1, 2. ა) მუშ კეთება უზოჯ იეჰოვაქ იესოშ სუმ მოციქულს დო მუჭო მიაჸუნეს თე მითითებას? ბ) მუს გუვარჩიენთ თე სტატიას?

 ახ. წ. 32 წანას, პასექიშ უკულ მოციქულ პეტრე, იაკობ დო იოანექ სარკო ხილუაშ მოწმეეფქ იჸუეს. თინეფ მაღალ გვალაშა რდეს ეკულირ, სოდეთ ძირეს, მუჭო ითირ იესოქ. „თის სახე ჩხანაცალო ურწკინუნდჷ დო მიკაქუნალ სინთეცალო უვარკალანდჷ“ (მათ. 17:1—4). ხილუაშ ბოლოს თინეფქ ქიგეგონეს ღორონთიშ სიტყვეფ: „თენა რე ჩქიმ საჸოროფო სქუა, ნამუთ მიბწონე. თის ურჩქილით!“ (მათ. 17:5). თე სუმ მოციქულქ მუშ ცხოვრებათ დამტკიც, ნამდა ურჩქილედ იესოს. ჩქი მოკონა, მივაჸუნათ თინეფიშ მაგალითის.

² წოხოლენ სტატიაშე ქობძირით, ნამდა იესოშ ხონარიშ რჩქილა ნიშნენს მუდგარენეფიშ კეთებაშე ვარიაშ რაგადის. თე სტატიას გუვარჩიენთ ჟირ მხარეს, მუდგაშეთ იესოქ თქუ, ნამდა ოკო ვაკეთათ.

3. მუ ოკო ვაკეთათ, მუჭოთ თენა მათეშ 7:13, 14-შე იძირე?

³ წეკითხით მათეშ 7:13, 14. ყურადღება ქიმიაქცით, ნამდა იესო მიშინუანს ჟირ ჭიშკარს, ნამუთ ჟირ შხვადოშხვა შარაშა გიშმურს. ართ რე „ფართე“ შარა, მაჟია — „ჭიფე“; მასმა შარა ვა არსებენს. ჩქი პირადო ოკო გიშებგორათ, ნამ შარას გივაჸუნუთ. თენა ჩქინ ცხოვრებას არძაშ უმოს მნიშვნელოვან გადაწყვეტილება რე, მუშენდა თეშა რე დამოკიდებულ ჩქინ მარადიულ სიცოცხლე.

4. მუჭო ეჭარუნდით „ფართე“ შარას?

 ⁴ ირიათო ოკო ფშუდან თი განსხვავება, მუთ თე ჟირ შარა შქას რე. „ფართე“ შარას ბრელ გეჸუნს, მუშენდა თექ ადვილ რე გილულა. სანარღოთ, უმენტაშ თე შარას სქიდუ. თინეფს ვარჩქილენა, ნამდა სატანას ზუსტას თენა ოკო — გილართან შარას, ნამუთ ღურაშა მიჸონანს თინეფს (1 კორ. 6:9, 10; 1 იოან. 5:19).

5. მუ აკეთ ნამთინექ, ნამდა ქიმიოგორუკო „ჭიფე“ შარას დო ქიგიაჸუნკო თის?

