1-2. (a) San Gado ben taigi dri fu den apostel fu Yesus èn san den du? (b) San wi o luku na ini na artikel disi?

BAKA a Paskafesa fu a yari 32, den apostel Petrus, Yakobus nanga Yohanes kisi wan aparti sortu fisyun. Leti na den fesi Yesus bigin kenki, kande di den ben de na tapu Hermon-bergi. „En fesi ben e brenki leki son. Den krosi fu en ben e brenki srefisrefi” (Mat. 17:1-4). Na a lasti pisi fu a fisyun den apostel yere Gado e taki: „Disi na mi Manpikin, a lobiwan di mi feni bun. Un arki en” (Mat. 17:5). Sensi a ten dati den dri apostel disi sori nanga a fasi fa den ben e libi taki den ben e arki Yesus. Wi wani de neleki den.

² Na ini na artikel na fesi wi leri taki te wi e arki Yesus sten, dan wi no o du son sani moro. Na ini a artikel disi, wi o luku tu sani di Yesus taki dati wi musu du.

3. Soleki fa Mateyus 7:13, 14 e sori, dan san wi musu du?

³ Leisi Mateyus 7:13, 14. Dyaso Yesus e taki fu tu difrenti doro di e tyari sma go na tu difrenti pasi: Wan „bradi” pasi èn wan „smara” pasi. A no e taki fu dri pasi. Wi musu bosroiti gi wisrefi na tapu sortuwan fu den pasi wi wani waka. Disi na a moro prenspari bosroiti di wi musu teki, fu di wan fu den pasi nomo e tyari wi go na têgo libi.

4. San yu kan taki fu a „bradi” pasi?

⁴ Wi musu luku san na a difrenti na mindri den tu pasi.  Furu sma lobi a „bradi” pasi fu di a no muilek fu waka na en tapu. A sari fu si taki someni sma e tan waka na tapu a pasi disi èn den e waka na baka den furu sma di de na en tapu kaba. Den no e si taki na Satan Didibri e hari sma kon na tapu a pasi disi di e tyari sma go na dede.​—1 Kor. 6:9, 10; 1 Yoh. 5:19.

5. San son sma du fu feni a „smara” pasi èn fu bigin waka na en tapu?

⁵ Ma a „smara” pasi e difrenti fu a bradiwan, fu di a pikin èn Yesus taki dati wan tu sma nomo man feni en. Fu san ede? We, na vers 15 Yesus e warskow den futuboi fu en gi falsi profeiti (Mat. 7:15). Soleki fa sma e taki, dan dusundusun bribi de èn furu fu den e taki dati na den e leri a tru anbegi. A sani disi e bruya milyunmilyun sma, èn fu dati ede den lasi-ati èn den no sabi moro san fu du. Dati meki den no e du muiti srefi fu go suku a pasi di e tyari sma go na libi. Ma toku sma man feni a pasi disi. Yesus taki: „Efu unu tan du den sani di mi taki, dan unu na mi disipel trutru. Unu o sabi san tru èn dati o meki unu kon fri” (Yoh. 8:31, 32). Wi breiti taki yu no e waka baka den omeni sma di de na tapu a bradi pasi, ma taki yu go suku a tru anbegi. Yu bigin meki muiti fu ondrosuku Gado Wortu fu kon sabi san a e aksi fu wi èn yu du san Yesus leri wi. Yu leri fu eksempre taki Yehovah wani taki wi musu drai baka gi falsi bribi èn taki wi no musu hori fesa moro di abi fu du nanga falsi anbegi. Yu si tu taki a kan muilek son leisi fu du san Yehovah wani èn fu tapu nanga sani di a no feni bun (Mat. 10:34-36). Kande a no ben makelek gi yu fu kenki yu libi, ma yu horidoro fu di yu lobi yu hemel Papa èn yu wani du sani di a feni bun. A breiti srefisrefi nanga yu.​—Odo 27:11.

6. San kan yepi wi fu tan na tapu a smara pasi, soleki fa Psalm 119:9, 10, 45, 133 e sori?

⁶ Efu wi e waka na tapu a smara pasi kaba, dan san wi kan du fu no komoto na en tapu? Luku wan eksempre. Furu smara bergipasi abi wan skotu na a lanki di e meki taki wagi no man komopo fu a pasi. A skotu disi poti drape so taki sma no e kisi mankeri. A e tapu den fu go tumusi krosibei na a lanki fu a pasi, noso fu abra a lanki srefi. Wi de seiker taki nowan sma ben o mandi taki a skotu de drape. Wi kan agersi a skotu disi nanga den wet fu Yehovah di wi kan feni na ini Bijbel. Den wet fu en na fu yepi wi so taki wi kan tan na tapu a smara pasi.​—Leisi Psalm 119:9, 10, 45, 133.

