1, 2. а) Иегова Иисустуң үш элчининге чүнү дужааган база олар ону канчаар күүсеткен? б) Бо статьяга чүнү сайгарар бис?

 БИСТИҢ эраның 32 чылда Беженги хүннүң байырлалының соонда, Иаков, Иоанн, болгаш Пётр Иисус-биле кады бедик дагже үне бергеннер (Ермон дагның бир адыры чадавас). Олар аңаа кайгамчык көстүүшкүн көрген! Аңаа «олар көрүп турда, Ооң [Иисустуң] хевир-шырайы өскерли берген: арны хүн дег чырып, а хеви чырыктан өңгүр апарган» (Мф. 17:1—4). Ооң соонда олар: «Бо дээрге Мээң ханы ынак Оглум-дур! Ол Мээң сеткилимге кирер-дир! Ону дыңнап чоруңар!» дээн Бурганның үнүн дыңнап кааннар (Мф. 17:5). Ол үш элчин чуртталгазы-биле Иисусту херек кырында дыңнап чораанын көргүскен. Бис база оларны өттүнүксеп турар бис.

² Бо ийи статьяга бис Иисусту дыңнаары дээрге чүл ол дээрзин сайгарып турар бис. Мурнунда статьядан чүнү кылбас ужурлуувусту көрген бис. А бо статьяга Иисустуң биске кылыңар дээш берген ийи айтыышкынын көөр бис.

3. Матфей 7:13, 14-тен алырга, чүнү канчаар ужурлуг бис?

³ Номчуптуңар: Матфей 7:13, 14. Эскерип көрүңер даан, Иисус чүгле ийи орук бар деп чугаалаан: тар эжик — кызаа орукче, а алгыг эжик — делгем орукче чедирер. Ында үш дугаар орук чок. Ынчангаш кайы орук-биле чоруурун боттарывыс шиитпирлээр бис. Ол шиитпирден мөңге чурттаар-чурттавазывыс хамааржыр.

4. Делгем орук кандыгыл? Тайылбырлаптыңар.

⁴ Ол ийи оруктуң чүзү-биле ылгалып турарын тодарадып алыры эргежок чугула. Делгем орук-биле чорууру белен  боорга, ону хөй улус шилип ап турар. Хомуданчыг чүүл, улустуң хөй кезии ону көргеш, база ол орук-биле бар чыдар. Ынчалза-даа олар ол орукту Эрлик белеткеп каан база ооң төнчүзү өлүм деп билбейн турарлар (1 Кор. 6:9, 10; 1 Ин. 5:19).

5. Чамдык улус кызаа орукту тып алгаш, ооң-биле чоруур дээш кандыг өскерлиишкиннерни кылган?

⁵ Делгем орукка бодаарга, өске орук — кызаа. Ону тып чедип кээр улус эвээш деп, Иисус чугаалаан. Чүге ындыг бооп турар? Солун чүүл, дараазында шүлүкте Иисус меге медээчилерден кичээниңер деп бодунуң эдерикчилерин сагындырган (Мф. 7:15). Шынап-ла, амгы үеде шажыннарның саны муң-муң чеде берген. Оларның барык шуптузу алыс шынга өөредип турар бис дижир. Бот-боттарынга чөрүшкек өөредиглерниң хөйүнден миллион-миллион кижилер аайын тыппайн, амыдыралга чедирер орукту дилээрин безин оралдашпайн турар. Ынчалза-даа ол орукту тып ап болур. Иисус мынча дээн: «Силер Мээң өөредиим ёзугаар чурттаар болзуңарза, Мээң ёзулуг өөреникчилерим болур силер. Ынчан алыс шынны билип алыр силер — оон ол шын силерни хостуг кылып каар» (Ин. 8:31, 32). Силер хөй улусту эдербейн, алыс шынны кызып дилеп турганыңар дээш, макталга төлептиг силер. Бурганның негелделерин билип алыр дээш, Ооң Сөзүн ханы шинчилеп, Иисустуң өөредиглерин дыңнап эгелээн силер. Оон аңгыда, меге шажындан укталган байырлалдар болгаш чаңчылдар Иеговага таарышпас деп билип кааш, адырлып алган силер (Мф. 10:34—36). Ону кылыры силерге белен эвес болган чадавас. Ынчалза-даа дээрде Адаңарга ынак болгаш база Ону өөртүр дээш, ону кылып шыдаан силер. Иегова силерге дыка чоргаарланып турар! (У. ч. 27:11).

