1-2. (a) Cossa che Dio el ga dito che Piero, Tiago e Gioani i gavea de far, e sarà che lori i ga obedio? (b) Cossa ndaremo veder in questo stùdio?

PENA dopo dela Pàscoa del ano 32 dopo de Cristo, i apòstoli Piero, Tiago e Gioani i ga visto una roba de maraveiarse. Quando i era nte un monte, fursi nte un posto del Monte Ermon, lori i ga visto a Gesù e la so fàcia la slusea come el sol e le so robe le slusea come la luce. (Mat. 17:1-4) Vanti de finir questa vision, lori i ga scoltà le parole de Dio: “Questo l’è el me Fiol, el amà. Lu el ga la me aprovassion. Scóltelo.” (Mat. 17:5) I apòstoli i ga obedio a Geovà. Lori i ga sempre scoltà la voce de Gesù nela so vita, e volemo far compagno a lori.

² In quelaltro stùdio, ghemo visto che, se volemo scoltar la voce de Gesù, ghemo de fermarse de far due robe. In questo stùdio, ndaremo veder due robe che Gesù el ga dito che ghemo de far.

3. De acordo con Mateo 7:13, 14, cossa ghemo de far?

³ Ledi Mateo 7:13, 14. * In questo testo, Gesù el ga  parlà che ghen’è la strada streta e la strada larga. Ghen’è sol queste due strade, e noantri ghemo de scòlier una de lore. Se volemo viver par sempre, ghemo de scòlier la strada streta.

4. Come che la ze la strada larga?

⁴ La strada larga la ze tanto difarente dela strada streta. L’è tanto fàcile caminar nela strada larga, ma la ze de Sàtana e la mena ala morte. Ne despiase veder che quasi tute le persone le seita a ndar in questa strada. — 1 Cor. 6:9, 10; 1 Gio. 5:19.

5. Cossa ghemo de far par catar e par seitar a caminar nela strada streta?

⁵ Ma cossa podemo dir sora la strada streta? Gesù el ga dito che pochi i saria boni de catarla parché ghen saria falsi profeti, o sia, le religion false. (Mat. 7:15) Arquante persone le dise che ghen’è miliari de religion, e tute le religion le pensa che le insegna la verità. Par quela, tanti i se ferma de proar catar la vera religion. Ma le parole de Gesù le mostra che le persone le pol catar la strada che la mena ala vita. Lu el ga dito: “Se valtri obedì a quel che mi insegno, sì pròpio me dissìpoli. Cognosseré la verità e la verità la ve libertarà.” (Gioani 8:31, 32) Se te ghè catà questa strada, te sì tanto bravo! Cossa te ghè fato par catarla? Te ghè scominsià a studiar tanto la Bìblia par capir cossa Geovà el vol e par imparar quel che Gesù el ne ga insegnà. Par esémpio, no te ghè pi credesto in quel che le religion false le insegna e no te ghè pi fato le selebrassion sbaliade. Sicuro che no l’è stà fàcile fermarse de far quel che l’è sbalià par obedir a Geovà. (Mat. 10:34-36) Ma te ghè fato questo parché te ami tanto a Geovà e parché te vol assarlo contento. Ricòrdate sempre che Geovà l’è tanto contento con ti! — Pro. 27:11.

6. De acordo col Salmo 119:9, 10, 45, 133, cossa ndarà giutarne a seitar a caminar nela strada streta?

⁶ Cossa che ndarà giutarne a seitar a caminar nela strada streta? I comandamenti de Geovà che i ze nela Bìblia. (Ledi Salmo 119:9, 10, * 45, * 133 *) Vardemo un esémpio che el ne giuta a capir meio questo. Proemo imaginar una strada streta che la va su par i monti. Drio la strada, ghen’è murete che le dà protession a quei che i ze drio viaiar. Cossita, lori no i casca mai fora dela strada. Sicuro che nissun el ndaria dir che le murete le ze lì sol par intrigar.

