1-2. (a) Muluku aalenle heeni aatthareli ale araru a Yesu, weera epakeke nave neereke yaahiiwelela? (b) Eheeni ninkelaahu woona yoosomeene yeela?

AVIRAKARU mpasika a 32 E.C., mutthareli Pedru, Yakobe ni Yohani, yaahoona etthu yootikiniha. Vamwaakoni woorakamela musulu, woona wene waari mwaako Hermoni, Yesu aapatxera otxentxa. Biblya onahima weera: “Ekhove awe yàhàrya ntoko nsuwa, sowara sawe sàkhala sottela ntoko warya.” (Math. 17:1-4) Ehinaakuveene omala yooweereya ele, atthu ale araru yaahiiwa nsu wiirimu, nenno neera: “Ola mwan’aka òsiveleyaxa, mwa yowo kinnahakalala’mo: munwiriyaneke.” (Math. 17:5) Atthareli ale araru yaapaka yeele yaarummwaaya, mpaka okhwipi wa okumi aya. Awo yaahoonihera veeli-veeli weera, yannitthara nsu na Yesu, hiyo tho, nintthuneya otthara ntakihero naya.

² Yoosoma yoomalihera, nohoona weera owiriyana nsu na Yesu, ontakansera weemexera opaka itthu. Yoosoma ela, ninkela woona itthu piili seiyo Yesu aahimmaawe nintthuneyaahu weera nipakeke.

3. Moovarihana ni Matheyo 7:13, 14, eheeni nintthuneya ahu weera nipake?

³ Mmusome Matheyo 7:13, 14. Moone ele Yesu aathalinhaawe voohima sa milako miili soovirikana. Yoole ori mutthu aakela othanla mphiro mmoha ni mmoha wa yoowo ti “wookhweya” nave mukina ti “woophureya”. Nohoona weera, khokhanle mphiro mukina wa naararu mene siri misewe miili paahi. Mutthu ti mutthu ahiyo, pooti othanla mphiro heeni onrowaawe ovira. Mene yoothanla eyo tiyootthunneya weera nipake—okhalano ekumi yoohimala onlipa ni hiyo.

4. Mphiro “wookhweya” onnikeliha woowi?

 ⁴ Nihittiwale weera misewe soopiili iya tisoovirikana. Atthu antxipale ennathanla mphiro “wookhweya” mwaha wooweera, tiwookhweya weetta. Yooriipiha murima eri yooweera atthu antxipale ennivirelela weetta mphiro owo nave ennipaka itthu atthu antxipale empakaaya. Mene awo khansuwela weera mphiro owo, ti wa Satana nave nipuro mphiro owo onkelihaayawo ti onookhwani.—1 Akor. 6:9, 10; 1 Yoh. 5:19.

5. Atthu akina yaapanke heeni weera ephwanye mphiro “woophureya” nave ovirelela weetta mwemmo?

⁵ Mene mphiro “woophureya,” tiwoovirkina nave Yesu aahimme weera atthu antxipale “khenphwanya.” Mwaha wa heeni? Mwaha wa maprofeti oowootha. Nave tiyeeyo Yesu aawaraalinhaawe oohuseraawe. (Math. 7:15). Nave atthu akina ennahima weera sookhala ittiini sintxipale soovirikana nave ittiini iyo, sinhima weera sinxuttiha ekhaikhai. Nto mwaha wa yeeyo, atthu antxipale khensuwela ettiini heeni eri ya ekhaikhai mwaha wa ele ittiini iyo sinxuttihaaya. Mene onoowereya ophwanya mphiro onkeliha wookumini. Yesu enre: “Mwèmelá mwa nsu naka, muri vekhaikhai òhuser’aka ni muni musuwele ekhaikhai, ni ekhaikhai enokhaliheni anethi.” (Yoh. 8:31, 32) Wakhala weera nyuwo moophwanya ephiro yeekhaikhai nave moohiya otthara mphiro ethanliyaaya atthu antxipale, nyuwo mooreeriwa! Nyuwo moomuxuttera Biblya vantxipale nave mooxuttera ele Muluku onwehereraawe wa nyuwo weera mpake, ni moopatxera owiriyana nsu na Yesu. Mwa ntakihero, nyuwo mooxuttera weera Yehova, onweherera wa nyuwo weera musempeke sooxuttiha sa ittiini sa ethiru ni mweemexere otxa isataka seiyo sihinvarina ni ele Biblya onhimaawe. Mweekhaikhai, nyuwo mohoonelela weera mwannitthuneya ohiya itthu ikina nave opaka ele Yehova ontthunaawe, nnaamweera vareene wooxupa. (Math. 10:34-36) Apaale pooti weera waahooxupani opaka matxentxo a mweekumini. Nnaamweera vareene hiiho, nyuwo khamuhiyerenre, mwaha wooweera munnamusivela tiithiinyu Yehova nave muntthuna weera muhakalalihe murima awe. Mweekhaikhai Yehova onkela wiiteexa mwaha wa yoothanlaanyu!—Mir. 27:11.

