119:9, 10, 45, 133, kɛkɔnge kekoka ntokotshɛ djɛ ntshikala lá mboka kɛ daambi?

⁶ Winá w’owangaso lɔkɛndɔ lá mboka kɛ daambi, kɛkɔnge kekoka ntokotshɛ djɛ ntshikala l’eteyi? Tokolenda ndjɔmbɔmba kɛnɛ. L’ewila ɛmɔtshi wangilake topapango l’emamo w’entayibo welekɔ la wɔɔkɔ djɛ nama shofɛrɛ l’otuka wɔnde. Topapango tɔsɔ ndjilamaka djɛ nama wa shofɛrɛ kana djɛ ndakotshɛ dj’ipa iwɔ ndeka malema kana ntamba topapango tɔkɔ. Lako shofɛrɛ yekiyanaka kana yetepelaka ante topapango tɔsɔ ntoshimbaka dj’iso mpeeta wɔlɔ l’ontayimbo kana ntoshimbaka akambo ankina! Ɛlɛmbɛ wɛ Yehova w’otanaso lá Bible welekɔ etengo topapango tɔsɔ. Ɛlɛmbɛ wɛnde ntokotshɛka dj’iso ntshikala lá mboka kɛ daambi—Wala Yeembo 119:9, 10, 45, 133.

7. Wopo wɔkɔnge dangala oyɛwɔ ladjɛ ndɔsa mboka kɛ daambi?

⁷ Dangala, nyongoyawokake winá ɔmɔtshi etengo ɛlɛmbɛ wɛ Yehova welekɔ nkenya efula? Nghɔsɔ ndeke Satana ɔkɔpande nyo nkanela. Nde nkɔpaka djɛ nyo ndjila yimba lá kɛnɛ kɛ waakɛnda lá mboka k’ekekete onanghawɔ, mande iwɔ nyɛnamaka etengo wasasanga nsɔsɔlɔ la lowiko. Nde nkɔpaka djɛ nyo nkanela ente nyopasasanga la lowiko lá yopo yɛlɔmbama etengo winanyo welá nkalasa kana anto w’ɛnanyo lá Ɛntɛrnɛtɛ onanghawɔ. Satana nkɔpaka djɛ nyo nkanela ente ɛlɛmbɛ wɛ Yehova nyoshimbaka djɛ nyo nangha kenkfumɔ k’okokanyo nangha djɛ nyo nsasanga la  lowiko. * Koko nyovungɔ nkambo djɛnɛ: Satana apakɔpɛ djɛ wanɛ watakɛndɛ lá mboka kɛnde nyɛna kɛnɛ kákongela l’ekomo kɛ lɔkɛndɔ lɔwɔ. Koko Yehova nkɔpaka djɛ nyo ndjewa ente, nyongoyala la lowiko lɔ wɔlɔ efula lá etsho weyaye ntsha nyo ntshikala lá mboka kɛtɔla tá lowiko.—Yee. 37:29; Iza. 35:5, 6; 65:21-23.

8. Olakanyelo wɔkɔnge wɔ dangala okokawɔ mba má ndjɔmbɔmba kɛ Olaf?

⁸ Kolenda olakanyelo w’okokɛ mba má kɛnɛ kekomelisa wɔnanyɔ ɔmɔtshi w’olangala w’etawɔ Olaf. * Winande welá nkalasa wahonaki djɛ ndotshinda djɛ nangha wayi wambindo wa nsanga mbeto. Winá wɔ ndaasipisoyɛ ante Ewakɛ wɛ Yehova mbikaka lá yopo yɛlama l’ɛlɛmbɛ wɛ Bible welendana la nanghedji, eseka ɛmɔtshi welá nkalasa kɛwɔ wananghaka lonkina la wolo djɛ ndotshinda djɛ nde nsanga  mbeto nyawɔ. Koko Olaf avundaka akambo wa sii mpidji. Koko apengo okakasano ɔmɔ wɔsɔ toko ndeke lopomanisa lande. Olaf ntepelaka ante: “Wetsha wɛmi wahonaki ndjawoyɛ lemi ambɔ lemi ladjɛ ndjingela nkalasa kɛ inivɛrsite ladjikɛnde ntsha lambingela nkalasa kɛsɔ anto wanghɔnɛmɛyɛka. Iwɔ wanshimelaka ambɔ ntsha mpingelisa nkalasa kɛsɔ, mbɔ mpangowa lowiko lɔ wɔlɔ.” Kɛkɔnge kekotshisa Olaf djɛ nde mpikama lá lodjimbo lɔsɔ? Nde ntepelaka ante: “Ndjalaka la djokanelo djɛ ma ma l’ase otshumano wɔmi. Iwɔ wayalaka etengo ase nkfumbo kɛmi. Lonkina ndjekaka Bible lá yopo yɛ lotshimola. Winá wɔ malekaka ndjeka, ndeke malekaka ndashikikɛ ente ndekɔ lá nsɔsɔlɔ. Eposelo weyalisa la nkambo djɛsɔnde, ndashikikɛka djɛ nkambela Yehova.”