6. Кызаа орук-биле улаштыр чоруурунга биске чүү дузалаар? (Ырлар 118:9, 10, 133).

⁶ Мөңге амыдыралга чедирер кызаа орук-биле улаштыр чоруурунга биске чүү дузалаар? Бир чижектен көрүптээлиңер. Даглыг, кызаа, дыйлагар, үргүлчү ээр орукка машиналар кыдыынче чоокшулап азы кээп дүшпезин дээш, оруктуң кыдыын херимнеп каар. Ол херим чолаачыларның амы-тынын камгалап турар. Кандыг-даа чолаачы: «Анчыын, бо херимни чүге тургузуп каан чүвел?» деп кажан-даа чугаалавас болгай. Библияда Иегованың негелделери база шак ындыг херимге дөмей. Олар биске кызаа оруктан үнмейн, амы-тынывысты камгалаарынга дузалап турар. (Номчуптуңар: Ырлар 118:9, 10, 133.)

7. Кызаа орук аныяктарны кызагдап турар бе? Тайылбырлаптыңар.

⁷ Оолдар-кыстар, Иегованың негелделери силерни кызагдап турар ышкаш кылдыр сагындырар-дыр бе? Эрлик силерни шак ынчаар бодаарыңарны күзеп турар. Алгыг орук-биле бар чыдар улустуң чуртталгазы солун болгаш аянныг, олар үени дыка эки эрттирип турар ышкаш сагындырар. А силерниң чуртталгаңар чалгааранчыг деп бодаарыңарны ол күзеп турар. Чаңгысклассчыларыңар азы интернет таварыштыр Эрлик силерни бир-ле чүүлден чыдып калган мен деп бодай бээр кылдыр бүзүредиксеп турар. Иегованың негелделери силерге сеткил ханып, солун чурттаарынга шаптыктап турар деп бодаарыңарны ол күзеп турар *. Ынчалза-даа мону утпаңар: алгыг орук-биле  бар чыдар улусту сөөлүнде чүү манап турарын Эрлик чажырып турар. А Иегова мөңге чуртталгаже чедирер орук-биле бар чыдар улусту канчаар йөрээрин ажыы-биле чугаалап турар (Ыд. ыр. 36:29; Иса. 35:5, 6; 65:21—23).

8. Олафтың чижээнден аныяктар чүнү өөренип ап болур?

⁸ Олаф * дээр дуңмавыстың онзагай чижээн көрээлиңер. Ооң-биле кады өөренип турган кыстар ону эр-херээжен чорук кылырынче албадап турган. Ынчалза-даа Олаф библейжи бедик мөзү-шынарлыг дүрүмнер-биле чурттап турарын чугаалаарга-даа, кезек уруглар харын-даа амырап, олче оон-даа артык туралап эгелээн. Ынчалза-даа ол, хая дег, шимчеш дивээн. Оон ыңай ол база бир өске шенелдеге таварышкан. Олаф үлешкен: «Башкыларым мени институтче кирип алыр кылдыр көгүдүп турган. Чедиишкин оон хамааржыр база ол чокта бо чуртталгага чүнү-даа чедип албас сен деп турганнар». Ынчалза-даа Олафка дүжүп бербезинге чүү дузалаан? Ол улаштырган: «Мен чыыштан эки  эш-өөрнү тып алган мен. Олар меңээ кады төрээннерим дег апарган. Оон ыңай Библияны хууда өөрениринге шыңгыы хамаарылгалыг апарган мен. Ону ханы шинчилээн тудум, ооң алыс шыныынга бүзүрелим дам быжыккан. Ынчангаш сугга суктуруп алгаш, Иегованың Херечизи болур деп шиитпирлеп алган мен».

9. Кызаа оруктан чандыр баспазынга биске чүү дузалаар?

⁹ Эрлик силерни мөңге амыдыралга чедирер кызаа орук-биле чорууруңарны күзевейн турар. Ынчангаш ол хөй улустуң дорт өлүмче бар чыдар алгыг орукче силерни көгүдүп аарын кызып турар (Мф. 7:13). Иисусту дыңнап, кызаа орук бисти хөй айыылдардан камгалаар деп билип турар болзувусса, ол оруктан черле чандыр баспас бис. Ам Иисустуң берген база бир айтыышкынын көргеш, чүнү канчаар ужурлуувусту билип алыылыңар.

