1-2. a) Ino raha nirahiny Zan̈ahary hataondro apostoly telo aby io, avio akory nataondro? b) Ino raha hidinihintsika ato?

TAFARANY Pasky tamy taon̈o 32, apostoly Petera ndreky Jakoba avio Jaona nahita fahitan̈a mahagaga. Tan̈abony bongo habo be zay iro taminio; mety mbala tohiny Bongo Hermona donko izio. Tiô fo sorany Jesosy nanjary nangilangilatra karaha masoandra, avio lambanany ambelan̈a nanjary nazava miran̈a jiro. (Mat. 17:1-4) Izikoa fa ho tapitry fahitan̈a io, iro naharen̈y feony Zan̈ahary nivolan̈a karaha ty: “Io Zanako ten̈a tiako, izy ankasitrahako. Tandrin̈esa izy.” (Mat. 17:5) Hita tamy fomba fiain̈anandro apostoly telo aby io fa nitandren̈y Jesosy ankitin̈y iro. Ke mba tiantsika halain̈a tahaka koa raha nataondro zen̈y.

² Hitantsika tamy lahatsoratra taloha in̈y fa, misy raha sasany mila ivolezantsika izikoa atsika mitandren̈y feony Jesosy. Fa hidinihintsika ato ndraiky raha aroe nivolan̈iny Jesosy fa mila ataontsika.

3. Koa Matio 7:13, 14 zahavan̈a, ino raha tokony hataontsika?

³ Vakia Matio 7:13, 14. Aleva onon̈o baka barô aroe nikoran̈iny Jesosy in̈y. Araiky ho izy mengo amy lalan̈a “malalaka”, fa araiky ndraiky mengo amy lalan̈a “maletry.” Tsisy fahatelony lalan̈a aby io, ke atsika tsy maintsy mifidy aia amindro roe io imboantsika. Io fanapahankevitry farany maventy tsy  maintsy ataontsika, izikoa atsika tihiain̈y mandrakizay.

4. Karakory ma lalan̈a “malalaka” io?

⁴ Aza adin̈a fa tsy miran̈a lalan̈a aroe io. Araiky “malalaka” mora handihanan̈a ke maro olo man̈an̈y. Mampalahelo fa maro olo man̈aradrôron̈o fo man̈araka lalan̈a io salakady tsy tihiala amizio. Tsy ikeny sain̈indro foeky fa Satana man̈ano raha handihanandro amy lalan̈a malalaka io, kanefa lalan̈a io mengo amy fahafatesan̈a.—1 Kor. 6:9, 10; 1 Jaona 5:19.

5. Akory nataonolo sasany nitady lalan̈a “maletry” io ndreky nan̈araka izio?

⁵ Jesosy ndraiky nivolan̈a fa vitsy fo olo mahita lalan̈a “maletry” io. Ino antony? Aleva onon̈o fa nampitandrin̈y pan̈aradia izy amy paminan̈y sandoko i Jesosy, aminy andininy man̈araka. (Mat. 7:15) Mandeha andrivony aby karazan̈a fivavahan̈a, ary ankamarozandro io miaboko mampianatra ny marin̈y. Ke maro olo manjary kivy, fotony efa tsy haindro eky aia ny ten̈a izy. Iro lastio efa tsy miezaka hitady lalan̈a mengo amy fiain̈ana foeky. Kanefa lalan̈a io ten̈a misy fa tsy raha niforomporôn̈iny. Karaha ty nambarany Jesosy: “Pianatranaka ankitin̈y anaro, izikoa tsy miala amy volan̈anaka. Anaro hahay ny marin̈y, ke ny marin̈y io hankafaka anaro.” (Jaona 8:31, 32) Derain̈y anao fotony anao tsy man̈aradrôron̈o fo fa ten̈a nitady ny marin̈y. Niezaka anao nianatra Volan̈a Zan̈ahary, ke hainao ino raha takiny amintsika. Nitandren̈y fampianaran̈any Jesosy koa anao. Ankoatranizen̈y, nianaranao koa fa mila miala amy fampianaran̈any fivavahan̈a diso atsika, avio tokony volezantsika iro fety ndreky fombafomba baka amy panompo sampy aby io. (Mat. 10:34-36) Mety tsy nora taminao nan̈aova fomba fiain̈ananao. Kanefa, nifen̈y fo anao niova fotony tianao Babanao andan̈itry an̈y, avio anao tihahazo sitraka aminany. Hay be fa ravoravo izy mahita ezaka jiaby ataonao!​—Ohab. 27:11.

