1-2. (a) Mwari akabvunzei aphostori atatu, uye awona akamuzwira here? (b) Ngazvipi zvaticaona mu fundo ino?

MUMASURE me Phaskwa mu gore ra 32 K.A., aphostori Pedru Tiyago na Juau, akaona ciro cinoshamisa. Awona ainga pa dunhu rakareba pamweni rainga Dunhu ra Herimoni, Djesu akacinjwa pa mberi pawo. Bhaibheri rinoti: “Ciso cake caidjeka hingana zuwa, uye macira ake ekunza akadjeka hinga ruvheneko.” (Mt. 17:1-4). Cioneso ici cisati capera, awona akazwa izwi ra Mwari reciti: “Uyu ndiye Mwana wangu, anodiwa, wandapfarira. Mupurutanei.” (Mt. 17:5) Aphostori atatu aya, akaita izvona kamare mu upenyu wawo wese we zuwa ne zuwa. Isusu tinodawo kuteedzera muezaniso wawo.

² Mu fundo yakadarika, takaona kuti kupurutana izwi ra Djesu kunobatanidza kuima kuita zviro zvimweni. Uye mu fundo ino, ticafunda zviro zviiri zvakabhuiwa na Djesu zvatinodikana kuita.

3. Maererano na Mateu 7:13, 14, tinodikana kuitei?

³ Erengai Mateu 7:13, 14. Djesu akareketa nge zve misuo miiri yakasiyana, musuo umwe na umwe waienda ku gwanza. Gwanza rimwe rainga “rakapamhama” uye rimwe rainga “rakatetepa.” Akuna gwanza rocitatu. Makwanza mairi basi. Uye umwe na umwe wedu anodikana kusanangura kuti ngaripi gwanza raanosanangura kuhamba ndiro. Icona cisananguro cinokhosa catinodikana kuita—ngekuti upenyu wedu usikaperi unotsamira pa cisananguro icona.

4. Gwanza “rakapamhama” rakagara kudini?

⁴ Tinodikana kuedzurira kuti makwanza mairi aya akasiyana maningi. Anhu akawanda anosanangura kuhamba mu gwanza “rakapamhama” ngekuti zviri nyore kuhamba ndirona. Zvinotsukwarisa  kuti anhu akawanda ari kuhamba ne gwanza irona, eciita zvinoizwa ne anhu ajinji. Asi awona aasati azvibata kuti gwanza irona ngera Sathani uye kuti mugumisiro wakhona ndi umwe basi, rufu.—1Ako. 6:9, 10; 1Ju. 5:19.

5. Anhu akawanda akaitei kuti agumire gwanza “rakatetepa” uye kuti ahambe naro?

⁵ Asi gwanza “rakatetepa” rakasiyana maningi ne gwanza “rakapamhama,” uye Djesu akareketa kuti anhu padoko basi ndiwona aizohamba mu gwanza irona. Asi ngei? Nge ndaa ye aphorofiti e kunyepa. Ndiyo ngwadzo iyona kamare yakapasa Djesu ateeri ake pana Mateu 7:15. Amweni anoti kuno mamirionji e magereja akasiyana-siyana anoreketa kuti anofundisa cokwadi. Nge ndaa yazvo, mamirionji e anhu anopedzesera asiya kupsvaka gereja recokwadi, zvoita kuti agare ne mibvunzo yakawanda pa zviya zvinofundiswa ne magereja. Asi zvinobvira kugumira gwanza rinoendesa ku upenyu usikaperi. Djesu akati: “Kana mukarumbwa muri mu soko rangu, mucagara afundi angu e zvirokwazvo, uye cokwadi cicamusudzunura.” (Ju. 8:31, 32) Kana makagumira gwanza recokwadi uye mashinga kusama kuita zvinoizwa ne anhu akawanda tinoti makorokoto. Makanyasa kufunda Bhaibheri, makafunda zvinoda Mwari, uye makatanga kupurutana izwi ra Djesu. Nge muezaniso, makafunda kuti Djehovha anoetsera kuti murambe fundiso dze magereja ekunyepa uye kuti musabatanidzwe pa maferiadho asikatenderhwi ne Bhaibheri. Zvezvirokwazvo makazwisisa kuti kusiya zviro izvona uye kuita zvinoda Djehovha azviripi nyore. (Mt. 10:34-36) Pamweni zvainga zvisiripi nyore kuita cinjo dzimweni. Kunyazi zvakadaro amuzi kuremba, ngekuti munoda Baba enyu Djehovha uye kupfadza mwoyo wawo. Zvezvirokwazvo Djehovha acadada na imwimwi!—Zvie. 27:11.