10. Иисустуң сөстеринден алырга, чүнү канчаар ужурлуг бис? (Матфей 5:23, 24).

¹⁰ Номчуптуңар: Матфей 5:23, 24. Мында Иисус иудейлерниң эки билир байдалын чугаалап берген. Сагыштаалап көрүңер даан: еврей эр кижи Бурганның өргээзинге өргүлге бээр дээн малын эккелгеш, өргээ бараалгакчызынга бээр деп турар. Ынчалза-даа ындыг харыысалгалыг үеде ооң чоок кижизи олче хомудай берген деп чүүлдү ол сактып келген. Ол малын аңаа арттырып кааш, чоруптар ужурлуг. Чүге? Иеговага өргүл эккээринден артык чугула чүүл бар бооп турары ол бе? Ийе. Иисус аңаа хамаарыштыр: «Баштай ол кижи-биле барып эптежип ал» деп дорту-биле чугаалаан.

11. Иаков акызы Исав-биле эптежип аар дээш, чүнү кылган?

¹¹ Канчаар эптежип алырының үлегерин Иаков өгбениң чуртталгазында болган таварылгадан көрүп болур бис. Ол өске черге 20 хире чыл чурттаан соонда, Бурган аңаа «бодуңнуң төрээн чериңче чана бер» деп дужааган (Э. д. 31:11, 13, 38). Ынчалзажок Иаковка ону кылыры берге турган. Чүге дээрге бир шагда Исав ону өлүрерин кыжанып турган болгай (Э. д. 27:41). Олар удавас ужуражып кээр деп билип кааш, «Иаков аажок коргуп, девидей берген» (Э. д. 32:7). Исав олче ам-даа хорадап турар деп бодааш, ол коргуп-сүртеп турган. Иаков акызы-биле эптежип аар дээш, чүнү кылган? Иаков дүвүрелдерин Иеговага чугаалааш, сеткилинден мөргээн. Ооң соонда элбек белектерни Исавче чоргузупкан (Э. д. 32:9—15). А кажан олар ужуражып кээрге, Иаков Исавка ханы хүндүткел көргүзүп, аңаа чаңгыс катап эвес, а мырыңай чеди катап черге чедир мөгейген! Шак ындыг биче сеткил болгаш хүндүткел Иаковка акызы-биле эптежип алырынга дузалаан (Э. д. 33:3, 4).

12. Иаковтуң чижээнден чүнү өөренип ап болур бис?

¹² Акызы-биле ужуражыр дээш, Иаковтуң канчаар белеткенип турганындан база аңаа ужуражып келгеш, канчаар алдынып турганындан хөй чүүлге өөренип ап болур бис. Иаков эгезинде биче сеткилдии-биле Иеговадан дузаны дилээн. А соонда ол бодунуң мөргүлүнүң аайы-биле алдынып, акызының чүрээн чымчадып аар дээш, мурнай белектерни чоргузупкан. А кажан олар ужуражып кээрге, Иаков бодунуң шынын бадыткап, маргышпаан. Чүге? Чүге дээрге ол акызы-биле эптежип алыр сорулгалыг турган. Иаковтуң чижээн канчаар өттүнүп болур бис?

13, 14. Чыышта акывысты азы угбавысты хомудадыпкан болзувусса, чүнү канчаар ужурлуг бис?

¹³ Мөңге амыдыралче чедирер оруктан чандыр баспас дизивиссе, ол орукта кады  бар чыдар улус-биле эп-найыралдыг болуру чугула (Рим. 12:18). А бир эвес чыышта акывысты азы угбавысты хомудадыпкан болзувусса канчаар? Эгезинде Иаковту өттүнүп, Иегова биске эптежип алырынга дузалаар кылдыр, сеткиливистиң ханызындан мөргүүр болзувусса эки.

¹⁴ Оон ыңай үени үндүрүп, бодувустан: «Мен бодумну томаартып, өршээлди биче сеткилдиг дилеп, эптежип алырынга белен мен бе? Бир эвес мен хомудадыпкан акымга азы угбамга биче сеткилдии-биле бир дугаар чеде бээр болзумза, Иегова биле Иисус чүнү миннир?» Ол болгаш өске-даа айтырыгларның дугайында эки боданыр болзувусса, Иисустуң айытканы ышкаш алдынар бис. Аңаа хамаарыштыр Иаков биске база-ла эки үлегерни көргүскен.