6. Koa Salamo 119:9, 10, 45 ndreky 133 zahan̈a, ino raha han̈ampy atsika tsy hiala amy lalan̈a maletry io?

⁶ Ino raha han̈ampy atsika tsy hiala amy lalan̈a maletry io? Diniha baka ohatra ty. Matetiky, lalan̈a koa man̈aniky bongo na amy tany misy fampan̈a, tsy maintsy asian̈a valavala fo amy sisiny. Valavala io miaro tomôbily tsy ho latsaka amy fampan̈a. Ke tsy man̈ohatra mandeha marikitry izio foeky sofera. Ary tsisy sofera handeha hitretre fa mideranzy izy iro valavala aby io. Tsisy ny hafa amy valavala io koa toro lalan̈any Jehovah amy Baiboly, fotony izio man̈ampy atsika tsy hiala lalan̈a.—Vakia Salamo 119:9, 10, 45, 133.

7. Karakory mety fahitany tanora lalan̈a maletry io?

⁷ Ndraikindraiky, maro tanora mahatsapa fa mamehifehy iro fan̈arehan̈a taridalan̈any Jehovah, fotony tsy havitandro man̈ano zay raha tiandro hatao. Ary zen̈y edy raha tiany Satana hampidirin̈y amy jerinaro tanora. Karaha sambatra hely fahitan̈a iro olo aby man̈araka lalan̈a malalaka io, ke tiany Satana anaro han̈iry iro. Ataony koa raha hahavy anaro hatsiaro perty. Ampiasainy amy zen̈y olo lekaoly araiky aminaro na olo hitanaro aminy Internet. Tiany Satana anao hieritreritry fa tsy sambatra foeky olo man̈araka taridalan̈any Jehovah. * Tsaraova fa tsy tiany Satana ho hainolo foeky aia hiafaranolo man̈araka lalan̈a malalaka io. Jehovah ndraiky tsy karaha zen̈y, fotony ambarany anaro ino aby raha  tsara miambin̈y olo man̈araka lalan̈a maletry mandeha amy fiainan̈a.​—Sal. 37:29; Isaia 35:5, 6; 65:21-23.

8. Ino raha ianarany tanora baka aminy Olaf?

⁸ Diniha baka tantarany rahalahy tanora araiky ty, Olaf an̈arany. * Nampirisiky izy haloto fitondranten̈a tsaiky lekaoly araiky taminany. Nazavainy tamindro fa izy Vavolombelon̈o Jehovah, ke ten̈a raha maventy aminany man̈araka toro lalan̈any Baiboly momba fitondranten̈a. Tsaiky man̈angy sasany klasy araiky taminany koa fa naharen̈y zen̈y, iro samby nan̈ano vava fa ho vitandro fo hitaon̈o i Olaf han̈ano firaisan̈a amindro. Fa Olaf tsy nivadiky tamy raha efa hainy fa marin̈y. Tsy zen̈y fo raha niaretany. Karaha ty koa ho Olaf: “Papianatranay nampirisiky zaho hanohy fianaran̈a taminy iniversite, fotony tsy hajainolo zen̈y zaho izikoa tsy man̈ano zen̈y. Zen̈y koa ho iro fomba azahoako asa tsara ndreky be karama.” Ino raha nan̈ampy i Olaf hiaritry fitsapan̈a? Ho izy: “Nanjary nahazo naman̈a maro an̈ivony  fiangonan̈a zaho. Iro io efa miran̈a lafamìko. Nankatsaraiko koa fomba fianarako Baiboly. Arakaraka nan̈anaovako zen̈y, nahavy zaho nahairesy lahatra fo fa marin̈y raha nianarako tao. Ke tapakevitry hanompo Jehovah fo zaho.”

9. Ino raha mila ataonao, izikoa anao tsy tihiala amy lalan̈a maletry io?

⁹ Ataony Satana raha hahavy anao tsy han̈araka lalan̈a mengo amy fiain̈ana. Tiany han̈araka jerinolo amy donia ty anao, ke handeha amy lalan̈a “malalaka mandeha amy fandripahan̈a.” (Mat. 7:13) Ndray zen̈y, tsy hiala amy lalan̈a maletry io atsika izikoa mitandren̈y raha nivolan̈iny Jesosy. Ho voaro fo atsika izikoa tsy miala amy lalan̈a io. Atsika iziô hizaha raha hafa nivolan̈iny Jesosy fa tokony hataontsika.