7. Parché che la strada streta la ze meio che la larga?

⁷ Se te sì gióveno, te pensi che l’è massa fadiga far quel che Geovà el dise e che saria meio esser nela strada larga par far quel che te vol ti? L’è Sàtana che el vol che te pensi cossita. Lu anca el vol che te pensi che servir a Geovà l’è drio  intrigarte de goder la vita. Lu el dopera altri gióveni nela scola e la internet par farte pensar cossita. * Ma ricòrdate che Sàtana no’l vol che te sàpia ndove la strada larga la mena. Ma Geovà el te dise che te gavarè una bela vita se te seiti a caminar nela strada streta. — Sal. 37:29; Isa. 35:5, 6; 65:21-23.

8. Cossa che i gióveni i pol imparar de Olaf?

⁸ Varda quel che ga sucedesto con Olaf. * Altri gióveni nela scola i seitea a dir che el gavea de far sesso. Alora, lu el ghe ga spiegà che el vivea de acordo con quel che dise la Bìblia. Par causa de questo, le tose le ga scominsià a sfidar una l’altra par far sesso con lu. Ma Olaf el ga seità a far quel che l’è giusto. Varda anca nantra roba che el ga infrontà  nela scola. Olaf el ga dito: “I me maestri i ga seità a dirme che me tochea far una università par esser una persona importante.” Cossa che ga giutà Olaf a infrontar questo? Lu el ga dito: “Mi go fato veri amighi nela congregassion e i fradei i era come una fameia par mi. Mi go anca scominsià a studiar de pi la Bìblia, e par causa de questo, ero cada volta pi sicuro che ero drio imparar la verità. Alora, go dessidio servir a Geovà e batesarme.”

9. Cossa ghemo de far se volemo seitar a caminar nela strada streta?

⁹ Sàtana el vol che se fermemo de caminar nela strada streta e scominsiemo a caminar nela strada larga, che la mena ala morte. (Mat. 7:13) Ma, noantri volemo scoltar a Gesù e seitar a caminar nela strada streta, che la ne dà protession. Adesso, ndaremo veder nantra roba che Gesù el ne ga dito de far.

10. De acordo con Mateo 5:23, 24, cossa Gesù el ga dito che ghemo de far?

¹⁰ Ledi Mateo 5:23, 24. * In questo testo, Gesù l’era drio parlar de una roba tanto importante che i giudei i fea par adorar a Geovà. Lori i gavea de ndar al témpio e dar una bèstia al sasserdote come sacrifìssio. Ma se i se ricordesse che ghen’era qualchedun disgustà con lori, ghe tochea assar el sacrifìssio lì, e ndar catarlo. Parché che ghe tochea far questo? Parché Gesù el ga dito che l’è pi importante far la pace con un fradel che far un sacrifìssio a Geovà.

11. Cossa Giacò el ga fato par far la pace col so fradel?

¹¹ Varda cossa Giacò el ga fato par far la pace col so fradel. Quando fea belche 20 ani che Giacò l’era distante dela so tera, Geovà el ga dito par meso de un àngelo che el tornesse indrio. (Gén. 31:11, 13, 38) Ma Giacò l’è restà tanto preocupà e el gavea tanta paura de far questo, parché el pensea che el so fradel, Esaù, lo odiea e el volea coparlo. (Gén. 27:41; 32:7) Alora, cossa Giacò el ga fato par far la pace col so fradel? Prima, lu el ga pregà a Geovà e el ghe ga parlà tuto quel che l’era drio suceder intrà lu e so fradel. Seconda, lu el ga mandà tanti presenti al so fradel. (Gén. 32:9-15) Tersa, quando Giacò l’è ndato catar Esaù, lu lo ga tratà tanto ben e el se ga fin indenocià sete volte davanti de lu. Sicuro che Giacò l’è stà bon de far la pace col so fradel parché l’è stà ùmile e el ghe ga mostrà rispeto. — Gén. 33:3, 4.