9. Kɛkɔnge kɛlɔmbama le wanɛ wakɔpa ntshikala lá mboka kɛ daambi?

⁹ Satana nkombolaka djɛ wɛ nyima má mboka kɛtɔla tá lowiko. Nde nkɔpaka wɛ nkilika efula k’anto wamingela lá mboka k’ekekete ‘kɛtɔla tá etshitanelo.’ (Mat. 7:13) Koko, tongotshikala lá mboka kɛ daambi ngo ntsha iso nkindjɛ ndjekameyɛ Yeso la nyɛna mboka kɛ daambi kɛsɔ etengo olamelo leso. Winá wɔsɔ nyontshɔ tolende nkambo nkina djɛ Yeso ndatoshimela djɛ nangha.

10. Lá nkilika Mateo 5:23, 24, kɛkɔnge kɛ Yeso ndatepela k’oyɛso ladjɛ nangha?

¹⁰ Wala Mateo 5:23, 24. Lanɛ Yeso atepelaka nkambo djɛ winá woyalaki djonyi efula le ase Juda wowekameyɛki. Kokanela djɛ onto ɔmɔtshi ambokoma lá tɛmpɛlɔ ko alekɔ entshupa djɛ mpɛyɛ nkfundji nyama kɛ ndambola. Ntsha lá winá wɔsɔ onto wɔkɔ ambovungɔ ante alekɔ la nkambo mɔtshi nya wɔnanyɔ kɛnde, nde ayalaki ladjɛ ntshika nyama lányi ko ‘nde nkalɔ.’ Lamo? Kɛkɔnge kekoka ndeka ndambola Yehova olambo djonyi? Yeso atepelaka papoo ante: ‘Kotila ntondo vu wɛ nya wɔnanyɔ kɛko.’

11. K’ɔkɔndɔla welo w’ilisa Djakɔbɔ djɛ ndjila vu nya Esawo.

¹¹ Iso nkoka mba olakanyelo wɔ djoyi efula lá kɛnɛ kelendana la ndjila vu má nshishima nkambo mɔtshi djehetisa lá lowiko lɔ owandji wɔ nkfumbo Djakɔbɔ. M’ɔkɔngɔ wɔ Djakɔbɔ tonangha ɛnɔnyi etengo 20 lá mbandja keyalisa otale l’owila wɔnde wɔ lowotshɔ, Ndjambe oshimelaka má lotshimbo l’ondjelo djɛ nde nkalɔ t’eteyi. (Ewa. 31:11, 13, 38) Koko okakasano ɔmɔtshi w’oyalaka. Wɔna nyɛnghɛnde, Esawo, ahonaka ndoyaka. (Ewa. 27:41) Djakɔbɔ okaka ‘wɔma la ayalaka l’okiyano efula’ ante mbala imɔtshi wɔna nyɛnghɛnde akindjɛ ngo ndowombela onkomba. (Ewa. 32:7) Kɛkɔnge kɛ Djakɔbɔ ndananghe djɛ ndjila vu nya nyanghɛmɔko kɛnde? Ntondontondo, nde alɔmbaka Yehova lá nkambo djɛsɔ. Masɔ, nde atomelaka Esawo epapɛyɛ. (Ewa. 32:9-15) L’ekomo, winá wɔ ndɛɛnanaka ny’Esawo elongi l’elongi, Djakɔbɔ atateyɛka ndɔwɛnyɛ dilɛmɛlɔ. Nde akfusamaka lá ntondo k’Esawo, ape mbala kɛmɔ kana ipe, koko mbala esamble! La enanghedji k’okitshakitshɛ edjinge dilɛmɛlɔ, Djakɔbɔ ilaka vu nya nyanghɛmɔko kɛnde.—Ewa. 33:3, 4.