⁵ „ფართე“ შარაშ გინაწონს, მაჟია შარა „ჭიფე“ რე დო იესოქ თქუ, ნამდა ხვალე ჭიჭე რაოდენობაშ კათას შეიალებედ, მიოგორუკო თის. საინტერესო რე, ნამდა უკულიან მუხლის თიქ მუშ მიმაჸუნალეფ გაფრთხილ ტყურა წინასწარმეტყველეფიშ გურშენ (მათ. 7:15). ნამთინე ფიქრენს, ნამდა რელიგიეფიშ უმენტაშ სიმართლეს ოგურუანს. მილიონობით ადამიანს თეშ გოუტახ გურ დო აბორჯჷ თეზმა რელიგიაქ, ნამდა შურო ვაცადნა სიცოცხლეშ შარაშ გორუას. მარა თენა შეიოლებერ რე. იესოქ თქუ: „ჩქიმ სიტყვას ქიმეჸუნთ-და, ნამდვილო ჩქიმ მოწაფეეფ რეთ. ქინანჭუთ ჭეშმარიტებას დო ჭეშმარიტება გუგათავისფალენა“ (იოან. 8:31, 32). თქვა ვეკაჸუნით უმენტაშის; თეშ მანგიორო, გეგმირკვით ჭეშმარიტება დო ქიდიჭყით ღორონთიშ სიტყვაშ ტომბაშე გურაფა, ნამდა ქიგეგითკო, მუს ითხინს თინა ჩქინდე. თეს გეძინელ, ურჩქილეთ იესოშ გურაფეფს. თქვა ბრელ მუდგარენ დიგურეთ, მაგალთო, თინა, ნამდა იეჰოვას ოკო, ვარია თქუათ ტყურა რელიგიეფიშ გურაფეფშე დო მიოტუათ თიცალ დღესასწაულეფიშ აღნიშნება, ნამუთ წარმართობაშე მოურს. თინა ხოლო გიჩქნა, ნამდა თეშ კეთება ვა რე ადვილ (მათ. 10:34—36). მარა ირნერო ოცადუთ, დითირათ ცხოვრება, მუშენდა გიჸორა თქვან ზეციერ მუმა დო გოკონა, გურ გუხარათ თის. იეჰოვას თენა მანგარო ოხიოლ (იგავ. 27:11).

6. მუჭოთ ფსალმუნიშ 119:9, 10, 45, 133-შე იძირე, მუ მიმეხვარებნა, ქუდოფსქიდათ ჭიფე შარას?

⁶ მუ მიმეხვარებნა, ქუდოფსქიდათ ჭიფე შარას? გუვარჩუათ მაგალით. გვალაშ ჭიფე შარეფს, ქირქეშ მხარეშე დამცავ ზღუდე რე გოჸუნაფილ, ნამუთ ადამიანეფიშ სიცოცხლეს თხილანს. მუშო ოკო რაგად, ნამთინ შოფერ ვა თქუანდჷ, ნამდა თე ზღუდე ოცილ თის. თეცალ რე ბიბლიას მოჩამილ იეჰოვაშ ნორმეფ ხოლო. თინა მოხვარნა, ქუდოფსქიდათ ჭიფე შარას (წეკითხით ფსალმუნიშ 119:9, 10, 45, 133).

7. მუჭო ოკო უჯინედან ახალგაზრდეფ ჭიფე შარას?

⁷ ახალგაზრდეფ, მინშა ხომ ვა ფიქრენთ, ნამდა იეჰოვაშ ნორმეფ გასაქანს ვა გარზენა? ზუსტას თენა ოკო სატანას, გოფიქრებაფუან. თის ოკო, ყურადღება თიშა გენგოღალაფუან, მუს ორთნა ფართე შარას გილულან თინეფ, მუშენდა ართ მეჯინათ თინეფს კმაყოფილებათ ეფშა ცხოვრება უღნა. სატანას ოკო, გოფიქრებაფუან, ნამდა ვა რეთ თიცალ ბედნერ, მუნერით თქვან სკოლაშ ამხანაგეფ ვარდა თი ხალხ რენა, მიდგას ინტერნეტით ორწყეთ დო თენა თიშენ, ნამდა მეჸუნთ იეჰოვაშ ნორმეფს. * მარა ვაგგოჭყორდან, ნამდა სატანა მუშ შარას გეჸუნან თინეფს უფულუნს, საბოლათ სოიშახ მიჸონანს თე შარა. თეშ გინაწონს, იეჰოვა არგამათ მეჩიებნა, მუნერ მომავალ ელნა თინეფს, მით ჭიფე შარას გეჸუნა (ფსალმ. 37:29; ეს. 35:5, 6; 65:21—23).

8. მუშ გურაფა შეულებნა ახალგაზრდეფს ოლაფიშ მაგალითშე?