7. Fa yonguwan musu si a smara pasi?

⁷ Yonguwan, un feni taki son leisi den wet fu Yehovah e tapu un fu du ala san un wani? Na dati Satan wani taki un musu denki. A wani taki yu poti prakseri na den sma di e waka na tapu a bradi pasi. Kande a o gersi gi yu leki na soso prisiri den sma disi e meki. A wani taki yu luku san den pikin fu yu skoro e du noso san de tapu Internet, èn na so a wani gi yu a firi taki yu no e prisiri fu a libi. Satan wani taki yu denki taki den wet fu Yehovah e tapu yu fu du ala san yu wani. * Ma no frigiti taki Satan no wani  taki den sma di e waka na tapu a pasi fu en si san de na a kaba fu a pasi disi. Ma Yehovah sori yu krin sortu blesi wi o kisi te wi e tan na tapu a pasi di e tyari sma go na libi.​—Ps. 37:29; Yes. 35:5, 6; 65:21-23.

8. San yongusma kan leri fu na eksempre fu Olaf?

⁸ Luku san wi kan leri fu na ondrofenitori fu wan yongu brada di nen Olaf. * Den pikin fu en klas ben wani dwengi en fu du hurudu. Di a taigi den taki Yehovah Kotoigi e du san Bijbel e taki, dan wan tu meisje fu en klas bigin du omeni muiti fu meki a abi seks nanga den. Ma fu di Olaf ben wani du san reti, meki a no du disi. Ma a no a tesi disi nomo miti en. Olaf taki: „Den meneer nanga jufrow fu mi skoro pruberi fu overtoigi mi taki mi musu teki hei skoroleri fu kan kisi biginen. Den taigi mi taki efu mi no du en, dan mi no o doro fara na ini a libi.” San yepi Olaf fu no du san den wani? A taki: „Mi tron bun mati nanga den brada nanga sisa na ini mi gemeente. Den kon de  leki famiri gi mi. Mi bigin studeri Bijbel fayafaya. O moro mi ben e studeri, o moro mi kon si taki disi na a tru leri. Dati meki mi ben wani du ala san mi man fu tan dini Yehovah.”

9. San den sma di wani tan na tapu a smara pasi musu du?

⁹ Satan wani taki wi komoto na a pasi di e tyari wi go na libi. Neleki fa a de nanga ala den tra sma, a wani taki yu srefi go waka tu na tapu a bradi pasi „di e tyari sma go na dede” (Mat. 7:13). Ma efu wi e tan arki Yesus èn wi e frustan taki a smara pasi na fu kibri wi libi, dan wi o tan waka na en tapu. Meki wi go luku wan tra sani now di Yesus taki dati wi musu du.

10. San Yesus taki dati wi musu du, soleki fa skrifi na Mateyus 5:23, 24?

¹⁰ Leisi Mateyus 5:23, 24. Dyaso Yesus e taki fu wan tori di ben de prenspari gi den Dyu di ben e arki en. Pruberi fu si en na yu fesi: Wan sma go na a tempel èn a de fu gi wan priester wan meti fu tyari leki ofrandi. Ma na a momenti dati a e memre taki en brada abi wan sani nanga en. Sobun, a e libi na ofrandi drape èn a e gowe. Fu san ede? We, a musu du wan sani di prenspari moro na ofrandi di a ben o tyari gi Yehovah. Yesus taki krin: „Go meki en bun nanga yu brada fosi.”

11. Fruteri san Yakob du fu meki en bun baka nanga Esau.

¹¹ Wi kan leri wan sani te wi e luku san pasa wan leisi nanga Yakob. Baka di Yakob gowe libi a kondre fu en sowan 20 yari, Gado seni wan engel go na en fu taigi en taki a musu drai go baka na oso (Gen. 31:11, 13, 38). Ma wan problema ben de. En bigi brada Esau ben wani kiri en (Gen. 27:41). Yakob ben ’frede srefisrefi èn a ben e bruya’ fu di a ben e denki taki en brada ati ben e bron ete nanga en (Gen. 32:7). San Yakob du fu meki en bun baka nanga en brada? A fosi sani di a du na taki a begi Yehovah fayafaya. Baka dati a seni wani bigi kado gi Esau (Gen. 32:9-15). Te fu kaba, di en nanga en brada miti, Yakob fosi gi Esau grani fu di a boigi gi en. A no wán noso tu leisi nomo a du disi, ma a du en seibi leisi! Fu di Yakob ben abi sakafasi èn a ben sori lespeki gi en brada, meki a ben man meki en bun baka nanga en.​—Gen. 33:3, 4.

12. San wi kan leri fu na eksempre fu Yakob?

¹² San wi kan leri fu a fasi fa Yakob sreka ensrefi fu miti en brada Esau èn a fasi fa a waka go miti en? Yakob ben sori sakafasi èn a ben aksi Yehovah fosi fu yepi en. Baka dati a du san a aksi na ini begi èn a du muiti fu meki sani kon bun nanga en brada. Di den tu brada miti, Yakob no haritaki nanga Esau fu luku suma ben abi leti. A wan-enkri sani di Yakob ben wani, na fu meki en bun baka nanga en brada. Fa wi kan teki na eksempre fu Yakob?