6. Maererano na Pisarema 119:9, 10, 45, 133, ngazvipi zvingatibetsera kuti tirumbwe tecihamba mu gwanza rakatetepa?

⁶ Rangarirai muezaniso unoteera. Makwanza amweni akatetepa anopinda ne mbuto dzimweni dzakakwirira hingana matunhu anoseenzesa ukutira unodziirira mutekenyi, kudai pasina ukutira iwona mutekenyi waizobuda mu gwanza uye ombwera. Ndiyo ndaa, apana munhu ungakwanisa kureketa kuti ukutira iwona uri kumupingaidza pa rhwendo rake! Nge mushobo umwewo mitemo ya Djehovha yatinogumira mu Bhaibheri inoseenza hingana ukutira iwona. Iwona unoseenza hingana cidziiriro uye unotibetsa kuti tirumbwe tecihamba mugwanza rakatetepa.—Erengai Pisarema 119:9, 10, 45, 133.

7. Ngei madjaha asikadikani kurangarira kuti kuhamba mugwanza rakatetepa kunoadzwinyirira?

⁷ Kana muri djaha, munosozwa kuti mitemo ya Djehovha yakanyanyisa uye aimusii meciita zvamunoda here? Sathani unoda kuti murangarire kudaro. Iyena unoda kuti murangarire kuti zvirinani kuhamba mu gwanza rakapamhama rinohambwa ne anhu ese eciita zviro zvaanoda, iyena unoda kuti murangarire kuti amuripi kukhorovhera zvakanaka mu upenyu, unoseenzesa amunofunda nawo kucikora, internet kuti murangarire kudaro. Sathani unoda kuti murangarire kuti kuseenzera Djehovha kurikupingaidza upenyu wenyu. * Asi edzurirai kuti: Sathani aadi  kuti muzie mugumisiro uripo kana mukahamba ne gwanza irona. Djehovha anoda kuti muone upenyu unopfadza wamucagara nawo kana mukarumbwa mecihamba mugwanza re upenyu.—Pis. 37:29; Isa. 35:5, 6; 65:21-23.

8. Madjaha anofundei ne zvakaitika na Olaf?

⁸ Onai zvakaitika ku hama inozwi Olaf. * Adoni ake e ku cikora aimubambidzira kuti aite zve pamaponde ne asikana e pa cikorepo. Paakapanganidza kuti wainga Mupupuri wa Djehovha uye kuti anorarama maererano ne zvinofundiswa ne Bhaibheri asikana anganani aaifunda nawo akaita zviri zvese kuti aone mukana wekuita naye zvepamaponde. Asi Olaf wakarumbwa akagondeka uye aazi kunyiswa ne muedzo iwona. Asi wakasongana ne miedzo yakawanda. Olaf unoti: “Afundisi angu akandibambidzira kuti ndiite faculdade ngekuti zvaizoita kuti ndireremedzwe uye ndaizogara munhu arinani mu upenyu.” Cinyi cakabetsera Olaf kuti akunde zvese izvi? Iyena unoti: “Ndakatanga kuita  ushamwari wakawanda ne hama dze mu ungano. Idzona dzainga mhuri kandiri. Uyewo ndakatanga kunyasa kufunda Bhaibheri. Pese pandairumbwa ndecifunda, ndaitunhudzira rugondo rangu rokuti ndagumira cokwadi. Ndiyo ndaa, ndakashinga kuti ndirumbwe ndeciseenzera Djehovha.”