 ⁸ გუვარჩუათ, მუშ გურაფა შეილებნა ახალგაზრდა ჯიმაშ, ოლაფიშ, მაგალითშე. * სკოლაშ ამხანაგეფ ოცადდეს, თინა უზნეობაშა გეიჸუნუესკო. მუჟამსით ოლაფიქ თინეფს გეუნწყჷ, ნამდა იეჰოვაშ მოწმეეფ ბიბლიაშ მაღალზნეობრივ ნორმეფით ცხოვრენა, ნამთინე თიშ კლასელ ძღაბიქ ხოლო უმოსო მინდომ თიშ მეჩილითაფა. თეშ უმკუჯინუო, ოლაფ მტკიცაშე გერდჷ. მარა თის ხვალე თე პრობლემა ვა უღუდ. თინა იჩიებ: „ჩქიმ მასწავლებერეფ ოცადდეს, დუმარწმუნესკო, უმაღლეს განათლება მიბღიკო. თინეფ მირაგადდეს, ნამდა შხვანერო ცხოვრებას წარმატებულ ვეპჸუაფუდ“. ოლაფ მეჩიებნა, მუქ მეხვარ თის, ქუგურზკო თე ირფელს: „კრებელეფწკუმა ხოლოშიან ურთიერთობა გუვავითარ. თინეფქ ოჯახცალო გინირთეს ჩქიმო. თეს გეძინელ, ქიდიბჭყჷ ბიბლიაშ უმოს სერიოზულო გურაფა. მუთ უმოს ტომბაშე იბრკვიენდჷ თის, თით უმოსო ბჯერდჷ, ნამდა  ჭეშმარიტებას ვორდჷ. შედეგო გინობჭყვიდ, ვემსახურკო იეჰოვას“.

9. მუ ოკო აკეთან თინეფქ, მიდგას ჭიფე შარას დოსქილადა ოკონა?

⁹ სატანას ოკო, მიგოტებაფუან სიცოცხლეშ შარას გილულა დო გეგნოიჸონან ფართე შარაშა, „ნამდგას ღურაშა მეჸუნს კოჩ“ (მათ. 7:13). მარა ჩქი ქუდოფსქიდუთ ჭიფე შარას, მუჟამსით გუვაგრძელენთ იესოშ რჩქილას დო თე შარას ჩქინ დამცველო მიფრჩქინანთ. მორთ ასე გუვარჩუათ შხვა მხარე, მუთ იესოქ მიწის, ნამდა ოკო ვაკეთათ.

10. მუჭოთ მათეშ 5:23, 24-ის მოჩამილ იესოშ სიტყვეფშე იძირე, მუ ოკო ვაკეთათ?

¹⁰ წეკითხით მათეშ 5:23, 24. იესოქ ეჭარ სიტუაცია, ნამუთ მანგარ მნიშვნელოვან რდჷ იუდეველეფშო. წერმიდგინით, პიროვნება მეულირ რე ტაძარშა დო მეჸუნაფილ აფჷ ცხოველ შესაწირო. მარა თე მომენტის გაშინე, ნამდა ჯიმას მუდგარენ უღჷ თიშ წინააღმდეგ, ათეშენ თინა იტენს მუშ მსხვერპლის დო მეურს თევრეშე. მუშენ იქციებ თაშ? მუ რე ღორონთშა მსხვერპლიშ შეწირუაშ უმოს მნიშვნელოვან? იესოქ არგამათ თქუ: „დიო სქან ჯიმას გერიგ“.

11. მუ აკეთ იაკობიქ, ნამდა მშვიდობა დირთინუკო ესავწკუმა?

¹¹ მშვიდობიან ურთიერთობაშ დორთინაფაშ ჯგირ მაგალითის მარზენა პატრიარქ იაკობ. ჸუდეშ დოტებაშე 20 წანაშ უკულ ღორონთიქ იაკობის უზოჯ, ნამდა დირთკო (დაბ. 31:11, 13, 38). მარა თენა ვა რდჷ ადვილ, მუშენდა უნჩაშ ჯიმას, ესავს, თიშ ჸვილუა ოკოდ (დაბ. 27:41). ესავ შილებე კინ გურმულირ ჸოფედკო, ათეშენ „მანგარო აშქურინ იაკობის დო სიმშვიდე მიოდინუ“ (დაბ. 32:7). მუ აკეთ იაკობიქ, ნამდა მშვიდობა დირთინუკო მუშ ჯიმაწკუმა? პირველ რიგის, თიქ ქილოც თე საკითხშენ. უკულ ბრელ საჩუქარ ქიმუჯღონ ესავს (დაბ. 32:9—15). საბოლათ, მუჟამსით ჯიმალეფქ ართმაჟიას ქეშეხვადეს, იაკობიქ პატიცემა გეგმირჩქინ თიშ მიმართ. თიქ ესავიშ წოხოლე ართშა დო ჟირშა ვარინ, შქვითშა დაშქვჷ ბირგულ. თანდაბლობაშ დო პატიცემაშ გიმორჩქინათ იაკობიქ მშვიდობა დირთინუ მუშ ჯიმაწკუმა (დაბ. 33:3, 4).