6. Moovarihana ni Nsalmu 119:9, 10, 45, 133, eheeni ennikhavihera ovirelela weetta mphiro woophureya?

⁶ Eheeni eneera enikhavihere ovirelela weetta mmphironi moophureya? Nkuupuwelani ela. Misewe mikina sinkhala muttuttuwani kapena mmwaakoni ni mukherekhere mwa iphiro iyo, sinnaheliwa iyuuma sineera sinikhapelele weera nihipittuwe naari ovilikitthuwa. Mene sahaakhanle iyuuma iyo ikaaro naari neere, motoriista aamumpaka asidente—mweekhaikhai khaavo eera eere, iyuuma iyo khasinvareleya muteko. Emoha-moharu, iyuuma iyo sinvarelela mphiro siri ntoko miruku sa Yehova. Miruku iyo sinkhala ntoko naakihero seiyo iyuuma sa mmphiro sinvahaaya, Miruku iyo sinkhala ntoko sinoonivarelela weera niwere ovirelela weetta mmphironi moophureya.—Mmusome Nsalmu 119:9, 10, 45, 133.

7. Mwaha wa heeni amiravo ehintthuneyaaya wuupuwela weera ephiro yoophureya ti yoovaha muteko?

⁷ Waari weera nyuwo mmiravo, munoona weera miruku sa Yehova ti sootepaxa naari khasinoohiyani okhala ootaphuwa? Nto musuwele weera tiyeeyo Satana ontthunaawe weera muupuweleke. Owo ontthuna weera muupuweleke weera khamumpuha mweekumini mwaha weera khamuneetta ephiro yookhweya. Nave-tho onnaavarihela muteko ale munsomanaanyu oxikola ni mwinternetini weera yoopakihekeni wuupuwela eyo. Owo ontthuna  weera muupuweleke weera onvarela muteko Yehova ovaha muteko mweekumini. * Mene muhittiwale ela: Satana khantthuna weera moonelele weera okhwipi wa mphiro owo ti okhwa. Mene Yehova toohiyana, owo ontthuna weera moone otthuneya waya weetta ephiro yoophureya yeeyo enroiha weekumini.—Nsal. 37:29; Yes. 35:5, 6; 65:21-23.

8. Eheeni amiravo eneeraaya exuttere ni ele yaamukhumelenle Olaf?

⁸ Moone ele yaakhumelenle ni munna oneeriwa Olaf. * Ale aasomanaawe Olaf yannamunyesereriha vantxipale weera owo akonihana ni asimwali a exikola awe. Vaavo owo aathalinhaawe weera owo aari Namoona a Yehova ni aakhala moovarihana ni ele Biblya onxuttihaawe, asimwali akina yoona weera ele yaari yooxupa etokotoko. Awosa yaapaka ele enweraaya weera ekonane ni yoowo. Mene Olaf aavirelela  okhala oororomeleya nave khaapwantthe yooweerera ele nave yooweerera ele khiyaakhanle emoharu. Olaf onahima weera: “Aprusoore aka yaaheerera okiputthaputtha weera kirowele exikola etokweene yoouniversidade weera kikhale oottittimiheya ni oovuwa mweekumini.” Vano eheeni yaamukhavihenre Olaf ovirelela okhala oolipa? Owo onnaatxeerera oriki: “Etthu enkikhavihera ori opaka onthamwene woolipa ni asinna a mmulokoni ni awo yaari ntoko amusi aka. Nave tho kaapatxeriha omusoma Biblya. Vaavo miyo kaamusomaaka Biblya, kanniroromela weera kaaphwanya ekhaikhai. Mwa yeeyo, miyo kaahiithanlela onvarela Yehova.”

9. Eheeni nintthuneyaahu weera nipake weera nivirelele weetta ephiro yoophureya?

⁹ Satana ontthuna weera mukhume ephiro yeeyo enrowiha wookumini ni muthanle ephiro yeeyo eri “yoowaanuwa, yeeyo enroiha wookhwaani.” (Math. 7:13) Mene hiyo, nohiithanlela ovirelela wiiwa nsu na Yesu nave weetta mphiro woophureya, yoowo onnithokorora. Ninkela woona vaanaano itthu Yesu onirummaawe weera nipake.