12. Olakanyelo wɔkɔnge w’owaso má ndjɔmbɔmba kɛ Djakɔbɔ?

¹² Iso mbaka olakanyelo ɔmɔtshi má wopo wɔ Djakɔbɔ ndoyalɔngɔsɔla djɛ ntopomana nya nyanghɛmɔko kɛnde edjinge wopo wɔ ndatateyɛ ntshawo nya Esawo. L’okitshakitshɛ onkfumɔ Djakɔbɔ alɔmbaka Yehova djɛnde ndokotshɛ. Masɔ nde ananghaka akambo lá yopo y’okana la ndɔmbɔ yɛnde, má nangha kenkfumɔ kɛ ndakoke nangha djɛ ndjila vu nya nyanghɛmɔko kɛnde. Winá wɔ yapomana iyape, Djakɔbɔ nya Esawo watahona  djɛ ndjewa kanga lolekɔ l’elonga kana l’ɛkfɔ. Okoma woyalisa la Djakɔbɔ nde ndjila vu nya nyanghɛmɔko kɛnde. Wopo wɔkɔnge okokaso ndjokola ndjɔmbɔmba kɛ Djakɔbɔ?

13-14. Ntsha tombokiyanyɛ winaso Okristo, kɛkɔnge k’oyɛso ladjɛ nangha?

¹³ Iso wanɛ wa kɛnda lá mboka kɛtɔlá tá lowiko ladjɛ ndjala vu la wananyɔ waso. (Ɔrɔ. 12:18) Okokaso ntateyɛ ngetemo ntsha tɔmbɛna ente tombokiyanyɛ winaso Okristo? Etengo Djakɔbɔ, iso ladjɛ ndɔmba Yehova m’anse k’oloko. Iso nkoka ndɔlɔmba djɛ nde ntshɔkɔla welo w’ilaso djɛ ndjila vu la wɔnanyɔ wɔso.

¹⁴ Lonkina iso ladjɛ ndɔsaka winá djɛ ndaashishima isɔmɛlɛ. Iso nkoka ndawopola weepó etengo wɛnɛ: ‘Lemi ndekɔ entshupa djɛ ndjawola ente nanghaka nyɛtshi, la djɛ ndɔmba imeyelo l’okitshakitshɛ onkfumɔ edjinge ndjila vu? Yehova nya Yeso iyongoka ngetemo ntsha lemi ndɔsa nkano djɛ ndjila vu isa wɔnanyɔ kana nkaana kɛmi?’ Nsakiso kɛso nkoka ntotshinda djɛ ndjekameyɛ Yeso ko nsawola la winaso Okristo l’okitshakitshɛ onkfumɔ djɛ ndjila vu. Lá nkambo djɛsɔ, iso nkoka nkilika ndjɔmbɔmba kɛ Djakɔbɔ.

15. Wopo wɔkɔnge ikfɔ yotanaso lá Ɛfɛsɛ 4:2, 3 otokotshɛwɔ djɛ ndjilá vu la wɔnanyɔ?

¹⁵ Kokanela kɛnɛ ketakoka mposa otayalawɔnde Djakɔbɔ nya Esawo wahonaka ndjewa kanga lolékɔ l’elonga kana l’ɛkfɔ! Djamba djɛwɔ ntasamba mbɔnga. Winá w’otshɔso ntila vu la wɔnanyɔ wɔso iso ladjɛ ndjala l’okitshakitshɛ. (Wala Ɛfɛsɛ 4:2, 3.) Woongo 18:19 ntepelaka ante: ‘Ilongo yɛ yombonanghela nyɛtshi alekɔ oloko wolo ndeka ngando kembodjingama la mpele edjinge ampɔsɔ imɔtshi ilekɔ etengo tonkengete tɔ wolo.’ Winá wɔlɔmbaso imeyelo l’okitshakitshɛ onkfumɔ, isonkoka ndekana ‘inkengete’ yɛsɔ.