10. Izikoa Matio 5:23, 24 zahavan̈a, ino raha tokony hataontsika ho Jesosy?

¹⁰ Vakia Matio 5:23, 24. Nisy raha maventy nikoran̈iny Jesosy tamindro Jiosy nitandren̈y izy aby io. Iritrireta hely baka, misy olo avy amy tempoly iô, efa pare izy han̈amia biby atao soron̈o. Izy hanôndro raha io tamy pisoron̈o in̈y, azony onon̈o fa mbala meloko aminany mare rahalahiny. Nambelany tiô biby handeha hatao sôron̈o io, baka io lôso izy nandeha. Han̈aia ma izy? Ino ma raha ten̈a matomboko mandilatra fan̈anaovan̈a sôron̈o io? Karaha ty ho Jesosy: “Mindao antsendriky mihavan̈a amy rahalahinao.”

11. Hazavà akory nataony Jakoba nihavan̈a tamy rahalahiny.

¹¹ Olo ten̈a tia fihavanan̈a i Jakoba, razambeny Israelita. Ke misy leson matomboko ianarantsika baka amy raha nataony. Efa kadiriny 20 taon̈o nialàny tamy tany faviany, fa tandraraiky, nampiasa anjely i Jehovah nan̈iraka izy himpody tan̈y. (Gen. 31:11, 13, 38) Fa nisy problemo. Niala tan̈y izy fotony Esao rahalahiny tseky hamono izy. (Gen. 27:41) ‘Tsy tafipetraka i Jakoba sady niasaloha mare’, fotony navozo izy tsao mbala meloko aminany fo zokilahiny io. (Gen. 32:7) Akory nataony Jakoba nihavan̈a tamy rahalahiny? Voanalohany, nivavaka mare izy, ke nikoran̈iny tamy Jehovah raha io. Faharoe, nandifasany kadô maro i Esao. (Gen. 32:9-15) Farany, iro koa fa tafitraotro, nataony raha han̈amezan̈a voninahitry zokiny io. Ke izy nankôhoko nan̈oloan̈a Esao, tsy indraiky, tsy indroe, fa impito aby! Jakoba ten̈a nanetry ten̈a sady nan̈aja i Esao, ke nanjary nihavan̈a tsara ndraiky iro roe mirahalahy.​—Gen. 33:3, 4.

12. Ino ma raha ianarantsika baka amy Jakoba?

¹² Ino raha ianarantsika baka amy Jakoba? Talohanizy hitraotro tamy rahalahiny, efa nidinihiny tsialohaloha raha handeha hivolan̈iny ndreky raha hataony. Nanetry ten̈a koa izy ke nangataka fan̈ampian̈a tamy Jehovah. Nan̈ano raha nifan̈araka tamy vavakanany izy, ke niezaka nihavan̈a tamy rahalahiny. Lera izy fanôjy taminy Esao, izy tsy nan̈azava tamy rahalahiny foeky azovy manan̈a ny marin̈y na azovy ny diso. Tanjon̈onany hihavan̈a amy rahalahiny. Akory hangalantsika tahaka raha nataony Jakoba zen̈y?

13-14. Ino raha tokony hataonao izikoa anao nan̈ano raha nampalahelo piaramanompo?

¹³ Izikoa atsika tihan̈araka lalan̈a mengo amy fiainan̈a, tia tsy tia, atsika tsy maintsy mihavan̈a amy piaramanompo. (Rom. 12:18) Ke izikoa azonao onon̈o fa nan̈ano raha nampalahelo piaramanompo anao, aleva tahaka Jakoba. Mivavaha baka Jehovah hitahy ezakanao hihavan̈a ndraiky amy rahalahinao.

 ¹⁴ Mila mandininten̈a koa atsika ndraikindraiky, ke han̈ontany ten̈a karaha ty: ‘Zaho ma mba man̈eky diso? Mba manetry ten̈a ma zaho ke mangataka azafady? Zaho ma mba von̈ono hihavan̈a edy? Mety han̈ano akory Jehovah ndreky Jesosy izikoa zaho man̈ano raha voanalohany hihavanan̈a amy rahalahiko na amy rahavaviko?’ Arakaraka fomba amaliantsika fan̈ontanian̈a aby io ahitantsika izikoa atsika mitandren̈y Jesosy avio manetry ten̈a ke man̈ano raha hihavanan̈a aminolo finoan̈a araiky amintsika. Zen̈y tsarabe modely napetrakany Jakoba.