9. Ngazvipi zvatinodikana kuita kuti tirumbwe tiri mugwanza rakatetepa?

⁹ Sathani anoda kuti mubude mugwanza rinoenda ku upenyu, uye motanga kuhamba mugwanza rinosanangurhwa ne anhu akawanda, gwanza rakapamhama, “rinoendesa kooparadzwa.” (Mt. 7:13) Asi isusu takashinga kurumbwa tecizwira izwi ra Djesu uye tecihamba mugwanza rakatetepa rinoseenza katiri hingana cidziiriro. Ngatione ciro cimweni cakabhuiwa na Djesu catinodikana kuita.

10. Maererano na Mateu 5:23, 24, Djesu akati tinodikana kuitei?

¹⁰ Erengai Mateu 5:23, 24. Mu tsamba iyi Djesu anobhuya zviro zvinokosha ku Adjudha. Edzai kurangarira munhu uri pa tempro kuti apase mu pristi cinyama cekubaira. Asi pedzepo unorangarira kuti pano hama imweni yakagumbuka nge ndaa yake, unosiya cinyama pamuceto “oenda koopsvaka” hama iyona. Ngei iyena waita izvona? Ngekuti painga pano ciro cinokosha kupinda kupira cinyama kuna Djehovha. Djesu akati: “Tangai maita runyararo ne hama yenyu.”

11. Djakobo akaitei kuti agare mu runyararo ne hama yake?

¹¹ Zvakaitika mu upenyu wa Djakobo zvingatifundisa zvatingaita kuti tigare ne runyararo. Mumasure mekupedza makore 20 arikure ne kaainga abarirhwa, Djehovha akaseenzesa ngirozi kuti ibvunze Djakobo kuti ahwirire ikona. (Ge. 31:11, 13, 38) Asi painga ne cinetso. Hama yake Isau, wainga ecida kuuraya Djakobo. (Ge. 27:41) Djakobo “wakanetseka maningi” ecirangarira kuti hama yake yainga iciri no bundu naye. (Ge. 32:7) Djakobo akakwanisa kudini garazve murunyararo ne hama yake? Cokutanga iyena wakanamata kuna Djehovha. Pedzepo wakatuma zviro kuna Isau. (Ge. 32:9-15) Pakupedzesera iyena wakasongana na Isau uye wakamupa rukudzo. Djakobo wakagodama pamberi pa Isau—haiwa kamwe basi, asi kanomwe! Djakobo wakakwanisa kugarazve ne runyararo ne hama yake nge kuti wakadzidodosa.—Ge. 33:3, 4.

12. Tingafundei ne muezaniso wa Djakobo?

¹² Tinofunda fundo inokosha pa zvakaitika na Djakobo kuti agare murunyararo ne hama yake. Djakobo wakadzidodosa uye wakakumbira rubetso ra Djehovha. Pedzepo Djakobo wakaita dii rake, wakaita zviri zvese kuti paaizosongana ne hama yake zvizoahambire zvakanaka. Paakasongana na Isau, Djakobo aazi kureketa kuti ndiyani wainga no ndaa. Djakobo waida kuti agarezve murunyararo ne hama yake. Ici ndico cainga ciri cinangwa na Djakobo. Isusu tingateedzera kudini muezaniso wa Djakobo?

13-14. Tinodikana kuitei kana takaita ciro cakagumbura hama yedu?

¹³ Kana tecida kurumbwa tecihamba mugwanza re upenyu, tinodikana kugara murunyararo ne hama dzedu. (Aro. 12:18) Asi kana takaita ciro cakagubura hama imweni tinodikana kuitei? Teciteedzera muezaniso wa Djakobo tinodikana kunamata kuna Djehovha. Tingakwanisa kukumbira Djehovha kuti atibetsere kuti tigarezve ne runyararo ne hama yedu.

 ¹⁴ Tinodikana kutora nguwa kuti tirangarire mibvunzo inoti: ‘Ndakagadzirira kusiya kudzikudza, ndogara munhu anodzidodosa ndokumbira rurekerero uye ndoita kuti pagare ne runyararo? Djehovha na Djesu acandiona kudini paacandiona ndecitora danho rekutanga kuti ndiite kuti ndigare ne runyararo ne hama kana hanzvadzi yangu?’ Kutora nguwa tecirangarira izvona zvicatipasa simba rokuti tipurutane izwi ra Djesu rokugara munhu anodzidodosa uye topsvaka hama yedu kuti pagare ne runyararo. Kana tikadaro ticakwanisa kuteedzera muezaniso wa Djakobo.