16. Lá nkambo nkina djɛkɔnge dj’oyɛso ladjɛ ntɔnɔla, ko lamo?

¹⁶ Iso ladjɛ ntɔnɔla lonkina lá kɛnɛ kɛ songoshimela wɔnanyɔ wɔso la wopo wɔ songooshimela. Ntsha tomboyala entshupa, iso ladjɛ nsawola l’onto wɔ sokiyanyɛki l’ikanyi yɛ nkɔnɔla mpota kelekɔ lande l’oloko. Má bango nde nkoka ntoshimela akambo wakoka ntokiyanyɛ. Nkoka ndjala wɔdju leso djɛ nyomala kana mpona ndaseela, iya ntsha tombonangha nghɔsɔ tongila vu? Lako. Vungɔ ente ndjila vu wɛ nya wɔnanyɔ wɔko alekɔ djonyi efula ndeka mpona kanga l’olekɔ l’elonga kana kanga l’olekɔ l’ɛkfɔ djonyi.—1 Kɔ. 6:7.

17. Olakanyelo wɔkɔnge w’okokɛ mba má ndjɔmbɔmba kɛ Gilbert?

 ¹⁷ Wɔnanyɔ ɔmɔtshi wetawɔ Gilbert ananghaka la wolo djɛnde nkoma onto wilaka vu. Nde nkɔndɔlaka ante: “Ndjalaka l’okakasano wɔ wolo efula isa ewoto kɛso kɛmɔtshi kɛ nsukensuke. L’ilá k’ɛnɔnyi ndekana epe, lánanghaki la wolo dj’iso nsawola akambo waso la vu nkfumɔ djɛ ndjala la djokanelo djɛ wɔlɔ isande.” Gilbert ndananghe lonkina nge? Nde ntepelaka ante: “Winá enkfumɔ lá ntondo kɛ nsawola l’ewoto kɛmi kɛsɔ, lalɔmbaki Yehova djɛ nde nkotshɛ lemi dj’ipa ntomala ntsha ambomposeyɛ nkambo mɔtshi djɛ nyɛtshi. Layalaki entshupa djɛ nyimeyɛ. Nsipisoyeka ente mpakoke mpona djɛ ndowawoyɛ ente lemi ndeke l’elonga, koko okoma wɔmi iyayalakande wɔ ndjila vu.” Eposelo wɛkɔnge weyalisa la nkambo djɛsɔ? Gilbert ntepelaka ante: “Winá wɔsɔ, lamboyala la vu djelá wɔɔngɔ ladjikɛnde lamboyala la djokanelo djɛ wɔlɔ isa nkfumbo kɛmi.”

18-19. Ntsha tombonanghela onto ɔmɔtshi nyɛtshi, nkano djɛkɔnge dj’oyɛso ladjɛ ndɔsa, ko lamo?

¹⁸ Lasɔ, winá w’isolɛ ente ombokiyanyɛka winako Okristo, nkano djɛkɔnge dj’oyɛ ladjɛ ndɔsa? Kilika dako djɛ Yeso djɛ ndjila vu. Sawola nya Yehova lá kɛnɛ kelendana la nkambo djɛsɔ, la yawɛkɛ tá nyuma kɛnde k’ekina djɛ nde nkokotshɛ djɛ wɛ ndjala onto wila vu. Ntsha wɛ nangha nghɔsɔ, ongoyala l’osasa, la ɔngɛnyɛ ente wɛ ndjekameyɛka Yeso.—Mat. 5:9.

¹⁹ Tolekɔ la djedjɛ efula te Yehova lá ɛlɔndjɛlɔ k’ɔtɔpɛyɛnde má ‘lotshimbo l’owandji w’otshumano,’ Yeso Kristo. (Ɛfɛ. 5:23) Ngo ngete ɔpɔstɔlɔ Pɛtɛlɔ nya Djakɔbɔ, la Djɔanɛ, nyontshɔ tɔshi nkano djɛ ‘ndowekameyɛka.’ (Mat. 17:5) Tɔmbɛnaka wopo w’okokaso nangha nkambo djɛsɔ má ndjila vu la winaso Okristo wɔ sananghela nyɛtshi. Má nangha nghɔsɔ la má ntshikala lá mboka kɛ daambi kɛtɔla tá lowiko, tongowa ɛtshɔkɔ efula winá wɔsɔ la osasa w’opa l’ekomo l’etsho w’eyaye.