10. Moovarina ni Matheyo 5:23, 24, eheeni Yesu aahimmaawe nintthuneyaahu weera nipake?

¹⁰ Mmusome Matheyo 5:23, 24. Yesu aahuuluma etthu yootepa otthuneya mpuwa mwa iversu iya voohima sa ekumi ya aYuda. Mweerere omuupuwela mutthu amukunxeene mwaamunama aakelaka onveleela wanamakeya. Voottharelana owo onnuupuwelela weera ookhala mutthu opahulannaaweno, nto owo onnamuhiya mwaamunama ole nave onnarowa ottantta wirana ni “mukhw’awe.” Mwaha wa heeni waatthuneyaawe opaka ele? Yaari yootthuneya mwaha wooweera onvaha mwaamunama Yehova khiyaakhanle etthu yootepaxa otthuneya ophwaha opaka murettele ni mutthu mukina. Yesu aahuuluma etthu ela moowiiwanyeya: “Orowe ni ottantte wirana ni mukhw’á.”

11. Muthalihe etthu Yakobe aapankaawe weera apake murettele ni tximweenaawe Esawu?

¹¹ Etthu yaakhumelenle ni Yakobe enoonixuttiha etthu yootepa otthuneya voohima sa opaka murettele. Sivirakaru iyaakha 20 moorakamelana ni nipuro aayarinwaawe, Yehova moorweela mwa nlaika aamuleela weera aamutthikela owannyawe aayarinwaawe. (Eph. 31:11, 13, 38) Mene naakhala nxupo, Esawu tximweenaawe oopatxera oyariwa, annatthuna omwiiva Yakobe. (Eph. 27:41) Yakobe “waamuriipa murima vantxipale ni woova” uupuwelaka weera tximweenaawe nlelo aamunyoonyeriwa. (Eph. 32:7) Vano Yakobe aawenre hayi opaka murettele nitximweenaawe? Woopatxerani, owo aapaka nivekelo wa Yehova ni murimaawe wootheene amuleelaka itthu sanvoreya. Voottharelanani owo aahoolowa matata nave anvaha tximweenaawe Esawu yoovaha. (Eph. 32:9-15) Okhwipi waya owo aarowa okumana ni Esawu nave Yakobe aapaka ele anweraawe weera amuttittimihe. Owo aakokhoora ohoolo wawe ohiya ekwaha emoha naari piili, mene ikwaha ithanu orwa piili [7]. Yakobe aawera opaka murettele ni tximweenaawe mmwaha wooweera owo aari oowiiyeviha nave aahoonihera nttittimiho.—Eph. 33:3, 4.

12. Eheeni ninxutteraahu ni ntakihero na Yakobe?

¹² Hiyo pooti oxuttera etthu yootthuneya mwaha wa ele Yakobe aapankaawe mwaha woopaka murettele ni tximweene awe Esawu. Yakobe aahiiyeviha nave aavekela nikhavihero wa Yehova. Voottharelana Yakobe aapaka ele aaweraawe, aani, aapaka ele aaweraawe weera akumane ni tximweene awe. Emaara aakumannaawe ni tximweene awe, owo kheerenre ohima weera aakhala ni erazau kapena hooye. Mene Yakobe etthu aasaasenraawe opaka,  waari opaka murettele ni tximweene awe nave eyo sika yaari yootthunaawe. Moota heeni hiyo nneeraahu nimutakihe Yakobe?

13-14. Ninkela opaka eheeni wakhala weera noomutthekela munnihu?

¹³ Weera nivirelele weetta mphiro onrowiha wookumini, onnitthunneya ovireleliha murettele ni asinnihu. (Arom. 12:18) Ninkha waakhala weera hiyo noomutthekela munnihu, eheeni nintthuneyaahu opaka? Ontthuneya otthara ntakihero na Yakobe, aani, wonvekela Yehova miruku ni nikhavihero. Hiyo ninvekele Yehova weera nipake murettele ni asinna.

¹⁴ Ninnitthuneya tho wiisunkera ehuhu weera niipakele makoho ntoko ala: ‘Keereke miyo onoowereya ohiya wiisunnuwiha ni okhala oowiiyeviha kivekelaka nlevelelo ni opaka murettele? Yehova ni Yesu yaakela woonela hayi wakhala weera miiva kohiithanlela opaka murettele ni munna naari murokora?’ Wiikoha haawo onkela onivaha ikuru weera niiwe nlove na Yesu nikhalaka oowiiyeviha naari naasaaseraka murettele ni asinnihu. Ni tihiihaawo nneeraahu ntthare ntakihero na Yakobe.