15. Aefeso 4:2, 3 ingatibetsera kudini kuti tigare murunyararo ne hama yedu?

¹⁵ Makamboedza kurangarira zvaizoitika kudai Djakobo akadzikudza paakasongana na Isau! Zvezvirokwazvo hingana zvisikazi kuhamba nge mwazvo. Patinoenda kogadzirisa zviro ne hama yedu, tinodikana kudzidodasa. (Erengai Aefeso 4:2, 3.) Zvierengo 18:19 inoti: “Hama inonga yashaishirhwa zvinonetsa kureketa nayo kudarika kurhwisa thaundi rakatenderedzwa ne ukutira.” Kufungura muromo tecikumbira rurekerero zvingakwanisa kufungura makandeado e “ukutira.”

16. Tinodikana kurangarireizve patinoenda kooita runyararo ne hama yedu, uye ngei?

¹⁶ Tinodikana kunyasa kurangarira zviro zvatinodikana kureketa ku hama yedu, uye kuti ticazvireketa nge mushobo upi. Kana tikaona kuti tanyasa kugadzirira tinodikana kupsvaka hama yedu yagumbuka toedza kuita zviri zvese kuti iyona igarezve shamwari yedu. Zvingaita kuti mukutanga ingareketa masoko atisikapfariri, pa nguwa iyona zviri nyore kuti tinyangadzwe totanga kudzidziirira, asi kuita kudaro akubetseri. Edzurirai kuti kugarazve murunyararo ne hama yenyu ciro cinokosha kudarika kurangarira kuti ndiyani ane ndaa.—1Ako. 6:7.

17. Mungafundei ne muezaniso wa Gilbert?

¹⁷ Hama inozwi Gilbert yaidikana kupeta masimba ari ese kuti igarezve ne runyararo. Iyona yakati: “Ndainga ndisikazwirani ne mwana wangu, ndakapedza makore mairi ndecireketa naye nge mushobo wakanaka uye kuti tigarezve ne runyararo.” Iyona yakaiteizve? “Pese pandaida koreketa ne mwana wangu ndaitanga ndaita munamato. Ndaigadzirira mundangariro mangu kuti ndikwanise kuzodzibata paya pandaizodairhwa ne maguro.  Ndaiziya kuti ndaidikana kugara ndakagadzirira kurekerera. Ndakafundira kuti zvainga zvisikabetseri kupsvaka kuti ndiyani ano ndaa, ndakazwisisa kuti caidikana rainga runyararo.” Iyena unoti: “Nyamasi ndinozwa kuti ndiri murunyararo ngekuti ndinonyasa kuzwirana ne mhuri yangu yese.”

18-19. Kana tikaona kuti tagumbura hama, tinodikana kushinga kuitei uye ngei?

¹⁸ Kana tikaziya kuti pano hama yatarhwadzisa, tinodikana kuitei? Seenzesai zano ra Djesu uye itai kuti pagare ne runyararo. Reketai na Djehovha ngezvazvo uye gondai rubetso re mwiya mucena kuti murumbwe muno runyararo. Kana mukaita izvona mucakwanisa kugara makapfara uye mucapangidza kuti muri kupurutana izwi ra Djesu.—Mt. 5:9.

¹⁹ Zvinotipfadza kuziya kuti Djehovha ne rudo rake anoseenzesa Djesu Kristu “musoro we ungano,” kuti atitungamirire mu upenyu. (Aef. 5:23) Tinodikana kushinga kurumwa “tecimupurutana,” hingana zvakaizva na muphostori Pedru, Tiyago uye na Juau. (Mt. 17:5) Tafunda kuti ngazvipi zvatinodikana kuita kuti tigadzirise runyararo ne hama yedu. Kana tikazviita uye torumbwa tecihamba mugwanza rakatetepa rinoendesa ku upenyu tinokwanisa kupfara zvinoku uye ticagara ne mupfaro usikaperi muno ramagwana.