12. მუს ბგურაფლენთ იაკობიშ მაგალითშე?

¹² ჩქი მუს მოგურუანა თინა, მუჭო ემზადებუდ იაკობ მუშ ჯიმაწკუმა შეიოხვალამშა დო უკულ მუჭო შეხვად თის? იაკობიქ თანდაბლურო თხუ იეჰოვას მოხვარა, უკულ ლოცვაშ მიხედვით მიქცუ დო ნამ შეულებუდუნ ირფელ გაკეთ, ნამდა დირთინუკო მშვიდობა მუშ ჯიმაწკუმა. ართიანს ქეშეხვადესინ, იაკობის ვა დუჭყაფ თიშ გარჩიება, მი რდჷ მართალ დო მი — მტყუან. თიშ მიზან რდჷ, მშვიდობა დირთინუკო. მუჭო შემლებნა მივაჸუნათ იაკობიშ მაგალითის?

13, 14. თანამორწმუნეს ქუვოწყინეთ-და, მუ ოკო ვაკეთათ?

¹³ სიცოცხლეშ შარაშ გეჸუნა ქუმოკონან-და, მშვიდობა ოკო მიღდან და დო ჯიმალეფწკუმა (რომ. 12:18). მუ ოკო ვაკეთათ, მუჟამსით მეფხვადუთ, ნამდა თანამორწმუნეს ვოწყინებაფეთ? იაკობცალო შურდოგურით ოკო იბლოცათ. შემლებნა იეჰოვას ფთხუათ, აკურთხას ჩქინ მონდომა, ნამდა ჯიმაწკუმა ჯგირ ურთიერთობა დიფრთინუათ.

¹⁴ თეს გეძინელ, ჩქინ დუდ ოკო გეგმიბრკვიათ. შემლებნა ჩქინ დუდის ბკითხათ: „ქუვორექო მზათ, ჩეფთხინუე სიამაყე, თანდაბლურო ქიფთხუე პატიება დო დიფრთინუე ჯიმაწკუმა მშვიდობა? მუჭო იგინანა იეჰოვა დო იესო დუდის, მუჟამსით მა ნაბიჯის გეგნობდგუნქ თანამორწმუნეწკუმა  მშვიდობაშ დართინაფალო?“. ჩქინ პასუხეფქ შილებე გინმოჭყვიდირაფუან, ვურჩქილათ იესოს დო თანდაბლურო ქიმეფრთათ თანამორწმუნეშა, ნამდა ხე ქეშუნწყუათ მშვიდობას. თეშნერო შემალებენა, მივაჸუნათ იაკობიშ მაგალითის.

15. მუჭო მოხვარნა ეფესოელეფიშ 4:2, 3-ს მოჩამილ პრინციპ, დიფრთინუათ მშვიდობა თანამორწმუნეწკუმა?

¹⁵ წერმიდგინით, მუ მაჸუნუდ შედეგო, იაკობის მუშ ჯიმაწკუმა მტყუან დო მართალიშ გარჩიება ქუდუჭყაფუდკო. ალბათ თე შეხვალამა გვალო შხვანერო გეთებუდ. მუჟამსით თანამორწმუნეშა პრობლემაშ გურშენ ოჩიებშა მეურთ, ჩქი ხოლო იაკობცალო თანდაბლობა ოკო გეგმიფრჩქინათ (წეკითხით ეფესოელეფიშ 4:2, 3). იგავეფიშ 18:19-ს ბკითხულენთ: „გურელაჭვილ ჯიმაშა გამანგარებულ ქალაქშე უმოს ძნელ მიოულარ რე; ნამთინე უთანხმოება ციხესიმაგრეშ რაზეფს მოგენს“. პატიებაშ თანდაბლურო თხუალა მოხვარნა, „გემნოფრთათ ინორაზილ ციხეშა“.

16. მუშ გურშენ ოკო დეფიფქრათ დო მუშენ?