15. Moota heeni nneeraahu nipake ele onhimaawe Aefeso 4:2, 3 weera niwere opaka murettele ni munna?

¹⁵ Nyuwo munnuupuwelela etthu yeera ekhumelele waakhanle weera Yakobe ohiisunnuwiha akumanakaru ni tximweene awe Esawu? Aani, itthu khasaakela okhumelela nnene. Ti vawonto, wakhala weera nintthuna opaka murettele ni munna, onnitthuneya okhala oowiiyeviha. (Mmusome Aefeso 4:2, 3.) Buukhu a Miruku 18:19 oneera: “Munna òtthekeliwa ti òkhomala ntoko ekhwikwi [ecidade], ovanyihana ti mikokottelo sa eyuma.” Tivawo, ovekela nlevelelo moowiiyeviha onkela onikhavihera ohula mulako wa “ekhwikwi” eyo.

16. Eheeni nneerahu nuupuwelele vaavo ninkelaahu opaka murettele ni mutthu mukina ni mwaha wa heeni?

¹⁶ Onnitthunneya wuupuwelela nnene wa ele ninkelaahu othaliha wa munna nave moota woopaka eyo. Voottharana wakhala weera nohoona weera nri oolikaneene, onnitthuneya omwaasa munna owo nimunyoonyinhaahu ni opaka ele ninweraahu weera nihokoloxere onthamwene ahu. Ekhaikhai weera, ekwaha yoopatxera pooti onuulumela etthu yeera ehinisivele. Nto emaara ene eyo ti wookhwaya okhala ni esara ni weerera wiisaakiha. Mene nto opaka eyo khenkela onikhavihera. Mene nto muhittiwale ela: Opaka murettele ni munninyu  eri etthu yootepa otthuneya, ohiya waasaasera othaliha wa ole okhalanne erazau kapena ohikhanleno.—1 Akor. 6:7.

17. Eheeni muxuttenraanyu ni ntakihero na Gilbert?

¹⁷ Munna mmoha oneeriwa Gilbert wannitthuneya wiilipihera weera apake murettele. Owo oneera: “Miyo nkiiwanana ni mwanaka nwaamuthiyana. Miyo kaaviriha iyaakha piili keereraka otthekula ni mwanaka ole moomaaleleya ni opaka murettele.” Owo aapanke tho eheeni? Owo onnaatxeerera eeraka: “Kihinaakuveene orowa wuuluma ni mwanaka kannivekela, nave tho kannireherera muupuwelo aka wakhala weera owo aakela okuulumela mwasaava. Nave-tho miyo wannitthuneya weera kikhale oolevelela. Nave-tho miyo kaaxuttera weera khuwaareerela ohima waari weera kookhala ni erazau kapena hooye. Ni tho kaasuwela weera yaari yootthuneya ovireleliha murettele.” Gilbert tho onnathaliha etthu yaakhumelenle vahoolo vaya. Owo oneera: “Olelo va kinnoona weera kookhala ni murettele nave kinnoona weera kihiiraana ni etthoko aka yootheene.”

18-19. Wakhala weera noomunyoonyiha mutthu mukina, etthu heeni nneeraahu niithanlele opaka ni mwaha wa heeni?

¹⁸ Wakhala weera nohoonelela weera noomunyoonyiha munna eheeni nintthuneyaahu weera nipake? Onnitthuneya otthara miruku seiyo ovanhaawe nave opaka murettele. Mmuleeleke Yehova woohima sa mwaha owo nave muroromeleke weera munookhaviheriwa ni munepa wootteela woovireleliha murettele. Nto mwapaka eyo munoowera okhala oohakalala ni woonihera weera munnawiriyana nsu na Yesu.—Math. 5:9.

¹⁹ Onnitthuneya osuwela weera, mooreerela murima, Yehova onninvarihela muteko Yesu Kristu yoowo ori “muru wa ekereja [muloko].” (Aef. 5:23) Ntoko murummwa Pedru, Yakobe ni Yohani, hiyo tho onnitthuneya wiithanlela “owiriyana nsu” na Yesu. (Math. 17:5) Mpuwa mwa yoosoma ene yeela nohoona moota hiyo nneeraahu nipakeke murettele ni asinna. Wakhala weera noopaka eyo ni nnavirelela weetta ephiro yeeyo enrowiha weekumini, nnookela okhala oohakalala vaanaano, muhoolo nave ohakalala weiwo ohinrowa omala.