15. Izikoa Efesianina 4:2, 3 zahan̈a, ino raha han̈ampy atsika hihavan̈a amy rahalahintsika?

¹⁵ Miniminia hely baka ty: Mety ho nan̈ano akory eky izikoa nan̈ambony ten̈a Jakoba taminizy nitraotro tamy rahalahiny? Mety vaky lagera donko! Izikoa misy raha tsy mampifankahazo atsika amy piaramanompo, mila manetry ten̈a atsika izikoa tihihavan̈a aminany. (Vakia Efesianina 4:2, 3.) Aminy Ohabolana 18:19 ao mivolan̈a karaha ty: “Sarotro azo mandilatra tanàna araiky avoakodidin̈y lakoro vato fatatra mare rahalahy araiky koa meloko mare; tsy fifankazahoan̈a sasany ndraiky miran̈a galan̈a vy fatao gadrany barô fidiran̈a amy tran̈o fatatra mare.” Miran̈a “tran̈o fatatra mare” fônolo manan̈a alahelo aminten̈a. Ho moramora aminany hihavan̈a aminten̈a izikoa anten̈a man̈ano azafady.

16. Ino koa raha tokony dinihintsika, baka io nan̈ino?

¹⁶ Mila dinihinao tsara raha handeha hivolan̈inao ndreky fomba hikoran̈anao amy piaramanompo tafintohin̈y taminao. Lera anao pare tsarabe, ataon̈a izy. Aza adin̈a fa tanjon̈onao, han̈ampody fihavanan̈anaro. Amy voanalohany, mety hivolan̈a raha tsy tianao ho ren̈y foeky izy, ke anao mety tihiaro ten̈a na ho meloko. Izikoa zen̈y raha ataonao, tsy hilamin̈y edy anaro. Aleva onon̈o fa hihavan̈a amy rahalahinao ny raha ten̈a maventy, fa tsy handeha han̈aboaka azovy manan̈a ny marin̈y na azovy ny diso.​—1 Kor. 6:7.

17. Ino raha mety ianaranao baka amy Rahalahy Gilbert?

¹⁷ Tsy maintsy nifen̈y mare Rahalahy Gilbert baka hanjary pampihavan̈a. Karaha ty ho izy: “Zahay roeny zanako man̈angy tiô tsy fankahazo foeky. Kadiriny taon̈o aroe zaho nifen̈y nikoran̈a taminany raha tan̈atiny fônaka ndreky niezaka ho kalma fo, baka zahay hihavan̈a.” Akory koa nataony Gilbert? “Alohany zaho hikoran̈a amy zanako io, efa  sakavy mivavaka ndreky man̈oman̈a jerinaka sandra zaho, amy zen̈y zaho tsy ho meloko izikoa izy tafivolan̈a raha mampameloko zaho. Nila von̈ono fo koa zaho han̈ambela hadisovan̈anany. Haiko eky iziô fa fihavanan̈a ny raha ten̈a maventy fa tsy fitakiako zònaka.” Ino vokany? Volan̈iny Gilbert: “Zioty, milamin̈y jerinaka fotony mihavan̈a tsarabe zahay jiaby fehiny.”

18-19. Izikoa atsika nan̈ano raha nampalahelo olo, tokony ho tapakevitry han̈ino atsika? Nan̈ino?

¹⁸ Tokony ho tapakevitry han̈ino anao izikoa azonao onon̈o fa anao nan̈ano raha nampaneloko piaramanompo? Areha torohevitriny Jesosy, ke man̈anaova raha hihavanan̈a. Koràn̈a amy Jehovah problemo io, avio matokisa fa fan̈ahy masin̈inany han̈ampy anao hanjary pampihavan̈a fo. Ho sambatra anao izikoa man̈ano zen̈y. Zen̈y koa fomba han̈aboahanao fa anao mitandren̈y Jesosy.​—Mat. 5:9.

¹⁹ Mankasitraka Jehovah mare atsika fotony izy ten̈a be fitiavan̈a. Mampiasa Jesosy Kristy “lohany fiangonan̈a” izy mitaridalan̈a atsika. (Efes. 5:23) Irarian̈a atsika ho tapakevitry ‘hitandren̈y izy’, karaha nataony apostoly Petera, Jakoba, baka io Jaona. (Mat. 17:5) Nianarantsika tato raha tokony hataontsika baka atsika hahavita hihavan̈a amy piaramanompo manan̈a alahelo amintsika. Izikoa atsika miezaka man̈ano zen̈y, tsy hiala amy lalan̈a mengo amy fiainan̈a foeky atsika. Tsy zen̈y fo fa, hahazo hatsaran̈a maro atsika rango zioty sady ho sambatra mandrakizay aminy amaray an̈y.