13-14. San wi musu du efu wi hati a firi fu wi brada noso sisa?

¹³ Efu wi e waka na tapu a pasi di e tyari sma go na libi, dan wi musu meki muiti fu libi bun nanga wi brada nanga sisa (Rom. 12:18). San wi musu du te wi sabi taki wi du wan sani di hati wan trawan? Wi musu du leki Yakob èn begi Yehovah  fayafaya. Wi kan aksi en fu blesi a muiti di wi o meki fu kon bun baka nanga wi brada.

¹⁴ Wi musu teki ten tu fu ondrosuku wisrefi. Wi kan aksi wisrefi: ’Mi wani meki muiti fu sori sakafasi èn aksi a sma pardon? Mi wani meki en bun baka nanga en? Fa Yehovah nanga Yesus o firi te mi fosi e bigin du wan sani fu kon bun baka nanga mi brada noso sisa?’ A piki tapu den aksi disi o yepi wi fu du san Yesus leri wi èn wi o sori sakafasi te wi e go meki en bun baka nanga wi brada. Meki wi teki na eksempre fu Yakob.

15. Fa a rai na Efeisesma 4:2, 3 kan yepi wi fu meki en bun baka nanga wi brada?

¹⁵ Fa sani ben o waka efu Yakob ben sori bigimemre di a miti en brada? Kande sani no bun o waka bun. Te wi e go taki nanga wi brada fu lusu wan trobi, dan wi musu sori sakafasi. (Leisi Efeisesma 4:2, 3.) Odo 18:19 e taki: „A moro makriki fu teki wan foto abra, leki fu kowru na atibron fu wan mati. Yu abi trobi di de leki a bowtu di e sroto wan portu fu wan fortresi.” Te wi e sori sakafasi èn wi e aksi pardon, dan dati o yepi wi fu meki en bun baka nanga trawan.

16. San wi musu hori na prakseri èn fu san ede?

¹⁶ Wi musu denki bun tu fosi wi go taki nanga wi brada. Luku san yu o taigi en èn fa yu o taki en. Hori na prakseri taki yu wani taki nanga en fu meki en bun baka nanga en èn fu a no mandi moro. Kande a o taki sani di no switi fu yere. Den sani di a e taki kan meki yu ati bron noso den kan meki yu haritaki nanga en fu sori taki a fowtu no de na yu. Ma yu denki taki disi o yepi yu fu kon bun baka nanga en? Nôno. No frigiti taki a moro prenspari fu meki en bun baka nanga yu brada, leki fu luku suma fowtu.​—1 Kor. 6:7.

17. San wi kan leri te wi e luku na eksempre fu Gilbert?

¹⁷ Wan brada di nen Gilbert e du ala san a man fu libi bun nanga trawan. A taki: „Mi nanga wan krosibei famiriman fu mi no ben feni en nanga makandra srefisrefi. Moro leki tu yari mi meki muiti fu taki nanga en nanga wan krin ati èn na wan rustig fasi fu di mi ben wani meki en bun baka nanga en.” San  moro Gilbert du? „Fosi mi go taki nanga a famiriman disi, mi begi fosi èn mi sreka misrefi san mi ben o du efu a no ben o taki switi nanga mi. Mi ben musu de klariklari fu gi en pardon. Mi si tu taki mi no ben musu hori nomonomo taki na mi abi leti. Mi kon frustan taki a moro prenspari sani na fu meki en bun baka nanga en.” San ben de a bakapisi? Gilbert taki: „Now mi e firi bun fu di mi nanga ala mi famiri e libi bun nanga makandra.”

18-19. San wi musu du te wi hati den firi fu wan sma èn fu san ede?

¹⁸ Sobun, san musu de a moro prenspari sani gi wi te wi si taki wi du noso taki wan sani di hati wi brada noso sisa? Meki en bun baka nanga en leki fa Yesus leri wi. Taki nanga Yehovah fu a tori èn meki en santa yeye yepi yu so taki yu kan libi bun nanga trawan. Te yu du disi, yu o firi koloku fu di yu sabi taki yu du san Yesus leri wi.​—Mat. 5:9.

¹⁹ Wi breiti taki nanga yepi fu Yesus Krestes, na „ede fu a gemeente”, Yehovah e sori wi fa wi musu libi nanga makandra (Ef. 5:23). Meki wi du ala san wi man fu „arki en”, leki fa den apostel Petrus, Yakobus nanga Yohanes du (Mat. 17:5). Wi si san wi kan du fu kon bun baka nanga wan brada noso sisa di mandi nanga wi fu di wi ben hati en firi. Te wi e arki Yesus èn wi e tan na tapu a pasi di e tyari gi wi go na libi, dan wi o kisi furu blesi now, èn na ini a ten di e kon sani o waka bun nanga wi fu têgo.