12. Cossa podemo imparar col esémpio de Giacò?

¹² Cossa podemo imparar col esémpio de Giacò? Lu l’è stà ùmile e el ga domandà el aiuto de Geovà. Dopo, el ga fato el meio che el podea par far la pace col so fradel. Savemo che questo l’era la roba pi importante par lu parché no’l ga proà mostrar chi che gavea sbalià. Come podemo far compagno a Giacò?

13-14. Cossa ne ocore far se ghemo disgustà a qualchedun?

¹³ Se volemo seitar a caminar nela strada streta, ghemo de viver in pace coi nostri fradei. (Rom. 12:18) Ma  cossa ghemo de far se ghemo disgustà a qualchedun? Ghemo de pregar a Geovà come Giacò el ga fato, e domandarghe che el ne giute a far la pace col nostro fradel.

¹⁴ Cossa pol giutarne a scoltar la voce de Gesù e far la pace col nostro fradel? Ghemo de farse queste domande: ‘Sarà che son ùmile par dirghe che go sbalià e domandarghe scusa? Mi vao far la pace col me fradel de volentiera par assar Geovà e Gesù contenti?’ Se ndemo parlar col fradel par far la pace, saremo drio far come Giacò.

15. Come Efesi 4:2, 3 pol giutarne a far la pace col nostro fradel?

¹⁵ Proa pensar in quel che podaria gaver sucedesto se Giacò el gavesse mostrà orgòlio quando el ga catà Esaù. Fursi Esaù no’l gavaria mia acetà far la pace. Alora, ghemo de esser ùmili quando ndemo domandar scusa al nostro fradel. (Ledi Efesi 4:2, 3. *) Proverbi 18:19 dise che ‘l’è pi fàcile ndar rento una cità che la ga muri intorno che far la pace con una persona che la ze disgustada, e che le barufe le ze come i portoni de una forte tore’. Cossita, esser ùmili e domandar scusa pol giutarne a verder i portoni de questa “tore”.

16. Cossa che ghemo de far vanti de ndar parlar col fradel che ghemo disgustà, e parché?

¹⁶ Vanti de parlar col fradel, ghemo de pensar in cossa ndaremo parlarghe e nela maniera de farlo. Dopo, ghemo de ndar parlar con lu e far tuto quel che podemo par far la pace con lu e par tornar a esser so amigo. Pol esser che el fradel el parle qualcossa che la ne assa disgustadi o inrabiadi e, par causa de questo, fursi voleremo spiegarghe parché ghemo sbalià. Ma, far questo no ndarà giutar. Ghemo de ricordarse che far la pace l’è pi importante che saver chi che ga sbalià. — 1 Cor. 6:7.

17. Cossa te ghè imparà col esémpio de Gilbert?

¹⁷ Un fradel de nome Gilbert el se ga sforsà tanto par far la pace cola so fiola. Lu el ga dito: “Mi e la me fiola no èrino  boni de ndar intesi. Par due ani, go proà far la pace con ela. Tute le volte, mi preghea a Geovà vanti de parlar con ela e mi savea che gavea de perdonarla se la me disesse su. Go imparà che la roba pi importante la ze far la pace e nò capir chi che ga sbalià. Ancoi, son tanto contento parché vivo in pace cola me fameia.”

18-19. Se ghemo disgustà a qualche fradel, cossa ghemo de far, e parché?

¹⁸ Alora, cossa che te ghè de far se te ghè disgustà un fradel? Parla con Geovà sora quel che ga sucedesto e fìdate che el te darà el spìrito santo par giutarte. Dopo, fà la pace col fradel, come Gesù el ga dito. Cossita, te scoltarè a Gesù e te restarè tanto contento. — Mat. 5:9.

¹⁹ Restemo tanto contenti che Geovà el dopera Gesù, che el ga la autorità nela congregassion, par insegnarne. (Efe. 5:23) In questo stùdio, ghemo imparà come podemo far la pace con un fradel che ghemo disgustà e come seitar a caminar nela strada streta. Se se sforsemo par far questo, saremo felici ancoi e par sempre. Alora, volemo far come Piero, Tiago e Gioani, e scoltar a Gesù. — Mat. 17:5.