¹⁶ თეს გეძინელ, ოკო დეფიფქრათ, მუს დო მუჭო უწინთ ჩქინ ჯიმას. თე დროს ჩქინ მიზან ოკო რდას, ირფელ გუვაკეთათ, ნამდა ჯგირ ურთიერთობა დიფრთინუათ განაწყენებულ ჯიმაწკუმა. დუდშე თიქ შილებე თიცალ მუდგარენ ქომწუან, მუთ იშენდოიშენ სასიამოვნო მარჩქილაფარ ვა რე. თე დროს ადვილო შილებე გურქ მომრთან დო დუდიშ გამართლება ქიდიბჭყათ. მარა ქეშუნწყუნდუო თენა ხეს მშვიდობიან ურთიერთობაშ დორთინაფას? მუშო ოკო რაგად, ვარ! რშუდან, ნამდა ჯიმაწკუმა მშვიდობიან ურთიერთობაშ დორთინაფა უმოს მნიშვნელოვან რე, ვინემ თიშ დამტკიცება, მი რე მართალ დო მი — მტყუან (1 კორ. 6:7).

17. მუშ გურაფა შემლებნა ჟილბერიშ მაგალითშე?

¹⁷ ართ ჯიმა, ჟილბერ, ბრელს ხანდენდჷ, ნამდა ხე ქეშუნწყუკო მშვიდობიან ურთიერთობას. თინა იჩიებ: „ჩქიმ ოსურსქუაწკუმა მანგარო გილმელ ურთიერთობაქ. ჟირ წანაშე მეტ ხანს ვოცადუდ, ალალას დო მშვიდას დორაგადაფას, ნამდა კინ ჯგირ ურთიერთობა დიფრთინეკო თიწკუმა“. ხოლო მუ აკეთ ჟილბერქ? „ირ დორაგადაფაშ წოხოლე ბლოცულენდჷ დო თეშნერო ჩქიმ დუდის ვამზადენდჷ, ნამდა მდგომარეობაშე ვეგშამრთუმუდკო თიშ მწარე სიტყვეფიშ მორჩქილაფაშ დროს. საჭირო რდჷ, ქომპატიებუდკო  თიშა. ქიდიბგურე, ნამდა ჩქიმ პასუხიშმგებლობა, ჯგირ ურთიერთობაშ დორთინაფა რე დო მართალ ვორექინ თიშ დამტკიცებას ოკო ვევეცადე“. მუ რდჷ თეშ შედეგ? ჟილბერ იჩიებ: „ასე დუდის მშვიდას ბგინაფლენქ, მუშენდა ჯგირ ურთიერთობა მიღჷ ოჯახიშ არძა წევრწკუმა“.

18, 19. მითინს ქუვოწყინებაფეთ-და, მუშ კეთება ოკო მაფდან გინოჭყვიდილ დო მუშენ?

¹⁸ თაშ ნამდა, მუ ოკო გაფდან გინოჭყვიდილ, მუჟამსით ოწყინებაფუანთ თანამორწმუნეს? მიაჸუნით იესოშ მითითებას, ნამდა თიწკუმა მშვიდობა დირთინუათ. ქუდურაგადეთ იეჰოვას თე საკითხიშ გურშენ დო რჯერდან, ნამდა თინა წმინდა შურიშ საშვალებათ ქიმგეხვარებნა, ხე ქეშუნწყუათ მშვიდობას. თაშ გაკეთენთ-და, იჸუაფუთ ბედნერეფ დო ხოლო უმოსო ქაძირანთ, ნამდა ურჩქილეთ იესოს (მათ. 5:9).

¹⁹ მარდულეფ ვორეთ, ნამდა იეჰოვა კრებაშ დუდიშ, იესო ქრისტეშ, საშვალებათ ჸოროფათ მარზენა მითითებეფს (ეფეს. 5:23). მოციქულ პეტრე, იაკობ დო იოანეცალო მორთ გინოჭყვიდილ მაფდან, ურჩქილათ იესოს (მათ. 17:5). ჩქი ქობძირით, მუჭო შემლებნა თეშ კეთება თანაქრისტიანწკუმა მშვიდობაშ დორთინაფათ. თაშ ქიმიფქციებუთ დო ჭიფე შარას ქუდოფსქიდუთ-და, მიბღენთ ბრელ კურთხევას ამდღა დო მომავალს — მარადიულ ბედნერობას.