15. Эфесчилерге 4:2, 3-те дүрүм акывыс азы угбавыс-биле эптежип алырынга биске канчаар дузалаар?

¹⁵ Бир эвес Иаков Исав-биле ужуражып келгеш, «сен буруулуг сен, а мен актыг мен» дээш маргыжып эгелээн болза, чүү бооп болур турган? Ол ужуражылга эки төнмес турган. Моон чүнү өөренип ап болур бис? Акывыс азы угбавыс-биле эптежип алырының мурнунда бодувусту томаартып алыр болзувусса эки. (Номчуптуңар: Эфесчилерге 4:2, 3.) Чугаалар 18:20-де: «Хомудаан ха-дуңмаң — быжыг шивээ-ле; алгыш-кырыш — шивээ хаалгазының дээктери-ле» — дээн. Биче сеткилдии-биле «Мени өршээп көрем!» деп чугаалаан сөстер шивээниң хаалгазынга дүлгүүр дег болур.

16. Чүнүң дугайында боданыр болзувусса эки база чүге?

¹⁶ Оон аңгыда, чүнү база канчаар чугаалаарының дугайында эки боданып алыры чугула. Чүгле ооң соонда хомудай берген кижи-биле чугаалажып баар болза эки. Чүге дизе бистиң сорулгавыс — аңаа хомудалындан адырлып алырынга дузалаары болгай. Ооң чугаалаан чамдык сөстеринге чөпшээрешпес чадавас силер. Ол байдалда хорадай берип азы бодун агартынып эгелээр айыыл бар. Ынчалза-даа ол бүгү кижи-биле эптежип алырынга дузалаар бе? Буруулуг кижини дилээриниң орнунга, ха-дуңмавыс-биле эптежип алыры чүден артык чугула деп сактып чоруулуңар (1 Кор. 6:7).

17. Жильберден чүнү өөренип ап болур?

¹⁷ Жильбер дээр акывыс амыр-тайбың нептередикчизи болурун кызып турар. Ол үлешкен: «Бис уруум-биле бот-боттарывысты  билчип чадап турган бис. Аравыска эки хамаарылганы тургузуп аар дээш, ийи чыл хире ооң-биле ажык болгаш чылыг-чымчак чугаалажырын кызып турган мен». Жильбер оон ыңай чүнү кылган? «Уруум-биле чугаалажырының мурнунда-ла, мөргүп турдум, оон хомуданчыг сөстерни дыңнаарынга база баш удур белеткенип аар турган мен. Мен өршээп өөренип алыр ужурлуг турган мен. Бодумнуң шынымны бадыткап турбайн, өг-бүлемге амыр-тайбыңны катап тургузуп алыры — мээң хүлээлгем деп эки билип турган мен». Бо бүгүнүң түңнели кандыг болган? Жильбер: «Чүрээмде амыр-тайбыңны миннир-дир мен, чүге дээрге шупту чоок улузум-биле эки хамаарылгалыг апарган мен» — деп чугаалаан.

18, 19. Бир кижини хомудадыпкан болзувусса, чүнү канчаар ужурлуг бис база чүге?

¹⁸ Бир кижини хомудадыпканыңарны билип каан болзуңарза, бо статьяны өөренген соонда, канчаар алдынар силер? Иисустуң: «Ол кижи-биле барып эптежип ал» дээн сөстериниң аайы-биле алдыныңар. Оон Иеговага мөргүп, Ооң ыдыктыг сүлдези силерге амыр-тайбың нептередикчизи болурунга албан дузалаар деп чигзинмеңер. Ынчан ёзулуг аас-кежиктиг бооп, Иисусту дыңнап турарыңарны көргүзер силер (Мф. 5:9).

¹⁹ Иегова бисти «ниитилелдиң Бажы» болур Иисус Христос таварыштыр ынакшылдыы-биле удуртуп башкарып турар боорга, өөрүп четтирер-дир бис (Эф. 5:23). Пётр, Иаков болгаш Иоанн элчиннер дег, Иисусту кезээде дыңнаалыңар (Мф. 17:5). Бистиң хүлээлгевис — хомудадыпкан улузувус-биле эптежип алыры деп бо статьядан билип алган бис. Акы-угбалар-биле эп-найыралдыг бооп, мөңге чуртталгага чедирер кызаа орук-биле улаштыр чоруур болзувусса, амгы үеде хөй йөрээлдерни алыр бис, а келир үеде төнчү чок аас-кежиктиг болур бис!